02/09/2025
“စိတ်ကောင်းနှလုံးကောင်းဟာ ပျိုးထောင်လို့ရတယ်”
🔳 အလုပ်လုပ်တဲ့အခါမှာ စိတ်စေတနာက သိပ်အရေးကြီးပါတယ်။ အမျိုးမျိုးသော အပြိုင်အဆိုင်တွေကြား ခေါင်းတစ်လုံး သာစေမှာလည်း အဲဒါပါပဲ။
အများစုက စီးပွားရေး မဟာဗျူဟာတို့၊ စီမံခန့်ခွဲမှုတို့၊ ဘယ်လိုအရောင်းတက်အောင် လုပ်မလဲတို့ဆို သိပ်စိတ်ဝင်စားကြတယ်။ ဒါတွေလည်း မလိုဘူး မဟုတ်ဘူး။ လိုပါတယ်။ စေတနာသက်သက်နဲ့က ဘာမှမှ လုပ်လို့မရတာ။
သို့သော် အဲဒါတွေ တူနေတဲ့အခါမှာတော့ စေတနာပါတဲ့သူက တပန်းသာသွားတာပဲ။
🔳 ကိုယ်တိုင်လည်း Customer အနေနဲ့ ပစ္စည်းဝယ်ဖူးမယ်။ ဝန်ဆောင်မှု ယူဖူးမယ်။ တချို့တွေ စေတနာ သိပ်ပါတယ်။ ဘယ်လိုခံစားရလဲ စဉ်းစားကြည့်။ ရင်ထဲမှာ မမေ့ဘူးနော်။ သူများတွေကိုပါ အလိုလို ပြန်ညွှန်းပေးချင်လာတာ။
အားလုံးလည်း သိကြမယ်။ လူတွေမှာ Expectation ဆိုတဲ့ မျှော်မှန်းချက် ရှိတယ်။ ကိုယ် ဒါကို ဝယ်ရင်၊ ဒီနေရာကို သွားရင် ဒီလောက်တော့ ရမှာပဲ၊ ဒီလိုတော့ ဆက်ဆံခံရမှာပဲ ဆိုပြီး စိတ်မှာ မှန်းထားတာ။
အဲဒီလောက် မရဘူးဆို စိတ်မကျေနပ်ဘူး။ အဲဒီအတိုင်း ဖြစ်တယ်ဆို ကျေနပ်တယ်။ အဲဒါထက် ပိုသာလွန်ရင်တော့ နှစ်သက်မှု ဖြစ်လာတယ်။ ဒါမှဒါပဲ ဆိုတဲ့ Loyal customer ဖြစ်လာတယ်။
အဲဒီလို သာလွန်တဲ့ အတွေ့အကြုံကို ပေးစွမ်းနိုင်တဲ့ အရာကတော့ "စိတ်စေတနာ" ပဲ ဖြစ်ပါတယ်။
🔳 အဲဒီစေတနာကလည်း အကြီးကြီးတွေမှာ မြင်ရတာ မဟုတ်ဘူး။ သေးသေးကလေးတွေမှာ ပိုသိသာတာ။ ကြိုတင်စီစဉ်ထားတဲ့ ပွဲတွေထက် လျှပ်တပြက် ဖြစ်လာတဲ့ ကိစ္စရပ်တွေမှာ စေတနာ ပါမပါက ပိုပေါ်လွင်သွားတာ။
ဒီဆိုင်မှာ ဒီအစားအသောက် ရောင်းတယ်။ ဘယ်လိုပဲ ကျွန်တော် ကျွန်မတို့ဆိုင်က စားသုံးသူကို အလေးထားပါတယ် ပြောပြော၊ သေးသေးလေးတွေကို လိုက်ကြည့်။ လာစားတဲ့သူတွေကို ဘယ်လောက် စေတနာထားတယ် မထားဘူး သိနိုင်လိမ့်မယ်။ သူတို့နေရာကနေ ဘယ်လောက် ထည့်တွေးပေးသလဲ၊ သူတို့ အဆင်ပြေအောင် ဘယ်လိုလုပ်ပေးထားသလဲ၊ ဒါတွေက စေတနာကို ပြနေတာ။
ကားငှားစီးတယ်။ သွားချင်တဲ့နေရာ တန်းတန်းမတ်မတ် ရောက်သွားတယ်ဆို မသိသာဘူး။ အိမ်ရှာမတွေ့တာတို့၊ ဟိုဘက်လမ်း ဒီဘက်လမ်း မှားတာတို့ ဖြစ်လာရင်တော့ မောင်းတဲ့သူရဲ့ စေတနာကို မြင်ရတော့မယ်။
