CNI Burmese

CNI Burmese CNI is a news agency which stands on three media policies; Independence, Justice and Neutrality.

အရေးကြီးကုန်စည်များကို ထပ်တိုးပြီး စနစ်တကျ လုပ်ဆောင်ရန်လိုCNI News၂၀၂၆ ခုနှစ်၊ စက်တင်ဘာ ၉မြန်မာနိုင်ငံတွင် ကုန်ဈေးနှုန်း...
09/09/2026

အရေးကြီးကုန်စည်များကို ထပ်တိုးပြီး စနစ်တကျ လုပ်ဆောင်ရန်လို

CNI News

၂၀၂၆ ခုနှစ်၊ စက်တင်ဘာ ၉

မြန်မာနိုင်ငံတွင် ကုန်ဈေးနှုန်း မြင့်တက်ခြင်းနှင့် ကုန်စည်ရှာပါးမှု ပြဿနာကို ဖြေရှင်းရန်အတွက် အရေးကြီး ကုန်စည် အရေအတွက်အား ထပ်တိုးပြီး စနစ်တကျဖြင့် တင်သွင်းခွင့်ပြုရန် လိုအပ်သည်ဟု စီးပွားရေးလုပ်ငန်း ရှင်များနှင့် စီးပွားရေးလေ့လာသူများက ထောက်ပြကြသည်။

မြန်မာနိုင်ငံတွင် နိုင်ငံခြားငွေ လိုအပ်ချက်ကြောင့် အရေးကြီး ကုန်စည်များကိုသာ တင်သွင်းခွင့်ပေးသည့် စနစ်ကို ကျင့်သုံးလျက်ရှိနေသည်။

ထို့နောက် ကုန်ဈေးနှုန်း မြင့်တက်ခြင်းနှင့် ကုန်စည်ရှားပါးမှု ပြဿနာများ ရင်ဆိုင်နေရသည်။

နိုင်ငံခြားငွေ လိုအပ်ချက်ကြောင့် ၂၀၂၆ ခုနှစ် နှစ်စပိုင်းမှစတင်၍ သွင်းကုန်များကို ကန့်သတ်လာပြီး တူညီသည့် ကုန်အမျိုးအစားတစ်ခုကို ကုမ္ပဏီတစ်ခုက တစ်လလျှင် တစ်ခုသာ လျှောက်၍ရသည့် ကန့်သတ်ချက်ကို ထုတ်ပြန် ခဲ့သည်။

ပြည်တွင်းတွင် အဓိက လိုအပ်နေသည့် ကုန်စည်များကို အလှည့်ကျဖြင့် မဟုတ်ဘဲ အရေးကြီးကုန်စည်၌ ပါဝင် သည့် ကုန်စည်အားလုံးကို အရေအတွက် အကန့်အသတ်ဖြင့် စနစ်တကျ ကြပ်မတ်၍ တစ်ပြိုင်တည်း တင်သွင်းခွင့် ပေးစေလိုသည်ဟု စီးပွားရေးလေ့လာသုံးသပ်သူ ဦးသက်ဇော်က CNI သတင်းဌာနသို့ ပြောသည်။

၎င်းက “အရေးကြီး ကုန်စည်ဆိုတာကတော့ ဒါက အရင်ဟာကို နည်းနည်း ကူးချတာပေါ့။ Essential နဲ့ non – essential ကို။ ဒါပေမယ့် ကုန်စည်တစ်မယ်ထဲက essential မဟုတ်ဘူးလေ။ ကုန်စည်ရှိမှာပေါ့။ Categorized ထဲမှာ မဖြစ်မနေ ကုန်စည် ၂၀ လောက် ရှိနိုင်တယ် ဆရာတို့ သုံးသပ်တာတော့။ ကုန်စည် ၂၀ ကိုတော့ မဖြစ်မနေ ပေးရမယ့်ဟာလေး ပေးရမှာပေါ့။ Categorized ထဲမှာ လျှပ်စစ်ပစ္စည်း၊ လျှပ်စစ်ပစ္စည်းက ဇိမ်ခံပစ္စည်းဆိုရင် နား ထားလိုက်။ ဇိမ်ခံမဟုတ်တဲ့ ပစ္စည်းတွေကို ဘယ်လိုသွင်းမလဲ။ လျှပ်စစ်ပစ္စည်းထဲမှာလည်း essential တွေ ရှိတယ် လေ။ Essential တွေကို ဘယ်လိုပေးသွင်းမလဲ။ လူသုံးကုန်၊ စားသုံးကုန်ထဲမှာလည်း ဘီစကစ်တို့ ကွတ်ကီးတို့ကို ခဏထားလိုက်။ ကျန်တာတွေက မဖြစ်မနေ သွင်းရမယ့် စားသောက်ကုန် Product တွေ ရှိတယ်။ အဲဒါတွေကို ဘယ်လိုပေးသွင်းမလဲ။ နောက်ပြီးတော့ လူသုံးကုန် ပစ္စည်းထဲမှာလည်း ဘယ်ဟာတွေ မဖြစ်မနေ ပေးသွင်းရမယ် ဆိုတဲ့ဟာရှိတယ်။ အဲဒါတွေလည်း ပေးသွင်းရမှာပေါ့နော်။ အဲဒီလိုမျိုးတွေ ခွဲပြီးတော့မှ နောက်တစ်ခါ limitation ပေါ့နော်။ ဘယ်လောက် အရေအတွက်၊ ဘယ်လောက် ကန့်သတ် တန်ပေါ့၊ ကန့်သတ်ပြီးတော့ ပေးရင်လည်း ဖြစ် တာပဲ။ အခုက ကိုယ့်ရှိတဲ့ ဘတ်ဂျက်က ဘယ်လိုရှိတယ်၊ ခုနက သုံးသပ်ပြသလို FE ကို ဘယ်လိုရအောင် ရှာမလဲ ဆိုတဲ့ အပေါ်မှာ မူတည်ပြီးတော့ သုံးစွဲမှုကို စီစဉ်သင့်တယ်လို့ ကျနော်တို့တော့ မြင်တယ်”ဟု ပြောသည်။

အရေးကြီး ကုန်စည်တွင် စားသောက်ကုန်၊ လောင်စာဆီ၊ ဆေးဝါးနှင့် ဆေးဘက်ဆိုင်ရာ ပစ္စည်များ၊ စိုက်ပျိုးရေး သွင်းအားစုများ၊ စက်မှုလုပ်ငန်းများအတွက် အခြေခံကုန်ကြမ်းများ၊ ဆောက်လုပ်ရေးအတွက် မရှိမဖြစ် ပစ္စည်းများ၊ လျှပ်စစ်နှင့် စွမ်းအင်ဆိုင်ရာ ပစ္စည်းများ ပါဝင်သည်။

သို့သော်လည်း တချို့သော ကုန်စည်များသည် အရေးကြီး ကုန်စည် ခေါင်းစဉ်အောက်တွင် ပါရှိသော်လည်း တင်သွင်းခွင့် မရသည့် အခြေအနေများနှင့်လည်း ကြုံတွေ့နေရသည်။

ထို့နောက် နိုင်ငံတော်အစိုးရ အနေဖြင့် တိုင်းပြည်တွင် ဖြစ်ပေါ်နေသည့် အကြောင်းအရာများ၊ နိုင်ငံခြားငွေ လိုအပ် ချက် ဖြစ်ပေါ်နေသော အတိုင်းအတာကို ပြည်သူများ သိရှိနိုင်ရန် ပွင့်လင်းမြင်သာစွာ ချပြရန် လိုအပ်သည်ဟု ဦးသက်ဇော်က CNI သတင်းဌာနသို့ ပြောသည်။

၎င်းက “အခုဟာကတော့ အကုန်လုံးကတော့ ပွင့်လင်းမြင်သာမှု ရှိဖို့တော့ လိုတာပေါ့ဗျာ။ နောက်ပြီးတော့မှ FESC ကလည်း ပြောသင့်တယ်။ တိုင်းပြည်မှာ ဘယ်လောက် FE ပဲ ရှိတယ်။ ဒါကြောင့်မို့လို့ ဒါတွေကတော့ လုပ်သင့် တယ်။ ဒါတွေကတော့ ပြည်သူတွေအနေနဲ့ ပူးပေါင်းဆောင်ရွက်သင့်ပါတယ်။ ပြည်သူတွေပါမှ တိုင်းပြည်က ဘယ် ဟာ ဆန်ရှင်လုပ်လုပ် အောင်မြင်မှာ။ ကိုယ့်အစိုးရ တစ်ခုတည်းနဲ့တော့ မအောင်မြင်ဘူးဆိုတာ သတိချပ် စေချင် တယ် အဲဒါတော့ ပြောချင်တယ်” ဟု ပြောသည်။

ထို့နောက် အရေးကြီး ကုန်စည်တွင် စက်သုံးဆီ ပါဝင်နေသည့် အကြောင်းပြချက်ဖြင့်လည်း စိုက်ပျိုးရေး လုပ်ငန်း များအတွက် လိုအပ်သည့် စက်သုံးဆီများကို စုဆောင်းနေသော တောင်သူများအား ဖမ်းဆီး အရေးယူမှုများလည်း ရှိနေသည်ဟု တောင်သူများထံမှ သိရသည်။

ပြီးခဲ့သည့် နွေစပါး ရိတ်သိမ်းချိန်တွင် စက်သုံးဆီ အခက်အခဲကြောင့် တောင်သူများသည် စက်သုံးဆီကို မူရင်း ဈေးနှုန်းထက် ၃ ဆပိုကြီးသည့် ဈေးနှုန်းဖြင့် ဝယ်ယူခဲ့ကြရသည့်အတွက် ဆုံးရှုံးမှုများ ဖြစ်ပေါ်ခဲ့သည်။

