https://www.facebook.com/100226203165244/

Fate Book Publishing, Yangon (2026)

12/08/2026

တမင်တကာ ရည်ရွယ် ပျက်ကွက်တာမျိုး မဟုတ်ပေမဲ့ မှာယူထားကြတဲ့သူတွေကို အားနာရကြောင်းပါပဲ။ စာအုပ်လေးတွေတော့ ဒီညနေ မှောင်ရီပျိုးစ အချိန်မှ လက်ထဲ ရောက်လာပါပြီ။ ဒီနေ့ ရလာအောင် တကူးတက ဒီဘက်အထိ ကားနဲ့ တင်ပေးလိုက်တဲ့ ပုံနှိပ်တိုက်က အစ်ကို,ကိုလည်း ကျေးဇူးတင်ရမှာပါ။

အရင်ကလိုမျိုး ပုံနှိပ်စက်က ထွက်လာခါစ စက္ကူ၊ မင်နံ့သင်းသင်းနဲ့ စာအုပ်ကလေးတွေပါပဲ။ မနက်ဖြန်၊ သဘက်ခါကနေ စလို့ မှာထားတဲ့ အမှာကလေးတွေကို စတင်ပို့ပေးပါမယ် ဆိုတဲ့အကြောင်းပါ။

ပြီးတော့ ခုလောက်အထိ စိတ်ရှည်ရှည်နဲ့ သည်းခံပေးပြီး စောင့်ဆိုင်းပေးခဲ့ကြတာကိုလည်း ကျေးဇူးအများကြီး တင်ရှိရတယ် ဆိုတာပါ။

- မိုးရဲ -

03/08/2026

စာအုပ်အမှာလေးတွေကို သည်းခံစောင့်ဆိုင်းပေးနေကြတာ ကျေးဇူးအများကြီးပါ။ အခုတော့ စာအုပ်အဖုံးလေးတွေကို ပလက်စတစ် လောင်းတဲ့ အဆင့် ရောက်နေပါပြီတဲ့။ အခုအပတ်အတွင်း ရလာနိုင်မယ် ထင်ပါတယ်။

စာအုပ်လေးတွေနဲ့ ရလာတာနဲ့ ပြင်ဆင်ထုပ်ပိုး ပို့ပေးဖို့ရာအတွက် လိပ်စာ ပြောင်းလဲပြင်ဆင်ချင်တာ၊ တစ်ခုခု ကြိုတင်မှာကြားထားချင်တာမျိုး ရှိရင်လည်း ဒီနေ့ထဲမှာ ကျနော့်ဆီ လာပြောပေးလို့ ရပါတယ်။

ဒီအတွက် အပြီးသတ် ပြင်ထားတော့မလို့ပါ။

စာအုပ်လေးတွေ စပို့တဲ့အချိန်မှာလည်း တစ်ခါပြန်လည် အကြောင်းကြားပေးပါဦးမယ်။

အားလုံးကို ကျေးဇူးပါနော်။

#အပြစ်အနာအဆာမရှိတဲ့စိတ်မှာ
#ထာဝရတောက်ပနေမယ့်နေေရောင်ခြည်
#𝘌𝘵𝘦𝘳𝘯𝘢𝘭𝘚𝘶𝘯𝘴𝘩𝘪𝘯𝘦𝘰𝘧𝘵𝘩𝘦𝘚𝘱𝘰𝘵𝘭𝘦𝘴𝘴𝘔𝘪𝘯𝘥

