Nyein Chan Khit Books

Nyein Chan Khit Books Contact information, map and directions, contact form, opening hours, services, ratings, photos, videos and announcements from Nyein Chan Khit Books, Book & Magazine Distributor, Nyein Chan Khit/484 Books Shop, သင်းဝင်လမ်းနှင့်လောပိတလမ်းထောင့် ၃၄ ရပ်ကွက် မ, Yangon 11421, Yangon.

ငြိမ်းချမ်းခေတ်စာအုပ်ဆိုင် ဒဂုံမြို့သစ်(မြောက်ပိုင်း/အရှေ့ပိုင်း/တောင်ပိုင်း)နှင့် တောင်ဥက္ကလာပမြို့နယ်များမှမှာယူပါက *ပို့ခ ၃၀၀၀ ကျပ်ဖြင့် ပို့ဆောင်ပေးသည်။ Viber - 09261778607, Ph - 09760607302
* Reading makes a country great *

🚹 အသက် ၂၀ ကျော်လာရင် လူတော်တော်များများက ပိုင်ဆိုင်မှုနဲ့ကိုယ့်တန်ဖိုးကိုတိုင်းတာတတ်ကြ တယ်။“ငါ့မှာ ကားမရှိဘူး”“အိမ်မရှိဘ...
02/09/2026

🚹 အသက် ၂၀ ကျော်လာရင် လူတော်တော်များများက ပိုင်ဆိုင်မှုနဲ့ကိုယ့်တန်ဖိုးကိုတိုင်းတာတတ်ကြ တယ်။

“ငါ့မှာ ကားမရှိဘူး”
“အိမ်မရှိဘူး”
“ငွေမစုနိုင်သေးဘူး”
“Business မရှိဘူး”
“Relationship မရှိဘူး”
“အလုပ်ကလည်း သိပ်မကောင်းဘူး”
“မိဘဆွေမျိုးမရှိဘူး”
“ညီအစ်ကိုမောင်နှမမရှိဘူး”
အဲဒီလိုအတွေးမျိုးတွေဝင်လာပြီးတော့ ကိုယ့်ကိုယ်ကိုမအောင်မြင်ဘူးလို့ထင်လာတတ်တယ်။ ဒါပေမယ့် မေးခွန်းကိုပြောင်းကြည့်ပါ။

“ငါ့မှာဘာရှိလဲ” မဟုတ်ဘဲ “ငါ ဘာဖြစ်လာပြီလဲ”

ဒီမေးခွန်းက ဘဝကိုပြောင်းလဲစေတတ်တယ်။

မင်းမှာစုဆောင်းငွေများများစားစားမရှိသေးဘူးဆိုပါစို့။
ဒါပေမယ့် မင်းကလွန်ခဲ့တဲ့သုံးနှစ်ကထက်ပိုပြီး ငွေရှာတတ်လာပြီလား။

မင်းမှာကိုယ်ပိုင်လုပ်ငန်းမရှိသေးဘူးဆိုပါစို့။
ဒါပေမယ့် မင်းကလူတွေရဲ့ပြဿနာကိုဖြေရှင်းပေးနိုင်တဲ့ နယ်ပယ်တစ်ခုမှာကျွမ်းကျင်တဲ့ Skill တစ်ခုရလာပြီလား။

မင်းမှာ အိမ်မရှိသေးဘူးဆိုပါစို့။
ဒါပေမယ့် ကိုယ့်ဝင်ငွေကိုကိုယ်စီမံနိုင်လာပြီလား။

မင်းရဲ့အသက်မွေးဝမ်းကျောင်းလုပ်ငန်းတစ်ခုခုမှာ မတည်ငြိမ်သေးဘူးဆိုပါစို့။
ဒါပေမယ့်လွန်ခဲ့တဲ့နှစ်ကထက်ပိုကောင်းတဲ့အခွင့်အရေးတွေ ရလာအောင် ကိုယ့်တန်ဖိုးကို တည်ဆောက်နေပြီလား။

