1XBET

04/12/2023

ရပ်ရှ်ဖို့ဒ် ကို လူရှေ့သူရှေ့ အပြစ် မပြောချင်ဘူး၊ နှစ်ယောက်တည်း တွေ့ပြီး စကားပြောမယ် ဆိုတဲ့ နည်းပြ တန်ဟက်
---------------------------------

ပြီးခဲ့တဲ့ စနေနေ့က နယူးကာဆယ်အသင်းကို အရေးနိမ့်ခဲ့တဲ့ ပွဲစဉ်အတွင်းမှာ အသင်းအတွက် ဘာမှ မယ်မယ်ရရ ခြေစွမ်းပြသနိုင်ခြင်း မရှိပဲ ရုန်းကန်နေခဲ့ရတဲ့ တိုက်စစ်မှူး မားကပ်စ် ရပ်ရှ်ဖို့ဒ်နဲ့ စကားပြောဆိုမှုတွေ လုပ်ဆောင်သွားမယ်လို့ မန်ချက်စတာ ယူနိုက်တက် နည်းပြ အဲရစ် တန်ဟက်က ဖွင့်ဟသွားခဲ့ပါတယ်။
ပြီးခဲ့တဲ့ ဘောလုံးရာသီတုန်းက မန်ယူနိုက်တက်အသင်းအတွက် ပြိုင်ပွဲစုံ ဂိုး (၃၀)အထိ သွင်းယူနိုင်ခဲ့ပေမယ့် ဒီရာသီမှာတော့ သွင်းဂိုး (၂)ဂိုးသာ ရရှိထားပြီး ခြေစွမ်းပိုင်းလည်း ကျဆင်းလျက် ရှိနေတဲ့ ရပ်ရှ်ဖို့ဒ်ဟာ အခု နယူးကာဆယ်နဲ့ ပွဲမှာလည်း သူရဲ့ body language တွေက ပြောစရာတစ်ခုလို ဖြစ်လာခဲ့ပြန်ပါတယ်။

အဲ့ဒီပွဲစဉ်မှာ ရပ်ရှ်ဖို့ဒ်က ယူနိုက်တက်အတွက် ထိထိရောက်ရောက် ကစားပေးနိုင်ခဲ့ခြင်း မရှိပဲ ဒုတိယပိုင်း (၆၁)မိနစ်မှာ လူစားလဲခံခဲ့ရသလို သူရဲ့ အမှုအယာတွေဟာလည်း ကြိုးစားအားထုတ်မှု ကင်းမဲ့နေတဲ့ ပုံစံမျိုးတွေလိုပါ ဖြစ်နေရပါတယ်။
ဒီလို ကိစ္စတွေနဲ့ ပတ်သက်ပြီး နည်းပြ တန်ဟက် က “ကျွန်တော် မားကပ်စ်နဲ့ စကားပြောဆိုသွားရပါလိမ့်မယ်။ မီဒီယာတွေမှာတော့ မဟုတ်ပါဘူး။ ကျွန်တော်က ကစားသမားတစ်ဦးချင်းစီရဲ့ စွမ်းဆောင်မှုတွေ အမှားအယွင်းတွေကို ပြောလေ့ရှိတဲ့သူ မဟုတ်ပါဘူး။“အခုအချိန် ဒီပြသာနာက ဖြစ်ပေါ်နေတယ်ဆိုတာ ကျွန်တော် သိပေမယ့်လည်း တကယ်တော့ မားကပ်စ်က သူ ခြေစွမ်းတွေ ပြသနိုင်ဖို့အတွက် အသေအချာ အားစိုက်ထုတ်နေတာပါ။

ဒါကြောင့်လည်း သူက သူရဲ့ အကောင်းဆုံး ပုံစံကို မကြာခင်မှာပဲ ပြန်ရသွားလိမ့်မယ်။ သူ ဒီအခြေအနေကနေ ပြန်လာနိုင်လိမ့်မယ်။ အဲ့လို ဖြစ်လာဖို့လည်း ကျွန်တော်တို့ဘက် သူ့ကို အကောင်းဆုံး ပံ့ပိုးပေးနေပါတယ်။” လို့ ပြောကြားလိုက်ပါတယ်။
ရပ်ရှ်ဖို့ဒ်ဟာ မနှစ်က အကောင်းဆုံး စွမ်းဆောင်ရည်တွေ ပြသနိုင်ခဲ့တဲ့ ရပ်ရှ်ဖို့ဒ်နဲ့ ဘာမှကို မဆိုင်တော့ပဲ ဂိုးတွေ သွင်းယူနိုင်ဖို့အပြင် ပုံမှန် ခြေစွမ်းတွေ ပြသနိုင်ဖို့ပါ ရုန်းကန်နေရပြီး အခုလည်း ပြိုင်ပွဲစုံ (၁၈)ပွဲထိ ကစားထားပြီးချိန်မှာ သွင်းဂိုး (၂)ဂိုးနဲ့ ဂိုးဖန်တီးမှု (၄)ကြိမ်သာ လုပ်ဆောင်ထားနိုင်ခဲ့ပါတယ်။

04/12/2023

ကာဆယ်နဲ့ ပွဲ ကွင်းထဲမှာ ယူနိုက်တက် ကစားသမား တစ်ဦးနဲ့ စကားများခဲ့သေးတဲ့ နည်းပြ တန်ဟက်
---------------------------------
မန်ချက်စတာ ယူနိုက်တက် နည်းပြ အဲရစ်တန်ဟက်ဟာ မနေ့ညတုန်းက နယူးကာဆယ်ကို ၁-၀ ဂိုးဖြင့် ရှုံးနိမ့်တဲ့ ပွဲစဉ်အတွင်း အသင်း တိုက်စစ်မှုး အန်တိုနီမာရှယ်နဲ့ အငြင်းပွား စကားများနေခဲ့တာ တွေ့ရပါတယ်။ပြင်သစ်တိုက်စစ်မှူးဟာ စိန့်ဂျိမ်းစ်ပါ့ခ်ပွဲစဉ်တွင် ဒိန်းမတ်တိုက်စစ်မှူး ဟွိုင်းလန်းကို ကျော်ဖြတ်ကာ ယူနိုက်တက် တိုက်စစ်ကို ဦးဆောင်ခွင့် ရရှိခဲ့ပါတယ်။

