23/04/2025
ငပု က ပြောသေးတယ်၊ ဘာတဲ့၊ တရုတ်ဟာ ကျေးဇူးရှင်၊ တရုတ်ကို အပြစ်မပြောရန် သတိပေးတယ် ဆိုပဲ။
မြန်မာစစ်တပ်အတွက် ဖျောက်ဖျက်မရတော့သည့် ရှက်စရာအကောင်းဆုံး နေ့ရက်
ဧပြီ ၂၂၊ ၂၀၂၅
တရုတ်၏ မြန်မာ့အရေး ဗြောင်ကျကျ ဝင်ရောက်စွက်ဖက်မှု ရလဒ်အနေဖြင့် ကိုးကန့် MNDAA တပ်များ ယခုရက်ပိုင်းအတွင်း လားရှိုးမြို့မှ အပြီးတိုင်ပြန်လည်ထွက်ခွာရတော့မည်ဖြစ်သည်။ မြေပြင်တွင်လည်း ပြီးခဲ့တဲ့ရက်ပိုင်းများကစ၍ MNDAA တပ်သားများ ကားကြီးကားငယ်အသွယ်သွယ်နှင့် သိန္ဒီမြို့ဖက်ကို ပြန်လည်ဆုတ်ခွာသွားခဲ့ကြပြီး၊ ဌာနဆိုင်ရာအဆောက်အအုံများတွင် လွှင့်ထူထားသည့် MNDAA အလံများကိုလည်း ပြန်လည်ဖြတ်ချသွားခဲ့ပြီဖြစ်သည်။
ယနေ့နေ့လည်ပိုင်းတွင်တော့ ရာထောင်ချီသော စစ်ကောင်စီတပ်သားများကို တင်ဆောင်လာသည့် စစ်မော်တော်ယာဥ်တန်းများ လာရှိုးမြို့ထဲသို့ ဝင်ရောက်လာခဲ့ကြသည်။ ထိုသို့ အလံတလူလူလွှင့်ကာ စစ်ကားများ လားရှိုးမြို့ထဲ ဝင်ရောက်လာပုံကို စစ်တပ်ထောက်ခံသူများက ဂုဏ်ယူဝင်ကြွားစွာ ရေးသားဖော်ပြနေကြသည်ကို တွေ့ရသည်။
အထူးသဖြင့် “တနေ့ကျရင် ရမခကို ပြန်လည်ရမယ်လို့ ယုံကြည်ထားသည့်အတိုင်း ပြန်ရပြီ” ဟု စစ်ကောင်စီထောက်ခံသူများက ဝမ်းခေါင်းသံကြီးများနှင့် တယ်လီဂရမ်တွင် ကြုံးဝါးခဲ့ကြသည်။
ထိုသို့ လားရှိုးမြို့ စစ်ကောင်စီလက်ထဲ ပြန်ရောက်ခဲ့သည်မှာ အမှန်ပင်ဖြစ်သည်။ သို့သော် ၄င်းတို့ကြုံးဝါးထားသည့် အဆိုပါလားရှိုးမြို့ကို တပ်မတော်ဟု ၄င်းတို့ခေါ်ဆိုကြသည့် မြန်မာစစ်တပ်က စွမ်းစွမ်းတမံ တိုက်ခိုက်သိမ်းယူခဲ့ခြင်းတော့မဟုတ် … ရိုးရှင်းစွာပြောရလျှင် တရုတ် ထွင်းဖောက်ပေးခဲ့သည့် ခွေးတိုးပေါက်မှတဆင့် ဂုဏ်သိက္ခာမဲ့စွာ ပြန်လည်ဝင်ရောက် သိမ်းယူသွားခြင်းပင်ဖြစ်သည်။
ယခင်လများအတွင်း လားရှိုးမြို့ မပြောနှင့် … ပြင်ဦးလွင်မြို့ပြင်လောက်တွင်သာ တပ်စွဲနိုင်တော့သည့် စစ်တပ်အနေဖြင့် တရုတ်နိုင်ငံ၏ မြန်မာ့အရေး ဗြောင်ကျကျ ဝင်ရောက်စွက်ဖွက်မှုကြောင့်သာ ယခုကဲ့သို့ လားရှိုးမြို့ကို ခပ်တည်တည်နှင့် နောက်ဖေးပေါက်က ဝင်ရောက်လာနိုင်ခြင်းလည်း ဖြစ်သည်။
စစ်ပွဲအလီလီကို အနိုင်ယူခဲ့သည်ဆိုသည့် စစ်တပ်သည် ပြည်သူပါဝင်သော တော်လှန်ရေးတွင် ၄င်းတို့၏ စစ်တိုင်းဌာနချုပ် ရမခရှိရာ လားရှိုးမြို့ကို ရက်ပိုင်းအတွင်း လွယ်လင့်တကူ ဆုံးရှုံးခဲ့ခြင်းဖြစ်ပြီး၊ ထိုနေ့မှစ၍ ယခုရက်ပိုင်းအထိ လားရှိုးမြို့ကို အနားပင်မကပ်နိုင်အောင် လုံးလုံးလျားလျား ဆုံးရှုံးခဲ့ခြင်းလည်းဖြစ်သည်။
အချုပ်အားဖြင့် ပြည်ပအားကိုး ပုဆိန်ရိုးဟု ဆိုကာ အတိုက်အခံများကို တစိုက်မတ်မတ် တိုက်ခိုက်ချေမှုန်းခဲ့သည့် မြန်မာစစ်တပ်သည် လက်တွေ့တွင် ပြည်ပတရုတ်အားကိုးဖြင့် လားရှိုးမြို့ကို ပြန်လည်ဝင်ရောက်လာနိုင်ခဲ့သည်။
ကိုယ်ပိုင်အရည်အချင်းကြောင့် မဟုတ်ဘဲ တိုင်းပြည်၏ အချုပ်အခြာကို စတေးပြီး တရုတ်ကို ဒူးထောက်ခယကာ လားရှိုးမြို့ကို ပြန်လည်ဝင်ရောက်ခဲ့သည့် ယနေ့သည် မြန်မာစစ်တပ်အတွက် အရှက်ရဖွယ်ရာ အကောင်းဆုံးနေ့တနေ့သာ ဖြစ်ပေတော့သည်။
