23/08/2025
▪︎ 𝙱𝚊𝚝 𝙼𝚒 𝙻𝚊𝚖𝚊𝚗 𝙽𝚊 𝙰𝚑𝚔𝚢𝚊𝚔 𝙰𝚒 𝚂𝚑𝚒𝚐𝚊 (ကချင်အစီအစဉ်ဖြစ်ပါတယ်)
𝗛𝗽𝗮𝗸𝗮𝗻𝘁 𝗚𝗶𝗻𝗿𝗮 𝗗𝗲 𝗚𝘂𝗺𝘀𝗵𝗲𝗺 𝗛𝗽𝘆𝗲𝗻 𝗗𝗮𝗽 𝗛𝗽𝘆𝗲𝗻 𝗡-𝗴𝘂𝗻 𝗕𝗮𝗶 𝗝𝗮𝘁 𝗟𝘂𝗻𝗴 𝗪𝗮
𝗕𝗮𝘁 𝗦𝗵𝗮𝗴𝘂 𝗟𝗮𝗺𝗮𝗻𝗴. 𝗕𝘆 𝗞𝗪 (𝗡𝗮𝘄 𝗔𝘄𝗻). 𝟮𝟯 𝗔𝘂𝗴𝘂𝘀𝘁 𝟮𝟬𝟮𝟱
▪︎ 𝙱𝚊𝚝 𝙼𝚒 𝙻𝚊𝚖𝚊𝚗 𝙽𝚊 𝙰𝚑𝚔𝚢𝚊𝚔 𝙰𝚒 𝚂𝚑𝚒𝚐𝚊 (ကချင်အစီအစဉ်ဖြစ်ပါတယ်)
𝗛𝗽𝗮𝗸𝗮𝗻𝘁 𝗚𝗶𝗻𝗿𝗮 𝗗𝗲 𝗚𝘂𝗺𝘀𝗵𝗲𝗺 𝗛𝗽𝘆𝗲𝗻 𝗗𝗮𝗽 𝗛𝗽𝘆𝗲𝗻 𝗡-𝗴𝘂𝗻 𝗕𝗮𝗶 𝗝𝗮𝘁 𝗟𝘂𝗻𝗴 𝗪𝗮
𝗕𝗮𝘁 𝗦𝗵𝗮𝗴𝘂 𝗟𝗮𝗺𝗮𝗻𝗴. 𝗕𝘆 𝗞𝗪 (𝗡𝗮𝘄 𝗔𝘄𝗻). 𝟮𝟯 𝗔𝘂𝗴𝘂𝘀𝘁 𝟮𝟬𝟮𝟱
Gumshem hpyen komishin gaw Jinghpaw mungdaw Hpakant ginra de lai mat wa sai May shata kaw nna htu shadut htim gasat wa ai raitim, ahkyak ai hpyen dap shara ni hpe n lu zing ai majaw, hpyen n-gun bai jat nna lung wa ai lam chye lu ai.
Ndai laman gumshem hpyen dap gaw hpyen n-gun tsa lam hte galang mi bai, Ka Maing – Lawng Hkang lam hku nna, Hpakant muklum de htu shadut lung wa ai re lam dai ginra kata na hpyen shiga hte ni htep ai marai langai tsun ai re.
Lai wa sai May shata kaw nna hpyen komishin a hpyen hpung ni gaw Hpakant sa lam rai nga ai; Nawng Lut (Indawgyi) – Gwihka lam, Ka Maing - Lawng Hkang lam ni hku nna hpyen n-gun tsa kaba hte htu shadut lung wa ai majaw, gasat gala majan ni byin nga ai re.