မန်ယူအသင်းရဲ့ ဝါရင့် တိုက်စစ်မှုး ဖြစ်တဲ့ အန်တိုနီမာရှယ်ဟာ ယခုရာသီမှာ တစ်ပွဲမျှ ပွဲချိန်ပြည့် ကစားခွင့် မရထားသူလည်း ဖြစ်ပါတယ်။နယူးကာဆယ်နှင့်ပွဲစဉ်ရဲ့ ပထမပိုင်းတွင် အဲရစ်တန်ဟက်ဟာ အန်တိုနီမာရှယ်အား လက်ဝှေ့ယမ်းပြခဲ့ပြီး အကြီးအကျယ် စိတ်ပျက်နေခဲ့တာလည်း တွေ့ရပါတယ်။ အန်တိုနီမာရှယ်က လက်နှစ်ဖက်ဆန့်ကာ ဘာမှ မလုပ်နိုင်တဲ့ ပုံစံမျိုးဖြင့် တုံပြန်ခဲ့ပါတယ်။

ယခုရာသီမှာ နည်းပြ အဲရစ်တန်ဟက်ဟာ ယူနိုက်တက်စတားများဖြစ်ကြတဲ့ ဆန်ချို၊ ဗာရန်းတို့နှင့်လည်း ပြဿနာ တက်ထားသူလည်း ဖြစ်ပါတယ်။အဲရစ်တန်ဟက်ဟာ ဒုတိယပိုင်းတွင် နယူးကာဆယ်အတွက် အန်တိုနီဂေါ်ဒွန်က အနိုင်ဂိုးသွင်းပြီး မိနစ် ၆၀ မှာ အန်တိုနီ မာရှယ်အစား ဟွိုင်းလန်းကို ထည့်သွင်းခဲ့ပါတယ်။

ဒါပေမဲ့လည်း မန်ချက်စတာ ယူနိုက်တက်ရဲ့ ပေါင် ၇၅ သန်းတန် တိုက်စစ်မှူးဟာလည်း ဂိုးပေါက်ရှာမတွေ့ခဲ့ပါဘူး။ ဒါကြောင့် ပွဲအပြီးမှာ ယူနိုက်တက်တို့ ၁-ဝ နဲ့ ရှုံးနိမ့်ခဲ့ရပါတယ်။

04/12/2023

ယူနိုက်တက် နယူးကာဆယ်နဲ့ သရေကျသွားနိုင်တဲ့ အခွင့်အရေးကောင်းကြီးကိုမှ ဝင်နှောက်ခဲ့တဲ့ မက်ဂွိုင်းယား
---------------------------------

မနေ့ညက မန်ချက်စတာယူနိုက်တက်ဟာ နယူးကာဆယ်ကို ၁-၀ ဂိုးဖြင့် ရှုံးနိမ့်တဲ့ပွဲစဉ်မှာ ချေပဂိုးရဖို့ အကောင်းဆုံး အခွင့်အရေး ကြုံခဲ့ပေမဲ့လည်း ဟယ်ရီ မက်ဂွိုင်းယားကြောင့် မရရှိခဲ့ပါဘူး။ အိမ်ရှင် နယူးကာဆယ် အသင်း ဟာ ပွဲချိန် ၅၅ မိနစ်မှာ အန်တိုနီဂေါ်ဒွန်ရဲ့ ဂိုးဖြင့် ပွဲကို ဦးဆောင်ထားနိုင်ခဲ့ပါတယ်။ပွဲနှောင်းပိုင်းတွင် ယူနိုက်တက်ဟာ ချေပဂိုးရရှိရေး ကြိုးပမ်းလာပြီး နယူးကာဆယ်ဘက်သို့ ခြိမ်းခြောက်မှုတွေ ပြုလုပ် လာခဲ့ပါတယ်။ပွဲချိန် ၈၉ မိနစ်မှာတော့ အန်တိုနီဟာ ယူနိုက်တက်တို့ ချေပဂိုးရဖို့ အကောင်းဆုံးအခွင့်အရေးရရှိခဲ့ပါတယ် ဒါပေမဲ့လည်း ဘရာဇီးစတားရဲ့ ကန်ချက်မှာ ဟယ်ရီမက်ဂွိုင်းယားကို ထိပြီး ချေပဂိုးမရရှိခဲ့ပါဘူး။

ဘောလုံးထိမှန်ချိန်တွင် ဟယ်ရီမက်ဂွိုင်းယားဟာ လူကျွံနေပါတယ်။ တကယ်လို့များ ဂိုးဝင်သွားခဲ့မယ်ဆိုရင်လည်း ဂိုးအဖြစ် သတ်မှတ်ခံရမှာ မဟုတ်ပါဘူး။

ယင်းအဖြစ်အပျက်ကြောင့် ဟယ်ရီမက်ဂွိုင်းယားဟာ ယခင်ကဲ့သို့ပင် ယူနိုက်တက်ပရိသတ်များရဲ့ အွန်လိုင်းတွင် ပစ်မှတ်ထားခြင်းခံလာရတာလည်း တွေ့ရပါတယ်။ ပရိသတ်တစ်ဦးက “အန်တိုနီ ဂိုးသွင်းချိန်မှာ မက်ဂွိုင်းယား အချိန်မှား၊ နေရာမှားသို့ ကံဆိုးပြီး ရောက်နေပါလား”လို့ ဆိုသွားပါတယ်။

အခြားတစ်ဦးကလည်း “မက်ဂွိုင်းယားက အရမ်းကံဆိုးသူပါလား။ ဘောလုံးကံကြမ္မာ ဇာတ်ဆရာတော့ မက်ဂွိုင်းယားကို အရမ်းမုန်းမှာပဲ”လို့ ပြောကြားသွားပါတယ်။ နယူးကာဆယ်ကို ရှုံးလိုက်တဲ့ ပွဲကြောင့် မန်ချက်စတာ ယူနိုက်တက်ဟာ ယခုရာသီ ၆ ပွဲမြောက် ရှုံးပွဲကြုံတွေ့ခဲ့ရပြီး အမှတ်ပေးဇယားအဆင့် ၇ သို့ ဆင်းလိုက်ရပါတယ်။

04/12/2023

ကစားကွက်ရော ကစားပုံပါ မဟန်တဲ့ မန်ယူတို့ နယူးကာဆယ် အသင်းကို အဝေးကွင်းမှာ ၁-ဝ နဲ့ ရှုံးသွားရတဲ့ ပွဲအကြောင်း
---------------------------------

