26/07/2026
စစ်ရှောင်စခန်းမှ အမျိုးသားတစ်ဦး ၎င်း၏ လည်ပင်းကို ၎င်းကိုယ်တိုင် လှီးဖြတ် သတ်သေ။
7 Stars News- ၂၆ ဇူလိုင် ၂၀၂၆။
ကချင်ပြည်နယ်၊ မိုးမောက်မြို့နယ်၊ လော့ဒန်ကျေးရွာ၊ ပါကထောင် (Pa Kahtawng) စစ်ရှောင်စခန်းမှ အမျိုးသားတစ်ဦး ၎င်း၏လည်ပင်းကို ကိုယ်တိုင်လှီးဖြတ်ပြီး သတ်သေသွားခဲ့ကြောင်းသိရသည်။
ဖြစ်စဉ်မှာ ပါကထောင် စစ်ရှောင်စခန်းတွင် နေထိုင်သော ဦးလဆန်အဖူနှင့် ဒေါ်မရစ်ကော့တို့၏သား ဖြစ်သူ ဦးလဆန်လန်သာ အသက် (၃၁)သည် ယမန်နေ့ ဇူလိုင်လ (၂၅)ရက်နေ့ညတွင် ဦးလဖိုင်နန်လုံ၏ နေအိမ်တွင် သူငယ်ချင်းများနှင့် အိပ်နေကျစဉ် ညသန်းခေါင်အချိန်၌ သေဆုံးသူ ဦးလဆန်လန်သာမှ ကယောင်ခြောက်ခြား အော်ဟစ်လာပြီး ည (၂)နာရီခွဲခန့်အချိန်တွင် ဓားတစ်ချောင်းကို ကောက်ယူကာ မိမိကိုယ်မိမိ လည်ပင်း လှီးဖြတ်ကာ ထိုဒဏ်ရာဖြင့် သွေးထွက်လွန်ကာ သေဆုံး သွားခဲ့ကြောင်း သိရသည်။
“ ည (၁၂)နာရီလောက်မှာ သေဆုံးသူက အိမ်အပြင်ကနေ အော်ဟစ် ဆူညံသံတွေကြားတယ်လို့ ပြောပြီး အိမ်ထဲ ဝင်လိုက် ထွက်လိုက်လုပ်နေခဲ့တယ်၊ ည (၂)နာရီခွဲတော့ အိမ်ရှင် ဦးလဖိုင်နန်လုံတို့အိမ်မှာရှိတဲ့ ဓားနဲ့ပဲ ကိုယ့်ကိုယ်ကို လည်ပင်း လှီးယူခဲ့တယ်။”ဟု သတင်းရင်းမြစ်တစ်ဦးက 7Stars Newsကို ပြောသည်။
သေဆုံးသူသည် အရင်ကတည်းကပင် စိတ်ဝေဒနာ ခံစားနေရသူဖြစ်ပြီး တခါတရံ ၎င်း တယောက်ထဲ စကားပြောဆိုနေတတ်သူဖြစ်ကြောင်း နီးစပ်သူများထံမှ သိရသည်။
ထို့အပြင် သေဆုံးခါနီး ရက်ပိုင်းတွင်လည်း အပြင်းဖျားနာနေကြောင်းနှင့် သေဆုံးသွားသည့်ညတွင် အရက်သေစာ သောက်စားထားခြင်းများ မရှိကြောင်း သိရသည်။
၎င်း၏ သေဆုံးမှုနှင့် ပတ်သက်၍ ပါကထောင် (Pa Kahtawng) စစ်ရှောင်စခန်းမှ တာဝန်ရှိသူများနှင့် စစ်ရှောင်စခန်း ကော်မတီဝင်များမှ တာဝန်ယူ ဖြေရှင်းပေးနေကြပြီဖြစ်ကြောင်းကို သိရသည်။
