Total Sports, Naypyidaw (2026)

05/06/2026

အီရွိုင်အိုလာ နဲ့ပြန်စပြီ… ပြီးရင်ကော

အီရွိုင်အိုလာဟာ နည်းပြကောင်းတစ်ယောက်ဖြစ်တယ်၊ ဘုန်းမောက်မှာလုပ်ပြခဲ့တာတွေကချီးကျူးစရာကောင်းတယ်။ တစ်ဖက်မှာ ဆလော့တ်နဲ့ ပြီးခဲ့တဲ့ရာသီ အနေအထားဟာ ဆိုးတယ်။ ချန်ပီယံလိဂ်ဝင်ခွင့်ကို အသည်းအသန်ယူပြီးရခဲ့တာက လွဲရင် ခြေစွမ်း၊ ရလဒ်၊ ပုံစံ၊ အသင်းတွင်းအနေအထား ဘာမှမကောင်းခဲ့ဘူး။ ဒါဆိုရင် ဆလော့တ်နေရာ အီရွိုင်အိုလာ ဝင်လာတာ ကောင်းတယ်ပေါ့။

ခက်တာက အဲ့လောက် ရှင်းရှင်းလင်းလင်းမတွေးနိုင်သေးတာပါပဲ။ အပေါ်ကပြောခဲ့တဲ့ အချက်နှစ်ချက်လုံးကို စိတ်ထဲမှာ တကယ်ယုံကြည်သည့်တိုင်၊ ပရီးမီးယားလိဂ်ဖလားကို ပထမရာသီမှာ ယူထားပြီး၊ ဒုတိယရာသီမှာအဆင်မပြေဖြစ်လိုက်တဲ့ ဆလော့တ်နေရာကို လဲမယ်။ ခေတ်သစ်တစ်ခုကို သူနဲ့စမယ်။ ကစားသမားအသစ်တွေနဲ့ ရေရှည်စီမံကိန်းရဲ့ အဓိကကျသူတစ်ဦးဖြစ်မယ်၊ ဆိုတာကတော့ အရိုးသားဆုံးပြောရရင် ဒွိဟဖြစ်လှပြီး၊ ဝိရောဓိများလွန်းလှပါတယ်။

အီရွိုင်အိုလာက နည်းပြကောင်းပါ။ ဒါပေမဲ့ အီရွိုင်အိုလာတွေအများကြီး လည်း မြင်ဖူးခဲ့ပါတယ်။ ဘရန်ဒန်ရော်ဂျာ၊ ဒေးဗစ်မိုယက်စ်၊ ဂရေဟမ်ကေပါ်တာ၊ နူနိုဆန်းတို့စ်၊ သောမတ်ဖရန့် စသဖြင့်ပေါ့။ သူတို့အားလုံးမှာ တူညီသော လမ်းကြောင်းရှိကြပြီး၊ ပရီးမီးယားလိဂ် အလယ်အလတ်အသင်းမှာ အစွမ်းပြတယ် ပြီးတော့ ပရီးမီးယားလိဂ်အသင်းကြီးဆီရောက်တယ်၊ ပြီးတော့….

ဒီလိုတွေးမိတာဟာ Hasty Generalization လို့ခေါ်တဲ့ ရှေ့ကကိစ္စတွေကြောင့် အခုလည်းဖြစ်မယ်လို့ ကောက်ချက်ချမိတဲ့ ယုတ္တိဗေဒအမှားလည်း ဖြစ်ကောင်းဖြစ်နိုင်တယ်ဆိုပေမဲ့၊ ပရီးမီးယားလိဂ်မှာ အခုလို ရာထူးတက်သွားသူများရဲ့လမ်းကြောင်းဟာ လွတ်တဲ့သူမပေါ်သေးတဲ့ ကျိန်စာလိုဖြစ်နေတာလည်း အမှန်ပါပဲ။

ဘာပဲဖြစ်ဖြစ် နည်းပြကောင်းတစ်ယောက်မလို့ အောင်မြင်စေချင်တာမလို့ စောင့်ကြည့်ရမှာပါပဲ။

04/06/2026

ဘောလုံးရာသီမှ မကုန်သေးခင်မှာပဲ အသင်းကြီးတွေဟာ နောက်ရာသီဝတ်ဆင်မဲ့ ဂျာစီဒီဇိုင်းအသစ်တွေကို တရားဝင်ကြေညာဖြန့်ချိနေခဲ့ပါပြီ။

ပီအက်စ်ဂျီ၊ အာဆင်နယ်၊ ရီးရဲလ်မက်ဒရစ်၊ မန်စီးတီး၊ လီဗာပူး၊ ယူနိုက်တက်၊ ဘိုင်ယန်၊ ချယ်ဆီး နဲ့ အီတလီအသင်းတွေ အတော်များများရဲ့ လာမဲ့ရာသီ ဂျာစီတွေဟာ မိတ်ဆက်ခဲ့ပြီးဖြစ်သလို ဝယ်ယူလို့ရနေပြီလဲဖြစ်ပါတယ်။

အသင်းတွေဟာ အရင်တုန်းကထက်စောပြီး ဂျာစီတွေကို ဖြန့်ချိနေကြသလားဆိုရင်တော့ ဟုတ်တယ်လို့ပဲပြောရပါမယ်။ ဒီလိုလုပ်ရခြင်းအကြောင်းကလည်း ရှင်းပါတယ်။

ဇွန်လကုန်မှာ ပိတ်လေ့ရှိတဲ့ ဘဏ္ဍာနှစ်မှာ ရောင်းရငွေကို ထည့်နိုင်ဖို့ပါပဲ။ ပြီးရင်တော့ ရာသီကြို ကမ္ဘာလှည့်မဲ့ ခရီးတွေမှာ အသီးသီးသောပရိသတ်တွေကို ရောင်းနိုင်ဖို့၊ ဥရောပရဲ့ စျေးဝယ်ရာသီဖြစ်တဲ့ နွေရာသီမှာ ရောင်းအားကို တင်နိုင်ဖို့စသဖြင့်သော အချက်တွေပါပါတယ်။ ကမ္ဘာ့ဖလားလည်းရှိတဲ့နှစ်မလို့ ပရိသတ်တွေ အာရုံမများခင် အရင်ကြိုရောင်းချင်တာလည်း ပါကောင်းပါနိုင်သေးတာပါပဲ။

