17/03/2025
ပါမောက္ခချုပ်ဆရာတော်ဘုရားကြီးကို CAE က တက္ကသိုလ်ဝင်တန်း ကျောင်းသူလေးတစ်ယောက် မေးတဲ့ မေးခွန်းလေး-
(အမေး)
လောကမှာ လူလိမ္မာနဲ့ လူမိုက်ဆိုရင် ဘာကြောင့် လူမိုက်က ပိုပြီး များပြားနေရတာပါလဲ။ ဘာကြောင့် လူမိုက်ကို ရှောင်ရှားသင့်ပါသလဲ အရှင်ဘုရား။
(အဖြေ)
လောကမှာ လူမိုက်တွေက လူလိမ္မာတွေထက် ဘာကြောင့် ပိုပြီး များပြားနေရသလဲ၊ ဘာကြောင့် လူမိုက်ကို ရှောင်ရှားသင့်ပါသလဲဆိုတာကို ဥပမာတစ်ခုနဲ့ ဘုန်းဘုန်းပြောပြမယ်။
ဥပမာ- သရက်သီး ၁၀လုံးမှာ ၁လုံးက ပိုးကိုက်နေတယ်။ အဲဒီ ပိုးကိုက်နေတဲ့ သရက်သီးကို အလယ်မှာထားပြီး ပိုးမကိုက်တဲ့ သရက်သီး ၉လုံးကို ဘေးကနေ ဝန်းရံထားမယ်ဆိုရင် အဲဒီပိုးကိုက်နေတဲ့ သရက်သီးကို ပိုးမကိုက်တော့အောင်၊ ပကတိ ပြန်လည်ကောင်းမွန်လာအောင် ကျန်တဲ့ ၉လုံးက မကုစားပေးနိုင်ဘူး။ ကျန်တဲ့ ၉လုံးကပဲ ပိုးကိုက်ခံရပြီး ပျက်စီးသွားတတ်တယ်။
အဲဒီလိုပဲ။ လူကောင်း ၉ယောက်က လူမိုက် ၁ယောက်ကို ကောင်းအောင်ပြုပြင်ပေးဖို့ဆိုတာ မတတ်နိုင်ဘူး။ ခက်ခဲလွန်းတယ်။ မကောင်းတဲ့ လူမိုက်ကြောင့်ပဲ လူကောင်း ၉ယောက်ဟာ ပျက်စီးခြင်းသို့ ရောက်နိုင်တယ်။
အဖွဲ့အစည်းတစ်ခုမှာ၊ နေရာတစ်ခုမှာ၊ လူမိုက်တစ်ယောက်ပါရင် အဲဒီအဖွဲ့အစည်း အသိုင်းအဝိုင်းဟာ ပျက်စီးသွားကြတာ များတယ်။ ပုထုဇဉ်ဆိုတဲ့ သဘောအရ ကောင်းတာနဲ့ မကောင်းတာဆို မကောင်းတဲ့ဘက်မှာ သာယာကြတာ များတယ်။ ထို့ကြောင့် လူမိုက်တွေဟာ လူကောင်းတွေထက် ပိုပြီး များပြားလာရတယ်။
ဗုဒ္ဓဘာသာဝင်အများစု သိကြတဲ့ မင်္ဂလာတရား ၃၈ ပါး တရားတော်ထဲမှာ အရေးကြီးဆုံးအချက်ဖြစ်လို့ မြတ်စွာဘုရားက "လူမိုက်ဆိုရင် ရှောင်သွေလွဲလို့ မမှီဝဲနဲ့ ကင်းအောင်နေ" ဆိုပြီး ပထမဆုံးအချက်မှာ ထည့်သွင်းမိန့်ကြားခဲ့တာ ဖြစ်တယ်။
လူမိုက်တစ်ယောက်ကြောင့် ပျက်စီးသွားတဲ့ လူလိမ္မာ များစွာရှိတယ်။ ဒါကြောင့် လူမိုက်ကို ရှောင်ရှားသင့်တယ်လို့ မြတ်စွာဘုရားက ဟောကြားတော်မူခဲ့ပါတယ်။
(ပါမောက္ခချုပ်ဆရာတော်
ဒေါက်တာ အရှင်နန္ဒမာလာဘိဝံသ)
Credit to စာပေဥယျာဉ်
