THE TEDIM POST

28/09/2025

➤ WEEKLY NEWS TANGKONA
Kal khat sunga Zogam thuthangte genkikna
Sep 28, 2025 ❖ THE TEDIM POST
Youtube Link ➤➤ https://youtu.be/0CsjYgQAB1U

28/09/2025

Hello! Dam maw Zomi! Tedim Post pan hong muakkik ung. Tuni Tang kha ni 28 (Nipini) September 28, 2025 kal khat sung thuthangte genkikna hong nei ning.
A kihel ding thulute in-
➤ PALETWA TOWNSHIP AH KITEELPI KIBAWL ZOLO AHIH MANIN KHUMI NATIONAL PARTY MIN TAWH MAKAI KIDEMNA AH MI KHAT BEK KIHEL SAK ZO
➤ MINDAT KHUAPI AH VANLAM TAWH KIDONA HUHAU IN INN 7 KISIA
➤ DAAI KHUA AH NATGUAL HANG-IN CINA MI KI BEHLAPLAP A ZATUI KI TANGSAM
➤ NCC IN CHIN STATE SUNG KITEELPI BAWLTHEIHNA MUN TENG AH KIDEM DING IN MIN PIA KHIN
➤ SAC MAKAIHNA TAWH A KIBAWLDING KITEELPI AH CHIN STATE PAN ZNP PARTY KIDEM SAWM
➤ CHIN BROTHERHOOD UKNA NUAI A OM KITEELPI A BAWLSAWM KHEMPEUH CB IN KHAM
……………………………………
➤ PALETWA TOWNSHIP AH KITEELPI KIBAWL ZOLO AHIH MANIN KHUMI NATIONAL PARTY MIN TAWH MAKAI KIDEMNA AH MI KHAT BEK KIHEL SAK ZO
Chin state, Paletwa township ah 2025 kiteelpi kibawl zolo ding ahih manin Khumi National Party min tawh Proportional Representation System zui-in kiteelna ah makai khat bek kihel sak zo ding uh hi cih Khumi National Party makai U Aung Ba in pulakna nei hi.
“Khumi te a tamzaw teenna mun ahi Paletwa leh Chin state sung a om township 4 ah kiteelpi a kibawl theih loh teh mundang ah kidem ding haksa hi. Tua huhau in Party Vice President ahi U Kan Lin pen teelcing makai kidemna ah kihel ding in min a kipia hi” cih zong genbehna nei hi.
……………………………………
➤ MINDAT KHUAPI AH VANLAM TAWH KIDONA HUHAU IN INN 7 KISIA
Chin state, Mindat township khuasung mun 2 ah SAC in September 21 nitak in vanlam pan bomb nih vei khiat uh a khuasung mite teenna inn 7 ki sia hi cih thu khuasung mite tungtawn in kitheikhia hi. Nitak 9:42pm in khat vei leh 9:50pm in khat vei khiat uh a, bomb tang 4 pha hi cih zong pulak uh hi.
……………………………………
➤ DAAI KHUA AH NATGUAL HANG-IN CINA MI KI BEHLAPLAP A ZATUI KI TANGSAM
Chin state sung Matupi township, Mindat township, Kanpalet township leh Paletwa township te gamgi a teng ahi Daai minam te tenna Daai khua ah natgual hang in cina mi tam mahmah a zatui zaha kitaangsam mahmah hi cih khuasung mite tungtawn in kithei khia hi.
“A si bel ki-om nai sam lo himah leh cina kibehlaplap in kitam mahmah a, a na nailote zong na ngeingai in a kilawh thei nam hi ding hi. Zatui te lah nidang sang a zah 5 bang a tamzaw in kilei kha ahih man in khuasung thuneite zong zaksakna kinei hi. A kitaangsam zatui zaha te ngah ding mah lunggulh pen hi ung” ci-in khuasung mi ten pulakna nei uh hi.
A neu a lian in malaria, dengue fever kinei ngeingai a tu a kha 4 huam sung teng ah naupang mi 5 bangin sihlawh hi. Naupang te sihlawhna hong pian ciang in pilsinsang te themvei sung kikhak a September 22 ni pan sangte kihong kik ta hi.
……………………………………
➤ NCC IN CHIN STATE SUNG KITEELPI BAWLTHEIHNA MUN TENG AH KIDEM DING IN MIN PIA KHIN
Myanmar gamsung ah SAC makaihna tawh a kibawl ding ahi kiteelpi pen Chin state ah zong kibawl ding hi. Chin state sung a kibawlsawmna mun khempeuh ah New Chinland Congress (NCC) Party in teelcing makai kidem ding in min pia khin hi cih NCC makai U Soe Htet in pulakna nei hi.
Chin state sung teelcing makai kidemna ah kihel ding mimal teng in;

Hakha Township
1. Pu Reuben Hmung (ပြည်သူ့လွှတ်တော်)
2. Pu Khua Lian Kam -FPTP (အမျိုးသားလွှတ်တော်)
3. Pu Cia Thun- PR (အမျိုးသားလွှတ်တော်)
4. Pu Lian Ceu - FPTP (ပြည်နယ်လွှတ်တော်)
5. Pi Mah Zi@ Hniang Zi -PR (ပြည်နယ်လွှတ်တော်)

