MyanHealth Media

MyanHealth Media "We make social media a place for health education, not misinformation." ( Doh Eain Mat Co.,Ltd is responsible for this page)

MyanHealth makes social media "a place for health education, not misinformation".
ကျန်းမာရေးဆိုင်ရာသတင်း၊ဆောင်းပါးများနှင့် ပေါ့ကတ်စ် အစီအစဥ်များကိုထုတ်လုပ်တင်ဆက်ပေးနေပါတယ်။

သတိထားကာကွယ်ပါ ဝမ်းပျက်ဝမ်းလျှောရောဂါKrisအခုတလော ဝမ်းပျက်ဝမ်းလျှောရောဂါ ဖြစ်ပွားမှု များပြားလာတဲ့ အတွက်ကြောင့် ဝမ်းပျက်ဝ...
16/08/2026

သတိထားကာကွယ်ပါ ဝမ်းပျက်ဝမ်းလျှောရောဂါ
Kris

အခုတလော ဝမ်းပျက်ဝမ်းလျှောရောဂါ ဖြစ်ပွားမှု များပြားလာတဲ့ အတွက်ကြောင့် ဝမ်းပျက်ဝမ်းလျှောရောဂါနဲ့ ဆက်စပ်ပြီးသတိပြုသင့်တဲ့ ကျန်းမာရေးဆိုင်ရာ အချက်အလက်များကို အများပြည်သူသိရှိနိုင်စေရန်အတွက် ရေးသားဖော်ပြပေးလိုက်ရပါတယ်။ ဝမ်းပျက်ဝမ်းလျှောခြင်းဆိုတာ ၂၄ နာရီအတွင်း အရည်ဝမ်း (သို့မဟုတ်) ဝမ်းပျော့ပျော့ ၃ ကြိမ်နဲ့အထက် သွားခြင်းကို ဆိုလိုပါတယ်။

ဝမ်းလျှောဝမ်းပျက်ခြင်းက မသန့်ရှင်းတဲ့ အစားအစာနဲ့ ရေကတစ်ဆင့် ရောဂါပိုးကူးစက်ခြင်းကြောင့် ဖြစ်နိုင်သလို ကာလဝမ်းရောဂါအပါအဝင် အခြားကူးစက်ရောဂါပိုးတွေကြောင့်လည်း ဖြစ်နိုင်ပါတယ်။
ဝမ်းပျက်ဝမ်းလျှောတဲ့အခါ အဓိကအန္တရာယ်က ရေဓာတ်နဲ့ ခန္ဓာကိုယ်အတွက် လိုအပ်တဲ့ ဆားဓာတ်တွေ ဆုံးရှုံးခြင်း ဖြစ်ပါတယ်။ အထူးသဖြင့် ကလေးငယ်တွေ၊ သက်ကြီးရွယ်အိုတွေ၊ ကိုယ်ဝန်ဆောင်မိခင်တွေ၊ အာဟာရချို့တဲ့သူတွေနဲ့ နာတာရှည်ရောဂါရှိသူတွေမှာ ပိုမိုပြင်းထန်နိုင်ပါတယ်။

ရေငတ်လာခြင်း၊ ပါးစပ်နဲ့ လျှာခြောက်ခြင်း၊ ဆီးနည်းခြင်း သို့မဟုတ် ဆီးအရောင်ရင့်လာခြင်း၊ မူးဝေခြင်းနဲ့ အားနည်းခြင်းတွေဟာ ရေဓာတ်ခမ်းခြောက်မှုရဲ့ အစောပိုင်းလက္ခဏာတွေ ဖြစ်ပါတယ်။ ကလေးတွေမှာ မျက်တွင်းချိုင့်ဝင်ခြင်း၊ ဂနာမငြိမ်ဖြစ်ခြင်းနဲ့ အရေပြားကို ဆွဲပြီးလွှတ်တဲ့အခါ မူလအနေအထားကို ပြန်ရောက်ဖို့ ကြာခြင်းတို့လည်း တွေ့နိုင်ပါတယ်။
ဝမ်းပျက်ဝမ်းလျှော စပြီဆိုတာနဲ့ ဓာတ်ဆားရည် (ORS) ကို စောစောသောက်ပေးဖို့ အရေးကြီးပါတယ်။ ORS ဟာ ဝမ်းလျှောခြင်းကို ချက်ချင်းရပ်တန့်စေတာမဟုတ်ပေမယ့် ဝမ်းသွားခြင်းနဲ့ အန်ခြင်းကြောင့် ဆုံးရှုံးသွားတဲ့ ရေနဲ့ ဆားဓာတ်တွေကို ပြန်လည်ဖြည့်တင်းပေးပြီး ရေဓာတ်ပြင်းထန်စွာ ခမ်းခြောက်ခြင်းကို ကာကွယ်ပေးပါတယ်။ ဝမ်းလျှောစေတဲ့ အကြောင်းရင်းတွေဟာ မတူညီနိုင်တာကြောင့် ပိုးသတ်ဆေး (Antibiotics) တွေကို ဆရာဝန်ညွှန်ကြားချက်မရှိဘဲ မိမိဘာသာ ဝယ်ယူသောက်သုံးခြင်း မပြုသင့်ပါဘူး။

ORS ဖျော်တဲ့အခါ အထုပ်ပေါ်မှာ ဖော်ပြထားတဲ့ ရေပမာဏအတိုင်း အတိအကျ ဖျော်ရပါမယ်။ ကျိုချက်ပြီး အအေးခံထားတဲ့ရေ၊ စနစ်တကျသန့်စင်ထားတဲ့ရေ သို့မဟုတ် ယုံကြည်စိတ်ချရတဲ့ ရေသန့်ကိုသာ အသုံးပြုသင့်ပါတယ်။ ORS ကို နို့၊ သစ်သီးဖျော်ရည်၊ အချိုရည်တို့နဲ့ မရောနှောသင့်ဘဲ ဖျော်ပြီး ၂၄ နာရီကျော်သွားတဲ့အခါ ကျန်ရှိတဲ့ရည်ကို သွန်ပစ်ရပါမယ်။

ကလေးတွေကို ORS တိုက်တဲ့အခါ တစ်ခါတည်းအများကြီး မတိုက်ဘဲ နည်းနည်းနဲ့ မကြာခဏ တိုက်ပေးသင့်ပါတယ်။ အန်နေမယ်ဆို ၁၀ မိနစ်ခန့်စောင့်ပြီးနောက် ဖြည်းဖြည်းချင်း ပြန်တိုက်နိုင်ပါတယ်။ ဝမ်းလျှောနေစဉ်အတွင်းမှာ မိခင်နို့နဲ့ ပုံမှန်စားနေကျ အာဟာရပြည့်ဝတဲ့ အစားအစာတွေကို ဆက်လက်ကျွေးသင့်ပြီး အစာဖြတ်ထားခြင်း မပြုလုပ်သင့်ပါဘူး။ ဒါ့အပြင် ကလေးတွေ ဝမ်းလျှောတဲ့အခါ Zinc တိုက်ပေးခြင်းဟာ ဝမ်းလျှောမှုကြာချိန်နဲ့ ပြင်းထန်မှုကို လျော့နည်းစေနိုင်ပါတယ်။ အသက် ၆ လအောက်ကလေးတွေကို တစ်နေ့ ၁၀ မီလီဂရမ်၊ အသက် ၆ လနဲ့အထက် ကလေးတွေကို တစ်နေ့ ၂၀ မီလီဂရမ်ဖြင့် ၁၀ ရက်မှ ၁၄ ရက်အထိ တိုက်ပေးနိုင်ပါတယ်။
ဒါပေမဲ့ အချိန်တိုအတွင်း အရည်ဝမ်းအများကြီးသွားခြင်း၊ “ဆန်ဆေးရေ” လို ဝမ်းသွားခြင်း၊ သွားတဲ့ဝမ်းက ငါးညှီနံ့နံခြင်း၊ ဝမ်းထဲသွေးပါခြင်း၊ အဆက်မပြတ်အန်ပြီး ရေမသောက်နိုင်ခြင်း၊ ဆီးအလွန်နည်းခြင်း သို့မဟုတ် ဆီးမသွားတော့ခြင်း၊ မျက်တွင်းအလွန်ချိုင့်ဝင်ခြင်း၊ ခြေလက်အေးစက်ခြင်း၊ အဖျားကြီးခြင်း၊ ဗိုက်အလွန်နာခြင်း၊ တက်ခြင်း၊ သတိလစ်ခြင်းတို့ ဖြစ်လာပါက နီးစပ်ရာ ဆေးရုံ၊ ဆေးခန်း သို့မဟုတ် ကျန်းမာရေးဌာနကို အမြန်ဆုံး သွားရောက်ကုသမှုခံယူဖို့ လိုအပ်ပါတယ်။
ဝမ်းပျက်ဝမ်းလျှောရောဂါကို ကာကွယ်ဖို့အတွက် “သန့်လေးသန့်” (ရေသန့်ရှင်းခြင်း၊ လက်သန့်ရှင်းခြင်း၊ အစားအစာသန့်ရှင်းခြင်းနဲ့ အိမ်သာသန့်ရှင်းခြင်း) ကို အဓိကလိုက်နာသင့်ပါတယ်။ သန့်ရှင်းစိတ်ချရတဲ့ သောက်သုံးရေကိုသာ အသုံးပြုပါ။ အစာမစားမီ၊ အစားအစာပြင်ဆင်မီ၊ ကလေးကို အစာမကျွေးမီ၊ အိမ်သာတက်ပြီးချိန်နဲ့ ဝမ်းလျှောလူနာကို ပြုစုပြီးချိန်တွေမှာ ဆပ်ပြာနဲ့ လက်ကို စနစ်တကျ ဆေးကြောပါ။ အစားအစာတွေကို ကျက်အောင်ချက်ပြုတ်ပြီး ပူပူနွေးနွေး စားသုံးသင့်ပါတယ်။ အသားစိမ်း၊ ငါးစိမ်းနဲ့ ချက်ပြီးသားအစားအစာတွေကို သီးခြားထားပြီး အစားအစာတွေကို ယင်မနားအောင် ဖုံးအုပ်ထားပါ။ ဝမ်းလျှောနေသူတွေအနေနဲ့ အခြားသူတွေအတွက် အစားအစာ ပြင်ဆင်ပေးခြင်းကိုလည်း ရှောင်သင့်ပါတယ်။

ဒီအခြေခံအချက်တွေကို သေချာလိုက်နာနိုင်မယ်ဆိုရင် ဝမ်းပျက်ဝမ်းလျှောရောဂါကြောင့် ဖြစ်ပေါ်နိုင်တဲ့ ရေဓာတ်ခမ်းခြောက်မှုနဲ့ ရောဂါပြန့်ပွားမှုကို ထိထိရောက်ရောက် လျှော့ချကာကွယ်နိုင်မှာ ဖြစ်ပါတယ်။
References

1. MOST Project. Diarrhoea Treatment Guidelines: Including New Recommendations for the Use of ORS and Zinc Supplementation for Clinic-Based Healthcare Workers. USAID; 2005.
2. World Health Organization. Diarrhoeal Disease. WHO; 2024.
3. World Health Organization. Zinc Supplementation in the Management of Diarrhoea. WHO; 2023.