အသင်းတွေရဲ့ ဂျာစီအသစ်စျေးတွေအနေနဲ့ အက်ဒီးဒက်စ်က ထုတ်တဲ့ ဂျာစီတွေမှာ ကစားသမားဝတ်တဲ့ ဗားရှင်းကို မြန်မာငွေ ကျပ် (၇) သိန်းကျော်၊ ပရိသတ်အတွက်ဗားရှင်းကို မြန်မာငွေကျပ် (၅)သိန်း လောက်ဖြစ်ပြီး၊ နိုက်ကီကတော့ နည်းနည်းပိုစျေးများပါတယ်။ ဒီလိုစျေးနှုန်းတွေက ဥရောပရဲ့ ငွေတန်ဖိုးနဲ့ ပြန်တွက်ရင်ကော များလားဆိုရင်တော့ မြင်သာအောင်နှစ်ဖက်တွက်ပြပါမယ်။ ဥရောပမှာ အနိမ့်ဆုံးလုပ်အားခနဲ့ အလုပ်လုပ်နေတဲ့ သူတစ်ယောက်ဟာ ပျှမ်းမျှအားဖြင့် တစ်နေ့/(၈)နာရီလုပ်ရင် ယူရို (၁၁၀) လောက်ရပါတယ်။ ဆိုတော့ကာ ပရိသတ်ဗားရှင်း ဂျာစီကို အနိမ့်ဆုံးလုပ်အားခ (၈)နာရီ အလုပ်လုပ်ပြီးရင် ဝယ်နိုင်ပါပြီ။ ဒါပေမဲ့ တစ်ဖက်ကကြည့်ရင်လည်း ဒီငွေပမာဏဟာ အဝတ်အစားဝယ်မယ်ဆို အရည်အသွေးကောင်းကောင်း အနွေးထည်ထူထူတစ်ထည် ဒါမှမဟုတ် ဖိနပ်ကောင်းကောင်းတစ်ရံ ဝယ်နိုင်တဲ့ ပမာဏမျိုး၊ နှစ်ပတ်စာလောက် လုံလုံလောက်လောက်မီးဖိုချောင်စားစရိတ်ပမာဏမျိုးလည်း ဖြစ်ပြန်ပါတယ်။ ဆိုတော့ကာ များလား နည်းလား ချိန်ကြည့်နိုင်ပါတယ်။

အသင်းတွေရဲ့ ဂျာစီရောင်းအားတွေဟာ အတော်များပါတယ်။ ၂၀၂၅ မှာ ရီးရဲလ်မက်ဒရစ်ဟာ ဂျာစီအထည် အရေအတွက် သိန်း (၃၀)ကျော်၊ ဘာစီလိုနာက (၂၉)သိန်းကျော်၊ ပီအက်စ်ဂျီက (၂၅) သိန်းကျော် နဲ့ အများဆုံးရောင်းရသူတွေ ဖြစ်ခဲ့တာပါ။ တစ်ထည်ကို ယူရို (၁၀၀)နဲ့ တွက်ရင်တောင် ရီးရဲလ်မက်ဒရစ် ဂျာစီထုတ်တဲ့ အက်ဒီးဒက်စ်ဟာ ယူရို သန်း (၃၀၀) ကျော်လောက် ဝင်ငွေပြန်ရပါတယ်တွက်နိုင်ပါတယ်။ ဒီတော့ တစ်နှစ်ကို သန်း (၁၀၀) ကျော်လောက််နဲ့ စပွန်ဆာစာချုပ်တွေ ချုပ်တာ မဆန်းတော့ပါဘူး။ ဒီလိုစောစောရောင်းရမှုဆီကနေ အဓိက အကျိုးအမြတ်ရမှာကလည်း စပွန်ဆာပေးထားတဲ့ ကုမ္ပဏီကြီးတွေပါ။ အသင်းတွေက အမြတ်ရဲ့ (၁၀) ရာခိုင်နှုန်းလောက်ပဲ ရပါတယ်။

ပရိသတ်တွေကော ဒီနှစ်ဂျာစီတွေကို ဘယ်လိုသဘောရလဲ၊ အခွင့်သာရင်ကော မြန်မာငွေ (၅)သိန်းကျော်လောက်နဲ့ဝယ်ဖြစ်မလား။

03/06/2026

လက်ရှိအပြောင်းအရွေ့မှာ ခြေလှမ်းအသွက်ဆုံးဖြစ်နေတာကတော့ စပိန်နှစ်သင်းပဲဖြစ်ပြီး၊ ဖလားလက်မဲ့ရာသီတွေ ရင်ဆိုင်နေရတဲ့ ရီးရဲလ်မက်ဒရစ်ဟာ ကိုနာတေး နဲ့ ဒမ်ဖရိုင်းကို ခေါ်ယူဖို့ သဘောတူညီချက်တွေ ရထားခဲ့ပြီဖြစ်ပါတယ်။

ကိုနာတေးကို လီဗာပူးကနေ အလွတ်ခေါ်ယူခဲ့တာဖြစ်ပြီး၊ ဒမ်ဖရိုင်းကိုတော့ ယူရို သန်း(၂၀) နဲ့ ခေါ်ယူခဲြတာလို့လည်း သိရပါတယ်။

ခံစစ်အားဖြည့်ဖို့လိုနေတဲ့ ရီးရဲလ်မက်ဒရစ်အတွက်တော့ ဒီခေါ်ယူမှုနှစ်ခုဟာ လိုအပ်ချက်အရကော၊ တန်ကြေးအရပါ ကောင်းတဲ့အပြောင်းအရွေ့လို့ဆိုနိုင်ပြီး၊ နည်းပြသစ်ဖြစ်လာမဲ့ မော်ရင်ဟိုအကြိုက် ကစားသမား ပုံစံမျိုးတွေလည်း ဖြစ်ပါတယ်။

လီဗာပူးအတွက်တော့ ဗန်ဒိုက်နေရာအစားထိုးဖို့ပါလိုအပ်နေတဲ့အချိန်မှာ ကိုနာတေးကို လက်လွှတ်ခဲ့ရသလို၊ မက်မာနာမန်၊ အိုဝင်၊ ဒူးဒက်၊ အာဘီလိုအာ၊ အလွန်ဆို၊ အာနိုးလ် တို့ပြီးရင် နောက်ထပ် ရီးရဲလ်မက်ဒရစ်ကိုပြောင်းရွေ့သွားတဲ့ကစားသမားဖြစ်ပြီး၊ ဒီကစားသမား (၇)ယောက်အတွက် စုစုပေါင်းပြောင်းရွေ့ကြေးဆိုလို့ ပေါင် သန်း (၄၀)ကျော်လောက်သာ ရခဲ့တာပါ။

