08/11/2023
Blink-182 le an hlapawl thlirnak
----------------------------------------------------
Blink-182 ih hlapawl hi tuihlan k*m 20 lengin radio ihsin ka rak ngai ngah ih, lehhnu ah an elbampawl tla ka ngaihven phah. Kan dung te hrawng ihsin an music video tete pawl ka hun zauhkual tikah an thuhla tawite tal hlawmawk duhnak a rung suak phah vivo. Ziangahtile, Punk Rock ben tampi lakah annih hi an phundang deuh ih, an hlapawl khal an danglam deuh hai ruangah a si.
An Thuhla Tawi:
Blink-182 ben cu k*m 1992 ah USA, California, San Diego khawpawn ah Tom Delonge (vocals, guitar) le Mark Hoppus (vocals, bass) lein an rak din thawk ih, drum tumtu dingah Scott Raynor an sawm. An ben hmin hi a tirah cun Blink ti lawng a si nan Blink hmin nei ben dang an rak um zo ruangah lehhnu ah 182 betin Blink-182 ti a si lanta.
Lehhnu ah Scott aiah Travis Barker a runglut leh. K*m tawkfang hnuah Tom tla vei hnih lai a suak lawk ih, a aiah Alkaline Trio ih guitarist Matt Skiba a runglut. Tom cun Blink-182 ihsi a suah tikah Angels & Airwaves ti mi punk ben thotho a din ih, amah in guitar tum phahin hla a sak thotho. Asinan k*m 2022 hrawng ihsin Blink-182 tiih theih lar mi pathum (Tom, Mark le Travis) cu an kawmaw lehsal.
Blink-182 hin nominations 60 hrawng ihsin awards 22, San Diego Music Awards pahra, Teen Choice Awards pathum le Kerrang lawmman pahnih an dawng zo.
Elbam le Hla:
An elbam hmaisabik "Cheshire Cat" cu 1995 ah an suah ih, a 2nk "Dude Ranch" cu 1997 ah an suah leh. An elbam hmaisabik cu an hlawhtling lemlo nan a 2nk cun miin an thei thawk thlang. K*m 1999 ih suak an elbam 3nk "E***a of the State" ihsi cun an hlawhtling zet ih, leitlun pumpi'n an thei vivo thlang.
Cun, 2001 ih suak an elbam 4nk "Take Off Your Pants and Jacket" khal an hlawhtling zet lala. Cuisin, Blink-182 (untitled, 2003), Neighborhoods (2011), California (2016) le Nine (2019) elbampawl an suah peh vivo. An hla hit hmaisabik cu an elbam 2nk sungih ta "Dammit" a si ih, an single netabik cu an kawmawksal hnu 2022 sungih suah mi "Edging" a si.
A tlangpithuin Tom hin hlasak phahin guitar a tum ih, Mark khalin bass tum phahin hla a sak phah ve ṭheu. Tom in lead le riff pawl a tum laiah Mark in rhythm a rak tum can tla a um ve. Hla fing khat ah pakhat in main vocals a sak laiah pakhat sawntu in backing a rak sak bawm can tla a um. Cun, hla fing pakhat ah thleithlakin an sak sawngawk mi a um vekin fing dangdang a hranhran ih an sak mi tla a um ve.
An hlapawl hi rock phun si ve siin zangkhai le tawi tete an si hai. Hla nem le muang tete an um bangin virvat, phur-um le rang vutvo tla an um ve. An hla tamsawn ah hin awnmawi fehdan phun khat lawng an hmang dah lemlo. Hla fing khat sungah awnmawi thlungdar tum dan phun hnih-thum an hman vekin riffs khal phun hnih-thum lai an hmang ṭheu.
An awnmawi le hla phun hi Pop/Skate Punk deuh ti a si ih, anmahpawl khal hi skate boarding paih zet pawl an rak si hai. Asinan an hlafang le umtudan hrekkhat cu ngai nuam lo le zauh mawi lo zikzik vek tla an um phah ve ṭheu ko. Hi khal hi punk rock khawvel lawngah si loin awnmawi khawvel dan a rak si ve hrimhrim.
An hla hit le ṭha hrekkhat cu
All the Small Things, What's My Age Again, Man Overboard, Dumbweed, First Date, The Rock Show, Anthem Pt. 2, Feeling This, I Miss You, After Midnight, Darkside, Edging, tvk. an si. Blink-182 cun an elbam netabik "One More Time" cu 2023 October ah an suah leh.
Dumbweed:
https://youtu.be/zzhCYiA0H2k?si=hOSoA7lajS1WdqKc
The Rock Show:
https://youtu.be/z7hhDINyBP0?si=hzoqRXF6ij5iun3N