26/07/2026

◼️ တစ်ညလုံး အိပ်မပျော်နိုင်သူတစ်ယောက် ကိုယ် ဖြစ်လာခဲ့ပုံ

တခြားဘဝတစ်ခုမှာ ကိုယ်ဟာ မင်းကို ရွေးချယ်ထားပြီးပြီ။ တခြားဘဝတစ်ခုမှာ ကိုယ်ဟာ ကျောခိုင်းထားတဲ့ မင်းရဲ့ ဦးခေါင်းတစ်ဖက်ကို ငေးစိုက်ကြည့်နေရင်း ငိုတော့မလိုလို ဖြစ်သွားပြီးခဲ့ပြီ။ အိပ်မက်လိုပဲ၊ မမြင်နိုင်တဲ့ တံတားတွေ ဖြတ်တယ်။ ကိုယ်ဟာ အရာရာတိုင်းအတွက် "နောက်ဆုံး" ဆိုတာမျိုး ဖြစ်လို့ မရနိုင်ပါဘူး။ ကိုယ် ရွေးချယ်ထားတဲ့ အရာတွေ အတွက်သာ "နောက်ဆုံး" ဖြစ်လို့ ရတယ်။ တံတားတစ်စင်းရဲ့ တခြားသော တစ်စင်း တစ်ဖက်ခြမ်းမှာတော့ အမြဲတမ်း ကိုယ် ရှိတယ်။ မင်းကတော့ ဦးခေါင်း သေးသေးလေး တစ်ခုအပေါ်မှာ အုပ်မိုးပေးထားခဲ့တဲ့ လက်နွေးနွေးလေး တစ်ဖက်။ ကိုယ်နဲ့ အတူတူ လှဲလျောင်းအိပ်စက်နေချိန်မှာ ကိုယ် မသိရှိသေးတဲ့ မင်းအကြောင်းတွေကို မျက်လုံးမှိတ်ထားရင်း ရေရွတ် ပြောဆိုပြနေတဲ့ ကောင်မလေး တစ်ယောက်။ အဲဒီအချိန်တွေမှာ အရင်ဘဝက မိုးသားနဲ့ မည်းမှောင်နေသော တိမ်တွေကို ကိုယ် သတိရတယ်။ တစ်ညလုံး အိပ်မပျော်သွားဖို့ ကိုယ် တကူးတက ကြိုးစားနေစရာ မလိုတော့ပါဘူး၊ မိုးရေစိုစွတ်နေတဲ့ သစ်ရွက်တွေရဲ့ အသံတွေကိုလည်း ကိုယ် ကြားတယ်။ ပြီးတော့ မင်း ခံစားခဲ့ရတဲ့ ဝေဒနာတွေထဲက ဘာသာစကားကို ကိုယ် ကြားတယ်။ အခုအချိန်မှာတော့ ကိုယ်ဟာ အမည်ပြောင်းသွားတဲ့ လမ်းတွေ မြို့တွေကို မူရင်း အမည်နဲ့သာ မှတ်မိ ခေါ်ဆိုသူ တစ်ယောက် ဖြစ်‌နေခဲ့ပါပြီ။ အလင်းမရှိတဲ့ တစ်ညတာလုံး ဒီအတိုင်းပဲ ကိုယ် ဆက်လက်ထိုင်နေမိတယ်။ ဒီလိုနဲ့ တချိန်ချိန်မှာ "နောက်ဘဝ" ဆိုတာလည်း ရှိလာခဲ့ဦးမယ် ဆိုပါတော့၊ အဲဒီအခါမှာလည်း မင်းကို ကိုယ် ရွေးမယ် ။ ။

မိုးရဲ

*Past Lives

25/07/2026

အရင်တစ်ရက်က ကိုယ့်ပါဆင်နယ်အကောင့်မှာ စာအုပ်ထွက်ခါနီးမို့လို့ “အပြစ်အနာအဆာ မရှိတဲ့ စိတ်မှာ ထာဝရတောက်ပနေမယ့် နေရောင်ခြည်” စာသားကို လက်ရေးနဲ့ ရေးပေးကြပါလားလို့ တောင်းမိလိုက်တယ်။

အရင်စာအုပ်တွေတုန်းကတော့ ဘာသာပြန်အုပ်တွေဆိုတော့ တကူးတက မိတ်ဆက်ပွဲတွေ၊ ပန်းစည်း ပေးခံရတာတွေ မလုပ်မိ။ ခုလည်း အဲဒါတွေ လုပ်ဖို့ စီစဉ် မရှိပါဘူး။ အဲ့လိုတွေထက်စာရင် ဒီလို လက်ရေးနဲ့ အမှတ်တရ ရေးပေးကြတာတွေကိုတော့ အမှတ်တရ သိမ်းထားချင်စိတ် ဖြစ််လို့။ သစ်မြစ်တွေလို ခိုင်ခိုင်မာမာ အမြစ်တွယ်နေတဲ့ သတိရမှုတွေတော့ ရှိတယ်လို့ ရေးခဲ့သလိုမျိုးပေါ့။

ခုက သူတို့ ရေးပေးကြတာတွေကို စုပြီး board ပုံလေး လုပ်မိတာ။

ပေ့က သူတွေလည်း ကိုယ့်အတွက် အမှတ်တရ လက်ရေးနဲ့ ဒီလို ရေးပေးပြီး ပုံလေး ပို့ပေးရင် ကျေးဇူးတင်မိမှာပါ။ စာအုပ်အတွက်ရော ကိုယ့်အတွက်ရော အမှတ်တရ ဖြစ်ရတာပေါ့လေ။ တကယ်လို့များ နောက်ထပ် ဒုတိယအကြိမ် ထပ်မံ စီစဉ်ဖြစ်တဲ့အခါကျရင်လည်း ဒီလို လက်ရေးနဲ့ ရေးပေးထားတာတွေကို ထည့်ချင်တယ်လို့လည်း တွေးထားမိတာပဲ။

စာအုပ်က ခုရှေ့လာမယ့် အပတ်ထဲဆို ရလောက်ပါပြီ။ ရရင် ပြန်အကြောင်းကြားပေးမယ်လေနော်။ အားလုံးကို ကျေးဇူး အများကြီးပါနော်။

- မိုးရဲ -

23/07/2026

ခုတလော ကိုယ်တို့ မြင်ခဲ့ရတဲ့ ရောင်စုံတောက်နေတဲ့ နေဝင်ချိန်တွေမှာ ဘာမဆို အလွန်အကျွံ ခံစားတတ်တဲ့ ကိုယ့်ရဲ့ စိတ်ကို ပြင်ပြီး အရာရာမှာ အကောင်းအတိုင်း ကိုယ် နေထိုင်ချင်တယ်။ ကိုယ်တို့ အကုန်လုံး ဘယ်သူမှ ပြည့်စုံကောင်းမွန်နေတာ မဟုတ်ဘူး။ ထာဝရ တည်မြဲခဲ့တာ မဟုတ်ပေမယ့် ကိုယ်တို့ ဘဝမှာ ခဏတာ ကြုံတွေ့ခဲ့ရတဲ့ ချစ်ခြင်းမေတ္တာက ကိုယ်တို့အတွက် လုံလောက်ခဲ့ပါတယ် ဆိုတာမျိုး။