01/06/2026

ချန်ပီယံလိဂ်ဖလား (၈)လုံး ၊ Treble (၅) ကြိမ် ပါဝင်ပါသော…

ဒီပုံထဲက လူငယ်သုံးယောက်ဟာ တစ်ချိန််မှာ ဘောလုံးကမ္ဘာရဲ့ ထိပ်ဆုံးဆိုတဲ့နေရာကို ရောက်ခဲ့ကြပါတယ်။ ဂွါဒီယိုလာဟာ လွှမ်းမိုးမှုကြီးမားပြီး၊ ခမ်းနားကြီးကျယ်လှသော အင်ပါယာတွေကို တည်ဆောက်ခဲ့တယ်။ မော်ရင်ဟိုဟာ သူသာလျှင် လုပ်ပြခဲ့နိုင်ခဲ့သည် ဆိုသော အောင်ပွဲတွေနဲ့ Special One ဖြစ်လာခဲ့တယ်။ အင်းနရစ်ဟာ ဘာစီလိုနာနဲ့ ပါရီကို အမြင့်တကာ အမြင့်ဆုံးဆိုတဲ့နေရာတွေ ပို့ပေးခဲ့ပြီး၊ ဘောလုံးကို ဘောလုံးလို ကစားခြင်းဆိုတဲ့ ရိုးရှင်းထိရောက်မှုကို အထက်မြက်ဆုံး ပုံဖော်ခဲ့ပါတော့တယ်။

31/05/2026

အာဆင်နယ် ချန်ပီယံလိဂ်ရှုံးနိမ့်မှုအပြီး ပြိုင်ဘက်အသင်းတွေနဲ့ ကစားသမားတွေရဲ့ မထိတထိ လေတိုက်မှုတွေ ထဲမှာ ချယ်ဆီးရဲ့ ကြော်ငြာကတော့ အကြမ်းဆုံးဖြစ်မယ်ထင်ပါတယ်။

ချန်ပီယံလိဂ်ဖိုင်နယ်ပြီးပြီးချင်းမှာပဲ “လန်ဒန်ရဲ့ ဆုဖလားအစုံစုဝေးရာနေရာကို လာလည်ပါ” ဆိုပြီး သူတို့ရဲ့ အိမ်ကွင်းအလည်အပတ်ခရီးစဉ်ကို ကြေညာသွားပြီး၊ ချန်ပီယံလိဂ်ဖလားပုံ၊ တခြားဥရောပဖလားပုံ တွေနဲ့အတူ “လန်ဒန်ဂုဏ်ဆောင်” ဆိုတဲ့ စာသားတွေနဲ့ တကွ ကြော်ငြာပို့စ်တင်ခဲ့တာပါ။

သေချာတာကတော့ သူတို့ရဲ့ အိမ်ကွင်းအလည်အပတ်ခရီးစဉ်ကို ကြော်ငြာပို့စ်ဆိုပေမဲ့၊ ဒါကို ကြော်ငြာချင်တာတော့ မဟုတ်ဘူးဆိုတာ အားလုံးအသိပဲဖြစ်ပါလိမ့်မယ်။

31/05/2026

အာဆင်နယ်ဟာ အသင်းသမိုင်းတလျောက်မှာ ချန်ပီယံလိဂ်ဗိုလ်လုပွဲကို နှစ်ကြိမ်ကစားခဲ့ပြီး၊ နှစ်ကြိမ်လုံးရှုံးနိမ့်ခဲ့ရတာဖြစ်ပါတယ်။ ၂၀၀၆ တုန်းက ဘာစီလိုနာကို ရှုံးခဲ့တာဖြစ်ပြီး၊ နှစ်(၂၀)အကြာ လက်ရှိမှာတော့ ပီအက်စ်ဂျီကို ရှုံးခဲ့တာပါ။

လက်ရှိကျင်းပဆဲဖြစ်တဲ့ ဥရောပပြိုင်ပွဲတွေမှာလည်း အာဆင်နယ်ဟာ ဖလားနဲ့ဝေးကွာနေရဆဲဖြစ်နေပြီး၊ ယူရိုပါလိဂ် (ယခင်ယူအီးအက်ဖ်အေ) ဗိုလ်လုပွဲတွေမှာလည်း ၂၀၀၀ ခုနှစ်တုန်းက ဂါလာတာဆာရေး၊ ၂၀၁၉ တုန်းက ချယ်ဆီးတို့ကို ရှုံးခဲ့ရတာပါ။

31/05/2026

ထိုက်တန်စွာဖြင့်သာ | ပွဲပြီးအတွေး

လွန်ခဲ့သော နှစ်ပေါင်း နှစ်ရာကျော်လောက်က သမိုင်းဝင် တိုက်ပွဲတစ်ခုရှိခဲ့ပြီး၊ အော်စတာလစ်မြို့အနီးမှာ ဩစတြီးယားတပ်တွေနဲ့ ပြင်သစ်တပ်တွေအကြား ဖြစ်ခဲ့တဲ့ နာမည်ကျော် အော်စတာလစ် တိုက်ပွဲပါ။ ဒီတိုက်ပွဲမှာတော့ နပိုလီယန်ရဲ့ ပြင်သစ်ဟာ သမိုင်းတွင်လောက်မဲ့ နိုင်ပွဲကို ရယူခဲ့ပြီး၊ နပိုလီယန်ရဲ့ ဘုန်းမီးနေလကို အမြင့်ဆုံးရောက်စေခဲ့ပါတယ်။ အခု ၂၀၂၆ မှာလည်း ပြင်သစ်အသင်း ပီအက်စ်ဂျီဟာ သူတို့ရဲ့ လွှမ်းမိုးမြင့်တက်မှုကို အမြင့်ဆုံးရောက်စေမဲ့ နိုင်ပွဲတစ်ပွဲကို အော်စတာလစ်နေရာနဲ့ မိုင် (၂၀၀) ကျော်လောက်အကွာမှာ ရယူခဲ့ပါတော့တယ်။

