MyanHealth Media

MyanHealth Media "We make social media a place for health education, not misinformation." ( Doh Eain Mat Co.,Ltd is responsible for this page)

MyanHealth makes social media "a place for health education, not misinformation".
ကျန်းမာရေးဆိုင်ရာသတင်း၊ဆောင်းပါးများနှင့် ပေါ့ကတ်စ် အစီအစဥ်များကိုထုတ်လုပ်တင်ဆက်ပေးနေပါတယ်။

အမျိုးအစား (၁) ဆီးချိုရောဂါရှိသူတွေ မာရသွန်ပြေးနိုင် အမျိုးအစား (၁) ဆီးချိုရောဂါရှိသူတွေအနေနဲ့ သွေးတွင်းသကြားဓာတ်ကို...
19/09/2026

အမျိုးအစား (၁) ဆီးချိုရောဂါရှိသူတွေ မာရသွန်ပြေးနိုင်

အမျိုးအစား (၁) ဆီးချိုရောဂါရှိသူတွေအနေနဲ့ သွေးတွင်းသကြားဓာတ်ကို သေချာစနစ်တကျ ထိန်းသိမ်းမယ်ဆိုရင် မာရသွန်ပြိုင်ပွဲတွေကို ဘေးကင်းကင်းနဲ့ ပြီးမြောက်အောင် ယှဉ်ပြိုင်နိုင်ပြီး ဆီးချိုမရှိသူတွေနဲ့ မတိမ်းမယိမ်း ပန်းဝင်ချိန်မျိုး ရရှိနိုင်တယ်လို့ လေ့လာမှုအသေးစားတစ်ခုက ဆိုပါတယ်။

ဥရောပ ဆီးချိုရောဂါလေ့လာရေးအသင်း (EASD) မှာ တင်ပြခဲ့တဲ့ ဒီသုတေသနမှာ ပို့ဇ်နန် (Poznań) မာရသွန်ပြိုင်ပွဲမှာ ဝင်ရောက်ယှဉ်ပြိုင်ခဲ့ကြတဲ့ အမျိုးအစား (၁) ဆီးချိုရှိသူ အပျော်တမ်းအပြေးသမား ၁၀ ဦးနဲ့ ဆီးချိုမရှိသူ ၁၀ ဦးတို့ ပါဝင်ခဲ့ပါတယ်။ သွေးတွင်းသကြားဓာတ်ကို အဆက်မပြတ် တိုင်းတာပေးတဲ့ Continuous glucose monitoring (CGM) ကိရိယာတွေကို အသုံးပြုခဲ့ကြပေမဲ့ ပြိုင်ပွဲယှဉ်ပြိုင်နေစဉ်မှာတော့ အဲဒီကိရိယာတွေရဲ့ တိကျမှု လျော့ကျသွားတာကို တွေ့ရပါတယ်။ ဒါကြောင့် ပြင်းထန်ပြီး အချိန်ကြာမြင့်တဲ့ လေ့ကျင့်ခန်းတွေ လုပ်ဆောင်ချိန်မှာ တိုင်းတာချက်တွေကို သေချာအတည်ပြုဖို့အတွက် အစဉ်အလာသုံး လက်ချောင်းထိပ် ထိုးဖောက်စစ်ဆေးတဲ့ သွေးတွင်းသကြားဓာတ်တိုင်း စက်တွေကို အသုံးပြုဖို့ လိုအပ်နိုင်သေးကြောင်း ညွှန်ပြနေပါတယ်။

အမျိုးအစား (၁) ဆီးချိုရောဂါရှိသူတွေဟာ သွေးတွင်းသကြားဓာတ်ကို စနစ်တကျ ထိန်းသိမ်းမယ်ဆိုရင် မာရသွန်ပြိုင်ပွဲတွေကို ဘေးကင်းကင်း ပြေးနိုင်ကြပြီး သူတို့ရဲ့ စွမ်းဆောင်ရည်ဟာလည်း ဆီးချိုမရှိတဲ့ အပြေးသမားတွေနဲ့ ရင်ဘောင်တန်းနိုင်ပါတယ်။
ဒီလေ့လာမှုမှာ သွေးတွင်းသကြားဓာတ် ပမာဏ၊ ကာဘိုဟိုက်ဒရိတ် စားသုံးမှုနဲ့ အင်ဆူလင် ပမာဏညှိယူမှုတွေကို စောင့်ကြည့်စစ်ဆေးခဲ့တာဖြစ်ပြီး၊ ဘေးကင်းကင်းနဲ့ ပါဝင်ယှဉ်ပြိုင်နိုင်ဖို့အတွက် သေချာစနစ်တကျ စီမံကိန်းဆွဲခြင်းနဲ့ အကောင်အထည်ဖော်ခြင်းတို့က သော့ချက်ဖြစ်ကြောင်း ပြသနေပါတယ်။

သွေးတွင်းသကြားဓာတ် အဆက်မပြတ်တိုင်းစက် (CGM) တွေဟာ အသုံးဝင်ပေမဲ့ မာရသွန်ပြေးနေစဉ်အတွင်း တိကျမှု လျော့ကျသွားတာမျိုး သတိပြုမိခဲ့တာကြောင့် ဆီးချိုရှိတဲ့ အပြေးသမားတွေအနေနဲ့၊ အထူးသဖြင့် မိမိ ခံစားနေရတဲ့ ရောဂါလက္ခဏာတွေနဲ့ ကိရိယာမှာပြနေတဲ့ အချက်အလက်တွေ မကိုက်ညီတဲ့အခါမျိုးမှာ အစဉ်အလာသုံး သွေးတွင်းသကြားဓာတ်တိုင်းစက်တွေနဲ့ ပြန်လည်စစ်ဆေးအတည်ပြုသင့်ပါတယ်။

ပါဝင်ယှဉ်ပြိုင်သူတစ်ယောက်ဟာ သွေးတွင်းသကြားဓာတ် လျော့နည်းမှု နှစ်ကြိမ် ဖြစ်ပွားခဲ့ပေမဲ့ ပန်းဝင်အောင် ပြေးနိုင်ခဲ့တာကို ကြည့်ရင် သင့်တော်တဲ့ သွေးတွင်းသကြားဓာတ် ပမာဏနဲ့ စတင်ဖို့နဲ့ ကာဘိုဟိုက်ဒရိတ်ကို ပုံမှန်ဖြည့်တင်းပေးဖို့ ဘယ်လောက်အရေးပါတယ်ဆိုတာ ပေါ်လွင်စေပါတယ်။

မာရသွန်ပြေးဖို့ ပြင်ဆင်နေတဲ့ အမျိုးအစား (၁) ဆီးချိုရောဂါရှိသူတွေအနေနဲ့ မိမိရဲ့ တစ်ဦးချင်း ကျန်းမာရေးအခြေအနေတွေကို ထည့်သွင်းစဉ်းစားပြီး အင်ဆူလင်၊ ကာဘိုဟိုက်ဒရိတ်နဲ့ ရေဓာတ်ဖြည့်တင်းမှုတို့အတွက် တစ်ဦးချင်းနဲ့ကိုက်ညီမယ့် အစီအစဉ်တစ်ရပ် ရရှိနိုင်ဖို့ ဆရာဝန်တွေနဲ့ တိုင်ပင်ဆွေးနွေးသင့်ပါတယ်။

Ref: medical express

18/09/2026

သွေးဖောက်ထုတ်ရင် သွေးတိုးကျတယ်ဆိုတာ တကယ်လား? ❌ မှားယွင်းတဲ့ အယူအဆတွေကြောင့် ကိုယ့်ရဲ့ အသက်အန္တရာယ် ထိခိုက်မှုမရှိရလေအောင် ဒီတစ်ပတ် MyanHealth ရဲ့ 'မှန်လား/မှားလား' အစီအစဉ်ကို မဖြစ်မနေ ကြည့်ရှုလိုက်ပါ။
#မှန်လားမှားလား

Weekly Health Round-Up (September Third Week)စာရေးသူ - ကိုတင် မြန်မာ့ သဘာဝဘေးအန္တရာယ်နဲ့ ကာလဝမ်းရောဂါ ကာကွယ်ရေးအတွက် ဆေ...
18/09/2026

