01/09/2022
⚠️ ကျွဲကောသီးနှင့် တွဲဖက်မသောက်သုံးသင့်သော ဆေးများ ⚠️
ကျွဲကောသီးသည် အသည်းတွင်ရှိသော CYP450 3A4 အင်ဇိုင်းများ၏ လုပ်ဆောင်မှုကို ဟန့်တားနိုင်စွမ်းရှိပါသည်။ ထိုအင်ဇိုင်းများသည် အနောက်တိုင်းဆေးဝါးအချို့ကို ဓာတ်ပြယ်အောင်ပြုလုပ် (Metabolize) ပေးသောကြောင့် ယင်းဆေးဝါးများမှာ ပုံမှန်ပျက်စီးခြင်း မရှိတော့ဘဲ သွေးထဲတွင် စုပုံလာပါသည်။ နေ့စဉ်သောက်သုံးသည်နှင့်အမျှ တစ်နေ့တခြား များလာပြီး သောက်သည့်သူကို ဆေးပမာဏလွန်ကဲခြင်း (Drug overdose) ဖြစ်စေနိုင်ပါသည်။ ထို့ကြောင့် ကျွဲကောသီးကို အနောက်တိုင်းဆေးဝါးအချို့နှင့်အတူ တွဲဖက်စားသုံးခြင်းမှ ရှောင်ကြဉ်ရပါမည်။ အထူးသတိထားရန် လိုအပ်သော ဆေးများမှာ-
♦️ စိတ်ရောဂါအတွက် အသုံးပြုသောဆေးများ (Psychotropics and antidepressants)
ဥပမာ - ဒိုင်ယာဇီပန် (Diazepam)
♦️ အဆီကျဆေးများ (Anti-cholesterol)
ဥပမာ - အေတိုဗာစတက်တင် (Atorvastatin)၊ လိုဗာစတတ်တင် (Lovastatin)၊ ဆီရီဗာစတတ်တင် (Cerivastatin)
♦️ သွေးတိုးကျဆေးများ (Antihypertensive)
ဥပမာ - အေမီယိုဒရုန်း (Amiodarone)/ ကော်ဒရုန်း (Cordarone)၊
လိုစာတန် (Losartan)၊ နီဖတ်ဒပင်း (Nifedepine)၊ အမ်လိုဒပင်း (Amlodipine)
♦️ ပဋိဇီဝဆေးအချို့ (Antimicrobials)
ဥပမာ - အရီသရိုမိုင်ဆင် (Erythromycin)၊ ကွီနင်း (Quinine)၊ အီထရာကိုနာဇိုး (Itraconazole)
ထို့ကြောင့် အနောက်တိုင်းဆေးဝါးများကို သောက်သုံးနေသူများသည် ကျွဲကောသီးကိုစားလျှင် ဆေးနှင့် (၆) နာရီခန့် ခြားပြီးမှသာ စားသင့်ပါသည်။ ထို့အပြင် တစ်နေ့လျှင် ဆေး (၄) ကြိမ် သောက်နေရသည့် အခြေအနေမျိုးတွင် ကျွဲကောသီးကို မစားသုံးသင့်ပါ။
ကျွဲကောသီးမှာ ကျွန်တော်တို့နိုင်ငံတွင် ပေါများစွာရရှိပြီး တစ်လုံးခွဲရုံနှင့် အိမ်ရှိ လူအကုန်စားနိုင်သော သစ်သီးဖြစ်ပါသည်။ ဓာတ်မတည့်သူမှအပ လူတိုင်း မကြာခဏ စားပေးသင့်ပါသည်။ သို့ရာတွင် အနောက်တိုင်းဆေးဝါးများ သောက်နေသူများမှာမူ သတိထားပြီး စားရန်လိုပါသည်။ အထူးသဖြင့် ညဘက် ခြေသလုံးကြွက်တက်သူများ အထူးအားကိုးရသည့် သဘာဝသစ်သီးတစ်ခု ဖြစ်ပါကြောင်း အကြံပြုတင်ပြအပ်ပါသည်။
ဒေါက်တာခင်မောင်လွင် (FAME)
ကိုးကားချက် - "သစ်သီးများနှင့် ကျန်းမာရေး" စာအုပ်၊ အခန်း (၁၃) ကျွဲကောသီးမှ ထုတ်နုတ်ဖော်ပြသည်။
