26/05/2026
❐ အရေးကြီးပြီသီချင်းကို အသက်ရှင်နေသရွေ့ ကာကွယ်သွားမည်ဟု မူရင်းအဆိုရှင် မွန်းအောင်ပြော။
မေ ၂၆၊ ၂၀၂၆။
သွေးသစ္စာ (အရေးကြီးပြီ) သီချင်းကို တပ်မတော်စစ်ချီတေးသီချင်းဟု စစ်တပ်ဝါဒဖြန့်နေခြင်းမှာ မဟုတ်မှန်ကြောင်း၊ အရေးကြီးပြီသီချင်းကို အသက်ရှင်နေသရွေ့ ကာကွယ်သွားမည်ဖြစ်ကြောင်း မူရင်းအဆိုရှင် မွန်းအောင်ကပြောသည်။
အဆိုပါ သီချင်းကို အဆိုတော် ထူးအိမ်သင်ကိုယ်တိုင် ၎င်း၏ နံဘေးတွင် ရေးစပ်သွားခဲ့ခြင်းဖြစ်ပြီး အသက်ရှိနေသမျှ ထိုအနုပညာကို ကာကွယ်သွားမည်ဟု မွန်းအောင်က လူမှုကွန်ယက်စာမျက်နှာမှတဆင့် ရေးသားထားခြင်းဖြစ်သည်။
၁၉၈၉ ခုနှစ်က ထူးအိမ်သင် တောထဲတွင် ရေးသားခဲ့ပြီး ၁၉၉၁ တွင် မွန်းအောင် သီဆိုခဲ့သည့် သွေးသစ္စာ (အရေးကြီးပြီ) သီချင်းကို စစ်တပ်က "စစ်သားသွေးနီရှေ့သို့ချီ’’ နာမည်ဖြင့် စစ်တပ်ဝါဒဖြန့် သီချင်း အဖြစ် ပြီးခဲ့သည့် မေလ (၂၄) ရက်က မြဝတီ ရုပ်သံမှတဆင့် ထုတ်လွှင့်ခဲ့သည်။
စစ်တပ်ရုပ်သံလိုင်းတွင် စီစဥ်ထုတ်လုပ်ခဲ့သည့် ဝင်းမော် (ရွှေသံစဥ်)က အဆိုပါ သီချင်းမှာ ၁၉၆၀ ခန့်က တေးရေး ဇာနည်စစ်သွေးက ရေးဖွဲ့ခဲ့ခြင်းဖြစ်ပြီး ထူးအိမ်သင်က သီချင်းစာသား တချို့ကိုယူကာ သွေးသစ္စာအဖြစ်ပြန်လည်ရေးဖွဲ့ခဲ့ခြင်းဖြစ်ကြောင်း ဝါဒဖြန့်ထားသည်။
"ကိုထူးအိမ်သင်ရေ ခင်ဗျားရဲ့အနုပညာဟာ ဘယ်လောက်ကြောက်စရာ ကောင်းပါသလဲ။ ဒီသီချင်းရဲ့ အားမာန်ကို စစ်တပ်ကတောင်မှ ယူသုံး အမြတ်ထုတ်ရပါသတဲ့" ဟု အဆိုတော်မွန်းအောင်ကတုန့်ပြန်ပြောဆိုထားသည်။
စစ်တပ်သည် လူထုကြိုက်မည့် အနုပညာကို အသစ်မဖန်တီးတတ်ဘဲ ပြည်သူများ ကြိုက်နှစ်သက်ပြီးသားသီချင်းကို ဇာတ်လမ်း အတုဆင်ကာ လှည့်စားခြင်းဖြစ်ကြောင်း၊ လွန်ခဲ့သည့် ၁၀ နှစ်လောက်ကလည်း အဆိုပါသီချင်းကိုပင် ကြံ့ဖွတ်ပါတီနှင့် စစ်တပ်က ဝါဒဖြန့်သီချင်းအဖြစ် စာသားပြင်ပြီး လုပ်ကြံဖန်တီးခဲ့ကြသေးကြောင်း မွန်းအောင်က အသိပေးသည်။
ထူးအိမ်သင်၏ လက်ရာကို ခိုးယူပြီး စိတ်ကြိုက် စာသားများ ညှပ်၊ ပြောင်းလဲပြီး အမြတ်ထုတ်သည့်အပြင် ဓါတ်ပြားဟောင်း တခုကိုပင် အတုအယောင် ဖန်တီး ပြခဲ့သေးကြောင်း အဆိုတော်ကမွန်းအောင်က ဆိုသည်။
"သမိုင်းကို ဘယ်လောက်ပဲ အတုအယောင် ဓာတ်ပြားတွေနဲ့ လိမ်ညာဖို့ ကြိုးစားပါစေ၊ အနုပညာရှင်ရဲ့ စစ်မှန်တဲ့ ဝိညာဉ်နဲ့ ကျနော့်လိုသက်ရှိထင်ရှား သမိုင်းသက်သေတွေ ရှိနေသရွေ့ အတုဟာ အစစ်ကို ဘယ်တော့မှ မကျော်နိုင်ပါဘူး"ဟု မွန်းအောင်ကဆိုသည်။
-ဟာရူမီ(စာတည်း မောင်ဘိုး)
#မွန်းအောင် #အရေးကြီးပြီ #ထူးအိမ်သင် #ကြံ့ဖွတ်ပါတီ #စစ်တပ် #ဆီသို့
-------------------------------------
Subscribe to us on;
Telegram >>> https://t.me/towardsweeklynews
SoundCloud >>> https://soundcloud.com/towards-podcast
YouTube >>> https://www.youtube.com/-Towards-Media
