06/06/2026
ကန်၏ပိတ်ဆို့မှုကြောင့် အီရန်ရေနံတင်ပို့မှု အနိမ့်ဆုံးအဆင့် ရောက်ရှိ
CNI International News
တီဟီရန်၊ ဇွန်လ ၆
အီရန်၏ ဆိပ်ကမ်းများကို အမေရိကန်ရေတပ်က ပိတ်ဆို့ထားမှုနှင့် ဟော်မုဇ်ရေလက်ကြားကို အီရန်က ပိတ်ဆို့ ထားမှုများကြောင့် မေလအတွင်း အီရန်၏ ရေနံတင်ပို့မှုသည် တစ်ရက်လျှင် ရေနံစည်ပေါင်း ၃၀၀,၀၀၀ အောက်သို့ ကျဆင်းခဲ့ပြီး ထိုပမာဏသည် ၆ နှစ်တာကာလအတွင်း အနိမ့်ဆုံးအဆင့်သို့ ရောက်ရှိခဲ့ခြင်းဖြစ်ကြောင်း The Nation မှ ဖော်ပြခဲ့သည်။
ရေနံသယ်ယူပို့ဆောင်ရေးဆိုင်ရာ အချက်အလက်များကို ဆန်းစစ်သည့် Vortexa အဖွဲ့၏ ထုတ်ပြန်ချက်အရ မေလအတွင်း အီရန်၏ ရေနံတင်ပို့မှုသည် တစ်ရက်လျှင် ရေနံစည်ပေါင်း ၂၀၉,၀၀၀ သာရှိခဲ့ပြီး မတ်လအတွင်းက တစ်ရက်လျှင် ရေနံစည်ပေါင်း ၁ ဒသမ ၉ သန်းနီးပါး၊ ဧပြီလက တစ်ရက်လျှင် ၁ ဒသမ ၃၄ သန်း ရှိခဲ့ရာမှ သိသိ သာသာ ကျဆင်းသွားခြင်း ဖြစ်သည်။
ထိုကဲ့သို့ ရေနံတင်ပို့မှုပမာဏ ထိုးဆင်းသွားခြင်းသည် အမေရိကန်သမ္မတ ဒေါ်နယ်ထရမ့် (Donald Trump) ၏ ပထမသက်တမ်းအတွင်း အီရန်အပေါ် အဆုံးစွန် ဖိအားပေးမှု မူဝါဒကို ကျင့်သုံးခဲ့သည့် ၂၀၁၉ ခုနှစ်မှ ၂၀၂၀ ပြည့် နှစ် ကာလနောက်ပိုင်း အနိမ့်ဆုံးအဆင့်ဖြစ်ကြောင်း ရိုက်တာသတင်းဌာနက ဖော်ပြခဲ့သည်။
အီရန်ဆိပ်ကမ်းများသို့ သင်္ဘောများ အဝင်/အထွက် မရှိအောင် တားဆီးရန် ရည်ရွယ်ပြီး ဧပြီလ ၁၃ ရက်တွင် အမေရိကန်က ရေတပ်ဖြင့် စတင်ပိတ်ဆို့ခဲ့ပြီးနောက် ယခုကဲ့သို့ အီရန်၏ ရေနံတင်ပို့မှု ကျဆင်းခဲ့ခြင်းဖြစ်သည်။
တစ်ချိန်တည်းမှာပင် အီရန်နိုင်ငံက ဟော်မုဇ်ရေလက်ကြားကို ပိတ်ပစ်ခဲ့ခြင်းကြောင့် ဆော်ဒီအာရေဗျ၊ ကူဝိတ်၊ အီရတ်နှင့် ယူအေအီးနိုင်ငံများမှ ရေနံတင်ပို့မှုများပါ ပြတ်တောက်သွားစေခဲ့ပြီး ကမ္ဘာ့ရေနံစျေးကွက်အတွင်း အကျပ်အတည်းများနှင့် ရင်ဆိုင်နေရသည်။