ဝမ်းပျက်/ဝမ်းလျှောဖြစ်သူအချို့ အစားအသောက်ကြောင့်ဖြစ်နိုင်ဟု ဆိုလှလှဝင်း(B.Pharm)ရန်ကုန်မြို့အတွင်း ဝမ်းပျက်/ဝမ်းလျှောဖြစ...
15/08/2026

ဝမ်းပျက်/ဝမ်းလျှောဖြစ်သူအချို့ အစားအသောက်ကြောင့်ဖြစ်နိုင်ဟု ဆို

လှလှဝင်း(B.Pharm)

ရန်ကုန်မြို့အတွင်း ဝမ်းပျက်/ဝမ်းလျှောဖြစ်ပွားသူ များပြားလာတာ အများစုဟာ အစားအသောက်ကြောင့် ဖြစ်နိုင်တယ်လို့ ကိုယ်တိုင်ခံစားနေရသူတွေက MyanHealth ကို ပြောပါတယ်။ ဝမ်းပျက်ဝမ်းလျှောရောဂါဟာ မစင်ကနေတစ်ဆင့် ကူးစက်တာဖြစ်ပြီး ပိုးပါဝင်နေတဲ့ မသန့်ရှင်းတဲ့ အစားအသောက်၊ ရေတွေကို စားသောက်မိတာက အဓိက ကူးစက်ရာလမ်းကြောင်း ဖြစ်ပါတယ်။
လက်ရှိမှာ ရန်ကုန်ပြည်သူ့ဆေးရုံကြီးမှာ ဝမ်းပျက်/ဝမ်းလျှောရောဂါနဲ့ လာရောက်ကုသနေရသူ ၂၀၀ နီးပါးခန့်​ရှိပြီး ဒီထဲက ၅၀ ကျော်မှာ ပြင်းထန်ဝမ်းရောဂါပိုး တွေ့ရှိထားတယ်လို့လည်း ရန်ကုန်တိုင်းဒေသကြီးအစိုးရအဖွဲ့က ထုတ်ပြန်ထားတာ ဖြစ်ပါတယ်။
“Sunday မှာ ညီမသူငယ်ချင်းတွေနဲ့ Hotpot သွားစားပြီးကတည်းက ဝမ်းသွားတာ စ ဖြစ်ပါတယ်။ ဗိုက်ကနာပြီး ဝမ်းအရည်တွေပဲ ခဏခဏ သွားပါတယ်။ တနင်္လာနေ့ကနေ ဗုဒ္ဓဟူးနေ့ မနက်ထိ ဝမ်းသွားတာ အကြိမ် ၂၀ ကျော် နေပါပြီ။ အခုတော့ လူက မူးလဲမလို ဖြစ်လာလို့ ဆေးရုံရောက်ပြီး ကာလဝမ်းပိုး စစ်ရပါတယ်။ ဝမ်းပိုးကတော့ Negative ထွက်ပေမယ့် ခန္ဓာကိုယ်ရဲ့ အရည်ဆုံးရှုံးမှု အရမ်းများနေလို့ ဆေးရုံတက်ခဲ့ရပါတယ်” လို့ ပုဂ္ဂလိကဆေးရုံတစ်ခုမှ ကုသမှု ခံယူနေတဲ့ သွဲ့သွဲ့ (အမည်လွှဲ) က MyanHealth ကို ပြောပါတယ်။
ဝမ်းပျက်/ဝမ်းလျှောဖြစ်ပွားမှုကို ရန်ကုန်တိုင်း လသာမြို့နယ်မှာ စတင်တွေ့ရှိခဲ့တာဖြစ်ပြီး အခုဆိုရင် ပန်းဘဲတန်း၊ လမ်းမတော်၊ အင်းစိန်၊ မရမ်းကုန်း၊ စမ်းချောင်းနဲ့ သာကေတမြို့နယ် မြို့ခံတွေမှာ ဖြစ်ပွားလာတာတွေ တိုးလာနေပါတယ်။ ရောဂါပိုးကူးစက်တာဟာ စားသောက်ကုန်နဲ့ ရေပေးဝေရေးစနစ်ကနေ ဖြစ်နိုင်ခြေရှိတယ်လို့ သံသယရှိကြောင်း ဒေသန္တရ ကျန်းမာရေးအရာရှိတွေက ထုတ်ပြန်ထားပါတယ်။
“နို့ခဲရယ်၊ နို့စိမ်းကော်ဖီရယ်၊ မုန့်ဟင်းခါးကလည်း အီကြာကွေးလေးနဲ့ စားလိုက်သေးတယ်။ အဲဒီမှာပဲ တန်းလျှောတော့တာ။ စားပြီးပြီးချင်းကို လျှောတာ။ ညကျတော့ ထပ်လျှောတယ်။ နှစ်ခါ၊ သုံးခါလောက် ထပ်လျှောတယ်။ မနက်ကျတော့လည်း တစ်ခါ ထပ်လျှောတယ်။ အဲဒါနဲ့ ဒီကို (ဆေးရုံ) ကို ရောက်လာတာ။​ ဒီရောက်တော့ အမကို သက်သာအောင် ဆေးထိုးပေးတယ်။ အခု ဖြစ်တာ တစ်ရက်တော့ ရှိပြီပေါ့။ ဒီကြားထဲမှာ နောက်ထပ် လေး၊ ငါးကြိမ်လောက် ထပ်လျှောတယ်။ အားလုံးပေါင်းဆို အကြိမ် ၂၀ လောက်တော့ ရှိပြီ။ လူကတော့ ဖြူဖပ်ဖြူလျော် မဖြစ်သွားဘူး။ တော်သေးတယ်။ သွေးပေါင်ချိန်ကတော့ ကျသွားတယ်" လို့ ပုဂ္ဂလိကဆေးရုံတစ်ခုတွင် ဝမ်းပျက်/ဝမ်းလျှောရောဂါဖြင့် ကုသမှု ခံယူနေရသူ အမျိုးသမီးတစ်ဦးက MyanHealth ကို ရှင်းပြပါတယ်။
လက်ရှိမှာ ရောဂါကူးစက်မှုကို ထိန်းချုပ်ဖို့အတွက် လမ်းမတော်၊ လသာ၊ ပန်းဘဲတန်း၊ ကျောက်တံတား စတဲ့ မြို့နယ်တွေက လမ်းဘေးစားသောက်ဆိုင်တွေကို ပိတ်ထားကြဖို့ မြို့နယ်အာဏာပိုင်တွေက ညွှန်ကြားထားသလို စမ်းချောင်း၊ အလုံစတဲ့ မြို့နယ်တွေမှာလည်း ဝမ်းရောဂါ သတိပြုကြဖို့ နှိုးဆော်ချက်တွေကို လုပ်ဆောင်နေပါတယ်။​
ဝမ်းပျက်/ဝမ်းလျှောရောဂါဟာ မိုးတွင်းကာလမှာ ဖြစ်ပွားလေ့ရှိပြီး ပြင်းထန်လာမယ်ဆိုရင်တော့ ရေဓာတ်နဲ့ ဆားဓာတ်ခမ်းတာ (Dehydration and Electrolyte Imbalance) ဖြစ်စေသလို ပြင်းထန်တဲ့ သွေးပေါင်ကျတာ (Hypovolemic Shock)၊ ကျောက်ကပ်ပျက်စီးတာ (Kidney Failure)၊ အာဟာရ ချို့တဲ့တာ (Malnutrition) တို့ပါ ဖြစ်စေပြီး အဆိုးဝါးဆုံး အခြေအနေမှာ ကိုယ်ခံအားကျဆင်းတာနဲ့ ရောဂါပိုး ဝင်ရောက်တာ (Sepsis) အထိ ဖြစ်ပြီး အသက်အန္တရာယ်ကိုပါ စိုးရိမ်ရပါတယ်။
လက်ရှိမှာ ပြင်းထန်ဝမ်းပျက်/ဝမ်းလျှောမှုအတွက် ရန်ကုန်ပြည်သူ့ဆေးရုံကြီး၊ ဂျပန်ဆေးရုံနဲ့ ဂန္ဒီဆေးရုံတွေမှာ သီးသန့်ကုသဆောင်ဖွင့် ကုသပေးနေပြီး ရွှေလမင်း (လမ်းမတော်) နှင့် (မြောက်ဥက္ကလာပ)၊ ဆာကူရာ စတဲ့ ပုဂ္ဂလိကဆေးရုံတွေမှာလည်းလည်း သီးသန့်ကုသဆောင်ပုံစံထားပြီး ကန့်သတ်ခုတင်အရေအတွက်နဲ့ လက်ခံကုသပေးနေပါတယ်။​ စုံစမ်းမှုတွေအရ အခုဆိုရင် ပုဂ္ဂလိကဆေးရုံတွေက သတ်မှတ်ခုတင်တွေမှာလည်း ဝမ်းပျက်/ဝမ်းလျှောကုသသူတွေနဲ့ ပြည့်နှက်နေပါတယ်။
ပုဂ္ဂလိက ဆေးရုံမှာ ကုသမှု ခံယူနေသူ အခြားအမျိုးသမီးတစ်ဦးကလည်း “လက်ဖက်ရည်ဆိုင်မှာ နို့အေးနဲ့ ပုစွန် dim sum စားခဲ့တယ်။ ပြီးတော့ မုန့်ဟင်းခါး စားလိုက်မိတယ်။ အဲဒီနောက် ဝမ်းတွေ ဆက်တိုက်သွားနေလို့ အမဘာသာ Norbactin နဲ့ Metronidazole သောက်လိုက်တယ်။ ပိုးသတ်ဆေးသောက်လိုက်တာတောင် ဝမ်းမရပ်လို့ အခုဆေးရုံကို လာခဲ့ရတာပါ" လို့ သူမရဲ့ ဖြစ်စဉ်ကို ရှင်းပြပါတယ်။
အခုလိုမျိုး ပိုးသတ်ဆေးတွေကို ဆရာဝန်ညွှန်ကြားချက် မရှိဘဲ ကိုယ်တိုင်ဝယ်ယူ သောက်သုံးတာ (Self-medication) ဟာ အနာနဲ့ဆေး မကိုက်ညီတာအပြင်ဆေးကြောင့်မလိုလားအပ်တဲ့ နောက်ဆက်တွဲဆိုးကျိုးတွေ ခံစားရနိုင်သလို ဆေးယဉ်ပါးမှုအန္တရာယ်ကိုပါ ဖြစ်စေနိုင်တယ်လို့ ကျန်းမာရေးဆိုင်ရာ ကျွမ်းကျင်သူတွေက သတိပေးထားပြီး ဝမ်းပျက်/ဝမ်းလျှောဖြစ်တဲ့အခါ ဝမ်းပိတ်ဆေးလိုမျိုး မသောက်သုံးသင့်ဘူးလို့လည်း အကြံပြုထားပါတယ်။ ညွှန်ကြားချက်မရှိဘဲ ဝမ်းပိတ်ဆေးကို ကိုယ့်သဘာနဲ့ ကိုယ် သောက်တဲ့အခါ ရောဂါပိုးနဲ့ အဆိပ်အတောက်တွေဟာ ခန္ဓာကိုယ်ထဲ ပိတ်မိနေပြီး အူနံရံတင်းမာတာနဲ့ အူပေါက်နိုင်တဲ့အထိ အန္တရာယ် ရှိတာကြောင့် ဖြစ်ပါတယ်။​
ဝမ်းပျက်/ဝမ်းလျှောရောဂါတွေအတွက် အဓိကကုသမှု ပုံစံဟာ လျော့နည်းသွားတဲ့ ရေနဲ့ ဓာတ်ဆားဓာတ်ကို အမြန်ဆုံးပြန်လည် ဖြည့်တင်းပေးတဲ့ နည်းဖြစ်ပြီး လက်ရှိ ကူးစက်မှုတွေ မြင့်ချိန်မှာ ပြင်ပ အစားအစာ စားတာအပြင် ရောဂါပိုး ကူးစက်နိုင်ခြေ မြင့်တဲ့ အများပြည်သူသုံး အိမ်သာ (Public Toilets) အသုံးပြုတာမျိုးကိုလည်း ရှောင်ကြဉ်ကြဖို့ လိုပါတယ်။ သန့်ရှင်းတဲ့ အစားအစာနဲ့ ကျိုချက်ထားပြီး ဒါမှမဟုတ် ပိုးသတ်ထားပြီးသား သောက်သုံးရေကို သောက်တာ၊ လက်ကို ဆပ်ပြာအသုံးပြုပြီး စင်ကြယ်စွာ ဆေးကြောတာမျိုးတွေနဲ့ ကိုယ့်ကိုယ်ကို ကြိုတင် ကာကွယ်နိုင်ကြောင်း ကျန်းမာရေးပညာရှင်တွေက အကြံပြုထားပါတယ်။

Weekly Health Round-Up (August Second Week )စာရေးသူ- ကိုတင်• ရန်ကုန်မြို့မှာ ဝမ်းပျက်/ဝမ်းလျှောရောဂါ ဖြစ်သူ ဆယ်နဲ့ ချီ ရ...
14/08/2026

Weekly Health Round-Up (August Second Week )
စာရေးသူ- ကိုတင်

• ရန်ကုန်မြို့မှာ ဝမ်းပျက်/ဝမ်းလျှောရောဂါ ဖြစ်သူ ဆယ်နဲ့ ချီ ရှိလာနေပြီး သြဂုတ် ၁၁ ရက်ကတည်းက လသာမြုိ့နယ်ထဲက ဖြစ်ပွားသူတွေ အရေးပေါ်ရောက်ရှိလာလို့ ရန်ကုန်ပြည်သူ့ဆေးရုံကြီးမှာ ကုသမှုတွေ လုပ်ပေးထားရတယ်လို့ ကျန်းမာရေးဝန်ထမ်းတွေဆီကနေ သိရပါတယ်။ ရောဂါဖြစ်သူ တိုးလာတဲ့အတွက် တိုင်းအတွင်းက မြို့နယ်တချို့မှာ လမ်းဘေးဆိုင်တွေ ယာယီပိတ်ထားဖို့ကိုလည်း သက်ဆိုင်ရာ မြို့နယ်စည်ပင်သာယာရေးဝန်ထမ်းတွေက လုပ်ဆောင်နေကြတယ်လို့ ရန်ကုန်မြို့ခံတွေက ဆိုပါတယ်။

