19/02/2024
ပအိုဝ်ႏဒေႏသကို စဲ့ပွယ်ꩻဧရိယာႏ ကွဲးလုဲင်းလုဲင်းလွဥ်။ လမ်းဖုံႏ၊ ဒုံဖုံႏ၊ ဝေင်ꩻဖုံႏတဲ့ ကွဲးကုဲင်ကုဲင်။ ခမ်းသားလုထုတဲ့ အသီအမားကွဲးအာအာ၊ စဲ့ပေးဆလꩻဖုံႏအသီအမာႏဖုံႏတဲ့ ကွဲးအာလွဥ်နေနေ။ စဲ့ပွယ်ꩻပဋိပက္ခယို အအီႏထွူမုဲင်ꩻခါနဝ်ꩻ လွိုတဲင်ဗွေႏဘုရာꩻမွန် ပုဂ္ဂိုလ်ႏတမုဲင်ꩻမုဲင်ꩻတဲ့ ရတသေနွောင်ꩻတဝ်း။
ထာꩻမာꩻသွို့ခြံဖုံႏတဲ့ မာꩻဗာႏဒွုမ်တဲင် ထွာလိုꩻ"အလုပ်လက်မဲ့"သားတဲ့ ကွဲးအာအာလွဥ်။ ကွယ်ႏတွော့ ယိုခါနဝ်ꩻ ကူႏငီႏချာငါဝင်ꩻ အဆင်ႏအဝ်ႏပြေႏနေက။ အတာႏဆွာꩻနဝ်ꩻ နန်းဗာႏ။ ပအိုဝ်ႏဒေႏသနဝ်ꩻ အဝ်ႏခမ်းကူသမ်းမွေးတဝ်း၊ အဝ်ႏဒျားအကဲဥ်ကိုတဲင် အီလꩻဗာႏ ကုလသမဂ္ဂဒုက္ခသည်ကူႏငီႏရေꩻသား(UNHCR)အစွိုꩻတွမ်ႏ ကုလသမဂ္ဂစားနပ်ရိက္ခာ(WFP)အစွိုꩻအထျꩻ အကူႏငီႏတဲ့နဝ်ꩻ NGO, INGOအစွိုꩻသားအထျတဲ့နဝ်ꩻ ရတယိုꩻတဝ်း။ စဲ့ဘေꩻကခံႏဗာႏ ဖူးဝေးခမ်းရင်ꩻသားအလင်ကထွာဒါႏ စောက်ဖုံႏ၊ ရခဲင်ႏဖုံႏ၊ ခင်ႏဖုံႏ၊ ချင်ꩻဖုံႏနဝ်ꩻ အဝ်ႏနယ်ႏစပ်(ခမ်းကူ)တဲင် ဆေ့ဆေ့အာအာ လꩻနွောင်ꩻ ခမ်းထန်ႏသားအထျꩻ အကူႏအငီႏ။
နဝ်ꩻမ ခေတ်ပညာႏဒါႏပအိုဝ်ႏပေးသီးတဲ့နဝ်ꩻ ယိုခါကအဝ်ႏမာꩻဒါႏ မိဥ်ႏမွေးတဝ်းတဲ့ ကရီးခါကအဝ်ႏမာꩻဗာႏဖိုဒါႏ NGO တွမ်ႏ INGOထာꩻမာꩻအကို ပအိုဝ်ႏပေႏသီးနဝ်ꩻ အခေႏနေႏမိဥ်ႏဖေႏ အဝ်ႏလိုႏရုဲင်ꩻတသွိုးဖေႏ စဲ့ဘေꩻကခံႏဗာႏခမ်းသားမွိုးဖါသီးအတာႏ "လူသားစာနာမှု"အကူႏငီး ခမ်းထန်ႏသားအထျꩻသွူ။