မန်ချက်စတာ ယူနိုက်တက်ဟာ မနေ့ညက နယူးကာဆယ် အသင်းကို အဝေးကွင်း သွားရောက် ရင်ဆိုင် ကစားရာ ၁-ဝ နဲ့ အရေးနိမ့်သွားခဲ့ရပါတယ်။ဧည့်သည် မန်ယူတို့က ဒီပွဲမှာ ဂိုးသမား အိုနာနာ၊ ခံစစ်မှာ မက်ဂွိုင်းယား၊ လုခ် ရှော၊ ဝန်ဘစ်ဆာကာနဲ့ ဒါလော့တို့ကို ကစားစေခဲ့ပြီး ကွင်းလယ်မှာတော့ မက်တော်မီနေး၊ မိုင်နူးနဲ့ ဘရူနို ဖာနန်ဒက်စ်တို့ကို ခင်းကျင်းလာခဲ့သလို တိုက်စစ် မှာတော့ ရက်ရှ်ဖို့ဒ်၊ ဂါနာချိုနဲ့ မာစီယယ်လ်တို့ကို တွဲဖက်ပေးခဲ့တာပါ။မန်ယူတို့အနေနဲ့ စိန့်ဂျိမ်းစ်ပါ့ခ်မှာ လူမစုံတာချင်းအတူတူ နယူးကာဆယ်လ်တို့ကို ယှဉ်ကစားဖို့ မဖြစ်နိုင်ခဲ့ဘဲ ကွင်းလယ် ထိန်းချုပ်နိုင်မှုအပိုင်းမှာ တန်ဟတ်ရဲ့ အဖြစ်မရှိမှုကိုပဲ မြင်ခဲ့ရသလို ပထမပိုင်းမှာ ဂိုးပေါက်ကန်သွင်းခွင့်ချင်းက တော်တော်လေး ကွာခြားနေခဲ့ပြီး ကောင်တာကိုပဲ အားပြုခဲ့ရပေမယ့် ဂိုးသမား အိုနာနာ အမှားအယွင်း မရှိခဲ့တာကြောင့် ဂိုးမရှိသရေပဲဖြစ်နေခဲ့ပါတယ်။ဒုတိယပိုင်းမှာတော့ မန်ယူတို့ ကစားပုံက ပိုချာလာခဲ့ပြီး ပွဲချိန် ၅၅ မိနစ်မှာတော့ နယူးကာဆယ်လ်တို့ ဂိုးသွင်းယူ သွားခဲ့သလို ဒီဂိုးကိုတော့ ညာခြမ်းတိုက်စစ်ကနေ ထရစ်ပီယာက ဂိုးရှေ့ကို အနိမ့်ဘော ချိုးပေးရာမှာ အယ်လ်မီရွန် ပိတ်သွင်းဖို့ မမီလိုက်ပေမယ့် ဘယ်တောင်ပံက ပြေးဝင်လာခဲ့တဲ့ ဂေါ်ဒန်က အနီးကပ် အပိုင်ကန်သွင်းပြီး အိုနာနာကို ကြေကွဲစေခဲ့တာပါ။ဒီနောက်မှာ မန်ယူတို့ဘက်က မာစီယယ်လ်၊ ရက်ရှ်ဖို့ဒ်၊ ဝန်ဘစ်ဆာကာနဲ့ မိုင်နူးတို့အစား ဟွိုင်လန်း၊ အန်တိုနီ၊ ရက်ဂီလွန်နဲ့ အမ်မရာဘတ်တို့ကို လဲကစားခဲ့ပြီး နယူးကာဆယ်လ်တို့ဘက်ကတော့ အရန်ခုံမှာ လူလဲစရာ ရှားပါး ရတဲ့ကြားထဲ ဂိုးသမား နစ်ခ် ပုပ် နာသွားခဲ့လို့ ဒူဘရက်ဗ်ကာကို ထည့်သွင်းခဲ့ရတာဖြစ်ပါတယ်။

ပွဲချိန် ၈၉ မိနစ်မှာ ရက်ဂီလွန်ရဲ့ ဖြတ်တင်ဘောကနေ အန်တိုနီက ကန်သွင်းပြီး လူစားဝင် ကစားသမားတွေရဲ့ ချေပဂိုး ဖြစ်ဖို့ နီးစပ်ခဲ့သေးပေမယ့် ရှေ့တက်ပြီး ယောင်နေတဲ့ ခေါင်းကြီး မက်ဂွိုင်းယားက လူကျွံအနေအထားကနေ ရင်ဘတ်နဲ့ ရှပ်ထိပြီး ကာကွယ်ပေးခဲ့လို့ မန်ယူတို့ ကြေကွဲခဲ့ရသလို နယူးကာဆယ်လ်တို့ကတော့ ကံကောင်းသွားခဲ့ကြတာပါ။

ပွဲချိန်အပြည့်မှာတော့ နယူးကာဆယ်လ်တို့က မန်ယူတို့ကို စိန့်ဂျိမ်းစ်ပါ့ခ်မှာ ဂေါ်ဒန်ရဲ့ တစ်လုံး တည်းသော ဂိုးနဲ့ အနိုင်ရသွားခဲ့ပါတယ်။ နည်းပြ တန်ဟတ်ရဲ့ မန်ယူအသင်းကတော့ အဆင့် ၇ နေရာကို ကျဆင်း သွားခဲ့ပါတယ်။

02/12/2023

အိုနာနာ ကင်မရွန်းလက်ရွေးစင် အသင်းမှာ အရွေး မခံရအောင် ညှိနေတဲ့ မန်ချက်စတာ ယူနိုက်တက်
---------------------------------

မန်ချက်စတာ ယူနိုက်တက်ဟာ အင်ဒရေ အိုနာနာအား အာဖရိကဖလားပြိုင်ပွဲတွင် အရွေး မခံရရေး အတွက် ကင်မရွန်း ဘောလုံး အဖွဲ့ချုပ်နှင့် ဆွေးနွေးမှုများ ပြုလုပ်နေပါတယ်။
ယူနိုက်တက်ဂိုးသမားဟာ နှစ်သစ်ကူးကာလတွင် နိုင်ငံတကာ ပွဲသွားကစားပါက ယူနိုက်တက်ရဲ့ ပွဲ ၆ ပွဲကို လွဲချော်မှာ ဖြစ်ပြီး အသင်းနှင့် ပြန်လည်ပူးပေါင်းချိန်တွင် နံပါတ်တစ်ဂိုးသမားနေရာကိုပါ ဆုံးရှုံးလာရမည်ကို စိုးရိမ်နေပါတယ်။အင်ဒရေအိုနုာနာဟာ ကင်မရွန်းအသင်းက ရွေးချယ်မှုကို ငြင်းပယ်လာမည် ဆိုပါက ယူနိုက်တက်အတွက်ပါ ကစားခွင့် ပိတ်ပင်ခြင်းခံရနိုင်ပါသေးတယ်။