#မိုးရဲ

—-

ရှေ့လာမယ်အပတ်ထဲမှာတော့ စာအုပ်လေး ရလောက်ပါပြီ။ မှာချင်တယ်ဆိုရင် မှာထားလို့ ရပါသေးတယ်။

https://m.facebook.com/story.php?story_fbid=878241032029436&id=100095306401973

19/07/2026

မြက်ခင်းပြင်တွေက ဘယ်တော့မှ အဆုံးသတ် မရှိပေမယ့် မင်း ပင်ပန်းနေမှုကို ကိုယ် သိတယ်။ အိပ်မက်ဆိုတာ တကယ်ရှိခဲ့ရင်တော့ အဲဒီအိပ်မက်က မင်းရဲ့ နွေးထွေးတဲ့ လက်ဖဝါးတွေနဲ့ ကိုယ့်ရဲ့ ပါးပြင်ကို ထိကပ်ထားဖို့ပေါ့။

#ကိုယ်လိုချင်တာနွေးထွေးတဲ့လက်ဖဝါး
#မိုးရဲ

16/07/2026

◾️ မေရီ မရှိတော့တဲ့နောက်ပိုင်းမှာတောင် ဂျွန်ဝပ်ဆင်က တစ်ယောက်တည်း စကားတွေ ဆက်ပြောနေဆဲပါပဲတဲ့

မနေ့ညက ငါ counseling ယူရတယ်။ နင် သေသွားပြီ ထင်လို့။ ငါ့ကို အသက်ရှုလေ့ကျင့်ခန်းတွေ လုပ်ခိုင်းတယ်၊ စသဖြင့်ပေါ့။ ဆူညံနေကြတဲ့ လူအုပ်ကြီး အလယ်မှာ အမြဲတမ်းတစ်ယောက်တည်း ဖြစ်နေသလို ခံစားချက်မျိုးနဲ့လေ။ မခေါ်ချင်တဲ့ လူတွေနဲ့ လမ်းမှာ ဆုံတွေ့မိတာမျိုးဆိုလည်း သူ ပြုံးရယ်ပြတတ်လာတယ်။ ငါတို့အတွက် ဝမ်းနည်းစရာတွေက အရွယ် ရောက်ရှိလာခဲ့ကြပြီနော်တဲ့။ ငါ့အတွက် နင်ဟာ ဖွင့်ဟဝန်ခံချက်တွေကို နားထောင်ပေးတဲ့ ဘုန်းတော်ကြီး တစ်ပါးလို။ လျှို့ဝှက်ချက်တွေ အားလုံးတို့ကတော့ ပြိုကျပျက်စီးသွားတဲ့ လှိုဏ်ခေါင်းတစ်ခုထဲမှာ ပျောက်ဆုံးသွားသလိုမျိုး ဖြစ်ခဲ့ရပြီပေါ့။

နင် မရှိတော့တဲ့ နောက်ပိုင်း တစ်ခါတလေလည်း နက်မှောင်နေတဲ့ တောအုပ်ရဲ့ အလယ်ထဲကို ဖြတ်ပြီး လမ်းလျှောက်ရသလိုမျိုး ငါ ခံစားရတယ်။ ဟိုးအဝေးကြီးမှာ ခပ်ဖျဖျ ရှိနေမယ့် အလင်းရောင်ကလေးကိုသာ မြင်နေနိုင်ဦးမယ်ဆိုရင် ဘယ်လောက်ပဲ ပင်ပန်းနွမ်းနယ်၊ ကံကြမ္မာရဲ့ ဆူးများတဲ့ အကိုင်းအခက်တို့က မျက်နှာကို ဘယ်လောက်ပဲ လာရိုက်ခတ်ခတ် ဆက်လက် လှမ်းလျှောက်နေမိဦးမှာပဲ။ ဒါပေမဲ့လည်းလေနော် ကံကြမ္မာက ငါတို့ကို တစ်ခါကလေးမှ မညှာတာခဲ့ဖူးဘူး။ ငါတို့အတွက် စောင့်ဆိုင်းနေမယ့် အလင်းမှိန်ဖျဖျကလေးလည်း တကယ်တမ်းမှာ အမှန်တကယ်မှ မရှိခဲ့တာ။ နောက်ဆုံးမှာတော့ တူညီတဲ့ ညကသာ ဘုရားရဲ့ရှေ့မှောက်မှာ ငါတို့ အားလုံးကို စောင့်ဆိုင်းနေလိမ့်ဦးမှာပဲ။ ဘာကိုမှ ထပ်မံ မမျှော်လင့်တော့ဘဲ အရိပ်တွေကိုသာ ငါတို့အတွက် အဖော်ပြုနေခဲ့ရတော့မှာပဲ။ သေဆုံးသွားခဲ့ကြတဲ့သူတွေနဲ့ ရှင်လျက် ခွဲခွါခဲ့ကြရသူတွေ - ဘယ်သူတွေကို မေ့ပျောက်ဖို့ ပိုလွယ်ကူလဲ ဆိုတာကို ဘယ်သူမှလည်း ထပ်တူ မပြောဆိုနိုင်ဘူးပေါ့။ နှလုံးသားမှာတော့ ရရှိခဲ့သမျှ ဒဏ်ရာတို့နဲ့ အမှတ်တရ ဖြစ်ခဲ့ရတာပါပဲ။ ငါ ဝမ်းမနည်းပါဘူး။