ထို့ကြောင့် ယခုနှစ် မိုးစပါး ရိတ်သိမ်းရန်နှင့် နွေစပါး စိုက်ပျိုးရန်အတွက် စက်သုံးဆီကို ယခုကတည်းကပင် တောင်သူများက ဝယ်ယူစုဆောင်းနေကြခြင်းဖြစ်သည်။

ထိုသို့ ဝယ်ယူစုဆောင်းသည့် တောင်သူများကို မြန်မာနိုင်ငံ ရဲတပ်ဖွဲ့မှ ဖမ်းဆီးပြီး စက်သုံးဆီကို သိမ်းဆည်း ခြင်းနှင့် တရားစွဲဆို အရေးယူခြင်းများ လုပ်ဆောင်နေသည်ဟု လယ်သမားဘဝ ဖွံ့ဖြိုးရေးအသင်း ဥက္ကဋ္ဌဟောင်း ဦးသိန်းအောင်က CNI သတင်းဌာနသို့ ပြောသည်။

၎င်းက “မြေဩဇာထက် ပိုအရေးကြီးတာက အခု ဒီဇယ်။ တောင်သူတွေက ဒီဇယ် မရှိလို့ မရဘူး။ အခု နွေစပါး စိုက်ဖို့အတွက် တချို့ ငွေရှာလို့ရတဲ့ တောင်သူတွေက ဒီဇယ် ဝယ်ထားရတယ်။ အချိန်တန်တော့မှ ရေတင်တော့မှ ဒါမှမဟုတ် ထွန်ယက်တော့မှ ဒီဇယ်မရှိရင် ထွန်လို့မရဘူး။ ထွန်လို့မရဘူး၊ ရေတင်လို့ မရဘူးဆိုရင် စိုက်ထား ဥစ္စာ တွေက အကုန်လုံး လွှင့်ပစ်ရမှာလေ။ အခု မိုးစပါး ပေါ်လာရင် မိုးစပါး ပျောက်ကျား ပျောက်ကျားလေးတွေတောင် ပေါ်လာပြီ။ သက်နု၊ ရက် ၉၀ တို့၊ ရက် ၁၂၀ တို့ စိုက်တယ်။ စောစောစိုက်တဲ့သူတွေက စပြီး ရိတ်နေရပြီလို့။ အဲဒီ တော့ ကောက်ရိတ်စက်တွေ၊ လယ်ထွန်စက်တွေအတွက် ကောက်ရိတ်စက်၊ လယ်ထွန်စက်ရှိတဲ့ တောင်သူတွေက ဘာလုပ်ရလဲဆိုတော့ ဒီဇယ်ဝယ်ရတယ်။ ရတဲ့ဈေးနဲ့ ဝယ်ရတယ်။ အဲဒါက အခု ဘာပြဿနာ တက်လဲဆိုတော့ တောင်သူတွေက ငွေရှာပြီး ဝယ်တဲ့အချိန်မှာ သယ်တဲ့အခါမှာ အရေးကြီး ကုန်စည်ဆိုပြီးတော့ အဲဒီလို လုပ်ထား တဲ့အတွက် တောင်သူတွေမှာလေ အခု အဖမ်းခံရတဲ့ တောင်သူတွေလည်း ရှိတယ်လေ။ တော်တော် ဒုက္ခရောက် တယ်။ ဖမ်းတဲ့အခါကျတော့ ပစ္စည်းလည်းသိမ်းတယ်။ လူကိုလည်း အပြစ်ပေးတယ်ဆိုတော့ လမ်းမှာ သယ်ရင်း သွားရင်းမှာ သူတို့ကျတော့ ဘာမှ မရှိဘူးလေ။ အဲဒီလို အဖမ်းခံ နေရတယ်လေ။ အဲဒီဥစ္စာက ပိုပြီးတော့ အကြောင်း ကြီးတယ်” ဟု ပြောသည်။

မြန်မာနိုင်ငံတွင် ဖြစ်ပေါ်နေသော နိုင်ငံခြားငွေ လိုအပ်ချက်ကို ဖြေရှင်းသည့် အနေဖြင့် ပို့ကုန်ရငွေမှတဆင့် သွင်းကုန် တင်သွင်းခွင့်ပေးသည့် စနစ်ကို ကျင့်သုံးနေခြင်း ဖြစ်သည့်အပြင် အရေးကြီး ကုန်စည် သတ်မှတ်၍ အလှည့်ကျဖြင့် တင်သွင်းခွင့် ပြုနေခြင်း ဖြစ်သည်။

Websiteတွင်ဖတ်ရှုရန်...........https://cnimyanmar.com/local-news-2/local-business/38789-aarayykyeekonehcaimyarrko-htauttoepyee-hcanaittakya-lotesaungraanlo

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

ပုံ - ကုန်စည်များကို တွေ့ရစဉ်

တိုင်း ၇ တိုင်းကို ပြည်နယ်အဖြစ် သတ်မှတ်သင့်ဟု ပြောCNI News၂၀၂၆ ခုနှစ်၊ စက်တင်ဘာ ၉ မြန်မာနိုင်ငံအတွင်းရှိ တိုင်းဒေသကြီး ၇...
09/09/2026

တိုင်း ၇ တိုင်းကို ပြည်နယ်အဖြစ် သတ်မှတ်သင့်ဟု ပြော

CNI News

၂၀၂၆ ခုနှစ်၊ စက်တင်ဘာ ၉

မြန်မာနိုင်ငံအတွင်းရှိ တိုင်းဒေသကြီး ၇ ခု စုစည်း၍ ပြည်နယ်တစ်ခုအနေဖြင့် သတ်မှတ်သင့်ကြောင်း တိုင်းရင်း သား လက်နက်ကိုင်များနှင့် နိုင်ငံရေးပါတီများက ထောက်ပြကြသည်။

မြန်မာနိုင်ငံရှိ တိုင်းဒေသကြီး (၇) ခုကို ပြည်နယ်အဖြစ် ပြောင်းလဲသတ်မှတ်သင့်သလား ဆိုသည့်အချက်သည် မြန်မာ့နိုင်ငံရေး၊ အခြေခံဥပဒေ ပြုပြင်ပြောင်းလဲရေးနှင့် ဖက်ဒရယ်စနစ် တည်ဆောက်ရေးတို့တွင် အလွန်ကျယ် ပြန့်ပြီး အရေးပါသော ဆွေးနွေးငြင်းခုံမှုတစ်ခုဖြစ်ကြောင်း နိုင်ငံရေးလေ့လာသုံးသပ်သူများက ထောက်ပြကြ သည်။

ဤအယူအဆနှင့် ပတ်သက်၍ ထောက်ခံသည့် အမြင်များနှင့် ကန့်ကွက်/စိုးရိမ်သည့် အမြင်များဟူ၍ နှစ်ဖက်စလုံး တွင် ခိုင်လုံသော အကြောင်းပြချက်များ ရှိနေကြကြောင်းလည်း ထောက်ပြကြသည်။

တိုင်းဒေသကြီးများကို ပြည်နယ်အဖြစ် ပြောင်းလဲရာတွင် နယ်နိမိတ် ပြန်လည်သတ်မှတ်ရေး၊ တိုင်းဒေသကြီးများ အတွင်းရှိ လူနည်းစု တိုင်းရင်းသားများ၏ အခွင့်အရေး ကာကွယ်ရေးကိုလည်း သေချာသတ်မှတ်ရန်လိုအပ်သည်။

ယခုမြန်မာနိုင်ငံတွင် ဖြစ်ပေါ်နေသည့် ပဋိပက္ခများက တိုင်း ၇ တိုင်းအား ဗမာနှင့်ပဲဆိုင်သလိုလို တိုင်းရင်းသားများ က ယူဆနေကြကြောင်း၊ ထို့ကြောင့် တိုင်းဆိုပြီး မထားဘဲနှင့် ပြည်နယ်ပဲ သတ်မှတ်ပေးသင့်သည်ဟု ကရင်နိုင်ငံ ရေးသမား မန်းအောင်ပြည့်စိုးက CNI သတင်းဌာနသို့ ပြောသည်။