Gumshem hpyen hpung ni Hpakant ginra de du shang wa ai June shata kaw na Wunpawng Mungdan Shanglawt Hpyen Dap (KIA) hte pawng hpawm rawt malan hpung ni zing madu da sai, Lamawng Kawng hte Lagat Kawng hpyen dap shara yan hpe bai zing madu la lu na matu, gumshem hpen dap hte pyitutsit hpyen hpung ni gaw, Hpakant kata hta Hpyen shamu shamawt lam ni matut manoi galaw nga ai lam chye lu ai re.
Dai hpyen dap kawng ni hpe bai zing madu lu na matu Sut Bum, Maw Wan hte Sharaw Hka mare ni hta dap jung nga ai hpyen gumshem dap ni hte KIA pawng hpawm rawt malan hpyen hpung ni June shata kaw nna ndai August shata du hkra gasat gala matut byin nga ai lam chye lu ai.
Bai nna gumshem hpyen dap gaw, nbungli hte bawng jahkrat gasat ai lam matut galaw nga nna, lanak kaba ni hte mung gap gasat nga ai lam chye lu ai.
Kachin Waves sawk kahkyin da ai htihkum ni hku nga yang, Hpakant ginra kata hpyen masa bai shuk shanut wa ai hpang, lai mat wa sai June shata kaw nna ndai August shata praw laman, muklum kata sinat hte gap sat kau hkrum ai marai 10 du nga sai lam mu chye lu nga ai.
===
𝗝𝗶𝗻𝗴𝗵𝗽𝗮𝘄 𝗠𝘂𝗻𝗴 𝗵𝘁𝗲 𝗦𝗮𝗺 𝗠𝘂𝗻𝗴 𝗞𝗮𝗰𝗵𝗶𝗻 𝗦𝘂𝗯-𝗦𝘁𝗮𝘁𝗲 𝗚𝗶𝗻𝗿𝗮 𝗡𝗶 𝗛𝘁𝗮 𝗠𝘂𝗸𝗹𝘂𝗺 𝗞𝗮𝘁𝗮 𝗟𝗮𝗴𝘂𝘁 𝗗𝗮𝗺𝘆𝗮 𝗡𝗶 𝗛𝗽𝗲 𝗟𝘂 𝗥𝗶𝗺 𝗞𝗮𝘂 𝗔𝗶 𝗦𝗵𝗶𝗴𝗮
Jinghpaw mung hte Sam mung Kachin Sub-state ginra Kuthkai muklum hta lagut damya ni hpe rim lu ai mabyin ni hte Myitkyina muklum hta PDF masu jahpai nna gumhpraw jahkrit hpyi sha ai masha ni nga ai lam shiga na chye lu ai re.
Myitkyina muklum, Myotit lawk All Star private shinggan jawng shawng kaw August 18 ya shani jahpawt daw hkying 11 aten hta bawm kapaw wa ai mjaw, mawdaw 3 kaw kamang hkra ai raitim, masha hkra hkala ai lam gaw, n nga ai lam, ginra masha ni tsun ai re.
Dai hte maren, June shata hta mung Myitkyina mare na Pyi Hing shinggan lahta tsang jawng shawng kaw bawm kapaw ai mabyin byin lai wa sai hte April shata hta mung Yuzana lawk na shinggan jawng langai a makau kaw bawm kapaw ai lam ni byin lai wa sa lam chye lu ai.
Myitkyina muklum kata na shinggan jawng (private school) hpaw sha ai madu ni hpe PDF masu jahpai phone matut nna, gumhpraw jahkrit hpyi sha ai mabyin ni mung nga nga ai lam, mabyin hpe chye tawn ai ni marai langai tsun ai re. Dai mabyin ni hte seng nna Myen hpyen komishin a npu na balik ni hpe shiga jaw shana ai raitim, ahkyak la ya ai lam n nga shi ai hpe chye lu ai.
Dai hta n-ga, August 17 ya shani hta mung, Myitkyina, Shatapru hta, nhtu kadun lang nna lagut damya bungli galaw hkyen ai masha langai hpe grup-yin na Shatapru mungmasha ni jawm wang rim kau ai nga nna, mabyin hpe myi chyaw mu ai masha langai tsun ai re.