လွန်ခဲ့သော နှစ်ပေါင်း နှစ်ရာကျော်က နပိုလီယန်ရဲ့ ပြင်သစ်စစ်တပ်၊ အခု အင်းနရစ်ရဲ့ ပီအက်စ်ဂျီတို့ သူတို့ရဲ့ အမြင့်ဆုံးအောင်ပွဲတစ်ခုကို အရယူခဲ့ကြမှုဟာ ဆုံမှတ်တစ်ခုရှိခဲ့ပါတယ်။ ပြင်သစ်လို Masse de Manoeuvre လို့ ခေါ်ပြီး၊ နပိုလီယန်ရဲ့ စစ်ဗျူဟာတွေထဲမှာ အထင်ရှားဆုံးတစ်ခုဖြစ်တဲ့ အရေးပါဆုံးကို သာလွန်အင်အားနဲ့ စုတိုက်ခြင်း သဘောပါပဲ။ ဒီအတွက် ကျောရိုးဟာ အရေးကြီးနေရာ၊ အဆုံးအဖြတ်ထိုးချက်၊ ပြောင်းလွယ်ပြင်လွယ်ဖြစ်မှု စတဲ့ သုံးချက်ဖြစ်ပြီး၊ သဘောတရားကတော့ နေရာတိုင်းကို အသာရဖို့ထက်၊ အရေးကြီးတဲ့နေရာကို လိုတဲ့အချိန်မှာ ထိထိရောက်ရောက် အပီအပြင် အင်အားနဲ့နှက်တာပါ။ ဩစတြီးယားတပ်တွေဟာ မြေပြင်ကို ထိန်းချုပ်နိုင်ပြီထင်နေတဲ့ အချိန်မှာပဲ နပိုလီယန်ရဲ့ တပ်ဟာ အဆုံးအဖြတ်ဖြစ်စေမဲ့ ထိုးနှက်မှုနဲ့ နိုင်ပွဲဆီကို သွားခဲ့ပါတော့တယ်။

ပွဲကို စပြောကြရအောင်ပါ။ ပရိသတ်တွေ တွက်ဆထားပြီးမဲ့ ပုံစံအတိုင်းပဲ၊ အာဆင်နယ်ဟာ ခံစစ်ကို အဓိကအားပြုပြီး စတင်ခဲ့ပါတယ်။ ဒါကို အင်းနရစ်လည်း တွက်ထားပြီးသား ဖြစ်မှာပါ။ ဒါပေမဲ့ အင်းနရစ်မတွက်မိထားလောက်မှာက ပွဲစလို့ သိပ်မကြာခင်မှာပဲ သူ့အသင်းရဲ့ အမှားကနေ ဂိုးပေးလိုက်ရမယ်ဆိုတာရယ်၊ အာဆင်နယ် ခံစစ်က ဒီလောက်တောင် အကွက်စေ့ ထိန်းချုပ်နိုင်မယ်ဆိုတာရယ်ပဲ ဖြစ်ပါလိမ့်မယ်။ ပွဲရဲ့ ပထမဆုံး ဂိုးဟာ စောစောစီးစီးမှာပဲ ဖြစ်လာခဲ့ပါတယ်။ ပီအက်စ်ဂျီရဲ့ အမှားကြောင့်စတာဖြစ်ပေမဲ့၊ ထရော့ဆက်ဒ်ရဲ့ အလုပ်လုပ်တာကော၊ ဟာဗတ်ဇ် ရဲ့ ဘောကြောနပ်၊ ပြေးအားကောင်း၊ အဆုံးသတ်ကောင်း တာတွေကြောင့်လည်း ဖြစ်ခဲ့တာပါပါတယ်။ ပွဲမတိုင်ခင် ကိုထက်စိုးနဲ့ ဒီပွဲအကြောင်းပြောဖြစ်တဲ့အထဲမှာလည်း ဟာဗတ်ဇ်ကိုပဲ သုံးရမှာပဲ ဆိုတာ ပြောဖြစ်ပြီး၊ ဒီလိုပွဲမျိုးအတွက်လိုတဲ့ ဉာဏ်နဲ့ သိစိတ် မြင့်မှုကြောင့်ပါ။

ဒီဂိုးရသွားပြီးတဲ့အခါမှာ အာဆင်နယ်အတွက် ထင်ထားတာထက် ပိုပြီး ခံစစ်ဆော့လို့ကောင်းမဲ့အနေအထားမျိုးကို ပိုင်ဆိုင်သွားသလို၊ တစ်ဖက်မှာလည်း နောက်မှာဆက်ပြောမဲ့ Defender Paradox (ခံစစ်ဝိရောဓိ) ထဲ ရောက်သွားပါတယ်။ ပီအက်စ်ဂျီဟာ ဒီဂိုးအပြီးမှာ ဂိုးပြန်ရဖို့ ဖိပါတော့တယ်။ ခက်တာက ဘောလုံးကိုင်ထားတာသာ ဖြစ်နေပြီး၊ ဘာမှ မယ်မယ်ရရ မလုပ်နိုင်လောက်အောင်ကို အာဆင်နယ် ခံစစ်က ကောင်းနေတာပါ။ ခံစစ်တွေကို ပြောရင် မာကြောတယ်၊ ကျစ်လစ်တယ်၊ ဆိုပြီး များသောအားဖြင့် ပြောလေ့ရှိပေမဲ့၊ အာဆင်နယ် ခံစစ်ကိုတော့ နောက်တစ်ခုပါ ထည့်ပြောရပါမယ်။ ဒါကတော့ အကွက်စေ့နေခြင်းပါပဲ။ ပီအက်စ်ဂျီဟာ အာဆင်နယ် ကာကွယ်ထားဖို့ မလုပ်ထားတဲ့နေရာတွေက လွဲရင် ဘယ်နေရာမှာမှ ချောင်မနေခဲ့ပါဘူး။ ပီအက်စ်ဂျီတိုက်စစ်ကစားသမားတွေ သိပ်ကြိုက်တဲ့ ပြေးလမ်းကြောင်းတွေ၊ နေရာအဟတွေဆိုတာ ဘယ်နားမှာမှ ရှိမနေဘူး။ ဘောလုံးကို ဘယ်ညာပို့ပြီး နေရာလွတ်ရှာရင် ထွက်မလာဘူး။ တစ်ယောက်ချင်းအခွင့်အရေး ကလည်း မရဘဲနဲ့ အာဆင်နယ်ဟာ မသိရင် လူအသာနဲ့ ခံစစ်ကစားနေသလိုဖြစ်နေအောင်ကို အကွက်စိခံစစ်ကို ကွက်ပြည့်နင်းထားတော့တာပါပဲ။ ဆာလီဘာ၊ ဂေဘရီရယ်လ် တို့ဟာ သူတို့ဘေးက အစွန်လူနှစ်ယောက်နဲ့ အတွဲညီညီ ခံစစ်ကစားတယ်၊ စကယ်လီနဲ့ ရိုက်စ်ရဲ့ လုပ်အားနှုန်းဟာ ပီအက်စ်ဂျီဘက်က ဘယ်သူဘောလုံးရရ ရင်ဆိုင်ရမဲ့ လူအဖွဲ့ကြီးထဲ ရှိနေအောင်ကောင်းတယ်။ ဒီကြားထဲ အိုဒီဂတ်က လိုက်ဖြည့်တယ်၊ ပီအက်စ်ဂျီ ကစားရတဲ့အနေအထားက ကြည့်နေရတဲ့ သူတောင် စိတ်ကျဉ်းကြပ် အသက်ရှုပေါက်ပိတ်လာသလို ခံစားမိလာပါတော့တယ်။