Weekly Health Round-Up
(September Third Week)
စာရေးသူ - ကိုတင်

 မြန်မာ့ သဘာဝဘေးအန္တရာယ်နဲ့ ကာလဝမ်းရောဂါ ကာကွယ်ရေးအတွက် ဆေးဝါးနဲ့ အာဟာရဆိုင်ရာ
ထောက်ပံ့ရေးပစ္စည်း ၄၆ မက်ထရစ်တန်နဲ့ ယူရိုငွေ ခုနစ်သိန်းခွဲကို ထောက်ပံ့ပို့ဆောင်လိုက်တယ်လို့
ရန်ကုန်အခြေစိုက် ဥရောပသမဂ္ဂရုံး (EU) က ထုတ်ပြန်ပါတယ်။
 ရခိုင်ပြည်နယ်၊ ကျောက်ဖြူခရိုင်ထဲမှာ အသက်ရှူလမ်းကြောင်းကနေ ကူးစက်တဲ့ရောဂါ အဖြစ်များနေတဲ့
ရွာတွေကို ဒေသပြည်သူ့ကျန်းမာရေးဌာနက ကွင်းဆင်းပြီး ကုသပေးခဲ့တယ်လို့ ဒေသတွင်း
သတင်းမီဒီယာတွေက ဖော်ပြကြပါတယ်။
 ရခိုင်ပြည်နယ်၊ ရမ်းဗြဲကျွန်းက စစ်ဘေးရှောင်တွေမှာ ယားနာရောဂါတွေ ဖြစ်နေတဲ့အပြင် ကျေးရွာပေါင်း
၈၀ လောက်မှာ ရာသီတုပ်ကွေးဖြစ်နေတာကြောင့် ကျန်းမာရေးအကူအညီတွေ လိုအပ်နေတယ်လို့
ရမ္မာမြီပရဟိတ (ရမ္မာမြေ စစ်ဘေးကူညီရေးအဖွဲ့) ဆီကနေ သိရပါတယ်။
 လာရောက်ကုသသူများလို့ ရန်ကုန်ဆေးရုံကြီးနဲ့ မြောက်ဥက္ကလာပဆေးရုံကြီးက ကင်ဆာဌာန
လူနာဆောင်မှာ ထိုင်စရာနေရာ မလောက်အောင်ကို ဖြစ်နေပြီး ပြသဖို့အတွက်လည်း အချိန်အတော်ယူ
စောင့်ဆိုင်းနေရတယ်လို့ သွားရောက်ကုသသူ လူနာတစ်ဦးရဲ့ မိသားစုဝင်တစ်ဦးက MyanHealth ကို
ပြောပါတယ်။
 ရေနစ်မြှုပ်ခဲ့တဲ့ စစ်ကိုင်းတိုင်းထဲက ကျေးရွာတွေက ပြည်သူတွေအတွက်
ကျန်းမာရေးစောင့်ရှောက်မှုတွေကို ဒေသအာဏာပိုင်တွေက ပြုလုပ်ပေးနေပြီး တချို့နေရာတွေမှာဆိုရင်
အခုအချိန်အထိ ရေဝပ်နေဆဲ ဖြစ်တယ်လို့ သိရပါတယ်။

 ရှမ်းပြည်မြောက်ပိုင်း “ဝ” အထူးဒေသ၊​ မန်မန်းဆိုင်းမြို့နယ်မှာ စက်တင်ဘာ ၁၄ ရက်က
ပန်ဆန်းမြို့နယ် ပြည်သူ့ကျန်းမာရေးနှင့် ကုသရေးဌာန၊ “ဝ” ကျန်းမာရေးဌာနနဲ့ မိတ်ဖက်အဖွဲ့တွေ
ပေါင်းပြီး ဒေသခံတွေကို ကွင်းဆင်းကုသမှုတွေ လုပ်ပေးခဲ့တယ်လို့ ထုတ်ပြန်ထားပါတယ်။
 နှလုံးသွေးကြောပိတ် လူနာ ခြောက်ဦးကို နှလုံးစက်မသုံးဘဲ နှလုံးသွေးကြော အစားထိုးဖြတ်ကျော်
ဆက်သွယ်တဲ့ ခွဲစိတ်ကုသမှု (Off-Pump Coronary Artery Bypass Surgery) ကို တရုတ်နိုင်ငံ
ရှန်ဟိုင်းမြို့က Yidi ဆေးရုံနဲ့ Shanghai University Medical School က ဒေါက်တာဖန်းဝမ်ဦးဆောင်တဲ့
အဖွဲ့ဝင် ငါးဦးပါ အဖွဲ့နဲ့ မန္တလေးပြည်သူ့ဆေးရုံကြီး၊ နှလုံးနဲ့ သွေးကြောခွဲစိတ်ကုဌာနတို့ ပူးပေါင်းပြီး
ပြုလုပ်ခဲ့တယ်လို့ ထုတ်ပြန် ထားပါတယ်။
 HIV ဝေနာရှင်တွေ သောက်သုံးရ ပိုလွယ်စေမယ့် Gilead ကုမ္ပဏီထုတ် HIV ဆေးအသစ်ကို အမေရိကန်
အစားအသောက်နှင့် ဆေးဝါးကွပ်ကဲရေးဌာန (FDA) က အတည်ပြုလိုက်ပြီ ဖြစ်တယ်လို့ CNBC
သတင်းက ရေးသားထားပါတယ်။
 ကမ္ဘာကျော် အလှကုန်ကုမ္ပဏီ L’Oreal က ထုတ်တဲ့ ဆံပင်ဖြောင့်ဆေးမှာ ကင်ဆာဖြစ်စေနိုင်တဲ့
အန္တရာယ်ရှိတာကို ထိမ်ချိန်ဖုံးကွယ်ထားမှုနဲ့ အမေရိကန်၊ အရီဇိုးနားပြည်နယ် ရှေ့နေချုပ်က
တရားစွဲဆိုလိုက်ပြီး သားအိမ်ကင်ဆာနဲ့ မျိုးဥအိမ်ကင်ဆာ ဖြစ်ပွားနိုင်ခြေ သတိပေးချက်ကို
မထုတ်ပြန်တာဟာ စားသုံးသူရေးရာဥပဒေကို ချိုးဖောက်တာ ဖြစ်တယ်လို့လည်း စွပ်စွဲထားပါတယ်။
ဆံပင်ဖြောင့်ဆေးကြောင့် ကင်ဆာဖြစ်နိုင်ခြေ​ရှိတာနဲ့ ပတ်သက်ပြီး ပြည်နယ်တစ်ခုအနေနဲ့ ပထမဆုံး
တရားစွဲတာလည်း ဖြစ်ပါတယ်။

 နိုင်ငံခြားသား လူနာနှစ်ဦးကို သူတို့ဖြစ်ပွားနေတဲ့ ကင်ဆာအခြေအနေနဲ့ ကိုက်ညီအောင် ပြုလုပ်ထားတဲ့
ကာကွယ်ဆေးတွေနဲ့ ကုသပေးနေပြီး ဒါဟာ ထိုင်းနိုင်ငံရဲ့ ကင်ဆာစီမံကိန်းတစ်ခုအောက်ကနေ
ဖြစ်တယ်လို့ အစိုးရ ဆေးဝါးဆိုင်ရာအဖွဲ့ (GPO) ညွှန်ကြားရေးမှူး ဒေါက်တာ မင်းကွမ် ဆူဖန်နဖွန်က
ပြောပါတယ်။ တစ်နှစ်ကြာ ခံယူရမယ့် ဒီကုသမှု ကုန်ကျစရိတ်ဟာ ဘတ် သန်း ၄၀ ကနေ ၇၀
လောက်အထိ ရှိနိုင်ပြီး ပြည်သူ့ဆေးရုံတွေမှာပါ ဒီကုသမှုကို တိုးချဲ့ပေးနိုင်ရင် နိုင်ငံထဲက
လူနာတွေအတွက် ကုန်ကျစရိတ် ပိုသက်သာလာနိုင် မယ်လို့လည်း GPO က မျှော်လင့်ထားပါတယ်။
 “ဝိတ်ချ ထိုးဆေးဘောပင်” လို့ လူသိများတဲ့ GLP-1 ထိုးဆေးကို စက်တင်ဘာ ၁၅ ရက်က စပြီး
အထူးထိန်း ချုပ်ဆေးဝါးအဖြစ် ထိုင်းနိုင်ငံ၊ အစားအသောက်နှင့် ဆေးဝါးကွပ်ကဲရေးဦးစီးဌာန (FDA) က
သတ်မှတ်မှာ ဖြစ်ပြီး ဆေးဆိုင်တွေမှာ ဝယ်မယ်ဆိုရင် ဆေးစား လိုအပ်သလို ထုတ်ပေးတဲ့အခါမှာလည်း
ဆေးဝါးကျွမ်းကျင်ပညာရှင်တွေကသာ ထုတ်ပေးရတော့မှာ ဖြစ်ပါတယ်။ အခုလို လုပ်တာဟာ ဆေးကို
မသင့်လျော်ဘဲ သုံးတာ၊ ဆေးအတုနဲ့ မှတ်ပုံမတင်ထားတဲ့ ဆေးတွေ ရှိနေတာအပြင် အွန်လိုင်းကနေ
လက်လွတ်စပယ် ရောင်းချတာတွေကို စိုးရိမ်ရတဲ့အတွက်ကြောင့် ဖြစ်ပြီး ဆေးတင်သွင်းချိန်ကနေ စပြီး
သိုလှောင်တာ၊ လူနာဆီ ဆေးပေးတဲ့ အဆင့်အထိ ခြေရာခံစောင့်ကြည့်မယ့် Track & Trace
စနစ်ကိုလည်း လုပ်ဆောင်သွားမယ်လို့ ထိုင်း FDA က ထုတ်ပြန်ထားပါတယ်။
 ဝက်သက်ရောဂါကြောင့် အမေရိကန်၊ ပင်ဆယ်လ်ဗေးနီးယားပြည်နယ်မှာ သေဆုံးသူ လေးဦးအထိ
ရှိနေပြီး နောက်ဆုံးသေဆုံးသူဖြစ်တဲ့ ပြည်နယ်အလယ်ပိုင်း မစ်ဖလင်ကောင်တီမှာ နေတဲ့ အသက် ၁၈
နှစ်အရွယ် လူငယ်ဖြစ်ပြီး ဝက်သက်ရောဂါရဲ့ ရှားပါးတဲ့ နောက်ဆက်တွဲအာရုံကြောဆိုင်ရာ Acute
Disseminated ရောဂါကြောင့် ဖြစ်တယ်လို့ ပြည်နယ်အာဏာပိုင်တွေ ထုတ်ပြန်မှုကို ကိုးကားပြီး AP

