Burma Associated Press

13/06/2026

ကမ္ဘာ့ဖလားဘောလုံးပွဲတွေ ပြခွင့်ရတဲ့ Mytel TV360 ရဲ့ Facebook စာမျက်နှာ ဖယ်ရှားခံရ

BAP၊ ဇွန် ၁၃။

၂၀၂၆ ကမ္ဘာ့ဖလားဘောလုံးပွဲစဉ်တွေ တိုက်ရိုက်ပြသခွင့်အတွက် မြန်မာမှာ တဦးထဲ မူပိုင်ခွင့်ရရှိထားတဲ့ စစ်တပ်ပိုင် Mytel TV360 ရဲ့ Facebook စာမျက်နှာကို Meta က ဖယ်ရှားလိုက်တယ်လို့ Justice For Myanmar က ယနေ့ ထုတ်ပြန်ပါတယ်။

မြန်မာစစ်တပ်နဲ့ ၎င်းတို့ရဲ့ စီးပွားရေးလုပ်ငန်းတွေကို Meta ပလက်ဖောင်းတွေပေါ်မှာ အသုံးပြုခွင့် တားမြစ်ပိတ်ပင်ထားတဲ့မူဝါဒအရ Justice For Myanmar က TV360 စာမျက်နှာကို သောကြာနေ့ အစောပိုင်းမှာ Facebook ထံ အသိပေးတိုင်ကြားပြီးနောက် ဖယ်ရှားခံလိုက်ရတာလို့ဆိုပါတယ်။

Facebook ရဲ့ မိခင်ကုမ္ပဏီဖြစ်တဲ့ Meta ဟာ Mytel ပိုင်ဆိုင်တဲ့ TV360 Facebook စာမျက်နှာကို သောကြာနေ့မှာ ဖယ်ရှားလိုက်တာဖြစ်ပြီး အဆိုပါ စာမျက်နှာကို Mytel က ကမ္ဘာ့ဖလားဘောလုံးပြိုင်ပွဲ ထုတ်လွှင့်ပြသမှု ကြော် ငြာဖို့ အသုံးပြုနေတာလို့လည်း JFM က ဖော်ပြပါတယ်။

ဒဏ်ခတ်ပိတ်ဆို့ခံထားရတဲ့ စစ်တပ်ပိုင်စီးပွားရေးလုပ်ငန်းစုကြီးဖြစ်တဲ့ မြန်မာ့စီးပွားရေးကော်ပိုရေးရှင်း (MEC) က ပူးတွဲပိုင်ဆိုင်တဲ့ Mytel ဟာ ကမ္ဘာ့ဖလားပြိုင်ပွဲရဲ့ မြန်မာနိုင်ငံအတွက် တဦးတည်းမူပိုင် ထုတ်လွှင့်ခွင့်ကို ကမ္ဘာ့ဘောလုံးအဖွဲ့ချုပ် (FIFA) ထံမှ ရရှိခဲ့တာဖြစ်ပြီး၊ ဖီဖာဟာ လူ့အခွင့်အရေးအပေါ် ဆိုးဆိုးရွားရွား လျစ်လျူရှုသည့် လုပ်ရပ်ဖြစ်သည်ဟု JFM က ပြောထားပါတယ်။

ဓာတ်ပုံ-JFM

Burma Associated Press

11/06/2026

"ချွေးနည်းစာလေးနဲ့စုဆောင်းပြီး ဆောက်ခဲ့ရတဲ့ အိမ်ကလေး ခဏပဲဆိုပြီးစစ်ရှောင်လိုက်တာ ဘာပစ္စည်း မှ မယူသွားလိုက်ရဘူး။ ပြန်လာကြည်တဲ့အချိန် ပြာပုံပဲကျန်တယ်။ ဒီမြင်ကွင်းကို ခုထိမမေ့နိုင် သေးဘူး"လို့ မအိက အိမ်ကို သတိရဟန်နဲ့ပြောပါတယ်။

မြို့သိမ်းတိုက်ပွဲပြီးလို့ နှစ်နှစ်ကျော်ကြာခဲ့ပြီဖြစ်ပေမဲ့ ဆီဆိုင်မြို့က မီးလောင်ပျက်စီးသွားတဲ့ နေအိမ်ရာပေါင်းများစွာဟာ ဒီနေ့ထိတိုင် ပြန်မတည်ဆောက်နိုင်သေးဘဲ ဒေသခံအများစုက စစ်ဒဏ် အကျိုးဆက်တွေနဲ့ ရုန်းကန်နေဆဲ ဖြစ်ပါတယ်။

လူမသေတာပဲဟုတ်‌နေပြီလို့တွေးပြီး အားးတင်းနေပေမဲ့ စိတ်က သေဆုံး‌နေတာကြာပြီ၊ ဘယ်လိုမှ နလန်မထူနိုင်သေးဘူး

10/06/2026

လက်တုံ့ပြန်သည့်အနေဖြင့် မြစ်ခြေရဲစခန်းအား PDF တိုက်ခိုက်သိမ်းပိုက်

BAP၊ ဇွန် ၁၀။

ပခုက္ကူခရိုင်၊ မြစ်ခြေမြို့ရှိ ရဲစခန်းကို လက်တုံ့ပြန်သည့်အနေဖြင့် တိုက်ခိုက်သိမ်းပိုက်ခဲ့သည်ဟု ပြည်သူ့ကာကွယ်ရေးတပ်မတော်-PDF က ယနေ့ ထုတ် ပြန်သည်။

အာဏာသိမ်းစစ်တပ်သည် ၂၀၂၆ ခုနှစ်၊ မေလ (၁၀) ရက်နေ့မှ ဇွန်လ (၂) ရက်နေ့အထိ ပခုက္ကူခရိုင်၊ မြစ်ခြေမြို့ရှိ ပြည်သူလူထုပိုင် နေအိမ်အဆောက်အဦးပေါင်း (၁၀၀၀) ကျော်ကို မီးရှို့ဖျက်ဆီးကာ ပြည်သူ (၂၄)ဦး (အတည်ပြုနိုင်သည့်) ကို ရက်ရက်စက်စက် မီးရှို့သတ်ဖြတ်ပြီး စစ်ရာဇဝတ်မှုကျူးလွန်ခဲ့သည်ဟုလည်း ထုတ်ပြန်ချက်တွင် ဖော်ပြထားသည်။

ထို့အတွက် ပြည်သူ့ကာကွယ်ရေးတပ်မတော်သည် ဇွန်လ (၁၀) ရက်နေ့တွင် မြစ်ခြေ စခန်းအား အပြီးတိုင် ထိုးစစ်ဆင်သိမ်းပိုက်ပြီး စစ်ရာဇဝတ်မှုကျူးလွန်ခဲ့သော အကြမ်းဖက် စစ်ကောင်စီအား လက်တုံ့ပြန်တိုက်ခိုက်ချေမှုန်းခဲ့သည်ဟုဆိုသည်။

ဇွန်လ (၁၀) ရက် နံနက် (၄) နာရီတွင် မြစ်ခြေရဲစခန်းအား မကွေးတိုင်းစစ်ဌာနကွပ်ကဲမှုအောက်ရှိ ၊ ပခုက္ကူခရိုင် စစ်ဌာန၏ ဦးဆောင်ကွပ်ကဲမှုဖြင့် ဝင်ရောက်တိုက်ခိုက်ခဲ့ရာ နံနက် (၅) နာရီတွင် အပြီးသတ်ချေမှုန်း တိုက်ခိုက်သိမ်းပိုက်နိုင်ခဲ့သည်ဟုသတင်းထုတ်ပြန်ထားသည်။

တိုက်ပွဲအတွင်း G-3 (၁၈)လက်၊ 79 (၁) လက်၊ ‌ခြောက်လုံးပြူး (၂) လက်၊ ၆၀မမ ကွန်မန်ဒိုစိန်ပြောင်း (၁) လက်၊ G-3 ကျည်ဘောက် (၂၇) ဘောက်၊ လက်လုပ် လေသေနတ် (၁) လက်၊ ကျည်ကာ ဦးထုပ် (၇)လုံး၊ G-3 ကျည် (၁၉၀၈) တောင့် သိမ်းဆည်းရရှိခဲ့ကြောင်းသိရသည်။

