27/03/2024
Mar 27
ရန်ကုန်မြို့လယ်ခေါင်ရှိ Sule Square အနီးတွင် ဗုံးပေါက်ကွဲမှုဖြစ်ပွား ၊ အနည်းဆုံး (၅) ဦး ထိခိုက်ဒဏ်ရာပြင်းထန်
===========================
ယနေ့ မတ်လ (၂၇) ရက် ညဦးပိုင်းတွင် ရန်ကုန်မြို့လယ်ခေါင် အချက်အခြာကျသည့် နေရာဖြစ်သည့် ဆူးလေဘုရားလမ်းနှင့် အနော်ရထာလမ်းထောင့်တွင် ဗုံးပေါက်ကွဲမှု ဖြစ်ပွားခဲ့ကြောင်း သိရသည်။
အဆိုပါ ဗုံးပေါက်ကွဲမှုကြောင့် အနီးဝန်းကျင်ရှိ သန့်ရှင်းရေးဝန်ထမ်း အချို့နှင့် လမ်းသွားလမ်းလာလူငယ် အနည်းဆုံး (၅)ဦးထက်မနည်း ထိခိုက်ဒဏ်ရာ အပြင်းအထန်ရရှိခဲ့ကြောင်း သိရသည်။
" အနည်းဆုံးတော့ (၅) ယောက်လောက်ရှိမယ် လဲနေတာ။ ဒဏ်ရာတော်တော် ပြင်းပြင်းထန်ထန် ရထားတာတွေ့ရတယ်။ သန့်ရှင်းရေးဝန်ထမ်း (၂) ယောက်လည်းပါတယ်နဲ့တူတယ်။ ပြီးတော့ အဲဒီနား ကော်ရှူနေတဲ့ ကလေးတွေလည်း ထိထားတာ တွေ့တယ်။ ဘယ်လိုဖြစ်တယ် ဘာညာတော့ ကျွန်တော်တို့လည်းမသိဘူး။ ကားနဲ့ဖြတ်သွားနေတုန်း အုန်းဆို အသံအကျယ်ကြီးကြားလို့ ခဏရပ်ကြည့်လိုက်တာ" ဟု ဗုံးပေါက်ကွဲမှု ဖြစ်ပွား အနီးအနားမှ ဖြတ်သွားသူ သတင်းရင်းမြစ်တစ်ဦးက ပြောသည်။
ယနေ့ည (၇) နာရီ မိနစ် (၄၀) ဝန်းကျင်က ဖြစ်ပွားခဲ့ခြင်း ဖြစ်ပြီး လုံခြုံရေးတပ်ဖွဲ့ဝင်များက လမ်းပိတ်စစ်ဆေးမှုများ လုပ်ဆောင်နေကြောင်း သိရသည်။
