26/10/2025
"ဟျောင့် မင်းမှာ Kpay ရှိလား"
ဒါဆိုရင် မိတ်ဆွေ၊ အပေါင်းအသင်းအချင်းချင်းကြားမှာ ကြောက်နေရတဲ့ အခြေအနေ ဖြစ်နေပါပြီ။
ဘာကြောင့်လဲဆိုရင် ဒီလို တစ်စုံတစ်ယောက်က မေးလာပြီ ဆိုရင် စလော့ဂိမ်းဆော့သူ တစ်ယောက်က ငွေစချေးတော့မယ် ဆိုတာပါပဲ။
မြန်မာပြည်မှာ မြို့ကော တောပါ မကျန် ဝါးမြိုနေတဲ့ အရာက စလော့ဂိမ်းခေါ် ငါးပစ်ဂိမ်းလို့ လူသိများတဲ့ အရာပါ။
တခါက နယ်ဘက်ရောက်တော့ စိုက်ခင်းတွေအတွင်း အလုပ်သမားတွေ ခဏနားနေကြတုန်း စွဲစွဲလမ်းလမ်းဆော့နေကြတာက စလော့ဂိမ်းတွေပါ။
အင်တာနတ်ပိတ်ဆို့ခံရမှု၊ လူမှုကွန်ယက်တွေ အသုံးပြုရင် အဖမ်းခံရတယ် ဆိုတဲ့ အချက်နဲ့ လူငယ်များစွာဟာ ဘေးကင်းရာ စလော့ဂိမ်းတွေထဲ ရောက်လာကြပါတယ်။
စဆော့တုန်းကတော့ အပန်းပြေ ဆိုပြီး အပျော်ဆော့ကြတာပါ။ ကနဦး ဂိမ်းစဖွင့်လိုက်ရင် Tip Money တချို့ အခမဲ့ စပေးပါတယ်။
တချို့က တစ်ထောင်ကျပ်ကနေ (၅၀၀၀)ကျပ်အတွင်း ရကြသလို အပေါင်းအသင်း မိတ်ဆွေကို ဖိတ်ခေါ်ပေးရင်လည်း သတ်မှတ်လက်ဆောင် ရပါတယ်။
အပျော်ဆော့ပေမယ့် ဂိမ်းကတော့ အပျော်ဆော့ ဖန်တီးပေးထားတာ မဟုက်တော့ (၁၀)ကြိမ်မှာ တစ်ကြိမ် ကောက်စားရင်း ငွေတွေ ပြန်သယ်သွားမှာပါ။
ဒီလို အချိန်မှာ လူတွေ မခံချိမခံသာ ဖြစ်လာချိန်မှာ အလွယ်တကူ ငွေဖြည့်သွင်းနိုင်တဲ့ စနစ်ကို ဖန်တီးပေးထားပါတယ်။
ဒါကတော့ K-pay နဲ့ Wave ပါပဲ။
အွန်လိုင်း လောင်းကစားဂိမ်း(၉၀) ရာခိုင်နှုန်းဟာ Kpay နဲ့ Wave တို့ကနေ တဆင့် ငွေကြေးစီးဆင်းနေကြတာပါ။
ငွေဖြည့်တာကလည်း သိပ်မခတ်ပါဘူး။
သူတို့ သတ်မှတ်ထားတဲ့ အကောင့်ထဲ ငွေထည့်ရင် ကုပ်ကျလာမယ်။
အဲကုပ်ကို ဂိမ်းအတွင်း ဖြည့်လိုက်တာနဲ့ အော်တို ဂိမ်းငွေကြေး ရသွားမယ်။
ရိုးရှင်းပြီး လှည့်စားတာ မပါသလောက် ဖြစ်တဲ့ စလော့ဂိမ်းတွေရဲ့ အဓိက လှည့်စားချက်က ဂိမ်းကစားချိန်မှာပဲ ဖြစ်ပါတယ်။
ဂိမ်းဆော့တဲ့ သူတွေဆီက အများဆုံးကြားရတဲ့ အသံက ငွေသိန်းချီ ပြန်ရတယ် ဆိုတာပါပဲ။
မေးမြန်းဖူးတဲ့ လူငယ်တစ်ဦးကတော့ သူဟာ ဂိမ်းကနေ ငွေသိန်းကဏန်း ပြန်ထုက်ယူဖူးကြောင်း ပြောပြဖူးပါတယ်။
သို့သော် ပါးနီကနေ ရတဲ့ ငွေဟာ ပါးနီထဲကိုပဲ ပြန်စီးဆင်းသွားပါတယ်။