သတင်းမှာ ဖော်ပြထားပါတယ်။ အားလုံးဟာ ဝက်သက်ကာကွယ်ဆေး မထိုးထားသူတွေ ဖြစ်ပြီး
သေဆုံးသူထဲပါတဲ့ မွေးကင်းစကလေးနှစ်ဦးက တော့ အသက်မပြည့်သေးတာကြောင့်
ဆေးမထိုးထားရသူတွေပါ။ အမေရိကန်မှာ ၁၉၉၁ ခုနှစ်နောက်ပိုင်း ဝက်သက်ရောဂါ ဖြစ်ပွားမှု
အများဆုံးနှစ်တွေကို ကြုံတွေနေရပြီး ပြီးခဲ့တဲ့ နှစ်နှစ်အတွင်းကလည်း ဒီရောဂါနဲ့ ဆက်စပ်ပြီး သေဆုံးသူ
ခုနစ်ဦးအထိ ရှိခဲ့ပါတယ်။
 GLP-1 အမျိုးအစား ဝိတ်ချဆေးနဲ့ ဆီးချိုရောဂါကု ဆေးတွေ သုံးသူအနည်းငယ်မှာ ရှားပါးပြီး
ပြင်းထန်တဲ့ ဦးနှောက်ရောဂါတစ်မျိုး ဖြစ်ပွားခဲ့တာကို တွေ့ရှိခဲ့တယ်လို့ လေ့လာဆန်းစစ်မှုတစ်ခုကို
အခြေခံပြီး Independent သတင်းက ရေးသားထားပါတယ်။ အမေရိကန် FDA ရဲ့
ဆေးဝါးဘေးထွက်ဆိုးကျိုးဖြစ်ရပ် ဆိုင်ရာ မှတ်တမ်းတွေနဲ့ သက်ဆိုင်တဲ့ လေ့လာချက်တွေကို
ပြန်လည်ဆန်းစစ်ခဲ့ရာမှာ ၂၀၂၃ ကနေ ၂၀၂၄ ခုနှစ်အတွင်း ဗီတာမင် B1 အလွန်အမင်းချို့တဲ့လို့ ဖြစ်တဲ့
အသက်အန္တရာယ်ကိုပါ ထိခိုက်နိုင်တဲ့ အာရုံကြောဆိုင်ရာ Wernicke encephalopathy ရောဂါဖြစ်ခဲ့သူ
၁၅ ဦးကို တွေ့ရှိခဲ့တာ ဖြစ်ပါတယ်။ ဒီရောဂါဟာ မှတ်ဉာဏ်ပိုင်းဆိုင် အမြဲထိခိုက်နိုင်သလို မှတ်ဉာဏ်သစ်
ဖန်တီးနိုင်စွမ်းကိုလည်း ပျောက်ဆုံးစေနိုင်ပေမယ့် ဒီဆေးသုံးသူ သန်းနဲ့ ချီ​ရှိတာကြောင့် တွေ့ခဲ့တဲ့
လူနာအရေအတွက်ကို အရမ်းကို နည်းပြီး ရှားပါးအခြေအနေ တစ်ခုဖြစ်တယ်လို့ ချီကာဂိုအခြေစိုက်
ဆရာဝန် ကာသစ် အာချာရီက ပြောပါတယ်။

ရင်သွေးငယ် သွားကျန်းမာရေး(ရေးသားသူ - Dr. အောင်ကိုထက်)​ယနေ့ခေတ်ရဲ့ လူနေမှုဘဝတွေက ခက်ခဲပင်ပန်းကြပါတယ်။ အိမ်ထောင်ပြုဖို့တော...
17/09/2026

ရင်သွေးငယ် သွားကျန်းမာရေး

(ရေးသားသူ - Dr. အောင်ကိုထက်)

​ယနေ့ခေတ်ရဲ့ လူနေမှုဘဝတွေက ခက်ခဲပင်ပန်းကြပါတယ်။ အိမ်ထောင်ပြုဖို့တောင် စဉ်းစဉ်း စားစားဖြစ်နေတဲ့ခေတ်ကာလမှာ သားသမီးယူကြဖို့ဆိုတာ ပိုလို့တောင်ခက်ခဲလာကြပါတယ်။ အိမ်ထောင်ပြုတဲ့နှုန်း၊ ကလေးယူတဲ့နှုန်းထားတွေ သိသိသာသာကျဆင်းလာတာမြင်နေကြရတာပဲဗျ။ အဲ့လိုအခြေအနေအတွင်း အိမ်ထောင်ပြု၊ ကလေးယူကြပြီဆိုရင် အရင်ခေတ်တွေကထက်ပိုပြီး ခက်ခဲမှု တွေ၊ စိန်ခေါ်မှုတွေနဲ့ ပူပန်နေကြရပါတယ်။ ငွေရေးကြေးရေး၊ နေထိုင်စားသောက်ရေး၊ ရင်သွေးငယ်ရဲ့ ဖွံ့ဖြိုးတိုးတက်ရေး၊ အထွေထွေကျန်းမာရေး၊ ပညာရေး အစရှိတဲ့ ထင်သာမြင်သာရှိတဲ့ အကြောင်းအရာ တွေနဲ့ပဲ လုံးပန်းကြရတဲ့အခါ သွားနှင့်ခံတွင်းကျန်းမာရေးကို ဂရုပြုအလေးထားနိုင်ဖို့ရာ မလွယ်ပါဘူး။ ဒါပေမဲ့ သွားဘက်ဆိုင်ရာဆရာဝန်တယောက်အနေနဲ့ မိဘတွေအတွက် ရေရှည်မှာ ငွေကုန်ကြေးကျ နည်းအောင်၊ ကလေးငယ်တွေ သွားနဲ့ပတ်သက်တဲ့ ဝေဒနာတွေ မခံစားရအောင်၊ မိဘရော ကလေးရော ရေရှည်မှာ စိတ်ချမ်းသာစေဖို့အတွက် သွားနှင့်ခံတွင်းကျန်းမာရေးအသိပညာ မျှဝေပေးလိုတာဖြစ်ပါတယ်။

​ရင်သွေးငယ်မွေးဖွားထားတဲ့မိခင်မှာ ရင်သွေးလေးတရက်ပြီးတရက် ကျန်းကျန်းမာမာ ရှင်သန် ကြီးထွားဖို့ ဂရုစိုက်ပေးနေရတဲ့တာဝန်၊ ဝတ္တရားတွေအပြင် ခံတွင်းသန့်ရှင်းကျန်းမာရေးကိုလည်း အလေးထားရမဲ့ အကြောင်းထပ်တိုးအသိပေးချင်ပါတယ်။ မိခင်အတွက် တာဝန်ပိုများသွားပေမဲ့ မိမိ ရင်သွေးငယ်အတွက် ကောင်းမွန်ကျန်းမာတဲ့ သွားနှင့်ခံတွင်းကို ပိုင်ဆိုင်ပြီး ရေရှည်မှာ စိတ်ချမ်းသာစေ မှာဖြစ်ပါတယ်။ ရင်သွေးငယ်ရဲ့ တကိုယ်ရည်သန့်ရှင်းရေး ဂရုစိုက်ပေးသလို ခံတွင်းသန့်ရှင်းဖို့ပြုလုပ် ပေးတဲ့အခါမှာ သန့်ရှင်းတဲ့ပိတ်စ(Steriled Gauze)အသုံးပြုရမှာ ဖြစ်ပါတယ်။ ပိတ်စကို ရေကျက်အေး မှာစိမ်၊ ရေညှစ်ပြီး သန့်ရှင်းစင်ကြယ်အောင်ဆေးထားတဲ့ မိခင်ရဲ့လက်ညှိုးမှာပတ်တဲ့အနေအထားနဲ့ သွားဖုံး၊ လျှာတွေကို ညင်ညင်သာသာ သုတ်သင်သန့်ရှင်းပေးရပါမယ်။ မနက်တကြိမ်၊ ညတကြိမ် ပြုလုပ်ပေးနိုင် ပါတယ်။ ဒီလိုလုပ်ပေးတာက ခံတွင်းသန့်ရှင်းရေးအပြင် သွားလေးတွေထွက်ပေါ်လာမဲ့ သွားဖုံးဖွံ့ဖြိုးရေးကိုလည်း လှုံ့ဆော်ပေးရာရောက်ပါတယ်။ သွားစတင်ထွက်ပေါ်လာပြီဆိုရင်တော့ သွားဖုံး/လျှာနဲ့ သွားဘေးပတ်လည်ကိုပါ သန့်ရှင်းပေးရပါမယ်။ သန့်ရှင်းရေးပုံမှန်ပြုလုပ်ပေးထားတဲ့ ကလေးရဲ့ ခံတွင်းထဲမှာ ဘက်တီးရီးယားပေါက်ပွားမှုလည်းနည်းပါးတဲ့အတွက် ပေါက်လာတဲ့သွား တွေမှာ အလွယ်တကူသွားပိုးစားတာ၊ သွားဖုံးရောဂါဝင်တာနည်းပါတယ်။ ခံတွင်းထဲမှာ အစာအကြွင်း အကျန်လည်း မကျန်ရှိတဲ့ အတွက် ကလေးရဲ့ ခံတွင်းနံ့လည်း ကောင်းမွန်ပါလိမ့်မယ်။