အဆိုပါ တိုက်ပွဲအတွင်း စစ်တပ်ဘက်မှ တပ်သား (၂) ဦး ကျဆုံးပြီး (၁၄) ဦး စစ်သုံ့ပန်းအဖြစ် လက်နက်ချအညံ့ခံခဲ့သည်ဟုလည်းဆိုသည်။

စစ် သုံ့ပန်းများကို နိုင်ငံတကာ စစ်ဥပဒေများနဲ့ အညီ ထိန်းသိမ်းထားရှိပြီး စစ်ရာဇဝတ်မှု ကျူးလွန်သူများအား စစ်ဘက်ဆိုင်ရာ ဥပဒေများနှင့်အညီ စိစစ်ဖော်ထုတ်၍ စစ်တရားရုံးတင် စစ်ဆေး အရေးယူ ဆောင်ရွက်သွားမည် ဖြစ်သည်ဟုလည်း အသိပေးထားသည်။

ဓာတ်ပုံ- ပြည်သူ့ကာကွယ်ရေးတပ်မတော်- PDF

BuBurma Associated Press

10/06/2026

စစ်မီးထဲက နိုးထဖို့ ရုန်းကန်နေရတဲ့ “မြို့”

BAP၊ ဇွန် ၁၀။

( အသိပေးချက်- ယခုဆောင်းပါးပါ အမည်များကို လုံခြုံရေးအရ လွှဲပြောင်းသုံးစွဲထားပါတယ်။)

အိမ်တိုင်ပါမကျန် မီး‌လောင်ပျက်စီး ဆုံးရှုံးခဲ့ရတဲ့ သူ့အိမ်ရှိရာ ဒီနေရာကို မအိ ထပ်လာဖို့ အင်အားမရှိတော့ သည်မှာ နှစ်နှစ်ကျော်ကြာမြင့်ခဲ့ပြီ ဖြစ်ပါတယ်။

အရင်က အိမ်ကြီးအိမ်ကောင်း ပရိဘောဂအပြည့်အစုံနဲ့သူတို့အိမ်လေးဟာ စစ်မီးကြောင့် ပျက်စီးခဲ့ရပြီး ဒီနေ့အချိန်အထိ ပြန်မဆောက်နိုင်သေးပါဘူး။

"ဒီခေတ်လိုဈေးနူန်းနဲ့ အိမ်ပြန်ဆောက်နိုင်ဖို့ဆိုတာ ဘယ်လိုတတ်နိုင်ဦးမှာလဲ၊ စစ်ပြီးတဲ့အချိန် ပြန်လာ ကြည့်တုန်းကတောင် သတိမေ့တဲ့အထိ ခံစားခဲ့ရတာလေ၊ ကိုယ်မွေးထားတဲ့ရင်သွေးလေးက ကိုယ့်ရှေ့မှာ မီး‌လောင်ပြီး သေဆုံးတာလားဆိုတဲ့ ခံစားချက်မျိုး ခံစားခဲ့ရတာ"လို့ မအိကသူ့ခံစားချက်ကို ပြောပြရင်း ရင်ဘတ်ကို လက်နဲ့ဖိထားပါတယ်။

မအိရဲ့အိမ်ဟာ စစ်ပွဲကာလတုန်းက ပအိုဝ်းပြည်သူ့စစ်တွေ စခန်းချသွားတဲ့ နေရာတခုပါ။ စစ်ပွဲရောက် လာတဲ့အချိန်မှာ ဘာပစ္စည်းမှမသယ်နိုင်ဘဲ ဝတ်ထားတဲ့အဝတ်အစားနဲ့သာ သူတို့မိသားစု အသက်လု ပြေးခဲ့ရတယ်လို့ မဝေးလှတဲ့ အတိတ်က ဖြစ်ရပ်ကို ပြန်ပြောပြပါတယ်။

"ချွေးနည်းစာလေးနဲ့စုဆောင်းပြီး ဆောက်ခဲ့ရတဲ့ အိမ်ကလေး ခဏပဲဆိုပြီးစစ်ရှောင်လိုက်တာ ဘာပစ္စည်း မှ မယူသွားလိုက်ရဘူး။ ပြန်လာကြည်တဲ့အချိန် ပြာပုံပဲကျန်တယ်။ ဒီမြင်ကွင်းကို ခုထိမမေ့နိုင် သေးဘူး"လို့ မအိက အိမ်ကို သတိရဟန်နဲ့ပြောပါတယ်။

မြို့သိမ်းတိုက်ပွဲပြီးလို့ နှစ်နှစ်ကျော်ကြာခဲ့ပြီဖြစ်ပေမဲ့ ဆီဆိုင်မြို့က မီးလောင်ပျက်စီးသွားတဲ့ နေအိမ်ရာပေါင်းများစွာဟာ ဒီနေ့ထိတိုင် ပြန်မတည်ဆောက်နိုင်သေးဘဲ ဒေသခံအများစုက စစ်ဒဏ် အကျိုးဆက်တွေနဲ့ ရုန်းကန်နေဆဲ ဖြစ်ပါတယ်။

ပြီးခဲ့တဲ့ ၂၀၂၄ ခုနှစ် ဇန်နဝါရီလ ၂၂ ရက်‌က‌နေ မတ်လကုန်အထိ ဆီဆိုင်မြို့မှာ စစ်ကောင်စီနဲ့ စစ်ကောင်စီ လက်အောက်ခံ PNO ပြည်သူ့စစ်တွေက တစ်ဖက်၊ ပအိုဝ်းလွတ်မြောက်ရေး တပ်မတော် (PNLA)နဲ့ မဟာမိတ်တော်လှန်ရေး တပ်ဖွဲ့တွေက တဖက် တိုက်ပွဲတွေဖြစ်ပွားခဲ့တာပါ။

တိုက်ပွဲစတင်ဖြစ်ပွားခဲ့တဲ့ ၂၀၂၄ ခုနှစ် ဇန်နဝါရီလကုန်မှာတော့ PNLA နဲ့ မဟာမိတ်တပ်တွေ မြို့တစ်ခု လုံးကို ထိန်းချုပ် ထားနိုင်ခဲ့ပါတယ်။

ဒါပေမဲ့လည်းစစ်ကောင်စီနဲ့ ပူးပေါင်းအဖွဲ့ဟာလေကြောင်းနဲ့ အပြင်းအထန်တိုက်ခိုက်ခဲ့လို့ ဆီဆိုင်မြို့ တစ်မြို့လုံးနီးပါး ပျက်စီးခဲ့ရပြီး နှစ်လကျော်အကြာမှာ စစ်တပ်က ပြန်လည်ထိန်းချုပ်ခဲ့ပါတယ်။

ပြည်သူတွေ မြို့ပျက်ကြီးထဲပြန်လည်ဝင်ရောက်နေထိုင်တာဟာ အခု ၂၀၂၆ ခုနှစ် ဇွန်လဆိုရင် နှစ်နှစ် ကျော် ကြာခဲ့ပါပြီ။

စစ်ပြီးစအချိန် ၂၀၂၄ ခုနှစ် မတ်လအတွင်း ပြည်သူတွေ မြို့ထဲ စတင်ဝင်ရောက်နေထိုင်ချိန်တုန်းက လမ်းပေါ်‌တွေနဲ့ နေအိမ်မြေကွက်လွတ်တွေမှာ ဖျာနဲ့ပတ်ထားတဲ့ ရုပ်အလောင်းတွေ၊ ရေမြောင်းတွေ အတွင်းမှာ သေဆုံး‌နေတဲ့ ရုပ်အလောင်းတွေကို မြင်တွေ့ခဲ့ရပါတယ်။

ပျက်စီး ဆုံးရှုံးခဲ့တဲ့ နေအိမ်တွေကို ရှင်းလင်းရေး လုပ်ဆောင်ချိန်မှာလည်း မြေကြီးထဲမှာ ရုပ်အလောင်း ၃ လောင်း ၄ လောင်းထပ်ပြီး မြှုပ်နှံထားတာကို မြင်တွေ့ခဲ့ရတယ်လို့ ကိုယ်တိုင်ကြုံခဲ့ရသူ မအိက ပြောပြပါ တယ်။