• မိုးတွင်းကာလ အစားအစာနဲ့ သောက်သုံးရေ မသန့်ရှင်းတာက ဝမ်းပျက်/ဝမ်းလျှောရောဂါတွေ ပိုပြီး ဖြစ်ပွားနိုင်လို့ လက်ကို ဆပ်ပြာနဲ့ စနစ်တကျ ဆေးဖို့၊ အစားအစာကို သန့်ရှင်းစွာ ပြင်ဆင်ပြီးမှ စားဖို့နဲ့ သောက်သုံးရေကို ဘေးကင်းစိတ်ချရအောင် လုပ်ပြီးမှ သုံးစွဲတဲ့ ပုံစံမျိုးနဲ့ ကြိုတင်ကာကွယ်နိုင်တယ်လို့ WHO (Myanmar) က ထုတ်ပြန်ထားပါတယ်။ ဒါ့အပြင် ကိုယ့်နေတဲ့ဒေသမှာ ဒါမျိုးဖြစ်ပွားနေတယ်ဆိုရင် ကိုယ်တိုင်နဲ့ မိသားစုဝင်တွေ ကူးစက်မခံရအောင် သန့်ရှင်းရေးကို ပိုဂရုစိုက်ဖို့၊ ရောဂါလက္ခဏာတွေ ပြလာရင် ရေဓာတ်မဆုံးရှုံးအောင် အရည်များများသောက်ဖို့နဲ့ ရောဂါပြင်းထန်ရင် အချိန်မီ ဆေးရုံ၊ ဆေးခန်းသွားဖို့ကိုလည်း တိုက်တွန်းထားပါတ​ယ်။

• ဝမ်းပျက်/ဝမ်းလျှောရောဂါ ဖြစ်နိုင်မှုကို ကြိုတင်ကာကွ​ယ်တဲ့အနေနဲ့ ကျောက်တံတားမြို့နယ်ထဲက လမ်းဘေးစျေးရောင်းချခွင့်ကို သြဂုတ် ၁၃ ရက်ကစပြီး ယာယီပိတ်ထားလိုက်ပြီး ရောဂါဖြစ်ပွားမှု အခြေအနေပေါ်မူတည်ပြီး ပြန်လည်ရောင်းချခွင့်ကို အသိပေးမယ်လို့ ကျောက်တံတားမြို့နယ် တာဝန်ရှိသူတွေက လိုက်လံ သတိပေးထားပါတယ်။

• ရန်ကုန်ဆေးရုံကြီးမှာ​ နှစ်ရက်အတွင်း ဝမ်းပျက်/ဝမ်းလျှောနဲ့ ဆေးရုံတက်ရသူ ၁၈၁ ဦးအထိ ရှိပြီး သြဂုတ် ၁၂ ရက် ည ၈ နာရီ အချက်အလက်အရ ဝမ်းရောဂါပိုး တွေ့ထားသူ ၉၃ ဦးအထိ ရှိနေပါတယ်။ ဆေးရုံတက်နေသူတွေထဲက ရှစ်ဦးကတော့ ရောဂါသက်သာလို့ နေအိမ်ကို ပြန်သွားရပေမယ့် အသက် ၉၂ နှစ်အရွယ် သက်ကြီးတစ်ဦးကတော့ သေဆုံးခဲ့တယ်လို့ ရန်ကုန်တိုင်းအစိုးရအဖွဲ့က ထုတ်ပြန်ထားပါတယ်။

• ဝမ်းပျက်/ဝမ်းလျှောဖြစ်ပွားမှုကို ကြိုတင်ကာကွယ်တဲ့အနေနဲ့ ရန်ကုန်ပြည်သူ့ဆေးရုံကြီးမှာ ချက်ပြုတ်ပြီး ပြင်ပအစားအစာလှူဒါန်းခွင့်ကို ယာယီတားမြစ်ထားတယ်လို့ လသာမဲဆန္ဒနယ် အမှတ် (၂) တိုင်းဒေသကြီးလွှတ်တော်ကိုယ်စားလှယ် ဒေါ်အေးမြသဲဖြူကို ကိုးကားပြီး One News က ရေးသားထားပါတယ်။

• နေပြည်တော် ပြည်သူ့ဆေးရုံကြီး (ခုတင် - ၁,၀၀၀) မှာ ဆဋ္ဌမနဲ့ သတ္တမအကြိမ်အဖြစ် ကျောက်ကပ်အစားထိုး ခွဲစိတ်ကုသခံထားတဲ့ လူနာတွေကို ကျန်းမာရေးဝန်ကြီးဌာန ပြည်ထောင်စုဝန်ကြီး ပါမောက္ခ ဒေါက်တာသက်ခိုင်ဝင်းကိုယ်တိုင် လိုက်လံကြည့်ရှု အားပေးခဲ့တယ်လို့ ဝန်ကြီးဌာနဘက်က ထုတ်ပြန်ထားပါတယ်။

• ရွှေဘိုမြို့နယ်ထဲက ရေဘေးသင့်ကိုယ်ဝန်ဆောင်တွေကို ဒေသ အာဏာပိုင်တွေက လှေနဲ့ ကယ်ထုတ်ပြီး အောင်မြင်စွာ မွေးဖွားပေးနိုင်ခဲ့တယ်လို့ သိရပါတယ်။

• ကွန်ဂိုနိုင်ငံ အရှေ့ပိုင်းမှာ ဖြစ်နေတဲ့ အီဘိုလာရောဂါ ကူးစက်မှုဟာ ထိန်းချုပ်နိုင်တဲ့အရှိန်ထက် ပိုပြီး မြန်မြန်ဆန်ဆန် ပျံ့နှံ့နေပြီး လက်ရှိနှုန်းထားအတိုင်း ဆက်ဖြစ်နေရင် မှတ်တမ်းတင်ထားမှုတွေအနက် လူအသေအပျောက်အများဆုံး ကူးစက်မှုအထိ ဖြစ်လာနိုင်တယ်လို့ ကမ္ဘာ့ကျန်းမာရေးအဖွဲ့ (WHO) က သတိပေးထားပါတယ်။

• အမေရိကန်မှာ သွေးတိုးရောဂါရှိပေမယ့် သွေးပေါင်ကျဆေး မသောက်သေးတဲ့ အရွယ်ရောက်သူ ၁၀ သန်းနီးပါးဟာ လမ်းညွှန်ချက်အသစ်အရ ဆေး စသောက်သင့်တဲ့ အခြအနေမှာ ရှိနေတယ်လို့ လေ့လာမှုတစ်ခုကို ကိုးကားပြီး CNN သတင်းက ရေးသားထားပါတယ်။ လေ့လာမှုအရ သွေးပေါင်ကျဆေးသုံးပြီး ကုသမှုခံယူသူတွေမှာ သေဆုံးနိုင်ခြေ ၂၃ ရာခိုင်နှုန်းနဲ့ နှလုံးသွေးကြောရောဂါကြောင့် သေဆုံးနိုင်ခြေကို ၅၀ ရာခိုင်နှုန်းအထိ လျှော့ချပေးနိုင်မှာ ဖြစ်ပါတယ်။ လက်ရှိမှာ သွေးတိုးရောဂါ ရှိပြီး နှလုံးသွေးကြောရောဂါ မဖြစ်သေးသူ ၈၁ သန်းလောက်ထဲက ၂၃ သန်းနီးပါးဟာ ဒီဆေးကုသမှုပုံစံသတ်မှတ်ချက်နဲ့ ကိုက်ညီလာနိုင်ပြီး ၉ ဒဿမ ၇ သန်းကတော့ လက်ရှိအချိန်အထိ သွေးပေါင်ကျဆေး မသုံးစွဲကြရသေးတာ ဖြစ်ပါတယ်။

• ဗြိတိန်က စူပါမားကတ်တွေနဲ့ လက်လီရောင်းသူတွေဟာ အရွယ်အစား၊ ပုံသဏ္ဍာန်နဲ့ အရောင်သတ်မှတ်ချက်တွေနဲ့ မကိုက်ညီတဲ့ အသီးအရွက်တွေကို လက်မခံကြပေမယ့် လက်ရှိမှာ သီးနှံထောက်ပံ့မှု လျော့နည်းလာလို့ ဆိုင်တွေမှာ ပစ္စည်းမပြတ်စေဖို့ ဒီသတ်မှတ်ချက်တွေကို ဖြေလျှော့လာမယ်လို့ မျှော်လင့်နေကြရပါတယ်။ လာမယ့် ရက်သတ္တပတ်တွေအတွင်းမှာ စားသုံးသူတွေအနေနဲ့ အပူလှိုင်းဖြတ်မှုကြောင့် အရွယ်သေးတဲ့၊ ပုံပျက်နေတဲ့၊ အရောင်အဆင်း ထူးခြားတဲ့ အသီးအရွက်တွေကို အရောင်းဆိုင်တွေမှာ တွေ့လာရဖို့ ရှိနေပြီး တောင်သူနဲ့ ရောင်းချသူတွေဘက်ကတော့ ဒါတွေဟာ စားသုံးဖို့ လုံးဝအန္တရာယ်မရှိ့ပါဘူးလို့ ဆိုထားပါတယ်။

ရန်ကုန် ဝမ်းရောဂါလူနာ ၁၈၂ ဦးအနက် ပြင်းထန်ပိုးတွေ့သူ ၅၄ ရှိကာ သက်ကြီးလူနာတစ်ဦး သေဆုံးရန်ကုန်မြို့မှာ ဝမ်းပျက်/ဝမ်းလျှောလူ...
13/08/2026

ရန်ကုန် ဝမ်းရောဂါလူနာ ၁၈၂ ဦးအနက် ပြင်းထန်ပိုးတွေ့သူ ၅၄ ရှိကာ သက်ကြီးလူနာတစ်ဦး သေဆုံး
ရန်ကုန်မြို့မှာ ဝမ်းပျက်/ဝမ်းလျှောလူနာ ၁၈၂ ဦးအထိ ရှိနေပြိး ပြင်းထန်ရောဂါပိုးတွေ့သူ ၅၄ ဦးအထိ ပါဝင်ကာ သက်ကြီးလူနာတစ်ဦးသေဆုံးထားတယ်လို့ ရန်ကုန်တိုင်းဒေသကြီးအစိုးရအဖွဲ့က ထုတ်ပြန်ထားပါတယ်။
ဆေးရုံတက်ရောက်ကုသမှု အခြေအနေ
ဝမ်းပျက်/ဝမ်းလျှောရောဂါ လူနာတွေကို သြဂုတ် ၉ ရက်မှာ စတင်တွေ့ရှိပြီးတဲ့နောက် ရန်ကုန်ပြည်သူ့ဆေးရုံကြီးသို့ လာရောက်ကုသမှုများ ဆက်တိုက် တိုးလာနေတာ ဖြစ်ပါတယ်။
* သြဂုတ် ၉ ရက် မှ ၁၀ ရက်အထိ: လူနာ ၂၈ ဦး
* သြဂုတ် ၁၁ ရက်: လူနာ ၇၀ ဦး
* သြဂုတ် ၁၂ ရက်: လူနာ ၈၄ ဦး
"ဖြစ်တဲ့သူတွေ အများစုက မြို့ထဲပိုင်း မြို့နယ်တွေက ဖြစ်တာများတယ်။ အဓိက လမ်းဘေးအစားအစာနဲ့ ရေကြောင့် ဖြစ်တာလို့ ထင်တယ်။ ပို့ရတဲ့ လူနာကတော့ များတယ်" ဟု ရန်ကုန်က လူမှုကူညီရေး အသင်းတစ်ခုရဲ့ တာဝန်ရှိသူတစ်ဦးက ရှင်းပြပါတယ်။
ရန်ကုန်ပြည်သူ့ဆေးရုံကြီး၏ သြဂုတ် ၁၃ ရက် စာရင်းတွေအရ ရောဂါဖြစ်ပွားသူတွေအနက် ပြင်းထန် ဝမ်းပျက်/ဝမ်းလျှောရောဂါပိုး တွေ့ထားသူ ၅၄ ဦးအထိ ပါရှိကာ ၎င်းတို့အား သီးသန့်ခွဲခြားကာ ကုသမှုများပေးနေရပါတယ်။ ထို့ပြင် ပြင်ပက အစားအသောက် လာရောက်လှူဒါန်းမှုတွေကိုလည်း ခေတ္တလက်မခံဘဲ ဆိုင်းငံ့ထားတယ်လို့ လူမှုကူညီရေးအသင်းတွေဆီကနေ သိရပါတယ်။
"ပြင်ပက လာလှူတဲ့ ထမင်းတို့၊ ဟင်းတို့ကို လက်မခံသေးဘူး။ တစ်ပတ် ပိတ်ထားတယ်။ လှူဖို့ စီစဥ်ထားတဲ့သူတွေ နောက်ဆုတ်လိုက်ရတယ်" လို့ ရန်ကုန်တိုင်းဒေသကြီးအတွင်းရှိ လူမှုကူညီရေးအသင်း တာဝန်ရှိသူတစ်ဦးက MyanHealth ကို ပြောပါတယ်။
ရောဂါဖြစ်ပွားမှုများပြားသည့် မြို့နယ်များနှင့် အရေးယူဆောင်ရွက်ချက်များ
လက်ရှိ ဖြစ်ပွားနေတဲ့ ဝမ်းပျက်/ဝမ်းလျှောရောဂါဟာ ရန်ကုန်တိုင်း လမ်းမတော်၊ လသာ၊ ပန်းဘဲတန်းမြို့နယ်တွေမှာ အဓိကဖြစ်ပွားနေတာဖြစ်ပါတယ်။ ဖြစ်ပွားသူ များလာပြီးတဲ့နောက် ယင်းမြို့နယ်တွေနဲ့ ကျောက်တံတားမြို့နယ်အတွင်းက လမ်းဘေးရောင်းချတဲ့ အစားအသောက်ဆိုင်တွေကိုလည်း အနည်းဆုံး ငါးရက်အထိ ပိတ်ထားရမယ်လို့ သက်ဆိုင်ရာ မြို့နယ်အုပ်ချုပ်ရေးအဖွဲ့တွေက ညွှန်ကြားထားပါတယ်။
သြဂုတ် ၁၂ ရက် ညပိုင်းကလည်း ကျောက်တံတားမြို့နယ် အုပ်ချုပ်ရေးအဖွဲ့က အောက်ပါအတိုင်း ကြေညာထားပါတယ်။
"လတ်တလောတွင် ဝမ်းပျက်ဝမ်းလျှောမှု ဖြစ်နိုင်သောကြောင့် မြို့နယ်အတွင်းရှိ လမ်းများပေါ်တွင် စျေးရောင်းချမှုများအား ၁၃ ရက်နေ့မှစ၍ နောက်သုံးရက်မှ ငါးရက်အတွင်း စျေးရောင်းချခြင်းမပြုပါရန် အသိပေး တားမြစ်အပ်ပါသည်။ ရောဂါအခြေ အနေပေါ် မူတည်ပြီး စျေးပြန်လည်ရောင်းချခြင်းအား ပြန်လည်အသိပေးမည်ဖြစ်ကြောင်း ကြေညာအပ်ပါသည်"
လသာမြို့နယ်ထဲမှာလည်း ဝမ်းပျက်/ဝမ်းလျှောရောဂါ ဖြစ်ပွားနေတဲ့အတွက် ဌာနဆိုင်ရာ၊ စည်ပင်၊ ကြက်ခြေနီ၊ ရပ်ကွက်အုပ်ချုပ်ရေးမှူးတွေနဲ့ လွှတ်တော် ကိုယ်စားလှယ်တွေ အစည်းအဝေးပြုလုပ်ခဲ့ပြီး ရောဂါဖြစ်စေမယ့် လက်လုပ်ချဉ်၊ အသုပ်၊ တုတ်ထိုး စတဲ့ ဆိုင်တွေကို နှစ်ရက်၊ သုံးရက်ခန့် ပိတ်ထားကြဖို့ လုပ်ဆောင်ထားတယ်လို့ လသာမြို့နယ် တိုင်းဒေသကြီးလွှတ်တော်ကိုယ်စားလှယ် ဒေါ်အေးမြသဲဖြူက သတင်းမီဒီယာတွေကို ထုတ်ဖော်ပြောဆိုထားပါတယ်။
ကြိုတင်ပြင်ဆင်မှုများနှင့် နောက်ခံအခြေအနေ
လက်ရှိမှာ ပြင်းထန်ဝမ်းရောဂါပိုးတွေ့လူနာ များပြားလာရင် ရန်ကုန်ဆေးရုံကြီး အဆောင်သစ်တစ်ခုမှာ ထပ်တိုးလူနာတွေအတွက် ခုတင်တပ်ဆင်တာ၊ ပိုးသတ်ဆေးဖြန်းတာတွေကို ကြိုတင်ဆောင်ရွက်ထားပြီး ဖြစ်တယ်လို့လည်း သူက ဆိုပါတယ်။
ရန်ကုန်မြို့မှာ ၂၀၂၄ ခုနှစ် မိုးရာသီကာလတုန်းက သာကေတ၊ လှိုင်သာယာ၊ ဒေါပုံ၊ ဗိုလ်တထောင်၊ သင်္ဃန်းကျွန်း စတဲ့ မြို့နယ်တွေမှာ ဝမ်းပျက်/ဝမ်းလျှောရောဂါ ဖြစ်ပွားခဲ့ဖူးပြီး လူသေဆုံးမှုတွေလည်း ရှိထားခဲ့ဖူးပါတယ်။