​ရင်သွေးငယ်မွေးဖွားပြီး အသက်တနှစ်ပြည့်တဲ့အခါ တနှစ်ပြည့်မွေးနေ့ကို သတိတရလုပ်ပေးကြ သလို တနှစ်ပြည့်အသက်အရွယ်အတွက် သွားနှင့်ခံတွင်းဆေးခန်းမှာ ပြသစစ်ဆေးအကြံဉာဏ်ယူဖို့လို ပါတယ်။ "သွားငုတ်တုတ်၊ လူငုတ်တုတ်'ဆိုသလိုပဲ ကလေးငယ်လေး ငုတ်တုတ်ထိုင်နိုင်တဲ့အရွယ် (၆လ-၈လ)ဝန်းကျင်မှာ အောက်ရှေ့သွားလေး နှစ်ချောင်းလည်း ငုတ်တုတ်ပေါက်လာပါပြီ။ ဖြည့်စွက်စာ စတင်စားတဲ့အချိန်ဆိုရင် ခံတွင်းထဲမှာ အစာအကြွင်းအကျန်လည်း ရှိလာပါပြီ။ ဒါကြောင့် ခံတွင်းသန့် ရှင်းရေးဂရုစိုက်ပေးရသလို တချို့မိဘတွေက သွားစပေါက်တာနဲ့ သွားဆေးခန်းမှာ လာရောက်တိုင်ပင် ဆွေးနွေးတာမျိုးလည်း ရှိကြပါတယ်။ ပထမသွားစပေါက်ချိန် ဒါမှမဟုတ် ကလေးအသက်တနှစ်ပြည့် ပြီးချိန်မှာ ပထမဆုံးအကြိမ် သွားဆေးခန်းသို့လာရောက်စစ်ဆေးတိုင်ပင်ခြင်း(First dental visit)လုပ် ပေးလို့ရပါတယ်။ သွားဆေးခန်းမှာ စောစောပြသအကြံဉာဏ်ယူထားရင် ကလေးရဲ့ အစားအသောက် အလေ့အကျင့်၊ သွားတွေမှာ သွားပိုးစားရောဂါဖြစ်နိုင်ချေ အနေအထား၊ သွားရဲ့ ကြွေလွှာခိုင်ခံ့မှုအနေ အထား၊ ထွက်ပေါ်လာမဲ့သွားတွေ နေရာတကျပေါက်လာပြီး ကျန်းမာနေဖို့၊ လူကြီးသွားများမပေါက်ခင် ကောင်းမွန်စွာ ဝါးစားနိုင်ဖို့နဲ့ စနစ်တကျသွားနှင့်ခံတွင်း သန့်ရှင်းရေးကို မိဘကိုယ်တိုင် နားလည် သဘောပေါက်စေနိုင်ပါတယ်။

​သွားတချောင်း စပေါက်တဲ့အချိန်ကနေ ကလေးအသက်(၆)နှစ် မပြည့်ခင်အရွယ်အတွင်း ကလေးငယ်တွေမှာဖြစ်တတ်တဲ့ "ကလေးငယ်အစောပိုင်းအရွယ် သွားပိုးစားရောဂါ(Early Childhood Caries-ECC)အကြောင်းပြောချင်ပါတယ်။ ECC က ညဖက်အိပ်တဲ့အခါ နို့ဘူးတပ်ပြီးအိပ်တဲ့ကလေးတွေ မှာ အဖြစ်များပါတယ်။ Nursing Bottle Caries လို့လည်းခေါ်ပါတယ်။ ကလေးရဲ့သွားမျက်နှာပြင်တွေ က တညလုံးအချိုနဲ့ထိတွေ့ပြီး စိမ်ထားသလိုဖြစ်တဲ့အခြေအနေကြောင့် ငယ်ရွယ်လွန်းတဲ့ကလေးရဲ့ သွားတွေမှာ သွားပိုးစားဖြစ်စဉ် စလာပါတယ်။ နေ့လည်ဘက်တွေမှာပါ အချိုတွေကျွေးနေမိတယ် ဆိုရင်တော့ ပိုဆိုးပြီပေါ့ဗျာ။ ဒီကြားထဲ သွားသန့်ရှင်းရေးကျတော့လည်း ကောင်းကောင်းဂရုစိုက်ပြီး မလုပ်ပေးဖြစ်ဘူး ဆိုရင် ECC ဖြစ်နိုင်ချေမြင့်မားနေပါပြီ။

​အုပ်ထိန်းသူမိဘတွေရဲ့ သွားနှင့်ခံတွင်း သန့်ရှင်းကျန်းမာရေးကလည်း တခန်း တကဏ္ဍအရေး ပါလာပြန်ပါတယ်။ အုပ်ထိန်းသူတွေမှာ သွားပိုးစား​ရောဂါ၊ သွားဖုံးရောဂါရှိနေရင် ကလေးကိုနမ်းတာ၊ ဇွန်း ပန်းကန်အတူမျှသုံးတာ၊ ကလေးကို အစာမခွံ့ခင် အစာအေးအောင်လေမှုတ်ပြီး ကျွေးတာကအစ ချီပြီး လူကြီးပါးစပ်ထဲက ဘက်တီးရီးယားတွေက ကလေးဆီကို ရောက်လာပြီး ကလေးမှာလည်း သွားပိုးစားရောဂါ၊ သွားဖုံးရောဂါဖြစ်လာနိုင်ဖို့ အခွင့်အလမ်း ပိုများလာပါတယ်။ ဒါ့ကြောင့် အုပ်ထိန်းသူ မိဘတွေမှာလည်း သွားပိုးစားရောဂါ ကုသကာကွယ်ထားတာ၊ မိဘကိုယ်တိုင်က သွားနှင့်ခံတွင်း ကျန်းမာရေး အသိရှိတာတွေက ကလေးအတွက်များစွာအထောက်အကူဖြစ်ပါတယ်။ ကလေးရဲ့ ခံတွင်း ထဲမှာဘက်တီးရီးယားတွေက အချဉ်ဖောက်လိုက်တဲ့ အက်စစ်ထွက်ပေါ်မှု ခဏခဏဖြစ်ပြီး သွားမျက်နှာ ပြင်ဆွေးမြေ့ပျက်စီးတာကနေ ECC စဖြစ်လာပါတော့တယ်။ ကလေးရဲ့သွားတွေမှာ အဖြူကွက်၊ အညို ကွက်နဲ့ ချိုင့်နေ ပေါက်နေတာတွေရှိနေပြီဆိုရင် သွားဆေးခန်းပြသဖို့ အရေးတကြီး အချက်ပြနေပြီ ဖြစ်ပါတယ်။ ECC ဖြစ်နိုင်ချေမြင့်မားတဲ့ကလေးတွေကို သွားဆေးခန်းမှာ ဖလိုရိုက်ဒ်ကုသမှုပြုလုပ်ပေး လို့ရပါတယ်။ နာကျင်မှုမရှိသေးလို့ လစ်လျူရှုထားမယ်ဆိုရင် မလွဲမသွေ နာကျင်တဲ့အဆင့်ကိုရောက်ပြီး ပိုမိုပြင်းထန်တဲ့(Severe ECC)ဖြစ်လာနိုင်ပါတယ်။ ဒါ့ကြောင့် မိဘတွေရေရှည်မှာ စိတ်မော လူမော မဖြစ်ရအောင် ကလေးသွားစထွက်ပြီဆိုတာနဲ့ သွားဆေးခန်းမှာ ပြသတိုင်ပင်ကြဖို့ အကြံပြုပြောဆိုတာ ဖြစ်ပါတယ်။

​နောက်တခုသတိထားရမှာက "ပြင်းထန်လျင်မြန်စွာ ပျံ့နှံ့သောသွားပိုးစားရောဂါ(Rampant Caries)" ဖြစ်ပါတယ်။ ဒီဖြစ်စဉ်ကတော့ ကလေးရော လူကြီးမှာပါ ခံတွင်းထဲက သွားအားလုံးနီးပါး သွားပိုးစားဖြစ်စဉ် လျင်လျင်မြန်မြန် ဖြစ်သွားတဲ့အခြေအနေကို ဆိုလိုတာဖြစ်ပါတယ်။ အကယ်၍ ECC ဖြစ်နေပါလျက် "ကလေးသွားတွေပဲ လူကြီးသွားပြန်ပေါက်လာလိမ့်မယ်'' ဆိုပြီး ပစ်ထားလိုက်ရင် Rampant Caries ဖြစ်သွားနိုင်ပါတယ်။ ဘာမှမဟုတ်ပါဘူးလို့ ထင်တဲ့ကိစ္စလေးက နောက်နေ့တွေမှာ ပြဿနာအကြီးကြီးဖြစ်လာနိုင်ပါတယ်ဗျ။ အစားအသောက်ရွေးချယ်မှု မမှန်ကန်ခြင်း၊ ပုံမှန်ထက် သကြားစားသုံးမှုများခြင်း၊ ခံတွင်းထဲမှာ တံတွေးအထွက်နည်းတဲ့ အခြေအနေဖြစ်နေခြင်း၊ သွားနှင့် ခံတွင်း သန့်ရှင်းရေး လုံလောက်မှု မရှိခြင်း၊ ခံတွင်းထဲမှာ ဘက်တီးရီးယား ပမာဏကြောက်စရာကောင်း အောင်များပြားလွန်းခြင်း၊ သွားအပေါ်ယံကြေွလွှာအားနည်းခြင်းနဲ့ သွားမျက်နှာပြင်အတွက် လိုအပ်တဲ့ ဖလိုရိုက်ဒ်ဓာတ်ရရှိမှုနည်းခြင်းတွေက Rampant Caries ဖြစ်ပွားနိုင်ချေများတဲ့အခြေအနေအကြောင်း အရာတွေဖြစ်ပါတယ်။ ဒီဖြစ်စဉ်က အချိန်မြန်မြန်နဲ့ပဲ ခံတွင်းထဲက သွားတော်တော်များများ သွားပိုးစား ရောဂါဖြစ်ပြီး ကလေးရဲ့ သွားနှင့်ခံတွင်းမှာ ဆိုးဆိုးဝါးဝါးနာကျင်ရောင်ရမ်းတာ၊ ပိုးဝင်တာ၊ အစာစားရ ခက်တာ၊ စကားပြောဖို့ခက်တာအပြင် တခြားခန္ဓာကိုယ်ဖွံ့ဖြိုးမှုတွေမှာပါ ဆိုးကျိုးသက်ရောက်နိုင်ပါ တယ်။ ကျောင်းနေအရွယ်ကလေးတယောက်သာဆိုရင် ခဏခဏရောဂါပိုးဝင်တာ၊ ရောင်ရမ်းတာ၊ နာကျင်တာဖြစ်လာပြီး ကျောင်းခဏခဏပျက်ရ၊ ညမအိပ်နိုင်၊ အစာမစားနိုင်တာနဲ့ ကလေးရဲ့စိတ် အခြေအနေလည်း အဆင်ပြေမှာ မဟုတ်ပါဘူး။ ကလေးသွားကနေတဆင့် တချိန်မှာပေါက်လာဖို့ မေးရိုးထဲမှာရှိနေတဲ့ လူကြီးသွားတွေကိုပါ ထိခိုက်တဲ့အထိ ဖြစ်နိုင်ပါတယ်။ အနာဂတ်မှာလည်း သွားနဲ့ ပတ်သက်ပြီး စိတ်ညစ်စရာတွေကြုံရနိုင်သလို မိမိကိုယ်ကို ယုံကြည်မှုကျဆင်းပြီး ပြောဆိုဆက်ဆံရေး တွေမှာပါ စိတ်အနှောင့်အယှက်ဖြစ်စရာတွေဖြစ်လာနိုင်ပါတယ်။