"တချို့ဆို လူငယ်လေးတွေပဲရှိသေးတာ၊ ဝတ်ထားတဲ့ အဝတ်အစားကိုမှတ်မိလို့သာ ဘယ်သူဆိုတာ သိရတယ်၊ အများစုကတော့ ဘယ်သူတွေမှန်းမသိကြဘူး"လို့ မအိက သူမြင်တွေ့ခဲ့ရတဲ့ အတိတ်က မြင်ကွင်းကို ပြန်ပြောရင်း အသံတိုးဝင်သွားပါတယ်။

လက်ရှိအချိန် ဆီဆိုင်မြို့ထဲစဝင်လိုက်တာနဲ့ မီးလောင်ပျက်စီးခဲ့လို့ နေအိမ်မဆောက်နိုင်သေးတဲ့ မြေကွက်လွတ်တွေ၊ လက်နက်ကြီးကျည်ထိလို့ ပျက်စီးခဲ့ရတဲ့ ကျည်ဆံရာအပေါက်တွေကို ဖြစ်သလို ဖာထေးထားကြတဲ့နေအိမ်တွေ မရေမတွက်နိုင်အောင်ရှိ‌နေတာကို မြင်ရပါတယ်။

မီးလောင်ပြီး တဈေးတခုလုံးဆုံးရှုံးခဲ့ရတဲ့ ဆီဆိုင်မြို့မဈေးကြီးဟာလည်း ယာယီဆိုင်ခန်းတွေ အဖြစ်နဲ့ ပြန်လည် လည်ပတ်‌နေကြပါတယ်။

စစ်ခေါင်းဆောင်မင်းအောင်လှိုင်က ဆီဆိုင်မြို့ဈေးကို ၃ ထပ် ဆောက်ပေးမယ်လို့ ပြည်သူတွေနဲ့ တွေ့ဆုံချိန် ကတိပေးထားပေမဲ့ လက်ရှိအချိန်ထိ‌ ယာယီဆိုင်ခန်းအ‌နေနဲ့သာ ရှိနေပါတယ်။

လက်ရှိယာယီ‌ဈေးထဲမှာ ဝယ်သူထက် ဈေး‌ရောင်းချသူသာများ‌နေတဲ့ အနေထားမျိုးဖြစ်ပြီး အနီးအနား ကရွာ‌တွေက လာရောက်ဝယ်ယူတာ နည်းနေပါတယ်။

"ဆိုင်မဖွင့်ရင် အသိမ်းခံရမှာစိုးလို့သာ ဖွင့်နေရတာ၊ စစ်မဖြစ်ခင်က ရောင်းခဲ့ရတာထက် ဆယ်ပုံတပုံ တောင် မရောင်းရဘူး။ ရွာဖက်ကသူ‌တွေ ဆီဆိုင်မြို့ထဲလာမဝယ်တော့ဘဲ ဆိုက်ခေါင် မြို့ဖက်သွားဝယ် ကြတော့ အရင်လိုပြန်ဖြစ်ဖို့ ကြာဦးမဲ့သဘောရှိနေတယ်"လို့ ဈေးဆိုင်ဖွင့်ထားတဲ့ အသက် ၅၀ အရွယ် အမျိုးသမီးတဦးက ပြောပါတယ်။

ဈေးအနီးဝန်းကျင်က မြေနေရာအများစုဟာ ပြန်လည်မတည်ဆောက်နိုင်သေးသလို ဒီမြို့ရဲ့ အကြီးဆုံးနဲ့ အမြင့်ဆုံးဖြစ်တဲ့ ၅ ထပ်တိုက် အဆောက်အဦအသစ်ဟာလည်း စစ်ဖြစ်ပွားရာကာလအတွင်းက အ‌ခြေအနေ အတိုင်း လက်နက်ကြီးထိတဲ့ အပေါက်ရာ‌တွေ၊ ကျည်ဆံရာအပြည့်နဲ့ရှိ‌နေဆဲပါ။

စီးပွားရေးလုပ်ဖို့ ငွေကြေးတတ်နိုင်သူအနည်းငယ်လောက်သာ အဆောက်အဦအသစ်ဆောက်ပြီး ဆိုင်ပြန်ဖွင့်ကြပေမဲ့ အများစုကတော့ အိမ်တွေအသိမ်းမခံရအောင်သာပြန်လည်နေထိုင်နေကြတယ်လို့ ပြောကြပါတယ်။

"စိတ်ဒဏ်ရာက လူမပြောနဲ့ ခွေးတွေပါခုချိန်ထိ မပျောက်သေးဘူး။ မိုးခြိမ်းသံကြားရင် တိုက်ပွဲ ကာလတုန်းက ကျန်ခဲ့တဲ့ခွေးတွေက ဝင်ပြေးပုန်းရတဲ့ထိ ကြောက်စိတ်ကဖြစ်နေတုန်း" လို့ မြို့ခံတဦးက ပြောပါတယ်။

မြို့အတွင်းက စာသင်ကျာင်း‌တွေရဲ့ အုတ်တံတိုင်း နံရံ‌တွေဟာလည်း လက်နက် ကြီးထိလို့ ပေါက်ထား တဲ့နေရာတွေမှာ အင်္ဂတေတွေနဲ့ ပြန်လည်ဖာထေးထားတာကို မြင်တွေ့ခဲ့ရပါတယ်။

ရှမ်းတောင်ဒေသနှစ်ဖက်တိုက်ပွဲကာလအတွင်း ပြည်သူနေအိမ် ၆၀၁ လုံး၊ ဘာသာ‌ရေး အဆောက်အဦ ၂၆ ခု၊ စာသင်ကျောင်း ၁၃ ကျောင်း၊ ဆေးရုံ ဆေးခန်း ၄ ခုနဲ့ ဈေး ၁ ခု ပျက်စီးဆုံးရှုံးခဲ့တယ်လို့ ပအိုဝ်းလူငယ် အစည်း အရုံး(PYO) က ၂၀၂၄ ခုနှစ် မေလတုန်းက ထုတ်ပြန် အသိပေးထားခဲ့ပါတယ်။

မိုးရွာရင် ရေယို‌တဲ့ မှန်တွေအက်ကွဲ‌နေတဲ့ ပြူတင်းပေါက်ရယ်၊ မှန်တွေမရှိတော့တာကြောင့် မိုးရေတွေဝင်နေတဲ့ ပြူတင်းပေါက်ဖက်ကို မဖြူတယောက် ကြည့်ရင်း ငေးမောနေပါတယ်။

မဖြူတို့အိမ်ဟာ အခြားသူ‌တွေလို အိမ်တခုလုံး ပျက်ဆီးဆုံးရှုံးမှုတွေမရှိခဲ့ပေမဲ့ လက်နက်ကြီး ကျရောက်ပေါက်ကွဲခဲ့လို့ မျက်နှာကျက်တွေပြိုကျတာ၊ နေအိမ်ခေါင်းမိုးတခုလုံးနီးပါး ကျည်ပေါက်ရာ‌တွေ အပြည့်ဖြစ်လို့ ခေါင်မိုးလဲထားရပါတယ်။

နေအိမ်တွင်းက ပရိဘောဂအပါအဝင် အိမ်သုံးပစ္စည်းတွေဟာလည်း သူခိုးခိုးခံခဲ့ရတာကြောင့် လူအိပ်ဖို့ အိပ်ယာကလွဲပြီး ဘာအသုံးအဆောင်မှ မရှိသေးတဲ့ အခြေအနေ ဖြစ်နေပါတယ်။

"လူမသေတာပဲဟုတ်‌နေပြီလို့တွေးပြီး အားးတင်းနေပေမဲ့ စိတ်က သေဆုံး‌နေတာကြာပြီ၊ ဘယ်လိုမှ နလန်မထူနိုင်သေးဘူး"လို့ မဖြူက ခပ်အေးအေးနဲ့ ပြောပါတယ်။

