https://www.facebook.com/101381188247261/

Dot Press, Myitnge (2025)

08/09/2025

SADNESS BLUe
by Yuya Kyawt Soe

-
DESCRIPTION for PiCs

I think the color needed to express SADNESS is BLUe so . . .

-

🔵 For resolution -
https://drive.google.com/drive/folders/12Ym_KFXQMVv8DNkxzjghOq62ls5csa36

*Do not repost without permission.

07/09/2025

မနက်ဖြန် နေ့လယ်ကျရင် ဒီကနေ Online visualize exhibition အနေနဲ့ ကျွန်တော် ဆွဲထားတဲ့ Artwork (၁၂) ခုကို တင်ပေးသွားချင်တယ်။ အပြင်မှာ အခွင့် သာလို့ ပြပွဲလုပ်ဖြစ်ရင်လည်း အားလုံးကို ဖိတ်ပါရဲ့။ သို့သော် လက်ရှိမှာတော့ online ကနေသာ အကြိုပြသထားပါရ‌စေ။ Series title ကတော့ SADNESS BLUe ပါ။ ဘယ်လိုပုံတွေ ပါဝင်မလဲ ဆိုတာကတော့ မနက်ဖြန် ကြည့်ရှုတဲ့အခါ မြင်တွေ့ကြပါလိမ့်မယ်။ ကျွန်တော်လည်း အချိန်အတော်ကြာ ပုံတွေ မဆွဲဖြစ်ရင်းကနေ အခုလို ပြန်ပြီး လှုပ်ရှားလာရတော့လည်း ရင်ခုန်မိသလို ပျော်လည်း ပျော်မိပါတယ် ။

07/09/2025

ဟေမန္တ (၂၀၂၄)
ပြုလုပ်သူ - ယုယကျော့စိုး

Digital Art Zine (Z-1) အနေနဲ့ ထွက်ရှိခဲ့တဲ့ "ဟေမန္တ" အမည်ရ Zine Book ထဲက Artwork တွေပါ။ ထွက်ရှိခဲ့ပြီးတာတော့ ကြာပါပြီ။ ကိုယ့်လူတို့ တအေးတ ဆေး ကြည့်ရှုနိုင်စေဖို့ စုစည်းပြီး တင်ပေးလိုက်ခြင်းပါ ။

31/08/2025

စိတ်ကော ကိုယ်ပါ အနည်ထိုင်နေတာနဲ့ စာမလာ သ တင်းမပါး ဖြစ်နေတာတောင် အတော်ကြာပြီ။ အခုလို ကိုယ့်လူတို့ မျက်မှောက် ပြန်လာရတော့လည်း ‌မပြောချင်တဲ့ စကားနဲ့ ရောက်လာခဲ့ပါတယ်။ အားလုံးကို ပြောချင်တာက ဒီနှစ် ၂၀၂၅ ကုန်တဲ့အခါ Press ရဲ့ Publishing ရပ်တော့မယ့် အကြောင်းပါ။ အစက ဒီအတိုင်း မရှိခဲ့သလို ဘာသိဘာသာ အငြိမ်ပဲ နေပြီး ပျောက်သွားမလို့။ သို့သော် ကနဦး အစကတည်းက အခုထိ အား‌ပေးလာကြတဲ့ ကိုယ့်လူတို့ကို အားနာသမှုဖြစ်တာနဲ့။ သေချာပြောပြပြီးမှပဲ နားပါတော့မယ်။ တဆက်တည်းမှာ ဝယ်ထားပြီး ကျွန်တော်တို့ မပို့ (မယူဖြစ်) သေးသမျှ အုပ်တွေကိုလည်း တိုက်မှာ သိမ်းပေးထားပါတယ်။ နောက်ပြီး ထုတ်ဖို့ ကျန်ရှိနေသေးတဲ့ စာအုပ်တွေကိုလည်း လာမယ့် အောက်တိုဘာလထဲမှာ ကျွန်တော်တို့ ဆက်ပြီး ထုတ်ဝေသွားပါ့မယ်။အားလုံးကို ကျေးဇူးတင်သလို၊ ယိုယွင်းနေတဲ့ ဒီလို ကာလမျိုးမှာ စိတ်ချမ်းသာပြီး ကိုယ်ကျန်းမာကြဖို့သာ ဆန္ဒပြုပါရဲ့ဗျာ ။

