01/02/2018
"နိုင်ငံတော်၏အတိုင်ပင်ခံပုဂ္ဂိုလ်နှင့်သူ၏ပိုင်ဆိုင်မှုများကို ကာကွယ်စောင့်ရှောက်သည့်ဥပဒေ" ပြဌာန်းမည်
◼◼◼◼◼◼◼◼◼◼◼◼◼◼◼◼◼◼◼◼◼◼◼
မကြာသေးမီက ဖြစ်ပွားခဲ့သော မီးရှို့ထားသော ဓာတ်ဆီပုလင်းဖြင့် နေအိမ်ကို တိုက်ခိုက်ခံရသည့် ဖြစ်ရပ်ကြောင့် နိုင်ငံတော်၏ အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နှင့် သူ၏ နေအိမ်အပါအဝင် ပိုင်ဆိုင်မှုများကို ကာကွယ်စောင့်ရှောက်ရန် ဥပဒေတစ်ရပ် လိုအပ်လာပြီ ဖြစ်ကြောင်း အမျိုးသားဒီမိုကရေစီအဖွဲ့ချုပ်ကို ဝန်းရံသူများက တောင်းဆိုသည့် အကြံပြုစာများကို အစိုးရအဖွဲ့က လက်ခံရရှိခဲ့ရာ အခုလို အကောင်အထည်ဖော်ရန် စီစဉ်လိုက်ရခြင်း ဖြစ်ကြောင်း သိရှိရသည်။ လွှတ်တော်ကိုယ်စားလှယ်တစ်ဦးမှ တစ်ဆင့် ပြည်ထောင်စု လွှတ်တော်တွင် အဆိုတင်သွင်းပြီး အတည်ပြုပြဌာန်းမည့် အဆိုပါ ဥပဒေတွင် အငြင်းပွားစရာများ ရှိနေခဲ့ပါသည်။
"ဒီဓာတ်ဆီပုလင်းအမှုကို သုံးသပ်ရရင် ပြိုင်ဘက်အုပ်စု ကြံ့ခိုင်ရေးနဲ့ အတိုက်အခံ မဘသကို ရည်ရွယ်တဲ့ နိုင်ငံရေးလုပ်ကြံမှုလို့ ကျွန်တော့် အနေနဲ့ သုံးသပ်တယ်....၊ လက်ရှိ အနေအထားအရ အာဏာရပါတီက အန်နံဒီပါတီဖြစ်နေပြီး ကြံ့ခိုင်ရေးပါတီက အတိုက်အခံပါတီ ဖြစ်နေတယ်လေ...၊ အဲ့ဒီလို အချိန်မှာ အာဏာရပါတီအကြီးအကဲရဲ့ လူမနေတဲ့ နေအိမ်ကို ဓာတ်ဆီပုလင်းနဲ့ ပစ်တယ်ဆိုတော့ ဒါဟာ တစ်ဘက်က အတိုက်အခံအင်အားစုတွေကို နာမည်ဖျက်ချင်လို့ လုပ်တဲ့ လုပ်ရပ်ပဲ...၊ တကယ်က ဒေါ်အောင်ဆန်းစုကြည်ကို လုပ်ကြံချင်တာ မဟုတ်ဘူး..၊ လုပ်ကြံဖို့ ရည်ရွယ်ချက်ရှိရင် ဓာတ်ဆီပုလင်းလေးနဲ့ ဘာလို့ ပစ်နေမလဲ...၊ စနိုက်ဘာနဲ့ ခေါင်းကို ပစ်တော့မပေါ့ ...၊ သက်သက်မဲ့ ကြံ့ခိုင်ရေးနဲ့ မဘသတို့က လုပ်ခိုင်းသလိုလို ဖြစ်အောင် ပုံဖော်တာ...၊ ပြောရရင် ပြိုင်ဘက်တွေကို နာမည်ဖျက်ဖို့ နှိပ်ကွပ်ဖို့ အာဏာရပါတီ ကိုယ်တိုင်က သူ့အိမ်သူ ဓာတ်ဆီပုလင်းနဲ့ ပြန်ထုခိုင်းတဲ့ နိုင်ငံရေးလုပ်ကြံမှုပဲ...