ဒါကို အင်းနရစ်ဖြည်ဖို့ ဘယ်လိုလုပ်လဲဆိုတဲ့အပိုင်းပြောကြရအောင်ပါ။ ဒီနေရာမှာ တွေးကြည့်ရရင် အင်းနရစ်ဟာ အာတီတာ ခံစစ်ကစားမှာပဲလို့ တွေးခဲ့မှာဖြစ်ပေမဲ့၊ ဒီလောက်ထိ အကွက်စေ့နေလိမ့်မယ်လို့ တွေးမထားမိခဲ့တာ၊ ဒါမှမဟုတ် ဘယ်လို ခံစစ်ပဲဖြစ်ဖြစ် သူ့အသင်းက ဖြိုနိုင်မယ်လို့ ယုံကြည်ထားတာ မျိုး ဖြစ်ကောင်းဖြစ်နိုင်ပါလိမ့်မယ်။ ပထမပိုင်း တစ်ဝက်လောက်မှာတော့ ပိုပြီးဖြည်ဖို့ကြိုးစားတဲ့အနေနဲ့ ရုဇ်နဲ့ ဗီတင်ဟာ ကို ပိုအသုံးချလာခဲ့ပါတော့တယ်။ ကာဗာရာ ကြပ်နေပြီဖြစ်တဲ့ ဘယ်ခြမ်းမှာ ကာဗာရာကို တည်ကြက်လို သုံးပြီး၊ ရုဇ်ကို အဓိကထိုးနှက်တဲ့အနေနဲ့ သုံးလာပါတယ်။ ဒီလိုလုပ်တာဟာ ဧရိယာထဲကိုတော့ ပိုရောက်လာတယ်ဆိုသော်ငြား ထိရောက်မှုကတော့ မထူးခြားစမြဲပါပဲ။ ပထမပိုင်းပြီးခါနီးလောက်မှ ပီအက်စ်ဂျီဘက် ဂိုးပေါက်တည့်ကန်ချက်စရတာကို ကြည့်ရင် ဒီပွဲဟာ ဘယ်လောက်ကြပ်နေလဲဆိုတာ မြင်သာပါလိမ့်မယ်။

ဒုတိယပိုင်းမှာတော့ပီအက်စ်ဂျီဟာ Masse de Manoeuvre ဗျူဟာကို ခင်းပါတော့တယ်။ ကွင်းရဲ့နေရာစုံကနေ ထိုးနှက်ဖို့ကြိုးစားနေမဲ့အစား၊ သူတို့ ရဲ့ အားအသာဆုံးဘယ်ဘက်ခြမ်းကို စုပြုံကစားဖို့ရွေးလိုက်ပြီး၊ ပြေးလမ်းကြောင်းရှည်တွေ၊ တစ်ဦးချင်းကျော်ဖြတ်မှုတွေအစား၊ လူအစုလိုက်နဲ့ အနီးကပ်အတိုပေးလုပ်ပါတော့တယ်။ ဒ္ကနေပဲ ချေပဂိုးဖြစ်လာစေမဲ့ ကာဗာရာရဲ့ ထိုးဖောက်မှု ဖြစ်ခဲ့တော့တာပါပဲ။ ပီအက်စ်ဂျီရဲ့ အားသာချက်တစ်ခုကလည်း ဒါပါပဲ။ ဒီလိုကစားလို့မဖြစ်တာနဲ့ နောက်တစ်မျိုးကစားနိုင်တဲ့ တိုက်စစ် ပုံစံကွဲမျိုးစုံကို လုပ်နိုင်ခြင်းပါ။

အာဆင်နယ်ဘက်ခြမ်းကို ပြောကြရအောင်ပါ။ ခံစစ်ကစားရအောင်လားလို့ ပြောချင်တဲ့သူရှိရင် ပီအက်စ်ဂျီထက် တိုက်စစ်ပိုကောင်းအောင် မကစားနိုင်ရင်၊ ပီအက်စ်ဂျီလို ပုံစံမျိုးကို အံ့အားသင့်လောက်အောင် အငိုက်ဖမ်းမကစားနိုင်ရင်၊ ဒါမှမဟုတ် ပီအက်စ်ဂျီထက် ဂိုပိုးသွင်းနိုင်မယ်လို့ မယုံကြည်ရင် ခံစစ်ကစားဖို့မှ တစ်ပါးအခြားမရှိပါဘူး။ အာဆင်နယ်ဟာ ဒီရာသီမှာ သိိပ်ကောင်းပါတယ်။ ဒါပေမဲ့ သူတို့ ကောင်းတာဟာ အပေါ်က သုံးချက်အတွက်ကောင်းတာထက်၊ ကျစ်လစ်မာကြောစွာ ကောင်းခြင်းပါ။ ကိုယ့်ရဲ့ အကောင်းဆုံးပုံစံကို အခြေမပြုဘဲ စွန့်စားမှုလုပ်ရင်ကောဆိုတာဟာ တွေးလို့ကောင်းပေမဲ့ ဒီအချိန်မှာ မလုပ်တာပိုကောင်းပါတယ်။ ဟိုလိုလို ဒီလိုလို မပိုင်ဘဲထလုပ်မိလို့ အပြတ်အသတ် ခံလိုက်ရတဲ့ အင်တာနဲ့ လီဗာပူး၊ ပီအက်စ်ဂျီထက် ဂိုးပိုသွင်းနိုင်မယ်လို့ ယုံကြည်ခဲ့တဲ့ ဘိုင်ယန်၊ နောက်တစ်ခါ အငိုက်မဖမ်းနိုင်တဲ့ ချယ်ဆီးတို့ဟာ ပူပူနွေးနွေး ဥပမာတွေပါပဲ။ ဒါဆိုရင် ချဉ်းကပ်မှု မှန်ပေမဲ့ ဘာရှိလဲဆိုရင် အပေါ်မှာပြောခဲ့တဲ့ (Defender Paradox) ခံစစ်ဝိရောဓိ ပါပဲ။ ပွဲတွေမှာ ခံစစ်ကစားဖို့ ပြင်ခဲ့တဲ့ အသင်းတွေဟာ ပွဲအစလောက်မှာ ဂိုးရသွားရင် ခံစစ်ကို နဂိုယိမ်းဖို့ တွေးထားတဲ့ ဒီဂရီထက် ပိုပြီး ယိမ်းသွားတတ်ပါတယ်။ နဂိုက ခံစစ်ဆင်ထားမယ်၊ ပြီးရင် ဘယ်လို တန်ပြန်လုပ်မယ်ဆိုတာအစား တန်ပြန်အပိုင်းကို နဂိုအတိုင်း ဆက်လုပ်ရမှာလား၊ ခံစစ်လုံးလုံး လုပ်လိုက်ရမှာလား ဆိုတာ ဝိရောဓိဖြစ်ကုန်တတ်ပါတယ်။ ဒီလိုကနေမှ ကြိုတင်ပြင်ဆင်ထားတဲ့ တန်ပြန် အစီအမံတွေကို ပွဲအစကတည်းက ကွင်းထဲမှာ မလုပ်ဖြစ်တော့ဘဲ၊ ဂိုးပြန်မပေးရတဲ့အထိ ဒီထဲမှာ ပိတ်မိသွားတတ်တာမျိုးပါ။ ရုတ်တရက်ကြည့်ရင် နဂိုစီစဉ်ထားတာနဲ့ ဘာကွာလို့လဲထင်ချင်စရာရှိပေမဲ့၊ ပွဲအစမှာ ဂိုးရတာနဲ့ ခံစစ်ကစားတယ်၊ တန်ပြန်တယ်၊ ခံစစ်ကစားတယ်၊ ပြီးတော့ ဂိုးရသွားတယ်က ကွဲပြားပါတယ်။