အဲဒါတွေက ပိုင်ဆိုင်မှုမဟုတ်ဘူး။ ဒါပေမယ့်အရင်းအနှီးတွေပါ။ မင်းအသက် ၂၅ မှာ မင်းရဲ့ဘဝကို အပြီး သတ်တည်ဆောက်ဖို့မလိုဘူး။

အသက် ၂၅ မှာ ကိုယ့်ဘဝအကြောင်းအားလုံးသိနေဖို့မလိုဘူး။ တကယ်တော့ လူတော်တော်များများဟာ အသက် ၂၅ မှာ သူတို့ဘာလုပ်ချင်တယ်ဆိုတာ သေချာမသိကြ သေးပါဘူး။

တချို့ကဘွဲ့ရပြီးမှသူတို့ရွေးခဲ့တဲ့ဘာသာရပ်ကို မကြိုက်တော့ဘူး။ တချို့ကအလုပ်ဝင်ပြီးမှ သူတို့လုပ်နေ တဲ့အလုပ်ဟာ သူတို့ဘဝတစ်လျှောက်လုပ်ချင်တဲ့အလုပ်မဟုတ်ဘူးဆိုတာ သိလာတယ်။ တချို့က Relationship တစ်ခုထဲဝင်ပြီးမှ ကိုယ့်အတွက်ဘယ်လိုလူမျိုးက သင့်တော်တယ်ဆိုတာသိလာတယ်။

တချို့ကစီးပွားရေးတစ်ခုလုပ်ပြီးကျရှုံးမှ ဘာတွေမလုပ်သင့်ဘူးဆိုတာနားလည်လာတယ်။ အဲဒါတွေဟာ အချိန်ဖြုန်းတာမဟုတ်ဘူး။ အတွေ့အကြုံရယူတာပါ။

ဘဝမှာ တစ်ခါတလေလမ်းမှားသွားတာဟာပြဿနာမဟုတ်ဘူး။
လမ်းမှားနေမှန်းသိပြီးတော့လည်း ဆက်လျှောက်နေတာက ပြဿနာ။

💥 အသက် ၂၅ မတိုင်ခင်သိထားသင့်တဲ့အရာတစ်ခု

မင်းဟာ မင်းရဲ့အလုပ်မဟုတ်ဘူး။ အလုပ်တစ်ခုပျက်သွားလို့မင်းဘဝမပျက်ဘူး။ Business တစ်ခုကျရှုံး သွားလို့ မင်းဟာကျရှုံးသူတစ်ယောက်မဖြစ်သွားဘူး။ Relationship တစ်ခုပျက်သွားလို့ မင်းရဲ့တန်ဖိုး မကျသွားဘူး။ Exam တစ်ခုကျလို့မင်းဘဝအဆုံးမဟုတ်ဘူး။ Interview တစ်ခုမအောင်လို့ မင်းဟာ မတော်တဲ့လူမဟုတ်ဘူး။ လူတစ်ယောက်က မင်းကိုငြင်းပယ်လို့ မင်းဟာချစ်ဖို့မထိုက်တဲ့လူ မဟုတ်ဘူး။ အသက် ၂၀ ကျော်ကာလမှာ လူငယ်တွေအများဆုံးလုပ်မိတဲ့အမှားတစ်ခုက ဖြစ်ရပ်တစ်ခုကို ကိုယ့်ရဲ့ Identity ဖြစ်အောင်လုပ်လိုက်တာပါ။

“ငါအလုပ်မရဘူး” ကနေ “ငါက အသုံးမကျဘူး” ဖြစ်သွားတယ်။
“ငါ Business ကျရှုံးတယ်” ကနေ“ငါက စီးပွားရေးလုပ်လို့မရဘူး” ဖြစ်သွားတယ်။
“သူက ငါ့ကိုမချစ်ဘူး” ကနေ “ငါက ချစ်ဖို့မကောင်းဘူး” ဖြစ်သွားတယ်။
ဒီလို မတွေးပါနဲ့။ လုံးဝမတွေးမိပါစေနဲ့။