လူကိုအိုမင်းစေတဲ့ မျက်နှာပြင်ပေါ်က အရေးအကြောင်းများ(Dr. အောင်မိုးသူ)မျက်နှာပေါ်က အရေးအကြောင်းတွေဆိုတာ အသက်အရွယ်အိုမင်းလာ...
13/08/2026

လူကိုအိုမင်းစေတဲ့ မျက်နှာပြင်ပေါ်က အရေးအကြောင်းများ
(Dr. အောင်မိုးသူ)

မျက်နှာပေါ်က အရေးအကြောင်းတွေဆိုတာ အသက်အရွယ်အိုမင်းလာတဲ့အခါ မရှောင်လွှဲနိုင်တဲ့
ဇီဝကမ္မဖြစ်စဉ်တစ်ခုပါ။ သို့ပေမယ့်လည်း အသက်အရွယ်ဆိုတာ ကိန်းဂဏန်းတစ်ခုပါပဲ။
သဘာဝတရားကြီးကို ခဏလောက်ဖြစ်ဖြစ် တတ်နိုင်သလောက် အချိန်ဆွဲဆန့်ပြီး
အိုမင်းခြင်းရဲ့ပြယုဂ်ကို ပိုသိသာစေတဲ့ မျက်နှာပေါ်က အရေးအကြောင်းတွေကို
လုံးဝမပေါ်လာအောင် မတားဆီးနိုင်သည့်တိုင် ပုံမှန်ထက်နောက်ကျပြီးမှ
ကိုယ့်မျက်နှာပေါ်ရောက်လာဖို့ တားဆီးကြည့်ကြရအောင်...
အရေးအကြောင်းတွေဆိုတာ ကျွန်တော်တို့ အရေပြားရဲ့ တင်းရင်းမှုနဲ့ ရုန်းကန်နိုင်စွမ်း
တဖြည်းဖြည်း လျော့နည်းလာတဲ့အခါ ဖြစ်ပေါ်လာတဲ့ အကြောင်းများ ၊ ခေါက်ရာများနဲ့
အမြောင်းရာတွေ ဖြစ်ပါတယ်။ ပြုံးတာ၊ ရယ်တာ၊ မျက်မှောင်ကြုတ်တာ နဲ့ တစ်ခုခုကို
စူးစိုက်ကြည့်တဲ့အချိန် မျက်နှာပေါ်က ကြွက်သားတွေလှုပ်ရှားရတာကြောင့် နဖူးပြင်ပေါ်၊
မျက်ခုံးကြား နဲ့ မျက်လုံးဘေးနားမှာ ပေါ်လာတဲ့ အရေးကြောင်းတွေကို Dynamic wrinkles လို့
ခေါ်ပြီး မျက်နှာပြင်ကြွက်သားတွေ ပြေလျော့နေတဲ့အချိန်မှာတောင် ပေါ်နေတတ်တဲ့
အရေးအကြောင်းတွေကိုတော့ Static wrinkles လို့ ခေါ်ပါတယ်။ ကျန်းမာတဲ့ အရေပြားမှာ
Collagen ၊ Elastin နဲ့ Hyaluronic acid တို့ ရှိနေပြီး အရေပြားကို ချောမွတ်စေဖို့နဲ့
ပျော့ပျောင်းနူးညံ့ပြီး ရေဓာတ်ပြည့်ဝနေအောင် ပေါင်းစပ် လုပ်ဆောင်ပေးကြပါတယ်။
အသက်အရွယ် အိုမင်းလာတာနဲ့အတူ သူတို့လေးတွေကလည်း တဖြည်းဖြည်း
လျော့နည်းလာပါတယ်။ တစ်ချိန်တည်းမှာပဲ အရေပြားက ပါးလွှာလာပြီး ပျက်စီးသွားတဲ့ cell
တွေကို ပြန်လည်ပြင်ဆင်နိုင်စွမ်း နှေးကွေးလာပါတော့တယ်။ ဒီလိုဖြစ်စဉ်တွေကကြောင့်
နက်ရှိုင်းတဲ့ အရေးအကြောင်းတွေ မပေါ်လာခင်မှာတင် မျက်လုံးနဲ့ ပါးစပ်ဘေးဝန်းကျင်နားမှာ
ပါးလွှာတဲ့ အကြောင်းလေးများ ကနဦးပေါ်လာပါတော့တယ်။

ဒါဆို မျက်နှာပေါ်မှာ အရေးအကြောင်းတွေ မြန်မြန်ပေါ်လာအောင် ဘယ်လိုအရာတွေက
တွန်းပို့ပေးနေလဲ?

ကျန်းမာတဲ့အသားအရေကို မက်မောကြသူတိုင်းရဲ့ ရန်သူတော် ခရမ်းလွန်ရောင်ခြည်တွေက
ထိပ်ဆုံးက ပါနေပြန်ပါတယ်။ ခရမ်းလွန်ရောင်ခြည်တွေက အောက်ဆီဂျင်ဓာတ်တိုး ပျက်စီးမှု
(Oxidative stress) ကို မြှင့်တင်ပေးပြီး အရေပြားရဲ့ တင်းရင်းနိုင်စွမ်းနဲ့ ရုန်းကန်နိုင်စွမ်းကို
လျော့နည်းလာစေတာကြောင့် အရေးအကြောင်းတွေ၊ အသားအရောင် မညီညာတာတွေ၊
အရေပြား ကြမ်းတမ်းတာနဲ့ လျော့ရဲတွဲကျတာတွေ ဖြစ်လာပါတော့တယ်။ Photoaging လို့
ခေါ်တဲ့ ဒီလိုဖြစ်စဉ်ကြောင့် မျက်နှာအရေပြား အိုမင်းရင့်ရော်ခြင်းရဲ့ အများစုက ဇရာကြောင့်
ပေါ်လာတာထက် နေရောင်ခြည်နဲ့ ရေရှည်ထိတွေ့တာနဲ့ ပိုမို သက်ဆိုင်နေတယ်လို့
သုတေသနလေ့လာမှုများမှာ ဖော်ပြထားပါတယ်။
နေထိုင်စားသောက်မှုနဲ့ဆိုင်တဲ့ အလေ့အထတွေထဲမှာ ဆိုရင် ဆေးလိပ်သောက်တာ၊
အိပ်ရေးပျက်တာ၊ စိတ်ဖိစီးမှုများတာ၊ အရက် အလွန်အကျွံ သောက်တာ၊ ကျန်းမာရေးနဲ့
မညီညွတ်တဲ့ အစားအသောက်တွေစားတာနဲ့ လေထုညစ်ညမ်းတာတွေက အရေပြားကို မြန်မြန်
အိုမင်းရင့်ရော်စေပါတယ်။ မျိုးရိုးဗီဇနဲ့လည်း ဆက်စပ်နေတာကြောင့် အသက်အရွယ်တူတဲ့
သူအချင်းချင်းမှာတောင် အရေးအကြောင်း စောပေါ်နေတဲ့သူတွေရှိနေတတ်ပါတယ်။
အရေးအကြောင်းတွေ ပေါ်လာတာကို နှေးကွေးစေဖို့ဆိုတဲ့နေရာမှာ ခရမ်းလွန်ရောင်ခြည်ဒဏ်
ကနေကာကွယ်ဖို့ နေရောင်ထဲထွက်တဲ့ အချိန်တိုင်း Broad-spectrum Sunscreen
(နေလောင်ကာလိမ်းဆေး) တစ်ခုခု လိမ်းဖို့လိုပါတယ်။ အသားအရေထိန်းသိမ်းဖို့ Skincare
ပစ္စည်းအနေနဲ့ ကော်လာဂျင် ထုတ်လုပ်မှုကို လှုံ့ဆော်ပေးတဲ့ Retinoids ကို ဂရုတစိုက် စွဲသုံးတာ၊
အောက်ဆီဂျင်ဓာတ်တိုးပျက်စီးမှုကို ကာကွယ်ပေးနိုင်တဲ့ Vitamin C ပါတဲ့ skincare သုံးတာနဲ့
အစိုဓာတ်ဖြည့်ပေးနိုင်တဲ့ Hyaluronic Acid ပါတဲ့ skincare သုံးပေးတာတွေက
အရမ်းမနက်ရှိုင်းတဲ့ အရေးအကြောင်းတွေကို သက်သာစေနိုင်ပါတယ်။ ဒါ့အပြင် သစ်သီးဝလံ၊
ဟင်းသီးဟင်းရွက်နဲ့ ပရိုတင်း မျှတစွာ စားပေးမယ်၊ လေ့ကျင့်ခန်းပုံမှန်လုပ်မယ်၊
အိပ်ရေးဝအောင်အိပ်မယ်၊ အထူးသဖြင့် ဆေးလိပ်သောက်တာကို ရှောင်နိုင်မယ်ဆိုရင်
အရေပြား စောစောစီးစီး အိုမင်းရင့်ရော်တာကို နှေးကွေးစေပါလိမ့်မယ်။
သိသိသာသာမြင်နေရတဲ့ အရေးအကြောင်းရှိသူတွေကတော့ ကိုယ့်မှာရှိတဲ့

