09/10/2026
“မနေရဲလို့ ရေကြည်တို့၊ သာပေါင်းတို့ဘက်ကို ရှောင်လာကြသူတွေ ရှိတယ်။ ပေါ်တာဆွဲတာ ကြမ်းနေတယ်၊ အဖမ်းလည်း ခံရတယ်။ လက်နက်ကြီးတွေ ပစ်လို့ ကြောက်ကြတာလည်း ပါတယ်”
၉၊ အောက်တိုဘာ။
သာပေါင်း၊ ရေကြည် မြို့နယ်တွေ အတွင်းက ရခိုင်ရိုးမ တောင်ခြေနေရာတွေမှာ စစ်တပ်နဲ့ အာရက္ခတပ်တော်(AA) တော်လှန်ရေး ပူးပေါင်းအဖွဲ့တွေ တိုက်ပွဲပြင်းထန်နေပြီး စစ်တပ်ဘက်က လေကြောင်း၊ လက်နက်ကြီး ပစ်ခတ်မှု ပိုများလာတယ်လို့ ဒေသခံတွေက ပြောပါတယ်။
“တိုက်ပွဲတွေကတော့ အရင်ထက် များလာတယ်။ ဘိုးတော် ချောင်းဖျားဘက်မှာ ပိုဖြစ်တယ်။ လေယာဉ်သုံးတာလည်း များတယ်။ တိုက်ပွဲ အခြေအနေတွေကတော့ သူဘက်က တိုးလိုက်၊ ကိုယ့်ဘက်က တိုးလိုက်ပါပဲ။ အသေးစိတ် ပြောဖို့တော့ စောသေးတယ်” လို့ မြေပြင်ရှိနေတဲ့ AA နဲ့ နီးစပ်သူ ဒေသခံ သတင်းရင်းမြစ်တဦးက ပြောပါတယ်။
ရခိုင်ပြည်နယ် အတွင်းက စစ်တွေ၊ ကျောက်ဖြူ မြို့နယ်တို့ရှိ တိုက်ပွဲတွေမှာ အထိနာနေတဲ့စစ်တပ်ဟာ ရခိုင်ပြည် ဝင်ပေါက် ရိုးမအရှေ့ဘက်ခြမ်း တောင်ခြေတွေထိ အင်အားဖြည့် ထိုးစစ်ဆင်လာနေတာ ဖြစ်ပါတယ်။ လက်ရှိမှာ စစ်တပ်ဟာ ရိုးမတောင်ခြေတလျှောက် ကျေးရွာကြီးတွေမှာ အထိုင်စခန်းချပြီး ဒေသခံတွေကို ပေါ်တာဆွဲတာ၊ တောထဲဝင်ဖို့ ဓါးစာခံ ခေါ်တာတွေလည်း လုပ်နေတယ်လို့ ဆိုပါတယ်။
“မနေရဲလို့ ရေကြည်တို့၊ သာပေါင်းတို့ဘက်ကို ရှောင်လာကြသူတွေ ရှိတယ်။ ပေါ်တာဆွဲတာ ကြမ်းနေတယ်၊ အဖမ်းလည်း ခံရတယ်။ လက်နက်ကြီးတွေ ပစ်လို့ ကြောက်ကြတာလည်း ပါတယ်” လို့ ရေကြည်ဒေသခံတဦးက ပြောပါ တယ်။
ပြီးခဲ့တဲ့ အောက်တိုဘာလ ၇ ရက်နေ့ကလည်း ပုသိမ်မြို့နယ် ရွှေသောင်ယံမြို့၊ ဘောမိရွာထဲ စစ်တပ်က ပစ်ခတ်တဲ့ လက်နက်ကြီးကျည် ကျရောက်ပေါက်ကွဲလို့ ရွာခံလင်မယားနှစ်ဦး သေဆုံးခဲ့ရပါတယ်။ ဒါ့အပြင် အောက်တိုဘာ ၁ ရက်နေ့ကလည်း သာပေါင်းမြို့နယ် သစ်ဖြူကျေးရွာအနီးဝန်းကျင်ကို ဗုံးကြဲလို့ ရခိုင်စစ်ရှောင် အမျိုးသမီးတဦး သေဆုံးပြီး တဦးထိခိုက်ဒဏ်ရာရသွားခဲ့ပါတယ်။
အရင်က တိုက်ပွဲအပြင်းအထန်ဖြစ်နေခဲ့တဲ့ ရေကြည်မြို့နယ် မြောက်စမ်းအမြောက်တပ် အမတ ၃၄၄ ဝန်းကျင်နဲ့ လေးမျက်နှာမြို့နယ် ပုသိမ် - မုံရွာကားလမ်းဝန်းကျင်တို့မှာတော့ အခုရက်ပိုင်းတိုက်ပွဲမရှိဘူးလို့ ဒေသခံတွေက ပြောကြပါတယ်။
စစ်တပ်ဟာ ဧရာ၀တီတိုင်းအပါအဝင် ရခိုင်နဲ့အစပ် ဒေသတွေကို အင်အားအလုံးအရင်းသုံးပြီး ၄၉၂၆ စစ်ဆင်ရေး လုပ်နေတယ်လို့ စစ်တပ်ထောက်ခံသူတွေက လူမှုကွန်ရက်မှာ ဝါဒဖြန့်နေပါတယ်။ ရခိုင်ရိုးမ တောင်ခြေတလျှောက် ရေကြည်၊ သာပေါင်းမြို့ နယ်အတွင်းရှိ ရှေ့တန်းစစ်မျက်နှာတွေကို နတခကနေ တဆင့် တပ်မ(၆၆) လက်အောက်ခံ ခလရ(၁)၊ ခလရ(၁၁) တပ်ရင်းတွေ ပို့ထားတယ်လို့လည်း AA ဘက်က သတင်းထုတ်ပြန် ထားပါတယ်။
အာဏာသိမ်း စစ်တပ်ဟာ မကွေး၊ ပဲခူး၊ ဧရာ၀တီ တိုင်းအပါအဝင် ချင်းပြည်နယ် တောင်ပိုင်း စတဲ့ ရခိုင်နဲ့ ထိစပ်နေတဲ့ ဒေသတွေ၊ ရခိုင်ပြည်နယ် အတွင်းက စစ်တွေ၊ ကျောက်ဖြူမြို့နယ်တွေမှာ တပြိုင်နက်တည်း ထိုးစစ်ဆင် တိုက်ခိုက်တာတွေ လုပ်နေပြီး လေကြောင်းဗုံးကြဲတာတွေ ဆက်တိုက်လုပ်နေတယ်လို့ AA က ဆိုပါတယ်။
#ရိုးမတောင်ခြေ #တိုက်ပွဲပြင်းထန်
#ရန်ကုန် #ပဲခူး #ဧရာဝတီ #မြစ်ဝကျွန်းပေါ်