အက်ကွဲနေတဲ့ မှန်တွေရဲ့နေရာမှာ မှန်အသစ်အစားမထိုးနိုင်သေးလို့ ပလပ်စတစ်စ‌တွေနဲ့ ဖာထေးထားတာကြောင့် လေက တလဟောဝင်နေပါသေးတယ်။

အိမ်ဆုံးရှုံးခဲ့သူတွေအချို့ကလည်း အိမ်ငှားဘဝနဲ့ နေ‌နေကြသလို အချို့ကလည်းသူတို့ပိုင်တဲ့ မြေနေရာမှာ တဲထိုးပြီး ယာယီအမိုးအကာနဲ့ နေထိုင်းရင်း အရင်လိုမြို့ပြန်လည်စည်ကားမဲ့ နေ့ကို မျော်လင့်နေ ကြပါတယ်။

အချို့သူတွေကြတော့ စစ်ပြီးကတည်းက‌နေရပ်မပြန်တော့ဘဲ အခြားနေရာမှာ အခြေချနေထိုင်‌နေ ကြသူ‌တွေလည်း အများအပြားရှိ‌နေပါသေးတယ်။

နေအိမ်တွေမှာ ပြန်လည်နေထိုင်သူတွေထဲမှာ အသက်ကြီးပိုင်း‌တွေနဲ့ ကလေးတွေ အမျိုးသမီးအကြီး ပိုင်းသာ အများအပြားရှိနေပြီး လူငယ်အများစု‌က ထိုင်းနိုင်ငံဖက်ကို ကျပန်းအလုပ်လုပ်ရင်း မိသားစုတွေကို ထောက်ပံ့နေကြရပါတယ်။

ကိုနောင်မှာ သား ၃ ဦးရှိပြီး၊သားတယောက်က စစ်ကောင်စီကို တိုက်ခိုက်ခဲ့တဲ့ တော်လှန်ရေး ရဲဘော်၊နောက်ထပ်သားတဦးက ထိုင်းနိုင်ငံမှာအလုပ်သွားလုပ်နေပြီး ကျန်သားတဦးက အခြား မြို့တမြို့မှာ ကျောင်းတက်‌‌နေပါတယ်။

အိမ်ထောင်စုစာရင်းထဲမှာ အရွယ်ရောက်ပြီး သား‌တွေပါလို့ စစ်မှုထမ်းကြေးကို မဖြစ်မနေ ထည့်ဝင်‌နေရပါတယ်။

တိုက်ပွဲအတွင်း နေအိမ်တွေပျက်စီးခဲ့လို့ ပြန်လည်ပြုပြင်ဖို့ ငွေကြေးမတတ်နိုင်သေးချိန်မှာ စစ်မှုထမ်း ကြေးထည့်ဝင်နေရတာကလည်း ဝန်ထုပ်ဝန်ပိုးဖြစ်‌နေတယ်လို့ သူက လက်ရှိအခြေနေကို ညည်းတွား ပြောဆိုပါတယ်။

"စစ်မှုထမ်းကြေးကို မြို့ပြန်လည်ထူထောင်နေတဲ့အချိန်မှာ ကောက်ဖို့မသင့်သေးဘူး၊ ဒီလောက်ခက်ခဲ‌နေ တဲ့ကာလမှာ ခတ္တရပ်ထားပေးရမှာလေ၊ အခုက ဓားပြတိုက်သလိုကောက်‌နေတာ"လို့ သူက မကျေမနပ် သံနဲ့ပြောပါတယ်။

အချို့ရပ်ကွက်တွေကစစ်မှုထမ်းကြေးကို တစ်နှစ်စာ ငွေကျပ် ၆ သိန်းပေးရသလို အချို့ရပ်ကွက်တွေက သူတို့ရပ်ကွက်အတွက် လူစားထိုးဖို့ စစ်မှုထမ်းတကြိမ်အတွက် ၆ သောင်းထိပေးနေရတယ်လို့ မြို့ခံ အချို့က ပြောပါတယ်။

ဆင်းရဲလွန်းတဲ့ မြို့ခံအချို့ဟာ စစ်မှုထမ်းလူစားဝင်ပေးဖို့ ငွေကျပ်သိန်း ၃၀ နဲ့ သူတို့‌သားတွေကို စစ်ထဲလိုက်ဖို့ သဘောတူတာတွေရှိနေတယ်လို့ အကြောင်း သိရှိသူတွေက ပြောပါတယ်။

"အချို့ကလည်းအကြွေးတွေများလို့ လူစားထိုးဝင်ချင်တယ်ဆိုတာမျိုး၊ အချို့ကတော့ သား‌တွေ ထိန်းမနိုင်မဲ့အတူတူ လူစားထိုးထည့်တာမျိုး၊ အချို့ကတော့ စလော့ဂိမ်းရှုံးလို့ ငွေလိုလို့ ကိုယ်တိုင် လူစားထိုးမယ်ဆိုပြီး ကမ်းလှမ်းကြတာရှိပါတယ်"လို့ ဆီဆိုင်မြို့အုပ်ချုပ်ရေးအဖွဲ့ဝင်တဦးက ပြောပါတယ်။

လက်ရှိအချိန်မှာ တိုက်ပွဲကာလအတွင်း PNLA ဖက်ကနေကူပီး တိုက်ပွဲဝင်ခဲ့တဲ့ တော်လှန်ရေး တပ်ဖွဲ့ဝင်တွေရဲ့ မိသားစုဝင်တွဟာလည်း စစ်ကောင်စီတပ်နဲ့ပအိုဝ်းပြည်သူ့စစ်တွေရဲ့ စောင့်ကြည့်မှု ခံ‌နေရဆဲဖြစ်ပါတယ်။

"သား‌တွေနဲ့အဆက်သွယ်ရှိလား၊ ဘယ်မှာလဲဆိုပြီးမကြာခဏ စစ်ဆေးခံနေရလို့ အဆက်အသွယ် မလုပ်ဘူး၊ ကလေးတွေကလည်းမဆက်လာဘူး၊ တော် လှန်ရေးတပ်သား‌တွေရဲ့ မိသားစုဝင်‌တွေ ဆိုပြီးကျွန်မတို့မှာ စိတ်ရောလူရော ပင်ပန်းကြီးစွာနေနေရတယ်" လို့ တော်လှန်ရေးတပ်ဖွဲ့ဝင်တဦးရဲ့ မိခင်ကပြောပါတယ်။

ဆီဆိုင်မြို့ကို စစ်တပ်က ပြန်လည်သိမ်းယူထားတယ်ဆိုပေမဲ့ ပအိုဝ်းပြည်သူ့စစ်အဖွဲ့ကသာ အာဏာ အရှိဆုံးဖြစ်‌နေပါသေးတယ်။

ဆီဆိုင်မြို့နယ်ထဲက ရွာ‌တွေဟာ ပအိုဝ်းပြည်သူ့စစ်ကို စစ်မှုထမ်းတကြိမ်အတွက် စစ်သား စုဆောင်း ပေးရသလို အချို့ရွာဆို စစ်မှုထမ်းကြေးအဖြစ် တလကို ကျပ်တသိန်းတစ်ရာကနေ သိန်း ၃၀၀ ထိ ပေးနေရတယ်လို့ ဆီဆိုင်မြို့နယ်ကျေးရွာက ပြည်သူတွေက ပြောပါတယ်။

အချို့ကျေးရွာတွေဆိုပစ္စည်းတင်ဖို့ ကား‌တွေပါ ထောက်ပံ့နေရပြီး ငြင်းဆန်လို့မရအောင် ပအိုဝ်းပြည်သူ့ စစ်က အာဏာရှိ‌နေတယ်လို့ ပြည်သူတွေက ပြောပါတယ်။

ဆီဆိုင်မြို့နယ်၊တောင်ရှေ့အုပ်စု ကျေးရွာတွေက ပအိုဝ်းပြည်သူ့စစ်အတွက် အလှည့်ကျ နေ့စဉ် ထမင်း၊ ဟင်းချက်ပြုတ်ပေးရတာ‌တွေရှိ‌နေတယ်လို့ ဒေသခံတွေက ပြောပါတယ်။