ငွေတွေ သိန်းဆယ်ချီ ရကြတယ် လို့ ဆိုတဲ့ သတင်းတွေ ကြားရပေမယ့် အဲလူတွေအများစုဟာ ပြန်ကုန်သွားတာ များပါတယ်။
တချို့ ဂိမ်းဆော့သူတွေဟာ ဂိမ်းက ရတဲ့ ငွေတွေနဲ့ ဆိုင်ကယ်ဝယ်၊ ရွှေဝယ်နိုင်တဲ့ အထိ ရှိတယ် လို့ ဆိုကြပေမယ့် အများစုဟာ နောက်ဆုံးအကြိမ်ပဲ ဆိုပြီး အရှုံးနဲ့ ခံကြရတာ များပါတယ်။
ဒီလိုနဲ့ အချိန်မရွှေး စလော့ဂိမ်း ဆော့သူတွေ ဖြစ်လာကြပြီး ဆင်းရဲ ချမ်းသာမရွှေး တွေ့သူကို "Kpay ရှိလား" မေးတက်ကြတာပဲ။
ကျွန်တော် အသိတစ်ဦးဆိုရင် ငွေကြေး အတိုင်းအတာ တခုထိ ရှိသလို မိဘကလည်း ငွေပေးနိုင်တဲ့ သူပါ။
သို့ပေမယ့် စလော့ဂိမ်းဆော့ပြီးနောက်ပိုင်း အချိန်ပြည့် ငွေတောင်းချေးသူ ဖြစ်လာတယ်။
အမြဲမေးလေ့ ရှိတာက Kpay ရှိလား ဆိုတာပါပဲ။
ဆိုတော့ အပေါင်းအသင်း မိတ်ဆွေတွေက ကနဦးခင်မင်ရင်းနှီးမှုနဲ့ ပေးကြရာကနေ နောက်ဆုံး မိတ်ပျက်တဲ့ အထိ ဖြစ်လာတယ်။
အသိမိတ်ဆွေတစ်ဦးရဲ့ ဆွေမျိုးဆိုရင် စလော့ဂိမ်းကြောင့် ရှိတာ ပေါင်၊ ရောင်းချတဲ့ သူ ဖြစ်လာတယ်။
နောက်ဆုံး သူ့မှာ ဘာမှ မရှိ မိတ်ဆွေတွေရဲ့ ပစ္စည်းတွေကို ပေါင်တဲ့ သူ ဖြစ်လာတယ်။
နောက်ဆုံး ခိုးပြီး ရောင်းချကာ စလော့ဂိမ်း ဆော့တဲ့ သူ ဖြစ်လာတယ်။
ပြောရရင် ကျေးလတ် နဲ့ နယ်ဘက်ဒေသတွေမှာ ခိုးမှုတွေ များလာတာဟာ မူးယစ်ဆေးဝါး ကြောင့် မဟုက်ပဲ "စလော့ဂိမ်း" ဆော့ကြတာကြောင့်ပါ။
မြန်မာမှာ လူငယ်တွေဟာ အမျိုးအစားလိုက် ကွဲပြားပါတယ်။ မူးယစ်ဆေးဝါး သုံးသူ အများစုက အထက်တန်းလွှာ နဲ့ လူလတ်တန်းစားတွေပါ။
သူတို့ဟာ ခိုးတဲ့ ဓလေ့ကို သိပ်ကျင့်သုံးလေ့ မရှိပါဘူး။
စလော့ဂိမ်း လို့ ခေါ်တဲ့ ငါးပစ်ဂိမ်းဆော့တဲ့ သူတွေကတော့ ရှိတာ အကုန်ချရောင်းတဲ့ လူတန်းစားပါ။
ကြာလာရင် ဘေးမှာ မိတ်ဆွေ အပေါင်းအသင်း၊ ဇနီး၊မယားဆိုတာတောင် မရှိတော့တဲ့ အထိ စွဲမတ်နေကြတာပါ။
အခုနောက်ပိုင်း စလော့ဂိမ်းကြောင့် ငွေသိန်းထောင်ချီ ရှုံးပြီး ဘဝပျက်နေကြတဲ့ လူတန်းစားတွေ တွေ့လာရတယ်။
တချို့ကြတော့ မိသားစုလိုက် ထွက်ပြေးကြရတဲ့ အထိ ဖြစ်လာတယ်။
အဆိုးဆုံးက ခိုးတာ ရှက်စရာ လို့ မထင်တော့ပဲ ပေါ်တင်ခိုးယူလာကြတာပါ။
ပြီးခဲ့တဲ့ လတွေတုန်းက ရန်ကုန် လူငယ်လင်မယားနှစ်ဦးဟာ ဖုန်းဆိုင်ကနေ ဖုန်းအလှစ်သုက်ကြတာကလည်း စလော့ဂိမ်းဆိုးကျိုးပါ။