စဲ့ပွယ်ꩻကထွာယိုခါနဝ်ꩻ ကားကားနဲ့ ဆို့ရုဲင်ခိန်ႏမွေးတဝ်းတဲင် ရိုꩻဗာႏ အပေါင်းသက်သာႏ။ စဲ့ပွယ်ꩻသီးသဘာဝအလꩻ ပေါႏခမ်းလင်ꩻခိန်ႏ ခမ်းခါရာႏသီႏခိန်ႏနဝ်ꩻ အအုံပဆားကဲဥ်းအာ။ ဒဲဥ်ရုတ်လာ (၅-လပိုင်း)ရပ်သူꩻနဝ်ꩻ ခမ်းလော့လင်ꩻစခိန်ႏ ဆို့ရုဲင်စခိန်ႏ။ မိဥ်ႏတွိုႏအခိန်ႏနဝ်ꩻ ခမ်းသားနွို့သဲင်ꩻချာဒုံခွင်ꩻ ဆို့ရုဲင်ခွင်ꩻမိဥ်ႏလနဝ်ꩻ နေင်ႏလေအတာႏ ခမ်းသားမွိုးဖါအတာႏအံႏအွရေꩻ တွမ်ႏ သက်မွန်ဗန်ရေꩻယို အခေႏအနေႏ သက်သာႏနွောင်ꩻ။ စူခွုမ်သားစွိုꩻတဲ့ ခမ်းသားအလောင်းယို အခွဥ်ႏအခတွမ်ႏ စားနပ်ရိက္ခာႏဖုံႏ အအီႏလꩻနွောင်ꩻတဲင် ရအီႏအွဥ်ႏဆွိုးဒါႏ တွိုက်ခပွယ်ꩻ။
နုဲင်းကထွားတေ့နဝ်ꩻ စဲ့မန်းနဝ်ꩻ နေးတွမ်း နဲင်ႏငန်ႏတောႏဘတ်ဂျက်အာႏတဲင် အရွဥ်ဖုံႏ လက်နက်ဖုံႏ ရိက္ခာႏဖုံႏ အအီႏတချ အအီႏယပ်နဝ်ꩻ ရတထွာတဝ်း။ ခမ်းရင်ꩻသားစူခွုမ်စွုမ်ႏစွိုꩻနဝ်ꩻ အအုံနောင်ကွို့ ခမ်းသားအလောင်း အခွဥ်ႏအခ(ဆက်ကြေး)တွမ်ႏ အလူႏသျင်ႏသားရွဥ်။ အသွို့ခြံ,အစီꩻပွာꩻရေꩻ တဲးတဲးဝါးဝါး တအဝ်ႏတဝ်း။ အမဲဥ်ႏတရာꩻအလꩻ ပအိုဝ်ႏစူခွုမ်သားအစွိုꩻမုဲင်ꩻတယဝ်း ကအီႏလꩻဗာႏ လိုꩻမျိုꩻလင်ခမ်းထန်ႏသားအထျꩻစဲ့ရေꩻအကူႏအငီႏဖုံႏနဝ်ꩻ တယိုꩻတဝ်း။ အသဲင်ထေ့ယင်းဒျာႏ ခမ်းသားထျ၊ နဝ်ꩻမဘုရာꩻဟော်ꩻခါꩻ "ရာဇတော ဝါ"ငဝ်းနဝ်ꩻ မဲဥ်ႏတန်။
ဆို့ရုဲင်ခိန်ႏ ခမ်းခါခိန်ႏတွင်ꩻ စူခွုမ်သားဖုံႏ ပေါႏတအွဥ်ႏဆွိုးတဝ်း တွိုက်ခပွယ်ꩻတဲ့ ခမ်းသားတဲ့ အံႏမ၊ ဝွေꩻသီးတဲ့အံႏမနေနေ။ အသွို့အခြံတအဝ်ႏတဝ်း၊ အစီꩻပွာꩻရေꩻတန်တန်တဲ့ တအဝ်ႏတဝ်း။ ကွယ်ႏတွော့ အမိဥ်ႏမာအာအာဒါႏ တရာꩻတဝင်ႏတဝ်း စီꩻပွာꩻရေꩻနဝ်ꩻတဲ့ ဒေါ့ဒါႏတဝ်း၊ ရွဥ်လွိုင်ႏဒါႏသွူ။