၎င်းက “အခုဟာ ငြိမ်းချမ်းရေးအတွက် လုံးပန်းနေကြတယ်။ အဲဒီဟာနဲ့ မပြီးဘူး တန်းတူညီမျှမှုရှိဖို့ မျှမျှတတ တန်းတူနီးပါးလောက်ပေါ့ ရှိနေကြဖို့ အာဏာခွဲဝေတဲ့ အပိုင်းမှာလည်း ဒီအစိုးရ အဖွဲ့တွေမှာရော၊ လွှတ်တော်မှာ ရော၊ ဌာနဆိုင်ရာ အကြီးအကဲတွေမှာရော၊ တပ်မတော်တွေမှာရောပေါ့ဗျာ။ မျှမျှတတလေး ရှိမယ်ဆိုလို့ရှင်ရင်တော့ လိုချင်တဲ့ ငြိမ်းချမ်းရေး ဖြစ်ပေါ်လာမယ်လို့ ကျနော်တို့ကတော့ သုံးသပ်ပြဖူးပါတယ်။ တိုင်းနဲ့ပြည်နယ် ၁၄ ခု လုပ် ထားတယ်၊ အခုဖြစ်နေတာက ဒီတိုင်း ၇ တိုင်းက ဗမာနဲ့ပဲ ဆိုင်သလိုလို ယူဆနေကြတယ် တိုင်းရင်းသားကနော်။ အဲဒီလို အယူအဆမျိုးကနေ ဝေးသွားအောင် ဥပမာ စစ်ကိုင်းတို့၊ မကွေးတို့၊ မန္တလေးတို့ကို ဗမာပြည်နယ်ပေးလိုက်၊ အကုန်လုံး တိုင်းဘာညာမထားဘဲနဲ့ ပြည်နယ်ကြီးပဲပေးလိုက်။ ကျန်တဲ့တိုင်းရင်းသား အများစုရှိနေတဲ့ ဧရာဝတီတို့၊ ရန်ကုန်တို့ ၊ ပဲခူးတို့ကိုတော့ ဒါအမျိုးသားများ ပြည်နယ်ဆိုပြီးတော့ ဒီဖွဲ့စည်းတည်ဆောက်ပုံမှာ အဲဒီလိုလုပ်ပေး လိုက်ရင် ငြိမ်းချမ်းရေး မျှတရေးများ ဖြစ်လာမလားလို့။ အုပ်ချုပ်ရေးစနစ်မှာ ဆိုလို့ရှိရင်လည်း မျှမျှတတလေးရှိ သင့်တယ်။ ငြိမ်းချမ်းရေးအတွက် ဆိုရင်လည်း လက်နက်နဲ့ ရင်ဆိုင်တိုက်ကြတာ မဟုတ်ဘဲနဲ့ စားပွဲပေါ်ညှိနှိုင်း၊ ဆွေးနွေးကြ လက်နက်အင်အားနဲ့ လာယူကြတဲ့ ပုံစံမျိုး မဟုတ်ဘဲနဲ့ သူလည်းနိုင်တယ်၊ ကိုယ်လည်းနိုင်တယ်ဆိုတဲ့ တွေ့ဆုံညှိနှိုင်းမှုမျိုး ဆိုရင်တော့ ပိုပြီးတော့ကောင်းမယ်လို့ သုံးသပ်တင်ပြလိုပါတယ်”ဟု ပြောသည်။

အချို့က ပြည်နယ်ဟူသော ကဏ္ဍကို တိုင်းရင်းသားများ၏ သမိုင်းကြောင်းနှင့် ယဉ်ကျေးမှုဆိုင်ရာ လက္ခဏာ အဖြစ် သာ သတ်မှတ်လိုကြပြီး၊ နယ်မြေအခြေပြု သပ်သပ်ဖြင့် ပြည်နယ် သတ်မှတ်ခြင်းကို သဘောမတူကြပေ။

လက်ရှိစနစ်အရ "ပြည်နယ်" များကို တိုင်းရင်းသားလူမျိုးများ အခြေစိုက်ရာ ဒေသများအဖြစ်လည်းကောင်း၊ "တိုင်းဒေသကြီး" များကို ဗမာလူမျိုးအများစု နေထိုင်ရာ ဒေသများအဖြစ်လည်းကောင်း ခွဲခြားထားသကဲ့သို့ ဖြစ် နေကြောင်း တိုင်းရင်းသားအများစုက ထောက်ပြကြသည်။

လက်ရှိ မြန်မာနိုင်ငံရှိ တိုင်းများအားလုံးကို "ပြည်နယ်" ဟု တပြေးညီ သတ်မှတ်လိုက်ခြင်းဖြင့် ဗမာနှင့် အခြား သော တိုင်းရင်းသားများအကြား နိုင်ငံရေးအရ တန်းတူညီမျှမှုကို ပိုမိုဖော်ဆောင်နိုင်သည်ဟု ယူဆကြကြောင်း လည်း ထောက်ပြကြသည်။

တိုင်းရင်းသားလူမျိုးများအမြင်ကမူ တိုင်း ၇ တိုင်းကို ပြည်နယ်အဖြ စ်ထားရှိရန်၊ ပြည်နယ် အားကောင်းလျှင် တိုင်း ပြည် တည်ဆောက်၍ရကြောင်း ရခိုင်ပြည်လွတ်မြောက်ရေးပါတီ(ALP)ဥက္ကဋ္ဌ ဒေါ်စောမြရာဇာလင်းက CNI သတင်းဌာနသို့ ပြောသည်။

၎င်းက “ဗဟိုချုပ်ကိုင်မှုကိုလည်း လျှော့ချဖို့လိုတယ်။ ဖွဲ့စည်းပုံဟာ အခုဆိုလို့ရှိရင် ဗဟိုက ချုပ်ကိုင်မှုက အရမ်း များတယ်။ ပြည်နယ် အားကောင်းဖို့ လိုတယ်။ ပြည်နယ်ရဲ့လုပ်ပိုင်ခွင့်တွေ သေချာဆွေးနွေးပြီးတဲ့အခါ တိုင်းပြည် တည်ဆောက်လို့ရတယ်။ ဖွဲ့စည်းပုံဆိုင်ရာ ကိစ္စရပ်တွေကိုလည်း ပြီးပြတ်အောင် ဆွေးနွေးဖို့ လိုတယ်လို့ မြင်ထားတယ်။ အခုဆိုလို့ရှိရင် ပြည်နယ် ၇ ခုနဲ့ တိုင်း ၇ ခုဆိုပြီးတော့မှ ဖွဲ့စည်းပုံမှာလည်း ဆွဲထားတာတစ်ကြောင်း ကိုယ့်တိုင်း ကိုယ့် ပြည်နယ် ဆိုပြီးတော့မှ ရှိနေကြတယ်။ တိုင်းရင်းသားတွေဘက်က မြင်တာကတော့ တိုင်း ၇ တိုင်းကို ပြည်နယ် အဖြစ် ထားမှာလားဆိုတာလည်း ဆွေးနွေးရမယ့် အချက်တစ်ခုအဖြစ် မြင်ထားကြတာ ရှိတယ်။ အတိအကျ ဆွေးနွေးတာတော့ မရှိသေးဘူး။ တိုင်းပြည် တည်ဆောက်မယ်ဆိုလို့ရှိရင် ဖွဲ့စည်းပုံရေးဆွဲ ပြင်ဆင်ရေးနဲ့ ပတ် သက်ပြီးတော့မှ တိတိကျကျ လုပ်ရမယ့်အချိန်က သိပ်မကြာသင့်ဘူး။ ဟိုတစ်ခုကို ဆွေးနွေးလိုက် အရှည်ကြီး သွားလိုက် ရက်ရှည်ကြာလိုက်၊ ဒီ တစ်ခုကို သွားလိုက် ရက်ရှည်ကြာလိုက် ဆိုတဲ့ဟာမျိုး ဖြစ်နေဖို့ရာထက် ဒီ အတွင်းမှာ ဘယ်လောက်ထိကို လုပ်မယ် အဲဒီအချိန်ပေါ်မှာ မူတည်ပြီးတော့မှ အားလုံးက သွားသင့်တယ်လို့ မြင် ထားတယ်”ဟု ပြောသည်။

ဖက်ဒရယ်ပြည်ထောင်စု တည်ဆောက်ရာတွင် ပြည်ထောင်စုအဖွဲ့ဝင် ယူနစ် အားလုံးသည် အဆင့်အတန်း တူညီ ကြရမည်ဖြစ်ပြီး၊ တိုင်းဒေသကြီးများကိုပါ ပြည်နယ်အဆင့် မြှင့်တင်ပေးခြင်းက ပိုမိုညီညွတ်သော ဖက်ဒရယ်ပုံစံ ကို ဖြစ်ပေါ်စေနိုင်ကြောင်း နိုင်ငံရေးလေ့လာသုံးသပ်သူများနှင့် တိုင်းရင်းသားများက ထောက်ပြကြသည်။

ပြည်နယ်တစ်ခု ဖြစ်လာပါက မိမိဒေသအလိုက် သီးခြားဖွဲ့စည်းပုံအခြေခံဥပဒေရေးဆွဲခွင့်၊ ကိုယ်ပိုင်ပြဋ္ဌာန်းခွင့်နှင့် သယံဇာတ ခွဲဝေခံစားခွင့်များ ပိုမို ရရှိလာနိုင်ပြီး ဒေသဖွံ့ဖြိုးရေးကို ပိုမိုထိရောက်စွာ လုပ်ဆောင်နိုင်မည် ဖြစ် သည်။

Websiteတွင်ဖတ်ရှုရန်...........https://cnimyanmar.com/political-2/politics-local/38788-tine-7-tineko-pyinaalaahpyit-saatmhaatsanghu-pyaww

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

ပုံ - မြန်မာနိုင်ငံရဲ့ တိုင်းဒေသကြီးနဲ့ပြည်နယ်တွေကို စုစည်းထားစဉ်

ထိုင်ဝမ်က ဒရုန်းတုံ့ပြန်ရေး စွမ်းဆောင်ရည်ကို အာရုံစိုက်လုပ်နေCNI International Newsတိုင်ပေ၊ စက်တင်ဘာ ၉ထိုင်ဝမ်၏ ထိပ်သီး ...
09/09/2026

ထိုင်ဝမ်က ဒရုန်းတုံ့ပြန်ရေး စွမ်းဆောင်ရည်ကို အာရုံစိုက်လုပ်နေ

CNI International News

တိုင်ပေ၊ စက်တင်ဘာ ၉

ထိုင်ဝမ်၏ ထိပ်သီး လေကြောင်းနှင့် အာကာသဆိုင်ရာ ကုမ္ပဏီတစ်ခုသည် သမားရိုးကျ ခရီးသည်တင် လေယာဉ် ထုတ်လုပ်မှုများထက် ကျော်လွန်ပြီး ဒရုန်းဖျက်စနစ်များဘက်ကို ပိုမိုအာရုံစိုက် လုပ်ဆောင်နေသည်ဟု Nikkei Asia မှ ဖော်ပြခဲ့သည်။