​ဒါ့ကြောင့် စောစီးစွာ သွားဆေးခန်းမှာ ပြသတိုင်ပင်ဖို့က အရေးကြီးပါတယ်။ ကြိုတင်ကာကွယ် မှုက ရင်သွေးငယ်တွေကို နာကျင်မှုကနေ ကင်းဝေးစေမှာဖြစ်ပါတယ်။ ဒီလိုကြိုတင်ကာကွယ်ကုသမှု ပြုလုပ်ခြင်း၊ စနစ်မှန်သွားသန့်ရှင်းရေး ဂရုစိုက်လုပ်ခြင်း၊ မိဘရဲ့ သွားနှင့်ခံတွင်းကျန်းမာရေး အသိပညာ ရှိခြင်းနဲ့ အချိန်မှန်သွားဆေးခန်းချိန်းဆိုပြသခြင်းတွေက ကလေးရဲ့ခံတွင်းထဲမှာ သွားပိုးစားပေါက်တွေ ကင်းစင်စေမှာဖြစ်ပါတယ်။ ကျန်းမာတဲ့ကလေးသွားလေးတွေက ကျန်းမာတဲ့လူကြီးသွားတွေပေါက် လာဖို့ ရှေ့ဆောင်အခင်းအကျင်းတရပ်ဖြစ်တယ်ဆိုတာ မိဘများသတိမူဖို့ ပြောပြရင်းကလေးငယ်တိုင်း Early Childhood Caries နဲ့ Rampant Caries တွေဖြစ်လာနိုင်တဲ့ အခြေအနေမျိုးမှ ကင်းရှင်းကြပါ စေဗျာ။

16/09/2026

ရှက်နေလို့ ရောဂါမသက်သာပါဘူး။ သိချင်နေတဲ့ ကျန်းမာရေးမေးခွန်းတွေကို 'မရှက်တမ်းမေး' အစီအစဉ်မှာ ယုံကြည်စိတ်ချစွာ ဝင်ရောက်ကြည့်ရှုလိုက်ပါ။
#မရှက်တမ်းမေး

ဆံပင်ဖြောင့်ဆေး(Hair relaxers) တွင် ပါဝင်သော ကင်ဆာဖြစ်ပွားနိုင်ခြေ အန္တရာယ်များကို လျှို့ဝှက်ထားမှုဖြင့် L'Oreal ကို စွပ...
16/09/2026

ဆံပင်ဖြောင့်ဆေး(Hair relaxers) တွင် ပါဝင်သော ကင်ဆာဖြစ်ပွားနိုင်ခြေ အန္တရာယ်များကို လျှို့ဝှက်ထားမှုဖြင့် L'Oreal ကို စွပ်စွဲတိုင်ကြား

ဆံပင်ဖြောင့်ဆေး(Hair relaxers) တွင် ပါဝင်သော ကင်ဆာဖြစ်ပွားနိုင်ခြေ အန္တရာယ်များကို လျှို့ဝှက်ထားမှုဖြင့် L'Oreal ကို အာရီဇိုးနားပြည်နယ်က စွပ်စွဲတိုင်ကြားလိုက်သည်။

L'Oreal SA နှင့် ၎င်း၏ အမေရိကန် အခြေစိုက် ကုမ္ပဏီခွဲတို့သည် ၎င်းတို့၏ ဆံပင်ဖြောင့်ဆေး အသုံးပြုသူ သုံးစွဲသူများနှင့် မိသားစုများထံမှ တရားစွဲဆိုမှုပေါင်း ထောင်ပေါင်းများစွာနှင့် ရင်ဆိုင်နေရစဉ်မှာပင်၊ အဆိုပါ အလှကုန်ကုမ္ပဏီသည် ဆံပင်ဖြောင့်ဆေးများက အမျိုးသမီးများတွင် ကင်ဆာဖြစ်ပွားစေနိုင်သည့် သက်သေအထောက်အထားများကို ဖုံးကွယ်ထားခဲ့သည်ဟု စွပ်စွဲကာ အာရီဇိုးနားပြည်နယ်က တရားစွဲဆိုလိုက်သည်။

ဒီမိုကရက်တစ်ပါတီဝင် အာရီဇိုးနားပြည်နယ် ဥပဒေချုပ် Kristin Mayes သည် ကြာသပတေးနေ့နှောင်းပိုင်းတွင် ပြည်နယ်တရားရုံး၌ တရားစွဲဆိုခဲ့ခြင်းဖြစ်ပြီး၊ အာရီဇိုးနားသည် ဆံပင်ဖြောင့်ဆေးများနှင့် ဆက်စပ်နေသော ကင်ဆာဖြစ်ပွားနိုင်ခြေ စွပ်စွဲချက်များအတွက် ပထမဆုံး စတင်တရားစွဲဆိုသည့် ပြည်နယ်ဖြစ်လာခဲ့သည်။

အဆိုပါ တရားစွဲဆိုမှုတွင် L'Oreal သည် အာဖရိကန်-အမေရိကန် အမျိုးသမီးများ အများစု အသုံးပြုကြသည့် ဤထုတ်ကုန်များကို သားအိမ်ကင်ဆာနှင့် သားအိမ်ခေါင်းကင်ဆာ ဖြစ်ပွားနိုင်ခြေ အန္တရာယ်များနှင့် ပတ်သက်၍ သုံးစွဲသူများအား သတိပေးခြင်းမရှိဘဲ ဈေးကွက်ဖြန့်ဖြူးခဲ့သဖြင့် ပြည်နယ်၏ သုံးစွဲသူကာကွယ်ရေးဥပဒေများကို ချိုးဖောက်ခဲ့သည်ဟု စွပ်စွဲထားသည်။
ပြည်နယ်အနေဖြင့် ဒဏ်ကြေးနှင့် နစ်နာကြေးများ ရရှိရန် တောင်းဆိုထားပြီး၊ L'Oreal အနေဖြင့် ကင်ဆာဖြစ်နိုင်ခြေ အန္တရာယ်ကို သတိပေးခြင်း မပြုသမျှ ကာလပတ်လုံး အဆိုပါ ထုတ်ကုန်များ ရောင်းချမှုကို ရပ်ဆိုင်းရန် တရားရုံး၏ အမိန့်ကိုပါ တောင်းဆိုထားသည်။

အာရီဇိုးနားပြည်နယ်၏ တရားစွဲဆိုချက်တွင် L’Oreal နှင့် ဆက်စပ်ကုမ္ပဏီများသည် ဆယ်စုနှစ်ပေါင်းများစွာ အမျိုးသမီးများနှင့် ကလေးသူငယ်များထံ ထုတ်ကုန်များကို ဈေးကွက်တင် ရောင်းချရာ၌ "သုံးစွဲသူများ၏ ဘေးကင်းလုံခြုံရေးထက် အမြတ်အစွန်းကို ဦးစားပေးခဲ့ပြီး၊ အာဖရိကနွယ်ဖွားများအပေါ် သက်ရောက်နေသည့် ရာစုနှစ်ပေါင်းများစွာ ကြာမြင့်ခဲ့သော လူမှုရေးဖိအားများနှင့် ခွဲခြားဆက်ဆံသည့် အလှအပဆိုင်ရာ စံနှုန်းများကို အမြတ်ထုတ်ခဲ့ကြသည်" ဟု ရေးသားထားသည်။

နယ်မြေဒေသ အသီးသီးမှ တရားစွဲဆိုမှုများကို ပိုမိုထိရောက်စွာ စီမံခန့်ခွဲနိုင်ရန် ပြုလုပ်သည့် တရားစီရင်ရေးဆိုင်ရာ လုပ်ငန်းစဉ်၏ အစိတ်အပိုင်းအဖြစ် ချီကာဂို ဖက်ဒရယ်တရားရုံးတွင် ပေါင်းစည်းထားသည့် အမျိုးသမီးများနှင့် ၎င်းတို့၏ မိသားစုများက စွဲဆိုထားသော တူညီသည့် တရားစွဲဆိုမှု ၁၂,၀၀၀ ကျော်နှင့် ကုမ္ပဏီက ရင်ဆိုင်နေရချိန်တွင် ယခု တရားစွဲဆိုမှု ထွက်ပေါ်လာခြင်းဖြစ်သည်။