မင်းရဲ့အတွေ့အကြုံတွေက မင်းကိုဖော်ပြနိုင်ပေမယ့် မင်းကိုအပြီးသတ်သတ်မှတ်ပေးလို့မရဘူး။
အောင်မြင်မှုရဲ့နောက်ကွယ်မှာ မမြင်ရတဲ့အချိန်တွေရှိတယ်။ တစ်နေ့မှာမင်းကိုယ်တိုင်လည်း ပြန်ကြည့်ရင်းအံ့ဩသွားနိုင်တယ်။

“အဲဒီအချိန်တုန်းက ငါဘာလို့ဒီလောက်စိတ်ပူခဲ့တာလဲ”

အသက် ၂၂ နှစ်တုန်းက စိတ်ပူခဲ့တဲ့အရာတွေထဲကတချို့ဟာ အသက် ၂၇ နှစ်ရောက်တဲ့အခါ အရေးမကြီးတော့ဘူး။

အသက် ၂၇ နှစ်တုန်းက စိတ်ပူခဲ့တဲ့အရာတွေထဲက တချို့ဟာ အသက် ၃၂ နှစ်ရောက်တဲ့အခါ အရေးမကြီးတော့ဘူး။

အဲဒါကြောင့် အခုမင်းရောက်နေတဲ့အခြေအနေကို အမြဲတမ်းဖြစ်နေမယ့်အခြေအနေလို့မယူဆပါနဲ့။

ဒီနေ့ငွေမရှိတာက နောက်ဆုံးဘဝအခြေအနေမဟုတ်ဘူး။ ဒီနေ့ မင်းရွေးချယ်ထားတဲ့အလုပ်မကောင်း တာက နောက်ဆုံးအလုပ်မဟုတ်ဘူး။ ဒီနေ့မသေချာတာက နောင်တစ်ချိန်လုံးမသေချာနေမယ်လို့ မဆိုလိုဘူး။ ဘဝဟာအမြဲရွေ့နေတယ်။ မင်းလည်းရွေ့နေတယ်။

ဒါဆို အသက် ၃၀ မတိုင်ခင် ဘာလုပ်သင့်လဲ။

ဆက်လက်ဖော်ပြပါမယ် --

ခေတ်သစ်လူ
စက်တင်ဘာ ၂ ရက်/၂၀၂၆ ခုနှစ်

🎯 အသက် ၃၀ မတိုင်မီ ဘာတွေတည်ဆောက်ထားသင့်လဲ |1| ........................... ............................ ................
01/09/2026

🎯 အသက် ၃၀ မတိုင်မီ ဘာတွေတည်ဆောက်ထားသင့်လဲ |1| ........................... ............................ ............................
တစ်ခါတလေ ညဘက်အိပ်ရာပေါ်လှဲရင်း နဖူးပေါ်လက်တင်စဉ်းစားမိတယ်. . စဉ်းစားရင်းခေါင်းထဲမှာ ရှုပ်ထွေးလာတဲ့အခါ ဖုန်းကိုဖွင့်မိပြန်တယ်။ Facebook ဖွင့်ကြည့်တယ်။

ကိုယ်နဲ့ အသက်သိပ်မကွာတဲ့သူတစ်ယောက်က စီးပွားရေးလုပ်ငန်းတစ်ခုအောင်မြင်နေပြီ။ နောက်တစ်ယောက်က ပြည်ပမှာ အလုပ်လုပ်နေပြီ။ တစ်ယောက်ကမင်္ဂလာဆောင်ပြီး အိမ်ထောင်ရေးအခြေတည်ငြိမ်နေပြီ။ နောက်တစ်ယောက်က ကားအသစ်တစ်စီးဝယ်ထားပြီ။ နောက်တစ်ယောက်က ကိုယ်ပိုင်အိမ်ဆောက်နေပြီ။ နောက်တစ်ယောက်က သူ့ရဲ့ပထမဆုံးစာအုပ်ထုတ်လိုက်ပြီ။ နောက်တစ်ယောက်က အသက် ၂၇ မှာ သိန်း ၁,၀၀၀ ကိုပထမဆုံးရှာဖွေစုဆောင်းနိုင်ခဲ့ပြီ။ စတဲ့သူတို့အတွေ့အကြုံတွေကိုမျှဝေထားကြ တယ်။ ကိုယ်ကတော့ ဖုန်းမျက်နှာပြင်ကိုကြည့်ရင်း တိတ်တိတ်လေးတွေးမိတယ်။