တရုတ်၏ မြင့်တက်လာသည့် ဒရုန်းစွမ်းဆောင်ရည်များကို စိုးရိမ်ရသည့်အတွက် ထိုင်ဝမ် အာကာသနှင့် လေကြောင်း စက်မှုဖွံ့ဖြိုးတိုးတက်ရေး ကော်ပိုရေးရှင်း (AIDC) သည် ၎င်း၏ လုပ်ငန်းများကို ဒရုန်းကာကွယ်ရေး စနစ်များဘက်သို့ လျှင်မြန်စွာ တိုးချဲ့ဆောင်ရွက်နေခြင်းဖြစ်သည်။

AIDC ကုမ္ပဏီသည် ခေတ်သစ် စ-စ်ပွဲ၏ လျှင်မြန်သော နည်းပညာ ပြောင်းလဲမှုများနှင့် ရင်ဘောင်တန်းနိုင်ရန် ၎င်း၏ ကိုယ်ပိုင် ဒရုန်းများ တည်ဆောက်ရေး လုပ်ငန်းများကို အရှိန်မြှင့်တင် ဆောင်ရွက်ခဲ့သည်။

ထိုင်ဝမ်အနေဖြင့် တရုတ်ပြည်မကြီးထံမှ စစ်ရေးဖိအားများကို ဆက်လက် ရင်ဆိုင်နေရသဖြင့် မောင်းသူမဲ့ လေယာဉ်များ တည်ဆောက်ရေးကို အရှိန်မြှင့် ဆောင်ရွက်လျက်ရှိကြောင်း ဧပြီလကတည်းက ထုတ်ဖော် ပြောကြားခဲ့ခြင်းဖြစ်သည်။

AIDC ဥက္ကဋ္ဌ ဂျင်နီဖာ ချောင် (Jennifer Chuang) က ၂၀၂၂ ခုနှစ်၊ ဖေဖော်ဝါရီလတွင် စတင်ခဲ့သော ရုရှား၏ ယူကရိန်း စ-စ်ပွဲတွင် ဒရုန်းများသည် ပိုမို တွင်ကျယ်လာပြီး ခေတ်သစ် စ-စ်ပွဲ၌ ဒရုန်းနည်းပညာ ဆန်းသစ်မှု အရှိန်ကို ပေါ်လွင်စေကြောင်း ထိုင်ဝမ်နိုင်ငံခြားရေးဝန်ကြီးဌာနက ကြီးမှူးကျင်းပသည့် ထိုင်ချုံ (Taichung) မြို့ရှိ AIDC စက်ရုံသို့ မီဒီယာများ သွားရောက်လေ့လာသည့် ခရီးစဉ်အတွင်း ပြောကြားခဲ့သည်။

“ဒရုန်းနည်းပညာဟာ နှစ်လတစ်ကြိမ်လောက် ဆန်းသစ်ပြောင်းလဲနေတာကို တွေ့နိုင်ပါတယ်။ ကျမတို့ အနေနဲ့ နည်းပညာကို အမြန်ဆုံး မီအောင် မလိုက်ပါနိုင်ရင် ပျက်စီးဆုံးရှုံးရလိမ့်မယ်လို့ ကျမ နားလည်ထားပါတယ်” ဟု ၎င်းက ဆိုသည်။

ထိုင်ဝမ်သမ္မတ လိုင်ချင်တေး (Lai Ching-te) အစိုးရသည် တရုတ်ပြည်မကြီး၏ ကျူးကျော် ဝင်ရောက် လာနိုင်ခြေ အတွက် ပြင်ဆင်သည့် အနေဖြင့် ထိုင်ဝမ်၏ လေကြောင်းကာကွယ်ရေး စနစ်များကို မြှင့်တင်ရန် စီစဉ်နေပြီး ဒရုန်း များ၏ အခန်းကဏ္ဍကိုလည်း ပိုမိုဦးစားပေး လုပ်ဆောင်လျက်ရှိသည်။

တရုတ်ပြည်မကြီး၏ စစ်ဘက်သုံး ဒရုန်းများသည် ထိုင်ဝမ်အနီးတွင် ပုံမှန် လှုပ်ရှားပျံသန်း လျက်ရှိကြောင်း ထိုင်ဝမ် ကာကွယ်ရေးဝန်ကြီးဌာနက ပြောကြားခဲ့သည်။

AIDC သည် ထိုင်ဝမ်လေတပ်မှ စတင် မြစ်ဖျားခံခဲ့ခြင်းဖြစ်ပြီး စစ်ဘက်သုံး လေယာဉ်များ တည်ဆောက်ရေးနှင့် ထုတ်လုပ်ရေးတွင် ပါဝင်ဆောင်ရွက်လျက်ရှိသည်။

ထို့ပြင် ထိုကုမ္ပဏီသည် ထိုင်ဝမ်၏ ဒရုန်းစက်မှုလုပ်ငန်းကို အရှိန်မြှင့်တင်ရန်နှင့် ပြည်ပအော်ဒါများ ရရှိရန် ရည်ရွယ်သည့် အစိုးရ ကျောထောက်နောက်ခံပြု ဒရုန်းထောက်ပံ့ရေးကွင်းဆက် မဟာမိတ်အဖွဲ့တွင်လည်း ဦးဆောင်သည့် အခန်းကဏ္ဍမှ ပါဝင်လျက်ရှိသည်။

Websiteတွင်ဖတ်ရှုရန်.......https://cnimyanmar.com/political-2/politics-local/38786-htinewamk-daronetonepyanrayy-hcwmsaungraiko-aarronehcitelotenay

Source: Nikkei Asia

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

ပုံ - ထိုင်ဝမ်ဒရုန်းကို တွေ့ရစဉ်

09/09/2026

စုံ/မ ယာဉ်မောင်းနှင်မှုစနစ် ဖျက်သိမ်း

CNI News

၂၀၂၆ ခုနှစ်၊ စက်တင်ဘာ ၉

မြန်မာနိုင်ငံတွင် စက်သုံးဆီ အခက်အခဲကြောင့် မော်တော်ယာဉ် မောင်းနှင်မှုစနစ် စုံ/မ သတ်မှတ်ချက်ကို ၂၀၂၆ ခုနှစ်၊ စက်တင်ဘာ ၉ ရက်၌ ဖျက်သိမ်းလိုက်ကြောင်း နိုင်ငံတော်သမ္မတရုံးက ထုတ်ပြန်ခဲ့သည်။

သို့သော် စုံ/မ သတ်မှတ်၍ စက်သုံးဆီ ဝယ်ယူ(ထည့်သွင်းခြင်း)ကိုတော့ ဆက်လက် ထားရှိမည်ဖြစ်သည်။

Website တွင်ကြည့်ရှုရန်- - - -https://cnimyanmar.com/watch-tv-2/38794-hcone-m-yarinmaunggnhainmhuhcanait-hpyetsaim

တိုင်းရင်းသားများ၏ တန်းတူညီမျှရေးဆိုတာ ဘာလဲCNI News၂၀၂၆ ခုနှစ်၊ စက်တင်ဘာ ၉ဗမာမဟုတ်သော တိုင်းရင်းသားလူမျိုးများ၏ တန်းတူညီ...
09/09/2026

တိုင်းရင်းသားများ၏ တန်းတူညီမျှရေးဆိုတာ ဘာလဲ

CNI News

၂၀၂၆ ခုနှစ်၊ စက်တင်ဘာ ၉

ဗမာမဟုတ်သော တိုင်းရင်းသားလူမျိုးများ၏ တန်းတူညီမျှမှု ရရှိရေးဆိုသည်မှာ မည်သည့် အဆင့်အတန်းကို ရည် ညွန်းနေတာလဲ ဆိုသည့်အပေါ် ပြည်တွင်း/ပြည်ပ သံတမန်အသိုင်းအဝိုင်းနှင့် နိုင်ငံရေးအသိုင်းအဝိုင်းကြား သိလို နေကြသည်။

လက်ရှိ မြန်မာနိုင်ငံတွင် ဗမာမဟုတ်သော တိုင်းရင်းသားများသည် ကိုယ်ပိုင်ပြဋ္ဌာန်းခွင့်နှင့် ကိုယ်ပိုင်အုပ်ချုပ်ခွင့် လွတ်လွတ်လပ်လပ် မရှိဘဲ အမည်ခံ ကိုယ်ပိုင်အုပ်ချုပ်ခွင့်ရဒေသများ အနေဖြင့်သာ ရရှိနေခြင်းကြောင့် တိုင်းရင်း သား လူမျိုးများက ဗဟိုချုပ်ကိုင်မှု လျှော့ချသော ကိုယ်ပိုင်အုပ်ချုပ်ခွင့်နှင့် ကိုယ်ပိုင်ပြဋ္ဌာန်းခွင့်ကို တောင်းဆိုလျက် ရှိနေသည်။