"ရွာ‌တွေဖက်မှာလဲ စိုက်ပျိုးရေးက ဈေးကောင်းမရ စစ်မှုထမ်းကြေးကတမျိုး ဘောလုံးပွဲအတွက် ထည့်ရတာကတမျိုးနဲ့ တောင်သူ‌တွေ စိတ်ဆင်းရဲနေကြပြီ"လို့ ဆီဆိုင်မြို့ ကျေးရွာတခုက ပြည်သူတဦးက ပြောပါတယ်။

ဒီအခြေအနေတွေကို PNO ဘက်ကို ဆက်သွယ်မေးမြန်းခဲ့ပေမဲ့ ပြန်လည်ဖြေကြားခြင်းမရှိခဲ့ပါဘူး။

ဆီဆိုင်မြို့ အဝင်လမ်းတလျောက်စစ်ဆေးရေးဂိတ်‌တွေမှာလည်း လက်နက် ကိုင်ထားတဲ့ ပအိုဝ်း ပြည်သူ့စစ်‌တွေမြင်နေရပြီး မြို့ထဲကုန်ပစ္စည်းတင်ဆောင်လာတဲ့ကားတွေကို အခွန်ကောက်ခံတာတွေ လုပ်‌နေတယ်လို့ ယာဉ်မောင်းအချို့က ပြောပါတယ်။

"တရားမဝင်ပစ္စည်းသယ်လာတာလည်းမဟုတ်ဘူး၊ ဒါကိုငွေကောက်တော့ ကုန်သည်တွေက တန်ဆာခပိုပေးရတော့ လိုအပ်တာထက်ဈေးပိုရာင်းမှ သူတို့အတွက်ကိုက်တာ"လို့ ကုန်တင်ယာဉ်မောင်း တဦးက ပြောပါတယ်။

သေနတ်ကိုင်ဆောင်ထားတဲ့ ပအိုဝ်းပြည်သူ့စစ်သားတွေကို‌ ဆီဆိုင်မြို့နေရာအနှံ့မှာ တွေ့မြင်ခဲ့ရပြီး၊ ဈေးအတွင်းဈေူဝယ်ရာမှာလည်း သေနတ်ကိုင်ထားတာကြောင့် အကြောင်းမသိသူအချို့အတွက် ထိတ်လန့်စရာဖြစ်နေပါတယ်။

အချို့ပြည်သူ့စစ်တပ်ဖွဲ့ဝင်တွေမှာ အသက်မပြည့်းသးတဲ့အရွယ်‌တွေပါဝင်နေပြီး ဆိုင်ကယ်စီးရင်း သေနတ်လွယ်ထားတာကိုလည်းမြင်တွေ့ခဲ့ရပါတယ်။
လက်ရှိအချိန်မှာတော့ ဆီဆိုင်မြို့နယ်ထဲက ကျေးရွာအချို့မှာ တိုက်ပွဲဖြစ်ပွားတာမျိုးရှိပေမဲ့ ဆီဆိုင်မြို့အတွင်း တော်လှန်ရေးတပ်ဖွဲ့တွေ မဝင်ရောက်နိုင်ဖို့ အဆင့်ဆင့်တားဆီးထားတယ်လို့ မြို့ခံတွေက ပြောကြပါတယ်။

"သူတို့ လေးလုံးအဖွဲ့ (PNLA) က အင်အားနည်းသွားတဲ့သဘောမျိုးဖြစ်‌နေပြီး ဒီဖက် သုံးလုံးအဖွဲ့ (PNO) ကတော့ စစ်ကောင်စီနဲ့ပေါင်းတော့ သာနေတဲ့ အခြေနေမျိုးလို့ပြောရမှာပဲ၊ဝန်ထမ်းတွေလည်း စစ်မှုထမ်း ကြေးထည့်ရတာပဲ၊ ပြည်သူတွေကတော့ နောက်တကြိမ် ထပ်ဖြစ်မှာ စိုးရိမ်စိတ်‌နဲ့ နေနေရတုန်း"လို့ ဆီဆိုင်မြို့ခံ အစိုးရဝန်ထမ်းတဦးက ပြောပါတယ်။

ဆီဆိုင်မြို့မှာ လျှပ်စစ်မီး၊ ရေ၊ လမ်းပန်းဆက်သွယ်ရေး အခြေအနေပြန်လည်တည်ဆောက်ရေး လုပ်ငန်းတွေလုပ်ဆောင်နေပေမဲ့ ပြည်သူအများစုက နေအိမ်ပြန်ဆောက်နိုင်ဖို့ ရုန်းကန်နေရဆဲ ဖြစ်ပါတယ်။

ပြည်သူတွေကသာ နေအိမ်ပြန်လည်တည်ဆောက်ဖို့ သေမတတ်ကြိုးစားရုန်းကန်‌နေရပေမဲ့ ပြည်သူ တွေရဲ့ အိမ်တွေကို ဖျက်စီးခဲ့တဲ့ စစ်တပ်နဲ့ရဲစခန်း‌တွေရဲ့ အဆောက်အဦတွေဟာ အခိုင်အမာ တည်ဆောက်ထားတဲ့ သစ်လွင်လှပတဲ့ အဆောက်အဦတွေအဖြစ်လက်ရှိအချိန်မှာ မြင်တွေ့နေရပါတယ်။

စစ်ဒဏ်ကြောင့် ဆီဆိုင်မြို့ရဲ့ အထွေထွေအုပ်ချုပ်ရေးမှူးရုံးဝင်းကြီးတခုလုံး ပြိုကျပျက်စီးခဲ့ပေမဲ့ လက်ရှိအချိန်မှာတော့ ကြီးမားခိုင်ခန့်တဲ့ အဆောက်အဦအဖြစ် ပုံဖော်‌နေပါတယ်။

ဒီရုံးရဲ့နောက်ကျောဖက်အနီးက အရပ်သားပိုင်တဲ့ အိမ်တလုံးကတော့ မီးလောင်ထားတဲ့အတိုင်း မဖြိူဖျက်ရသေးတဲ့ အဆောက်အဦအဖြစ် ရှိနေဆဲဖြစ်ပါတယ်။

" သူတို့စစ်တပ်အတွက်ကျတော့ နှစ်လအတွင်း RCတိုက်တွေ အုတ်တံတိုင်းအခိုင်အမာ‌တွေနဲ့ ဆောက်လို့ မြန်လိုက်တာ၊ ကျွန်မတို့ပြည်သူတွမှာသာ အိမ်အသစ်ဆောက်ဖို့မပြောနဲ့ ယာယီအဆောက်အဦလေးနဲ့ မိုးမယိုအောင် ဖာထေးဖို့မနည်းရုန်းကန်နေ‌နေရတာ"လို့ ဆီဆိုင်မြို့ခံအမျို့သမီးက မကျေနပ်တဲ့ အမှုအယာနဲ့ ဆောက်လက်စအဆောက်အဦကို ကြည့်‌နေရင်းပြောပါတယ်။

ပြည်သူတွေ ပြန်လည်နေထိုင်နေတာ ၂ နှစ်ကျော်ကြာသွားပြီဖြစ်ပေမဲ့ မအိရဲ့ အိမ်ဟောင်းနေရာမှာတော့ မီးလောင်ကျွမ်းခဲ့တဲ့ အုတ်ကျိုးအုတ်ပဲ့အချို့တိုင်းသာ ကျန်ရှိနေဆဲဖြစ်ပါတယ်။

ဆီဆိုင်မြို့လေး ပြန်လည်အသက်ဝင်လာဖို့ ကြိုးစားနေပေမဲ့ စစ်ဒဏ်ကြောင့် ဆုံးရှုံးခဲ့ရတဲ့ မြို့ခံပြည်သူတွေရဲ့ စိတ်ဒဏ်ရာတွေက ဒီနေ့အချိန်ထိ ပြန်လည်တည်ဆောက်နိုင်ခြင်း မရှိသေးပါဘူး။