“ငါက ဘာလုပ်နေတာလဲ”
ဒီမေးခွန်းဟာ အသက် ၂၀ ကျော်လာတဲ့လူငယ်တော်တော်များများရဲ့စိတ်ထဲမှာရှိနေတတ်တဲ့ မေးခွန်းတစ်ခုဖြစ်ပါတယ်။

အသက် ၂၂ မှာမေးတယ်။
“ငါ ဘာလုပ်ရမလဲ”

အသက် ၂၅ မှာမေးတယ်။
“ငါ နောက်ကျနေပြီလား”

အသက် ၂၈ မှာမေးတယ်။
“ငါ့ဘဝ ဘယ်အချိန်မှတည်ငြိမ်မှာလဲ”

အသက် ၃၀ နီးလာတဲ့အချိန်မှာမေးခွန်းက ပိုလေးလာတယ်။
“ငါ့အသက် ဒီလောက်ရှိနေပြီ။ ငါ့မှာဘာရှိသေးလဲ”

ဒီမေးခွန်းကို မင်းလည်းမေးဖူးရင် ဒီစာအုပ်ဟာမင်းအတွက်ပါ။
ဒါပေမယ့် ဒီစာအုပ်ကိုမဖတ်ခင် အရင်ဆုံးတစ်ခုသိထားစေချင်တယ်။ အသက် ၂၅ နှစ်ဖြစ်တာနဲ့ နောက်ကျသွားတာမဟုတ်ဘူး။ အသက် ၃၀ ဖြစ်တာနဲ့လည်း ဘဝကအဆုံးသတ်မသွားဘူး။

👉 သူများရဲ့အောင်မြင်မှုကို ကိုယ့်ဘဝရဲ့ Deadline မလုပ်ပါနဲ့။

လူတစ်ယောက်ရဲ့ဘဝကိုနားလည်ဖို့ အခက်ဆုံးအရာတစ်ခုက သူ့ဘဝရဲ့အချိန်ဇယားကိုမမြင်ရတာပါ။ ကျနော်တို့က လူတစ်ယောက်ရဲ့ရလဒ်ကိုပဲ မြင်တယ်။ သူ့ရဲ့ကားကိုမြင်တယ်။ သူ့ရဲ့အိမ်ကိုမြင်တယ်။ သူ့ရဲ့လုပ်ငန်းကိုမြင်တယ်။ သူ့ရဲ့အောင်မြင်မှုကိုမြင်တယ်။ ဒါပေမယ့်အဲဒီရလဒ်နောက်က နှစ်တွေကို မမြင်ဘူး။ သူဘယ်နှစ်ခါကျရှုံးခဲ့လဲမသိဘူး။ သူ့မိသားစုက ဘယ်လောက်ထောက်ပံ့ခဲ့လဲမသိဘူး။ သူ့မှာ အရင်းအနှီးဘယ်လောက်ရှိခဲ့လဲမသိဘူး။ သူ့အခွင့်အရေးတွေ ဘယ်လောက်ရခဲ့လဲမသိဘူး။ သူဘယ်လောက် အချိန်စောစောစတင်ခဲ့လဲမသိဘူး။ သူ့ရဲ့နောက်ကွယ်က အခက်အခဲတွေကိုလည်း မသိဘူး။