အာတီတာဟာ ခံစစ်ဆင်တာကို မဟာအဆင့်ကောင်းကောင်းပိုင်နိုင်နေပါပြီ။ ဒါပေမဲ့ ပါရဂူအထိရောက်ဖို့ဆိုရင်တော့ ဂိုးရတဲ့ ခံစစ်ဆင်ခြင်းအဆင့်ကိုတက်ဖို့ လိုပါတယ်။ ဒါဟာ လိုအပ်ချက်၊ အားနည်းချက်လို့ ပြောလိုတာထက်၊ ခံစစ်ဆင်ကစားခြင်းရဲ့ ပါရဂူမြောက် အဆင့်ကို ပြောခြင်းသာဖြစ်ပါတယ်။ အဆက်မပြတ်တိုက်စစ်ဟာ အကောင်းဆုံး ခံစစ်ဆိုတဲ့ ပက်ရဲ့ ချဉ်းကပ်မှုလိုမျိုး၊ အကောင်းဆုံးခံစစ်ရဲ့ အဆက်မပြတ် ထိုးနှက်မှု လို့ပြောရမဲ့ မော်ရင်ဟို ရဲ့ ပုံစံမျိုး အဆင့်တွေပါပဲ။ စိတ်ပိုင်းဆိုင်ရာအရ ကြည့်ရင်လည်း တိုက်စစ်ကစားနေတဲ့ အသင်းဘက်ကို မှားရဲ မှားကြည့် ဆိုတဲ့ အကြောက်တရား ရိုက်ထည့်ပေးပြီး၊ နဂိုတည်းကမှ ဖောက်မရလို့ စိတ်ရှုပ်လာတဲ့ ပြိုင်ဘက်ကို အကြောက်တရားပါ ထပ်ထည့်ပေးဖို့ လိုအပ်ခြင်းပါပဲ။

သရေပြန်ကျသွားတဲ့အခါမှာတော့ ပိုပြီး လှုပ်ရှားမှုတွေ တွေ့လာရပြီး၊ ပီအက်စ်ဂျီဘက်ကလည်း သူတို့ကစားချင်သလို နေရာလွတ်နေရလာပါတော့တယ်။ အာတီတာကတော့ ဒီအနေအထားမှာ ဘာလုပ်မယ်ဆိုတာကို ကြိုပြီးတွေးထားပြီးသား ဖြစ်ပုံရပြီး၊ လူစားလဲမှု နှစ်ခုကို ချက်ချင်းလုပ်ပါတော့တယ်။ ပြေးလမ်းကြောင်းတွေ ပေးရတော့မဲ့ အနေအထားမှာ အဝါကတ်ထိပြီးသား မော့စကွဲယားကို လဲတာ ရာနှုန်းပြည့်မှန်ပေမဲ့၊ အိုဒီဂတ်အစား ယော့ခရက်၊ အိုဒီဂတ်-အီဇီ တိုက်ရိုက်က ပိုမကောင်းဘူးလားဆိုပြီးတော့ နည်းနည်းလေးတွေးချင်စရာပါ။ ပြီးတဲ့အခါမှာ တိုက်စစ် ရဲ့ အဓိကအင်အား နှစ်ခုဖြစ်တဲ့ ဆာကာနဲ့ ထရော့ဆက်ဒ်ဟာ ဒီပွဲမှာ တိုက်စစ်အလုပ်တွေ လုပ်ခွင့်မရခဲ့ဘဲ ပွဲချိန်တွေ ကုန်ခဲ့ရတာ၊ အပြန်အလှန်ကစားတော့မဲ့ အချိန်မှာ နှစ်ယောက်လုံးမရှိတော့တာကတော့ နှမြောစရာပါပဲ။

ပီအက်စ်ဂျီဘက်မှာတော့ ကာဗာရာနေရာမှာ ဝင်လာတဲ့ ဘာကိုလာဟာ ပိုလန်းဆန်းတဲ့ပြေးအားနဲ့ အခွင့်အရေးတွေရခဲ့ပါတယ်။ အင်းနရစ်ရဲ့ တိုက်စစ်လက်နက်တစ်ခုဖြစ်တဲ့ ဗီတင်ဟာရဲ့ အဝေးကန်ချက်တွေကလည်း ပိုနီးစပ်လာခဲ့ပါတယ်။ ဒါပေမဲ့ ဂိုးတော့ မဖြစ်ခဲ့ပါဘူး။ ပီအက်စ်ဂျီအတွက်လည်း ပွဲအခင်းကျင်းက သူတို့ စိတ်ကြိုက်ဖြစ်သွားချိန်မှာ ကာဗာရာကော၊ ဒမ်ဘီလီပါ မရှိတော့တာမလို့ ချိန်သားမကိုက်ဖြစ်သွားခဲ့တယ်ပြောရမှာပါပဲ။

အချိန်ပိုမှာတော့ နှစ်သင်းလုံးဟာ အဓိကတိုက်စစ်ကစားသမားတွေ မရှိတော့သလို၊ သတိထားပြီးတော့လည်း ပိုကစားခဲ့ကာ၊ တည်ကန်ဘောတွေကို ပိုဂရုစိုက်ခဲ့ကြပါတယ်။

