14/09/2025
ကြားကာလအစိုးရကို ဦးဆောင်ရန် အမျိုးသမီးဝန်ကြီးချုပ်ကို ခန့်အပ်ပြီးနောက် နီပေါတွင် အခြေအနေများ ပြန်လည်ငြိမ်သက်လာ
AFP, 13 September 2025
နီပေါနိုင်ငံတွင် အဂတိလိုက်စားမှုဆန့်ကျင်ရေး ဆန္ဒပြပွဲများ ဖြစ်ပေါ်ပြီးနောက် ကြားကာလအစိုးရကို ဦးဆောင်ရန် အမျိုးသမီးဝန်ကြီးချုပ်တစ်ဦးကို ခန့်အပ်လိုက်ရာ အခြေအနေများ ပုံမှန်အတိုင်းပြန်ဖြစ်လာကာ ညမထွက်ရအမိန့်ကိုလည်း လျှော့ပေါ့ပေးလိုက်သည်။
အသက် ၇၃ နှစ်အရွယ် တရားသူကြီးချုပ်ဟောင်း ဆူရှီလာ ကာကီသည် တည်ငြိမ်အေးချမ်းမှုပြန်လည်ဖော်ဆောင်ရန်နှင့် အဂတိလိုက်စားမှုကင်းရှင်းသော အနာဂတ်အတွက် ဆန္ဒပြသူများ၏တောင်းဆိုမှုများကို ဖြည့်ဆည်းပေးရန် စက်တင်ဘာ ၁၂ ရက် ညပိုင်းတွင် တာဝန်ပေးအပ်ခံရပြီး ယာယီအစိုးရဝန်ကြီးချုပ်အဖြစ် ကျမ်းသစ္စာကျိန်ဆိုခဲ့သည်။
ဆယ်စုနှစ်တစ်ခုကြာ ပြည်တွင်းစစ်အဆုံးသတ်ခဲ့ပြီး ၂၀၀၈ ခုနှစ်တွင် ဘုရင်စနစ်ကို ဖျက်သိမ်းခဲ့ပြီးနောက်ပိုင်း ယခုဖြစ်ပွားခဲ့သည့် အဆိုးရွားဆုံးဆန္ဒပြမှုများတွင် လူပေါင်း ၅၁ ဦးထက်မနည်း သေဆုံးခဲ့သလို ပါလီမန်အဆောက်အအုံလည်း မီးရှို့ခံခဲ့ရသည်။
ယခုအခါ ပါလီမန်ကို နောက်ပိုင်းတွင် ဖျက်သိမ်းခဲ့ပြီး ၂၀၂၆ ခုနှစ်၊ မတ်လ ၅ ရက်နေ့တွင် ရွေးကောက်ပွဲကျင်းပရန် သတ်မှတ်ခဲ့ကာ ယာယီအစိုးရကို ပြန်လည်ဖွဲ့စည်းရန် လုပ်ငန်းများစတင်ခဲ့သည်။
စက်တင်ဘာ ၁၃ ရက် နံနက်ပိုင်းတွင် လမ်းမများပေါ်၌ အခြေအနေများ တည်ငြိမ်အေးချမ်းလာပြီး ဈေးများဖွင့်လှစ်ကာ၊ ယာဉ်ကြောပိတ်ဆို့မှုများပြန်လည်ဖြစ်ပေါ်လာကာ မိသားစုဝင်များလည်း ဘုရားကျောင်းများသို့ သွားရောက်ခဲ့ကြသည်။
စစ်ဦးစီးချုပ် ဗိုလ်ချုပ် အာရှော့ခ် ရာ့ဂျ် ဆစ်ဂ်ဒယ်လ် နှင့် သမ္မတ ရမ် ချန်ဒရာ ပေါဒယ်လ်တို့၏ ညှိနှိုင်းဆောင်ရွက်မှုများ အပြီးတွင် ပထမဆုံး ယာယီအမျိုးသမီးဝန်ကြီးချုပ်အဖြစ် ခန့်အပ်ခဲ့ပြီး အဆိုပါ ခန့်အပ်မှုအတွက် “Gen Z” ဆန္ဒပြလူငယ် ကိုယ်စားလှယ်များနှင့်ပါ ညှိနှိုင်းခဲ့ရသည်။
ထောင်နှင့်ချီသော လူငယ်လှုပ်ရှားသူများသည် နောက်လာမည့်အဆင့်များကို ဆွေးနွေးရန်အတွက် Discord အပလီကေးရှင်းကို အသုံးပြုခဲ့ကြပြီး ကာကီကိုလည်း ၎င်းတို့၏နောက်လာမည့်ခေါင်းဆောင်အဖြစ် သတ်မှတ်ခဲ့ကြသည်။
ပြည်သူများသည် မငြိမ်မသက်မှုများ ပြီးဆုံးချင်ကြသဖြင့် ဝန်ကြီးချုပ်အသစ်ခန့်အပ်မှုကို ကြိုဆိုခဲ့ကြသည်။
“အခုအချိန်အတွက်တော့ ယာယီအစိုးရရဲ့ ဆုံးဖြတ်ချက်ဟာ ကောင်းပါတယ်” ဟု ကတ်မန်ဒူမြို့ရှိ ဆိုင်တစ်ဆိုင်တွင် အလုပ်လုပ်သော အသက် ၂၃ နှစ်အရွယ် ဒူရ်ဂါ မာဂါက ပြောသည်။
“ဒီအချိန်မှာ ပြည်သူတွေ၊ အထူးသဖြင့် လူငယ်တွေအတွက် အဓိကပြဿနာက အဂတိလိုက်စားမှုပါ” ဟု ၎င်းက ပြောသည်။
“Gen Z ပဲဖြစ်ဖြစ်၊ ဒါကို ဖြေရှင်းမယ့် နိုင်ငံရေးသမားပဲဖြစ်ဖြစ် အရေးမကြီးပါဘူး၊ ဒါကို ရပ်တန့်ဖို့ပဲ လိုပါတယ်” ဟု ၎င်းက ထပ်လောင်းပြောသည်။
ပြီးခဲ့သည့် သီတင်းပတ်အတွင်း ဆန္ဒပြမှုများသည် နီပေါနိုင်ငံ၏ ရေရှည်စီးပွားရေးပြဿနာများကို ပေါ်လွင်စေခဲ့သည်။
ကမ္ဘာ့ဘဏ်၏ အချက်အလက်များအရ နီပေါတွင် ၁၅ နှစ်မှ ၂၄ နှစ်ကြား လူငယ် ငါးပုံတစ်ပုံသည် အလုပ်လက်မဲ့ဖြစ်ပြီး တစ်ဦးချင်းဝင်ငွေသည် ၁,၄၄၇ ဒေါ်လာသာရှိသည်။
အိန္ဒိယဝန်ကြီးချုပ် နာရင်ဒရာ မိုဒီက “အောင်မြင်ပါစေ” ဟု ကာကီအား ဆုတောင်းပေးခဲ့ပြီး အိန္ဒိယအနေဖြင့် “နီပေါပြည်သူများ၏ ငြိမ်းချမ်းရေး၊ တိုးတက်ရေးနှင့် သာယာဝပြောရေးအတွက် ခိုင်မာစွာကတိပြုသည်” ဟု ထပ်လောင်းပြောသည်။
#ဝန်ကြီးချုပ်သစ် #နီပေါ #နိုင်ငံတကာ