ယင်းသို့ မကြုံရစေရေးအတွက် ကင်မရွန်းအနေဖြင့် အိုနာနာအား မရွေးချယ်စေရန် ကလပ်က ကြားဝင် ဆွေးနွေး ညှိနှိုင်းမှုများ ပြုလုပ်နေပါတယ်။အဲရစ်တန်ဟက်က “သူတို့ ရွေးချယ်ရင်တော့ သူ သွားရမယ်။ ဒါပေမဲ့ ကျွန်တော်တို့ ဆွေးနွေးနေတယ်”လို့ ပြောကြား သွားပါတယ်။

အိုနာနာဟာ ကမ္ဘာ့ဖလားပြိုင်ပွဲအတွင်းတွင် ကင်မရွန်းအသင်း နည်းပြရီဂိုဘတ်ဆောင်းနှင့် ပြဿနာတက်ပြီးနောက် အသင်းမှ နှုတ်ထွက်ခဲ့ပြီး လက်ရွေးစင် ကစားသမားဘဝမှ အနားယူခဲ့ပါတယ်။

အသက် ၂၇ နှစ်ရှိ အိုနာနာဟာ နောက်ပိုင်းတွင် ရီဂိုဘတ်ဆောင်းနှင့် ငြိမ်းချမ်းရေးရယူပြီးနောက် ကင်မရွန်း အသင်း အတွက် ပြန်လည်ကစားပေးခဲ့ပါတယ်။
လက်ရှိအနေအထားအရ ကင်မရွန်းရဲ့ အာဖရိကဖလားပြိုင်ပွဲတွင် အင်ဒရေအိုနာနာကို ရွေး/မရွေးမှာ လီဗာပူး နောက်ခံလူဟောင်း ရီဂိုဘတ်ဆောင်းအပေါ်တွင် မူတည်နေပါတယ်။

အာဖရိက ဖလားပြိုင်ပွဲကို ဇန်နဝါရီလ ၁၃ ရက်နေ့မှ ဖေဖော်ဝါရီလ ၁၁ ရက်နေ့အထိ ကျင်းပသွားမည်ဖြစ်ပြီး အင်ဒရေ အိုနာနာမှာ ယူနိုက်တက်ရဲ့ ပွဲ ၆ ပွဲကို လွဲချော်လာပါမယ်။

မန်ချက်စတာ ယူနိုက်တက်ဟာ အိုနာနာ မကစားနိုင်ချိန်တွင် နံပါတ်နှစ်ဂိုးသမား အယ်တေးဘေယီနီဒါကို အသုံးပြုပါမယ်။

02/12/2023

ဒီရာသီ ဈေးဦးပေါက် အရင်ဆုံး ထုတ်ခံရမယ့် နည်းပြ အဖြစ် အဲရစ်တန်ဟက် က ထိပ်ဆုံးက ရေပန်းစားနေ
---------------------------------

ဒီတလော ရလဒ်ဆိုးတွေနဲ့ ရုန်းကန်နေရတဲ့ မန်ချက်စတာ ယူနိုက်တက်နည်းပြ အဲရစ်တန်ဟက်ဟာ ဒီရာသီ ပရီးမီးယားလိဂ်မှာ ဈေးဦးပေါက် အဖြစ် ပထမဆုံး အထုတ်ခံရမဲ့ နည်းပြအဖြစ် ထိပ်ဆုံးက ရေပန်းစားနေပါတယ်။ ယူနိုက်တက်အသင်းဟာ ပြီးခဲ့တဲ့ ချန်ပီယံလိဂ်ပွဲမှာ ဂါလာတာစာရေးနဲ့သရေကျခဲ့တာကြောင့် အဲရစ်တန်ဟက်အတွက် ဖိအားပိုများလာပြီဖြစ်ပါတယ်။
မန်ချက်စတာ ယူနိုက်တက် အသင်းဟာ ဂါလာတာစာရေးကို ၂-၀ ဂိုး၊ ၃-၁ ဂိုးတွေနဲ့ အကြိမ်ကြိမ် ဦးဆောင်နိုင်ခဲ့ပေမဲ့ အနိုင်ရလဒ်မထိန်းနိုင်ဘဲ ၃ ဂိုးစီ သရေကျခဲ့တာကြောင့် အခုဆိုရင် ချန်ပီယံလိဂ်အုပ်စုကနေ လှည့်ပြန်ရဖို့ နီးစပ်နေပါပြီ။

ယူနိုက်တက်အသင်းဟာ ဒီရာသီမှာ ၆၁ နှစ်အတွင်း အဆိုးရွားဆုံး ရာသီအစမှတ်တမ်းဆိုး ပိုင်ဆိုင်ခဲ့ပြီး ပရီးမီးယားလိဂ်မှာ ၁၃ ပွဲကစားအပြီးမှာပဲ ၅ ပွဲအထိ ရှုံးနိမ့်ခဲ့ပါတယ်။ချန်ပီယံလိဂ်အုပ်စုကနေ ထွက်ရဖို့ နီးစပ်သွားပြီးတဲ့နောက် ရာသီမကုန်ခင် နည်းပြရာထူးက အထုတ်ခံရဖို့ ဘွတ်ကီဒိုင် တွေရဲ့အလေးပေးချက်မှာ ထိပ်ဆုံးက ရေပန်းစားနေပြီဖြစ်ပါတယ်။

နာမည်ကျော် ဘွတ်ကီဝက်ဘ်ဆိုက်ဖြစ်တဲ့ Betfair က ရာသီမကုန်ခင် အဲရစ်တန်ဟက် ရာထူးက အထုတ်ခံရဖို့ အတွက် ၄ လေး/၆ လေးနဲ့ အလေးပေးချက်ဖွင့်လှစ်ထားပြီး အဲရစ်တန်ဟက်သာ အထုတ်ခံရရင် ယူနိုက်တက်နည်းပြသစ်ဖြစ်လာဖို့ ဇီဒန်းက ၇ လေး/၂ လေးနဲ့ ရေပန်းစားနေပါတယ်။မန်ချက်စတာ ယူနိုက်တက်အသင်းဟာ ဒီတစ်ပတ်မှာ နယူးကာဆယ်နဲ့ ပရီးမီးယားလိဂ် အဝေးကွင်းပွဲကြပ် ကစားရမှာ ဖြစ်ပြီး အဲဒီနောက် အိမ်ကွင်းပွဲတွေအဖြစ် ချယ်လ်ဆီး၊ ဘုန်းမောက်တို့နဲ့ ဆက်တိုက်ကစားရမှာပါ။