ပယ်နယ်တီမှာတော့ သိကြတဲ့အတိုင်းပါပဲ။ ပီအက်စ်ဂျီရဲ့ ဆာဖို့နော့ဗ်ရဲ့ ကာကွယ်ပုံတွေဟာ အားရစရာမရှိပေမဲ့၊ အာဆင်နယ်ဘက် ဂိုးပေါက်ကို မတည့်တာ နှစ်လုံးတောင်ဖြစ်ခဲ့ပါတော့တယ်။ ပယ်နယ်တီအခိုက်အတန့်မှာတော့ ကန်သွင်းမှုထက် စိတ်ပိုင်းဆိုင်ရာ ဖိအားတွေ ကွာပါတယ်။ လက်ရှ်ချန်ပီယံလည်းဖြစ်၊ ဒီလို အဆင့်မျိုးကိုလည်း ပိုကစားဖူးတဲ့ ပီအက်စ်ဂျီဘက်ကအမူအရာတွေနဲ့ အာဆင်နယ် ကွာတယ်လို့ ခံစားမိစေခဲ့ပါတယ်။ အထူးသဖြင့် ဂေဘရီရယ် ကန်တဲ့အချိန်မှာ ဘယ်လောက်တောင် ဖိအားဝင်နေလည်း ဆိုတာ မြင်သာလွန်းပါတယ်။ ပယ်နယ်တီမှာ ဖိအား၊ အတွေးပေါင်းစုံက ဝင်တာပါပဲ။ ဒီလိုဖြစ်လာတဲ့အခါမှာ အတင်းဘာမှမဖြစ်ဘူး အေးဆေးဆိုပြီး ပေါ့ပျက်ပျက်ပျက် လုပ်လိုက်တာ၊ second thought ဝင်ပြီး အလွန်အကြူး လုပ်မိတာ စတဲ့ အစွန်းနှစ်ဖက်ဖြစ်တာနဲ့ အမှားဖြစ်တော့တာပါပဲ။

အာတီတာနဲ့ အာဆင်နယ်အတွက် မဖြစ်မနေ လိုအပ်တဲ့ ဖလားအောင်မြင်မှုကို ဒီရာသီမှာ ရထားပြီမလို့၊ ချန်ပီယံလိဂ်ကိုတော့ နှမြောစရာ တစ်ခုအနေနဲ့ပဲ ထားပြီး၊ စဉ်ဆက်မပြတ်အောင်ပွဲတွေ ထပ်ရှာဖို့ပဲ လုပ်ဆောင်ရမှာပါ။ ဒီအစုအဖွဲ့၊ ဓီအဆင့်အတန်း၊ ထပ်လာမဲ့အားဖြည့်မှုတွေနဲ့ဆို ဖြစ်နိုင်ချေတွေ အပြည့်ပါပဲ။

ပီအက်စ်ဂျီကတော့ အင်းနရစ်ပါပဲ။ ကာဗာရာကို ကမ္ဘာ့အဆင့်ဖြစ်လာစေတယ်၊ ဒမ်ဘီလီကို သန်း ၁၀၀ ပေးခဲ့တဲ့ သူ့အသင်းဟောင်းက မမှားပါဘူးလေလို့ စိတ်သက်သာရရစေခဲ့တယ်၊ ဒူရေး၊ ဘာကိုလာ၊ ပါချို၊ အမ်မရီတို့ကို တင်သွားလာခဲ့တယ်။ ဘောလုံးကို ဘောလုံးဆန်စွာနဲ့ ကစားလို့ရပါတယ်ဆိုတဲ့ ယုံကြည်မှု မျိုးကို သက်သေပြ အဓွန့်ရှည်ခဲ့ပြီး၊ ပီအက်စ်ဂျီဆိုတာဟာ ဘယ်ကစားသမား ဘယ်တစ်ဦးတစ်ယောက်ရဲ့ နာမည်ကိုမှ အမှီမပြုထားတဲ့ အမှတ်တံဆိပ်တစ်ခုဖြစ်အောင် တည်ဆောက်ခဲ့ပါတော့တယ်။ ဒီနိုင်ပွဲဟာ အင်းနရစ်နဲ့ ပီအက်စ်ဂျီအတွက် ချွင်းချက်မရှိ ထိုက်တန်စွာနဲ့ပါပဲ။

30/05/2026

Congratulations PSG - Paris Saint-Germain

ပီအက်စ်ဂျီဟာ ချန်ပီယံလိဂ်ခေတ်မှာ ရီးရဲလ်မက်ဒရစ်ကလွဲပြီး ဘယ်သူမှမလုပ်နိုင်သေးတဲ့ နှစ်နှစ်ဆက်တိုက် ချန်ပီယံဆုရယူခြင်းကို လုပ်ပြသွားခဲ့ပါပြီ။ အာဆင်နယ်အတွက်တော့ ဒီနှစ်ဟာ သူတို့ ကာလရှည်ဝေးကွာနေခဲ့တဲ့ ပရီးမီးယားလိဂ်ကို ပြန်လည်ရယူနိုင်ခဲ့ပေမဲ့၊ အိပ်မက်ရှည်ဖြစ်တဲ့ ချန်ပီယံလိဂ်ကိုတော့ လက်တစ်ကမ်းအကွာကနေ ဒုတိယအကြိမ် လက်လျော့ခဲ့ရတာပါပဲ။

ပွဲချိန်အစောပိုင်းမှာတင်ပေးလိုက်ရတဲ့ဂိုး၊ အာဆင်နယ်ရဲ့ အကွက်စေ့မာကြောလှတဲ့ ခံစစ်ကြောင်းတို့ကြောင့်ပထမပိုင်းမှာ ဘာမှမလုပ်နိုင်ခဲ့သလောက် အခက်တွေ့ခဲ့ရပြီးမှ ဒုတိယပိုင်းမှာ ထိုးဖောက်မှု မူကွဲတစ်ခုကနေ ရလာတဲ့ပယ်နယ်တီအခွင့်အရေး ကို အသုံးချပြီး ဆက်သွားခဲ့တာပါ။

ဒုတိယပိုင်းလက်ကျန်မိနစ်တွေကော၊ အချိန်ပိုတွေမှာပါ နှစ်သင်းလုံးဟာ ထပ်မံဂိုးသွင်းနိုင်ခဲ့ခြင်းမရှိတော့ဘဲ၊ ပယ်နယ်တီအဆုံးအဖြတ်မှာတော့ အာဆင်နယ်ဘက်က နှစ်ကြိမ်လွဲချော်မှုနဲ့အတူ ပီအက်စ်ဂျီတို့ ချန်ပီယံဖြစ်ခဲ့ပါတော့တယ်။