လွန်ခဲ့တဲ့ နှစ်တွေတုန်းက စလော့ဂိမ်းကို မိတ်ဆွေတချို့ မိတ်ဆက်ပေးမှု စမ်းဆော့ဖြစ်ပါသေးတယ်။
အပျော်ဆိုရာကနေ ငွေလေး (၅၀၀၀)ထည့်လိုက် ဆော့လိုက် လုပ်ရာကနေ တတိတိ ပါနေတာ သိရလို့ တခါတည်း ဖုန်းထဲကနေပါ ဖျက်ချလိုက်ရတယ်။
ပြောရရင် စလော့ဂိမ်းတွေဟာ နောက်ကွယ်ကနေ တတိတိ လူငယ်တွေနဲ့ လူတန်းစားအလွှာတွေကို ဝါးမြိုနေတဲ့ အရာ ဖြစ်လာပါပြီ။
အခုချိန်ထိ ဖြေရှင်းနိုင်စွမ်းလည်း မရှိကြသလို ဖမ်းဆီး အရေးယူနေတာတွေလည်း မရှိသလောက်နီးပါးပါပဲ။
အွန်လိုင်းဂိမ်းတွေဟာလည်း ကျားဖြန့်လိုပဲ ဒေတာစင်တာအနည်းငယ်နဲ့ အင်တာနတ် ကောင်းကောင်းရှိရင် ရပါပြီ။
အားလုံးကို Software ကနေတဆင့် လုပ်တာ ဖြစ်ပြီး ပိုင်ရှင်က (၇၀)ရရင် ထိုးသားက (၃၀)ပြန်ရတဲ့ ရလာဒ်နဲ့ ဂိမ်းကို ဖန်တီးထားပါတယ်။
တချို့အဆိုအရတော့ မြန်မာပြည်မှာ ဒိုင်က (၉၀)၊ ထိုးသားက (၁၀)ပဲ ပြန်ရတယ်။လို့ ဆိုတယ်။
ပြောရရင် ထိုးသားသာ ငွေ(၁၀၀)ထည့်ထိုးလိုက်ရင် သူ့ဆီမှာ (၁၀)ပဲ ကျန်ရမယ့် အကွက် ဖြစ်ပါတယ်။
လူငယ်တွေဟာ လွက်လပ်ခွင့်လည်း မရှိ၊ လုံခြုံမှုလည်း မရှိ၊ ဘယ်မှ သွားခွင့် လာခွင့် မရတဲ့အပြင် Social media တွေလည်း အပိတ်ခံထားရတဲ့အခါ အွန်လိုင်းဂိမ်းတွေ ကြီးစိုးလာခဲ့တာပါ။
ဒီလို စလော့ဂိမ်းတွေကို နိုင်ငံတဝှမ်း လူငယ်၊ လူရွယ် သန်းနဲချီ ဆော့နေကြတယ်။
လူတန်းစားမရွေး၊ အကြီးအငယ် မရွှေး ဆော့ကြတဲ့ ဒီအွန်လိုင်းဂိမ်းတွေကြောင့် ဘဝပျက်သူတွေ၊ မိသားစုလိုက် ဒုက္ခရောက်နေသူတွေ အများကြီး ရှိနေပါပြီ။
သို့သော် ဖမ်းဆီး အရေးယူနိုင်စွမ်း ကင်းမဲ့နေသလို ပိုင်ရှင်တွေဟာလည်း ကျားဖြန့်လိုပဲ နယ်စပ်တွေ၊ တခြားနိုင်ငံတွေမှာ အခြေတည် နေထိုင်ကြပါတယ်။
အများစုဟာ ပြည်တွင်းမှာ အေဂျင့်ဆိုသူတွေကို ရာခိုင်နှုန်းး တချို့နဲ့ ငွေကြေးလဲလှယ်တာ ဝန်ဆောင်မှု ပေးခိုင်းပါတယ်။
စလော့ဂိမ်းအေဂျင့်တွေဟာ တစ်မြို့ တစ်ယောက်နှုန်းတောင် မဟုက်တော့ နယ်မြို့မှာတောင် ရပ်ကွက်အလိုက် အေ့ဂျင့် ရှိနေတဲ့ အထိ များပါတယ်။
သူတို့ဟာ ငွေထုတ်တာ၊ ငွေသွင်းတာ တာဝန်ယူပေးပြီး ဒိုင်ချုပ်တွေဆီ ငွေပေးကြရပါတယ်။
ဒီလို ငွေကြေးတွေဟာ ဘယ်လို စီးဆင်းနေလဲ ဆိုတာ မသိရပေမယ့် အများစုဟာ ကျားဖြန့်လိုပဲ ခရစ်ပတိုကနေတဆင့် ပြည်ပကို စီးဆင်းသွားပုံပါ။
