12/09/2022
အိပ်ရာခင်းနှင့်အစွပ်များကို ဘယ်နှစ်ရက်တစ်ခါ လဲပေးသင့်သလဲ ? 🤔
ဒီနေ့မှာတော့ လူတိုင်းအတွက် အကျိုးလည်းရှိမယ် ၊ သိလည်းသိထားသင့်တဲ့ အကြောင်းအရာလေးကို ဇီဝဗီတကနေ ဖော်ပြပေးသွားပါ့မယ် ။
🛏ကျွန်တော်တို့ရဲ့ တစ်နေ့တာအချိန် ၂၄ နာရီမှာ လေးပုံတစ်ပုံက ကုတင်ပေါ်မှာ ကုန်ဆုံးတယ် ဆိုတာ သတိထားမိကြပါလား။ ကျွန်တော်တို့တွေဟာ နေ့စဥ် ပျမ်းမျှ (၈) နာရီ အိပ်ချိန် ရှိတယ်ဆိုလျှင် တစ်ပတ်ကို (၅၆) နာရီဟာ ကုတင်ပေါ်မှာ အိပ်ရင်းကုန်ဆုံးသွားတာပေါ့ ။
🛏ဒီတော့ အိပ်ရာခင်း ၊ ခေါင်းအုံး ၊ စောင် ၊ ဖက်လုံး စတာတွေနဲ့ ထိတွေ့ရတဲ့ အချိန်ဟာလည်း ကြာရှည်လွန်းပါတယ် ။ ဒါကြောင့် အိပ်ရာအသုံးအဆောင် ၊ အခင်းအကျင်း တွေကို သန့်ရှင်းအောင် ထားဖို့ဆိုတာ လိုအပ်လာပါတယ် ။
🤔ဘာကြောင့် အိပ်ရာခင်းတွေ ၊ခေါင်းအုံး တွေကို သန့်ရှင်းအောင်ထားသင့်တာလဲ (သို့) ပုံမှန် လဲပေးသင့်တာလဲ ?
အိပ်ရာခင်းတွေ ၊ ခေါင်းအုံးစွပ်တွေမှာ ဖုန်မှုန့်တွေ၊ အရေပြားဆဲလ်သေတွေ ၊ ကိုယ်ခန္ဓာမှထွက်သောအဆီတွေ ၊ ချွေး ၊ အညစ်အကြေး နှင့် ပိုးမွှားတွေ စွဲကပ်နေနိုင်ပါတယ် ။
ဖုန်မှုန့် တွေ ၊ ပိုးမွှားတွေဟာ အရေပြားယားယံခြင်း ၊ အလက်ဂျစ်ထခြင်း ၊ အင်ပြင်ထွက်ခြင်း များဖြစ်စေနိုင်ပါတယ် ။
မမြင်နိုင်သော သေးငယ်လွန်းတဲ့ ပိုးမွှားတွေက မိမိခန္ဓာကိုယ်ထဲသို့ဝင်ရောက်ဒုက္ခမပေးနိုင်သည့်တိုင် အိပ်ရာခင်း ၊ စောင် ၊ ခေါင်းအုံးစွပ် စသည်တို့တွင် တွယ်ကပ်ကာ ပွားများလာပြီး ထောင်ချီ ၊သောင်းချီအထိ ပွားကာ ကပ်တွယ်နေနိုင်ပါတယ် ။
မိမိရဲ့ ချွေး ၊ ခေါင်းမှထွက်သောအဆီ ၊ ခြေဆီလက်ဆီ ၊ သွားရည် စသည်တို့သည်လည်း ဘတ်တီးရီးယားပေါက်ပွားစေနိုင်သော ကြားခံများဖြစ်ပါတယ် ။ ဒါ့အပြင် အထက်ပါအရာတို့သည် အနံ့ဆိုးကိုလည်း ဖြစ်စေပါတယ် ။
မိမိသည် အလက်ဂျစ်ရှိသူ ၊ ပန်းနာရင်ကြပ်ရှိသူဆိုလျှင် ရောဂါလက္ခဏာများကို ပိုမိုဆိုးရွားလာစေပါတယ် ။
ဒါကြောင့် မိမိရဲ့ အိပ်ရာနှင့် အိပ်ရာအခင်းအကျင်းကို သန့်ရှင်းအောင် ထားပြီး အချိန်မှန်လျှော်ဖွပ် လဲကျင်းပေးသင့်ပါတယ် ။
🤔လဲတာတော့ဟုတ်ပါပြီ....ဘယ်လောက်တစ်ခါလဲပေးရမှာလဲ ?