Falam Township
1. Pu Khaw Lian Thawng (ပြည်သူ့လွှတ်တော်)
2. Salai Nghepi Thian Uk Thang - FPTP (အမျိုးသားလွှတ်တော်)
3. Pu Bual Sai Lo - PR (ပြည်နယ်လွှတ်တော်)
4. Pu Siang Nei Mang - PR (ပြည်နယ်လွှတ်တော်)
Tedim Township
1. Pu Cin Sian Piang@ ဦးဇင်ရှင်းပြောင် (ပြည်သူ့လွှတ်တော်)
2. Pu Dal Khai Khan Mang - FPTP (အမျိုးသားလွှတ်တော်)
3. Nu Cing Ciang Vung - PR (အမျိုးသားလွှတ်တော်)
4. Nu Vung Huai Kim - FPTP (ပြည်နယ်လွှတ်တော်)
5. Dr Vum Lian Thang - PR (ပြည်နယ်လွှတ်တော်)

Tonzang Township
1. Nu Lam Ngaih Huai - FPTP (ပြည်နယ်လွှတ်တော်)
2. Pu Thang Za Mang - PR (ပြည်နယ်လွှတ်တော်)

Thantlang Township
1. Dr Van Hmun Lian (ပြည်သူ့လွှတ်တော်)
2. Pi Thluai Cia - FPTP (ပြည်နယ်လွှတ်တော်)
3. Pu Ni Kio - PR (ပြည်နယ်လွှတ်တော်)
Paletwa Township1. Pu Weih Tin(ဝှေ့တင်း)- FPTP (အမျိုသားလွှတ်တော်)
2. Pu Soe Htet - PR (အမျိုးသားလွှတ်တော်)
3. Pu Sanay Aung - FPTP (ပြည်နယ်လွှတ်တော်)
4. ဆလိုင်း ခွဲယန် - PR (ပြည်နယ်လွှတ်တော်)

Mindat Township
1. U Shing Thang (ပြည်သူ့လွှတ်တော်)
2. U Ning Shing-FPTP (အမျိုးသားလွှတ်တော်)
3. U Thang Ling Om- FPTP (ပြည်နယ်လွှတ်တော်)
4. U Thang Aung -PR (ပြည်နယ်လွှတ်တော်)

Matupi Township
1. Pu San Min @စံမင်း (ပြည်သူ့လွှတ်တော်)
2. Dr San Linn - FPTP (အမျိုးသားလွှတ်တော်)
3. Pu Ro Lian - FTPT (ပြည်နယ်လွှတ်တော်)
4. Pu Pawluh - PR (ပြည်နယ်လွှတ်တော်) te a hi hi.
……………………………………
➤ SAC MAKAIHNA TAWH A KIBAWLDING KITEELPI AH CHIN STATE PAN ZNP PARTY KIDEM SAWM
SAC makaih kiteelpi ah a kidemsawm ZNP party in “Kidem ding a ka ngaihsutna mun te uh bek vuah teelcing makai kidem ding te sazian pia khin hi ung. Tua mun te ah meekuang ki luitheihna panmun khempeuh aiding in a kidem ding te’ min zong kipia khin hi. Kiteelna makai UEC te in zong hong sang khin uh a kuateng kidem in mimal bangzah phading cih pen October 4, 2025 khit teh tangkona neihsawm pan ung” ci-in pulakna nei uh hi.
Teelcing makai kidem ding akua mapeuh makai te in a munmun ah September 23 - October 4, 2025 sung sittelna nei ding uh hi cih UEC pulakna tungtawn in kithei khia hi.
……………………………………
➤ CHIN BROTHERHOOD UKNA NUAI A OM KITEELPI A BAWLSAWM KHEMPEUH CB IN KHAM
“SAC in hong tung ding December 28, 2025 pan in kiteelpi a bawlsawm pen mipite lunggulhna tawh kituak lo democracy tawh kilehbulh gamtatna hi. A thumaan lo kiteelna bawlding a hanciam sung mah un khangno te man, mipite simmawh, galkap ukna bang thukhun te khunna hang leh mipi te taang a ding Party te a kihel loh na hang in hih kiteelpi pen thumaan lo ahihna ki langh khia hi” ci-in CB in pulakna nei hi.
“Ukna buluah SAC te in tubek hilo nidang pek pan a hunhun in mipite simmawh in a bawlsiatna uh thusim lo khualna nei lo in meekuang a lui sawm party te leh mimal akua mapeuh CB in thu hong khen ding hi. Mipi te zong hih meepiakna ah kihel kei ni” cih zong khauhtak in pulakna nei uh hi.
Chin state ah SAC in Paletwa, Kanpalet, Mindat leh Matupi township te ah kiteelpi bawllo ding a Thantlang, Hakha, Falam, Tedim leh Tonzang township te ah bawl ding uh hi.
……………………………………
Sources: Chin World/ Khonumthung Burmese/ Chinland News
Youtube Link ➤➤ https://youtu.be/0CsjYgQAB1U

21/09/2025

➤ WEEKLY NEWS TANGKONA
Kal khat sunga Zogam thuthangte genkikna
Sep 21, 2025 ❖ THE TEDIM POST
Youtube Link ➤➤ https://youtu.be/MzR7XIeNobk