ဒါပေမယ့်ကိုယ့်ဘဝကိုတော့ကိုယ်သိတယ်။ ကိုယ့်အခက်အခဲတွေကိုကိုယ်သိတယ်။ ကိုယ့်မိသားစုအခြေ အနေကိုကိုယ်သိတယ်။ ကိုယ်စခဲ့ရတဲ့နေရာကိုကိုယ်သိတယ်။ ကိုယ်ဆုံးရှုံးခဲ့တာတွေကိုကိုယ်သိတယ်။ အဲဒီတော့မမျှတတဲ့ပြိုင်ပွဲတစ်ခုကို ကိုယ်တိုင်ဖန်တီးလိုက်မိတယ်။ သူ့ရဲ့ Highlight Reel နဲ့ကိုယ့်ရဲ့ Behind-the-Scenes ကို နှိုင်းယှဉ်နေမိတယ်။ အဲဒီလိုနှိုင်းယှဉ်လေလေ ကိုယ့်ဘဝကပိုပြီးသေးသွားသလို ခံစားရလေလေပါပဲ။

👉 အသက် ၃၀ ဆိုတဲ့နံပါတ်ကို ဘယ်သူကသတ်မှတ်ထားတာလဲ။

“အသက် ၃၀ မတိုင်ခင် အိမ်တစ်လုံးရှိရမယ်”
“အသက် ၃၀ မတိုင်ခင် ငွေစုထားရမယ်”
“အသက် ၃၀ မတိုင်ခင် အိမ်ထောင်ကျရမယ်”
“အသက် ၃၀ မတိုင်ခင် အလုပ်အကိုင်တည်ငြိမ်ရမယ်”
“အသက် ၃၀ မတိုင်ခင် အောင်မြင်ရမယ်”
ဒီလိုစကားတွေကို ကျွန်တော်တို့ကြားဖူးကြတယ်။

ဒါပေမယ့် တစ်ခါလောက်ရပ်ပြီးမေးကြည့်ရအောင်။ ဘာကြောင့်အသက် ၃၀ လဲ။ အသက် ၂၉ မှာ မအောင်မြင်သေးရင်ဘာဖြစ်မလဲ။ အသက် ၃၁ ရောက်ရင် အခွင့်အရေးတွေအားလုံးပိတ်သွားမှာလား။

အသက် ၃၀ ကျော်ရင် အသစ်တစ်ခုသင်လို့မရတော့ဘူးလား။
အသက် ၃၀ ကျော်မှ Career ပြောင်းလို့မရတော့ဘူးလား။
အသက် ၃၀ ကျော်မှ စီးပွားရေးစလို့မရတော့ဘူးလား။
အသက် ၃၀ ကျော်မှကိုယ့်ဘဝကို ပြန်စီစဉ်လို့ မရတော့ဘူးလား။ မဟုတ်ပါဘူး။ အသက်ဆိုတာ Deadline မဟုတ်ဘူး။ အသက်ဆိုတာကိုယ့်ဘဝဘယ်လောက်အထိ ရှည်မလဲဆိုတာကို တိုင်းတာတဲ့ နံပါတ်တစ်ခုသာဖြစ်တယ်။ ဘယ်အချိန်မှာအောင်မြင်ရမယ်ဆိုတာကို သတ်မှတ်ပေးတဲ့နံပါတ်တော့ မဟုတ်ဘူး။

ဒါပေမယ့် အသက် ၂၀ ကျော်ကာလကိုပေါ့ပေါ့မထားသင့်ဘူး။
အသက် ၃၀ က Deadline မဟုတ်ဘူးလို့ ပြောတာဟာ “ဘာမှမလုပ်ဘဲနေပါ” လို့ပြောတာမဟုတ်ဘူး။