နင့်ကို မပြောပြဖူးခဲ့တဲ့ ဇာတ်လမ်းတစ်ပုဒ် ရှိသေးတယ်။ ယောက်ျားတစ်ယောက်က သေဆုံးခါနီးမိန်းမတစ်ယောက်ရဲ့ နံဘေးမှာ ထိုင်စောင့်ဆိုင်းနေရတဲ့ အကြောင်း။ ဒီအမျိုးသမီးရဲ့ မျက်လုံးအိမ်ထဲမှာ သူ့ရဲ့ ပုံသဏ္ဍာန်ကိုလည်း အမျိုးသားက ပြန်မြင်နေရတယ်။ အမျိုးသမီးရဲ့ မျက်လုံးအရောင်က အနက်ရောင်စစ်စစ်။ အနီရောင် နေလုံးကြီးက အရှေ့ကနေ အနောက်၊ အနောက်ကနေ အရှေ့ကို ထွက်ပေါ်နေတဲ့ အချိန်ကာလ နှစ်ပေါင်းတစ်ရာတိတိ ကျွန်မရဲ့ အုတ်ဂူနံဘေးမှာ ထိုင်ပြီး စောင့်ဆိုင်းပါ၊ ကျွန်မ ရှင့်ဆီ ပြန်လာခဲ့ပါမယ်လို့ အမျိုးသမီးက မှာခဲ့တယ်။ အမျိုးသား ဖြစ်သူကလည်း နေ့ရက်ပေါင်းများစွာ မရေတွက်နိုင်တော့လောက်အောင် ထိုင်စောင့်ဆိုင်းလျက်သား။ အချိန်တွေ ကြာမြင့်လွန်းလှလို့ အမျိုးသမီးက သူ့ကို လှည့်စားသွားပြီလားလို့တောင် ထင်မြင်လာတဲ့အထိ။ ဘယ်လောက်တောင်မှ အချိိန်တွေ ကုန်လွန်သွားခဲ့ပြီလဲ ဆိုတာကို သူကိုယ်တိုင် မေ့လျော့သွားခဲ့တဲ့အထိ။

ဒီလိုနဲ့ တချိန်မှာတော့ အုတ်ဂူမြေပုံနံဘေးကနေ အဖြူရောင်ကြာပန်းလေးတစ်ပွင့် ပေါက်လာခဲ့ပါတယ်တဲ့။ မြူနှင်းတစ်စက်လောက်နဲ့ စိုစွတ်နေတဲ့ အဖြူရောင် ကြာပန်းပွင့်ကလေးကို အမျိုးသားဖြစ်သူက ယုယုယယ နမ်းလိုက်တယ်။ သူတို့ရဲ့ ဘာသာစကားမှာ "ကြာပန်း" ဆိုတဲ့ စကားလုံးကို "နှစ်တစ်ရာ" နဲ့ "ဆုံစည်းတွေ့ဆုံခြင်း" ဆိုတဲ့ စကားလုံး နှစ်လုံးတို့ ပေါင်းစည်းပြီး ရေးသားရတာလေ။ ဒီအချိန်ရောက်ရှိလာတော့မှသာ မရေမတွက်နိုင်တော့တဲ့ နေ့ရက်ကာလတွေ အများကြီးထဲမှာ သူ စောင့်ဆိုင်းခဲ့ရတဲ့ နှစ်တစ်ရာအချိန်ကာလက ကုန်လွန်သွားခဲ့ပြီ ဆိုတာကို ပထမဆုံးအကြိမ်အဖြစ် သူ သိရှိလိုက်ရတော့တယ်။

အဝေးကောင်းကင်မှာ ညနေကြယ်ကလေးက ခပ်ဖျဖျ လင်းနေပါတော့ရဲ့တဲ့။

မိုးရဲ
၃-ဧပြီ-၂၅

- Anton Chekhov's Uncle Vanya
- Natsume Sōseki's Ten Nights Dreaming

(ကဗျာစာအုပ် pre order တင်ချင်ရင် comment ထဲက link ကနေ ဝင်ကြည့်ပြီး တင်ထားလို့ ရပါတယ်)

16/07/2026

◾️ ကိုယ်တို့မှာ တစ်ယောက်နဲ့ တစ်ယောက် ခွင့်လွှတ်ပေးနိုင်လောက်အောင်အကောင်းမြင်စိတ်တွေ မရှိကြတော့ဘူးဆိုရင်