၊ ဟော အခုကြည့် ဥပဒေထွက်လာပြီ... ၊ နိုင်ငံတော်၏ အတိုင်ပင်ခံပုဂ္ဂိုလ်နှင့် သူ၏ပိုင်ဆိုင်မှုများကို ကာကွယ်စောင့်ရှောက်သည့် ဥပဒေတဲ့ ....၊ စဉ်းစားကြည့်လေ...၊ ပိုင်ဆိုင်မှုဆိုတဲ့ အထဲမှာ နေအိမ်တင်မကတော့ဘူး..၊ ဘဏ်အပ်ထားတဲ့ ငွေတွေကအစ သူ့စပ်စမိုင်နာအဆုံး ပါဝင်တယ်...၊ ပြောရရင် သူ့ဘဏ်အကောင့်ထဲမှာ ငွေတွေ ဘယ်လောက်တောင် ခိုးထည့်ထားလို့ ကာကွယ်ပေးဖို့ လိုအပ်နေသလဲ မပြောတတ်ဘူး၊ ဖြစ်နိုင်ချေက ၂မျိုးပဲ ရှိတယ်၊ ပထမက ပြိုင်ဘက်တွေကို နိုင်ငံရေးအရ လုပ်ကြံချင်လို့ ဒါမှမဟုတ် ဒုတိယက သူ့ရဲ့ မဖုံးနိုင် မဖိနိုင် ကြွယ်ဝလာတဲ့ ငွေကြေးတွေကို ကာကွယ်ဖို့ လိုကို လိုနေလို့ ဒီဥပဒေကို ပြဌာန်းတာ ၊ အဲ့ဒီလို ပြဌာန်းဖို့အတွက် အကြောင်းပြချက် ကောင်းကောင်းရအောင် ဒီဓာတ်ဆီပုလင်း အမှုကို ကာယကံရှင် ကိုယ်တိုင် ဖန်တီးတာပဲ ..၊ အဲ့သလို မြင်ပါတယ်"
ဟု ပြည်သူတစ်ဦးက မှတ်ချက်ပေးသည်။ ဥပဒေကြမ်းတွင် အတိုင်ပင်ခံပုဂ္ဂိုလ်ကို တစ်စုံတစ်ရာ စိတ်ပိုင်းဆိုင်ရာ အနှောက်အယှက်ပေးရန် သို့မဟုတ် အသက်နှင့်ခန္ဓာကို ပြင်းပြင်းထန်ထန်ဖြစ်စေ၊ အခြားသော အကျိုးတစ်စုံတစ်ရာ ထိခိုက်နစ်နာစေရန်ဖြစ်စေ ၊ မရွှေ့ပြောင်းနိုင်သော ပိုင်ဆိုင်မှုကို ဖြစ်စေ၊ ရွေ့ပြောင်းနိုင်သော ပိုင်ဆိုင်မှုကို ဖြစ်စေ သို့မဟုတ် အဆိုပါပိုင်ဆိုင်မှုများနှင့် စပ်ဆက်၍ ဖြစ်စေ၊ တိုက်ခိုက်ရန်၊ အကြမ်းဖက်ရန်၊ ဖျက်ဆီးရန်၊ ထိခိုက်နစ်နာစေရန် ပြောဆို ကြံစည်သည် ၊ ရည်ရွယ်သည်၊ အားထုတ်သည်၊ အားပေးသည်၊ ဟောပြော ၊ ရေးသား၊ လှုံဆော်သည်၊ သို့မဟုတ် ပူးပေါင်းပါဝင်သည်ဟု တိုင်ကြားခံရလျှင် သို့မဟုတ် တာဝန်ရှိသူက သံသယရှိလျှင် ရဲအရေးပိုင်အမှုအဖြစ် ဖမ်းဆီးထိမ်းသိမ်းခွင့် ရှိသော အာမခံ လုံးဝ မရသည့် ၆၆(ဃ)ကဲ့သို့ ဥပဒေ ဖြစ်သည်။ ပို၍ သာလွန်သွားသော အချက်မှာ အကယ်၍ အမှုမခိုင်လုံ၍ လွတ်မြောက်ခဲ့လျှင် မိမိအား တိုင်ကြားစွဲဆိုသူကို ၆လအတွင်း တန်ပြန် တရားစွဲဆိုခွင့် မရှိခြင်း ဖြစ်သည်။ အနည်းဆုံး ပြစ်ဒဏ် ၆လမှ အများဆုံး ၇နှစ်အထိ ပြင်းထန်သည်။
Tiloka Daily
တိလောကဂျာနယ်