အရေးအကြောင်းအမျိုးအစား၊ ကိုယ့်ရဲ့အောက်ခံအရေပြား အခြေအနေနဲ့ အသက်အရွယ်ပေါ်
မူတည်နေတာမို့ ကုသနိုင်မှုတွေလည်း အမျိုးမျိုးရှိနေပြန်ပါတယ်။ ကော်လာဂျင်
အသစ်ထုတ်လုပ်မှုကို လှုံ့ဆော်ပေးနိုင်တဲ့ Fractional laser resurfacing ၊ Radiofrequency
microneedling နဲ့ Microneedling တို့လို ကုသမှုတွေအပြင် Dynamic wrinkles လို အမျိုးအစား
အရေးအကြောင်းတွေမှာ ကြွက်သားတွေကို ခေတ္တ ပြေလျော့စေနိုင်တဲ့ Botulinum toxin (Botox)
ထိုးကုသမှုတွေ၊ ကြွက်သားထုထည်အားနည်းပြီးချိုင့်နေတဲ့ အရေးအကြောင်းတွေမှာဆိုရင်
Hyaluronic acid အသားဖြည့်ဆေး (Dermal Fillers) နဲ့ ပြန်ဖြည့်တဲ့ ကုသမှုတွေ
ရယူနိုင်ပါတယ်။ ဒီလိုကုသမှုတွေကလည်း ဆောင်ရ၊
ရှောင်ရမယ့်အချက်တွေအပြင်အခန့်မသင့်ရင် ဘေးထွက်ဆိုးကျိုးတွေရှိတတ်တာမို့
ကျွမ်းကျင်တဲ့ အရေပြားအထူးကုဆရာဝန်တွေနဲ့ တိုင်ပင်ပြီးမှသာ ကုသမှုယူသင့်ပါတယ်။
အရေးအကြောင်းတွေဆိုတာ အသက်အရွယ်အိုမင်းလာခြင်းရဲ့ အစိတ်အပိုင်းတစ်ခု
ဖြစ်သည့်နည်းတူ၊ ဘယ်လို ကုသမှုမျိုးကမှ အိုမင်းရင့်ရော်မှု ဖြစ်စဉ်ကို ထာဝရ
မတားဆီးနိုင်ပါဘူး။ သို့သော်ငြားလည်း ကိုယ့်ကို ရှိရင်းစွဲအသက်ထက်ကြီးတယ်လို့ ထင်ရစေတဲ့
အရေးအကြောင်းတွေကိုတော့ တတ်နိုင်သမျှ နှေးကွေးအောင်လုပ်နိုင်ပါတယ်။
အရမ်းနက်ရှိုင်းတဲ့ အရေးအကြောင်းတွေ ပေါ်လာမှ ကုသမှုခံယူတာထက် အသက် ၃၀
ဝန်းကျင်အရွယ်ကတည်းက
ထိန်းသိမ်းနေထိုင်လို့ရတဲ့နည်းလမ်းတွေလိုက်နာနေထိုင်ရင်သက်သာစေတာကြောင့်
ဆောင်းပါးလေးကနေတစ်ဆင့် ကျန်းမာရေးဗဟုသုတတွေကို လက်ဆင့်ကမ်းပေးလိုက်ပါတယ်
ခင်ဗျာ...

References:
Mayo Clinic Staff. (2023, December 12). Wrinkles - Symptoms and causes. Mayo Clinic.
https://www.mayoclinic.org/diseases-conditions/wrinkles/symptoms-causes/syc-
20354927
Fisher, G. J., Varani, J., & Voorhees, J. J. (2008). Looking older: fibroblast collapse and
therapeutic implications. Arch Dermatol, 144(5), 666-672.
https://doi.org/10.1001/archderm.144.5.666
American Academy of Dermatology Association. (n.d.). Wrinkles.
https://www.aad.org/public/cosmetic/wrinkles

ပြဒါးနှင့် အရောင်ချွတ်ဆေးများပါဝင်ပြီးသုံးစွဲရန်မသင့်သော အလှကုန်ပစ္စည်းများကို FDAကြေညာ မြန်မာနိုင်ငံတွင်း၌ရောင်းချနေ...
12/08/2026

ပြဒါးနှင့် အရောင်ချွတ်ဆေးများပါဝင်ပြီးသုံးစွဲရန်မသင့်သော အလှကုန်ပစ္စည်းများကို FDAကြေညာ

မြန်မာနိုင်ငံတွင်း၌ရောင်းချနေသည့် အလှကုန်ပစ္စည်း(၅)မျိုးသည် မှတ်ပုံတင်ထားခြင်းမရှိသည့်အပြင် ကျန်းမာရေးအတွက် ဘေးအန္တရာယ် ဖြစ်စေနိုင်သော တားမြစ်ပစ္စည်းများပါဝင်နေကြောင်းအစားအသောက်နှင့်ဆေးဝါးကွပ်ကဲရေးဦးစီးဌာန(FDA)က ထုတ်ပြန်သည်။

အဆိုပါအလှကုန်ပစ္စည်းများတွင် ထည့်သွင်းရန်မသင့်သည့် တားမြစ်ဓါတုပစ္စည်းများကြောင့် အရေပြား ယားယံခြင်း၊ ရောင်ရမ်းခြင်း၊ အဖြူအနီကွက်များဖြစ်ခြင်း၊ အရေပြားမှတဆင့်ခန္ဓာကိုယ်အတွင်းသို့စုပ်ယူ၍ ထုံကျင်ခြင်း၊ ကြွက်သားတုန်ခါခြင်း၊ ပင်ပန်းနွမ်းနယ်ခြင်း၊ ခေါင်းကိုက်ခြင်းနှင့်စိတ်ကျရောဂါများအပြင် ရေရှည်သုံးစွဲပါက ကျောက်ကပ်ပျက်စီးခြင်းနှင့်အခြား ရောဂါများ ဖြစ်ပွားနိုင်ကြောင်း အဆိုပါထုတ်ပြန်ချက်ကဖော်ပြသည်။

အလှကုန်ပစ္စည်းတင်သွင်းဖြန့်ဖြူးရောင်းချသည့် ကုမ္ပဏီ၊ လက်လီလက်ကားဆိုင်များနှင့် online ရောင်းချသည့်လုပ်ငန်းများသည် အစားအသောက်နှင့်ဆေးဝါးကွပ်ကဲရေးဦးစီးဌာနတွင် မှတ်တမ်းတင် ထားခြင်းမရှိသော အများပြည်သူသုံးစွဲရန်မသင့်ကြောင်း ကြေညာထားသည့်အလှကုန်ပစ္စည်းများ တင်သွင်း ဖြန့်ဖြူးရောင်းချခြင်းများကို ကျင့်ဝတ် (Ethic)အရလုံးဝမပြုလုပ်ရန်နှင့် လိုက်နာဆောင်ရွက်ခြင်းမရှိပါက သက်ဆိုင်ရာအာဏာပိုင် အဖွဲ့အစည်းက ပြည်သူ့ကျန်းမာရေးဆိုင်ရာ ဥပဒေပုဒ်မ ၃၊ အပိုဒ် (၃)(ဃ) အရ အရေးယူဆောင်ရွက်သွားမည်ဖြစ်ကြောင်း သက်ဆိုင်ရာက အသိပေးထားပါသည်။အဆိုပါအလှကုန်ပစ္စည်းများတွင်Steorid ၊Mercury၊Rhodamine B+၊Barium Peroxide အစရှိသည့်ဓါတုပစ္စည်းများ ပါဝင်ကြောင်းစစ်ဆေးတွေ့ရှိရသည်ဟု FDA ‌ထုတ်ပြန်ချက်အရသိရပါသည်။

အဆိုပါဓာတုပစ္စည်းများ၏ ကျန်းမာရေးဆိုးကျိုးများမှာ​စတီးရွိုက် (Steroid) သည် အရေပြား ရောင်ရမ်းမှုကို မြန်ဆန်စွာ လျှော့ချပေးပြီး ခဏတာအတွင်း အသားအရေ ကြည်လင်ဖြူဝင်းသွားစေရန် ထည့်သွင်းလေ့ရှိသည့်ပြီးယင်းအလှကုန်များကို သုံးစွဲပါက အရေပြား ပါးလွှာလာခြင်း၊ သွေးကြောမျှင်များ ရောင်ရမ်းလာခြင်း၊ ဝက်ခြံပြင်းထန်စွာ ထွက်ခြင်းနှင့် သုံးစွဲမှု ရပ်တန့်လိုက်ပါက အရေပြား နီရဲယားယံ၍ လောင်ကျွမ်းသကဲ့သို့ ခံစားရခြင်းတို့ ဖြစ်ပွားနိုင်သည်။ ထို့ပြင် အရေပြားမှတစ်ဆင့် ရေရှည်စိမ့်ဝင်ပါက ခန္ဓာကိုယ်၏ ဟော်မုန်းစနစ် ကမောက်ကမဖြစ်ခြင်း၊ ကိုယ်ခံအားကျဆင်းခြင်းနှင့် သွေးတိုး၊ ဆီးချိုရောဂါများ ဖြစ်ပွားနိုင်ခြေကို မြင့်တက်ခြင်းတို့ဖြစ်သည်။

​ပြဒါး (Mercury) ကို အသားအရေကို ညိုမည်းစေသည့် မယ်လနင် (Melanin) ထုတ်လုပ်မှုကို တားဆီးပေးနိုင်သဖြင့် အသားဖြူခရင်မ်များတွင် တရားမဝင် ထည့်သွင်းလေ့ရှိကြသည်။ ပြဒါးသည် အရေပြားမှတစ်ဆင့် သွေးကြောအတွင်း စိမ့်ဝင်ပြီး ဦးနှောက်နှင့် အာရုံကြောစနစ်ကို ထိခိုက်စေကာ ခြေလက်ထုံကျင်ခြင်း၊ ကြွက်သားအားနည်းခြင်း၊ ခေါင်းကိုက်ခြင်း၊ မှတ်ဉာဏ်ချို့ယွင်းခြင်း၊ အိပ်မပျော်ခြင်းနှင့် စိတ်ကျရောဂါများကို ဖြစ်ပေါ်စေသည်။ ရေရှည်သုံးစွဲပါက ကျောက်ကပ်ဆဲလ်များကို ပျက်စီးစေပြီး ကျောက်ကပ်ပျက်စီးခြင်းအထိ ဖြစ်ပွားနိုင်သည့်အပြင် ကိုယ်ဝန်ဆောင်မိခင်များ သုံးစွဲပါက သန္ဓေသား၏ ဦးနှောက်ဖွံ့ဖြိုးမှုကိုပါ ပြင်းထန်စွာ ထိခိုက်စေနိုင်သည်။

​ရိုဒါမင်း ဘီ (Rhodamine B+) သည် တောက်ပသည့် အနီရောင်နှင့် ပန်းရောင် ရရှိစေရန်အတွက် နှုတ်ခမ်းနီ သို့မဟုတ် ပါးနီကဲ့သို့ အလှကုန်များတွင် ထည့်သွင်းလေ့ရှိသော စက်မှုဇုန်သုံး ဆိုးဆေး (Industrial Dye) ဖြစ်သည်။ အဆိုပါ ဓာတုဆိုးဆေးသည် တိုက်ရိုက် ထိတွေ့မိပါက အရေပြားနှင့် မျက်လုံးများကို ပြင်းထန်စွာ ယားယံစပ်လောင်စေခြင်း၊ အစက်အပြောက်များနှင့် အဖြူအနီကွက်များ ဖြစ်ပေါ်စေခြင်းတို့ကို ဖြစ်စေသည်။ ထို့ပြင် အသည်းကို အဆိပ်အတောက်ဖြစ်စေရုံမျှမက ကင်ဆာရောဂါ ဖြစ်ပွားစေနိုင်သည့် ကာစီနိုဂျင် (Carcinogen) စာရင်းဝင် ဖြစ်သဖြင့် အလှကုန်နှင့် အစားအသောက်များတွင် သုံးစွဲခြင်းကို ကမ္ဘာတစ်ဝှမ်း လုံးဝတားမြစ်ထားသည်။

​ဘေရီယမ်ပါရောဆိုက် (Barium Peroxide) သည် အရောင်ချွတ်ဆေးအဖြစ် စက်မှုလုပ်ငန်းများတွင် သုံးစွဲသည့် ဓာတုပစ္စည်းဖြစ်ပြီး ဆံပင်ဆိုးဆေးနှင့် အသားဖြူဆေးအချို့တွင် တရားမဝင် ထည့်သွင်းလေ့ရှိသည်။ အရေပြားကို ပြင်းထန်စွာ လောင်ကျွမ်းစေခြင်း၊ အရေခွံကွာခြင်းနှင့် ရောင်ရမ်းခြင်းတို့ကို ချက်ချင်း ဖြစ်ပေါ်စေနိုင်သည်။ အရေပြားမှတစ်ဆင့် ခန္ဓာကိုယ်အတွင်းသို့ ရောက်ရှိပါက သို့မဟုတ် ရှူရှိုက်မိပါက ကြွက်သားများ အားနည်းခြင်း၊ နှလုံးခုန်နှုန်း မမှန်ခြင်း၊ ပင်ပန်းနွမ်းနယ်ခြင်းနှင့် အစာအိမ် အူလမ်းကြောင်းဆိုင်ရာ ဝေဒနာများကို ခံစားရစေနိုင်သည်။

FDA ထုတ်ပြန်ချက်တွင်ပါဝင်သော အလှကုန်ပစ္စည်းများ၏ အမည်၊ထုတ်လုပ်သည့်နိုင်ငံ၊ပါဝင်သည့်တားမြစ်ဓာတုပစ္စည်းများကို ပုံတွင်ကြည့်ရှုနိုင်ပါသည်။