အစစ အရာရာ ငါအဆင်မပြေပေမယ့် ကမ္ဘာကြီးဟာ လှလိုက်တာကွာလို့လည်း ပြောဖူးမိကြမှာ မဟုတ်ဘူး။ ဒီအတွက်ကြောင့်ပဲ ကိုယ့်ကိုယ်ကိုယ် ဆူးတွေရှိတဲ့ ကြာပွတ်နဲ့ ပြန်ရိုက်ပြီး ဘုရားသခင် ဆီမှာ အပြစ်ဖြေနေတဲ့ အပြစ်သားတွေလိုမျိုး တစ်ယောက်နဲ့ တစ်ယောက် ခွင့်လွှတ်မှုတွေကို အပြန်အလှန် တောင်းခံနေရမှာပဲ။ ကိုယ်တို့ဟာ မီးနဲ့ ရှို့မယ် ခြိမ်းခြောက်ခံရလို့ အသက်ထွက်လောက်အောင် ကပြ ဖျော်‌ဖြေနေရတဲ့ ဝက်ဝံတစ်ကောင် ဆိုတာထက် ဘာမှမပိုပါဘူး။ တစ်ခါတစ်လေမှာလည်း ကမ္ဘာကြီး ပျက်တော့ပါမယ်လို့ အော်ဟစ်ငိုယိုနေကြရင်းနဲ့ပေါ့။ ကိုယ့်ကိုယ်ကိုယ် အဖန်တလဲလဲ သတ်သေနေကြရင်းနဲ့ပေါ့။ ကိုယ်တို့ဟာ လုပ်ခဲ့ပြီးမှ မှားမှန်း သိကြတာ။ အဲဒီအခါမျိုးမှာ ကိုယ်တို့ လုပ်နိုင်တာကလည်း ဒီအမှားတွေကို လက်သင့်ခံလိုက်ပြီး ရေ တစ်ဖန်ခွက်ကြီးကြီး သောက်ချလိုက်ရုံပဲ။ သေခြင်းတရားသာ ရှိမနေဘူးဆိုရင် ကိုယ်တို့တွေကလည်း တစ်ယောက်ကို တစ်ယောက် ခွင့် လွှတ်ပေးဖို့ အတော်ကို ခဲယဉ်းခဲ့ကြမှာ။ ဖက်ထားပေးချင်ပေမယ့် ဖက်ထားခွင့် မရတော့သလိုမျိုး။ ကိုယ်တို့မှာ ရှိခဲ့ကြတဲ့ အကောင်းမြင်စိတ်က ဖြစ်မလာသေးတဲ့ အရာတွေ အပေါ်မှာပဲ လုံးလုံးလျားလျား မူတည်နေတာ မဟုတ်ဘူး။ ဖြစ်ပြီးသားအရာတွေ အပေါ်မှာလည်း လှောင်ပြောင်ချင်တဲ့စိတ်နဲ့ အကောင်းမြင်တတ်အောင် ကြိုးစားခဲ့ကြရတာပဲ။ တစ်ယောက်ယောက်ရဲ့ ငြင်းဆန်မှုကို ခံခဲ့ရတဲ့ အချိန်မျိုးမှာတောင် နင့်ကောင် ငါ့လို ကဗျာ ရေးတတ်ရင်ခက်မယ်လို့ သရော်တဲ့ လေသံနဲ့ ပြောမိ သွားသလိုမျိုး။ ကိုယ်တို့ဟာ ဖြစ်နိုင်ချေ နည်းပါးတယ်ဆိုရင်တောင်မှ (အရင်က ဖြစ်ခဲ့ဖူးလို့) လွမ်းလောက်စရာ ဟွန်းတယောသံ ကြားနေရတဲ့၊ ရှေးဟောင်းဘုရားစေတီတွေ ပြည့်နှက်နေတဲ့ လမ်းကြားထဲကနေ ချုသံ တချွင်ချွင်နဲ့ မြင်းလှည်းတစ်စီးတစ်လေ ပေါ်လာမလားလို့ စိတ်ကူးဉာဏ် ကွန့်မြူးမှု တစ်ခုနဲ့ အတူတူ စောင့်ဆိုင်းနေကြတဲ့သူတွေပေါ့။ တချိန်ချိန်မှာတော့ ည,ဟာ မင်း ကိုယ့်ကို ခွင့်လွှတ်ခဲ့တယ် ဆိုတဲ့ စကားသံကို ယူဆောင်လာခဲ့မှာပဲ။ အဲဒီအခါကျ ကိုယ် မရှိတော့ပေမဲ့ တသက်လုံး မွေးမြူယူလာခဲ့ရတဲ့ အကောင်းမြင်စိတ်တွေနဲ့ မင်း ဆက်လက်နေထိုင်ပေါ့လေ ။ ။

(ချိမ့်သို့)