21/09/2025

Hello! Dam maw Zomi! Tedim Post pan hong muakkik ung. Tuni Taang kha ni 21(Nipini) September 21, 2025 kal khat sung thuthangte genkikna hong nei ning.
A kihel ding thulute in-
➤ CHINSTATE, TOWNSHIP LI’TE AH KITELNA KIBAWL LO DING
➤ HAKHA TOWNSHIP PUALAM AH SINGTANG PUAK KHIAT LOH DING CDF- HAKHA IN GEN
➤ DAAI GAMSUNGAH TOHKUI NATNA HANGIN KHUASUNGMI TAMPI’N HONG NUSIA
➤ CHIN STATE SUNGAH THAUTAWI MIPI’GALKAPTE KHAT LE KHAT KILEM NADING IN INDIA NEW DELHI AH THUNGETNA KINEI
……………………………………

➤ CHINSTATE, TOWNSHIP LI’TE AH KITELNA KIBAWL LO DING
Chinstate sung ah Mindat, Kanpalet, Paletwa leh Matupi township te ah kitelna bawlloh dingin Union Election Committee (UEC)te in September 14 ni-in lai suak sak uh hi.
Chinstate Pyituh Hluttaw pan in Mindat, Kanpalet, Paletwa leh Matupi township ading mun 4, Amyothar Hluttaw (FTPT) ah Mindat, Paletwa leh Matupi district ading mun 3 leh Chinstate Hluttaw (FTPT) ading Mindat, Kanpalet, Paletwa leh Matupi township ah mun 4 akigawm mun 11 te ah meekuang lui loh dingin UEC in tangko uh hi.
December 28,2025 in a kibawl ding ahi kiteelna ah hihmunte pan suahtatak in meekuang a kilui theilohna ding munte hi ci’n UEC in pulakna nei hi.
2025 kitelna ah Chinstate pan in Khumi National Party (KNP), Zomi National Party (ZNP) leh Chinland Congress Party (CCP) te kihel ding hi.

……………………………………

➤ HAKHA TOWNSHIP PUALAM AH SINGTANG PUAK KHIAT LOH DING CDF- HAKHA IN GEN
Hakha township, Chinland Center Department of Land and Forestry te phalnalai om lo in Hakha township sung pan mundangah singtang puakkhiat ding September 20 pan October 10 d**g kikhaktan hi cih CDF- Hakha in September 18 ni-in khamnalai suaksak uh hi.
Hakha township sung mun khatlekhat a pua nuamten tua mun a makaih makaite kiangah ni 3 ma-in genkhol dinga, Hakha township pualam a pua nuamten Center Department of Land and Forestry te kiangah ni 5 sapin gen kholh kul ci hi.
Thukhun a zui lote thukhun om bangin thusitna leh thukhenna kinei ding hi ci'n CDF- HAKHA in lai suaksak hi.

……………………………………

➤ DAAI GAMSUNGAH TOHKUI NATNA HANGIN KHUASUNGMI TAMPI’N HONG NUSIA
Chin State, Daai Regional Council (CRC) ukna nuaiah khua 90 kiim bang om in September kha kipat lam pan tohkui natna hong nasia mahmah hi. Zatui zaha kicin lohna hangin
khuabup kiim cina bek thamlo in naupang 3 leh uhaam khat in hong nusia khin hi.
Khuahun kilaihna hangin tohkui hong laang hiding a, naupang, khangno leh uhaam a vekpi in kithuak kim hi. A dang natna bel om lo in khuabup kiim bang in tohkui a ngahna uh huhau in sang kikhak a, haksatna tampi zong kituak hi ci’n khuasungmi khat in pulakna nei hi.
Mindat township ah zong tohkui hangin tuk*m sungin naupang 7 bang in hong nusia khin hi.
Daai Regional Council leh CDF-Daai i cihte pen Chinstate nuailam Mindat, Matupi, Kanpalet leh Paletwa township tengah Daai minamte omna hi-in CRC' thu vaihawmna nuaiah om hi.

……………………………………

➤ CHIN STATE SUNGAH THAUTAWI MIPI’GALKAPTE KHAT LE KHAT KILEM NADING IN INDIA NEW DELHI AH THUNGETNA KINEI
Chinstate sungah thautawite khatlekhat kikapna a om nawn loh nadingin Chin Women Prayer Group te in kipawlkhawm in New-Delhi ah September 11 in thungetna nei uh hi.
New- Delhi ah a om Chin Christian Church ah gambeela om nupite, mizoram pan nupite leh Manipur pan kuki nupite zong kihel in zingsang 11:00am-nitak 04:00Pm kikal thunget khopna nei uh hi.
Thungetna ah kihel CDM Nu Vungboih in nidangin SAC te do khawm in i oma, tun in ahihleh laigui naleng gal kisuah i hih manin hihbangdan sepnate a bei nading deihna leh khatlekhat kikal kidona te a beina ding lunggulhna tawh CWPG in thungetna kinei hi ci'n pulak hi.
A kisam Pastor te, gambeel makaite in Lai Siangtho tawh kalsuana khat le khat mawh kimaisak ding gen pi-in nei uh hi.

……………………………………

Source: Khonumthung Burmese, Chin World
Youtube Link ➤➤

Kal khat sunga Zogam thuthangte genkiknaSep 21 ❖ THE TEDIM POST……………………..