အဲဒီနောက် ချန်ပီယံလိဂ်အရေးကြီးပွဲစဉ်ဖြစ်တဲ့ ဘိုင်ယန်မြူးနစ်ကို အိမ်ကွင်းပွဲ လက်ခံကစားရမှာဖြစ်တာကြောင့် လာမယ့် ပွဲတွေမှာ ရလဒ်မကောင်းရင် အဲရစ်တန်ဟက်ရဲ့အနာဂတ် မသေချာနိုင် တော့ပါဘူး။

02/12/2023

မန်ယူအသင်း အတွက် အဓိက စိုးရိမ်စရာ ဖြစ်နေတဲ့ ကစားသမား တစ်ဦးကို ဖော်ထုတ်လိုက်တဲ့ ဂိုးသမား ရှမိုက်ကယ်
---------------------------------

မန်ချက်စတာ ယူနိုက်တက်နဲ့ ဂါလာတာစာရေး တို့ သရေကျခဲ့တဲ့ ပွဲစဉ်မှာ လူစားဝင် ကစားသမားအဖြစ် ဝင်ရောက် လာခဲ့သော်လည်း မာရှယ်က ဘာမှလုပ်ပြနိုင်ခြင်းမရှိခဲ့ပါဘူး။ ပြိုင်ဘက်ရဲ့ဂိုးဧရိယာအတွင်း ဘောလုံးထိချက် ၂ ကြိမ်နှင့်တစ်ပွဲလုံး ဘောလုံးထိချက် ၁၆ ကြိမ်သာ ရရှိခဲ့တဲ့ မာရှယ်က ခြေစွမ်းပြသနိုင်ခြင်းမရှိခဲ့ပါဘူး။မန်ယူ ဂိုးသမားဟောင်းကြီး ရှမိုက်ကယ်ကတော့ မာရှယ် ရဲ့ စွမ်းဆောင်ရည် အပေါ် အတော် စိတ်ပျက်နေပြီး အသင်း အတွက် အဓိက စိုးရိမ်မှုတစ်ခုက ဟွိုက်လန်းရဲ့နေရာတွင် မာရှယ်ကို ထည့်သွင်းလိုက်ခြင်းပဲဖြစ်ပါတယ်လို့ ရှမိုက်ကယ် က ပြောကြားလိုက်ပါတယ်။ “၂-၀ ဂိုးဖြင့် ဦးဆောင်နေတဲ့ပြီး ဒီလိုမျိုး အခိုက်အတန့်က ပထမဆုံးအကြိမ်တော့ မဟုတ်ပါဘူး။ပွဲကို သတ်လိုက် သလိုပါပဲ။ တခြားအသင်းက ဝင်မလာနိုင်အောင် လုပ်ရမှာပါ။ ဘောလုံးကို ထိန်းသိမ်းပြီး အမှား မရှိအောင် လုပ်ရမှာဖြစ်သော်လည်း အမှားများခဲ့ပါတယ်”
“ဟွိုက်လန်းကို ကစားသမားလူစားလဲလိုက်တဲ့အခါ အခြားကစားသမားတွေကို ကြည့်ရမှာဖြစ်ပြီး ဖိအားတွေက များနေမှာဖြစ်ပါတယ်။တန်ဟက်ထည့်လိုက်တဲ့ မာရှယ်က ဘာမှမလုပ်နိုင်ခဲ့ပါဘူး ဒါကြောင့် အသင်းရဲ့ တိုက်စစ်ပိုင်း အတွက် အရမ်းကို ခက်ခဲသွားစေခဲ့ပါတယ်”

“ဒါက ပြိုင်ဘက်အသင်းအတွက် ဘောလုံးဖြတ်မှုတွေလုပ်ဖို့ အခွင့်အရေးတွေ အများကြီးပေးသလိုဖြစ်ပါတယ်။ ဒီလောက် ဂိုးပမာဏ သွင်းတယ်ဆိုရင် တစ်မှတ်ထက်ပိုတဲ့ အမှတ်မျိုးကို မျှော်လင့်သင့်ပါတယ်”လို့ ရှမိုက်ကယ်က ပြောပါတယ်။

ယူနိုက်တက်ရဲ့တန်ဟက်ရဲ့ လုပ်ဆောင်မှုက စိတ်မကျေနပ်ဖွယ်ရာဖြစ်ပြီး သရေကျသွားတာကတော့ ဆိုးရွား သွားခဲ့ပါတယ်။ ယူနိုက်တက်ရဲ့ ချန်ပီယံလိဂ်အုပ်စုတက်ရေးက ဝေဝါးသွားပြီဖြစ်ပြီး အိုနာနာကို ပွဲထွက် ကစားသမား အဖြစ် သုံးခဲ့တာက ဝေဖန်စရာဖြစ်လာပါတယ်။

ယူနိုက်တက်ရဲ့ နောက်ထပ်ပွဲစဉ်ကတော့ ပရီးမီးယားလိဂ်ပွဲအဖြစ် နယူးကာဆယ်နှင့် ကစားရမှာဖြစ်ပြီး တန်ဟက်ရဲ့ အသင်းဟာ ပထမဆုံးပရီးမီးယားလိဂ် ၁၃ ပွဲမှာ ၅ ပွဲအထိ ရှုံးနိမ့်ထားပြီး ထိပ်ဆုံး ၄ သင်းနှင့် ၄ မှတ် ကွာဟနေပါတယ်။

02/12/2023

ဖီဖာ စည်းမျဉ်း တစ်ခုကြောင့် အိုနာနာ လုပ်ပုံ မဟန်ရင် မန်ချက်စတာ ယူနိုက်တက် အတွက် ကစားခွင့် ပိတ်ပင်ခံရဖွယ် ရှိ
---------------------------------
ကင်မရွန်း လက်ရွေးစင် ဂိုးသမား အင်ဒရေအိုနာနာဟာ ဖီဖာရဲ့ လူသိနည်းတဲ့ စည်းမျဉ်းကြောင့် မန်ချက်စတာ ယူနိုက်တက် အတွက်လည်း ကစားခွင့် ပိတ်ပင်ခြင်းခံလာရဖို့ ရှိနေပါတယ်။မန်ချက်စတာ ယူနိုက်တက် ရဲ့ နံပါတ်တစ် ဂိုးသမားဟာ လာမယ့် ဇန်နဝါရီလတွင် ကင်မရွန်းအတွက် အာဖရိက ဖလားပြိုင်ပွဲ ကစားရန် ရှိနေပါတယ်။
သူဟာ ကာတာကမ္ဘာ့ဖလားပြိုင်ပွဲတုန်းက နည်းပြ ရီဂိုဘတ်ဆောင်းနှင့် ဆက်ဆံရေး အဆင်မပြေမှုကြောင့် နှုတ်ထွက်ကာ အိမ်ပြန်လာခဲ့ပြီးနောက် ကင်မရွန်းလက်ရွေးစင်ကစားသမားဘဝမှ အနားယူခဲ့သူလည်း ဖြစ်ပါတယ်