🔳 တစ်ခါလည်း ရေးဖူးတယ်။ ကော်ဖီဆိုင်ထိုင်လို့ နှာစေးနေတော့ ဆိုင်ရှင်အစ်မကြီးက နှာစေးပျောက်ဆေး လာပေးတယ် ဆိုတာလေ။ ခုလို ခဏခဏ ထည့်ရေးနေကတည်းကိုက ကျွန်တော့်စိတ်ထဲ မှတ်မှတ်ရရ ဖြစ်နေတာ ပေါ်လွင်တယ်။
ပုံမှန်အချိန်ဆို ဘယ်သိနိုင်မလဲ။ ကျွန်တော် နှာစေးတာလည်း ဒီဆိုင်တစ်ဆိုင်တည်း မဟုတ်ဘူး။ သို့သော် တခုတ်တရနဲ့ ဂရုစိုက်ပေးတာတော့ သူပဲ ရှိတယ်။
ဒါကြောင့်မို့လည်း Customer service မှာ ပြောကြတာ။ သင်လို့မရဘူးတဲ့။ It is not a skill, it is an attitude တဲ့။
🔳 နည်းစနစ်တွေ၊ လုပ်ဆောင်သင့်တာတွေ၊ မမြင်သေးတဲ့ ရှုထောင့်ကနေ မြင်တတ်လာဖို့တွေတော့ သင်ပေးလို့ ရတာပေါ့။ သို့သော် သင်တိုင်းမရဘူး။ အတွင်းထဲမှာ စေတနာအခံလေး ပါမှ။ ဒီလိုဆိုလိုတာ။
စေတနာအခံလေး ပါနေရင်လည်း တော်ရုံတန်ရုံက အရမ်းသင်စရာ မလိုဘူး။ သူ့ဟာသူလေး အဆင်ပြေနေရော။ နည်းနည်းမွမ်းမံပေးလိုက်ရင် ရပြီ။ မမြင်သေးတာ မြင်တတ်အောင် ပြောပြလိုက်ရင် ရပြီ။ စေတနာ မပါတဲ့သူကျတော့လည်း ဘယ်လိုသင်သင် မြင်ကိုမမြင်တာ။
ဒါကြောင့် စိတ်ကောင်းနှလုံးကောင်း ရှိခြင်းဟာ အောင်မြင်ခြင်းရဲ့ အကြောင်းတရားတစ်ခုပဲလို့ ခံယူထားတယ်။ ဘာလုပ်လုပ် စေတနာလေးထား။ တစ်ဖက်လူက ခံစားမိတယ်။ အဲဒီအပင်က အသီးမသီးဘဲ မနေဘူး။ သီးကိုသီးတယ်။
🔳 ထုံးစံအတိုင်း ငြင်းကြခုန်ကြရရင်၊ စိတ်ကောင်းနှလုံးကောင်း ဆိုတာကရော မွေးရာပါလား၊ ပျိုးထောင်လို့ ရလားပေါ့။ တကယ်တော့ အဲဒီမေးခွန်းက အတော်လေး ဒိတ်အောက်နေပါပြီ။ Debate ခေါင်းစဉ်တစ်ခုလိုပဲ ဖြစ်နေပြီ။ နှစ်ခုစလုံးက သူ့နည်းသူ့ဟန်နဲ့သူ အရေးပါတယ် ဆိုတာ ငြင်းစရာကိစ္စ မဟုတ်တော့ဘူး။
ပင်ကိုယ်ဗီဇ ကောင်းပေမဲ့ ပျိုးထောင်ပုံ မမှန်လည်း အဆင်မပြေဘူး။ ပင်ကိုယ်ဗီဇ မကောင်းလည်း ပျိုးထောင်ပုံမှန်ရင် အဆင်ပြေသွားတတ်တယ်။ ဟိုဘက်ဒီဘက် အစွန်းတွေတော့ ရှိတာပေါ့လေ။ ဥပမာ ဆိုးရွားတဲ့ ငယ်ဘ၀ ရှိခဲ့ပေမဲ့ သူ့ဗီဇလေးကိုက ကောင်းနေတဲ့အတွက် လူဆိုးဖြစ်မလာတာမျိုး၊ ပုံမှန်မိဘအုပ်ထိန်းမှုနဲ့ပဲ ကြီးပြင်းလာကြပေမဲ့ ဒီတစ်ယောက်ကျမှ မကောင်းနေတာမျိုး။ ဒါပေမဲ့ ရှားပါတယ်။
