29/09/2026
■ “ကိုယ်ဝန်နဲ့ ဈေးဝယ်လာတဲ့ အမျိုးသမီးက AA တပ်ဖွဲ့ဝင် ဖြစ်နိုင်မှာလား” - ကိုဝေဟင်အောင် မေးခွန်းထုတ်
(သေဆုံးဒဏ်ရာရသူများထဲတွင် မွတ်ဆလင် အများအပြားပါဝင်)
Western News| စက်တင်ဘာ ၂၉
ရခိုင်ပြည်၊ ကျောက်တော်မြို့ ပိုက်သည်ရပ်ကွက်ရှိ အိန္ဒိယဈေး လေကြောင်းတိုက်ခိုက်မှုတွင် သေဆုံး၊ ဒဏ်ရာရရှိသူများမှာ အာရက္ခတပ်တော် (AA) တပ်ဖွဲ့ဝင်များသာဖြစ်ပြီး AA တပ်၏ ယမ်းတိုက်ပေါက်ကွဲမှုကြောင့် ဖြစ်ပွားခြင်းဖြစ်သည်ဟု အကြမ်းဖက် စစ်ကောင်စီ လော်ဘီများမှ လူမှုကွန်ရက်စာမျက်နှာများနှင့် တယ်လီဂရမ်ချန်နယ်များတွင် ဖြန့်ဝေနေသည့် ပြောဆိုချက်များကို စစ်ဘေးရှောင်အရေး ကူညီနေသူနှင့် နိုင်ငံရေးအကျဉ်းသားဟောင်း ကိုဝေဟင်အောင်က ကိုယ်ဝန်ဆောင်အမျိုးသမီးနှင့် ကလေးငယ်များ ထိခိုက်သေဆုံးခဲ့မှုကို ထောက်ပြကာ ပြန်လည်တုံ့ပြန်ထားသည်။
ယမန်နေ့ စက်တင်ဘာလ ၂၈ ရက်က ကျောက်တော်မြို့ ပိုက်သည်ရပ်ကွက်ရှိ အိန္ဒိယဈေးနှင့် ကစ္ဆပနဒီတံတား လေကြောင်းတိုက်ခိုက်မှုကြောင့် အပြစ်မဲ့ အရပ်သား ၅၀ ဦး သေဆုံးပြီး ၆၀ ဦးခန့် ဒဏ်ရာရရှိခဲ့ကြောင်းနှင့် ဒဏ်ရာရရှိသူများအနက် အနည်းဆုံး ၂၂ ဦးမှာ ပြင်းထန်ဒဏ်ရာရရှိထားသည်။
ယင်းထိခိုက်သေဆုံး၊ ဒဏ်ရာရသူများထဲတွင် မွတ်ဆလင်များလည်း အများအပြား ပါဝင်နေပြီး အရေအတွက်ကို ဆက်လက်စုံစမ်းနေဆဲဖြစ်သည်။
အဆိုပါဖြစ်စဉ်နှင့်ပတ်သက်၍ စစ်ကောင်စီနှင့် ၎င်းတို့၏ လော်ဘီများမှ လူမှုကွန်ရက်စာမျက်နှာများနှင့် တယ်လီဂရမ်ချန်နယ်များတွင် လေကြောင်းတိုက်ခိုက်မှုမဟုတ်ဘဲ AA တပ်၏ ယမ်းတိုက်ပေါက်ကွဲမှုကြောင့် ဖြစ်ပွားခြင်းဖြစ်ကြောင်းနှင့် သေဆုံး၊ ဒဏ်ရာရရှိသူများမှာ AA တပ်ဖွဲ့ဝင်များဖြစ်ကြောင်း သတင်းမှား ဖြန့်ဝေနေကြခြင်းဖြစ်သည်။
ယင်းပြောဆိုချက်များကို တုံ့ပြန်ရာတွင် ကိုဝေဟင်အောင်က ကိုယ်ဝန် ၉ လရှိသည့် အမျိုးသမီးတစ်ဦး ဈေးဝယ်ရန် ထွက်လာစဉ် တိုက်ခိုက်မှုအတွင်း သေဆုံးခဲ့သည့်ဖြစ်စဉ်ကို ထောက်ပြခဲ့သည်။
“ပိုက်သည်ရပ်ကွက်ကပဲ ကိုယ်ဝန် ၉ လနဲ့ အမျိုးသမီးတစ်ယောက်။ နာမည်က ခင်မာနွယ်၊ အသက်က ၃၂ နှစ်။ ဈေးဝယ်ဖို့ ထွက်လာတဲ့အချိန်မှာ ဗုံးကြဲခံရတာနဲ့ သွားတိုးတာ။ သူ့ခန္ဓာကိုယ်မီးလောင်နေရင်းနဲ့ ကလေးငယ်ကို မွေးဖွားခဲ့တယ်။ မိခင်ရော၊ ကလေးငယ်ရော မီးပုံထဲမှာ သေသွားခဲ့ရပါတယ်” ဟု ၎င်းက ပြောသည်။
ထို့အပြင် သေဆုံးသူများအတွင်း ကလေးငယ်များ ပါဝင်နေခြင်းကို ထောက်ပြပြီး ၎င်းတို့မှာ AA တပ်ဖွဲ့ဝင်များဖြစ်သည်ဟု စစ်လော်ဘီများ ပြောဆိုနေခြင်းကို ပြန်လည်မေးခွန်းထုတ်ခဲ့သည်။