ဆို့ရုဲင်ခိန်ႏနဝ်ꩻ သဲင်ချာဒုံခွင်ꩻ၊ ဆို့ရုဲင်ခွင်ꩻ မိဥ်ႏလခန်းတယဝ်း အနီꩻအရင်ꩻမိဥ်ႏအဝ်ႏတဝ်းတဲ့ ခမ်းသားယို အယပ်ယင်းဒျာႏ။ နဝ်ꩻမ အနီꩻအရင်ꩻအာႏ ကသန်ကတလာဒါႏ နီပအိုဝ်ႏပွယ်ꩻစားသီးနဝ်ꩻ အဝ်ႏလိုႏပွိုင်ဆင်ခါꩻ ဆို့ရုဲင်ရေꩻအနီꩻအရင်ꩻ၊ ယံဖေႏအပ်ကူႏငီႏနွောင်ꩻ ယံကဖေႏငါးနွောင်ꩻရီး စဲ့ဘေꩻကခံႏဗာႏဒါႏ သွို့ခြံလုဲင်းလွုပ်သားဖုံႏအတာႏ အနီꩻအရင်ꩻသွူ။
နဝ်ꩻမ ကထွာဒါႏ ပအိုဝ်ႏစူခွုမ်သားနီသွံစွိုꩻခေါင်းဆောင်တန်သီးတဲ့နဝ်ꩻ အစွိုꩻနွို့သားတဖြာꩻစီႏတဲ့နဝ်ꩻ ကဖေႏအာႏဒါႏသားတဖြာꩻစီးတဲ့နဝ်ꩻ ယူႏကဝ်းခါꩻရီးသွော့ ဆို့ရုဲင်ꩻရေꩻကိစ္စဖုံႏယို။ ခမ်းသားတဖြာꩻရိုꩻရိုꩻအနေႏငါတဲ့ အဝ်ႏယူႏငေါဝ်းနွောင်ꩻရီးက အွဥ်ငါခေါင်းဆောင်တန်သီးနဝ်ꩻ တယူႏကောဝ်းနွောင်ꩻတဝ်း အခရာႏတအဝ်ႏတဝ်း၊ ယူႏကောဝ်းနွောင်ꩻသေႏချာႏအကျောင်ꩻယို ယွုမ်းအံႏဒျာႏသွူ။
အယံသွတ်နေႏ မဲဥ်နိုꩻဆော်ႏငါႏ ပွယ်ꩻစာꩻတန်သီးတဲ့နဝ်ꩻ ခမ်းသားတဖြာꩻစီႏတဲ့နဝ်ꩻ ဆို့ရုဲင်ခိန်ႏသူꩻနဝ်ꩻ အချင်ꩻချင်ꩻ ဖေႏကကူႏငီႏနွောင်ꩻဝင်ꩻ အနီꩻအရင်ꩻအတာႏ ရွဥ်ကလို့ပျင်ႏအီဒါႏ အရေးတကီꩻတဝ်းပွယ်ꩻဖုံႏ ရွဥ်ကလို့ပျင်ႏအီထာꩻမာꩻဖုံႏယိို အဝ်ႏလိုႏသျောင်ႏငါႏဝင်ꩻ စွုမ်းဖြာꩻဖြာꩻသွူ။
လိုꩻသေလိုꩻဒါႏ လိုꩻကယူႏကဝ်းရီးဒါႏ ပုဂ္ဂိုလ်ႏခွန်နင်ꩻသီးကားကအဝ်ႏ ယူႏခံႏကိုသွော့ဝင်ꩻ ပငါပရာꩻဖုံႏသြ....
Crd:Cherry Myay Ashin
February 19, 2024