17/08/2025

မဲဆောက်လိပ်စာနဲ့ ညီပု ရဲ့ ကဗျာစာအုပ် မှာထားပြီး လက်ဝယ်မရောက်သေးတဲ့သူတွေ Cb မှာ စာပို့ပြီး လာပြောပေးကြပါဦး ခင်ဗျာ ။

16/08/2025

A leap year will occur next month.

UCP - 26
LEAP YEAR by Yarzar
Folklore's literary project

10/08/2025

ငါတို့ဇာတ်လမ်းမှာ မျက်ရည်တွေဟာ အဓိကဇာတ်ကောင် (The Classic | 2003)

လူ့ဘဝဟာ စပြီဆိုကတည်းက ငိုခဲ့ရတယ်။ ကောင်းကင်ကြီးမှာ မိုးရေတွေ ဘယ်တော့မှ ခမ်းခြောက်မသွားသလိုမျိုး ငါတို့ကိုယ်စီမှာလည်း စိုစွတ်ဝမ်းနည်းမှုတွေနဲ့ပေါ့ကွာ။ အရာရာ မလွယ်ကူလို့ပဲ လူအဖြစ်ကို ခက်ခက်ခဲခဲ ရခဲ့ကြ။ နောက်ပြီး ငါတို့ အချစ်ကို တွေ့ရှိခဲ့ကြ။ နွားချေးပိုးကောင်လေးကို မတွေ့ဖူး မမြင်ဖူးတဲ့ ကောင်မလေး၊ မြစ်တစ်ဖက်ကမ်းက သရဲခြောက်တဲ့ အိမ်အိုကြီးဆီကို သွားကြည့်ချင်တဲ့ ကောင်မလေး။ ငါဟာ လှေကိုလည်း မလှော်တတ်ခဲ့သလို မြစ်ကိုလည်း မဖြတ်ဖူးခဲ့ပါဘူး။ ဒါပေမဲ့ နင်ရှိနေမှာ ဆိုတဲ့ အသိနဲ့တင် စွန့်စားခန်းကြီးထဲ လက်ပစ်ကူးဖို့ စဉ်းစားစရာကို မလိုခဲ့တာပါ။ မြစ်ကမ်းစပ်မှာ လှေက မရွေ့၊ နင်ကလည်း စကားတွေ ကရားရေလွှတ်၊ နောက်တော့လည်း အဖြစ်မှန်ဟာ သူ့အလိုလို ပေါ်လာပြီး ငါတို့လည်း အိမ်အိုကြီးဆီ ရောက်ခဲ့တာပါပဲလေ။

ဘဝရဲ့ လွတ်လပ်ပေါ့ပါးမှုဟာ ဖန်တီးမယူဘဲ ရောက်လာတတ်တယ်။ တစ်ခါတစ်ရံ အားရပါးရ အော်ပစ်လိုက်၊ တစ်ခါတစ်ရံ အသံမထွက်နိုင်တော့တဲ့ ဆို့နင့်ဝမ်းနည်းမှုနဲ့ ငိုကြွေးလိုက်။ ရုတ်တရက် မိုးတွေ ရွာလာတယ်။ လှေကလေးက မြစ်လယ်ဆီကို တရွေ့ရွေ့။ ငါဟာ လှေကြိုးကို ချည်ဖို့ မေ့လျော့ခဲ့သူ၊ ကိုယ့်ကို ခိုင်မြဲစွာ ရစ်ပတ်လာတဲ့ သံယောဇဉ်ကြိုးလေးကို လွတ်ထွက်မသွားအောင် ချည်ဖို့ ပျက်ကွက်ခဲ့သူ ဖြစ်တယ်။ ခြေထောက်နာသွားတဲ့ နင့်ကို ကုန်းပိုးပြေးလိုက်ဖို့၊ ဗိုက်ဆာနေတဲ့ ကောင်မလေးကို ဖရဲသီးခွဲကျွေးဖို့ မမေ့ခဲ့တာဘဲ ပျော်စရာ ခဏတာများပေါ့လေ။ ခြေတံရှည် လယ်စောင့်တဲလေးပေါ်မှာ သက်တန့်ကြီး ကိုင်းကျနေတယ်။ တဲကလေးထဲမှာ ခိုက်ခိုက်တုန်နေတဲ့ အအေးဒဏ်ကို မျက်ဝန်းများနဲ့ နွေးစေခဲ့တယ်။ နောက်တော့ အိမ်အပြန်လမ်းက ချောင်းရိုးလေးထဲ ပိုးစုန်းကြူးလေး ဆင်းဖမ်းပေးခဲ့တယ်။ နင့်အတွက်တော့ ကျေးလက်ဒေသက အကောင်လေးတွေဟာ မတွေ့ဖူး၊ မမြင်ဖူးတဲ့ ရတနာလေးတွေပေါ့ဟာ။