ဒါပေမဲ့ သူဟာ ယူနိုက်တက်သို့ ပြောင်းလာပြီးအချိန်မှာတော့ စိတ်ပြောင်းကာ ကင်မရွန်းအတွက် ပြန်လည်ကစားပေးခဲ့ပြီး ယခုနှစ် အတွင်းမှာ ၃ ပွဲကစားပေးထားပြီး ဖြစ်ပါတယ်။ဒါပေမဲ့ အင်ဒရေအိုနာနာဟာ ယူနိုက်တက်သို့ ပြောင်းရွှေ့လာပြီးတဲ့နောက် အမှားများ ပြုလုပ်ကာ လက်စွမ်းကျ ဆင်းလာပြီးနောက် အာဖရိကဖလားပြိုင်ပွဲ သွားမကစားဘဲ ကလပ်တွင် နေရာမြဲရေးအတွက် လုပ်ဆောင်လာဖို့ ရှိနေပါတယ်။

ကင်မရွန်းဂိုးသမားဟာ ကြားရက်တုန်းက ဖီနာဘာချီနှင့် ၃ ဂိုးစီသရေကျကာ ချန်ပီယံလိဂ်မှ ထွက်ခွာရကိန်း ဆိုက်သွား ခဲ့တဲ့ ပွဲတွင် အမှားပြုလုပ်ပြီး ၂ ဂိုးပေးခဲ့ရပါတယ်။ ယင်းသို့ အခြေအနေကြောင့် အိုနာနာဟာ လာမယ့် ဇန်နဝါရီလတွင် ကင်မရွန်းအတွက် အာဖရိက ဖလားပြိုင်ပွဲ သွား ကစားပါက ပြန်ရောက်လာချိန်တွင် ယူနိုက်တက်နံပါတ်တစ်ဂိုးသမားနေရာမှာ အာမခံချက်မရှိဖြစ်နေပါတယ်။ဒါကြောင့်လည်း အိုနာနာဟာ အာဖရိကဖလားပြိုင်ပွဲသွားကစားဘဲ ယူနိုက်တက်အတွက် ဆက်ကစားကာ အကောင်းဆုံး ပုံစံပြန်ရရေး ကြိုးပမ်းမယ်လို့ သတင်းထွက်နေပါတယ်။

ဒါပေမဲ့ တကယ်လို့များ ကင်မရွန်းဘက်က ဆင့်ခေါ်ပေမဲ့ အိုနာနာဘက်က ပူးပေါင်းရန် ငြင်းဆိုလာပါက ဖီဖာအနေဖြင့် ယူနိုက်တက်အတွက် ကစားခွင့်လည်း ပိတ်ပင်လာနိုင်ပါတယ်။ ဖီဖာရဲ့ စည်းမျဉ်းအရ နိုင်ငံအတွက် ကစားခွင့်ငြင်းဆိုတဲ့ ကစားသမားကို ကလပ်အတွက် ကစားခွင့်ပိတ်ပင်နိုင်တဲ့အပြင် ၅ ရက်ပါ ထပ်မကစားနိုင်အောင် အရေးယူနိုင်ပါတယ်။

တဖက်တွင် လီဗာပူးနောက်ခံလူဂျိုယေးမာတစ်ဟာ ၂၀၁၇ ခုနှစ်နှင့် ၂၀၁၀ ခုနှစ် အာဖရိကဖလားပြိုင်ပွဲတို့တွင် ကင်မရွန်း အတွက် ကစားရန် ငြင်းဆိုခဲ့ပေမဲ့လည်း ပွဲပယ်ခံရမဲ့အရေးမှ ရှောင်လွဲနိုင်ခဲ့ဖူးပါတယ်။

သူဟာ ၂၀၁၅ ခုနှစ်ကတည်းက ကင်မရွန်းအတွက် ကစားခြင်းမရှိတာကြောင့် ပွဲပယ်မှုမှ ရှောင်လွဲနိုင်ခဲ့တာပါ။ အာဖရိကဖလားပြိုင်ပွဲကို ဇန်နဝါရီလ ၁၃ ရက်နေ့မှ ဖေဖော်ဝါရီလ ၁၁ ရက်နေ့အထိ ကျင်းပမည်ဖြစ်ရာ ကင်မရွန်းသာ ဗိုလ်လုပွဲသို့ တက်ရောက်မည်ဆိုပါက အိုနာနာမှာ ယူနိုက်တက်အတွက် ပွဲ ၆ ပွဲအထိ လွဲချော်လာနိုင်ပါတယ်။

02/12/2023

မန်ချက်စတာ ယူနိုက်တက် ပရိသတ်တွေအား ဆောရီးပါ ဆိုတဲ့ ဂါနာချိုရဲ့ တောင်းပန်စကား
---------------------------------

ဗုဒ္ဓဟူးညက ကစားခဲ့တဲ့ ဂါလာတာစာရေးနဲ့ ၃-၃ သရေပွဲအပြီးမှာ မန်ယူ တောင်ပံ ကစားသမား ဂါနာချို ကတော့ ဆိုရှယ်မီဒီယာ ကနေတဆင့် အသင်းပရိသတ်တွေအား တောင်းပန်လိုက်ပါတယ်။မဖြစ်မနေနိုင်ဖို့လိုခဲ့တဲ့ အစ္စတန်ဘူလ်က ပွဲမှာ ဂါနာချိုဟာ မန်ယူအတွက် အဖွင့်ဂိုးကိုသွင်းပေးခဲ့တာပါ။ ဖာနန်ဒက်စ် ပေးလိုက်တာကို လွတ်လွတ်ကျွတ်ကျွတ် ဖြစ်နေတဲ့ အာဂျင်တီးနားသားက ဂိုးသမားမဖမ်းနိုင်တဲ့ကန်ချက်မျိုးနဲ့ ကန်ခဲ့ပါတယ်။