ဗမာမဟုတ်သော တိုင်းရင်းသားလူမျိုးများသည် တိုင်းရင်းသား တန်းတူညီမျှ အခွင့်အရေး ရရှိ‌ရေး၊ ကိုယ်ပိုင် ပြဋ္ဌာန်းခွင့်နှင့် ကိုယ်ပိုင်အုပ်ချုပ်ခွင့် ရရှိရေး၊ ဖက်ဒရယ်ပြည်ထောင်စု တည်ဆောက်ရေး၊ ဒီမိုကရေစီစနစ် ထွန်ကား ရေး၊ ကိုယ့်ကံကြမ္မာ ကိုယ်ဖန်တီးခွင့် ရရှိရေး စသည့် အချက်များအား တောင်းဆိုကာ လက်နက်ကိုင်တော်လှန် လျက် ရှိသည်။

ဗဟိုအစိုးရ အနေဖြင့် အင်အားနည်းပါးသည့် အဖွဲ့အစည်းများ သို့မဟုတ် ပုဂ္ဂိုလ်ရေးအရ မနီးစပ်သည့် အဖွဲ့ အစည်းများကို ဖယ်ထားခြင်းနှင့် ချဥ်းကပ်မှု ကွဲပြားခြင်းသည်လည်း တွေ့ဆုံဆွေးနွေးပွဲများမှ ပိုမို ဝေးကွာသွား စေမည်ဖြစ်ကြောင်း ပအိုဝ်းအမျိုးသားအဖွဲ့ချုပ်(PNO)မှ ပြော‌‌ရေးဆိုခွင့်ရှိသူ စောခွန်ကျော်ဝင်းက CNI သတင်း ဌာနသို့ ပြောသည်။

ထို့အပြင် ငြိမ်းချမ်းရေး တည်ဆောက်ရာ၌ အဖွဲ့အစည်း အကြီးအသေး သို့မဟုတ် လူမျိုးစုများ၏ အင်အားအပေါ် မမူတည်ဘဲ တိုင်းရင်းသားအားလုံးကို တန်းတူရည်တူ သဘောထား၍ ယုံကြည်မှု ပြန်လည် တည်ဆောက်ရန် လိုအပ်သည်ဟု ၎င်းက ဆက်ပြောသည်။

စောခွန်ကျော်ဝင်းက “ကျနော့် အမြင်ကတော့ အဓိက,ကတော့ အစိုးရဘက်က စဉ်းစားတဲ့ အခါကျတော့ တိုင်းရင်း သားတွေ အပေါ်မှာ ဥပမာ အင်အားကြီးတဲ့ တိုင်းရင်းသားအပေါ် ဆက်ဆံတဲ့အခါ သော်လည်းကောင်း၊ အင်အား မကြီးတဲ့ တိုင်းရင်းသားအပေါ် ဆက်ဆံတာ တန်းတူဆက်ဆံဖို့ ဒါတော့ လိုအပ်တယ်။ တချို့ကလည်း တိုင်းရင်း သား တချို့ကလည်း ခံစားကြတယ်။ ငါတို့ အင်အားမရှိတဲ့ အခါကျတော့ ငါတို့ကို ဘေးမှာထားတယ်။ တကယ့် အင်အားကြီးတဲ့ အဖွဲ့ကျတော့ တွေ့ဆုံတဲ့အခါ ဦးစားပေးပြီး ပြောဆို ဆက်ဆံတယ်။ ဒါလည်း တချို့ တိုင်းရင်းသား တွေက ခံစားရတယ်။ အစိုးရဘက် အနေနဲ့လည်း ဆက်ဆံတဲ့ အခါမှာ တန်းတူရေတူ ဆက်ဆံပြီးတော့ အားလုံး ခွဲခြားမှုမရှိဘဲ ဆက်ဆံမှ ပူပေါင်း ဆောင်ရွက်မယ်၊ လက်တွဲခေါ်မယ်ဆိုရင်‌ ခုနက အမြင်လည်း ပျောက်သွားနိုင် တယ်။ ပြီးခဲ့တဲ့ ကာလတွေမှာဆို အမြင်က အဲဒီလို‌ မြင်နေကြတာ အင်အားရှိတဲ့သူ၊ ပိုပြီးနီးစပ်တဲ့သူ၊ ယုံကြည်ရတဲ့ သူဆို ဘေးနားမှာ ရှိတယ် ပြောဆို ဆက်ဆံရ လွယ်တယ်။ တကယ်လို့ အင်အားမရှိတဲ့သူ၊ အဖွဲ့အစည်း အင်အား မရှိတဲ့ တိုင်းရင်းသားလိုမျိုး ပုဂ္ဂိုလ်အရ ရင်းနှီးမှု မရှိတဲ့ ပုဂ္ဂိုလ်မျိုးဆို မယုံကြည်သလိုမျိုး ဖြစ်တယ်။ တိုင်းရင်းသား တွေကလည်း ရှေ့တိုးရ မတိုးချင် အနောက်ပဲ ပြန်သွားချင်တဲ့ ဆန္ဒတွေရှိတယ်။ နောက်ဆုံး တွေ့ဆုံကြရအောင်ဆို နောက်ဆုံး ခုနက ခံစားချက်တွေ ရှိလာတဲ့အခါကျတော့ မတွေ့ချင် မပြောချင်တော့ဘူး ပိုပြီးဝေးသွားနိုင်တယ်။ အဓိက,ကတော့ ဦးဆောင်တဲ့ အဓိက အရေးကြီးတဲ့ ဘယ် တိုင်းရင်းသားမဆို ဘယ်အဖွဲ့အစည်းမဆို အားလုံး ကြီးကြီးသေးသေး ပညာတတ်တတ် မတတ်တတ်၊ ရင်းနှီးမှုရှိရှိ မရှိရှိ တပြေးညီ ဆက်ဆံပြောဆို နေရာ ပေးမယ်ဆို ရင်တော့ အမြင်ကွဲတဲ့ဟာတွေ လျော့သွား မယ်ပေါ့နော်” ဟု ပြောသည်။

ထို့အပြင် တိုင်းရင်းသား လက်နက်ကိုင်ပဋိပက္ခသည် ဗမာလူမျိုးနှင့် တိုင်းရင်းသားများအကြား ပဋိပက္ခမဟုတ်ဘဲ အာဏာရအစိုးရနှင့် တိုင်းရင်းသားလက်နက်ကိုင် အဖွဲ့အစည်းများအကြား ဖြစ်ပေါ်သည့် ပဋိပက္ခသာဖြစ်ကြောင်း စောခွန်ကျော်ဝင်းက ထောက်ပြသည်။

တိုင်းရင်းသားလူမျိုးများ၏ တန်းတူညီမျှရေးဆိုသည်မှာ သယံဇာတခွဲဝေမှုနှင့် မြေယာစီမံခန့်ခွဲမှု စသည့် ကဏ္ဍများ ကို ဗဟိုအစိုးရ၏ ကိုင်တွယ်မှုမှ လျှော့ချကာ လူမျိုးစုများသို့ လုပ်ပိုင်ခွင့် ပိုပေးရန်ဖြစ်သည်ဟု ယူဆကြောင်း နိုင်ငံရေးလေ့လာသုံးသပ်သူ ဒေါက်တာ‌အောင်မျိုးက CNI သတင်းဌာနသို့ ပြောသည်။

၎င်းက “တန်းတူ ရရှိရေးဆိုတာကို နားလည်တာကတော့ သယံဇာတခွဲဝေမှု မြေယာစီမံခန့်ခွဲမှုပေါ့နော်၊ အဲဒီနေရာ မှာ ပြည်ထောင်စုကနေပြီးတော့ ကိုင်တွယ်ထားတာကို လျှော့ပြီးတော့ တိုင်းရင်းသားတွေကို လုပ်ကိုင်ခွင့် ပိုပေးရ မယ်ဆိုတဲ့ သဘောလို့ နားလည်တယ်။ အခွန်ကိစ္စ ဘာညာကတော့ မပြောလိုပါဘူး သို့သော်လည်းပဲ အခွန်ကိစ္စမှာ လည်းပဲ ရတဲ့အခွန်ကတော့ တိုင်းရင်းသားတွေ ပြန်သုံးရတာပဲ။ သို့သော်လည်းပဲ သူတို့ကို စီမံခန့်ခွဲခွင့် အချိုးတစ်ခု ပေးပြီးတော့ သုံးတာလည်း သူတို့ပါ့သာ ပြန်သုံးဆိုတဲ့ အပိုင်းဆိုရင်တော့ ကျေနပ်သွားမှာပေါ့နော် ဒီလိုပဲ ယူဆ တယ်” ဟု ပြောသည်။

အစိုးရအနေဖြင့် တိုင်းရင်းသား လက်နက်ကိုင်များအပေါ် ခွဲခြားဆက်ဆံခြင်းနှင့် အသိအမှတ်ပြုရန် တွန့်ဆုတ်နေ ခြင်းသည်လည်း စ-စ်ပွဲများ ကြာရှည် နေနိုင်သည်ကို သတိပြုရန် လိုအပ်ကြောင်း၊ မြန်မာနိုင်ငံတွင် တိုင်းရင်းသား မျိုးနွယ်များသည် လက်နက်မကိုင်လျှင် အရာမဝင်ဘူးဟု အသိစိတ်ဝင်နေကြောင်း တိုင်းရင်းသားခေါင်းဆောင် များက ထောက်ပြကြသည်။

Websiteတွင်ဖတ်ရှုရန်........https://cnimyanmar.com/political-2/politics-local/38784-tinerainnsarrmyarreat-taanntuunyemyaharayysotar-bharlell

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

ပုံ - တိုင်းရင်းသား လူငယ်များကို တွေ့ရစဉ်

စုံ/မ ယာဉ်မောင်းနှင်မှုစနစ် ဖျက်သိမ်းCNI News၂၀၂၆ ခုနှစ်၊ စက်တင်ဘာ ၉မြန်မာနိုင်ငံတွင် စက်သုံးဆီ အခက်အခဲကြောင့် မော်တော်ယ...
09/09/2026

