23/10/2025
အောက်တိုဘာ၂၃ရက်ဟာ မြန်မာစာရေးဆရာကြီး
ဗန်းမော်တင်အောင် ကွယ်လွန်တဲ့နေ့ ဖြစ်ပါတယ်။
ဒီနေ့ဆိုရင် ကွယ်လွန်ခြင်း ၄၇နှစ်ပြည့်ခဲ့ပါပြီ။
ကွယ်လွန်ခြင်းသတိတရအဖြစ် ဆရာ့နာရေးနေ့က
ကမ်းတဲ့ ယပ်တောင်ပေါ်မှာ စတင်ဖော်ပြခဲ့ပြီးတော့
အခုထိတိုင် ထင်ရှားလူသိများတဲ့ စကားတခွန်းကိုပဲ
ထပ်ဆင့်ကာ ဖော်ပြလိုက်ချင်ပါတယ်။
ဒီစကားတွေကို ဆရာမကွယ်လွန်မီ သုံးရက်အလို
၂၀ အောက်တိုဘာ ၁၉၇၈ နေ့က သားဖြစ်သူကို
ဆေးရုံကုတင်ပေါ်မှာ ပြောခဲ့တာလို့ အမှတ်အသား
ရှိပါတယ်။
………………………………………
++“ရာစုနှစ်တခုမှာ မျိုးဆက်လေးခု ရှိတယ်။
၁၈၈၅ ခုနှစ်နောက်ပိုင်း ကိုလိုနီခေတ်က စပြီး
တို့အဘိုးတွေဟာ နယ်ချဲ့ကို တော်လှန်လာခဲ့
ကြတယ် ။ အဖေတို့ လက်ထက်ကျတော့
အမျိုးသားလွတ်မြောက်ရေးတာဝန်ကို
ထမ်းဆောင်ခြင်း ပြုခဲ့ကြတယ်။
++“သားတို့ဟာ ဒီရာစု ( ၁၈၈၅-၁၉၈၅)နှစ်ရဲ့
နောက်ဆုံးမျိုးဆက်တွေပဲ။
++“အချို့ဟာ သမိုင်းရဲ့တာဝန်တွေကို
ရဲရဲရင့်ရင့် ထမ်းဆောင်ခဲ့ကြတယ်။
အချို့ကျတော့ သမိုင်းတာဝန်ကိုမကျေပွန်ကြဘူး။
++“လူတယောက်ရဲ့ တန်ဖိုးဟာ
သူ ဖြတ်သန်းကျော်လွှားနေတဲ့ ခေတ်ကြီးက
သူ့ပခုံးပေါ် တင်ပေးလိုက်တဲ့ သမိုင်းတာဝန်ကို
သူဘယ်လောက် သယ်ပိုးထမ်းဆောင်ခဲ့တယ်ဆိုတဲ့
အချက်နဲ့ တိုင်းတာရမှာပဲ “
—ဗန်းမော်တင်အောင်
………………………………………
ဆရာဗန်းမော်တင်အောင်နဲ့ ပတ်သက်လို့ရေးကြတာ
အများကြီး ရှိတဲ့အနက် ဆရာမြသန်းတင့်က သူ့ရဲ့
‘မုန်တိုင်းထဲကလူ’ဆောင်းပါးမှာ အခုလို ရေးခဲ့တာ
ပြန်လည် ဖော်ပြလိုက်ပါရစေ။
'ကိုတင်အောင်ကား ကျနော်တို့ သိခဲ့သည့်
နှစ်ပေါင်း၃၀အတွင်းက သမိုင်းအကွေ့တိုင်းတွင်
ရေဆန်ကိုချည်း အမြဲတမ်း ကူးခဲ့သူ’ ပါတဲ့။
▪️
ဇော်ဂျီဖိုလ်ဝင်စာအုပ်တိုက်၊ ရန်ကုန်မြို့။
၂၃ အောက်တိုဘာ ၂၀၂၅။
![ဝသုန္ဓရေလက်ရေး[ နိုဝင်ဘာ ၁၉၈၉]စာအုပ်ထဲမှာ တွဲထည့်ပေးထားတဲ့အချပ်ပို စာမျက်နှာလေး တွေ့လို့အမှတ်တရ ဖော်ပြလိုက်ပါရစေ။ ▪️ဇော...](https://img3.medioq.com/207/281/1367294172072812.jpg)
![#ဆရာသင့်နော်သို့_သတိတရနဲ့[တဆင့် ကူးယူဖော်ပြခြင်း]ဆရာသင့်နော်က ထူးဆန်းတယ်။ သူ့ဥတ္တရလွင်ပြင်ကနေ စာအုပ်တအုပ်ထုတ်ချင်တဲ့အကြ...](https://img5.medioq.com/371/846/1350837613718468.jpg)