14/09/2025

➤ WEEKLY NEWS TANGKONA
Kal khat sunga Zogam thuthangte genkikna
Sep 15, 2025 ❖ THE TEDIM POST
Youtube Link ➤➤ https://youtu.be/1eSdcDvzCNc

14/09/2025

Hello! Dam maw Zomi! Tedim Post pan hong muakkik ung. Tuni Tang kha ni 14 (Nipini) September 14, 2025 kal khat sung thuthangte genkikna hong nei ning.
A kihel ding thulute in-
➤ HUIH HATLUATNA HANGIN THANTLANG AH SANGINN KISIA
➤ KANPALET TOWNSHIP AH SAC IN BOMB A KHIATNA HANGIN MI KHAT LIAM
➤ CHIN STATE SUNGAH THAUTAWITE KITHUMIT ZAWHLOHNA HANGIN MIZORAM KIPAWLNA TUAMTUAM TEN PALAI SEM HI CI-IN SALAI LIAN LUAI IN GEN
➤ KALAY TOWNSHIP AH NUMEINO NIH TUI KANNA PAN TUI-IN TAI IN SI
➤ SAC IN KHANGNO OMNA INNTE AH ZAN HUN SUNGIN LUT IN KHANGNOTE MAN
……………………………………
➤ HUIH HATLUATNA HANGIN THANTLANG AH SANGINN KISIA
Thantlang township, Ngalan khua-ah huih hatluatna hangin mipite’n hanciam tawmin a lam uh sanginn khat September 6, 2025 in kisia hi.
Ngalan sang pen NLD hun lai-in High School a ngah hi-in sang thak a ki lam beh laitak himahleh 2021 k*m SAC in ukna a buluah ciangin sanginn pen 10% kiim bek ki lamzo khin pan hi. Himahleh tua khit nungin mipite’ hanciam tawmna tawh 80 x 15 ft azai-in sanginn lam ki zomto suak a, sangnaupang vekpigawm 180 kiim pha hi.
……………………………………
➤ KANPALET TOWNSHIP AH SAC IN BOMB A KHIATNA HANGIN MI KHAT LIAM
Kanpalet township, Khapaan (ခါပန်း) khua ah ukna buluah SAC galkapte in Sep 10, 2025 sun 12:00 Am hun pawl in bomb tang 3 a khiatna uh huhau in khuasungmi khat in liamna ngah hi ci-in CDF-Kanpalet in pulak hi.
CB tawh khut kilen ahi CDF-Kanpalet in a let Kanpalet township pen SAC in k*m kipat pan tuni d**g bomb khiat zel in mipite’n liamna ngah in innlelo zong tampi kisia khin hi.
……………………………………
➤ CHIN STATE SUNGAH THAUTAWITE KITHUMIT ZAWHLOHNA HANGIN MIZORAM KIPAWLNA TUAMTUAM TEN PALAI SEM HI CI-IN SALAI LIAN LUAI IN GEN
Chin State sung ah thautawite kithumit zawhlohna hang in Mizoram kipawlna tuamtuamte in palai hong sem uh hi ci’n Salai Lian Luai in September 6, 2025 Chin Brotherhood (CB) te’ fundraising bawlna zoom pan pulak hi.
Thautawi khatlekhat lungsim ki thutuahlohna, ngaihsutna kibat lohna leh thu pomzia kibat lohna hangin Mizoram pan NGO, k*mpi lam kipawlnate leh k*mpi minpua Advocacy team cih bangin kipawlna tuamtuamte sam in kilemtuah zelkhin hi ci’n genbehna zong nei hi.
Tulaitak in Mizoram Christian Convention pen Mizoram state sungah mimal phazah vekpi ii 75% bang hi a, palai a sep laitak ahi hi. Mailam ah kilemna a om tuan kei aleh gambeel mipite leh thautawite tawh kisai vaite ah Mizoram mipi te’n vaipuak lak ding bek om lai hi cih zong MCC in pulakna nei hi.
Interim Chin National Consultative Council (ICNCC) mah kipsak in Chin State sung thu vaihawm ding leh SAC dokhop ding ngetna om himah leh tangtung zolo ahih manin i tuah noploh thu a kituak hita hi ci-in Salai Lian Luai in gen hi.
Salai Lian Luai pen NLD hun (2016 – 2021) in Chief Minister of Chin State a sem khat ahi hi.
……………………………………
➤ KALAY TOWNSHIP AH NUMEINO NIH TUI KANNA PAN TUI-IN TAI IN SI
Carmel mual ah thungen ding in a pai ahi Munlai a teng k*m 10 gual naupang numeino nih Saygyi lui (ဆည်ကြီးချောင်း) a kanna uh pan tuitaihna hangin Sep 6, 2025 in hong nusia uh hi.
Carmel mual ah a pai pen mi thum hi a, luitui na khang ahih manin khat in kan ngamlo in a lawm tegel in a kanna uh pan tui-in a taisuak ahi hi. A si minihte luang bel nitak lamin kimupah hi cih zong khuasung mite’n pulak uh hi. A si numeinote pen Lia Cing San Nuam leh Lia Nuam Lam Cing hi a, private sang khat-ah sang a kah laitak uh ahi hi.
Tui a kanlo naupang pen sunnung nai khat pawl-in inn tungkik a, a thuteng a gen khitteh a veng a paam ten delh pah in khat pen Kalay-Pyidawthar lampi lui kanna lei bul ah kimu in zato a puak uh hang lapnawn lo hi. A khat pen lei tunsuk ma guntui suang tawh kidalna mun khat ah kimu hi. Siluangte pen tui-in a taihna pan tai thum ciang bang kizong hi ci-in rescue team te’n gen uh hi.
……………………………………
➤ SAC IN KHANGNO OMNA INNTE AH ZAN HUN SUNGIN LUT IN KHANGNOTE MAN
Kalay township, veng pawlkhat ah SAC galkapte leh Pyiusawhtee (ပျူစောထီး) te in zan midaih hun sungin khangno omna innte ah lut-in khangnote man uh hi.