Burma Associated Press

09/06/2026

“Proof Of Life” ကိုသုံးပြီး ပစ္စည်းရောင်းတာ အလှူခံတာမလုပ်ဖို့ မေတ္တာရပ်ခံ

BAP၊ ဇွန် ၉။

စစ်တပ်ရဲ့ ဖမ်းဆီးထိန်းသိမ်းတာကို ခံထားရတဲ့ ဒေါ်အောင်ဆန်းစုကြည် အသက်ရှင်ကြောင်း သက်သေ ပြဖို့ တောင်းဆိုနေတဲ့ Proof Of Life ကမ်ပိန်း နာမည်ကို အသုံးပြုပြီး ပစ္စည်းရောင်းတာအလှူခံတာတွေ မလုပ်ဖို့ All in One Piece Movement က မေတ္တာရပ်ခံလိုက်ပါတယ်။

"Proof Of Life အသုံးအနှုန်းသည် အမေဒေါ်အောင်ဆန်းစုကြည် သက်ရှိထင်ရှားရှိနေဆဲဖြစ်ကြောင်း ခိုင်မာသော သက်သေအထောက်အထားရရှိနိုင်ရေးအတွက် တောင်းဆိုခြင်းဖြစ်ပါသည်။ ၎င်းသည် အမှတ်တံဆိပ်တစ်ခု မဟုတ်ပါ။ အမေ သက်ရှိထင်ရှားရှိနေကြောင်း သက်သေပြနိုင်ရေးအတွက် ဝိုင်းဝန်းတောင်းဆိုပေးခြင်းဖြင့် ကူညီစေလိုပါသည်" လို့ မေတ္တာရပ်ခံထားပါတယ်။

Proof Of Life နဲ့ ပတ်သတ်ပြီး ပစ္စည်း ရောင်းချတာ၊ အလှူငွေရှာဖွေတာတွေကိုလည်း လုပ်ဆောင်နေတာ မရှိဘူးလို့ အသိပေးထားပါတယ်။

ဒါကြောင့် Proof Of Life အသုံးအနှုန်းကို မှန်မှန်ကန်ကန် အသုံးပြုကြဖို့နဲ့ ငွေကြေးတစ်စုံတစ်ရာ ပတ်သက်ခြင်းမရှိရင် အသုံးပြုနိုင်တယ်လို့ ဦးဆောင်သူတွေ ဘက်ကအသိပေးထားပါတယ်။

စစ်တပ်ရဲ့ ဖမ်းဆီးချုပ်နှောင် ခံထားရတဲ့ ဒေါ်အောင်ဆန်းစုကြည် အသက်ရှင်နေကြောင်း သက်သေပြဖို့ အတွက် ကမ်ပိန်းကို သားဖြစ်သူ ကင်မ်အဲရစ် (ခ) ကိုထိန်လင်း ဦးဆောင်ပြီး Proof Of Life အနေနဲ့ လှုပ်ရှားမှူတွေပြုလုပ်ကာ တောင်းဆိုနေကြတာပါ။

Burma Associated Press

08/06/2026

ဖိလစ်ပိုင်တောင်ပိုင်းတွင် ပြင်းအား ရစ်ခ်ျတာစကေး ၇.၈ အဆင့်ရှိ အင်အားပြင်းငလျင်တစ်ခု လှုပ်ခတ်၊ ဒေသတွင်း ဆူနာမီသတိပေးချက်များ ထုတ်ပြန်
BAP ဘာသာပြန်။

တနင်္လာနေ့တွင် ဖိလစ်ပိုင်တောင်ပိုင်း Mindanao ဒေသ၌ ပြင်းအား ၇.၈ အဆင့်ရှိ ငလျင်တစ်ခု လှုပ်ခတ်သွားခဲ့ကြောင်း အမေရိကန်ဘူမိဗေဒလေ့လာရေးအဖွဲ့ (USGS) အရ သိရပြီး၊ အဆိုပါငလျင်ကြောင့် ဖိလစ်ပိုင်နိုင်ငံနှင့် အိမ်နီးချင်း အင်ဒိုနီးရှားနိုင်ငံ အပါအဝင် ဂျပန်နိုင်ငံတို့တွင်ပါ ဆူနာမီသတိပေးချက်များ ထွက်ပေါ်လာခဲ့သည်။

USGS ၏ ဖော်ပြချက်အရ ငလျင်သည် ဒေသစံတော်ချိန် နံနက် ၇ နာရီ ၃၇ မိနစ်ဝန်းကျင်တွင် မြေအောက်အနက် ၃၅ ကီလိုမီတာ (၂၁.၇ မိုင်) ခန့်ကို ဗဟိုပြု၍ လှုပ်ခတ်ခဲ့ခြင်း ဖြစ်သည်။ လတ်တလောတွင် သေဆုံးသူရှိကြောင်း သတင်းပို့ချက်များ မရရှိသေးပါ။

အဆိုပါငလျင်သည် Mindanao ကျွန်း၏ တောင်ဘက်အစွန်းဆုံးစွန်းဖြစ်သော Sarangani ခရိုင်ရှိ General Santos မြို့ ကမ်းလွန်ပင်လယ်ပြင်ကို ဗဟိုပြု၍ လှုပ်ခတ်ခဲ့ခြင်းဖြစ်ကြောင်း ဖိလစ်ပိုင် မီးတောင်နှင့် ငလျင်ဗေဒအဖွဲ့ (Phivolcs) က ပြောကြားခဲ့သည်။

Phivolcs သည် ဆူနာမီသတိပေးချက်ကိုလည်း ထုတ်ပြန်ထားပြီး ကမ်းရိုးတန်းဒေသများတွင် နေထိုင်သူများကို ရွှေ့ပြောင်းကြရန် တောင်းဆိုထားသည်။ အမေရိကန် ဆူနာမီသတိပေးစနစ်အရ ဖိလစ်ပိုင်နိုင်ငံ၏ အချို့နေရာများတွင် ဆူနာမီလှိုင်းများသည် ဒီရေမျက်နှာပြင်အထက် ၁ မီတာမှ ၃ မီတာအထိ မြင့်တက်လာနိုင်ကြောင်း သိရသည်။

General Santos မြို့ရှိ ဒေသခံသတင်းပြန်ကြားရေးရုံးမှ ဓာတ်ပုံများတွင် ငလျင်လှုပ်ခတ်ပြီးနောက် ကုန်စုံဆိုင်များနှင့် အဆောက်အအုံများ ပြိုကျပျက်စီးနေသည်ကို တွေ့ရသည်။
နေအိမ်များမှ ရွှေ့ပြောင်းရန်နှင့် ကယ်ဆယ်ရေးလုပ်ငန်းများ စတင်ရန်အတွက် "သက်ဆိုင်ရာ အစိုးရအဖွဲ့အစည်းအားလုံးကို ချက်ချင်း အရေးယူဆောင်ရွက်ဖို့ ညွှန်ကြားထားပါတယ်" ဟု ဖိလစ်ပိုင်သမ္မတ ဖာဒီနန် မားကို့စ် ဂျူနီယာက ပြောကြားခဲ့သည်။

"ထိခိုက်မှုရှိတဲ့ ခရိုင်တွေက ကျွန်တော်တို့ရဲ့ မိဘပြည်သူတွေအနေနဲ့ ဆူနာမီသတိပေးချက်ကို ကျေးဇူးပြုပြီး လိုက်နာကြပါ။ မြင့်မားတဲ့ ကုန်းမြေတွေဆီ အခုပဲ ရွှေ့ပြောင်းကြပါ။ စောင့်မနေကြပါနဲ့။ ခင်ဗျားတို့ရဲ့ အသက်က နောက်မှာ ကျန်ခဲ့မယ့် ဘယ်အရာထက်မဆို ပိုအရေးကြီးပါတယ်။" ဟု ၎င်းက ထုတ်ပြန်ချက်တစ်ခုတွင် ပြောကြားခဲ့သည်။

ပျက်စီးဆုံးရှုံးမှုပုံရိပ်အများစု ထွက်ပေါ်နေသည့် Sarangani ခရိုင်သည် လူဦးရေ ၅၈၀,၀၀၀ ခန့် နေထိုင်ရာ ဒေသဖြစ်သည်။

