10/07/2026
အာဇာနည်နေ့မှာ ဒေါ်အောင်ဆန်းစုကြည်ကို တက်ခွင့်ပြုမယ်ဆိုပြီး သတင်းလွှင့်နေတယ်။ အဲ့ဒါ မဖြစ်နိုင်ဘူး။ အာဇာနည်နေ့၊ ဒေါ်အောင်ဆန်းစုကြည်နဲ့ NLD တို့ ဆက်စပ်ခဲ့တဲ့သမိုင်းကို ပြန်ကြည့်ရင်သိနိုင်တယ်။
၁၉၈၈ခုနှစ်တုန်းကလည်း မဆလအစိုးရက ရန်ကုန်မြို့တော်ခန်းမမှာလုပ်တဲ့ အာဇာနည်နေ့ဆွမ်းကျွေးပွဲမှာ ဒေါ်အောင်ဆန်းစုကြည် ရေစက်ချတာကို MRTV ကအချိန်တော်တော်ကြာကြာ လွှင့်ပေးခဲ့တယ်။ ဒေါ်အောင်ဆန်းစုကြည်ကို အစိုးရပိုင်မီဒီယာကနေ ပထမဆုံးမြင်ခွင့်ရခဲ့တာပဲ။ အဲ့နောက်ရက်၂၀ကြာတော့ ၈လေးလုံးအရေးတော်ပုံစတော့တာပဲ။
၁၉၈၉အာဇာနည်နေ့မှာ ဒေါ်အောင်ဆန်းစုကြည်နဲ့ ဝန်းရံသူတွေဟာ အာဇာနည်ဗိမာန်ကို ချီတက်ဖို့ကြံစည်ပါတယ်ဆိုပြီး ဒေါ်အောင်ဆန်းစုကြည်နဲ့ ဝန်းရံသူတွေ( တတ်သိအဖွဲ့လို့လူသိများတယ်) တဖွဲ့လုံးကို ဖမ်းတယ်။ နောက်၆နှစ်အကြာ ၁၉၉၅ ခုနှစ်မှဒေါ်အောင်ဆန်းစုကြည်ပြန်လွတ်တယ်။ ၁၉၉၅ခုနှစ် အာဇာနည်နေ့မှာ ဒေါ်အောင်ဆန်းစုကြည်ပန်းခွေချတာကို တီဗီမှာပြန်မြင်ရတာ ၁၉၉၉ ခုနှစ်အထိပေါ့။ အဲ့ကာလမှာ NLD ပါတီဟာလည်း လှုပ်ရှားအသက်ဝင်လာတယ်။
အဲဒီနောက်၂၀၀၀ခုနှစ်မှာ ဒေါ်အောင်ဆန်းစုကြည်အိမ်အကျယ်ချုပ်ကျခံရပြီး ၂၀၁၀အထိ အာဇာနည်နေ့တွေမှာ ပန်းခွေချခွင့်မရခဲ့ပါဘူး။
၂၀၁၀ ခုနှစ်နှောင်းပိုင်းမှာ ဒေါ်အောင်ဆန်းစုကြည်ပြန်လွတ်လာပါတယ်။ ၂၀၁၁ အာဇာနည်နေ့မှာ ဒေါ်အောင်ဆန်းစုကြည် ပန်းခွေချဝပ်ပြုတာကို တီဗွီမှာပြန်တွေ့ရပါတယ်။ NLD ပါတီကလည်း ပါတီမှတ်ပုံပြန်တင်ပြီး ၂၀၁၀ ရွေးကောက်ပွဲမှာဝင်ပြိုင်ပါတယ်။
ပြောရရင် ဒေါ်အောင်ဆန်းစုကြည် အဖမ်းခံနေရတဲ့ကာလတိုင်းမှာ စစ်တပ်က ၄င်းကို ဖခင်ဗိုလ်ချုပ်အောင်ဆန်းထံ သွားရောက်ဂါဝရပြုခွင့် မပေးခဲ့ပါဘူး။
စန္ဒာမင်းနဲ့ မင်းအောင်လှိုင်တို့ရဲ့ဘုံသဘောထားတစ်ခုဖြစ်တဲ့ ဒေါ်အောင်ဆန်းစုကြည်နဲ့ NLD ကိုအပြတ်ရှင်းရေး ဦးတည်ဆောင်ရွက်နေတဲ့ ခုလိုအချိန်ကာလမှာ ဒေါ်အောင်ဆန်းစုကြည်ကိုအာဇာနည်နေ့ အခမ်းအနားတက်ခွင့်ပေးမယ်ဆိုတာ ရည်ရွယ်ချက်တခုခုရှိလို့ တမင်လွှင့်တဲ့သတင်းသာ ဖြစ်ပါတယ်။
#ဒေါ်အောင်ဆန်းစုကြည် #အာဇာနည်နေ့ #လွမ်းသူပန်းခွေ #အာဇာနည်သူရဲကောင်းများ