အဲဗာတန်နဲ့ပွဲမှာ ဘိုင်စကယ်ကစ်ဂိုးသွင်းခ့တဲ့ ဂါနာချိုတစ်ယောက် ၂ ပွဲဆက်ဂိုးသွင်းနိုင်ခဲ့တာပါ။ ပွဲချိန် ၁၈ မိနစ်မှာလည်း ဖာနန်ဒက်စ်ရဲ့ဂိုးကြောင့် မန်ယူဟာ ၂ ဂိုးပြတ်ဦးဆောင်နိုင်ခဲ့ပါတယ်။ဒုတိယပိုင်းအစမှာလည်း ၃-၁ နဲ့ ဦးဆောင်နိုင်ခဲ့သေးပေမယ့် အိုနာနာရဲ့အမှားတွေကြောင့် နောက်ဆုံးမှာ ၃-၃ သရေ ကျခဲ့ကာ အုပ်စုက ပြုတ်လုနီးပါး ဖြစ်သွားတာပါ။အဲဒီပွဲပြီးတော့ ဂါနာချိုက Instagram ပေါ်မှာ ပို့စ်တစ်ခု တင်ခဲ့ပါတယ်။ အဲဒီပို့စ်ကတော့ အောက်ပါ အတိုင်း ဖြစ်ပါတယ်။”ဆောရီးပါ ယူနိုက်တက်ပရိသတ်တို့ရေ .. ဒါဟာ ချန်ပီယံလိဂ်ပါ။ အဲဒါကို ကျွန်တော်တို့ နားလည်သလို တာဝန် ယူလည်း ယူပါတယ်။ တစ်ပွဲ ကျန်နေသေးသလို ကျွန်တော်အစွမ်းကုန်ကြိုးစားသွားမှာပါ”လို့ ရေးထားခဲ့ပါတယ်။မန်ယူဟာ အုပ်စုနောက်ဆုံးပွဲမှာ ဘိုင်ယန်ကို နိုင်ရင်တောင် တစ်ဖက်ကပွဲမှာ ဂါလာတာစာရေးနဲ့ ကိုပင်ဟေဂင်တို့ သရေကျမှ နောက်တစ်ဆင့်တက်မှာ ဖြစ်ပါတယ်။

02/12/2023

ဘရူနို ဖာနန်ဒက်စ်ရဲ့ မလိုအပ်ဘဲ လူချ ကစားလို့ ဂိုးပေးလိုက်ရတာတွေ ထောက်ပြသွားတဲ့ ပေါလ်စခိုးလ်

မန်ချက်စတာ ယူနိုက်တက် ဂန္တဝင် ပေါလ်စခိုးလ် က ဂါလာတာစာရေး ၃-၃ မန်ချက်စတာ ယူနိုက်တက် ပွဲစဉ်မှာ သူ့အသင်းဟောင်း မန်ချက်စတာ ယူနိုက်တက်ဟာ ၂ဂိုးပြတ်နဲ့ ဦးဆောင်ပြီးမှ သရေပြန်ကျခဲ့တဲ့ အတွက် အသင်းခေါင်းဆောင် ဘရူနို ဖာနန်ဒက်စ်မှာ အများကြီး တာဝန်ရှိကြောင်း ပြစ်တင် ဝေဖန်သွားခဲ့ပါတယ်။
ဂါလာတာစာရေး ၃-၃ မန်ချက်စတာ ယူနိုက်တက် ပွဲအပြီးမှာတော့ ဘောလုံးရေးရာ ဝေဖန်သုံးသပ်သူ အများစုက ချေပဂိုးတွေကို အလွယ်တကူ ခွင့်ပြုပေးခဲ့တဲ့ ဂိုးသမား အိုနာနာကို ပြစ်တင် ဝေဖန်နေကြပါတယ်။

ဒါပေမယ့် ယူနိုက်တက်ဂန္တဝင် ပေါလ်စခိုးလ်ကတော့ မလိုလားအပ်တဲ့ လူချကစားမှုတွေ လုပ်ခဲ့တဲ့ အသင်းခေါင်းဆောင် ဘရူနို ဖာနန်ဒက်စ်မှာလည်း ဒီသရေပွဲ အတွက် အပြစ်ရှိကြောင်း ထောက်ပြသွားခဲ့တာပါ။
ပေါလ်စခိုးလ်က – “ဘရူနို ဖာနန်ဒက်စ်က သူတို့တွေ လုပ်မိခဲ့တဲ့ အမှားတွေ အကြောင်း ပြောတာကို ကြားပါတယ်။ ဒါပေမယ့် သူကလည်း ပြိုင်ဘက်ကို ဂိုး ၂ဂိုး ခွင့်ပြုခဲ့ရတဲ့ ရူးကြောင်ကြောင် ပြစ်ဒဏ်ဘော ၂ကြိမ် လုပ်ခဲ့ပါတယ်။ သူ အပါအဝင် မန်ချက်စတာ ယူနိုက်တက်ရဲ့ ကစားသမား အားလုံးက ဒီသရေပွဲ အတွက် တာဝန်ခံရပါလိမ့်မယ်” လို့ ဝေဖန်သွားခဲ့တာပဲ ဖြစ်ပါတယ်။

ပွဲချိန် ၂၉မိနစ်မှာ ဘရူနို ဖာနန်ဒက်စ်ရဲ့ မလိုအပ်ပဲ လူချကစားမှုကြောင့် ရလာတဲ့ ပြစ်ဒဏ်ဘောကို ဇီရက်ဇ်က အကောင်းဆုံး ကန်သွင်းကာ ဂါလာတာစာရေး အတွက် ပထမချေပဂိုးကို သွင်းယူခဲ့ပါတယ်။
ပွဲချိန် ၆၂မိနစ်မှာလညျး ဘရူနို ဖာနန်ဒက်စ်ရဲ့ မလိုအပ်ပဲ လူချကစားမှုရဲ့ ရလဒ်အဖြစ် ဂါလာတာစာရေးတို့ ပြစ်ဒဏ်ဘော ကန်သွင်းခွင့် ထပ်ရခဲ့ပြီး ဇီရက်ဇ်က အဆိုပါ ပြစ်ဒဏ်ဘောကို ကန်သွင်းခဲ့ရာ ယူနိုက်တက် ဂိုးသမား အိုနာနာရဲ့ ဂိုးဖမ်းပုံ မသပ်ရပ်မှုကြောင့် ဂါလာတာစာရေးတို့ ဒုတိယမြောက် ချေပဂိုးကို ထပ်မံ ရရှိခဲ့တာပါ။

02/12/2023

'' ဒိုင်လူကြီးတွေ လုပ်ပွဲ လုပ်တာလား ပြောခံနေရတဲ့ ဂါလာတာစာရေး ၃-၃ မန်ချက်စတာ ယူနိုက်တက် ပွဲစဉ် ''
---------------------------------