ဖိလစ်ပိုင်နိုင်ငံ Sarangani ခရိုင်၊ Alabel မြို့မှ ရဲမှူး Benjie Ancheta က ၎င်းတို့ အလံတင်အခမ်းအနား ပြုလုပ်နေစဉ် ငလျင်လှုပ်ခတ်ခဲ့ခြင်းဖြစ်ပြီး လှုပ်ခတ်ပြီးချင်းတွင် ရဲစခန်းအဆောက်အအုံ၌ အက်ကြောင်းအချို့ ဖြစ်ပေါ်သွားခဲ့ကြောင်း ရိုက်တာသတင်းဌာနသို့ ပြောကြားခဲ့သည်။

ထိခိုက်ဒဏ်ရာရသူရှိကြောင်း လတ်တလော သတင်းမရရှိသေးသော်လည်း ပြင်းထန်သော တုန်ခါမှုကြောင့် အချို့လူများ သတိလစ်မူးလဲသွားခဲ့ကြောင်း Ancheta က ပြောကြားခဲ့သည်။

"ဒါက ကျွန်တော်တို့ ကြုံဖူးသမျှထဲမှာ အပြင်းထန်ဆုံး ငလျင်ပါပဲ။" ဟု Ancheta က ရိုက်တာသတင်းဌာနသို့ ဖုန်းဖြင့် ပြောကြားခဲ့သည်။

အင်ဒိုနီးရှားနိုင်ငံသည် ၎င်း၏ မြောက်ဘက်ကမ်းရိုးတန်းအတွက် ဆူနာမီသတိပေးချက် ထုတ်ပြန်ခဲ့ပြီး ဂျပန်နိုင်ငံကလည်း Ibaraki ခရိုင်မှ Okinawa ခရိုင်အထိ ၎င်း၏ တောင်ဘက်ကမ်းရိုးတန်းအတွက် အလားတူ သတိပေးချက် ထုတ်ပြန်ခဲ့သည်။

ဖိလစ်ပိုင်၊ အင်ဒိုနီးရှားနှင့် ဂျပန်နိုင်ငံတို့သည် ပစိဖိတ်သမုဒ္ဒရာကို ဝန်းရံထားပြီး ငလျင်နှင့် မီးတောင်ပေါက်ကွဲမှုများ မကြာခဏ ဖြစ်ပွားလေ့ရှိသည့် "မီးကွင်းဒေသ" (Ring of Fire) ဟု ခေါ်ဆိုသော ပြတ်ရွေ့ကြောများပေါ်တွင် တည်ရှိနေကြသည်။

အမျိုးသားမိုးလေဝသဌာန၏ ဖော်ပြချက်အရ ဟာဝိုင်ယီကျွန်းတွင်မူ ဆူနာမီအန္တရာယ် မတွေ့ရှိရကြောင်း သိရသည်။

ကိုးကား - CNN
ပုံစာ - ၂၀၂၆ ခုနှစ် ဇွန်လ ၈ ရက်နေ့က General Santos မြို့တွင် ပြင်းအား ၇.၈ အဆင့်ရှိ ငလျင်တစ်ခု လှုပ်ခတ်ပြီးနောက် ပြိုကျပျက်စီးသွားသော Jollibee အမြန်ရ ရိုးရာစားသောက်ဆိုင်ရှေ့၌ ရဲတပ်ဖွဲ့ဝင်များ စုဝေးနေကြစဥ်။ (Edwin Espejo/AFP/Getty Images)။
Burma Associated Press

08/06/2026

ဒီတံတားအောက်က စစ်သားတွေဆိုတာလည်း မြဝတီမြို့စောင့်တပ်ဖြစ်တဲ့ ခလရ ၂၇၅ က အဖွဲ့တွေ။

သူတို့ကို ဒီနေရာကို ရွေ့ထားပေးတာလည်း ကရင်နယ်ခြားစောင့် BGF ပဲ။ သူတို့တွေ တံတားအောက်မှာ ဘန်ကာဆောက်ဖို့ ပစ်ကျင်းတွေလုပ်ဖို့ကူညီပေးတာလည်း BGF ပဲ။ ဒါ့အပြင် BGF တပ်ဖွဲ့ဝင် တချို့က လည်း အာဏာသိမ်းစစ်တပ်ရဲ့ ယူနီဖောင်းဝတ်ပြီးတိုက်ပေးခဲ့တယ်။ ဒါတွေက ၂၇၅ ကနေ ပြေးလာတဲ့ အရာရှိတယောက် ပြန်ပြောပြတာ။

မြဝတီ တမြို့လုံးလုံး သေနတ်သံ ဗုံးသံတွေ ဆူညံနေတဲ့အချိန်အထိလည်း သွားသွားလာလာ အချို့က မပြတ်ဘူး။

06/06/2026

နတ်မောက်မှာ ချောင်းကို ဖြတ်မောင်းတဲ့ယာဉ် ရေစီးနဲ့မျောပါပြီး အမျိုးသားတစ်ဦး သေဆုံး

BAP၊ ဇွန် ၆။

မကွေးတိုင်း၊ နတ်မောက်မြို့နယ်မှာ ချောင်းတစ်ခုကို ဖြတ်သန်းမောင်းနှင်တဲ့ ယာဉ်တစီး ရေစီး မျောပါပြီး အမျိုးသားတစ်ဦး သေဆုံးသွားတယ်လို့ မြန်မာနိုင်ငံ မီးသတ်တပ်ဖွဲ့က ဒီနေ့ ဇွန် ၆ ရက်မှာ ထုတ်ပြန် ပါတယ်။

မနေ့က ဇွန် ၅ ရက် ည ၈ နာရီမှာ နတ်မောက်မြို့ တံခွန်တိုင်ကျေးရွာအနီးမှာ ချောင်းအတွင်း ရေစီးနဲ့မျောပါသွားတဲ့ မော်တော်ယာဉ်ကို ဆယ်ယူရာမှာ ယာဉ်ပေါ်ပါ အမျိုးသား ပျောက်ဆုံး နေတာကြောင့် ဆက်လက်ရှာဖွေရာမှာ ဒီနေ့ ဇွန် ၆ ရက်နေ့ မနက်ပိုင်းမှာမှ သေဆုံးနေတဲ့ အမျိုးသား အလောင်းကို ပြန်လည်ရှာတွေ့ခဲ့တာလို့ဆိုပါတယ်။

ဓာတ်ပုံ - မြန်မာနိုင်ငံ မီးသတ်တပ်ဖွဲ့

Burma Associated Press

06/06/2026

တာ့ခ်ခရိုင်တွင် လုယက်ရန် ကြိုးပမ်းမှုဖြင့် တရုတ်အမျိုးသား သုံးဦး အဖမ်းခံရ
BAP ဘာသာပြန်။

မြန်မာနိုင်ငံမှ ထွက်ပြေးလာပြီးနောက် ဖမ်းဆီးခံရမည့်အရေးမှ ရှောင်တိမ်းရန် ကြိုးပမ်းစဉ် ဒေသခံတစ်ဦးကို လုယက်ရန် ကြိုးပမ်းခဲ့ပြီး ရဲကင်းလှည့်ယာဉ်တစ်စီးကို ဖျက်ဆီးခဲ့သည်ဟု စွပ်စွဲခံရပြီးနောက် တရုတ်နိုင်ငံသား သုံးဦးကို တာ့ခ်ခရိုင်၊ Phop Phra တွင် ဖမ်းဆီးလိုက်သည်။

အသက် ၂၈ နှစ်အရွယ် Yang Luta ၊ အသက် ၃၁ နှစ်အရွယ် Feng Zhengdaoနှင့် အသက် ၃၂ နှစ်အရွယ် Hu Pan ဟု အမည်ရသည့် တရုတ်အမျိုးသား သုံးဦးကို Phop Phra ရဲစခန်းမှ ရဲအရာရှိများက ဖမ်းဆီးထိန်းသိမ်းလိုက်ကြောင်း ထိုင်းမီဒီယာများက သောကြာနေ့တွင် ဖော်ပြခဲ့သည်။