Sam mung dingdung daw Kuthkai muklum hta mung, August 20 ya shani mawdaw gram seng workshop shawng kaw zaw hte hpawn gan jahkring tawn da ai mawdaw langai hpe lagu gau hprawng mat ai la langai hpe Lashu muklum shang wa mahka na shagyit kaw MNDAA Kokang hpyenla ni lu rim kau ai lam, ginra masha langai tsun ai re.
Dai hta n-ga August 15 ya shani hta mung, Kuthkai kaw sha damya langai hpe TNLA hpyenla ni sa rim ai shaloi bai nhtang share wa ai majaw, sinat hte gap rim ai hta damya wa si mat ai re lam. Kuthkai buga masha tsun ai re.
Jinghpaw mungdaw hpyen komishin uphkang nga ai Myitkyina muklum kata hta lai wa sai aten ni hta mung lagut lagu, kashun kashe damya mabyin ni law law lang byin lai wa sai lam chye lu ai.
===
𝗔𝗻𝗮 𝗭𝗶𝗻𝗴 𝗚𝘂𝗺𝘀𝗵𝗲𝗺 𝗛𝗽𝘆𝗲𝗻 𝗗𝗮𝗽 𝗗𝗲𝗰𝗲𝗺𝗯𝗲𝗿 𝗛𝘁𝗮 𝗚𝗮𝗹𝗮𝘄 𝗡𝗮 𝗥𝗮 𝗟𝗮𝘁𝗮 𝗣𝗼𝗶 𝗛𝘁𝗮 𝗝𝗶𝗻𝗴𝗵𝗽𝗮𝘄 𝗠𝘂𝗻𝗴𝗱𝗮𝘄 𝗞𝗮𝘁𝗮 𝗡𝗮 𝗚𝗶𝗻𝘄𝗮𝗻𝗴𝗱𝗮𝘄 (𝟲) 𝗹𝗮𝘄𝗺
Hpyen Komishin a ra lata poi komishin kaw nna, August 20 ya shani ndau shana ai hta, mungshawa malai rapdaw (လွှတ်တော်) shagu a daw (1) hku nna galaw na ra lata poi hpe December shata hta galaw hpang sa wa na re lam chye lu ai.
Ra lata poi daw langai hku nna December 28 ya, Laban shani galaw sa wa na hpyen komishin a ra lata poi hta ginwangdaw (မြို့နယ်) 102 lawm ai rai nna, Jinghpaw mungdaw kata na ginwangdaw 6 mung lawm nga ai hpe ndau laika hta mu lu ai.
Jinghpaw mungdaw kata na dai ginwangdaw 6 ni gaw, Danai, Hkawng Lang Hpu, Nawk Mung, Putao, Monyin hte Myitkyina ginwangdaw ni lawm nga ai hpe mu lu ai.
Dai hta n-ga, September praw 8 ya shani kaw nna ra lata poi shang shingjawng na masha ni a mying jahpan bang mai sai lam mung ndai August 20 ya shani ndau da sai re.
Ya aten Jinghpaw mungdaw Man Maw muklum padang dip majan hpe matut manoi gasat nga ai gaw shata 8 jan rai nga sai rai nna, Hpakant hte Wai Maw muklum ni hta mung lahkawng maga hpyen shamu shamawt lam ni galaw nga ai hte hpyen masa n zim nga ai ginra ni re.
Ta lata poi hte seng nna, gumshem hpyen komishin gaw, Ginwangdaw (မြို့နယ်) 330 hpe mungshawa malai rapdaw (ပြည်သူ့လွှတ်တော်) ngu masat da nhtawm, amyusha malai rapdaw (အမျိုးသားလွှတ်တော်) a matu ra lata poi masat gaiwang (110) masat da ai lam, ra lata poi komishin a ndau laika kaw na chye lu ai. Dai hta n-ga, ginwang gira kaba (တိုင်းဒေသကြီး) hte mungdaw rapdaw a matu ra lata poi gaiwang (364) masat da ai rai nna, amyusha bawsang malai salang (တိုင်းရင်းသားရေးရာကိုယ်စားလှယ်) ni a matu shara (29) masat da ai lam chye lu ai.