ပါရီရဲ့ ပါဝါဟာ ဘောလုံးကမ္ဘာရဲ့ ထိပ်ဆုံးကိုရောက်သွားပါပြီ။ ကစားပုံအရကော၊ အောင်မြင်မှုအရပါ လက်ရှိဘယ်အသင်းကိုမဆို သာနေပြီဖြစ်ပါတယ်။ ဒီအောင်မြင်မှုဟာ ထိပ်ဆုံးကပြောရမဲ့ သူကတော့ အင်းနရစ်ပါပဲ။ အသင်းရဲ့ နာမည်ကျော်တွေအစား၊ ပိုထိရောက် ပိုအလုပ်ဖြစ်တဲ့ ကစားသမားကောင်းတွေကို သွေးသင့်သူသွေး၊ မွေးသင့်သူမွေးပြီး လက်ရှိ ပီအက်စ်ဂျီကို ဖြစ်လာစေခဲ့သူပါပဲ။

အကျယ်တဝင့်ကိုတော့ ပွဲပြီးအတွေးမှာဆက်ရေးပါဦးမယ်။

30/05/2026

လီဗာပူးဟာ အာနေးဆလော့တ်နဲ့ လမ်းခွဲခဲ့ပြီဖြစ်ကြောင်း တရားဝင်ကြေညာခဲ့ပါပြီ။

စတင်ကိုင်တွယ်တဲ့ ရာသီမှာတင် ပရီးမီးယားလိဂ်ချန်ပီယံဖြစ်ခဲ့တဲ့ အထိအောင်မြင်ခဲ့ပေမဲ့၊ ဒုတိယရာသီမှာ ရှုံးပွဲတွေ၊ မတည်ငြိမ်မှုတွေနဲ့ အောင်မြင်မှုမရခဲ့ခြင်းတွေဟာ လမ်းခွဲဖို့ဖြစ်လာစေခဲ့တယ်ပြောရပါလိမ့်မယ်။ လီဗာပူး ခေတ်အသစ်တစ်ခုကို၊ လူအသစ်တွေနဲ့ စတင်ရမဲ့ အချိန်မှာ ဆလော့တ်နဲ့ ဆက်လက်တွဲဖို့ မဖြစ်နိုင်တော့ဘူးလို့ပဲ အသင်းဘက်က ယူဆခဲ့ပုံလည်းရပါတယ်။

ဆလော့တ်ရဲ့ လမ်းခွဲမှုကြောင့် နောက်ရာသီမှာ အာဆင်နယ်က လွဲရင် မန်စီးတီး၊ ယူနိုက်တက်၊ လီဗာပူး၊ ချယ်ဆီး၊ စပါး စတဲ့အသင်းတိုင်းဟာ နည်းပြသစ်/တစ်ရာသီတောင်မကိုင်ဖူးသေးတဲ့ နည်းပြ တွေနဲ့ စတင်ကြတော့မှာပါပဲ။

30/05/2026

ဒီည ဘယ်ဘက်မှာ ရှိမှာလဲ…

ချန်ပီယံလိဂ်ဖိုင်နယ်မှာ ကန်မဲ့အသင်းတွေက သင်အားပေးတဲ့အသင်းတွေဟုတ်ချင်မှဟုတ်ပါလိမ့်မယ်။ ဒါပေမဲ့ ရသွားစေချင်တဲ့အသင်း၊ တိမ်းညွတ်တဲ့အသင်း ဆိုတာကတော့ အမြဲရှိမှာပါပဲ။ ကျွန်တော့်အတွက် ချန်ပီယံလိဂ်ဗိုလ်လုပွဲ ဆိုပြီး သေသေချာချာ ခံစားကြည့်တတ်တဲ့ အချိန်ကစပြီး တိမ်းညွတ်တဲ့အသင်းက အမြဲရှိခဲ့ပြီး၊ နှစ်စဉ်မျှဝေလိုက်ပါတယ်။

ပီအက်စ်ဂျီ vs အင်တာ (ပီအက်စ်ဂျီ)
ဒေါ့မွန် vs ရီးရဲလ် (ရီးရဲလ်)
မန်စီးတီး vs အင်တာ (မန်စီးတီး)
လီဗာပူး vs ရီးရဲလ် (ရီးရဲလ်)
မန်စီးတီး vs ချယ်ဆီး (ချယ်ဆီး)
ပီအက်စ်ဂျီ vs ဘိုင်ယန် (ဘိုင်ယန်)
စပါး vs လီဗာပူး (လီဗာပူး)
ရီးရဲလ် vs လီဗာပူး (ရီးရဲလ်)
ဂျူဗီ vs ရီးရဲလ် (ရီးရဲလ်)
ရီးရဲလ် vs အက်သလက်တီကို (အက်သလက်တီကို)
ဂျူဗီ vs ဘာကာ (ဂျူဗီ)
ရီးရဲလ် vs အက်သလက်တီကို (ရီးရဲလ်)
ဒေါ့မွန် vs ဘိုင်ယန် (ဒေါ့မွန်)
ဘိုင်ယန် vs ချယ်ဆီး (ချယ်ဆီး)
ဘာကာ vs ယူနိုက်တက် (ဘာကာ)
ဘိုင်ယန် vs အင်တာ (အင်တာအင်တာအင်တာ)
ဘာကာ vs ယူနိုက်တက် (ဘာကာ)
ယူနိုက်တက် vs ချယ်ဆီး (-)
အေစီ vs လီဗာပူး (အေစီ)
ဘာကာ vs အာဆင်နယ် (အာဆင်နယ်)
အေစီ vs လီဗာပူး (လီဗာပူး)
မိုနာကို vs ပေါ်တို (ပေါ်တို)
ဂျူဗီ vs အေစီ (အေစီ)

ဘယ်အသင်းရဲ့ ပရိသတ်မှ မဟုတ်ခဲ့တဲ့အတွက် အမာခံအားပေးတာထက် တိမ်းညွတ်အသင်းပဲဖြစ်တာမလို့၊ ကျွန်တော်နဲ့ နှစ်တိုင်းထပ်တူဖြစ်မဲ့ သူတော့ ရှားပါလိမ့်မယ်။ ပရိသတ်တွေရဲ့ ဘယ်ဘက်မှာတွေ ရှိခဲ့ဖူးလဲကိုလည်း မှတ်မိသလောက် ပြန်လည်မျှဝေခဲ့ပါဦး။

Total Sports

05/06/2026

04/06/2026

03/06/2026

01/06/2026

31/05/2026

31/05/2026

31/05/2026

30/05/2026

30/05/2026

30/05/2026

Address

Telephone

Website

Alerts

Contact The Business

Shortcuts

Share

Category