လည်ချောင်းနာပြီးဖျားနေပြီလား(Wor Mi Thi)မိုးတွင်းရောက်လာပြီဆိုရင် လည်ချောင်းလေးနာလိုက်၊ အဖျားလေးတက်လိုက်၊ နှာလေးစေးလိုက်...
11/08/2026

လည်ချောင်းနာပြီးဖျားနေပြီလား
(Wor Mi Thi)
မိုးတွင်းရောက်လာပြီဆိုရင် လည်ချောင်းလေးနာလိုက်၊ အဖျားလေးတက်လိုက်၊ နှာလေးစေးလိုက်နဲ့ မိသားစုတွေ တစ်ယောက်ပြီးတစ်ယောက် ဖျားကြတော့ပါပဲ။ ဒီလို လည်ချောင်းနာရတဲ့ အကြောင်းအရင်း အများစုကတော့ ဗိုင်းရပ်စ်ပိုးကြောင့်ဖြစ်ပြီး ပဋိဇီဝဆေး သောက်စရာမလိုဘဲ သက်သာ ပျောက်ကင်းသွားတတ်ကြပါတယ်။
လည်ချောင်းနာရခြင်းရဲ့ အဓိကအကြောင်းရင်းတွေထဲမှာ အအေးမိခြင်း၊ တုပ်ကွေးနဲ့ တခြားအသက်ရှူလမ်းကြောင်းဆိုင်ရာ ဗိုင်းရပ်စ်ကူးစက်မှုတွေက အဖြစ်များဆုံး ဖြစ်ပါတယ်။ အသက်ရှူလမ်းကြောင်းဆိုင်ရာ ဗိုင်းရပ်စ်တွေကြောင့် လည်ချောင်းနာတဲ့အခါ ချောင်းဆိုးတာ၊ နှာစေးနှာပိတ်တာ၊ နှာချေတာ၊ အသံဝင်တာ ဒါမှမဟုတ် မျက်လုံးနီပြီး မျက်ရည်ကျတာတွေပါ တွဲဖြစ်တတ်ပါတယ်။ ပြင်းထန်တဲ့ နောက်ဆက်တွဲပြဿနာမရှိရင် အများအားဖြင့်တော့ ကိုယ်ခံစွမ်းအားက အနိုင်ယူပြီး တစ်ပတ်လောက်အတွင်းမှာပဲ တဖြည်းဖြည်း သက်သာလာတတ်ပါတယ်။ တစ်ခုသိထားရမယ့်အချက်က ပိုးသတ်ဆေးလို့ ခေါ်ကြတဲ့ ပဋိဇီဝဆေးတွေဟာ ဗိုင်းရပ်စ်ကို မသတ်နိုင်ပါဘူး။ ဒါကြောင့် ဗိုင်းရပ်စ်ကြောင့်ဖြစ်တဲ့ လည်ချောင်းနာတာအတွက် ပဋိဇီဝဆေးသောက်လည်း ရောဂါမြန်မြန်မပျောက်နိုင်ပါဘူး။ ဒါ့အပြင် မလိုအပ်ဘဲ ပိုးသတ်ဆေးတွေ မကြာခဏသောက်နေရင် နောင်တစ်ချိန် ဘက်တီးရီးယားပိုးတွေ ဆေးယဉ်ပါးလာနိုင်ပါတယ်။
လူအနည်းစုမှာတော့ တစ်ခါတစ်ရံ လည်ချောင်းနာတာဟာ ဘက်တီးရီးယားပိုးကြောင့် ဖြစ်နိုင်ပါတယ်။ အများဆုံးဖြစ်စေတဲ့ ဘက်တီးရီးယားပိုးက Group A Streptococcus ဖြစ်တဲ့အတွက် Strep Throat လို့ခေါ်ပါတယ်။ Strep Throat ဟာ လူကြီးတွေထက် ကလေးတွေမှာ ပိုအဖြစ်များပါတယ်။ ဒီရောဂါဟာ ရုတ်တရက် လည်ချောင်းပြင်းပြင်းထန်ထန်နာတာ၊ ကိုယ်ပူတာ၊ မျိုချရင် နာတာ၊ အာသီးနီပြီး ရောင်လာတာ၊ လည်ပင်းအရှေ့ဘက်နားက အကျိတ်လေးတွေ နာကျင်ရောင်ရမ်းလာတာတွေနဲ့ စတင်တတ်ပါတယ်။ အာသီးပေါ်မှာ အဖြူရောင်အဖတ်တွေ တွေ့ရနိုင်ပေမဲ့ ချောင်းဆိုးတာနဲ့ နှာစေးတာတွေကတော့ များသောအားဖြင့် မတွေ့ရတတ်ပါဘူး။
ဒါ့အပြင် လည်ချောင်းနာပြီး ကိုယ်ပူနေတဲ့ ကလေးတွေမှာဆိုရင် ခန္ဓာကိုယ်ပေါ် အနီရောင်အဖုအပိန့်တွေ ထွက်မထွက်ကိုလည်း စောင့်ကြည့်သင့်ပါတယ်။ အရေပြားကို ထိကြည့်တဲ့အခါ သဲစက္ကူလို ကြမ်းတမ်းနေတဲ့ အနီရောင်အဖုအပိန့်မျိုး ဖြစ်လာရင် Scarlet Fever ဖြစ်နိုင်တာကြောင့် လိုအပ်တဲ့ ပိုးသတ်ဆေးတွေ သောက်သုံးရတာမျိုး ရှိနိုင်တဲ့အတွက် ကျန်းမာရေးဝန်ထမ်းကို ပြသသင့်ပါတယ်။
လိုအပ်တဲ့အခါ ကျန်းမာရေးဝန်ထမ်းရဲ့ ညွှန်ကြားချက်နဲ့သောက်တဲ့ မှန်ကန်တဲ့ ပဋိဇီဝဆေးကုသမှုဟာ ရောဂါလက္ခဏာတွေ ကြာချိန်ကို လျှော့ချပေးနိုင်သလို တခြားသူတွေကို ကူးစက်နိုင်ခြေနဲ့ နောက်ဆက်တွဲပြဿနာအချို့ကိုလည်း လျှော့ချပေးနိုင်ပါတယ်။ ဒါပေမဲ့ မိမိအိမ်မှာ ကျန်နေတဲ့ ဆေးဟောင်းတွေကို သောက်တာ၊ တခြားသူရဲ့ဆေးကို မျှဝေသောက်တာ ဒါမှမဟုတ် သက်သာလာတာနဲ့ ဆေးကို ကိုယ့်သဘောနဲ့ ရပ်လိုက်တာမျိုးတော့ လုံးဝ မလုပ်သင့်ပါဘူး။
လည်ချောင်းနာပြီးဖျားတဲ့အခါ များသောအားဖြင့် ခန္ဓာကိုယ်က ပိုးကို တိုက်ထုတ်နေချိန်အတွင်း နာကျင်မှုသက်သာအောင် စောင့်ရှောက်ပေးတာနဲ့ ရေဓာတ်မခန်းခြောက်အောင် ထိန်းပေးတာက အရေးကြီးပါတယ်။ ရေများများသောက်သင့်ပြီး ရေနွေးနွေး၊ စွပ်ပြုတ် ဒါမှမဟုတ် လည်ချောင်းကို သက်တောင့်သက်သာ ဖြစ်စေမယ့် အရည်တွေ သောက်နိုင်ပါတယ်။ အေးတာကမှ ပိုသက်တောင့် သက်သာ ရှိတယ်လို့ ခံစားရရင် ရေအေးဒါမှမဟုတ် အေးမြနူးညံ့တဲ့ အစားအစာတွေ ကိုလည်း ရွေးချယ်နိုင်ပါတယ်။ ပူလွန်းတဲ့ အစားအသောက်တွေ၊ အရည်တွေကတော့ လည်ချောင်းကို ပိုယားယံစေနိုင်တာကြောင့် ရှောင်သင့်ပါတယ်။
အိမ်တွင်းကုထုံးအနေနဲ့ဆိုရင် ဆားရည်နွေးနွေးနဲ့ ပလုတ်ကျင်းတာမျိုး လုပ်ပေးနိုင်ပါတယ်။ ဆေးမတည့်တာ မရှိဘူးဆိုရင် ပါရာစီတမောလို ဆေးကို လည်ချောင်းနာ သက်သာအောင် သောက်နိုင်ပါတယ်။ အသံကို အနားပေးတာ၊ ဆေးလိပ်နဲ့ ဆေးလိပ်ငွေ့ကို ရှောင်တာ၊ ဖုန်ထူတဲ့နေရာတွေမှာ မနေဘဲ ရှောင်ရှားတာတွေကလည်း လည်ချောင်းယားယံမှုကို သက်သာစေနိုင်ပါတယ်။ လက်ကို မကြာခဏဆေးကြောတာ၊ ချောင်းဆိုးနှာချေတဲ့အခါ ပါးစပ်နဲ့ နှာခေါင်းကို ဖုံးအုပ်တာ၊ ရေခွက်၊ ဇွန်းနဲ့ စားသောက်အသုံးအဆောင်တွေကို မျှဝေသုံးတာတွေကို ရှောင်တာက ဗိုင်းရပ်စ်နဲ့ Strep ပိုး ကူးစက်ပျံ့နှံ့မှုကို လျှော့ချနိုင်ပါတယ်။ ရာသီတုပ်ကွေး ကာကွယ်ဆေးကို နှစ်တိုင်းပုံမှန်ထိုးပေးတာကလည်း အထိုက်အလျောက် ကာကွယ်ပေးနိုင်ပါတယ်။
လည်ချောင်းနာတာ တဖြည်းဖြည်း ပိုပြင်းထန်လာရင်၊ ကိုယ်ပူအမြင့်ကြာရှည်နေရင်၊ ရေမသောက်နိုင်လောက်အောင် မျိုချရခက်ရင် ဒါမှမဟုတ် တစ်ပတ်လောက် ကြာတဲ့အထိ မသက်သာလာရင်တော့ ဆေးရုံ/ဆေးခန်းကို သွားရောက်ပြသင့်ပါတယ်။ အသက်ရှူရခက်လာတာ၊ ရေ ဒါမှမဟုတ် တံတွေးကိုတောင် မမျိုနိုင်တာ၊ တံတွေးယိုစီးကျနေတာ၊ ပါးစပ် ဒါမှမဟုတ် လည်ပင်းအတွင်း မှာ အလွန်အမင်းရောင်လာတာ၊ အသံပြောင်းပြီး ပါးစပ်ထဲတစ်ခုခု ထည့်ထားသလို အသံထွက်လာတာ၊ အသက်ရှူစဉ်တစ်ရွှီးရွှီးမြည်လာတာ ဒါမှမဟုတ် လက္ခဏာတွေ မြန်မြန်ပိုဆိုးလာခဲ့တာတွေ ရှိလာရင်တော့ အရေးပေါ်ဆေးကုသမှု ခံယူသင့်ပါတယ်။
လည်ချောင်းနာတာ အများစုဟာ ရေဓါတ်လုံလုံလောက်လောက်ဖြည့်မယ်၊ လုံလောက်အောင် အနားယူမယ်၊ အာဟာရပြည့်အောင် စားမယ်ဆို တဖြည်းဖြည်း သက်သာပျောက်ကင်းလာ တတ်ပါတယ်။ အိမ်မှာ လည်ချောင်းနာပြီး ဖျားနေတဲ့ လူနာရှိခဲ့မယ်ဆိုရင် ပုံမှန် အသက်ရှူနိုင်သလား၊ ရေမျိုချ(သောက်)နိုင်သလား၊ လက္ခဏာတွေကတိုးတက်မှုရှိလား၊ တခြားအန္တရာယ်ရှိလက္ခဏာတွေ ရှိနေလား ဆိုတာတွေကို သတိထား စောင့်ကြည့်ဖို့တော့ လိုအပ်ပါတယ်။
References
1. Centers for Disease Control and Prevention. About Strep Throat.
2. Centers for Disease Control and Prevention. Clinical Guidance for Group A Streptococcal Pharyngitis.
3. National Institute for Health and Care Excellence. Sore Throat (Acute): Antimicrobial Prescribing.
4. National Health Service. Sore Throat.