L’Oreal USA ၏ ပြောရေးဆိုခွင့်ရှိသူတစ်ဦးက ကုမ္ပဏီအနေဖြင့် ၎င်းတို့၏ ထုတ်ကုန်များ ဘေးကင်းမှုအပေါ် ယုံကြည်မှုအပြည့်ရှိပြီး အဆိုပါ စွပ်စွဲချက်များသည် ဥပဒေကြောင်းအရ သို့မဟုတ် သိပ္ပံနည်းကျအရ ခိုင်လုံမှုမရှိဟု ယူဆကြောင်း ပြောကြားခဲ့သည်။

Dark and Lovely၊ Optimum နှင့် အခြားသော ကုန်အမှတ်တံဆိပ် အမည်များဖြင့် ဈေးကွက်တင်ရောင်းချခဲ့သည့် အဆိုပါ ထုတ်ကုန်များသည် ကောက်ကွေးသော ဆံပင်များကို အမြဲတမ်း ဖြောင့်စင်းသွားစေရန် အာမခံထားသော ထုတ်ကုန်များဖြစ်သည်။

အမျိုးသား ကျန်းမာရေးဌာန (NIH) မှ ပြုလုပ်ခဲ့သော သုတေသနကို ၂၀၂၂ ခုနှစ်တွင် ထုတ်ပြန်ခဲ့ပြီးနောက် ပထမဆုံး တရားစွဲဆိုမှုများ တရားရုံးသို့ ရောက်ရှိလာခဲ့ခြင်းဖြစ်ကာ၊ အဆိုပါ လေ့လာချက်တွင် ထိုထုတ်ကုန်များကို တစ်နှစ်လျှင် အကြိမ်ပေါင်းများစွာ အသုံးပြုသည့် အမျိုးသမီးများသည် သားအိမ်ကင်ဆာ ဖြစ်ပွားနိုင်ခြေ နှစ်ဆထက်မက ပိုများကြောင်း တွေ့ရှိခဲ့ရသည်။
L'Oreal ၏ ပြောရေးဆိုခွင့်ရှိသူက သောကြာနေ့တွင် အဆိုပါ သုတေသနသည် ထိုထုတ်ကုန်များ အသုံးပြုခြင်းနှင့် တရားလိုများ စွပ်စွဲထားသည့် ရောဂါအခြေအနေများအကြား တိုက်ရိုက်အကြောင်းရင်း ဆက်စပ်မှုကို ရှာဖွေတွေ့ရှိခဲ့ခြင်း မရှိကြောင်း ပြန်လည်ပြောကြားခဲ့သည်။
Ref: Reuters

ကလေးငယ်များနှင့် သွေးလွန်တုပ်ကွေးအန္တရာယ်(Si Si)မိုးရာသီရောက်လာတာနဲ့အမျှ မိဘတွေအနေနဲ့ ကလေးတွေမှာ အထူးသတိထားရမယ့် ရောဂါတွ...
15/09/2026

ကလေးငယ်များနှင့် သွေးလွန်တုပ်ကွေးအန္တရာယ်
(Si Si)

မိုးရာသီရောက်လာတာနဲ့အမျှ မိဘတွေအနေနဲ့ ကလေးတွေမှာ အထူးသတိထားရမယ့် ရောဂါတွေထဲမှာ သွေးလွန်တုပ်ကွေးရောဂါ (Dengue) လည်း ပါဝင်ပါတယ်။ သွေးလွန်တုပ်ကွေးဟာ အေးဒီးစ် (Aedes) ခြင်ကတစ်ဆင့် ကူးစက်တဲ့ ဗိုင်းရပ်စ်ရောဂါတစ်မျိုးဖြစ်ပြီး ကလေးတွေမှာ ရောဂါပြင်းထန်လာရင် အသက်အန္တရာယ်ရှိနိုင်ပါတယ်။
ဒါပေမယ့် မိဘတွေအနေနဲ့ သိထားသင့်တဲ့ အရေးကြီးဆုံးအချက်ကတော့ ကလေးအဖျား ဘယ်လောက် ကြီးသလဲဆိုတာ တစ်ခုတည်း မဟုတ်ဘဲ ကလေးရဲ့ အခြေအနေ ဘယ်လိုပြောင်းလဲလာသလဲဆိုတာကို စောင့်ကြည့်ဖို့ပါ။ အထူးသဖြင့် သွေးလွန်တုပ်ကွေးမှာ အဖျားကျသွားတာက ရောဂါပျောက်သွားပြီလို့ အမြဲမဆိုလိုပါဘူး။

 သွေးလွန်တုပ်ကွေးဖြစ်ရင် ဘာလက္ခဏာတွေ တွေ့ရနိုင်သလဲ
ရောဂါပိုးရှိတဲ့ခြင် ကိုက်ခံရပြီးနောက် ရက်အနည်းငယ်အတွင်း အဖျားတက်ခြင်း၊ ခေါင်းကိုက်ခြင်း၊ မျက်လုံးနောက်ဘက်နာခြင်း၊ ကိုယ်လက်ကိုက်ခဲခြင်း၊ အစာစားချင်စိတ်မရှိခြင်း၊ ပျို့အန်ခြင်းနဲ့ အရေပြားမှာ အနီစက်၊ အနီကွက်တွေ ပေါ်လာခြင်းတို့ ဖြစ်နိုင်ပါတယ်။ ကလေးငယ်တွေမှာတော့ မိမိခံစားနေရတာကို လူကြီးတွေလို ရှင်းရှင်းလင်းလင်း မပြောပြနိုင်တာကြောင့် ကလေးရဲ့ အမူအရာနဲ့ နေထိုင်စားသောက်ပုံ ပြောင်းလဲလာတာကိုပါ မိဘတွေက သတိထားကြည့်ပေးဖို့ လိုပါတယ်။

 အဖျားကျချိန်မှာ ပိုပြီး သတိထားပါ
သွေးလွန်တုပ်ကွေးမှာ သတိထားရမယ့်အချိန်က အဖျားကျလာတဲ့အချိန် ဖြစ်ပါတယ်။ ရောဂါစဖြစ်ပြီး အများအားဖြင့် ၃ ရက်ကနေ ၇ ရက်အတွင်း အဖျားကျလာချိန်မှာ တချို့ကလေးတွေဟာ အခြေအနေ ပြန်ကောင်းလာပေမယ့် တချို့မှာတော့ ရောဂါပြင်းထန်တဲ့အဆင့်ကို ရောက်သွားနိုင်ပါတယ်။ ဒါကြောင့် “အဖျားကျပြီ၊ ကလေးကောင်းသွားပြီ” လို့ မယူဆဘဲ အောက်ပါ အန္တရာယ်သတိပေးလက္ခဏာ တွေ ရှိ၊ မရှိကို အထူးစောင့်ကြည့်ပါ။

• ဗိုက်အလွန်နာခြင်း၊ ဗိုက်နာတာ မသက်သာခြင်း
• မကြာခဏအန်ခြင်း၊ ရေသောက်ရင်တောင် အန်ခြင်း
• နှာခေါင်းသွေးလျှံခြင်း၊ သွားဖုံးသွေးယိုခြင်း
• အန်တဲ့အထဲ သွေးပါခြင်း သို့မဟုတ် ဝမ်းမည်းမည်းသွားခြင်း
• အလွန်နုံးခွေနေခြင်း၊ အိပ်ငိုက်လွန်ခြင်း
• ဂနာမငြိမ်ဖြစ်ခြင်း၊ ပုံမှန်နဲ့မတူဘဲ စိတ်တို၊ ငိုယိုနေခြင်း
• ရေမသောက်နိုင်ခြင်း၊ ပါးစပ်ခြောက်ခြင်း၊ ဆီးနည်းလာခြင်း
• အသက်ရှူမြန်ခြင်း သို့မဟုတ် အသက်ရှူရခက်ခြင်း
• အဖျားကျသွားပေမယ့် ကလေးရဲ့အခြေအနေ ပိုဆိုးလာခြင်း

ဒီလက္ခဏာတွေထဲက တစ်ခုခုတွေ့လာရင် မစောင့်ဘဲ ဆေးရုံ၊ ဆေးခန်းမှာ ချက်ချင်းပြသဖို့ လိုပါတယ်။

အထူးသဖြင့် လက်ခြေအေးစက်လာတာ၊ အသားအရောင်ဖျော့လာတာ၊ အလွန်နုံးခွေနေတာ၊ မူးဝေ သတိလစ်တာ၊ ဆီးအလွန်နည်းတာ သို့မဟုတ် မထွက်တော့တာ၊ အသက်ရှူခက်လာတာ တွေဟာ သွေးလည်ပတ်မှု မကောင်းတော့တဲ့ အရေးပေါ်အခြေအနေ ဖြစ်နိုင်တာကြောင့် အရေးပေါ်ဆေးကုသမှု ချက်ချင်းခံယူရပါမယ်။

 ကလေးဖျားနေချိန် အိမ်မှာ ဘယ်လိုပြုစုမလဲ
ကလေးကို အနားယူစေပြီး ရေဓာတ် မခမ်းခြောက်အောင် အရည်ကို နည်းနည်းစီ မကြာခဏ တိုက်ပေးပါ။ မိခင်နို့ တိုက်နေတဲ့ကလေးဆိုရင် မိခင်နို့ ဆက်တိုက်ပေးပါ။ ကလေးရဲ့ အစာစားနိုင်မှု၊ ရေသောက်နိုင်မှုနဲ့ ဆီးသွားတဲ့အကြိမ်ရေ နည်းလာသလား ဆိုတာကိုလည်း စောင့်ကြည့်ပေးပါ။