စုံ/မ ယာဉ်မောင်းနှင်မှုစနစ် ဖျက်သိမ်း

CNI News

၂၀၂၆ ခုနှစ်၊ စက်တင်ဘာ ၉

မြန်မာနိုင်ငံတွင် စက်သုံးဆီ အခက်အခဲကြောင့် မော်တော်ယာဉ် မောင်းနှင်မှုစနစ် စုံ/မ သတ်မှတ်ချက်ကို ၂၀၂၆ ခုနှစ်၊ စက်တင်ဘာ ၉ ရက်၌ ဖျက်သိမ်းလိုက်ကြောင်း နိုင်ငံတော်သမ္မတရုံးက ထုတ်ပြန်ခဲ့သည်။

စုံ/မ စနစ်ဖြင့် မော်တော်ယာဉ် မောင်းနှင်ခွင့် ကန့်သတ်ချက်ကို ၂၀၂၆ ခုနှစ်၊ မတ်လ ၇ ရက်နေ့က စတင် သတ်မှတ်ခဲ့ခြင်းဖြစ်ပြီး စက်တင်ဘာ ၉ ရက်နေ့မှာတော့ ပြန်လည် ဖျက်သိမ်းလိုက်ခြင်းဖြစ်သည်။

သို့သော် စုံ/မ သတ်မှတ်၍ စက်သုံးဆီ ဝယ်ယူ(ထည့်သွင်းခြင်း)ကိုတော့ ဆက်လက် ထားရှိမည်ဖြစ်သည်။

Websiteတွင်ဖတ်ရှုရန်........https://cnimyanmar.com/political-2/politics-local/38791-hcone-m-yarinmaunggnhainmhuhcanait-hpyetsaim

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

သွင်းကုန်/ပို့ကုန် မူဝါဒအား သင်္ချာနည်းဖြင့် စဉ်းစားပါက မဖြစ်နိုင်CNI News၂၀၂၆ ခုနှစ်၊ စက်တင်ဘာ ၉မြန်မာနိုင်ငံတွင် သွင်း...
09/09/2026

သွင်းကုန်/ပို့ကုန် မူဝါဒအား သင်္ချာနည်းဖြင့် စဉ်းစားပါက မဖြစ်နိုင်

CNI News

၂၀၂၆ ခုနှစ်၊ စက်တင်ဘာ ၉

မြန်မာနိုင်ငံတွင် သွင်းကုန်၊ ပို့ကုန် မူဝါဒများအား သင်္ချာနည်းဖြင့် စဉ်းစားဆောင်ရွက်မည်ဆိုပါက မဖြစ် နိုင်ကြောင်းနှင့် တိုင်းပြည်၏ GDP ပါ ကျသွားနိုင်ကြောင်း စီးပွားရေးနှင့်ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က CNI သတင်းဌာနသို့ ပြောသည်။

မြန်မာနိုင်ငံတွင် မည်သည့် စီးပွားရေးမူဝါဒ ဥပဒေများ ပြဋ္ဌာန်းပါစေ ဈေးကွက် စီးပွားရေးကို ဦးတည် သည့် စနစ်သာ ဖြစ်ရမည်ဖြစ်ကြောင်း၊ ထို့ပြင် သာတူညီမျှမှုလည်း ရှိရမည်ဖြစ်ကြောင်း စီးပွားရေးနှင့် ဘဏ်ရေးရာကျွမ်းကျင်သူ ဦးဋ္ဌေးအောင်ကြည်က ပြောသည်။

၎င်းက “သင်္ချာနဲ့ စဉ်းစားပုံမျိုးဆို မရဘူး။ ဥပမာ NX ပေါ့ Net Export ပေါ့။ Net Export ဆိုတာက နိုင်ငံ ခြား ကုန်သွယ်မှု ရှင်းတမ်းမှာ export သည် import ထက်များရင် ဒါတိုင်းပြည်အတွက် ကောင်းတယ် ပေါ့။ အဲဒီလို သင်္ချာနဲ့ သွားစဉ်းစားလို့မရဘူး။ import ဆိုတဲ့ နေရာမှာ ဘာလဲဆိုတော့ ပြန်ပြီး export လုပ်ဖို့အတွက် raw material တွေ တင်သွင်းတာရှိတယ်။ equation တစ်ခုပြောပြမယ်။ Y=C+I+G+NX ဆိုတာ။ C ဆိုတာက Consumption ကိုပြောတာ စားသုံးမှု၊ I ဆိုတာက ရင်းနှီးမြှုပ်နှံမှုကို ပြောတာ။ G ဆိုတာက Government Expenditure (အစိုးရအသုံးစရိတ်) ကိုပြောတာ၊ NX ဆိုတာက နိုင်ငံခြားပို့ကုန် ထဲကနေ သွင်းကုန်ကို နှုတ်တာ။ ဒီသင်္ချာနဲ့ စဉ်းစားလိုက်တဲ့အခါမှာ ဘာဖြစ်လဲဆိုတော့ C ဆိုတာ ကျနော်တို့က ပစ္စည်းအများစုသည် နိုင်ငံခြားကပဲ သွင်းရတာပဲလေ။ အဲဒီတော့ C မှာ သွားမထိဘူးလား။ ထိတာပဲလေ။ ရင်းနှီးမြှုပ်နှံမှု ပစ္စည်းတော်တော်များများလည်း နိုင်ငံခြားက သွင်းရတာပဲ။ အဲဒီတော့ I မှာ ရော သွားမထိဘူးလား။ ထိတာပဲ။ ဒါ အရပ်သားလိုရှင်းပြတာ ပညာရှင်လို ရှင်းပြတာ မဟုတ်ဘူး။ အစိုးရ အသုံးစရိတ် Government Expenditure အစိုးရအသုံးစရိတ် တော်တော်များများသည်လည်း Foreign earning နဲ့ သုံးရတဲ့ ပစ္စည်းတွေက အများကြီး အဲဒီတော့ ဒီသွင်းကုန် Prohibitive ဆိုတာထက် quickly ပေါ့။ အတင်းအကျပ် တအားကို ထိန်းလိုက်တဲ့အခါမှာ ရှေ့က C ရော၊ I ရော၊ G ရော သွားထိမှာ။ အဲဒီ တော့ ဘာဖြစ်မလဲသိလား GDP ပါ ကျသွားမှာ။ ဒါကိုတော့ သေချာ မူဝါဒဆိုင်ရာကို သေချာ special စဉ်းစား စေချင်ပါတယ်ပေါ့။ ဘာလို့ဆို ဒီအစိုးရအဖွဲ့ အထဲမှာလည်း ပညာရှင်တွေရှိပါတယ်။ ကျနော်တို့ ထက် တတ်တဲ့သူတွေ အများကြီးရှိပါတယ်” ဟု ပြောသည်။

မြန်မာနိုင်ငံတွင် သွင်းကုန်လိုင်စင် လျှောက်ထားမှု စည်းမျဉ်းများ၊ ကန့်သတ်ကုန်ပစ္စည်း စာရင်းများနှင့် ပို့ကုန်/သွင်းကုန်ဆိုင်ရာ ညွှန်ကြားချက်များ ခေါင်းစဉ်အမျိုးမျိုးဖြင့် မကြာခဏ ပြောင်းလဲနေခြင်းကြောင့် လုပ်ငန်းရှင်များ အခက်အခဲများ ကြုံတွေ့နေကြရသည်။

စက်သုံးဆီ၊ ဆေးဝါးနှင့် အခြေခံ ကုန်ကြမ်းပစ္စည်း အချို့မှလွဲ၍ ကျန် သွင်းကုန် အများစုအတွက် လိုင်စင် ရရှိရန် အချိန်ကြာမြင့်ခြင်း၊ ကြိုးနီစနစ် များပြားခြင်းနှင့် အကန့်အသတ်ဖြင့်သာ ခွင့်ပြုခြင်း တို့ကြောင့် စက်ရုံ/အလုပ်ရုံများ အပါအဝင် ကုန်ကြမ်း ပြတ်လပ်ခြင်းနှင့် စျေးကွက်အတွင်း ကုန်စျေးနှုန်း မြင့်တက် ခြင်းတို့ကို ကြုံတွေ့နေရကြောင်း စီးပွားရေးလေ့လာသုံးသပ်သူများက ထောက်ပြကြသည်။

ထို့ပြင် ပို့ကုန်မှ ရရှိသော နိုင်ငံခြားငွေ၏ သတ်မှတ် ရာခိုင်နှုန်းကို ဗဟိုဘဏ်၏ သတ်မှတ် စျေးနှုန်းဖြင့် မဖြစ်မနေ လဲလှယ်ရသည့် မူဝါဒကြောင့်လည်း ပို့ကုန်လုပ်ငန်းရှင်များမှာ အခက်အခဲ ဖြစ်လျက်ရှိ ကြောင်း သိရသည်။

နိုင်ငံခြားငွေကြေးသည် ဗဟိုဘဏ် သတ်မှတ်စျေး၊ ပြင်ပတရားဝင် စျေးကွက်နှင့် ပြင်ပမှောင်ခို စျေးကွက် တို့အကြား စျေးနှုန်းကွာဟချက် ကြီးမားနေဆဲဖြစ်၍ သာမန် ကုန်သွယ်မှု လမ်းကြောင်းများ ထိခိုက်ပြီး တရားမဝင် လမ်းကြောင်းများဘက်သို့ ပိုမို ကူးပြောင်းသွားကြကြောင်းလည်း စီးပွားရေးလေ့လာ သုံးသပ် သူများက ထောက်ပြကြသည်။