ဒီနေရာမှာ အရေးကြီးတဲ့ကွာခြားချက်တစ်ခုရှိတယ်။ နောက်ကျနေပြီလို့မထင်နဲ့။ ဒါပေမယ့်အချိန်တွေ အများကြီးရှိသေးတယ်လို့လည်းမထင်နဲ့။ အသက် ၂၀ ကျော်ကာလဟာ ဘဝတစ်ခုလုံးကို ဆုံးဖြတ်ပေး မယ့် အချိန်တစ်ခုမဟုတ်ပေမယ့်၊ ကိုယ့်ရဲ့နောက်ပိုင်းဘဝကို အများကြီးသက်ရောက်စေမယ့် အခြေခံ တွေကိုတည်ဆောက်ဖို့ အလွန်ကောင်းတဲ့ကာလတစ်ခုပါ။ ဒီအချိန်မှာရလာတဲ့အရာတွေထဲက တချို့ဟာ ပိုက်ဆံထက်ပိုတန်ဖိုးရှိတယ်။

ဝါသနာပါရာနယ်ပယ်တစ်ခုမှာကျွမ်းကျင်မှုတစ်ခု၊ ဒါမှမဟုတ် အသက်မွေးဝမ်းကျောင်းပညာတစ်ခုခု၊ ကောင်းမွန်တဲ့အမူအကျင့်တစ်ခု။ ကောင်းမွန်တဲ့အလေ့အကျင့်တစ်ခု။ ငွေကိုင်တွယ် တတ်တဲ့အကျင့်။
လူကောင်းတွေနဲ့ ဆက်ဆံရေး။ ကိုယ့်ကိုယ်ကိုနားလည်မှု။ ကျရှုံးတဲ့အခါပြန်ထနိုင်တဲ့စိတ်။ ဒီအရာတွေ က အသက် ၃၀ ရောက်တဲ့အခါ မင်းကိုတခြားသူတစ်ယောက်ဖြစ်အောင်မပြောင်းလဲပေးနိုင်ပေမယ့် မင်းဘဝကိုကိုယ်တိုင်ထိန်းချုပ်နိုင်တဲ့ အင်အားတွေဖြစ်လာနိုင်တယ်ဆိုတာ ယုံကြည်လိုက်ပါ။

“ငါ့မှာဘာရှိလဲ” ဆိုတဲ့မေးခွန်းထက် “ငါ ဘာဖြစ်လာပြီလဲ” လို့မေးကြည့်ပါ။

ခေတ်သစ်လူ
စက်တင်ဘာ ၁ ရက်/၂၀၂၆ ခုနှစ်

🚩 စစ်ပွဲသာမဖြစ်ခဲ့လျှင် ဆရာဝန်ဖြစ်လာမည့်သူများ၊ အနုပညာရှင်ဖြစ်လာမည့်သူများသည် အာဇာနည်ဆိုသည့် နာမည်တပ်တံဆိပ်ကပ်ထားသော ရုပ...
15/08/2026

🚩 စစ်ပွဲသာမဖြစ်ခဲ့လျှင် ဆရာဝန်ဖြစ်လာမည့်သူများ၊ အနုပညာရှင်ဖြစ်လာမည့်သူများသည် အာဇာနည်ဆိုသည့် နာမည်တပ်တံဆိပ်ကပ်ထားသော ရုပ်အလောင်းများအဖြစ် မိခင်နိုင်ငံသို့ပြန်ရောက်လာကြသည်။

📚 ဘဂ္ဂဒက်ကဖရန်ကင်စတိုင်း
🖊 ရဲလွင်အောင်(မြန်မာပြန်ဆိုသည်)
*********
◼ အီရတ်နိုင်ငံသား စာရေးဆရာ၊ ကဗျာဆရာ၊ ဇာတ်ညွှန်းဆရာနှင့် မှတ်တမ်းရုပ်ရှင်ဒါရိုက်တာ အာမတ်ဆာဒါဝီဟာ အာရပ်ဝတ္ထုဆိုင်ရာ နိုင်ငံတကာဆုပထမဆုံးရရှိခဲ့တဲ့ အီရတ်နိုင်ငံသားဖြစ်ပါတယ်။