အခု စိတ်ကောင်းနှလုံးကောင်းမှာလည်း ဒီလိုပဲ။ တချို့က ပင်ကိုယ်ဗီဇအရကို စိတ်ထားကောင်းတာ။ စေတနာပါတာ။ ဒါက ကိုယ့်လက်ထဲ ရှိတဲ့ကိစ္စ မဟုတ်ဘူး။ ရွေးလို့ရခဲ့တာလည်း မဟုတ်ဘူး။
🔳 ကိုယ်လုပ်လို့ရတာက ပျိုးထောင်တဲ့ကိစ္စ။
ရသစာပေဖတ်တာ၊ ရုပ်ရှင်ကြည့်တာ၊ ဘာသာရေး အဆုံးအမတွေ နာယူတာ၊ အနုပညာတစ်ခုခုကို ခံစားတာ၊ ကြင်နာတတ်တဲ့သူတွေနဲ့ များများထိတွေ့တာ စတဲ့ နည်းတွေကတော့ စိတ်ကောင်းနှလုံးကောင်း ရှိလာစေနိုင်တဲ့ အကြောင်းတရားတွေပေါ့။
ဦးနှောက်ထက် နှလုံးသားနဲ့ ပိုဆိုင်တဲ့ကိစ္စမို့ အဲဒီထဲအထိ ထိုးဖောက်ဝင်ရောက်သွားနိုင်တဲ့ အရာတွေလိုတယ်။ ရသ၊ ဘာသာတရား၊ ကိုယ်တိုင်အတွေ့အကြုံ၊ ဒီ ၃ ခုကတော့ အထိရောက်ဆုံးလို့ မြင်ပါတယ်။
🔳 YouTube မှာ ရိုက်ရှာကြည့်လိုက်။ ကြင်နာမှုနဲ့ ပတ်သက်ပြီး စိတ်ကို နူးညံ့သွားစေမယ့် ဗီဒီယိုအတိုလေးတွေ အများကြီးရှိတယ်။ Random Act of Kindness လို့ ခေါ်တာပေါ့။ အလှူကြီးပေး၊ မီဒီယာတွေခေါ်၊ ကလေးတွေကို ကြင်နာပြ၊ ဒီလိုမဟုတ်ဘူး။ သွားရင်းလာရင်း အမှတ်မထင် ပြသသွားတဲ့ ကြင်နာမှုတွေကို ဆိုလိုတာ။ ကြိုတင်စီစဉ်ထားတာ မဟုတ်တဲ့အတွက် ရင်ထဲမှာ အကြင်နာတရား ရှိမနေရင် လုပ်လို့မရနိုင်တဲ့၊ လုပ်ရကောင်းမှန်းတောင် မသိတဲ့အရာတွေပေါ့။
အဲဒါလေးတွေ ကျွန်တော်ဆို မကြာမကြာ ကြည့်ဖြစ်တယ်။ ကိုယ်ပါ လိုက်လုပ်ပေးချင်စိတ် ဖြစ်လာတယ်။ နှလုံးသားတွေ နူးညံ့လာတယ်။ ဘယ်သူ့ကို ဘယ်လိုလေး ပျော်အောင်လုပ်ပေးလိုက်ရမလဲ မြင်တတ်လာတယ်။
ဒါကြောင့်လည်း စိတ်ကောင်းနှလုံးကောင်းဟာ ပျိုးထောင်လို့ရတယ် ပြောတာပါ။
🔳 ဘာအလုပ်ပဲလုပ်လုပ်၊ စေတနာထားပြီး လုပ်ပါ။ ပြိုင်ဘက်တွေကြား ခေါင်းတစ်လုံးသာစေမယ် ပြောလို့ ငါလည်း စေတနာထားဦးမှပဲ ဆိုတာကျ အပြင်ကလာတဲ့ မက်လုံးကြောင့် လုပ်တာပါ။ ကြာကြာမခံပါဘူး။
ကိုယ့်ရင်ထဲမှာသာ စိတ်ကောင်းနှလုံးကောင်းကို မွေးမြူထားပါ။ ပျိုးထောင်ထားပါ။ ကျန်တာတွေက သူ့အလိုလို နောက်က လိုက်လာမှာ ဖြစ်ပါတယ်။
ဒေါက်တာ ဖြိုးသီဟ
၂.၉.၂၀၂၅
