07/08/2025
◼︎ ကမ္ဘောဒီးယားလုပ်သားတွေ အစုလိုက်အပြုံလိုက် အိမ်ပြန်သွားလို့ ထိုင်းမှာ လုပ်သားပြတ်လပ်မှု ဖြစ်ပေါ်
ထိုင်း-ကမ္ဘောဒီးယားနယ်စပ်မှာ တိုက်ပွဲတွေကြောင့် ကမ္ဘောဒီးယားရွှေ့ပြောင်းအလုပ်သမားတွေ အစုလိုက်အပြုံလိုက် နေရပ်ပြန်သွားခဲ့ရာက ထိုင်းနိုင်ငံမှာ လုပ်သားရှားပါးမှုပြဿနာကို သိသိသာသာ ရင်ဆိုင်နေရပြီဖြစ်တယ်လို့ ထိပ်တန်းစီးပွားရေးပညာရှင်တစ်ဦးက သတိပေးပြောကြားလိုက်ပါတယ်။
ထိုင်းနိုင်ငံရဲ့ အဓိကလုပ်သားအင်အားစုဖြစ်တဲ့ ကမ္ဘောဒီးယားအလုပ်သမားတွေ ရုတ်တရက်ထွက်ခွာသွားမှုဟာ ထိုင်းနိုင်ငံရဲ့ စိုက်ပျိုးရေး၊ ဆောက်လုပ်ရေး၊ အစားအသောက်ကုန်ထုတ်လုပ်ငန်းနဲ့ ဝန်ဆောင်မှုကဏ္ဍတွေမှာ ထုတ်လုပ်ရေးလုပ်ငန်းတွေကို အကြီးအကျယ်ထိခိုက်စေပါတယ်။
တရားဝင်စာရင်းအရ ကမ္ဘောဒီးယားအလုပ်သမား ငါးသိန်းခန့်ရှိပေမဲ့ တရားမဝင်အလုပ်သမားတွေအပါအဝင် စုစုပေါင်း တစ်သန်းကနေ ၁ ဒသမ ၂ သန်းအထိ ရှိနိုင်တယ်လို့ ခန့်မှန်းရပါတယ်။
၂၀၂၅ ဇူလိုင်လနှောင်းပိုင်းက နယ်စပ်တင်းမာမှုတွေ ပြင်းထန်ခဲ့တဲ့ ငါးရက်တာကာလအတွင်းမှာ ကမ္ဘောဒီးယားအလုပ်သမား လေးသိန်းနီးပါး နေရပ်ပြန်သွားခဲ့ပြီး ပထမဆုံးနေ့တစ်နေ့တည်းမှာပဲ တစ်သိန်းခွဲအထိ ထွက်ခွာသွားခဲ့ပါတယ်။
ဒီလိုဖြစ်ရတာဟာ ထိုင်းနိုင်ငံတွင်းမှာ လုံခြုံမှုမရှိတော့ဘူးဆိုတဲ့ ကောလာဟလတွေ ကျယ်ကျယ်ပြန့်ပြန့် ပျံ့နှံ့ခဲ့တာကြောင့်ဖြစ်တယ်လို့ ဆိုပါတယ်။
အလုပ်သမားသိန်းပေါင်းများစွာ ရုတ်တရက်ပျောက်ကွယ်သွားမှုကြောင့် ထိုင်းနိုင်ငံမှာ လုပ်သားအင်အားပြတ်လပ်မှုတွေ ဖြစ်ပေါ်နေပါတယ်။
အထူးသဖြင့် Chanthaburi, Trat နဲ့ Surin လို နယ်စပ်ပြည်နယ်တွေမှာ ကမ္ဘောဒီးယားအလုပ်သမားတွေဟာ လုပ်သားအင်အားစုစုပေါင်းရဲ့ ၇၀ ကနေ ၈၀ ရာခိုင်နှုန်းအထိရှိတာကြောင့် အဲဒီဒေသက စီးပွားရေးလုပ်ငန်းအများအပြားဟာ သူတို့ရဲ့လုပ်ငန်းလည်ပတ်မှုတွေကို လျှော့ချနေရပါတယ်။
ဒီအကျပ်အတည်းကိုဖြေရှင်းဖို့အတွက် လာအိုနဲ့ မြန်မာနိုင်ငံတွေကနေ အလုပ်သမားတွေ ပိုမိုတင်သွင်းဖို့ စဉ်းစားနိုင်ပေမဲ့ ကဏ္ဍအလိုက်နဲ့ ဒေသအလိုက် လုပ်သားလိုအပ်ချက်တွေ မတူညီတာကြောင့် ကမ္ဘောဒီးယားအလုပ်သမား တစ်သန်းကျော်ရဲ့နေရာကို အစားထိုးဖို့က ရေတိုမှာ အခက်အခဲတွေ ရှိနေပါတယ်။
လာအိုအလုပ်သမားတွေဟာ အရေအတွက် ကန့်သတ်ချက်ရှိပြီး အဓိကအားဖြင့် ဝန်ဆောင်မှုကဏ္ဍ လုပ်ကိုင်ကြချိန်မှာ မြန်မာအလုပ်သမားတွေကတော့ စက်မှုကဏ္ဍတွေနဲ့ အနောက်ဘက်နဲ့ မြောက်ဘက်နယ်စပ်တွေမှာ စုစည်းနေကြပါတယ်။
ဒါကြောင့် အထူးသဖြင့် အရှေ့ဘက်က စိုက်ပျိုးရေးနဲ့ အစားအသောက်ကုန်ထုတ်လုပ်ငန်းကဏ္ဍတွေမှာ ကမ္ဘောဒီးယားလုပ်သားအင်အားကို အစားထိုးတာဟာ ဒေသအလိုက်နဲ့ ရာသီအလိုက် လုပ်သားရှားပါးမှုတွေကို ဖြစ်ပေါ်စေနိုင်ပြီး အထူးသဖြင့် သီးနှံရိတ်သိမ်းချိန်တွေမှာ ပိုဆိုးနိုင်ပါတယ်။
စီးပွားရေးပညာရှင် Anusorn Tamajai က ရေရှည်မှာတော့ ထိုင်းနိုင်ငံအနေနဲ့ လုပ်သားအင်အားအပေါ် မှီခိုနေရတဲ့ ထုတ်လုပ်မှုပုံစံကနေ နည်းပညာနဲ့ အရင်းအနှီးကို ပိုမိုအားထားတဲ့ပုံစံဆီကို ပြောင်းလဲသွားဖို့က ရှောင်လွှဲလို့မရတဲ့ကိစ္စဖြစ်တယ်လို့ အကြံပြုခဲ့ပါတယ်။
ကိုးကား - Nation Thailand