မနေ့ညက ဂါလာတာစာရေးနဲ့ မန်ချက်စတာယူနိုက်တက်တို့ရဲ့ ချန်ပီယံလိဂ်ပွဲမှာ တော်မီနေးရဲ့ လက်ထိဘောကို ပင်နယ်တီ မပေးခဲ့တာ၊ အငြင်းပွားစရာ လူကျွံဆုံးဖြတ်ချက်တွေကြောင့် ဒိုင်လူကြီးတွေ လုပ်ပွဲဖန်တီးခဲ့တယ်လို့ ပရိသတ် တွေက စွပ်စွဲနေကြပါတယ်။ပထမပိုင်း ၁၁ မိနစ်မှာ ဘရူနိုဖာနန်ဒက်စ်ရဲ့ ဖန်တီးမှုကနေ ဂါနာချိုက အဖွင့်ဂိုးသွင်းခဲ့ပြီး နောက် ၄ မိနစ်အကြာမှာပဲ ဂါလာတာစာရေးတို့ ပင်နယ်တီ ကန်ခွင့် ရသင့်တဲ့ အနေအထားဖြစ်ခဲ့ပါတယ်။

ပင်နယ်တီဧရိယာအတွင်း အန်ဒွန်ဘီလီရဲ့ကန်ချက်က တော်မီနေး လက်မောင်းနဲ့ထိသွားပေမဲ့ VAR က ပင်နယ်တီ မပေးသလို ကွင်းလယ်ဒိုင် ဟိုဆေးဆန်းချက်ဇ်ကလည်း ရုပ်သံပြန်မကြည့်ခဲ့ပါဘူး။ အင်္ဂါနေ့က PSG-နယူးကာဆယ်တို့ရဲ့ပွဲမှာ နယူးကာဆယ်နောက်ခံလူ လစ်ဗရာမန်တိုရဲ့ အငြင်းပွားစရာ လက်ထိဘော ကနေ ပယ်နယ်တီပေးခဲ့ရပြီး ၂၄ နာရီအကြာမှာကစားတဲ့

ဂါလာတာစာရေး-ယူနိုက်တက်ပွဲမှာတော့ တော်မီနေးရဲ့လက်ထိဘောကို ပင်နယ်တီပေးဖို့ VAR က ငြင်းဆန်ခဲ့တာ ဖြစ်ပါတယ်။

အဲဒါကြောင့် ပရိသတ်တွေက ပွဲအပြီးမှာ အခုလို မှတ်ချက်တွေ ပေးနေကြပါတယ်။ ‘စဉ်းစားကြည့်လေ .. ယူနိုက်တက်သာ အုပ်စုက ထွက်ရရင် UEFA အတွက် အမြတ်ငွေ အများကြီး ဆုံးရှုံးမှာဖြစ်လို့ ယူနိုက်တက်ကို မဖြစ် ဖြစ်တဲ့နည်းနဲ့ အုပ်စုက တက်ခွင့်ရအောင် ဂွင်ဖန်မှာပဲ.. လုပ်ပွဲကြီးပါကွာ . .’၊

‘ဒါက သေချာပေါက် ပယ်နယ်တီပေးရမှာပါ . .VAR ဟာ ယူနိုက်တက်ဘက်ကို သိသိသာသာ ဘက် လိုက်ခဲ့ပါတယ် ’ လို့ လူမှုကွန်ရက်မှာ ဝေဖန်ရေးသားခဲ့ကြပါတယ်။ဒါ့အပြင် ပထမပိုင်းပြီးခါနီးမှာ ဂါလာတာစာရေးတိုက်စစ်မှူး အီကာဒီ လွတ်လွတ်ကျွတ်ကျွတ် ပြေးထွက်ပြီး ဂိုးသွင်း ခဲ့ပေမဲ့ စည်းကြပ်ဒိုင်က လူကျွံအလံထောင်ခဲ့သလို VAR ကလည်း စည်းကြပ်ဒိုင်ရဲ့ ဆုံးဖြတ်ချက်အတိုင်း လူကျွံပေး ခဲ့ပါတယ်။

ဒါပေမဲ့ ရုပ်သံပြကွက်အရ လင်ဒီလော့ဖ်ရဲ့ လက်မောင်း အနေအထားက အီကာဒီကို Onside ဖြစ်စေတာကြောင့် VAR ရဲ့ဆုံးဖြတ်ချက်က အငြင်းပွားစရာဖြစ်ခဲ့ရပါတယ်။
ချန်ပီယံလိဂ်မှာ လူကျွံဘောကို VAR က Line မဆွဲဘဲ semi-automated စနစ်နဲ့ ဆုံးဖြတ်တာဖြစ်ပေမဲ့ အငြင်းပွားစရာတွေက ရှိနေဆဲပါပဲ။

လူကျွံဘောဖြစ်ရပ်နဲ့ပတ်သက်ပြီး ပရိသတ်တွေက
‘ဒါက လူကျွံဘောမဟုတ်ပါဘူး . .ဒိုင်တွေရဲ့ ဆုံးဖြတ်ချက်က ရှက်စရာပါပဲ . .’၊ ‘ဂါလာတာစာရေးဟာ ဒိုင်လူကြီးတွေရဲ့ဓားပြတိုက်တာခံခဲ့ရပါတယ်’လို့ X(Twitter)မှာ ဝေဖန်ရေးသားခဲ့ပါတယ်။

ယူနိုက်တက်အသင်းဟာ ၁၈ မိနစ်အတွင်း ဂါနာချို၊ ဘရူနိုဖာနန်ဒက်စ်တို့ရဲ့ဂိုးတွေနဲ့ ဦးဆောင်နိုင်ခဲ့ပြီး ဇီယက်ချ်က ဖရီးကစ် ကနေ ချေပဂိုးပြန်သွင်းခဲ့ပါတယ်။

၅၅ မိနစ်မှာ တွမ်မီနေးက တတိယဂိုး သွင်းခဲ့ပေမဲ့ ဇီယက်ချ်ကပဲ ဖရီးကစ်ကနေ ဒုတိယချေပဂိုး၊ ၇၁ မိနစ်မှာ အက် ခ်တာကော့ဂလူက တတိယချေပဂိုးပြန်သွင်းခဲ့တာကြောင့် ၃-၃ ဂိုးစီ သရေကျခဲ့ပါတယ်။

02/12/2023

ဂါလာတာစာရေး ရဲ့ ပထမ ချေပဂိုး ဟာ ယူအီးအက်ဖ်အေ စည်းမျဉ်း တစ်ခုကို ချိုးဖောက်ထားကြောင်း ထောက်ပြမှု ထွက်နေ

တူရကီကလပ် ဂါလာတာစာရေးဟာ မနေ့ညတုန်းက အစ္စတန်ဘူလ်မှာ မန်ချက်စတာ ယူနိုက်တက်နှင့် ၃ ဂိုးစီ သရေကျတဲ့ပွဲမှာ ပထမခ...