နောက်တော့ နင်နဲ့ ငါ၊ တစ်ယောက်ရဲ့ ရတနာဟာ တစ်ယောက် ဖြစ်ခဲ့ကြ။ ရွာနေတဲ့ မိုးတွေထဲ မျက်ရည်ကိုယ်စီနဲ့ ပြေးလွှားခဲ့ကြ။ ငါ့အသက်ရဲ့ သုံးပုံနှစ်ပုံလောက် ဖြတ်သန်းပြီးချိန်မှာ ငါဟာ သိပ်ကို မောနေခဲ့ပြီ။ အဖြစ်အပျက်တွေဟာ ငါတို့စီမံလို့ မရဘဲ သူ့အလိုလို ဖြစ်ပျက်သွားခဲ့တယ်။ ကံကြမ္မာကိုလည်း ငါလိုက်မမီဘူး။ နင့်ကိုလည်း ငါ မမီတော့ဘူး။ ရောက်တတ်ရာရာ အကြောင်းတွေပေမယ့် စတွေ့ကြကတည်းက ပန်းချိုချိုလေးတွေ ထုံမွှန်းထားတဲ့ အဆွေးဇာတ်ကြီးဆိုတာ ငါတို့သိခဲ့လိုက်ရင် ကောင်းမယ်နော်။ နင်လည်း အူလှိုက်သည်းလှိုက် ငိုစရာ မလိုတော့ဘူးပေါ့။ ငါ့ဆီမှာ နောက်ဆုံးကျန်ခဲ့တာဆိုလို့ နင်ကိုယ်တိုင် ဆွဲပေးလိုက်တဲ့ ဆွဲကြိုးလေးပဲ ရှိတော့တယ်။ အသက်တာအတွက် ထာဝရလွမ်းဆွတ်စေလိုသောအားဖြင့်။ ငါ့ကို ချည်လာတဲ့ကြိုးတစ်ချောင်းအား ချည်တိုင်မဲ့တဲ့ ငါ့ဘဝဆီမှ ဝေးကွာစေလိုသောအားဖြင့်။

ငါဆိုတဲ့ လူ့အဖြစ်ကို ရခဲ့တာ သိပ်ကို ပျော်ပါတယ်။ ငါ့ရဲ့ လူ့အဖြစ်မှာ ကောင်မလေးတစ်ယောက်ကို တွေ့ဆုံခွင့်၊ ချစ်ခွင့်၊ ပျော်ရွှင်ကြည်နူးခွင့်၊ လွမ်းခွင့်၊ ဆွေးခွင့်၊ ကြေကွဲခွင့် ထောင်သောင်းမက ရရှိခဲ့တဲ့အတွက်လည်း သိပ်ကို ကျေနပ်မိပါတယ်။

