11/12/2025
စစ်ကိုင်းက စစ်ရှောင်သောင်းနဲ့ချီ တစ်နှစ်နီးပါးကြာ စစ်ဘေးရှောင်နေရတာကြောင့် စားနပ်ရိက္ခာအကူညီ လိုအပ်နေ၊
MN/MFP ၊ ဒီဇင်ဘာ - ၁၁
စစ်ကိုင်းတိုင်းအထဲက ကျေးရွာပေါင်း ၅၀ ကျော်က သောင်းနဲ့ချီတဲ့ဒေသခံတွေဟာ အခုနှစ်မတ်လကနေ ဒီဇင်ဘာလထိ ဆယ်လနီးပါးကြာ စစ်ဘေးတိမ်းရှောင်နေကြရပေမဲ့ ကူညီထောက်ပံ့မှုတွေ နည်းသွားတာကြောင့် စားနပ်ရိက္ခာ အကူအညီတွေ လိုအပ်နေတယ်လို့ ဒေသခံတွေက ပြောပါတယ်။
စစ်ကိုင်းနယ်ထဲက မင်းကွန်းတိုက်နယ် ကျေးရွာတွေနဲ့မတ်လကနေ လက်ရှိအချိန်အထိ စစ်အုပ်စုတပ်တွေက မကြာခဏ စစ်ကြောင်းထိုး စီးနင်းလုယက်မီးရှို့တာနဲ့ ဒေသခံတွေကို ဖမ်းဆီးတာတွေ လုပ်ဆောင်နေတာ ဖြစ်ပါတယ်။
ဒါ့အပြင် စစ်ကိုင်းမြို့အနောက်ဖက်၊ စစ်ကိုင်းနယ်အနောက်ခြမ်းနဲ့ မြောက်ခြမ်းက ကျေးရွာတွေကိုပါ စစ်ကြောင်းထိုး စီးနင်းလုယက်မီးရှို့တာနဲ့ ဒေသခံတွေကို ဖမ်းဆီးသတ်ဖြတ်တာတွေ ပိုတိုးလုပ်လာတာကြောင့် ဒေသခံတွေ ထွက်ပြေးတိမ်းရှောင်နေရတာလို့ မြေပြင်သတင်းရင်းမြစ်တွေက ဆိုပါတယ်။
လက်ရှိမှာ စစ်အုပ်စုက စစ်ကိုင်း-ဆားတောင်-ရွှေဘို လမ်းပိုင်းကို စီးနင်းထားပြီး လမ်းဘေးဝဲယာက ကျေးရွာတွေမှာ အထိုင်ချကာ နေအိမ်တွေကို ဖောက်ထွင်းလုယက်မီးရှို့နေတာကြောင့် ဒေသခံတွေ အများစု နေရပ်မပြန်နိုင်ကြသေးသလို စစ်ကိုင်းနယ်ထဲကို ကူညီထောက်ပံ့မှုတွေမလာတော့လို့ စစ်ရှောင်ပြည်သူတွေ အခက်ခဲဖြစ်နေတယ်လို့ စစ်ကိုင်းဒေသခံ သတင်းရင်းမြစ်တစ်ဦးက ပြောပါတယ်။
“ဆားတောင်သွားတဲ့ လမ်းတလျှောက်ကရွာတွေမှာလဲ (စခ)တွေက အကုန်ထိုင်ထားတာ။ မင်းကွန်းတိုက်နယ်မှာလည်း စစ်ကြောင်းထိုးနေသေးတယ်။ စစ်ကိုင်းမြို့အနောက်ဖက် ရေဝင်အရပ်က ရွာတွေကလည်း စစ်ကြောင်းထိုင်ထားတော့ ရှောင်နေရတုန်းပဲ။ အခု စစ်ရှောင်နေရတဲ့ ရွာတွေက ၅၀ ကျော်တယ်။ စစ်ဘေးရှောင်တွေက ပြန့်ကျဲနေတော့ လူဦးရေစာရင်းက အတိအကျ မရနိုင်ဘူး။ အခု စစ်ရှောင်တွေကို NUG ကလည်း မကူညီဘူး။ ပြည်တွင်းပြည်ပက အလှူရှင်တွေလည်း မလာတော့ဘူး။ ဒေသခံပြည်သူတွေအချင်းချင်းပဲ ကူညီစောင့်ရှောက်ပေးနေရတာ”
စစ်ကိုင်းမြို့နယ်မှာ ကျေးရွာအုပ်စုပေါင်း ၈၀ ကျော်အထဲက ၅၀ ကျော်မှာနေထိုင်တဲ့ သောင်းနဲ့ချီတဲ့ ဒေသခံတွေဟာ ၁၀ လကျော်ကြာ တောတောင်တွေထဲမှာ စစ်ဘေးတိမ်းရှောင်နေကြရတာ ဖြစ်ပါတယ်။