အဖျားအတွက် Paracetamol ကို ကလေးရဲ့ ကိုယ်အလေးချိန်နဲ့ ကိုက်ညီတဲ့ပမာဏအတိုင်းသာ အသုံးပြုသင့်ပါတယ်။ Aspirin၊ Ibuprofen နဲ့ အခြား NSAIDs အမျိုးအစား အကိုက်အခဲ ပျောက်ဆေးတွေကို မိမိဘာသာ မတိုက်သင့်ပါဘူး။ သွေးယိုနိုင်ခြေကို ပိုတိုးစေနိုင်လို့ ဖြစ်ပါတယ်။

အရေးကြီးတာက ကလေးရဲ့အခြေအနေကို နာရီပိုင်းအလိုက် စောင့်ကြည့်ပေးခြင်း ဖြစ်ပါတယ်။ အဖျား ကျသွားတာထက် ကလေးက ရေသောက်နိုင်သလား၊ ဆီးပုံမှန်သွားသလား၊ နိုးနိုးကြားကြားရှိသလား၊ အသက်ရှူပုံမှန်ရှိသလားဆိုတာတွေက ပိုအရေးကြီးပါတယ်။

အန်တဲ့အရည်၊ ဝမ်းအရောင်နဲ့ သွေးယိုခြင်းရှိ၊ မရှိကို စောင့်ကြည့်နေရတဲ့အချိန်မှာ အရောင်မည်းတဲ့ အစားအစာနဲ့ အချိုရည်တွေက သွေးပါခြင်းနဲ့ ရောထွေးပြီး ခွဲခြားရခက်စေနိုင်တာကြောင့် မပေးတာ ပိုကောင်းပါတယ်။

 ခြင်ကိုက်မခံရအောင်လည်း ကာကွယ်ပေးပါ
သွေးလွန်တုပ်ကွေးကို ကာကွယ်ဖို့ အဓိကနည်းလမ်းကတော့ ခြင်မပေါက်ဖွားအောင်လုပ်ခြင်းနဲ့ ခြင်ကိုက်မခံရအောင် ကာကွယ်ခြင်း ဖြစ်ပါတယ်။

အိမ်နဲ့ပတ်ဝန်းကျင်မှာ ရေဝပ်နိုင်တဲ့ တာယာဟောင်း၊ ပလပ်စတစ်ခွက်၊ အိုးခွက်၊ အုန်းမှုတ်ခွက်၊ ပန်းအိုးနဲ့ ရေသိုလှောင်တဲ့ပုံးတွေကို ပုံမှန်စစ်ဆေးပြီး ရေမဝပ်အောင် ရှင်းလင်းပါ။ ရေသိုလှောင်တဲ့ ပုံးတွေကို လုံခြုံစွာဖုံးထားပါ။ ကလေးတွေကို အင်္ကျီလက်ရှည်၊ ဘောင်းဘီရှည် ဝတ်ပေးနိုင်ပြီး နေ့ဘက်ဖြစ်စေ၊ ညဘက်ဖြစ်စေ အိပ်ချိန်မှာ ခြင်ထောင်အသုံးပြုပေးနိုင်ပါတယ်။ ကလေးတွေအတွက် ခြင်မကိုက်ဆေး (Mosquito Repellent) အသုံးပြုမယ်ဆိုရင်လည်း ကလေးရဲ့အသက်အရွယ်နဲ့ သင့်တော်၊ မသင့်တော်ကို ဆေးအညွှန်းမှာ သေချာဖတ်ပြီး ညွှန်ကြားချက်အတိုင်းသာ အသုံးပြုပါ။

သွေးလွန်တုပ်ကွေးမှာ အဖျားကျသွားတာဟာ ရောဂါပျောက်သွားတာ မဟုတ်ပါဘူး။ အဖျားကျချိန်မှာပဲ ကလေးက ဗိုက်နာလာတာ၊ ဆက်တိုက်အန်တာ၊ သွေးယိုတာ၊ ရေမသောက်နိုင်တာ၊ ဆီးနည်းလာတာ၊ အလွန်နုံးခွေတာ၊ ဂနာမငြိမ်ဖြစ်လာတာ၊ လက်ခြေအေးလာတာနဲ့ အသက်ရှူခက်လာတာတွေ ရှိ၊ မရှိကို ပိုပြီးဂရုစိုက် စောင့်ကြည့်ပေးရပါမယ်။
မိဘတွေရဲ့ အနီးကပ်စောင့်ကြည့်မှုနဲ့ အန္တရာယ်လက္ခဏာတွေကို စောစောသိရှိခြင်းဟာ ကလေးကို အချိန်မီ ဆေးကုသမှုရရှိစေဖို့ အရေးကြီးတဲ့ အစိတ်အပိုင်းတစ်ခု ဖြစ်ပါတယ်။

References
1. Adams, L.E., Wong, J.M. and Paz-Bailey, G. (2024). Dengue. JAMA, 332(24), 2109–2110.
2. Ministry of Health (2026). Management of Dengue – Clinical Guidelines. 2nd ed. Naypyidaw: Ministry of Health, National Unity Government.
3. World Health Organization (2009). Dengue: Guidelines for Diagnosis, Treatment, Prevention and Control. Geneva: WHO.
4. World Health Organization (2011). Comprehensive Guidelines for Prevention and Control of Dengue and Dengue Haemorrhagic Fever. WHO Regional Office for South-East Asia.

သင့်ကျန်းမာရေးအတွက် သတိထားရမယ့် အစားအသောက်တွေကော်ဖီတွေအရမ်းသောက်ဖြစ်နေလား​ကမ္ဘာတစ်ဝှမ်းမှာ လူဦးရေ သန်း ၂၅၀ လောက်ဟာ အမြင်...
14/09/2026

သင့်ကျန်းမာရေးအတွက် သတိထားရမယ့် အစားအသောက်တွေ

ကော်ဖီတွေအရမ်းသောက်ဖြစ်နေလား

​ကမ္ဘာတစ်ဝှမ်းမှာ လူဦးရေ သန်း ၂၅၀ လောက်ဟာ အမြင်အာရုံ အနည်းနဲ့အများ ချို့ယွင်းတဲ့ ဒဏ်ကို ခံစားနေကြရပါတယ်။ သင့်မျက်လုံးရဲ့ ကျန်းမာရေးဟာ သင့်နှလုံးနဲ့ သွေးကြောတွေရဲ့ ကျန်းမာရေးနဲ့ တိုက်ရိုက် ဆက်စပ်နေတယ်ဆိုတာ သင်သိပါသလား။ သင် စားသောက်လိုက်တဲ့ အစားအသောက်တွေဟာ သင့်ရဲ့ နှလုံးသွေးကြော ကျန်းမာရေးရော၊ အမြင်အာရုံပေါ်မှာပါ ရေရှည် သက်ရောက်မှု ရှိစေနိုင်ပါတယ်။

​မနက်ခင်းမှာ သောက်လေ့ရှိတဲ့ ကော်ဖီ ဒါမှမဟုတ် လက်ဖက်ရည်ထဲမှာပါတဲ့ ကဖင်းဓာတ်ဟာ မျက်လုံးတွင်း ရေဖိအား (IOP) ကို မြင့်တက်စေနိုင်ပါတယ်။ ရေတိမ်ရောဂါ (Glaucomaဖြစ်ဖို့အလားအလာရှိသူတွေ ကဖင်းဓာတ် သောက်သုံးလိုက်တဲ့အခါ မျက်လုံးဖိအား ပိုတက်လာတာကို လေ့လာမှုတွေအရ သိရပြီး၊ ဖိအား အလွန်အမင်း မြင့်တက်ရင် အမြင်အာရုံ ချို့ယွင်းတာနဲ့ မျက်စိကွယ်တာတွေပါ ဖြစ်စေနိုင်ပါတယ်။

အရက်ကိုအမြဲမသောက်ပါနဲ့

​အရက်ဟာ အစားအသောက် မဟုတ်ပေမဲ့ ခန္ဓာကိုယ်ထဲ ထည့်သွင်းလိုက်တဲ့အခါ မျက်စိရောဂါတွေနဲ့ ဆက်စပ်နေတယ်လို့ ကျွမ်းကျင်သူတွေက ထောက်ပြကြပါတယ်။ အရက် အလွန်အကျွံ သောက်သုံးတာဟာ အသက်ငယ်ငယ်နဲ့ တိမ်ဖုံးသွားစေတဲ့ မျက်စိအတွင်းတိမ် ရောဂါကို စောစောစီးစီး ဖြစ်စေနိုင်ပါတယ်။

အားဖြည့်အချိုရည်လည်း သတိနဲ့သောက်

​အချိုရည်တွေ၊ အင်အားဖြည့်သောက်စရာတွေနဲ့ အခြား အချိုဓာတ်ပါတဲ့ သောက်စရာတွေမှာ သကြားဓာတ်တွေ အပြည့်ပါဝင်နေပြီး တစ်ခါတစ်ရံ လက်ဖက်ရည်ဇွန်း ၇ ဇွန်းကနေ ၁၀ ဇွန်းအထိတောင် ပါတတ်ပါတယ်။ ဒါတွေဟာ အစားအသောက်ကနေ သကြားဓာတ် ရရှိစေတဲ့ နံပါတ်တစ် အရင်းအမြစ်လည်း ဖြစ်ပါတယ်။ ဒီလို သကြားဓာတ် လွန်ကဲတာက အမျိုးအစား (၂) ဆီးချိုနဲ့ နှလုံးရောဂါ ဖြစ်နိုင်ခြေကို မြင့်တက်စေပြီး၊ ဒါကနေတစ်ဆင့် ဆီးချိုကြောင့် ဖြစ်တဲ့ မျက်ကြည်လွှာ ရောဂါ (Diabetic retinopathy) နဲ့ အသက်အရွယ်ကြောင့် ဖြစ်တဲ့ မျက်ကြည်လွှာ ယိုယွင်းရောဂါ (AMD) လိုမျိုး မျက်စိရောဂါတွေဆီ ဦးတည်သွားစေတာမို့ ကျန်းမာရေးနဲ့ ညီညွတ်တဲ့ ရေကိုပဲ ရွေးချယ်သောက်သုံးတာ အကောင်းဆုံး ဖြစ်ပါတယ်။