ငါတို့ ဇာတ်လမ်းမှာ
မျက်ရည်တွေဟာ အဓိက ဇာတ်ကောင်ပဲ။
ဇာတ်လမ်းသဘောအရ
အဓိကဇာတ်ကောာင်ကို သတ်လိုက်လို့ မရဘူး။
မျက်ရည်ဆိုတဲ့ ဇာတ်ကောင်ဟာ ရုပ်လုံးကြွနေဖို့
ငါတို့ ဝေးနေမှ ဖြစ်မှာ။

နောက်ဆုံးတော့ ဇာတ်ကောင်အလိုကျပဲ ဘယ်တော့မှ မဆုံနိုင်အောင် ငါတို့ ဝေးကွာမျောလွင့်သွားရတယ်နော်။ သံသရာဟာ ဆက်ရှိနေဦးမှာပါ။ လူ့အဖြစ်ဆိုတာလည်း သေဆုံးလိုက်၊ တစ်ခါပြန်ရှင်သန်လိုက် ဖြစ်နေဦးမှာ။ နောက်တစ်ကြိမ် တိုက်မိဖို့ဆိုတာ စကြာဝဠာကြီးထဲ မျောနေတဲ့ ကိုယ်တို့လို အပိုင်းအစလေးတွေအတွက် အခွင့်အရေး ရှိနိုင်တယ် မဟုတ်လား ။

ထက်အိမ်

09/08/2025

ဒီနေ့ ဩဂတ် (၉) ရက်နေ့ဟာ စနေနေ့။ ပြီးတော့ စာချစ်သူများနေ့ပါ ဖြစ်နေပြန်တော့။ အချိန်လေး မဆိုသလောက်များ ရရင်၊ မနားမနေ အပြင်းနှင်နေတဲ့ ဒီဂျစ်တယ် ကမ္ဘာထဲက ခဏတဖြုတ် ထွက်လာပြီး စာ အုပ်စင် ရှင်းတာဖြစ်ဖြစ်၊ ကိုယ် ဖတ်ဖို့ မေ့နေတဲ့ စာ အုပ်ကို အပြီးသတ် ဖြစ်အောင် ဖတ်တာမျိုးဖြစ်ဖြစ်၊ ဝယ်ထားပြီး တစ်ခါမှ ကိုင်ဖတ်ဖို့ အခွင့်မရသေးတဲ့ စာအုပ်အသစ် တစ်အုပ်ကို ဖွင့်ဖတ်ကြည့်လိုက်တာ ပဲဖြစ်ဖြစ်။ စာအုပ်နဲ့ ပတ်သက်တဲ့ မည်သည့် အခြင်း အရာမဆို ပြုလုပ်ကြည့်ရင်း ဒီနေ့လေးကို ဖြတ်သန်းကြည့်ကြဖို့ တိုက်တွန်းချင်ပါရဲ့ ခင်ဗျာ ။

08/08/2025

ဝယ်ယူနိုင်ပါပြီဗျ။
Physical & Ebook (Available)