Vortexa မှ လေ့လာဆန်းစစ်သူ တစ်ဦးဖြစ်သည့် ကလဲရား ဂျန်းမန်း (Claire Jungman) က အီရန်နိုင်ငံ၏ ရေနံ တင်ပို့မှု ကျဆင်းသွားရခြင်း၏ အဓိက အကြောင်းရင်းများမှာ ဟော်မုဇ်ရေလက်ကြားတစ်ဝိုက် ပြတ်တောက်မှုများ ဖြစ်ပေါ်ခြင်း၊ အမေရိကန်ရေတပ်၏ ပိတ်ဆို့မှုများနှင့် လက်ရှိ လုံခြုံရေးအရ စိုးရိမ်ရသည့် အခြေအနေများကြောင့် သင်္ဘောပိုင်ရှင်များ၊ လုပ်ငန်းလည်ပတ်သူများ၊ အာမခံကုမ္ပဏီများနှင့် ကုန်သွယ်ဖက်များအနေဖြင့် ၎င်းတို့၏ သင်္ဘောများနှင့် သင်္ဘောသားများကို စေလွှတ်ရန် ဝန်လေးနေကြခြင်းတို့ကြောင့် ဖြစ်ကြောင်း ပြောကြားခဲ့သည်။
စွမ်းအင်ဆိုင်ရာ အချက်အလက်များကို ဆန်းစစ်သည့် Kpler အဖွဲ့၏ ထုတ်ပြန်ချက်များတွင်လည်း မေလအတွင်း အီရန်၏ ရေနံတင်ပို့မှုသည် တစ်ရက်လျှင် ရေနံစည်ပေါင်း ၂၆၀,၀၀၀ ခန့်ရှိခဲ့ပြီး ထိုပမာဏသည် Vortexa အဖွဲ့၏ စာရင်းဇယားထက် အနည်းငယ် ပိုမိုများပြားသော်လည်း ခြောက်နှစ်တာ ကာလအတွင်း အနိမ့်ဆုံး အဆင့်တွင်သာ ရှိနေဆဲ ဖြစ်သည်။
အကယ်၍ ယခုအခြေအနေသည် ရေရှည်ဖြစ်ပွားနေမည်ဆိုပါက အီရန်အနေဖြင့် ၎င်းတို့၏ အဓိက စျေးကွက် လည်းဖြစ်၊ အရေးပါသော စွမ်းအင် ဝင်ငွေရရှိရာ အရင်းအမြစ်လည်းဖြစ်သည့် တရုတ်နိုင်ငံသို့ ရေနံတင်ပို့မှု ပမာဏကို ဆက်လက် ထိန်းသိမ်းထားနိုင်လိမ့်မည် မဟုတ်ကြောင်း Kpler မှ လေ့လာဆန်းစစ်သူ ဟိုမာယွန် ဖာလက်ရှာဟီ (Homayoun Falakshahi) က ပြောကြားခဲ့သည်။
နောက်ဆုံး ရရှိထားသည့် အချက်အလက်များအရ တရုတ်နိုင်ငံ၏ အီရန်ရေနံစိမ်း တင်သွင်းမှုသည် မေလတွင် တစ်ရက်လျှင် ရေနံစည်ပေါင်း ၁ ဒသမ ၁၀ သန်းအထိ ကျဆင်းသွားခဲ့ပြီး၊ ထိုပမာဏသည် ၂၀၂၅ ခုနှစ် ဇန်နဝါရီလ နောက်ပိုင်း အနိမ့်ဆုံးအဆင့်သို့ ရောက်ရှိသွားခြင်း ဖြစ်သည်။
Source: The Nation
#သတင်းအပြည့်အစုံကို Comment Link တွင် ဖတ်ရှုရန်
ပုံ - အီရန်နဲ့ဟော်မုဇ်ရေလက်ကြားကို တွေ့ရစဉ်