===
▪︎ 𝗡𝗶𝗻𝗴𝗴𝗮𝘄𝗻 𝗠𝘂𝗻𝗴𝗺𝗮𝘀𝗮 𝗟𝗮𝗺-𝘆𝗮𝗻 𝗵𝘁𝗮 𝗥𝗮𝘄𝗻𝗴 𝗔𝗶 𝗠𝘂𝗻𝗴𝗺𝗮𝘀𝗮 𝗚𝗮𝘀𝗶 𝗔 𝗟𝗮𝗰𝗵𝘆𝘂𝗺 𝗡𝗶, 𝗗𝗮𝘄 - 𝟮𝟱
Ndai bat hta hpang jahtum hku nna tang madun mat wa na, ninggawn mungmasa lam yan hta rawng ai mungmasa ga si 5 ni gaw;
1. Ding-run: galoi mung ding-yang re ai ngu ai lachyum re. (arau re ai, maren re ai lachyum re.)
2. Mungsang masa: kaga mungdan ni hte matut mahkai, bawngban jahkrup, kanawn mazum, mahku mara lam, Jasat sa wa ai hpe ngu ai.
3. Kanu mungdan: tinang a Kanu kawa, kaji kawoi ni maden zinghka da ai madu mungdan majing; tinang a daidaw daihpang mungdan majing hpe ngu ai.
4. Wuhpung hka yang sharaw gawa ai: (Ga malai) tinang tinggyeng dinghkrai rai nna, myit magaw rawng let, wuhpung kaw nna hkabra ai wa hpe gaw, hyen wa e apyaw sha hte roirip dangsha ai hpe hkrum chye ai lachyum re. (Shada myithkrum, tsawra, kamhpa hkat, gahkyin gumdin ra ai lam hpe hpaji jaw da ai gamalai re.)
5. Manang ngu yang ndang: (Gamalai) manang kaja, jinghku kaja re ngu nna grai kamhpa ai wa she, tinang a hyen tai taw ai hpe ngu ai re.
Yu madat n-gun jaw taw nga ai mungchyingsha ni yawng mung, akyu rawng ai hpaji lu la na re ngu myit mada let, ninggawn mungmasa lam yan hta rawng ai mungmasa ga si ni a lachyum ni hpe tang madun ai lamang ngut sai hku re. Matut nna mung Kru ya shani shagu Kachin Waves kawn tang madun nga ai Jinghpaw lamang hpe mung matut yu madat n-gun jaw la na hpe ga saw dat nngai. Chyeju kaba sai.
https://youtu.be/tGI6AgO5-Ac?si=ZoKs4BeJ_thMHHvN
https://x.com/kachinwaves/status/1959256599438278661?t=vdYdNRkdIirx460lKUHRzA&s=19
https://t.me/Kachinwaves/1440
Lai sai bat na link:
https://www.facebook.com/kachinwavesnews/videos/1313186090534923/?__cft__[0]=AZVyvBth4Kp3kBeFCpF5tLOQfM0Kcn-8EM1indo3_PCYp8pwXhN69NEKBlVErtAu22BGvdmC-a-nLjwIGSzIseO2cIU5-2vCb4E0xPeoboNuYVsOkTDzsukKaSYx9X70E9zN5FEUJ0-y4ciC2vNoyIlHB-nyYBg2x7_lYjKIxqYULmpSL7muQuQaHZrPvnhvdbSmA1UlPVhR_BHCAR5XX5a6&__tn__=%2CO%2CP-R