📗 UCP - 25 ဆမ်ရဲ့ အရေးအသားစုစည်းမှု စာအုပ် ထွက်ရှိပါပြီ။ Folklore အဖွဲ့ထဲမှာ Youth Founding
Member တစ်ယောက် ဖြစ်သလို ရှေ့ဘက်မှာလည်း "ဆန့်တန်းများ" အမည်ရ Poetry Chapbook တစ်ခုကို ထွက်ရှိထားပြီးသူလည်း ဖြစ်ပါတယ်။ အဲဒီကနေမှ အခု၊ အချိန်တစ်ခု ခြားပြီးကာမှ ဒီအုပ်က ထွက်ရှိလာတာပါ။ စာအုပ်နာမည်ကလည်း "ကာလဆိုင်ရာ လူမှုစာတမ်း" တဲ့။ အပုဒ်ရေ (၁၅) ပုဒ်လုံးကတော့ ဒီဝိသေသျကို ထောပန မပြုပေမယ့် တစ်ခါတစ်ရံ မေ့လို့ မေ့နေတဲ့ အနိဌာရုံတွေက လိုအပ်တဲ့ ကွက်လပ်နဲ့ နားလည်နိုင်မှုကို စီရင်တတ်ပါတယ်။ ဖတ်ကြည့်ကြပါလို့ အထူးအားဖြင့် မညွှန်းချင်ဘူး။ ဘာကြောင့်လဲ ဒီလို မေးလာခဲ့သည် ရှိသော်။ နိုင်ငံတကာ စာရေးသူတွေရဲ့ အမည်နာမများကို ပခုံးဖက် ပေါင်းသူများလို လေယူလေသိမ်း အစုံနဲ့ နှုတ်တိုက်ရွတ်ချသွားပြီး ဒါလေးတောင် မသိရကောင်း ဆိုသူတို့အတွက် စိုးရိမ်နေမိလို့ပါ။ ဒီကာလ၊ ဒီစနစ်ယန္တရား ဖြစ်တာကြောင့် ဒါမျိုး ပြည်တွင်း ပင်ကိုယ်ရေးတွေကို လက်သင့်မခံနိုင် ဖြစ်နေတာကလည်း စိတ်ဝင်စားစရာရယ်တော့ ဟုတ်မနေပါဘူး။ အရေးပါတာကိုပဲ အရာပေးလေ့ရှိတော့၊ ကိုယ်လို သူလိုတွေကို ရည်ရွယ်လျက် Press က‌နေမှ ထုတ်လုပ်လိုက်ရခြင်းပါ။ တနည်းအားဖြင့် ဆို work done ပေါ့။ ဒီတော့ ကိုယ်မကြုံဖူးလို့ သတိမထားမိတဲ့ အရာတစ်ခုခုကို အတတ်စမ်းပြီး ဖတ်ရှုချင်လျှင်က အားပေးတုံ့ပြန်နိုင်ပါပြီ။ အရေအတွက်ကတော့ ကန့်သတ် ထုတ်ဝေထားပါတယ်။ တန်ဖိုးအားဖြင့် ၅၀၀၀ ကျပ်ပါ။ မျက်နှာဖုံးကိုတော့ ယုယကျော့စိုးပဲ ပြုလုပ်ထားပါတယ်။ စာမြည်း‌အနေဖြင့်လည်း အောက်က လင့်ခ်‌‌တွေကမှတဆင့် ဖတ်ရှုလို့ ရပါတယ်။

အနေအထိုင်
https://www.facebook.com/share/p/1MVGHf8c6m/

ဟာသထဲက ကာလ
https://www.facebook.com/share/p/1775pymtvC/

◾
မှာယူထားသူများသို့ စာအုပ် ပို့ဆောင်ပေးမည့် ရက်ကတော့ စာအုပ်ထွက်ရှိမယ့် ရက်ရဲ့နောက် (၂) ရက်၊ (၃) ရက် ရှိတဲ့အခါမှ ပို့ဆောင်ပေးသွားမှာပါ ဗျ။ မှာယူလိုသူများအနေနဲ့ နာမည်၊ လိပ်စာနှင့် ဖုန်းနံပါတ်တို့ကို Cb သို့ ပေးပို့၍ ဝယ်ယူနိုင်ပါတယ်။ ထပ်တိုး အနေနဲ့ Local တွင်သာမက ထိုင်းဘက်က အမှာတွေကိုလည်း ပို့ဆောင်ပေးကြောင်း ပြောပြပါရစေဗျာ။
အားလုံးလည်း သာယာလှပပြီး စိတ်လက်ကြည်သာတဲ့ ညနေချိန်ခါ တစ်ခုအား ပိုင်ဆိုင်နိုင်ကြပါစေ ခင် ဗျာ ။