အိပ်ရာခင်းများကို တစ်ပတ်တစ်ခါလဲပေးသင့်ပါတယ် ။ အထူးသဖြင့် နွေရာသီ တွင် ချွေးထွက်ပိုများသည့်အတွက် မကြာခဏ လဲသည့် အလေ့အကျင့်ကို လုပ်ဆောင်သင့်ပါတယ် ။ အိမ်မွေးတိရစ္ဆာန်လေးများနှင့် မိမိအိပ်ရာပေါ်တွင် အတူ အိပ်တယ်ဆိုပါကလည်း မကြာခဏ အိပ်ရာခင်းလဲပေးဖို့သင့်ပါတယ်။
အကြမ်းဖြင်းအားဖြင့်.....
အိပ်ရာခင်း - (၁)ပတ် သို့ (၂)ပတ် တစ်ခါလဲခြင်း
ခေါင်းအုံးစွပ် - (၁)ပတ် တစ်ခါ လဲခြင်း
စောင်အစွပ် - (၂)ပတ် သို့ (၁)လ တစ်ခါ လဲခြင်း
စောင် - (၂)လ သို့ (၃)လ တစ်ခါ လဲခြင်း
ခေါင်းအုံး - (၄)လ သို့ (၆)လ တစ်ခါလဲခြင်း
အကယ်၍ အချိန်မပေးနိုင်ပါက အိပ်ရာခင်းနှင့် အစွပ်များကို တစ်လတစ်ခါတော့ ပုံမှန်လဲပေးရန် ကြိုးစားသင့်ပါတယ် ။
မွေ့ရာကို (၆)လတစ်ခါ သန့်ရှင်းပေးခြင်း ၊ ဖုန်ခါပေးခြင်း ၊ နေပူပြပေးခြင်းမျိုး ပြုလုပ်ပေးနိုင်ပါတယ် ။ (၆)နှစ် သို့ (၈)နှစ် ကြာပြီဆိုလျှင်တော့ မွေ့ရာအသစ်ကို အစားထိုးအသုံးပြုပေးပါ ။
အိပ်ရာခင်းနှင့်အစွပ်များကို လျှော်ဖွပ်သည့်အခါတွင်လည်း ကော်တွန်ဆိုလျှင်ရိုးရိုးရေ ၊ polyester ဆိုလျှင် ရေနွေး စသည်ဖြင့် အညွှန်းတွင် ပါသည့်အတိုင်း လျှော်ဖွပ်ပေးသည့်ပါတယ် ။ Softener, ဆပ်ပြာရည် အပျော့ စသည်ဖြင့် လျှော်ပြီးလျှင်လည်း ဆပ်ပြာစင်စေရန် ရေဖြင့်တစ်ခါ စိမ်ထားပေးပါ ။ လျှော်ဖွပ် ပြီးစီးပါက သေချာခြောက်သွေ့ရန် နေလှန်းပြီးမှ သိမ်းဆည်းပါ ။ ဆပ်ပြာရည်ကျန်ခြင်း ၊ အစိုဓာတ်ကျန်နေခြင်းတို့သည် မှိုစွဲခြင်း ၊ဖားဥစွဲခြင်း တို့ဖြစ်စေနိုင်ပါတယ် ။
မိမိရဲ့အိပ်စက်ရာနေရာနှင့်အခင်းအကျင်းကို သန့်သန့်ရှင်းရှင်းထားခြင်းသည် ကျန်းမာရေးအတွက်လည်း အထောက်အပံ့ဖြစ်စေပြီး ၊ သာယာညိမ့်ညောင်းစွာ အိပ်စက်ခြင်းကိုလည်း ပေးစွမ်းပါတယ် ။ ဒါကြောင့် စာဖတ်ပရိသတ်တို့ လိုက်နာကျင့်သုံးစေနိုင်ရန် ဗဟုသုတရဖွယ် ဖော်ပြပေးလိုက်ပါတယ် ။💛
----------------------------------
ကျန်းမာသောလူနေမှုဘဝအတွက် မဖြစ်မနေလိုအပ်မည့် အသိပညာဗဟုသုတများကို မျှဝေပေးနိုင်ရန် ရည်ရွယ်၍ Ziwa Vita (ဇီဝဗီတ) ကိုဆရာဝန်လူငယ်များနှင့်ပညာရှင်အချို့ ပူးပေါင်းတည်ထောင်ခဲ့ပါသည်။ Ziwa Vita (ဇီဝဗီတ) မှတင်ဆက်ပြီးသော ကျန်းမာရေးဆောင်းပါးများနှင့် အသစ်အသစ်သော ဆောင်းပါးများကို https://ziwa-vita.com တွင်ဝင်ရောက်လေ့လာဖတ်ရှူနိုင်ပါသည်။
▶️Like and follow us on Facebook & Instagram.
Facebook link- https://www.facebook.com/ziwavita/
Instagram link- https://www.instagram.com/ziwavita/