မြန်မာနိုင်ငံ၏ လက်ရှိ အနေအထားသည် ပုံမှန်မဟုတ်သည့် အခြေအနေ ဖြစ်သောကြောင့် သင်္ချာပုံသေ နည်းအတိုင်း တွက်ချက်ပြီး သွား၍မရကြောင်း၊ နိုင်ငံခြားငွေ အများအပြား အမြန်ရရှိနိုင်မည့် ကုန်သွယ် ရေး လမ်းကြောင်းများကို ပြန်လည် လုပ်ဆောင်ရန် လိုအပ်ကြောင်း စီးပွားရေး သုတေသီတစ်ဦးက CNI သတင်းဌာနသို့ ပြောသည်။

၎င်းက “မပြေဘူးဗျ။ ဘာဖြစ်လို့လဲဆို ကျနော်တို့က anomany ပေါ့။ ပုံမှန်မဟုတ်တဲ့ အခြေအနေ ဖြစ်နေ တယ်။ ပုံမှန်မဟုတ်တဲ့ အခြေအနေဆိုတာ အရာခပ်သိမ်းက ပုံမှန်မဟုတ်တဲ့ အခြေအနေ။ ကုန်သွယ်ရေး မူဝါဒကို အကောင်အထည်ဖော်ရတဲ့ ဝန်ထမ်းတွေရဲ့ အခြေအနေကိုပဲ စစဉ်းစားကြည့် ဒါမူဝါဒ အကောင် အထည် ဖော်တဲ့အပိုင်းကို ပြောပြတာ။ ကြိုက်တဲ့မူဝါဒဆွဲ အကောင်အထည်ဖော်တဲ့ အပိုင်းတွေမှာရှိတဲ့ သာမန်ရတဲ့ ဝန်ထမ်းတွေရဲ့လစာက တအားနည်းတယ်။ အဲဒီတော့ ပြောရရင် ဟို institutional capacity က ထားပါတော့၊ ပုံမှန် လုံလုံလောက်လောက် ရနေတဲ့ အခြေအနေ၊ ပုံမှန် institutional capacity အပြည့်အဝ ရှိနေတဲ့ အခြေအနေ၊ အားလုံးက ပုံမှန် အခြေအနေ ဆိုရင် ခုန calculus လို တွက် လိုက်၊ ဒီဘက်က input ဒီလောက် ထည့်လိုက်၊ processing လုပ်ပြီးရင် output အဲ့လောက် ထွက်မယ် ပေါ့၊ စသဖြင့် စသဖြင့်ပေါ့၊ လုပ်ရင် အခုက ကျနော်တို့က variable တွေက အများကြီးပဲ။ ဥပမာ ထားပါ တော့ တရုတ် ဒီ ကုန်သွယ်ရေး လမ်းကြောင်းပဲ ထားပါတော့ဗျာနော်၊ အဲဒီမှာ stakeholder တွေက အများကြီးပဲ၊ different segment မှာ။ အဲဒါမျိုးတွေပေါ့၊ အဲဒါတွေ ကျနော်တို့က သွားပြီးတော့ stability တစ်ခု အနေနဲ့ constant တစ်ခု အနေနဲ့ သွားပြီး တွက်လို့ မရဘူး။ အဲဒီတော့ အခုအချိန်မှာလုပ်ဖို့ က တော့ ပိုက်ဆံ မြန်မြန် ရနိုင်တဲ့ trade route တွေကို ပြန်ပြီးတော့ပြန်လုပ်၊ ခုနလို champion ပြန်ရှာ၊ သေချာ crisis management ပေါ့နော်၊ အဲဒီလို ဖြစ်လို့ ဖြစ်ရမယ့် အဲဒီ crisis move တစ်ခုနဲ့ manage လုပ်မှပဲ ရမယ်လို့ ထင်တယ်၊ ခုနလိုမျိုး ဟို static ပုံစံနဲ့ formula ထဲ ထည့်ပြီးတော့ လုပ်လို့ ရနိုင်မယ့် အခြေအနေ မရှိဘူးလို့ မြင်ပါတယ်” ဟု ပြောသည်။

၂၀၂၁ ခုနှစ်နောက်ပိုင်း နိုင်ငံရေး အခြေအနေ ပြောင်းလဲမှုများကြား နယ်စပ်ဒေသအချို့၌ တိုက်ပွဲများနှင့် နယ်စပ်ဂိတ်များ ပိတ်ထားရခြင်းကြောင့် တရားဝင် နယ်စပ်ကုန်သွယ်မှု ပမာဏ သိသိသာသာ လျော့ကျ သွားပြီး အခွန် မဆောင်သည့် တရားမဝင် မှောင်ခိုကုန်သွယ်မှုများ ပိုမို များပြားလာလျက်ရှိသည်။

ထိုသို့ တရားမဝင် မှောင်ခိုကုန်သွယ်မှု ပိုမို များပြားလာသော်လည်း ခရီးလမ်းတစ်လျှောက်ရှိ လက်နက် ကိုင် ဂိတ်များအားလုံးကို ဂိတ်ကြေး ပေးဆောင်ရခြင်း၊ လာဘ်ထိုးရခြင်း၊ ဖမ်းဆီးခံရပါက ကုန်များကို ပြန်လည် ရွေးယူရခြင်းတို့ကြောင့် ပြည်တွင်း၌ ကုန်ဈေးနှုန်းများမှာ ကျဆင်းသွားသည် မရှိဘဲ မြင့်တက် လျက်သာ ရှိနေသည်။

Websiteတွင်ဖတ်ရှုရန်........https://cnimyanmar.com/local-news-2/local-business/38783-swinkone-phoetkone-muuwardaaarr-sainhkyaarnaeehpyang-hcainhcarrpark-mahpyitnine

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

ပုံ - ပို့ကုန်သွင်းကုန်နဲ့သင်္ချာနည်းကို သရုပ်ဖော်ပြထားစဉ်

09/09/2026

စက်တင်ဘာလ ၉ ရက်နေ့ ငွေ/စက်သုံးဆီ ဈေးနှုန်းများ

CNI News

၂၀၂၆ ခုနှစ်၊ စက်တင်ဘာလ ၉

ယနေ့ ( စက်တင်ဘာလ ၉ ) နံနက် ငွေဈေးနှင့်စက်သုံးဆီ ဈေးနှုန်းများကို ဖော်ပြပေးလိုက်ပါသည်။

အချိန်နှင့်အမျှ အပြောင်းအလဲ ရှိနိုင်ပါသည်။

Website တွင်ကြည့်ရှုရန်- - - -https://cnimyanmar.com/watch-tv-2/38790-hcaattainbharl-9-raatnae-ngway-hcaatsonese-jhayynhuannmyarr

ဒွန်နာရမ်မာထံ မလိုအပ်ဘဲ ပေးပို့မှုမလုပ်ဖို့ မာရက်စ်ကာ သတိပေး CNI Sport News၂၀၂၆ ခုနှစ်၊ စက်တင်ဘာ ၉မန်စီးတီးအသင်းနည်းပြ မ...
09/09/2026

ဒွန်နာရမ်မာထံ မလိုအပ်ဘဲ ပေးပို့မှုမလုပ်ဖို့ မာရက်စ်ကာ သတိပေး

CNI Sport News

၂၀၂၆ ခုနှစ်၊ စက်တင်ဘာ ၉

မန်စီးတီးအသင်းနည်းပြ မာရက်စ်ကာဟာ ပေါ်တိုအသင်းကို ၂ ဂိုး-ဂိုးမရှိနဲ့ ချန်ပီယံလိဂ် ပွဲအပြီးမှာ ဂိုးသမား ဒွန်နာရမ်မာရဲ့ စွမ်းဆောင်ရည်ကို ကျေနပ်ပေမယ့် ဂိုးသမားထံ မလိုအပ်ဘဲ ဘောလုံးပြန်ပေးပို့မှုတွေ မလုပ်ဖို့ သတိပေးခဲ့ပါတယ်။

မာရက်စ်ကာက “ဒီပွဲမှာ အကြိမ် အနည်းငယ်ဖြစ်ခဲ့တာက ဒွန်နာရမ်မာရဲ့ အမှားမဟုတ်ပါဘူး။ သူ့ဆီ ဘောလုံး ပြန်ပေးပို့တာတွေဟာ ဆုံးဖြတ်ချက် မှားခဲ့တယ်လို့ ကျနော်ထင်ပါတယ်။ တခြား ရွေးချယ်စရာ မရှိရင်တော့ ဂိုးသမားကို ဘောလုံးပြန်ပေးရမှာ ဖြစ်ပေမယ့် အခု လိုအပ်တာထက်ပိုပြီး သူ့ကို ပြန်ပေးနေပါတယ်။ ကိုဗင်ထရီ နဲ့ပွဲမှာ သူဟာ ဂိုးပေးလိုက်ရမလို အမှားမျိုး ဖြစ်ခဲ့ပေမယ့် ဒါဟာ အသင်းဖော်က သူ့ကို ဘောလုံးပြန်ပေးတဲ့ ဆုံးဖြတ်ချက် အမှားကြောင့်ပါ”လို့ ပြောခဲ့တာပါ။

မန်စီးတီးအသင်းဟာ တိုက်စစ်မှူး ဟာလန်းရဲ့ သွင်းဂိုးတွေနဲ့ ချန်ပီယံလိဂ် League Phase အဖွင့်ပွဲကို အနိုင်နဲ့ စတင် နိုင်ခဲ့ပါတယ်။