တချို့ကလည်း အိမ်ခြံမြေ၊ ရွှေနဲ့ ငွေကြေးလဲလှယ်မှုတွေကနေတဆင့် စီးဆင်း ခြေရာဖျောက်ကြတာ တွေ့ရပါတယ်။
မြန်မာနိုင်ငံမှာ စလော့ဂိမ်းလို့ ခေါ်တဲ့ ငါးပစ်ဂိမ်းတွေရဲ့ နေ့စဉ် ငွေကြေးစီးဆင်းနေမှုဟာ ကျပ်သိန်း သောင်းကဏန်းအထက် ရှိနေနိုင်ပါတယ်။
အများစုဟာ ပြည်တွင်း ဘဏ်တွေရဲ့ အွန်လိုင်းငွေကြေးစနစ်ကိုပဲ ပေါ်ပေါ်ထင်ထင် သုံးပြီး ငွေကြေးစီးဆင်းစေတာပါ။
သို့သော် အာဏာသိမ်းပြီးချိန်ကစလို့ ယနေ့အထိ စလော့ဂိမ်းတွေကြောင့် ဘဝပျက်သူတွေ၊ ဒုက္ခရောက်သူတွေ အများကြီး ရှိနေကြပါပြီ။
သူတို့ အတွက် သင်ခန်းစာယူစရာ ဖြစ်သလို နိုင်ငံအတွက် လူညွန့်တုံးစေမယ့် ဒီလို စလော့ဂိမ်းတွေကို ရှင်းလင်းဖို့ အသိပညာပေး အစီအစဉ် လိုပါတယ်။
အွန်လိုင်းလောင်းကစားတွေကို ကြေညာပေးတာမျိုးကိုလည်း ဆန့်ကျင်ဖို့နဲ့ ငါးပစ်ဂိမ်း၊ စလော့ဂိမ်းတွေရဲ့ ဆိုးကျိုးကို ဖော်ပြနိုင်ဖို့ အသိပေးနိုင်ဖို့ လိုပါတယ်။
စစ်ကောင်စီကတော့ သူတို့ အကျိုးစီးပွားမထိခိုက်သေးသရွှေ့ လွက်ပေးထားအုန်းမှာ ဖြစ်သလို လူငယ်တွေ ဘဝပျက် ဂိမ်းထဲမှာ နစ်မျောနေတာကို သူတို့ သဘောကျတဲ့ အခြေအနေ ဖြစ်ပါတယ်။
လူငယ်တွေ နိုင်ငံရေး စိတ်မဝင်စားရင် ပြီးရော ဆိုတဲ့ အချက်ကို စစ်ကောင်စီဟာ လောင်းကစားလုပ်ငန်းတွေ ပိုကျယ်ပြန့် တိုးပွားလာစေခဲ့တယ်။
စစ်ကောင်စီဟာ PDF game ဆော့ရင် အရေးယူမယ် လို့ ဆိုနေပေမယ့် လူတွေရဲ့ ဘဝပေါင်းများစွာ၊ မိသားစုတွေ အတိဒုက္ခရောက်စေတဲ့ စလော့ဂိမ်းတွေကို အရေးယူဖို့ လုပ်ဆောင်တာ ရှိမနေပါဘူး။
ဆိုတော့ အခုချိန်ထိ စလော့ဂိမ်းတွေဟာ မြို့ပြကနေ ကျေးလတ်ထိပါ မကျန် ဖြန့်ကျက်တိုးပွားနေဆဲပါပဲ။
လက်ရှိ မြန်မာပြည်ရဲ့ ဝင်ငွေအကောင်းဆုံး စီးပွားရေးဆိုရင်လည်း မမှားတဲ့ ကိစ္စပါ။
ပြီးတော့ ကျားဖြန့် နဲ့ စလော့ဂိမ်းက တူပေမယ့် ပုံစံချင်း မတူကြပါဘူး။
ဆိုတော့ ခင်များကို ဂိမ်းလေးတခုနဲ့ မိတ်ဆက်ပေးမယ် လို့ ဆိုလာရင် သတိထားပါ။
ဒါဟာ သင့်ဘဝကို ချိုးဖြတ်တော့မယ့် ဒုက္ခပေးတော့မယ့် အရာ ဖြစ်ပါတယ်။
ဘာကြောင့်ဆို နောက်ပိုင်း မင်းဟာ Kpay ရှိလား ဆိုတဲ့ စကားလုံးကို သုံးသူ ဖြစ်လာတော့မှာမို့ပါ။
စလော့ဂိမ်းတွေကို ရှောင်ပါ။
မိသားစုကို အချိန်ပေးပါ။