-
☎️ Dot Press's Viber - 09982455114
✉️ Dot Press's Telegram - 09982455114

06/08/2025

မြူနှင်းတွေပြီးတော့

နှစ်ခြမ်းကွဲနေတဲ့ ကျောင်းဝန်းတံခါးတွေ ရင်ချင်းစေ့သွားကြတဲ့ ရာသီကို ရောက်လာတယ်။ စားဝိုင်းတစ်ဝိုင်းပဲ ရှိတော့ နေ့လယ်ခင်းတစ်ခုလို တိတ်ဆိတ်လို့ ကားတွေ ဖြတ်သွားတဲ့ လမ်းမကြီးကိုပဲ သူ ငေးနေတာ။ အရင်လတုန်းကထက် ရောင်းအား ပိုကောင်းအောင် ဒီဘက်လမှာ ဘယ်လိုပြင်ဆင်သင့်လဲဆိုတာ စဉ်းစားနေပုံပဲ။ အနည်းဆုံးတော့ အဲ့လိုလို့ ကျွန်တော် ထင်တယ်၊ ဟုတ်ချင်မှဟုတ်လိမ့်မယ်။ သူ ဘာတွေကို ဘယ်လိုတွေးနေမှန်း ကျွန်တော်မှ အတိအကျ မသိနိုင်တာကိုး။ ဒီတော့ ထင်တာကို ပြောရတာပဲ။ ထင်တာကို ပြောရရင် အစားအသောက်တွေက အရင်လို အရသာ မဟုတ်တော့ဘူး။ အခုလည်း ဆိုင်ရောင်းအားကျတာနဲ့ပတ်သက်ပြီး သိရအောင် ဆိုင်မှာ လာနေတာ တစ်ပတ်လောက် ရှိပြီ။ ဒီလမ်းမကြီးမှာ ဖြတ်သွားဖြတ်လာ လူတွေနဲ့ ကားတွေပဲ ရှိတာ။ ဒါပေမဲ့ လူပါးပြီဆို လမ်းမကြီးကို သူ ငေးမြဲငေးဆဲ၊ ဒါက တစ်ခုခုကို ကြိုတင်သတိပေးနေသလိုမျိုးပဲ။ ပြီးခဲ့တဲ့ နှစ်နှစ်က ကျွန်ဝောာ်ဟာ လေထဲ ဂျက်လို ပျံသန်းချင်စိတ်နဲ့ သူငေးနေတဲ့ ဟောဒီ လမ်းမကြီးပေါ်ပဲ ဇဝေဇဝါရောက်လာဖူးတယ်။ ပြီးတော့လည်း စိတ်ရဲ့အလွန်မှာ ဆိပ်ကမ်းနံရံကိုပဲ ပြန်လည်ဆိုက်ကပ်ချင်မှုတွေ တရုတ်ရုတ်နဲ့ ကျွန်တော့်ဟာ တကယ့်ကို တန်ဖိုးမရှိတဲ့ အစုတ်ပဲ။ မှတ်ဉာဏ်ထဲမှာ လတစ်လဟာ ထာဝရထက် ပိုကြာနေခဲ့တယ်။ အိပ်မရတဲ့ ညတွေထဲမှာ အဖိုးရဲ့ ရယ်သံကို ပြန်ကြားနေရတယ်။ လူ့ဘဝ ဖြစ်ရပ်ဆိုးတွေ အလွန်မှာ ကိုယ်ခန္ဓာ အစိတ်ပိုင်းတွေ မြေပေါ် တဂျောက်ဂျောက်နဲ့ ပြုတ်ကျနေသလိုပဲ။ ကျွန်ဝောာ့်စိတ်ထဲ ဒီရက်ပိုင်း အဲ့လိုတွေခံစားနေရတယ်။ တစ်ယောက်ယောက်က ဒီအကြောင်းတွေ သိသွားရင် ဘယ်လောက်ကောင်းမလဲပေါ့၊ ကြံဖန်ပြီး ထင်ရာကို တွေးယူပစ်လိုက်ရတာပဲ။ စောက်ကျိုးနည်း လမ်းမကြီးမှာ စိတ်ဝင်စားစရာဘာမှမရှိဘူး၊ ဒါလည်း သူ ဆက်ငေးနေတာပဲ။ ဘုရားကျောင်းရဲ့ ခေါင်းလောင်းသံတွေဟာ အနောက်မှာ ရှိတဲ့ သားသတ်ရုံက အသံတွေကို အလုံပိတ်ပေးထားသလိုမျိုး တစ်ခွန်းမှ မပြောလည်း သူ့မျက်ဝန်းတွေထဲ မြင်နေရတယ်။ စောင့်ကြည့်နေရတဲ့ ကျွန်တော်သာ စိတ််မရှည်ချင်တော့ဘူး။ အိမ်ကို ပြန်ဖို့ပဲ အတွေးက မြန်နေတော့တယ်။ ဒါကြောင့် ရိုးမစံတော်ချိန်ဆီ ရောက်ရှိပြီးနှင့်တဲ့ သူငယ်ချင်းတွေကို အမီလိုက်ဖို့ ကားကို ခပ်မြန်မြန်လေး မောင်းပြန်လာခဲ့လိုက်တော့တယ်။ သူ လမ်းမပေါ်က ဘာတွေကို တကယ် စိတ်ဝင်စားနေမှန်းတော့ မေးမလာခဲ့ဘူး။ သေခြင်းတရားကို *ကျွန်တော် 'အာမင်' လို့ ပြောလိုက်ရင် ရှောင်ကွင်းလို့ လွတ်ပါ့မလား။ အဲ့မေးခွန်းဟာ ရင်ဘတ်ထဲ သစ်ရွက်တွေ တဖွဲဖွဲကြွေနေသလို ဗြောင်းဆန်လွန်းနေတော့တယ် ။