Tukiim mah in zong Pyiusawhtee tamna Mingalar Uyinn veng (မင်္ဂလာဥယျာဉ်) ah ta 5 a nei papi khat man uh a khahkik nailo uh hi cih khuasungmi khat in pulakna nei hi. Pyiusawhtee te in amau veng sung, a mau kinaipihte omna veng sung te deuh ah khangnote man kawikawi uh hi. A diak in Mingalar Uyinn leh Aung Thitsar veng te ah nitak sim phial SAC in khangnote man ci hi.
August pan September kha kipat lam ciang d**g SAC in khangno mimal 60 ciang bang man khin ding in mipite in gen uh hi.
……………………………………
Sources: Chin World/ Khonumthung Burmese
Youtube Link ➤➤

Kal khat sunga Zogam thuthangte genkiknaSep 15 ❖ THE TEDIM POST……………………..

07/09/2025

➤ WEEKLY NEWS TANGKONA
Kal khat sunga Zogam thuthangte genkikna
Sep7, 2025 ❖ THE TEDIM POST
Youtube Link ➤➤ https://youtu.be/s1vqWQ60U0o

07/09/2025

Hello! Dam maw Zomi! Tedim Post pan hong muakkik ung. Tuni Taang kha ni 7(Nipini) September 7, 2025 kal khat sung thuthangte genkikna hong nei ning.
A kihel ding thulute in-
➤ TONZANG KHUA AH CC IN SIAHKAIHNA HANGIN MIPI TEN GENTHEIHNA THUAK
➤ FALAM DISTRICT, LUMBANG LEH PARTE KHUA KIKAL AH LAMCIM IN MAWTAW TAMPI AWK
➤ CHIN STATE KHUAPI HAKHA KHUAGEI AH MAWTAW KHAT TUAHSIA
➤ PALETWA AH AA IN INDIA- MYANMAR KIZOPNA DINGIN TEMPORARY PASSPORT ZANGHSAK
➤ INDIA - MYANMAR GAMGI AH THAU LAWNG 8 LEH GALVAN PAWL KHAT KIMAN
……………………………………
➤ TONZANG KHUA AH CC IN SIAHKAIHNA HANGIN MIPI TEN GENTHEIHNA THUAK
Tonzang ah CC in khasim in sing leh a dang tuamtuamte zong siahkaihna nei uh ahih manin mipite gen thei mahmah uh hi.
A beisa hun in tui pen ei zatzah tawh kituak in siah kipia himah leh tu-in inn khatah then khat leh tul nga ta kipia kha a,zatuisai(clinic)hong nuamte in kha khat tul thum ta pia kha uh hi.
Tunai lam ciangin inn khat-ah singkhuah 40,20 cihdan, phualngakmi a kilaih uh ciang mipite’n kikhel in va dawn va kha in vaipuak kila hi. Cycle hawlte ading inn khat pan then nih leh tul nga ta cih bang in zong kipia kha hi.
Banker lam nading then nga, CC galkapte meh lei nading then khat leh tul nga cih dan in hong d**g uh hi ci’n khuasungmi khat in pulakna nei hi.Tonzang khua ah a omlaiteng pen ut man hi lo-in sumlepai haksatna hang hizaw a hih man in hibang ciang in haksa kisa mahmah hi cih zong pulak beh hi.
Hih thu huhau in CDF- Tonzang makai ahi Pu Thang Suan Mung in tuiman dingin siah then khat leh tul nga leh zatuisai (clinic) hon nading CC khutnuai ah aom khua'te ah inn khat ciang tul leh za nga ta cihdan in siah kai bek hi ung ci hi.
2024 May 23 ni-in CDF- Tonzang kihelna CC in Tonzang township ngah uh a, tua hun pan in tuni d**g CC in a uk ahi hi.

……………………………………
➤ FALAM DISTRICT, LUMBANG LEH PARTE KHUA KIKAL AH LAMCIM IN MAWTAW TAMPI AWK
Famlam district sung a om Lumbang leh Parte khua kikal lamneuna munkhat ah August 16, 2025 in lampi cipna huhau in mawtaw neute, Dyna, Jeep cih te bek in tawn thei a, vanpua mawtaw pite-in tawn thei lo hi. Lam pelh tawn uh himah leh tua mun ah zong mawtaw khat kisia in awk ahih manin a paisuk, apaito mawtaw te lampi ah awk zihziah hi.
“Mawtaw hawl teng ki pawlkhawm in lampi ki bawlbawl lai hi. A tuaksuk mawtaw pawlkhat in bel Zogam sung ah mehthuk tam a pian pen na mun ahi Lartii khua nawkin pai uh hi. Lampi neu in lauhuai ahih manin kinawh pai thei lo hi” cih zong khuasungmi khat in pulakna nei hi.