အီတလီဂိုးသမား ဒွန်နာရမ်မာဟာ ဒီပွဲမှာ ပေါ်တိုအသင်းကို လက်ဆောင်ဂိုးပေးဖို့ နီးစပ်ခဲ့သလို ပြီးခဲ့တဲ့ ကိုဗင်ထရီ အသင်းနဲ့ ပရီးမီးယားလိဂ် ပွဲမှာလည်း သူ့ရဲ့အမှားကနေ ဂိုးပေးရဖို့ နီးစပ်ခဲ့သေးတာပါ။

ဒါပေမယ့် မန်စီးတီးအသင်းနည်းပြ မာရက်စ်ကာက ဒွန်နာရမ်မာအပေါ် စိုးရိမ်မှုမရှိဘဲ ဘောလုံးကို မကြာခဏ ပေးပို့တဲ့ အသင်းကစားသမားတွေကို အပြစ်တင်ခဲ့တာ ဖြစ်ပါတယ်။

မန်စီးတီးအသင်းဟာ ဒီပွဲမှာ ကွင်းလယ်လူသစ် တစ်ဦးဖြစ်တဲ့ ဘူအာဒီကို အန်ဇိုဖာနန်ဒက်ဇ်နဲ့ တွဲဖက်ကာ ပွဲထွက် လူစာရင်းမှာ အသုံးပြုခဲ့ပြီး ဘူအာဒီရဲ့ စွမ်းဆောင်ရည်ကို ကျေနပ်တယ်လို့ နည်းပြမာရက်စ်ကာက ပြောခဲ့ပါတယ်။

ပရီးမီးယားလိဂ်အဖွင့်ပွဲ ၃ ပွဲစလုံး ရာနှုန်းပြည့် အနိုင်ရရှိထားတဲ့ မန်စီးတီးအသင်းဟာ ပွဲစဉ် ၄ အဖြစ် ယူနိုက်တက် အသင်းနဲ့ မန်ချက်စတာဒါဘီပွဲ ယှဉ်ပြိုင်မှာ ဖြစ်ပါတယ်။

Source: ESPN

#သတင်းအပြည့်အစုံကို Comment Link တွင် ဖတ်ရှုရန်

ပုံ - မန်စီးတီးအသင်း နည်းပြ မာရက်စ်ကာကို တွေ့ရစဉ်

နိုင်ငံရေးနှင့် သဘာဝဘေးကို ဖြေရှင်းနေရသည့် နီပေါအစိုးရသစ်CNI International Newsခတ္တမန္ဒူ၊ စက်တင်ဘာ ၉ နီပေါနိုင်ငံတွင် ပြ...
09/09/2026

နိုင်ငံရေးနှင့် သဘာဝဘေးကို ဖြေရှင်းနေရသည့် နီပေါအစိုးရသစ်

CNI International News

ခတ္တမန္ဒူ၊ စက်တင်ဘာ ၉

နီပေါနိုင်ငံတွင် ပြီးခဲ့သည့်နှစ် စက်တင်ဘာလက လူငယ်များ ဦးဆောင်သည့် ဆန္ဒပြမှုများသည် ဆူပူအုံကြွမှုများ အဖြစ် ပြောင်းလဲသွားခဲ့ပြီးနောက် နိုင်ငံရေး အကျပ်အတည်း တစ်ခု ပေါ်ပေါက်လာခဲ့သည်ဟု အေပီမှ ဖော်ပြခဲ့ သည်။

နိုင်ငံအတွင်း လူမှုမီဒီယာများကို ပိတ်ပင်ရာမှ စတင်ဖြစ်ပွားခဲ့သည့် အဆိုပါ ဆန္ဒပြမှုများသည် နောက်ပိုင်းတွင် အစိုးရအဖွဲ့၏ အဂတိလိုက်စားမှုများကိုပါ ဆန့်ကျင်လာခဲ့ပြီး ဆူပူအုံကြွမှုများ အရှိန်မြင့်တက်ခဲ့ကာ လူပေါင်း ဒါဇင်ချီ သေဆုံး၍ အစိုးရ အဆောက်အအုံများနှင့် နိုင်ငံရေးသမားများ၏ နေအိမ်များလည်း မီးရှို့ဖျက်ဆီးခံခဲ့ရ သည်။

ထို့နောက် ဝန်ကြီးချုပ် ကေပီ ရှာမာ အိုလီ (K.P. Sharma Oli) သည် ရာထူးမှ နုတ်ထွက်သွားခဲ့ကာ အစိုးရအဖွဲ့ အပြောင်းအလဲ ဖြစ်ပွားခဲ့ပြီး လက်ရှိတွင် ဝန်ကြီးချုပ်သစ် ဘာလန်ရှား (Balen Shah) က နိုင်ငံရေးအခြေအနေကို တည်ငြိမ်အောင် ကြိုးပမ်းလျက်ရှိသည်။

သို့သော် သြဂုတ် ၂၆ ရက်က တရုတ်နိုင်ငံ တိဘက်ဒေသနှင့် နီပေါနယ်စပ်တွင် ရေခဲမြစ်ပြိုရာမှ ဆိုးရွားပြင်းထန် သည့် ရေကြီးရေလျှံမှု ဖြစ်ပွားခဲ့ပြီး နီပေါဘက်ခြမ်းတွင် လူနေအိမ် ၇၅၀၀ ခန့် ပျက်စီးကာ ရေအားလျှပ်စစ် စီမံကိန်း ၁၂ ခုလည်း ထိခိုက်ပျက်စီးခဲ့သည်။

ထိုသဘာဝဘေးအန္တရာယ်၏ ထိခိုက်ပျက်စီးမှု တန်ဖိုးသည် ဒေါ်လာ ၂ ဒသမ ၅၆ ဘီလျံ ခန့်ရှိမည်ဟု ခန်းမှန်းခဲ့ပြီး လက်ရှိ ဘဏ္ဍာရေးနှစ်အတွက် ဘတ်ဂျက် ဒေါ်လာ ၁၄ ဘီလျံသာ ရှိသည့် နီပေါအစိုးရအတွက် ကြီးမားသည့် စိန်ခေါ်မှု ဖြစ်လာခဲ့သည်။

ထို့ကြောင့် မတ်လကမှ ဝန်ကြီးချုပ်အဖြစ် စတင် တာဝန်ထမ်းဆောင်ခဲ့သည့် အသက် ၃၆ နှစ်အရွယ်သာ ရှိသေး သည့် ဘာလန်ရှားအတွက် နိုင်ငံရေးကို တည်ငြိမ်အောင် ထိန်းသိမ်းနေရချိန်တွင် ဆိုးရွားပြင်းထန်သည့် သဘာဝ ဘေးကို ထပ်မံရင်ဆိုင်ခဲ့ရသည်။

“ရေကြီးရေလျှံမှုဖြစ်တဲ့ နေရာတွေဟာ ဘာမှသုံးစားလို့ မရအောင် ပျက်စီးသွားပါတယ်။ ပြန်လည် ထူထောင်ရေး ကတော့ လွယ်မှာ မဟုတ်ပါဘူး” ဟု လွှတ်တော်အမတ် တစ်ဦးဖြစ်ပြီး နိုင်ငံတကာဆက်ဆံရေးနှင့် ခရီးသွား လာရေးကော်မတီဥက္ကဋ္ဌ ဆမ်နီမာ အူဒက်စ် (Sumnima Udas) က ပြောကြားခဲ့သည်။

ထို့ကြောင့် ရှား၏ အစိုးရအဖွဲ့သစ်သည် ၎င်းတို့၏ ကတိကဝတ်အတိုင်း နိုင်ငံရေးစနစ်ကို ပြုပြင်ပြောင်းလဲမှုများ ပြုလုပ်နေရချိန်တွင် တစ်ဖက်တွင်လည်း သဘာဝဘေးကြောင့် ပြန်လည်ထူထောင်ရေး လုပ်ငန်းစဉ်ကို နိုင်နင်းစွာ ကိုင်တွယ်နိုင်ခြေ ရှိ/မရှိ စောင့်ကြည့်ခံရမည်ဖြစ်သည်။

လက်ရှိ အချိန်တွင် အစိုးရသည် ကယ်ဆယ်ရေးနှင့် ပြန်လည်နေရာ ချထားရေးများအတွက် စစ်တပ်၊ ရဲတပ်ဖွဲ့၊ ရဟတ်ယာဉ်များ၊ ဆေးအဖွဲ့များ၊ ဒေသခံ အာဏာပိုင်များနှင့် ညှိနှိုင်းဆောင်ရွက်မှုများကို လုပ်ဆောင်လျက် ရှိသည်။

Websiteတွင်ဖတ်ရှုရန်........https://cnimyanmar.com/political-2/politics-local/38781-ninenganrayynhang-sabharwabhayyko-hpyayshinnnayrasany-nepawaahcoerasait

Source: အေပီ

CNI Telegram Channel-----https://t.me/ChannelNewsIndependent

CNI Youtube Channel-----https://www.youtube.com/

CNI Tiktok Link----https://www.tiktok.com/?lang=en

CNI Twitter Link-----https://twitter.com/ChannelNewsInd1

ပုံ - နီ‌ပေါရေကြီးနစ်မြုပ်မှုကိုတွေ့ရစဉ်

Address

Yangon

Website

Alerts

Be the first to know and let us send you an email when CNI Burmese posts news and promotions. Your email address will not be used for any other purpose, and you can unsubscribe at any time.

Shortcuts

Share

Category