15/02/2023
ထိုင်းတောင်ပိုင်း စိုက်ပျိုးရေးခြံထဲ မြန်မာနှစ်ဦးသတ်ခံရ
VOA ၊ ဖေဖော်ဝါရီ ၁၅၊ ၂၀၂၃
ထိုင်းနိုင်ငံတောင်ပိုင်း ချွန်ဖော်ခရိုင်ထဲက ဒူးရင်းစိုက်ပျိုးရေးခြံ မှာ ဖေဖေါ်ဝါရီလ ၁၄ရက်နေ့ညက မြန်မာရွှေ့ပြောင်းလုပ်သား နှစ်ဦးဟာ သူတို့နေထိုင်ရာ ၂၅ဧကလောက်ကျယ်ဝန်းတဲ့ ဒူရင်းခြံထဲမှာပဲအသတ်ခံခဲ့ရတာပါ၊ သူတို့တွေဟာ ဘယ်လိုအန္တရာယ်တွေနဲ့ ရင်ဆိုင်ခဲ့ရသလဲဆိုတာကို ရဲတွေကလိုက်လံစုံစမ်းနေတယ်လို့ ထိုင်းတောင်ပိုင်းအခြေစိုက် ပညာရေးနဲ့ဖွံဖြိုးတိုးတက်ရေးဖောင်ဒေးရှင်းကအလုပ်သမားရေးရာတာဝန်ခံဦးမင်းဦးကအခုလိုပြောပါတယ်။
"ဒူးရင်းခြံလုပ်သား ၂ ယောက်ခြံလုပ်သား၂ ယောက် ယောက်ကျားလေးအသက် ၄၈ နဲ့ ၅၈နှစ်ယောက်အသတ်ခံရတယ်ဆိုတာတွေ ရဲကတော့ စုံစမ်းဖော်ထုတ်နေတယ်အဲဒါနဲ့ပတ်သက်ပြီး မြန်မာတွေကပဲသတ်သလား ထိုင်းတွေကပဲ သတ်သလားဆိုတာကိုလိုက်စုံစမ်းနေတယ် ဒါမှမဟုတ်အချင်းပြသနာရှိလို့လားဆိုတာဖော်ထုတ်နေတယ်။"
ပြီးခဲ့တဲ့ရက်ကလည်း ဘန်ကောက်အနီး စမွတ်ပရာကန်ခရိုင် ဘန်ပုံမြို့နယ်ထဲမှာ မြန်မာအလုပ်သမားတွေကို အထောက်အထားလက်မှတ်လုပ်ပေးရာမှာ ကူညီနေတဲ့မြန်မာပွဲစားတစ်ဦးသတ်ဖြတ်ခံခဲ့ရပါတယ်။ ဒီအမှုနဲ့ပတ်သက်ပြီးတော့ လည်း သက်သေတစုံတရာ ရရှိတာ မတွေ့ရသေးဘူးလို့လည်းဦးမင်းဦးကပြောပါတယ်။
"ဘန်ကောက်နားက ဘန်ပလီဆိုတဲ့နေရာမှာလည်း မြန်မာနိုင်ငံသားပွဲစားတယောက်အသတ်ခံရတာရှိတယ်၊ တရားခံကလည်းမမိသေးဘူး ဘာကြောင့်သတ်လဲဆိုတာ မသိသေးဘူး။"
အခုလိုမြန်မာနိုင်ငံသားတွေသတ်ဖြတ်ခံရမူ့နဲ့ပတ်သက်လို့မြန်မာသံရုံးနဲ့ သက်ဆိုင်ရာမိသားစုတွေ အလုပ်သမားအဖွဲ့အစည်းတွေက ဖိဖိစီးစီးလိုက်ပါဆောင်ရွက်မှသာ အမှုမှန်ပေါ်ပေါက်မှာဖြစ်တယ်လို့လည်းဦးမင်းဦးကပြောပါတယ်။
"ဥပဒေကြောင်းအရလိုက်လံလုပ်ဆောင်ပေးမယ့်သူတွေ ပံပိုးပေးမယ်အဖွဲ့အစည်း တွေ ကိုယ်အစိုးရသံရုံးတွေ ဒီအတိုင်းထားရင်အေးဆေးနဲ့ သွားနိုင်တယ် မိသားစုက အကြောင်းကြားသံရုံးတွေကို ပြောတာ အကြောင်းကြားတာ သံအရာရှိတွေလိုက်တာမျိုးဆိုရင်တော့သက်ဆိုင်ရာအာဏာပိုင်တွေကလိုက်လုပ်ပေးတာရှိမှ မြန်မယ် ဒါမှမဟုတ်ဘူးဆိုရင်တော့ဒီအမှုက ပျောက်သွားတာ ပေါ့သွားတာတွေဖြစ်တတ်တယ်။"
များသောအားဖြင့် မြန်မာပြည်သားတွေသတ်ဖြတ်ခံရတဲ့အမှုတွေမှာတော့ အမှုမှန်ပေါ်ပေါက်ဖို့အတွက် မြန်မာသံရုံးနဲ့ အလုပ်သမားရေးဆောင်ရွက်နေတဲ့အဖွဲ့အစည်းတွေက လိုက်ပါဆောင်ရွက်ပေးရတာ ဖြစ်ပါတယ်။ အခု ဖြစ်ပွားခဲ့တဲ့လူသတ်မှုတွေမှာတော့ သေဆုံးသူတွေဟာ ဓါးဒဏ်ရာတွေနဲ့ သေဆုံးခဲ့ကြတာပါ။ တချို့အမှုတွေကတော့ စီစီတီဗွီမှတ်တမ်းတွေကနေ လိုက်လံစုံစမ်းတာမျိုးလုပ်ရပေမယ့်၊ အခုလိုလူသူဝေးတဲ့စိုက်ပျိုးရေးခြံထဲ ဖြစ်ပျက်ခဲ့တာတွေကိုတော့ စုံစမ်းဖို့ ခဲယဉ်းတယ်လို့ ထိုင်းရောက်မြန်မာလုပ်သားတွေက ပြောဆိုကြပါတယ်ရှင်။