……………………………………
➤ CHIN STATE KHUAPI HAKHA KHUAGEI AH MAWTAW KHAT TUAHSIA
Hakha khuapi, Vanmualthar khua gei ah August 30,2025 ni, nitak hun 6:00pm pawlin saivan pua mawtaw khat tuah sia hi. Mawtaw tung ah a hawlpa leh a nungzui unau mi 2 bek hi-in bangmah liamna baina omlo sam hi.

……………………………………
➤ PALETWA AH AA IN INDIA- MYANMAR KIZOPNA DINGIN TEMPORARY PASSPORT ZANGHSAK
Chin state, Paletwa township a kem AA in India- Myanmar kikawmna Paletwa township, Shinlet khua pan gamgi a kannuam mipite zat ding passport bawl uh hi cih Paletwa khuasungmite in pulak uh hi.
AA in a bawl temporary passport pen India lamah kizat theihna om tuan lo hi. Ahih hangin Paletwa pan mizoram ah a zin nuamte in hih passport neih hamtang kul a,gamgi kantan ma in bangtan ziakai ding banghang pai cih bang in form fillup sak uh hi.Zato kilak a paite ahih leh zong a ciahkik uh ciang zatolai te laksak uh hi.
Temporary passport ngah theih nadingin passport(maan), omna, mimal tangthu tom, zinnopna a hang leh ni bangzah sung zin ding cihte kisam hi.
Temporary passport pen Paletwa township, Shinlet khua ah kibawl hi-in, Shinlet khua pen India- Myanmar gamgi tuilam tawh kizop theihna khua khat ahi hi.
A beisa hun in boat license leh driver license bek kisam in August kha pan temporary passport kisamsak uh a, thukhum pawl khat zong neih behbeh lai uh hi ci’n khuasungmite in pulakna nei uh hi.

……………………………………
➤ INDIA - MYANMAR GAMGI AH THAU LAWNG 8 LEH GALVAN PAWL KHAT KIMAN
Mizoram, Champhai district, Saikhumphai khua-ah India gamgi kem ahi Artan thautawi ten thaulawng 8 leh galvan pawlkhat man uh hi.
Artan thautawi ten thu a ngahna tungtawn in Saikhumphai khua inn khat-ah August 29 in lutin sit uh a, 12 bore rifle khat, pistol khat, thautang pawlkhat leh innteekte man uh hi.Innteekte thu a dottelna uh tungtawn in gamsung ah thaulawng pawlkhat matbeh uh hi.
A mat uh galvante pen Heckler & Koch G3 Assault Rifle lawng khat,Springfield Sniper Rifle lawng nih, Shotgun lawng nih, MA Assault Rifle lawng khat, khuttawi bomb tang nih, kidalna puan, manbilu khat leh thautang pawl khat kihel hi. A kiman galvan teng leh Innteekpa Dungtlang pen police te kiangah ki ap hi.
Saikhumphai pen Falam township, leilet khua tawh kinai India- Myanmar gamgi khat hi

……………………………………
Sources: Chin World
Youtube Link ➤➤

Kal khat sunga Zogam thuthangte genkiknaSep 7 ❖ THE TEDIM POST……………………..

31/08/2025

➤ WEEKLY NEWS TANGKONA
Kal khat sunga Zogam thuthangte genkikna
Aug 24, 2025 ❖ THE TEDIM POST
Youtube Link ➤➤ https://youtu.be/r1L8K73B38s