ရေ ပြီးတော့ မြွေ - ပြီးတော့ ရေ ပြဿနာကြုံနေရတဲ့ ရေဘေးသင့်ဒေသSelena "ဒီရေဘေးက သာမန် မိုးကြီးလို့ ဖြစ်တာ မဟုတ်ဘူး။ တာကျိုးပ...
10/08/2026

ရေ ပြီးတော့ မြွေ - ပြီးတော့ ရေ ပြဿနာကြုံနေရတဲ့ ရေဘေးသင့်ဒေသ

Selena

"ဒီရေဘေးက သာမန် မိုးကြီးလို့ ဖြစ်တာ မဟုတ်ဘူး။ တာကျိုးပေါက်ကနေ ရေတွေ ဆက်ဝင်နေမှာကြောင့် လနဲ့ ချီပြီးကြာနိုင်တယ်။ ပြဿနာတွေ အများကြီးရှိနေပြီး ကျန်းမာရေးပြဿနာကတော့ ကျွန်မတို့ အစိုးရိမ်ဆုံးပဲ" လို့ ဆိုလာသသူက ကျုံပျော်မြို့နယ် အိမ်ထောင်ရှင်မတစ်ဦးပါ။

ဇူလိုင် ၃၀ ရက်ညက ငဝန်မြစ်ရေကာတာ ကျိုးပေါက်ပြီးနောက် လေးမျက်နှာမြို့နယ်အပြင် ဒေသတွင်း ထိစပ်မြို့တွေ ဖြစ်တဲ့ အိုင်သပြု၊ ရေကြည်၊ ကျုံပျော်၊ ငါးသိုင်းချောင်း စတဲ့ မြို့နယ်တွေထဲအထိ ရေဝင်ရောက်ကုန်ပြီး ဒေသခံတွေဟာ ရေဘေးနဲ့ ရင်ဆိုင်နေကြရတာပါ။ သြဂုတ် ၂ ရက်အထိ ဧရာဝတီတိုင်းဒေသကြီး အစိုးရအဖွဲ့ ထုတ်ပြန်ချက်အရ ဒီဒေသ တွင်းက အိမ်ခြေ ၁,၇၃၄ လုံး၊ အိမ်ထောင်စု ၁,၇၆၄ စုက လူဦးရေ ၈,၃၈၂ ဦးဟာ ရေကြီးမှုအန္တရာယ်အပြင် ကျန်းမာ ရေးနဲ့ ဆက်စပ်တဲ့ ပြဿနာတွေကိုပါ တပါတည်း ရင်ဆိုင်နေကြရပါတယ်။ အထူးသဖြင့် ရေကြီးမှုကြောင့် တွင်းအောင်း သတ္တဝါအမျိုးအစားဖြစ်တဲ့ အဆိပ်ရှိ မြွေတွေ ထွက်လာတဲ့ ပြဿနာပါ။

လေးမျက်နှာမြို့နယ်က ရပ်ကွက်နဲ့ ကျေးရွာတွေထဲ တာကျိုးပေါက်ရေတွေ ဝင်လာပြီးနောက် မြွေတွေကို ခပ်စိပ်စိပ် တွေ့လာရပြီး မြွေပွေးနဲ့ မြွေဟောက်လို အဆိပ်ရှိ မြွေတွေအပြင် အဆိပ်မရှိတဲ့ မြွေတွေကိုပါ တွေ့လာရတာလို့ ဒေသတွေဆီက အခုလို ပြောပြပါပါတယ်။ ဒီလို တွေ့ရှိတာဟာ လေးမျက်နှာ မြို့တစ်ခုတည်းတင် မဟုတ်ပါဘူး။ တခြားရေကြီးဒေ သတွေ ဖြစ်တဲ့ ငါးသိုင်းချောင်း၊ ရေကြည်၊ ယုန်သလင်းနဲ့ အိုင်သပြုဘက်တွေမှာ တွေ့လာရတာ ဖြစ်ပါတယ်။
"မြွေတွေ အများကြီးပေါ်လာတယ်။ တစ်နယ်လုံး ရေဝင်တာဆိုတော့ တွင်းတွေထဲကနေ ထွက်လာတာ။ လမ်းဘေးတွေမှာဆို ခွေနေတာ အများကြီးပဲ။ လူတွေက လိုက်ရှင်းလင်းပေမယ့် မရဘူးလေ။ ရေက ဆက်တက်လာလေ ‌မြွေတွေ ပိုတွေ့လေပဲ။ အဓိကက မြွေပွေးနဲ့ မြွေဟောက်တွေပါ။ ကင်းတွေလည်း တွေ့တယ်။ ကျွန်မတို့အိမ် အောက်ထပ် ရေမြုပ်နေပြီး မြွေကြောက်လို့ နေကို မနေရဲဘူး" လို့ လေးမျက်နှာမြို့နယ်၊ အောင်ဘော်စုရွာ ဒေသခံ ဦးမောင်ဦးက MyanHealth ကို ပြောပြပါတယ်။

တခြား ရဘေးသင့် လေးမျက်နှာမြို့ခံတစ်ဦးကလည်း "ကျွန်တော်တို့‌ဒေသက မြွေပွေး၊ မြွေဟောက်ပေါတယ်။ ဖြစ်ရင်လည်း ဒီနှစ်ကောင်ထဲက တစ်ကောင်ကောင်ကြောင့် ထိတာ။ မြွေဆိပ်ဖြေဆေးက ဟင်္သာတဆေးရုံးကြီးမှာတော့ ရှိတယ်။ ကျွန်တော်တို့ဒေသမှာတော့ မလုံလောက်ဘူး။ အခုဆိုရင် ဆေးရုံတွေပါ ပိတ်ထားရတော့ စိုးရိမ်ရတာပေါ့။ ကျန်းမာ ရေးဌာနနဲ့ အလှူရှင်တွေအနေနဲ့ မြွေဆိပ်ဖြေဆေးတွေအတွက် ထည့်သွင်းစဉ်းစားစေချင်ပါတယ်" လို့ ဆိုပါတယ်။

မြွေတွေဟာ သူတို့ နေတဲ့ တွင်းလို နေရာတွေ ရေဝင်လာတာကြောင့် ခြောက်သွေ့တဲ့ နေရာကို​ရှာရင်း လူနေအိမ်နဲ့ အိမ်ဝန်းတွေပေါ်အထိ ရောက်ရှိလာကြတာ ဖြစ်ပြီး မြွေခိုအောင်းနိုင်တဲ့ သစ်ပင်နဲ့ ခြုံနွယ်တွေပါ ရေနစ်မြုပ်ကုန်ကြီး ရေစီးနဲ့အတူ မျှောပါရင်း ဘေးလွတ်ရာနေကြတဲ့ လူတွေရှိတဲ့နေရာကို ပိုရောက်လာနိုင်တာ ဖြစ်တယ်လို့ မြွေအပါ အဝင် မြန်မာ့ဇီဝမျိုးစိတ်တွေကို အမျိုးအစားခွဲခြားခြင်း၊ အချက်အလက်စုဆောင်းရေးနှင့် ထိန်းသိမ်းစောင့်ရှောက်ရေး လုပ်ဆောင်နေတဲ့ Native Species Conservation and Identification in Myanmar - NSCI က အကြံပြုထားပါတယ်။

လက်ရှိမှာ လေးမျက်နှာမြို့နယ်ထဲမှာ အဆိပ်ရှိ မြွေအပြင် မြွေအမျိုးမျိုးကို နေရာစုံ တွေ့နေပြီး ရေဘေးသင့်သူတွေကို မော်တော်နဲ့ ကူညီကယ်ဆယ်ဖို့ သွားလာရင်း လူမှုရေးလုပ်ငန်း လုပ်နေတဲ့ ပရဟိတလူငယ်တစ်ဦးလည်း မြွေကိုက်ခံရလို့ ဆေးဝါးကုသနေရတယ်လို့ ဒေသခံတွေ ပြောပြပါတယ်။
ဧရာဝတီတိုင်းအစိုးရကတော့ ရေဘေးသင့်ဒေသတွေအတွက် မြွေ အန္တရာယ် သတိပေးချက်နဲ့ အရေးပေါ်သတိပေး ချက်တွေကို သြဂုတ် ၄ ရက်က ထုတ်ပြန်ထားပြီး အစိုးရဆေးရုံနဲ့ အရေးပေါ်ကုသရေးစခန်းတွေမှာ မြွေဆိပ်ဖြေ ဆေး (Antivenom) တွေ လုံလုံလောက်လောက် စုဆောင်းထားတယ်လို့ ထုတ်ပြန်ထားပြီး မြွေကိုက်ခံရရင် ချက် ချင်းလာရောက်ကုသကြဖို့နဲ့ ဆက်သွယ်ရမယ့် ကျန်းမာရေးတာဝန်ခံတွေရဲ့ ဖုန်းနံပါတ်တွေကိုပါ ထုတ်ပြန်ထားပါတယ်။

လက်ရှိမှာ ရေဘေးကြောင့် လေးမျက်နှာမြို့နယ်ပြည်သူ့ဆေးရုံနဲ့ အိုင်သပြု တိုက်နယ်ဆေးရုံတို့ကို ပိတ်ထားရပြီး လူနာနဲ့ ဆေးရုံသုံးပစ္စည်း၊ ဆေးဝါးတွေကို ဟင်္သာတ ခရိုင်ပြည်သူ့ဆေးရုံကို ပို့ဆောင်ထားရတယ်လို့ မြေပြင်မှာ ကူညီနေကြတဲ့ ကျန်းမာရေးဝန်ထမ်းတွေက ပြောပြပါတယ်။
မြွေဆိပ်ဖြေဆေး လုံလောက်စွာ စုဆောင်းထားပြီးဖြစ်ပြီး ကိုက်ခံရရင် အစိုးရကုသရေးစခန်းတွေဆီ လာဖို့ ထုတ် ပြန်ထားပေမယ့် ဒီသတင်းအချက်အလက်တွေဟာ ကျေးရွာတွေဆီ မရောက်သလို ရေဘေးကို အဆိုးဝါးဆုံး ခံနေကြရတဲ့ လေးမျက်နှာမြို့နယ်ထဲဥ ရခိုင်ရိုးမတောင်ခြေဘက်နေတဲ့ သူတွေဟာ ကုသရေးစခန်းတွေဆီကို ရောက်ရေးထက် ရေဘေးလွတ်ရေးကိုသာ အဓိကထားပြီး အဆင်ပြေသလို နေနေကြရပါတယ်။
"ဝေးလံတဲ့ ရွာတွေဆိုရင် ဆေးခန်းလည်း မရှိဘူး။ ဆေးလည်း ရဖို့မလွယ်ဘူး။ မြွေတွေကတော့ ပေါပေါများများတွေ့နေရတယ်။ မြေကိုက်ခံရတဲ့ ဖြစ်စဉ်တွေလည်း ကြားနေရပါတယ်" လို့ လေးမျက်နှာမြို့နယ်၊ ခတ္တူရွာဒေသခံတစ်ဦးက MyanHealth ကို ပြောပြပါတယ်။

လတ်လောမှာ လေးမျက်နှာအပါအဝင် နီးစပ်တဲ့ဒေသတွေအတွင်းမှာ ရေကြီးလို့ လမ်းပန်းဆက်သွ​ယ်ရေးတွေ ပြတ်တောက်နေသလို လမ်းပိုင်းနဲ့ တံတားတွေ ပျက်စီးတာ၊ လူထိခိုက်တာတွေကိုလည်း ကြုံနေရပါတယ်။ ရေကြီးတာ ကြောင့် သြဂုတ် ၃ ရက်တုန်းက လေးမျက်နှာ - အိုင်သပြု - ငါးသိုင်းချောင်းကားလမ်းပေါ်က အလျား ၁၅ ပေ၊ အနံ ၁၂ ပေနဲ့ အကျယ် ၈ ပေရှိတဲ့ ကွန်ကရသစ်တံတား ကျိုးကျခဲ့တာကြောင့် ယာယီဘေလီတံတား ဆောက်ပြီး လမ်းပန်းဆက်သွယ်ရေးပြတ်တောက်မှု အခက်အခဲကို ဖြေရှင်းနေရပါတယ်။ ရေတိုက်စားလို့ ကားလမ်းပျက်စီးမှု တွေကလည်း ရှိနေပြီး သြဂုတ် ၄ ရက်က ဟင်္သာတမြို့နယ်၊ နိဗ္ဗာန်ရွာနဲ့ ခမောက်စုရွာလမ်းမှာ ရေဘေးသင့်သူတွေကို သွားကူဖို့ လာတဲ့ ယာဉ်တစ်ဏီး တိမ်းမှောက်လို့ ရှစ်ယောက်တောင် ဒဏ်ရာရရှိခဲ့ပါသေးတယ်။ ရေကြီးမှုကြောင့်ပဲ လေးမျက်နှာမြုိ့နဲ့ ဆက်စပ်တဲ့ ဒိုင်ပျက်နဲ့ ဇရပ်လှကြားက ရထားလမ်းလည်း ရေနစ်လို့ သြဂုတ် ၄ ရက်ကစပြီး အဲဒီနဲ့ ဆက်စပ်တဲ့ ရထားခရီးစဉ်တွေကို ရပ်ဆိုင်းထားရပြန်ပါတယ်။

"သွားရေးလာရေး ခက်ခဲတဲ့ရွာတွေမှာ ကျန်းမာရေးဌာနတွေ ထပ်ပြီး ဖွင့်စေချင်တယ်။ မြွေဆိပ်ဖြေဆေးဆိုတာကလည်း ကျန်းမာရေးဌာနက စနစ်တကျထူထောင်ထားမှ ရတာပါ။ ရွာမှာ မြွေကိုက်ခံရရင် ကျန်းမာရေးဌာနကို အမြန်ဆုံးရောက်ဖို့ လိုတယ်။ အခုလိုအခြေအနေကတော့ သွားရေးလာရေးခက်ခဲတဲ့အတွက် အဆင်မပြေသေးဘူး" လို့ လေးမျက်နှာမြို့နယ်၊ ရိုးမတောင်ခြေမှာ နေထိုင်သူတစ်ဦးကပြောပါတယ်။