*ဒီးန်ယန်းဂ်စာသား

ရာဇာ

01/08/2025

လကုန်ပြီး လအသစ်ရဲ့ အစရက် ဖြစ်တဲ့ ဒီကနေ့ ဩဂတ် (၁) ရက်နေ့မှာတော့ နှစ်လယ် အရောင်းပွဲလေးတစ်ခု ရှိထားပါတယ်။ တိုက်ဆိုင်စွာ အဲဒီပွဲကလည်း လစာထုတ်ရက်များထဲမှာပဲ ဆိုတော့၊ ကိုယ့်လူတို့အ တွက်လည်း ဟန်ကျမယ် ထင်ပါတယ်။ တခြားပွဲ မ ဟုတ်ပါဘူး။ ကျွန်တော်တို့ ဘယ်‌တော့ ရောက်လာမလဲ ဆိုပြီး၊ အမြဲခန့်မှန်းနေကျ စိတ်ကူးချိုချို စာအုပ် တိုက်ရဲ့ နှစ်လယ် စာအုပ်အရောင်းပွဲလေးပါ။

မနက်က ကျွန်တော် ဒီနှစ် ၂၀၂၅ စာအုပ် အရောင်း စာရင်းကို ကြည့်လိုက်မိတော့ အရင်ပွဲတုန်းက ကျွန် တော် ဝယ်ဖြစ်ခဲ့တဲ့ စာအုပ် အတော်များများကို အ ခုစာရင်းထဲမှာ ရှာလို့ မတွေ့တော့ပါဘူး။ ပြန်ထွက်အုပ်တွေထဲလည်း မောင်ချောနွယ် ရဲ့ တစ်အုပ်ချင်း ထွက်ခဲ့တဲ့ ကဗျာစာအုပ်တွေကို အဖုံးလက်ရာသစ်နဲ့ ထပ်ထွက်လာတာ တွေ့ရတယ်။ ဒါပေမဲ့ စာအုပ်ဈေး အပြောင်းအလဲတော့ ရှိသွားတယ်ပေါ့။ တိုက်ပြတ်အုပ်တွေဆိုတော့လည်း လက်ခံလို့ ရပါတယ်။ အရင်က ကျွန်တော်ဆိုလည်း ကဗျာပေါင်းချုပ်တွေကိုဆို မဖြစ်မနေမှပဲ ဝယ်တာပါ။ တစ်အုပ်ချင်း လိုက်စုပြီး ဝယ်လို့ ရနိုင်သေးတယ်ဆို ပေကပ်ပြီး တစ်အုပ်ချင်းသာ ဝယ်ဖြစ်ပါတယ်။ ပေါ့ပေါ့ပါးပါးလည်း ရှိ၊ တစ်နေရာကနေ တခြားတစ်နေရာ ယူသွားလည်း လွယ် လင့်တကူ ဖြစ်တော့ အဝယ်မမှားဘူးပေါ့။