မိုးရဲ

(ဒီအပုဒ်ကို ဆူးနွယ် ရွတ်ပေးထားတာ။ နောက်ရက်တွေကျရင်လည်း စာအုပ် မထွက်မချင်း စာအုပ်ထဲပါတဲ့၊ ရွတ်ပေးထားတာ ရှိတဲ့ အပုဒ်တွေကို ဒီမှာ ပြန်တင်ဖြစ််မလား မသိ။ ရွတ်ထားတာမျိုး ရှိရင်လည်း လာပို့ပေးလို့ ရပါတယ်။ ဒီမှာ ပြန်တင်ပြီး နားထောင်ကြတာပေါ့။)

15/07/2026

အမှာစာအနေနဲ့ကတော့ “𝐄𝐭𝐞𝐫𝐧𝐚𝐥 𝐒𝐮𝐧𝐬𝐡𝐢𝐧𝐞 𝐨𝐟 𝐭𝐡𝐞 𝐒𝐩𝐨𝐭𝐥𝐞𝐬𝐬 𝐌𝐢𝐧𝐝” စာသားကို “အပြစ်အနာအဆာ မရှိတဲ့ စိတ်မှာ ထာဝရ တောက်ပနေမယ့် နေရောင်ခြည်” လို့ ယူထားမိတဲ့ အကြောင်း အနည်းငယ်မျှ ပြောချင်လို့ပါ၊ ဒီမူရင်းစာသားကို စပြီး သဘောကျခဲ့ရတာက ကျွန်တော်တို့အားလုံး ကြိုက်နှစ်သက်ခဲ့တဲ့ ၂၀၀၄ ခုနှစ်မှာ ထွက်ရှိလာတဲ့ ဂျင်ကာရေးနဲ့ ကိတ်ဝင်းစလတ်တို့ရဲ့ ရုပ်ရှင်ဇာတ်ကားကနေပေါ့။ မူရင်းကဗျာကတော့ Alexander Pope (၁၆၈၈ − ၁၇၄၄) ရဲ့ Eloisa to Abelard ကဗျာထဲကပါတဲ့။

ဒီကဗျာထဲမှာတော့ အတိတ်က မှတ်ဉာဏ်တွေ၊ နာကျင်စရာ ကောင်းတဲ့ ခံစားချက်တွေသာ မရှိရင်၊ ဒီအရာတွေ အားလုံးကိုသာ မေ့လျော့သွားခဲ့မယ်ဆိုရင် အပြစ်အနာအဆာ မရှိတဲ့ စိတ်မှာ ထာဝရ တောက်ပနေမယ့် နေရောင်ခြည်လို ဖြစ်နေမှာပဲလို့ ရေးသားထားတာပါ။ ဇာတ်ကားထဲမှာလည်း တစ်ယောက်ကို တစ်ယောက် မေ့လျော့သွားစေဖို့အတွက် မှတ်ဉာဏ်တွေကို ဖျောက်ဖျက်ပစ်ဖို့ ကြိုးစားနေကြတဲ့ ချစ်သူ နှစ်ယောက်ကို တွေ့ရပါလိမ့်မယ်။

ဒီလိုသာ မေ့လျော့သွားကြရင် ဘာဝေဒနာမျိုးမှ မရှိတော့တာ၊ မခံစားနေရတော့တာ ကောင်းတာပေါ့လို့ ထင်ကောင်း ထင်စရာ ရှိနိုင်ပေမဲ့ အမှတ်တရ သတိရစရာ ဖြစ်ရပ်တွေ၊ စွဲလမ်းမှုတွေသာ မရှိခဲ့ဘူးဆိုရင်လည်း လူတွေက ဘယ်အရာတွေနဲ့ ဘာအတွက်ကြောင့် ဆက်လက် ရှင်သန်နေကြတော့မှာလဲ ဆိုတာပဲ ကိုယ့်ဘက်က မေးစရာ ရှိလာပါတယ်။ နာကျင်စရာ အဖြစ်တွေတော့ ရှိခဲ့ပေမဲ့ နာကျင်မှုထဲမှာပဲ ပိတ်မိနေမှာမျိုး၊ ခွင့်မလွှတ်နိုင်ဘဲ တစ်ယောက်နဲ့ တစ်ယောက်ကို အပြစ်တွေပဲ မြင်နေတာမျိုး ဆိုလိုချင်တာ မဟုတ်ပါဘူး။

ဒီလို နာကျင်မှုတွေနဲ့ မေ့လျော့မှုတို့ရဲ့ ဆန့်ကျင်ဘက်က သစ်မြစ်တွေလို ခိုင်ခိုင်မာမာ အမြစ်တွယ်နေတဲ့ အမှတ်တရ သတိရမှုတွေကပဲ ကိုယ့်အတွက် အပြစ်အနာအဆာ မရှိတဲ့ စိတ်မှာ ထာဝရ တောက်ပနေမယ့် နေရောင်ခြည်လို တောက်ပနေလိမ့်မယ်လို့ ဆိုလိုချင်ပါတယ်။

ဒါ့အပြင် တစ်ချိန်ချိန်မှာ မေ့လျော့သွားကောင်း မေ့လျော့သွားနိုင်တဲ့ အတွေ့အကြုံတွေ၊ ဖြစ်ရပ်တွေထက် ဒီလို ခံစားခဲ့ရတဲ့ ခံစားချက်တွေ၊ သတိရမှုတွေက ပိုမိုစစ်မှန်တယ်လို့ ကိုယ့်အနေနဲ့ ယုံကြည်ပါတယ်။ ဒီအတွက်ကြောင့်လည်း −