စည်သွပ်ဗူးလည်းတခါတလေမှစား

​အသင့်စား ငါးသေတ္တာ၊ခရမ်းချဉ်သီးဆော့စ်နဲ့ သံဗူးသွပ် အစားအသောက်တွေမှာ ဆိုဒီယမ် (ဆားဓာတ်) ပမာဏ အမြောက်အမြား ပါဝင်လေ့ရှိပြီး တစ်နေ့တာ လိုအပ်ချက်ရဲ့ ၇၅ ရာခိုင်နှုန်းအထိတောင် ရှိတတ်ပါတယ်။ ဒီလို အစားအသောက်တွေကို လျှော့စားပေးတာဟာ သွေးတိုးရောဂါနဲ့ ဆက်စပ် မျက်စိပြဿနာတွေကို နည်းပါးစေတာမို့ ဈေးဝယ်တဲ့အခါ “ဆိုဒီယမ် လျှော့ချထားသည်” (Low sodium) သို့မဟုတ် “ဆား ထပ်မံမထည့်ထားပါ” (No salt added) ဆိုတဲ့ အမျိုးအစားတွေကို ရွေးချယ်ပြီး၊ သဘာဝအတိုင်းဟင်းခတ်အမွှေးအကြိုင်တွေကိုပဲ သုံးစွဲချက်ပြုတ်စား‌သောက်ပါ။

ကြော်ဆီ၊ချက်ဆီ

​လွန်ခဲ့တဲ့ နှစ်ပေါင်း ၃၀ကတည်း က ပြုလုပ်ခဲ့တဲ့ လေ့လာမှုတစ်ခုအရ မပြည့်ဝဆီ အမျိုးအစားတစ်ချို့ ဖြစ်တဲ့ Linoleic acid ကို အလွန်အကျွံ စားသုံးတာဟာမျက်စိရောဂါ ဖြစ်နိုင်ခြေ ပိုမြင့်မားတာနဲ့ ဆက်စပ်နေတာကို တွေ့ရပါတယ်။ ဒီအဆီဓာတ်ကို ဆူးပန်းဆီ(စားအုန်းဆီ)၊ နေကြာဆီ၊ ပြောင်းဖူးဆီ၊ ပဲပုပ်ဆီနဲ့ နှမ်းဆီလို ချက်ပြုတ်ဆီတွေမှာ တွေ့ရတတ်ပါတယ်။ ကျန်းမာရေး ကျွမ်းကျင်သူတွေကတော့ စားပွဲတင်ဇွန်း တစ်ဇွန်းမှာ ပြည့်ဝဆီ ၄ ဂရမ်ထက် နည်းတဲ့ ချက်ပြုတ်ဆီတွေကိုပဲ သုံးဖို့ အကြံပြုထားပြီး၊ အဆီတုတွေ (Hydrogenated oils) နဲ့ Trans fats ပါတဲ့ ဆီတွေကိုတော့ ဝေးဝေးက ရှောင်သင့်ပါတယ်။

​Trans fats ပါတဲ့ အဆီတွေနဲ့ ကြော်ထားတဲ့ အကြော်အလှော်တွေဟာ LDL ခေါ် မကောင်းတဲ့ ကိုလက်စထရော ပမာဏကို မြင့်တက်စေပြီး နှလုံးရောဂါ၊ လေဖြတ်တာနဲ့ အမျိုးအစား (၂) ဆီးချိုရောဂါတွေကို ဖြစ်စေနိုင်ပါတယ်။ ဒါ့အပြင် ဆဲလ်တွေကို ပျက်စီးစေတဲ့ Free radicals တွေကိုလည်း ထွက်ရှိစေတာမို့ AMD(Age-related Macular Degeneration / အသက်အရွယ်ကြီးလာသည်နှင့်အမျှဗဟိုမြင်လွှာ ပျက်စီးသည့် ရောဂါ) နဲ့ ဆီးချိုကြောင့်ဖြစ်တဲ့ မျက်ကြည်လွှာ ရောဂါတွေဆီ ဦးတည်သွားစေပါတယ်။ ဒီ Free radicals တွေကို တုံ့ပြန်တိုက်ဖျက်ဖို့အတွက် သံပုရာ/သံပရိုသီးနှံများ၊ ခရမ်းချဉ်သီးနဲ့ ငရုတ်ပွနီလိုမျိုး ဗီတာမင် စီ အပြည့်အဝပါတဲ့ သစ်သီးဝလံနဲ့ ဟင်းသီးဟင်းရွက်တွေကို များများ စားသုံးပေးပါ။

ဘေကွန်နဲ့ငါးခြောက်

​ဟော့ဒေါ့၊ ဝက်ပေါင်ခြောက်၊ငါး‌ေခြာက်နဲ့အသင့်စား အသားချောင်းတွေမှာ ဆိုဒီယမ်ဓာတ် အမြောက်အမြား ပါဝင်နေပါတယ်။ အမြဲစားရင်ဆားဓာတ် ရုတ်တရက် မြင့်တက်သွားတာဟာ ကြာလာရင်မှာ သွေးတိုးရောဂါကို ဖြစ်စေနိုင်ပြီး၊ မျက်လုံးမှာဆိုရင် သွေးကြော ပျက်စီးပြီး အမြင်အာရုံ ဝေဝါး/ဆုံးရှုံးခြင်း (Hypertensive retinopathy)၊ မျက်ကြည်လွှာ အောက်ဘက် အရည်များ စုပုံခြင်း (Choroidopathy) နဲ့ အာရုံကြောများ သေဆုံးကာ အမြင်အာရုံ ဆုံးရှုံးခြင်း (Neuropathy) တွေကို ဖြစ်ပေါ်စေနိုင်ပါတယ်။ဒါကြောင့် တစ်နေ့ကို ဆိုဒီယမ် ပမာဏ ၂,၃၀၀ မီလီဂရမ် သို့မဟုတ် ဒါထက် နည်းအောင် လျှော့ချ စားသုံးသင့်ပါတယ်။

Ref:WebMD

13/09/2026

အော်တစ်ဇင် (𝘼𝙪𝙩𝙞𝙨𝙢) ဆိုတာ ရောဂါတစ်ခု မဟုတ်ပါဘူး... သူတို့လေးတွေရဲ့ ထူးခြားတဲ့ ဖွံ့ဖြိုးမှုတစ်ခုသာ ဖြစ်ပါတယ်။ ✨
လူ့အဖွဲ့အစည်းကြားထဲက အော်တစ်ဇင်နဲ့ ပတ်သက်တဲ့ အထင်အမြင်လွဲမှားမှုတွေနဲ့ အရေးကြီးတဲ့ အသိပညာတွေကို 𝙈𝙮𝙖𝙣𝙃𝙚𝙖𝙡𝙩𝙝 ရဲ့ 𝙀𝙭𝙘𝙡𝙪𝙨𝙞𝙫𝙚 𝙄𝙣𝙩𝙚𝙧𝙫𝙞𝙚𝙬 (𝙋𝙖𝙧𝙩 𝙄) မှာ တင်ဆက်ပေးလိုက်ပါတယ်။ #𝙈𝙮𝙖𝙣𝙃𝙚𝙖𝙡𝙩𝙝 #𝘼𝙪𝙩𝙞𝙨𝙢𝘼𝙘𝙘𝙚𝙥𝙩𝙖𝙣𝙘𝙚 #𝙈𝙚𝙣𝙩𝙖𝙡𝙃𝙚𝙖𝙡𝙩𝙝 #𝙃𝙚𝙖𝙡𝙩𝙝𝙆𝙣𝙤𝙬𝙡𝙚𝙙𝙜𝙚 #𝙀𝙭𝙘𝙡𝙪𝙨𝙞𝙫𝙚𝙄𝙣𝙩𝙚𝙧𝙫𝙞𝙚𝙬

12/09/2026

မိုးတွင်းရောက်ပြီဆိုတာနဲ့ အိမ်မှာ တစ်ယောက်မဟုတ်တစ်ယောက် လည်ချောင်းနာပြီး ဖျားနေကြပြီလား? 🤔
လည်ချောင်းနာတိုင်း ပိုးသတ်ဆေးသောက်တာ မှန်ရဲ့လားဆိုတာကို ဒီတစ်ပတ် 𝙈𝙮𝙖𝙣𝙃𝙚𝙖𝙡𝙩𝙝 ရဲ့ '𝙀𝙭𝙥𝙚𝙧𝙩 𝙀𝙭𝙥𝙡𝙖𝙣𝙖𝙩𝙞𝙤𝙣' အစီအစဉ်မှာ အသေးစိတ် ရှင်းပြပေးထားပါတယ်။
#𝙈𝙮𝙖𝙣𝙃𝙚𝙖𝙡𝙩𝙝 #𝙀𝙭𝙥𝙚𝙧𝙩𝙀𝙭𝙥𝙡𝙖𝙣𝙖𝙩𝙞𝙤𝙣 #𝙃𝙚𝙖𝙡𝙩𝙝𝙏𝙞𝙥𝙨 #𝙎𝙤𝙧𝙚𝙏𝙝𝙧𝙤𝙖𝙩

Address

Yangon

Telephone

+66627040459

Website

Alerts

Be the first to know and let us send you an email when MyanHealth Media posts news and promotions. Your email address will not be used for any other purpose, and you can unsubscribe at any time.

Shortcuts

Share

Category