ပြောလို့သာ ပြောတာပါ။ အခု စာရင်းထဲလည်း ဝယ်လိုက်မိလို့ ကျေနပ်သွားရစေမယ့် ဈေးကော စာအုပ် အထူအထည်နဲ့ အရေးအသားပါ ညက်လှတဲ့ စာအုပ်ကောင်းတွေ အများကြီး ရှိပါသေးတယ်။ ဒီမှာ တစ်ခု အကြံပြုချင်တာက အချိန်လေး ကိုယ့်လူတို့ ပေးနိုင်ရင် ကောင်းလိမ့်မယ်။ ဘာလို့ဆို တိုက်ပြတ်ဖြစ်ခါနီး အုပ်တွေနဲ့ ပြန်ထွက်ဖို့ ကြာမယ့် အုပ်တွေကို ဦး စားပေး ‌ရှာဝယ်စေချင်လို့ပါ။ အဲဒီလို ဝယ်တော့ကျ အသစ်မူ ပြန်ထွက်လာတဲ့အခါ နှစ်အုပ်စာဈေး ပေးဝယ်ဖို့ မလိုတော့ဘူးပေါ့လေ။ ပြီးတော့ အုပ်အထူနဲ့ အကြိမ်ရေ အဟောင်းအုပ်တွေကိုလည်း ရွေးဝယ်ထားသင့်ပါတယ်။ ဥပမာ - ဝတ္ထုတိုပေါင်းချုပ်တွေတို့၊ ရှေးက မြန်မာ့စာ‌ရေးဆရာတွေရဲ့ ဝတ္ထုအုပ်တွေတို့၊ ရုပ်ပြစာအုပ်တွေတို့ပေါ့။

ကျွန်တော်လည်း အရင် စိတ်ကူးပွဲတုန်းက ဝယ်ထားလက်စ အုပ်တွေ ရှိပေမယ့်၊ ဒီတစ်ခေါက် ပွဲမှာတော့ ရုပ်ပြစာအုပ်တွေနဲ့ သုမောင် ရဲ့ စာအုပ်တချို့တော့ ဦးစားပေး ဝယ်ဖြစ်မယ်လို့ စိတ်ကူးမိထားပါတယ်။
သို့သော် ဆိုင်ရောက်ရင်တော့ ဘာအုပ်တွေ ထပ်‌တွေ့လို့ ဘာတွေ ဝယ်ဖြစ်ဦးမယ် ဆိုတာကတော့ စဉ်းစားလို့ မရသေးပါဘူး။ နောက်ပြီး ကိုယ့်လူတို့ကိုလည်း သိပ်နောက်မကျ‌စေချင်ပါဘူး။ လိုချင်တဲ့ စာအုပ်နဲ့ လွဲတာကလည်း အသည်းကွဲစေနိုင်တာပဲမို့။ လိုချင်တဲ့ စာအုပ်တွေကို တွက်ချက်ပြီး ရွေးချယ် ဝယ်ယူနိုင်ကြဖို့ရာ အောက်မှာ ဒီနှစ်အတွက် စာအုပ်စာရင်းကိုလည်း တွဲပြီး ဖော်ပြပေးလိုက်ပါတယ် ။

စာအုပ်စာရင်း -
https://drive.google.com/file/d/1JL8Stha6qldPDfTOo7w7w3w-ZdvrTKsI/view?usp=drive_link

မူရင်းပိုစ့် -
https://www.facebook.com/100064761126325/posts/1178605644308129/?mibextid=Nif5oz

Dot Press

08/09/2025

07/09/2025

07/09/2025

31/08/2025

17/08/2025

16/08/2025

10/08/2025

09/08/2025

08/08/2025

06/08/2025

01/08/2025

Address

Telephone

Website

Alerts

Contact The Business

Shortcuts

Share

Category