“အခုနက ကျနော်ပြောတဲ့အထဲမှာပါတဲ့ ကိုယ်ဝန်ဆောင်အမျိုးသမီးတစ်ယောက်။ ကိုယ်ဝန်ကြီးနဲ့ ဈေးဝယ်လာရင်း ဗုံးကြဲခံရလို့ သေဆုံးသွားတယ်။ သူက AA တပ်ဖွဲ့ဝင် ဖြစ်နိုင်မှာလား။ ပြီးတော့ အခု သေဆုံးထဲမှာ စာရင်းကြည့်လိုက်ရင်လည်း အနည်းဆုံး ၇ ယောက်လောက် ကလေးငယ်တွေပဲ ဖြစ်ပါတယ်။ ဒီကလေးငယ်တွေက AA တပ်ဖွဲ့ဝင် ဖြစ်နိုင်မှာလား။ ဒါကိုလည်း စဉ်းစားစေချင်တယ်။ ပြောရရင် စစ်ကောင်စီက ဆင်သေကို ဆိတ်သားရေနှင့်ဖုံးဖို့ ကြိုးစားတာပဲဖြစ်ပါတယ်။ သူတို့အမှားကို ဖုံးကွယ်ဖို့အတွက် အခြားတစ်ဘက်ကို လက်ညိုးထိုးတာပဲ ဖြစ်ပါတယ်” ဟု ကိုဝေဟင်အောင်က ပြောသည်။
ကျောက်တော်အိန္ဒိယဈေးဖြစ်စဉ်တွင် သေဆုံး၊ ဒဏ်ရာရရှိခဲ့သူများမှာ ဈေးသည်များ၊ ဈေးဝယ်သူများ၊ လမ်းသွားလမ်းလာများနှင့် ကုန်တင်ကုန်ချလုပ်သားများပဲဖြစ်ကြောင်း ဒေသခံပြည်သူတစ်ရပ်လုံးက ပြောဆိုကြသည်။
အကြမ်းဖက် စစ်ခေါင်းဆောင် မင်းအောင်လှိုင်က ငြိမ်းချမ်းရေးဆွေးနွေးမှုများ ပြုလုပ်မည်၊ မြန်မာနိုင်ငံ ငြိမ်းချမ်းရေးရရှိရေး ကြိုးပမ်းမည်ဟု ပြောဆိုနေသော်လည်း အခြားတစ်ဘက်တွင် လူသတ်ဖြတ်နေကြောင်း ကိုဝေဟင်အောင်က ဝေဖန်ထောက်ပြသည်။
“စစ်ကောင်စီဟာ အမြဲတမ်း ရှေ့စကားနဲ့ နောက်စကားနဲ့ မညီတဲ့ အရူးတစ်ယောက်နဲ့ တူပါတယ်။ အမှန်က ငြိမ်းချမ်းရေး လုပ်မယ်လို့ ပြောရင် ငြိမ်းချမ်းရေးမှာ လုပ်ရမယ့် အဆင့်တွေရှိပါတယ်။ ဥပမာ ငြိမ်းချမ်းရေး လိုလားတဲ့ သွင်ပြင်လက္ခဏာတွေ ပြရမယ်။ ငြိမ်းချမ်းရေးနဲ့ လျော်ညီတဲ့ လုပ်ရပ်တွေကို ပြရမယ်။ အခုက အဲလိုမဟုတ်ဘူး။ နိုင်ငံရေးအရ ငြိမ်းချမ်းရေးဆိုတဲ့ စကားလုံးနဲ့ကာပြီးတော့ နောက်မှာ လူသတ်ဖို့ ကြိုးစားနေတာပဲ ဖြစ်ပါတယ်” ဟု ကိုဝေဟင်အောင်က ပြောသည်။
ကျောက်တော်မြို့ အိန္ဒိယဈေးနှင့် ကစ္ဆပနဒီတံတား ဖြစ်စဉ်တွင် သေဆုံးသူ ၅၀ ဦး၊ ဒဏ်ရာရရှိသူ ၆၀ ဦးအထိ ရှိလာသည့်အပြင် မင်းပြားမြို့နယ် စွန်ရဲကျေးရွာနှင့် သံတွဲမြို့နယ် ငပလီကမ်းခြေတို့တွင်လည်း ထိုနေ့အတွင်း လေကြောင်းတိုက်ခိုက်မှုများကြောင့် အရပ်သား ၉ ဦး ထပ်မံဒဏ်ရာရရှိခဲ့သည်။
စက်တင်ဘာ ၁ ရက်မှ ၂၈ ရက်အထိ ရခိုင်ပြည်အတွင်း စစ်ကောင်စီတပ်၏ လေကြောင်းနှင့် လက်နက်ကြီးတိုက်ခိုက်မှုများကြောင့် အရပ်သားပြည်သူ အနည်းဆုံး ၆၁ ဦး သေဆုံးခဲ့ရပြီး ၉၇ ဦးအထိ ဒဏ်ရာရရှိခဲ့ကြောင်း Western News မှတ်တမ်းများအရ သိရသည်။
ပုံစာ - စစ်ကောင်စီ လေကြောင်းဗုံးကြဲ၍ ထိခိုက်ပျက်စီးမှုမြင်ကွင်းနှင့် သေဆုံးသူများထဲတွင် မိသားစုဝင်များ ပါဝင်သွား၍ ကျန်ရစ်ခဲ့သူများ ငိုကြွေးနေကြစဉ်။ (ဓါတ်ပုံ - AA Info DesK)
#ရခိုင်ပြည် #လေကြောင်းဗုံးကြဲခံရ #အရပ်ပြည်သူများ #အစုလိုက်အပြုံလိုက်သေဆုံး #အကြမ်းဖက်စစ်ကောင်စီ #စစ်ရာဇဝတ်မှုကျူးလွန်ခြင်း #နိုင်ငံတကာမှအရေးယူပေးရန်လိုအပ်နေ