NSCI ကတော့ ရေဘေးသင့်ဒေသ မြွေဆိုးအန္တရာယ် ရှောင်ရှားနိုင်ဖို့အတွက် အိမ်ပတ်ဝန်းကျင် သန့်ရှင်းထားဖို့၊ အိမ်ထဲနဲ့ အိမ်ပြင်မှာ မြွေအောင်းနိုင်တဲ့ ကြွက်တွင်းလို တွင်းဟောင်းတွေကို မြေဖို့ ပိတ်ဆို့ဖို့အပြင် အနွေးဓာတ်ရလို့ ဖိနပ်ထဲ ဝင်ခွေနေတတ်တဲ့ မြွေတွေရဲ့ သတိပြုဖွယ် အမူအကျင့်တွေကို ထုတ်ပြန်ထားပါတယ်။ ဒါ့အပြင် နေ့ဘက်နဲ့ ညဘက်အလိုက် မြွေဆိုးမဝင်နိုင်အောင် ဘယ်လိုပုံ သတိပြုနေထိုင်ရမယ်ဆိုတာအပြင် မြေကိုက်ခံရရင် ဘယ်လို မြွေအမျိုးအစားဖြစ်တယ်ဆိုတာကို ခွဲခြားသိနိုင်မယ့် နည်းလမ်းတွေကိုလည်း သူတို့ရဲ့ ဝက်ဘ်ဆိုက်နဲ့ လူမှုကွန်ရက် ဖေ့ဘုတ်စာမျက်နှာမှာ ဖော်ပြထားပါတယ်။
ရေဘေးသင့်ဒေသတွေမှာ ရေကြီးမှုနဲ့အတူ လူထုကျန်းမာရေးကို ခြိမ်းခြောက်လာတဲ့ မြွေဆိုးအန္တရာယ်နဲ့ ပတ်သက် လို့ လိုအပ်တဲ့ မြွေဆိပ်ဖြေဆေးကို လိုအပ်သူတွေဆီ ရောက်ဖို့ သယ်ယူပို့ဆောင်ရေးဟာ စနစ်ကျဖို့ လိုသလို ဒါတွေ ကို စနစ်တကျ သိုလှောင်ထားဖို့ကလည်း ဆေးရုံ ကျန်းမာရေးဌာနတွေဘက်က ကြိုတင်ပြင်ဆင်ထားရမယ်လို့ ရေဘေးကယ်ဆယ်ရေး ဆောင်ရွက်နေတဲ့ သက်တံ့ရောင် ပရဟိတအသင်းတာဝန်ခံ ဦးဝင်းဇော်ဦးက အကြံပြု တိုတွန်းသလို "အလှူရှင်တွေအနေနဲ့ ကျန်းမာရေးဝန်ထမ်းတွေနဲ့ ချိတ်ဆက်ပြီး မြွေဆိပ်ဖြေဆေး လှူဒါန်းပေးစေချင်တယ်" လို့လည်း ဆိုပါတယ်။ လက်ရှိ ကြုံတွေ့နေရတဲ့ ရေဘေးဟာ ရက်ပိုင်းနဲ့ ပြီးပြတ်မယ့် ကိစ္စ မဟုတ်ဘဲ လနဲ့ ချီ ကြာနိုင်တာကြောင့် သက်ဆိုင်သူတွေအနေနဲ့ အရေးပေါ် ကူညီကယ်ဆယ်ရေးအပြင် ကျန်းမာရေးပြဿနာတွေနဲ့ ဆက်စပ်ပြီး ရေရှည်အစီအမံတွေ ချမှတ်ပေးဖို့ လိုနေပြီလို့လည်း ရေဘေးသင့်ဒေသက ပြည်သူတွေက ပြောနေ ကြပါတယ်။

- မြွေပြီးတော့ ရေ ပြန်လာ -
လေးမျက်နှာမြို့အပြင် ရေဘေးသင့်ဒေသတွေက ရေဘေးနဲ့အတူ ပါလာတဲ့ မြွေဘေးအပြင် ကျေးရွာပေါင်း ၈၀ ကျော်က ရေတွင်း၊ ရေကန်နဲ့ အဝိစိတွင်းတွေပါ ရေဝင်၊ နစ်မြုပ်ကုန်လို့ သန့်ရှင်းတဲ့ သောက်သုံးရေ ရရှိရေးဟာ ကပ်ဘေးတစ်ခုအဖြစ် ရှိနေပါတယ်။​

"ကျွန်မက အခု မြင်နေရတဲ့ရေကို ခပ်ပြီး မိနစ် ၂၀ လောက် ကျိုချက်သောက်တယ်။ ရေတွင်းတွေရော၊ အဝီစိတွင်းတွေပါ မြုပ်နေပြီလေ။ ရေသန့်ဗူးကလည်း ဘယ်လောက်မှာလဲ။ အိမ်မှာက ကလေးငယ်ရှိတော့ ရေကို တော်တော်လေး ထိန်းသုံးနေရတယ်" လို့ လေးမျက်နှာမြို့နယ် ခတ္တူကျေးရွာ ဒေသခံတစ်ဦးက‌ သူမရဲ့ အခြေအနေကို ရှင်းပြပါတယ်။
လက်ရှိမှာ ရေဘေးကြုံနေရသူတွေဟာ အလှူရှင်တွေ လာလှူတဲ့ သောက်သုံးရေနဲ့ ရေမမြုပ်သေးဘဲ ဘုန်းကြီး ကျောင်းတွေမှာ ဖွင့်ထားတဲ့ ကယ်ဆယ်ရေးစခန်းတွေက ရေကိုသာ အဓိက အားထားနေကြရပါတယ်။ ရေဘေးသင့်ဒေသတွေမှာ သန့်ရှင်းတဲ့ရေ ပြတ်လပ်မှု ပြဿနာဟာ ဝမ်းပျက်ဝမ်းလျှောလို နောက်ဆက်တွဲ ကျန်းမာရေးပြဿနာတွေကို ဖြစ်စေတတ်တာမို့ ရေရှည်အစီအမံ လိုအပ်နေပြီလို့လည်း လူမှုကူညီကယ်ဆယ်ရေးအသင်းတွေ က ဆိုနေကြပါတယ်။

"ရေကြီးရေလျှံဖြစ်ရင် ဝမ်းရောဂါ ကပ်ပါလာတတ်တယ်။ စီးလာတဲ့ရေတွေက သန့်ရှင်းမှု မရှိဘူး။ ဒါကိုပဲသုံးမိရင် ရောဂါတွေဖြစ်လာမယ်။ အဓိကက ရေရှည်အတွက် သောက်သုံးရေ လုံလုံလောက်လောက်ရအောင် အစီအမံတွေချမှတ်ဖို့လိုတယ်။ အဲဒီအတွက် အစိုးရရဲ့ ခွင့်ပြုချက်နဲ့အတူ ငွေအားရော၊ နည်းပညာအကူအညီပါ လိုအပ်ပါတယ်" လို့ လေးမျက်နှာမြို့နယ်က ရေဘေးသင့်ပြည်သူတွေကို ကျန်းမာရေးစောင့်ရှောက်မှုပေးနေတဲ့ ဆရာဝန်တစ်ဦးက MyanHealth ကို ပြောပါတယ်။
သြဂုတ်လ ပထမအပတ်ထဲမှာ လေးမျက်နှာမြို့နယ်ဟာ ဆိုးဝါးတဲ့ ရေဘေးသင့်မှုကို ဆိုးဆိုးဝါးဝါး ကြုံနေရဆဲ ဖြစ်ပြီး ဒါးကချောင်းအပါအဝင် ဒေသတွင်းချောင်းလက်တက်တွေကတဆင့် ရေကြည်၊ ငါးသိုင်းချောင်း၊ ကျုံပျော်၊ အထောင်၊ သောင်ကြီး၊ ရှားခဲ၊ နိဗ္ဗာန်၊ ခမောက်စု၊ ဇရပ်လှ၊ ဒိုက်ပျက်၊ အသုတ်၊ သာပေါင်းမြို့နယ်တွေအထိ ရေဝင် ရောက်မှု ရှိဆဲဖြစ်လို့ ရေမမြုပ်သေးတဲ့ အဝိစိတွင်းတွေကို လုံခြုံရအောင် ပိတ်ဆို့ပြီး ရေချို၊ ရေကောင်း ထိန်းသိန်းဖို့ ကျွမ်းကျင်သူတွေဘက် အကြံပြုထားသလို ရေကြည်မြို့နယ် မီးသတ်ဦးစီးဌာနကတော့ ရေဝင်နိုင်တဲ့ဒေသတွေက အဝိစီတွင်းတွေကို ရေလွတ်လောက်တဲ့အထိ ပိုက်ဆက်ပြီး မြှင့်တင်ထားကြဖို့ အကြံပြုထားပါတယ်။

လေးမျက်နှာမြို့ဟာ ၁၉၉၁ ခုနှစ်တုန်းက ရေကာတာ ကျိုးကျလို့ သုံးလလောက် ဆိုးဝါးတဲ့ ရေဘေးသင့်မှုကို ကြုံတွေ့ခဲ့ရပြီး အခု ရေဘေးဟာ နှစ်ပေါင်း ၃၆ နှစ်ကြာအပြီး ထပ်မံဖြစ်ပွားခဲ့တာ ဖြစ်ပါတယ်။ လက်ရှိ ရေဘေးကြောင့် ရေဘေးသင့်သူတွေဟာ ကယ်ဆယ်ရေးစခန်းမှာ နေထိုင်သူတွေ ရှိသလို ရေလွတ်နေရာအထိ ဆင့်ထိုးပြီး နေထိုင်ရသူတွေလည်း​ ရှိနေပြီး အညစ်အကြေးစွန့်ထုတ်ဖို့နဲ့ သောက်သုံးရေသန့် လက်လှမ်းမီရရှိရေးဟာ စိန်ခေါ်ချက်ဖြစ်လာလို့ ရေရှည်မှာ ကျန်းမာရေးပြဿနာတွေ ရှိလာနိုင်တယ်လို့ ရေဘးသင့်ကူညီနေတဲ့ Ayeyarwaddy Karen Youth အဖွဲ့ဝင်တစ်ဦးကလည်း ထောက်ပြပါတယ်။
ရေဘေးသင့်ဒေသတွေအနေနဲ့ ရေပြန်လည် ကျတဆင်းသွားရင် ရေတွင်းတွေ ပြန်လည်ရှင်းလင်းရေးနဲ့ သန့်ရှင်း တဲ့ သောက်သုံးရေအဖြစ် ပြန်လည်ရရှိနိုင်ဖို့ ဆေးခပ်တဲ့ လုပ်ငန်းစဉ်တွေကို လုပ်ဆောင်ရမှာ ဖြစ်ပြီး သောက်သုံးရေ ပြဿနာဟာ လနဲ့ချီ ဖြေရှင်းရမယ့် ပြဿနာတစ်ခုပါ။

လက်ရှိမှာ ဧရာဝတီတိုင်းအစိုးရအဖွဲ့ကတော့ ရေဘေးသင့်သူတွေကို ရေလွတ်ရာနေရာ ပြောင်းပေးတာမျိုး ကယ် ဆယ်ရေးလုပ်ငန်းတွေ လုပ်ဆောင်ပေးတာအပြင် သောက်သုံးရေ၊ ရိက္ခာနဲ့ စားသောက်ကုန် ထောက်ပံ့တာ၊ ကယ်ဆယ်ရေးပစ္စည်းတွေ ဖြန့်ဝေပေးတာတွေကို လုပ်ဆောင်ပေးနေတယ်လို့ သတင်းထုတ်ပြန်ထားပါတယ်။ နောက်ပြီး ကျိုးပေါက်သွားတဲ့ ရေကာတာ ပြန်လည်ပြင်ဆင်ရေးလုပ်ငန်းတွေကို စက်ယန္တရားသုံးပြီး လုပ်ဆောင်နေပြီလို့လည်း ကြေညာထားပါတယ်။

လေးမျက်နှာအပါအဝင် ရေကာတာကျိုးလို့ ရေကြီးမှုဒဏ် ခံရတဲ့ ဒီဒေသတွေမှာ လတ်တလော ဖြေရှင်းရမယ့် အ ရေးပေါ် အကူအညီတွေအပြင် မြွေဆိပ်ဖြေဆေးနဲ့ ကိုက်ခံရသူတိုင်း ဆေးဝါးရရှိဖို့ ပြဿနာ၊ သန့်ရှင်းတဲ့ သောက် သုံးရေပြတ်လပ်မှု ပြဿနာဟာ လနဲ့ချီ ရှင်းရမယ့် လူထုကျန်းမာရေးပြဿနာအဖြစ် ရှိနေပြီလည်း ဖြစ်ပါတယ်။

Address

Yangon

Telephone

+66627040459

Website

Alerts

Be the first to know and let us send you an email when MyanHealth Media posts news and promotions. Your email address will not be used for any other purpose, and you can unsubscribe at any time.

Shortcuts

Share

Category