ပြီးခဲ့တဲ့ နိုဝင်ဘာလကလည်း စစ်ကိုင်းနယ်နဲ့ဝက်လက်နယ်ထဲက ကျေးရွာတွေကို စစ်ကြောင်းထိုးပြီး လူသတ်၊ လုယက်၊ မီးရှို့ခဲ့ရာမှာလည်း နေအိမ်တွေမီးရှို့ဖျက်ဆီးတဲ့အပြင် ဒေသခံတောင်သူတွေ စိုက်ပျိုးထားတဲ့ စပါးခင်းတွေကိုပါ မီးရှို့သွားတယ်လို့ ဒေသခံတစ်ဦးက ဆိုပါတယ်။
“ဆားတောင်ဘက်ကနေ ဝက်လက်ဘက်ကို ပြီးခဲ့တဲ့လပိုင်းက ထိုးသွားတဲ့ စစ်ကြောင်းက လူသတ်၊ မီးရှို့ အကုန်လုပ်သွားတာ။ စပါးခင်းပါမချန်ဘူး ရှို့သွားတာ။ လယ်ယာလုပ်လို့ရသေးတဲ့ ကျေးရွာတွေက စစ်ရှောင်တွေက အဆင်ပြေသေးပေမဲ့ (စခ)တွေ ခဏခဏ ဝင်မွှေတာနဲ့ အထိုင်ချထားတဲ့ကျေးရွာတွေက ပြည်သူတွေကတော့ လယ်ယာလည်း လုပ်ကိုင်စားသောက်လို့မရတော့ အစစအရာရာ ခက်ခဲကြတာပေါ့”
စစ်ကိုင်းနယ်မြောက်ခြမ်းနဲ့ မင်းကွန်းတိုက်နယ်ကျေးရွာတွေကနေ ကိုယ်လွတ်ရုန်းထွက်ပြေးခဲ့ရတဲ့ စစ်ရှောင်ပြည်သူတွေဟာ လက်ရှိအချိန်ထိ စစ်အုပ်စု စစ်ကြောင်းထိုးနေတာကြောင့် နေရပ်မပြန်ရသေးတဲ့အပြင် ကူညီထောက်ပံ့မှုတွေမရတာကြောင့် ကြုံရာကျပန်းအလုပ်တွေကို လုပ်ကိုင်နေရတယ်လို့လည်း စစ်ရှောင်ပြည်သူတွေက MFP ကို ပြောဆိုထားပါတယ်။
စစ်အုပ်စုက ပြီးခဲ့တဲ့ မတ်လကနေ နိုဝင်ဘာလထိ စစ်ကိုင်း-ရွှေဘို ကားလမ်းဘေးက ကျေးရွာတွေဖြစ်တဲ့ ရုန်းပင်ကန်၊ ဝက်သားပုတ်၊ သစ်ချိုကုန်း၊ ပုဂံတူ၊ ကျော်ဇေယျာ၊ ရင်းမကျင်း၊ လင်းတလူး၊ ချိုင်းကြီး၊ ထန်းဖူးတော၊ ရွာသစ်၊ ကျားမင်းကြီး စတဲ့ ရွာပေါင်း ၁၀ ရွာကျော်က နေအိမ်ပေါင်း ထောင်နဲ့ချီ မီးရှို့ဖျက်ဆီးထားသလို စစ်ကိုင်းနယ်မြောက်ခြမ်းနဲ့အရှေ့ခြမ်းရှိ တလိုင်း၊ စဉ့်ကိုင်(တောင်-မြောက်)၊ ကင်း၊ ချောင်းမကြီး၊ မင်းကွန်းတောင်ရွာ၊ ရှားရောင်း၊ မဲဇလီချောင်း၊ လက်ပံ စတဲ့ ကျေးရွာပေါင်း ၁၀ ရွာကျော်နဲ့ စစ်ကိုင်းမြို့အနောက်ဘက်က ကျေးရွာတွေအပါဝင် စုစုပေါင်း ကျေးရွာ ၃၀ ထက်မနည်းကို စီးနင်းလုယက်မီးရှို့ဖျက်ဆီးခဲ့တယ်လို့ စစ်ရှောင်အရေးကူညီနေသူတွေက ဆိုထားပါတယ်။
MFP ရဲ့ သတင်း၊ ဆောင်းပါးနဲ့ ရုပ်သံတွေကို ယူကျူ့နဲ့ တယ်လီဂရမ်မှာလည်း ကြည့်နိုင်ပါတယ်။
#အညာ #စစ်ကိုင်း #မန္တလေး #မကွေး