31/08/2025

Hello! Dam maw Zomi! Tedim Post pan hong muakkik ung. Tuni Khuado kha ni 31 (Nipini) August 31, 2025 kal khat sung thuthangte genkikna hong nei ning.
A kihel ding thulute in-
➤ SAC IN TEDIM TOWNSHIP VANLAM PAN 2 VEI BOMB KHIAT
➤ CDF-CDM SIYIN GALKAP KHAT AMAH LE AMAH KISIHBAWL
➤ MRO/CDF MATUPI IN GALKAP TUM DING IN A MAT UH PAWLKHAT KHAHKIK
➤ ZZLMS IN GAMSUNG DAIHNA A OM NADING KIPAWL KHAWM IN SIAMSIN KHOPNA NEI
➤ TAMU KHUAPI AH SAC TE’N GALKAP LUT DING MIN SAZIAN TAWH KHANGNO TE MAN
……………………………………
➤ SAC IN TEDIM TOWNSHIP BOMB KHIAT
Ukna buluah SAC in Tedim township aom Mualbem leh Zangzawl khuate August 25, 2025 sun nai 1:30 pm kiimin Jet Fighter tawh bomb 2 vei khiat uh hi. Zangzawl ah naupang khat a khe liam lawh hi. Tua ni mah nitak 4:00 pm kiimin Heilei khua zong bomb khiat uh a khuasung mi 2 in liamma ngah hi.
“Mualbem khua leh Zangzawl pen khuaveng hi a tua lam ah bomb tang 7 a khiatna lak vuah tang 5 puakkham hi. Bangteng sukha in bangteng piang cih pen kigen thei lian nailo a Mualbem khua lam pan bangmah thu kiza thei nailo hi” cih zong khuamite’n pulak na nei uh hi.
……………………………………
➤ CDF-CDM SIYIN GALKAP KHAT AMAH LE AMAH KISIHBAWL
Aug 26 ni zingsang lam in k*m 27 apha pan CDF-CDM Siyin galkap Sailas Thang Khat Pum amah le amah thau tawh kikaplum hi. Gam kuan ding in a kithawi laitak uh hi-a a pualam va pusuak pak ning acih zawh a sawt lo-in a lawmte’n thau ging azak uh ciang delhpah napi uh lap nawn lo hi ci-in a naihuaite khat in gen hi. Abeisa 2024 k*m October kha sung a nu’ nusiat khit akipan Silas a gamtatzia a ngeina bang pha lo cih zong genbeh hi.
……………………………………
➤ MRO/CDF MATUPI IN GALKAP TUM DING IN A MAT UH PAWLKHAT KHAHKIK
Matupi township, ChianPyan khua (ခြန်ပြန်းရွာ) pan galkap tum ding in CDF-Matupi te’n a mat uh mimal 12 lak pan k*mcing nailo mi 2 leh khangno mi 3 khahkik uh hi. Mi 12 lak pan kuateng khahkhia ding cih meesawkna tawh a khensat uh ci hi.
Matupi khuanu khuapa te leh pilsin makai te lungkim lo uh ahih manin August 23, 2025 in lungphona nasiatak nei uh a CDF-Matupi te tawh aki thukimna tungtawn un naupangte a suakta ahi hi.
……………………………………
➤ ZZLMS IN GAMSUNG DAIHNA A OM NADING KIPAWL KHAWM IN SIAMSIN KHOPNA NEI
Kipumkhat nading leh gamsung daihna om nading in ZZLMS kipawlna ahi Hakha township, Thantlang township leh Matupi township sungah om thautawi kipawlna 5 te in siamsin khop akhat veina aneih lam uh Aug 22 in lai suah uh hi. Hibangin kipawl khawma siamsin khop theih nading tha hong pialeh sumlepaai tawh hong panpih mipite khat ciat tung zong lungdamna gen uh hi.
ZZLMS ahihleh Chinland Council (CC) te khutnuai ah nasem kipawlna hi a, CDF-Zotung, CDF-Zophei, CDF-Lautu, CDF-Mara leh Senthang Revolution Force (S.R.F) thautawi kipawlna 5 te kigawm khopna ahi hi.
……………………………………
➤ TAMU KHUAPI AH SAC TE’N GALKAP LUT DING MIN SAZIAN TAWH KHANGNO TE MAN
India-Myanmar gamgi ahi Tamu khuapi ah SAC galkap te-in a beisa July kha pan kipan nitak 8:00 pm khit inn khat khit khat ah pai-in min sazian tawh galkap tum ding khangno te man uh hi cih khuasungmi te’n pulak uh hi. A suakta kik pawlkhat aom hang galkap a tumsuak kha zong om veve ci hi. Atum suak khate ahihleh zatui zang khangno te hizaw pian cilai hi.
……………………………………
Sources: Chin World/ Khonumthung Burmese
Youtube Link ➤➤ https://youtu.be/ro6CLe5eqYM