၎င်းတို့သည် အဆိုပါ မြောက်ပိုင်းနယ်စပ်ခရိုင်ရှိ Ruam Thai Phatthana အုပ်စု၊ Ban Sap Anan နှင့် Ban Phadi ကျေးရွာကြား လမ်းမပေါ်တွင် ရဲကင်းလှည့်ယာဉ်တစ်စီးကို ဖျက်ဆီးခဲ့ပြီး ဒေသခံတစ်ဦးထံမှ မော်တော်ဆိုင်ကယ်တစ်စီးကို ခိုးယူရန် ကြိုးပမ်းခဲ့သည်ဟု စွပ်စွဲခံထားရသည်။
အဆိုပါဖြစ်စဉ်သည် ကြာသပတေးနေ့ ညနေပိုင်းတွင် ဖြစ်ပွားခဲ့ခြင်းဖြစ်ပြီး သံသယရှိသူများသည် ရဲကင်းလှည့်ယာဉ်၏ ပြတင်းပေါက်များကို သစ်သားတုတ်များနှင့် ကျောက်ခဲများဖြင့် ထုရိုက်ဖျက်ဆီးခဲ့သဖြင့် သိသာထင်ရှားသော ပျက်စီးဆုံးရှုံးမှု ဖြစ်ပွားခဲ့သည်ဟု ဆိုသည်။

ဒေသခံ ကျေးရွာခေါင်းဆောင်များနှင့် ရဲအရာရှိများထံ အကြောင်းကြားချက်ရောက်ရှိပြီးနောက် ချက်ချင်း လိုက်လံဖမ်းဆီးခဲ့သဖြင့် အဆိုပါ အမျိုးသား သုံးဦးကို လိုက်လံပိတ်ဆို့ပြီးနောက် နောက်ဆုံးတွင် ဖမ်းဆီးနိုင်ခဲ့ခြင်း ဖြစ်သည်။

စစ်ဆေးမေးမြန်းစဉ်အတွင်း အဆိုပါ အမျိုးသား သုံးဦးက ၎င်းတို့သည် တိုးတက်သော ဗုဒ္ဓဘာသာ ကရင်အမျိုးသားတပ်မတော် (DKBA) ထိန်းချုပ်ရာ မြန်မာနိုင်ငံ နယ်မြေတစ်ခုတွင် အလုပ်လုပ်ရန် လှည့်ဖြားခြင်းခံခဲ့ရသည်ဟု ထွက်ဆိုခဲ့ကြသည်။

လှည့်ဖြားခံရမှန်း သိရှိပြီးနောက် ၎င်းတို့သည် Phop Phra မှတစ်ဆင့် ထိုင်းနိုင်ငံအတွင်းသို့ နယ်စပ်ကို ဖြတ်ကျော်ကာ ထွက်ပြေးခဲ့ကြသည်ဟု ဆိုသည်။

သံသယရှိသူများသည် ၎င်းတို့တွင် ငွေကြေးမရှိသဖြင့် မဲဆောက်ခရိုင်သို့ သွားရောက်နိုင်မည့် နည်းလမ်းကို ရှာဖွေရန် ကြိုးပမ်းခဲ့ခြင်းဖြစ်ကြောင်း ဝန်ခံခဲ့ကြသည်ဟု ရဲတပ်ဖွဲ့က ပြောကြားခဲ့သည်။
အာဏာပိုင်များသည် စုံစမ်းစစ်ဆေးမှုများ ပြုလုပ်နေပြီး ဥပဒေအရ အရေးယူနိုင်ရန် ဆောင်ရွက်လျက် ရှိသည်။ အဆိုပါ တရုတ်နိုင်ငံသားများကို နိုင်ငံအတွင်းသို့ တရားမဝင် ဝင်ရောက်မှုဖြင့် တရားစွဲဆိုထားသည်။

ကိုးကား - Bangkok Post

ပုံစာ - ကြာသပတေးနေ့ ညနေပိုင်းတွင် ဒေသခံတစ်ဦးကို လုယက်ရန် ကြိုးပမ်းခဲ့ပြီး ရဲကင်းလှည့်ယာဉ်တစ်စီးကို ဖျက်ဆီးခဲ့သည်ဟု စွပ်စွဲခံရပြီးနောက် တရုတ်အမျိုးသား သုံးဦးကို တာ့ခ်ခရိုင်၊ Phop Phra တွင် ဖမ်းဆီးလိုက်သည်။ (Workpoint TV 23 မှ ရုပ်သံမှတ်တမ်းဓာတ်ပုံ)
Burma Associated Press

06/06/2026

ခေါင်းဆောင်မှအပ ပျူစောထီး ၇၀ ကျော်ကို လက်နက်တွေနဲ့ ဖမ်းမိဟု အညာမြေတပ်ပေါင်းစု ထုတ်ပြန်

BAP၊ ဇွန် ၆။

မကွေးတိုင်း၊ ပေါက်မြို့နယ်အတွင်းရှိ ပျူစောထီးများနေထိုင်သည်ဆိုသော ကုက္ကိုလ်စုကျေးရွာကို တော်လှန်ရေးတပ်ဖွဲ့များက သိမ်းပိုက်ပြီးနောက် ထွက်ပြေးတိမ်းရှောင်နေသည့် ပျူစောထီးအဖွဲ့ဝင် များကို လိုက်လံဖမ်းဆီးရာ ခေါင်း ဆောင်မှအပ လူ ၇၀ ကျော်ကို လက်နက်ခဲယမ်းများနှင့်အတူ ဖမ်းဆီးရမိခဲ့ကြောင်း အညာမြေတပ်ပေါင်းစုက ထုတ်ပြန်သည်။

ပျူစောထီးအဖွဲ့ကို ဦးဆောင်သည့် ခေါင်းဆောင်နှင့် စစ်သား ၅ ဦး သည် ၎င်းတို့ ခေါ်ဆောင်လာသည့် ပျူစောထီးများနှင့် မိသားစုဝင်များကို စွန့်ပစ်ကာ နယ်မြေကျွမ်းကျင်မှုကို အသုံးပြု၍ ထွက်ပြေးလွတ်မြောက်သွားခဲ့သည်ဟုဆိုသည်။

လက်ရှိအချိန်အထိ ၎င်းတို့ ၆ ဦးကို ဖမ်းဆီးနိုင်ခြင်း မရှိသေးဘဲ ဆက်လက်ရှာဖွေနေဆဲ ဖြစ်သည်။

စစ်တပ်ထောက်ခံသူ ပေါက်ဘုန်းကြီး (အာရိယာဝံသ) ၏ အားအထားရဆုံးဟုဆိုသည့် ကုက္ကိုလ်စုကျေးရွာနှင့် ရေပြာရဲစခန်းတို့ကို ဇွန်လ ၄ ရက်နေ့တွင် တော်လှန်ရေးပူးပေါင်းတပ်ဖွဲ့များက သိမ်းပိုက်ခဲ့ခြင်းဖြစ်သည်။

စခန်းသိမ်းပြီးနောက် ပျူစောထီးများ ထွက်ပြေးမှုအတွက် အညာမြေတပ်ပေါင်းစုနှင့် ဒေသတွင်း တပ်ဖွဲ့အသီးသီးတို့ ပူးပေါင်း၍ တောနင်းရှာဖွေးခြင်း၊ ကင်းထောက်ခြင်းများဖြင့် မနားမနေရှာဖွေခဲ့ရာ ယမန်နေ့ ည(၇)နာရီခနိ့တွင် ပေါက်နယ်တောတွင်းတနေရာတွင် အစုလိုက်ဖမ်းဆီးမိခဲ့သည်ဟုဆိုသည်။

ဖမ်းဆီးရမိသည့် ပျူစောထီးများနှင့် မိသားစုဝင်များကို လက်ရှိတွင် ဂျနီဗာကွန်ဗင်းရှင်း (Geneva Conventions) နှင့်အညီ စစ်သုံ့ပန်းအဖြစ် သတ်မှတ်ကာ ဘေးကင်းလုံခြုံစွာ ထိန်းသိမ်းစောင့်ရှောက် ထားကြောင်း အညာမြေ တပ်ပေါင်းစုက ထုတ်ပြန်ထားသည်။

ရုပ်သံ - Bo Bo ThantZin’ Facebook

Burma Associated Press