အမေရိကန်ဦးဆောင်တဲ့ နိုင်ငံခြားတပ်တွေသိမ်းပိုက်ထားတဲ့ ဘဂ္ဂဒက်မြို့မှာ 'ဟာဒီ' ဆိုတဲ့ ပစ္စည်း အဟောင်းအမြင်းရောင်းဝယ်သူ၊ ပုံပြောကောင်းသူတစ်ဦးဟာ လူသားခန္ဓာကိုယ် အစိတ်အပိုင်း တွေကိုစုစည်းပြီး ရုပ်အလောင်းတစ်လောင်းဖြစ်အောင် ချုပ်လုပ်ခဲ့ပါတယ်။

ပြည်သူတွေရဲ့ဘဝဟာ အစိတ်စိတ်ကွဲနေပြီဖြစ်ပြီး အစိုးရအနေနဲ့ သက်သာရာသက်သာကြောင်း တစ်ခုခုလုပ်ပေးစေချင် တာကြောင့် ဒီလိုလုပ်တာဖြစ်တယ်လို့ သူက ပြောပါတယ်။

သူချုပ်လုပ်ထားတဲ့ ရုပ်အလောင်းကြီး ပျောက်သွားကာ မြို့တွင်း ကြောက်စရာကောင်းတဲ့ဖြစ်ရပ်တွေ ပေါ်ပေါက်လာပြီး နောက်မှာတော့ 'ဟာဒီ' တစ်ယောက် မကောင်းဆိုးဝါးတစ်ကောင်ကို ဖန်တီးမိပြီဖြစ်တယ်ဆိုတာ နားလည်လာခဲ့ရပါတယ်။

ဒီမကောင်းဆိုးဝါးဟာ အဖိနှိပ်ခံတွေအတွက်၊ နစ်နာမှုတွေအတွက် လက်စားချေနေသူဖြစ်တာမို့ သာမန်ပြည်သူတွေအတွက် သူရဲကောင်းဖြစ်လာမလား၊ ကိုယ်စားပြုသူ ဖြစ်လာမလားဆိုတဲ့ မျှော်လင့်ချက်တွေလည်း ရှိလာခဲ့ပါတယ်။

💦 တန်ဖိုး ၁၈၀၀၀ ကျပ်
💦 စာမျက်နှာ ၃၁၈
🚗 အိမ်အရောက်ပို့ဆောင်ပေးသည်။

09261778607

#ငြိမ်းချမ်းခေတ်စာအုပ်ဆိုင်
#ဘဂ္ဂဒက်ကဖရန်ကင်စတိုင်း
#ရဲလွင်အောင်

⬛ စာကြည့်တိုက်ပညာ၏ ဖခင် ဆရာကြီး ဒေါက်တာ စည်သူသော်ကောင်း ✍✍ ရေးသားသူ - ပုံ့ပုံ့ (စာပေဗိမာန်) ✍✍ ------------------- အပို...
30/07/2026

⬛ စာကြည့်တိုက်ပညာ၏ ဖခင် ဆရာကြီး ဒေါက်တာ စည်သူသော်ကောင်း
✍✍ ရေးသားသူ - ပုံ့ပုံ့ (စာပေဗိမာန်) ✍✍
------------------- အပိုင်း(၃) -------------------

▪️◾️ ဆရာကြီးနှင့် စာပေဗိမာန်ရေစက်
ဆရာကြီးနှင့် စာပေဗိမာန်ရင်းနှီးမှုကို ပြန်ပြောင်းတွက်စစ်လျှင် နှစ်ပေါင်း ၇၀ ခန့်ရှိခဲ့ပြီ ဖြစ်သည်။ ဆရာကြီး၏ဖခင် ပညာမင်းကြီး စည်သူ ဦးကောင်းသည် စာဖတ်ဝါသနာကြီးသူပီပီ စာဖတ်ခန်း၏ စာအုပ်စင်ကြီးတစ်ခုတွင် မြန်မာနိုင်ငံ ဘာသာပြန်စာပေ အသင်းနှင့် စာပေဗိမာန် စာအုပ်များ ပြည့်လျှံလျက်ရှိရာ စာဖတ်ဝါသနာပါသည့် ဆရာကြီးက အမြဲယူဖတ်ခဲ့သည်။ ထိုအချိန်မှစ၍ စာပေဗိမာန်နှင့် ရင်းနှီးခဲ့သည်ဟု ဆိုဖူးသည်။

