02/07/2025
"ဆရာစံမြို့သစ်ထဲမှာ ပန်းရံလုပ်နေတဲ့ သီဟဦး ဆိုတဲ့ကောင်လေးကို အုပ်ကြီး တင်စိုး ရာအိမ်မှူး သန်းစိုး ဦးဆောင်ပြီး စစ်သားတွေ ရဲတွေ ပျူတွေနဲ့ တရားခံဖမ်းသလို အလုပ်ထဲအထိ လာရောက်ဖမ်းဆီးသွားပါတယ်။ သီဟဦး မင်းစစ်မှုထမ်းရမယ့်စာရင်းပါနေလို့ အခုချက်ချင်းလိုက်ခဲ့ဆိုပြီး အတင်းခေါ်သွားတာ"ဟု ဒေသခံတစ်ဦးမှ Tharyarwaddy 8 City ကို ရှင်းပြသည်။
သာယာဝတီမှာ အုပ်ချုပ်ရေးမှူးတင်စိုးနဲ့ ရာအိမ်မှူးတို့ ဦးဆောင်သော စစ်ကောင်စီတပ်ဖွဲ့မှ ပန်းရံလုပ်နေသည့် လူငယ်တစ်ဦးအား စစ်မှုထမ်းရမည်ဆိုကာ ပေါ်တာဆွဲ
Tharyarwaddy 8 City / ဇူလိုင် ၂၊ ၂၀၂၅
ပဲခူးတိုင်းအနောက်ခြမ်း၊ သာယာ၀တီခရိုင်ရှစ်မြို့နယ်ထဲက သာယာဝတီမြို့နယ်၊ အောက်လက်ပံခုန်အုပ်စု အုပ်ချုပ်ရေးမှူး တင်စိုး၊ ရာအိမ်မှူး သန်းစိုး တို့ ဦးဆောင်သည့် စစ်တပ်၊ ရဲနှင့် ပျူစောထီးများမှ ဇူလိုင်လ ၁ ရက် ယမန်နေ့ နံနက် ၉ နာရီ ၄၅ မိနစ် အချိန်တွင် မြောက်ဝါးလေးရုံရွာနေ ဦးအောင်နိုင်အေး ၏သား မောင်သီဟဦး အား စစ်မှုထမ်းရမည်ဆိုကာ ၄င်းပန်းရံလုပ်နေသည့် ဆရာစံမြို့သစ် အလုပ်ဆိုဒ်၌ ဝင်ရောက်ပေါ်တာဆွဲသွားကြောင်း သတင်းရရှိပါသည်။
"ဆရာစံမြို့သစ်ထဲမှာ ပန်းရံလုပ်နေတဲ့ သီဟဦး ဆိုတဲ့ကောင်လေးကို အုပ်ကြီး တင်စိုး ရာအိမ်မှူး သန်းစိုး ဦးဆောင်ပြီး စစ်သားတွေ ရဲတွေ ပျူတွေနဲ့ တရားခံဖမ်းသလို အလုပ်ထဲအထိ လာရောက်ဖမ်းဆီးသွားပါတယ်။ သီဟဦး မင်းစစ်မှုထမ်းရမယ့်စာရင်းပါနေလို့ အခုချက်ချင်းလိုက်ခဲ့ဆိုပြီး အတင်းခေါ်သွားတာ"ဟု ဒေသခံတစ်ဦးမှ Tharyarwaddy 8 City ကို ရှင်းပြသည်။
အောက်လက်ပံခုန်အုပ်စု အုပ်ချုပ်ရေးမှုး တင်စိုး၊ ရာအိမ်မှုး သန်းစိုး၊ ညောင်နီကုန်းရွာ ရာအိမ်မှုး တင်လှ၊ လက်ခွဲရွာနှင့် ဝါးလေးရုံရွာ ရာအိမ်မှုး မျိုးဇော် တို့သည် စစ်တပ်အားကိုးဖြင့် ပြည်သူများကို အနိုင်ကျင့်ဗိုလ်ကျနေပြီး ဒေသခံများထံမှ စစ်မှုထမ်းထောက်ပံ့ကြေးဟုဆိုကာ တစ်အိမ်လျှင် သုံးသောင်းငါးထောင်ကျပ်မှ ငါးသောင်းကျပ်အထိ လစဥ် အတင်းအကြပ် ကောက်ခံနေသလို မရှိနွမ်းပါးကြသည့် လူငယ်များအား အတင်းအကြပ် ပေါ်တာဆွဲ ဖမ်းဆီးခြင်းများ လုပ်ဆောင်နေကြောင်း သိရှိရပါသည်။
"ညောင်နီကုန်းက ရာအိမ်မှူးတင်လှအိမ်မှာ ကြက်ဝိုင်း ဂျင်ဝိုင်း ဖဲဝိုင်း အာဝါဒေးဝိုင်းတွေကို လုပ်နေတာကြာပါပြီ ဘယ်သူမှမဖမ်းဘူး။
အုပ်ကြီးတင်စိုးနဲ့ ရာအိမ်မှူးတွေက စစ်တပ်အားကိုးနဲ့ လစဥ်လတိုင်း စစ်မှုထမ်းကြေး တစ်အိမ် ၃၅၀၀၀ကနေ ၅၀၀၀၀ အထိ အတင်းအကြပ် တောင်းပါတယ်။ မရှိနွမ်းပါးကြတဲ့ လူငယ်တွေကို အိမ်ပေါ်တက်ပေါ်တာဆွဲပြီး တစ်ယောက် သိန်း၅၀နဲ့ ရောင်းစားတယ်။ စစ်မှုထမ်းကြေးငွေနဲ့ လူငယ်တွေရောင်းစားတဲ့ငွေတွေရနေတော့ သူတို့တွေ အလုပ်မလုပ်ဘဲ ချမ်းသာနေကြပြီ။ PDFတွေအနေနဲ့ ဒီလူတွေကို အမြန်ဆုံး အရေးယူပေးကြဖို့လည်း အားလုံးကိုယ်စား မေတ္တာရပ်ခံပါတယ်"ဟု ဒေသခံတစ်ဦးမှ ပြောသည်။
သတင်း - ဝတီမောင်
စာတည်း - ရာမန်
#သာယာဝတီမြို့နယ်