“ဒီလိုနဲ့ ဘ၀ရဲ့ တစ်နေရာရာမှာတော့ ကိုယ်မထင်မှတ်ထားမိဘဲ ဖွေးဆွတ်နေတဲ့ ဆံပင်တွေကို ဒဂုန်တာရာလိုမျိုး အနောက်ကို ပြန်လှန်ဖြီးထားပြီးသား ဖြစ်သွားခဲ့မှာပဲ။ မြက်ပင်တွေက ရှည်လျားတာ ဟုတ်တယ်၊ ဒါပေမဲ့ ကိုယ်တို့ရဲ့ ဘ၀တွေက အဲဒီ မြက်ပင်တွေထက် ပိုမို ရှည်လျားတယ်။ သစ်ပင်တစ်ပင်ဖြစ်ဖို့ လုံလောက်တဲ့ အတွေ့အကြုံတွေ ကိုယ့်မှာ မရှိဘူး၊ ဒါပေမဲ့ သစ်မြစ်တွေလို ခိုင်ခိုင်မာမာ အမြစ်တွယ်နေတဲ့ သတိရမှုတွေတော့ ရှိတယ်၊ အပြစ် အနာအဆာ မရှိတဲ့ စိတ်မှာ ထာဝရ တောက်ပနေမယ့် နေရောင်ခြည်တွေလိုမျိုးပေါ့။ တစ်ချိန်ချိန်မှာတော့ ကိုယ်တို့ဟာ လမ်းမှာ ဆုံတွေ့မိမယ့် အမျိုးသမီး တစ်ယောက်ယောက်ကို မခေါ်နိုင်၊ မပြောနိုင် ဖြစ်ပြီး မျက်နှာလွှဲသွားကြမယ့် သူတွေချည်းပဲ။ ငါ အိပ်မောကျသွားပြီလို့ ကိုယ့်ကိုယ်ကိုယ် ပြန်မပြောနိုင်ခင်မှာ နှစ်နှစ်ခြိုက်ခြိုက် အိပ်ပျော်သွားကြမယ့် သူတွေချည်းပဲ။ အိပ်မက်ရဲ့ တစ်နေရာရာမှာတော့ ပင်လယ်လှိုင်းတွေထဲကနေ နောက်တစ်ခါ ရေနဲ့ ထပ်ပြီး မဖျက်ဆီးတော့ပါဘူးလို့ သက်တံလိုမျိုး ကတိစကားတစ်ခုကို စောင့်ဆိုင်းမိလျက်သားပေါ့။ ညဉ့်နက်သန်းခေါင်အချိန် ကိုယ်တို့ခြံဝင်းထဲက မြူတွေ ကြားထဲမှာ ပျော်ရွှင်စွာ ပြေးလွှားနေကြမယ့် မြင်းဖြူတွေကို မျှော်လင့်မိလျက်သားပေါ့”

စတဲ့ ဒီလို အရေးအသားတွေကို ရေးဖြစ်ခဲ့မိတာ ဖြစ်ပါလိမ့်မယ်။

−−

ဒီစာအုပ်အထဲမှာ ကျနော် ရေးခဲ့သမျှ အကုန်အစင် အပုဒ်စေ့လားဆိုတော့ မဟုတ်ပါဘူး၊ ကျန်ရစ်နေသေးတာတွေ၊ ချန်ရစ်ထားခဲ့တာတွေလည်း ရှိပါသေးတယ်။ ဒါတွေကိုတော့ နောက်ပိုင်းမှာမှ ထပ်မံဖြည့်စွက်သွားဖို့ ရှိတယ် ဆိုတာပါ။

ကိုယ့်အပေါ်မှာ စာရေးဆရာတစ်ယောက်အနေနဲ့ စာဖတ်သူတွေ သိထားကြတာက အခုလို ကဗျာတွေကို ရေးသားသူ တစ်ယောက် အဖြစ် သိထားကြတာက သက်သက်၊ မိုရီဆာကီ စာအုပ်ဆိုင် နေ့ရက်များလို စာအုပ်တွေကိုပါ ဘာသာပြန်ဆို ရေးသားနေသူ တစ်ဦးအဖြစ် သိထားကြတာက သက်သက် ဖြစ်နေကြလိမ့်မလား မသိပါဘူး။ ဘာသာပြန်တဲ့ စာတွေမှာတော့ မူရင်းခံစားချက်အတိုင်း တသွေဝေမတိမ်း လိုက်နာပြန်ဆိုရတာ ရှိပေမဲ့ အခုကဗျာတွေမှာတော့ ကိုယ့်ရဲ့ ခံစားချက်အတိုင်း လွတ်လွတ်လပ်လပ် ရေးသားလို့ ရတဲ့ အရေးအသားတွေကို တွေ့ရလိမ့်မယ်လို့ ပြောရမလားပါပဲ။