24/08/2025

Hello! Dam maw Zomi! Tedim Post pan hong muakkik ung. Tuni Khuado kha ni 24 (Nipini) August 24, 2025 kal khat sung thuthangte genkikna hong nei ning.
A kihel ding thulute in-
➤ PDF-ZOLAND IN MUALBEEM KHUA HAUSA PA MAN
➤ TEDIM TOWNSHIP AH SUMTUH KIMAN
➤ HAKHA KHUAPI AH SACTE KAPNA HANGIN KHUASUNGMI 1 IN HONG NUSIA
➤ MINDAT KHUAPI KILAK HUN LAI IN SAC TEN LEISUNG AH A SEL UH GALVAN PAWLKHAT CDF-MINDAT KIANG KI-AP
➤ KANPALET TOWNSHIP AH VAN LAM PAN BOMB KHIATNA HANGIN INN KISIA
➤ CHIN STATE SUNG MIPI GALKAPTE’ UKNA KHUAPITE AH ZONG KITEELNA BAWL DING SAC IN PULAK
➤ 2025 KITEELPI TAWH KISAI ZFU/PDF ZOLAND IN THUSUAHNA NEI
……………………………………
➤ PDF-ZOLAND IN MUALBEEM KHUA HAUSA PA MAN
Mualbeem khua ah hausa a sem Pa Hau Khan Nang PDF-Zoland in August 16 in man hi cih thu kiza hi. Pa Hau Khan Nang pen banghang in bang mawhna tawh man cih a innkuanpihte in zong thei lo uh hi cih Pa Hau Khan Nang' lawm khat in pulak hi.
Ahi zongin PDF-Zoland lam pan “Pa Hau Khan Nang in ukna buluah galkapte kiangah thu na puak zel ahih manin ka mat uh ahi hi. Hih thu pen upmawh cih bang hilo in teci kician tak tawh ka sep uh hi cih” pulak uh hi.
Pa Hau Khan Nang pen Mualbeem khua hausa a sep kawm in tender nasep tawh zong a thuahkawm khat ahi hi.
……………………………………
➤ TEDIM TOWNSHIP AH SUMTUH KIMAN
Tedim khuapi, khua khat ah sumtuh kizang hi cih a kizakna huhau in Tedim Township People’s Administration leh khangno kipawlnate in kan uh-a tul 10 lai vive mak 1 (10,000,000) man uh hi.
Ciau ah a sum man zah’ i a lang tawh lei in a ngah hi cih sumtuh neipa in a pulakna Tedim Township People’s Administration in August 16 in tangko khia uh hi. Ahi zongin sumtuh neipa’ min leh bang khua-ah kiman cih pen genkhia lo uh hi.
Ukna kibuluah ma in zong private bank te leh k*mpi bank te pan zong tul 10 dal leh tul 5 dal a kimuh theih zel lam khuasungmi khat in genbehna nei hi.
……………………………………
➤ HAKHA KHUAPI AH SACTE KAPNA HANGIN KHUASUNGMI 1 IN HONG NUSIA
Chin State, Hakha khuapi, Pyidawtha veng kiim ah August 20, 2025 sun 12:00 pm pawl in SAC te thaukapna hangin sangnaupang mi 2 leh khuasungmi pasal khat in liamma ngah uh hi.
Ukna buluah galkap ten thau tawh a kap khit uh ciang liamna ngah khuasungmipa pen a phual mah ah sisan naisan nung mah ah vuakgawp beh lai uh hi. Zato kipuka himahleh a liamma nasiatna hang tawh tua ni mah nitak 7:00 pm in hong nusia hi. Hong nusia pasal pa pen k*m 30 gual Thantlang township, Tisen khua mi ahi hi.
……………………………………
➤ MINDAT KHUAPI KILAK HUN LAI IN SAC TEN LEISUNG AH A SEL UH GALVAN PAWLKHAT CDF-MINDAT KIANG KI-AP
Chin state, Mindat khuapi laklai in a nungkik SAC te in a sel uh MA 15 khat, RPG 7 khat, MA 4 khat, MA 3 khat leh a kisam setvan pawlkhat khuasungmi khat in August 22, 2025 in CDF-Mindat khutsung ah ap hi. Tua a-ap khuasung mipa CDF-Mindat in sumtang pawlkhat tawh pahtawina nei uh hi.
……………………………………
➤ KANPALET TOWNSHIP AH VAN LAM PAN BOMB KHIATNA HANGIN INN KISIA
Kanpalet township ah ukna buluah galkapte in khuasung mun nih-ah vanlam pan August 17 zingsang 6:55 am pawl in bomb khiat ahih manin innlelo pawlkhat kisia a, mipite bel bang mah ci lo uh hi.
……………………………………
➤ CHIN STATE SUNG MIPI GALKAPTE’ UKNA KHUAPITE AH ZONG KITEELNA BAWL DING SAC IN PULAK
2025 December kal nunung tegel leh 2026 January kal masa tegel ah SAC in kiteelna bawl ding a geelna huhau in Chin state sung mipi galkapte’ ukna khuapite ah zong kiteelna bawl ding cih Union Election Committee (UEC) in August 15 in laisuak sak uh hi.
Tulaitak in Chin state sung ah Hakha township leh Tedim township pen SAC khutnuai ah om lai-in, Paletwa township ahih leh AA khutnuai ah om a, a dang townshipte mipi galkapte’ khutnuai ah a om ahi hi.
Hih kiteelna ah Chin state pan party registration a ngah khin Khumi National Pary, New Chinland Congress Party leh Zomi National Party teng kihel ding uh hi.
Myanmar gambup mipi galkapte ukna nuai ah a om township khempeuh zong kiteelna bawl dingin Aug 15 ni in UEC in tangto khia hi.
……………………………………
➤ 2025 KITEELPI TAWH KISAI ZFU/PDF ZOLAND IN THUSUAHNA NEI
State Security and Peace Commission (SSPC) makai in a kibawl ding 2025 kiteelpi pen mipi phattuamna ding hilo banah mipi’ lunggulhna tawh a kituak lo SAC te ukna kipsuakna ding ahihman in mipi tawh kipawl in khaktan ding hi ung cih ZFU/PDF Zoland in August 19, 2025 in laisuahna nei hi.
Tua laisuahna sung ah hong tung ding 2025 kiteelpi pen mipi thuneihna omlo, democracy tawh kituak lo, liangko kikimna omlo kiteelna a hihman in a kidem sawm Party tuamtuamte leh makaite’n mipi khual lo in amau angsung bek a khual ci-in mipi in hong kiciamteh ding hi. A kihel veve laite amau khensatna tungtawn in pansan kila ding hi cih zong pulak beh uh hi.
SAC makaih kiteelpi pen ong tung ding December 28, 2025 in kipan ding hi cih August 18, 2025 in SAC te’n pulakna nei uh hi.
……………………………………
Sources: Chin World/ Khonumthung Burmese
Youtube Link ➤➤

Kal khat sunga Zogam thuthangte genkiknaAug 24 ❖ THE TEDIM POST……………………..