#အမှာစာ
#𝐄𝐭𝐞𝐫𝐧𝐚𝐥𝐒𝐮𝐧𝐬𝐡𝐢𝐧𝐞𝐨𝐟𝐭𝐡𝐞𝐒𝐩𝐨𝐭𝐥𝐞𝐬𝐬𝐌𝐢𝐧𝐝

−−−

အစကတော့ ကြိုတင်အမှာ မကောက်တော့ဘူးလို့ရော၊ မကောက်သေးဘူးလို့ရော တွေးထားတာပါ။ ဒီအတိုင်း လာမှာကြတဲ့ သူတွေလည်း ရှိတာမို့ (ဒီအတွက်လည်း ကျေးဇူးတင်ရကြောင်းပါပဲ။ ဒီစာအုပ်ကို အများကြီး မျှော်နေကြမှန်း သိပါတယ်။ ကိုယ်ကသာ မထုတ်သေးဘူးလို့ တိုက်တွန်းခဲ့သမျှကို ငြင်းနေခဲ့မိတာပါ။) ပို့ခါနီးအချိန်ကျ လိပ်စာတွေ အသင့်ပြင်ဆင်ထားရအောင်လို့ တစ်ခါတည်းပဲ ကြိုကောက်ထားပါတော့မယ်။

စာအုပ်က အခုလကုန် ထွက်လာမှာပါ။ ကြားထဲမှာ COD နဲ့ပဲ ဖြစ်ဖြစ်၊ Prepaid ငွေရှင်းထားပြီးတော့ပဲ ဖြစ်ဖြစ် အဆင်ပြေသလို မှာထားလို့ ရပါတယ်။ ပါဝင်တဲ့ အပုဒ်တွေနဲ့ မာတိကာကို Fate ရဲ့ တယ်လီချယ်နယ်

https://t.me/fatebookpublishing/64

ကနေ သွားရောက် ဖတ်ရှုလို့ ရပါတယ်။ နောက်ရက်တွေမှ ဒီမှာ သက်သက် တစ်ခါ ပြန်တင်ပေးပါမယ်။

တန်ဖိုးက (၈,၅၀၀) ကျပ်ပါ။ စာမျက်နှာ (၁၀၀) ပါ။ စာအုပ်ဆိုဒ်က Fate က ထုတ်ဝေထားတဲ့ စာအုပ်လေးတွေရဲ့ အရွယ်အစား အတိုင်းပါပဲ၊ အုပ်ရေ (၃၀၀) သာ ထုတ်ဝေပါတယ်။ စာအုပ်ဆိုင်တွေပေါ် လိုက်ဖြန့်ချိတာလည်း အများကြီး မရှိလောက်ပါဘူး။ ဆိုင်တွေက အမှာရှိလာရင်တော့ သွားပို့ပေးဖြစ်မှာပါ။

မှာယူချင်တယ်ဆိုရင် Fate ကနေ တဆင့် ဆက်သွယ် မှာယူထားလို့ ရပါတယ်။ စာအုပ်လေးတွေ ပုံနှိပ်တိုက်က ရရှိလာတဲ့အချိန်၊ ပို့ဆောင်ခါနီးအချိန်ကျရင်လည်း တစ်ခါ ပြန်အကြောင်းကြားပေးပါမယ်နော်။

အားလုံးကို ကျေးဇူးပါနော်။

− မိုးရဲ −

01/06/2026

မေလ (၂၅) ရက်နေ့မှာ ပြုလုပ်ခဲ့တဲ့
Giveaway အစီအစဉ်လေးမှာ
ပါဝင်ဆုတောင်းပေး၊ မန့်ပေးခဲ့ကြတဲ့
စာဖတ်သူများအားလုံးကို ကျေးဇူးတင်ရှိရကြောင်းနဲ့
ဒီအစီအစဉ်မှာ စာအုပ် (၃) အုပ် ကံထူးသွားတဲ့
ကံထူးရှင် (၃) ယောက်တို့ပါ။

စာအုပ်လေးတွေအတွက် ပို့ပေးဖို့အတွက်
နာမည်၊ လိပ်စာ၊ ဖုန်းနံပါတ်လေးတွေကို
မက်စင်ဂျာကနေ တဆင့် ပြောပေးကြပါဦးနော်။

ပြီးတော့ အဲဒီပို့စ်ထဲမှာ Fate က ဆက်လက်စီစဉ်မယ့်
စာအုပ်လေးတွေကို စောင့်မျှော်နေကြကြောင်း
မန့်ထားကြတာတွေအတွက်လည်း
ကျေးဇူးတင်ရကြောင်းနဲ့ နောက်ထပ် စာအုပ်အသစ်တွေကို
စီစဉ်နိုင်အောင် ကြိုးစားသွားပါဦီးမယ် ဆိုတာပါ။

အားလုံးကို ကျေးဇူးပါနော်။

Fate Book Publishing

12/08/2026

03/08/2026

26/07/2026

25/07/2026

23/07/2026

19/07/2026

16/07/2026

16/07/2026

15/07/2026

01/06/2026

Address

Telephone

Website

Alerts

Contact The Business

Shortcuts

Share

Category

Listing takedown request