ထိုစာအုပ်တိုင်းတွင် ပါရှိသည့် “အမှောင်ခွင်း၍ အလင်းဆောင်အံ့” ဟူသည့် ဆောင်ပုဒ်ကို အထူး သဘောကျသူဖြစ်သည်။ ဆရာကြီး၏ဖခင်သည် ၁၉၅၁ ခုနှစ်မှ ကွယ်လွန်သည့် ၁၉၅၇ ခုနှစ် အထိ ပညာမင်းကြီးအဖြစ် ဆောင်ရွက်ခဲ့ပြီး အမေက အထူးခင်မင်လေးစားသော ရန်ကုန် တက္ကသိုလ် စာကြည့်တိုက်မှူး ဦးသိန်းဟန် (ဆရာဇော်ဂျီ) က ကျောင်းသုံးစာအုပ် ပြုစုထုတ်ဝေရေးဌာနတွင် ညွှန်ကြားရေးမှူးအဖြစ် ဆောင်ရွက်ခဲ့သည်။ ထို့ကြောင့် ဖခင်က ဆရာဦးသိန်းဟန် ရုံးခန်းသို့ မကြာခဏ သွားသည်။

ထိုစဉ်က ပညာရေးဝန်ကြီး ဌာနသည် စာပေဗိမာန်နှင့်ပူးပေါင်းပြီး လွတ်လပ်ရေးရခါစကာလတွင် အင်္ဂလိပ်ကိုလိုနီခေတ် က ပြဋ္ဌာန်းခဲ့သော ကျောင်းသုံးစာအုပ်များအစား ကျောင်းသုံးစာအုပ်အသစ်များကို စာပေဗိမာန်နှင့် ပူးပေါင်းပြီး ပြုစုထုတ်ဝေ ခဲ့သည်။ ထိုအချိန်က စာပေဗိမာန်၏ အုပ်ချုပ်ရေးမှူး ဦးစံသွားသည် ဦးကောင်း၏မိတ်ဆွေဖြစ်သကဲ့သို့ မိခင်ချင်းလည်း ခင်မင်ရင်းနှီးကြသည်။ ဖခင် ဦးကောင်း ကြောင့် ဆရာကြီးဦးသော်ကောင်း၏ ဘဝတစ်လျှောက်လုံး စာပေဗိမာန်နှင့် ရင်းနှီးခဲ့သည်။

၁၉၅၁- ၁၉၅၂ ခုနှစ်တွင် ဖခင် ဦးကောင်း ဦးဆောင်သည့် ပညာရေးလေ့လာရေးမစ်ရှင်အဖွဲ့နှင့် အတူ ရန်ကုန်တက္ကသိုလ်၏ စာကြည့်တိုက်မှူး ဆရာဦးသိန်းဟန်၊ စာပေဗိမာန် အုပ်ချုပ်ရေးမှူး ဆရာဦးစံထွားတို့လည်းလိုက်ပါကာ အင်္ဂလန်၊ အမေရိကန်၊ မက္ကဆီကိုနှင့် ကနေဒါနိုင်ငံများသို့ ခြောက်လကြာ လေ့လာရေးခရီး သွားရောက်ခဲ့ပြီး ပြည်သူလူထုအတွက် စာကောင်းပေမွန်များ ထုတ်ဝေနိုင်ရေး၊ အထူးသဖြင့် မြန်မာ့စွယ်စုံကျမ်းများ ပြုစုရေးကိစ္စကို အလေးထား လေ့လာခဲ့ကြသည်။

ဖခင်ဖြစ်သူနှင့် ဆရာရင်း ဦးသိန်းဟန် (ဆရာဇော်ဂျီ) နှင့် ဆရာ ဦးထင်ကြီး (တက္ကသိုလ်ထင်ကြီး) တို့၏ တိုက်တွန်းတာဝန်ပေးချက်အရ ၁၉၆၄ ခုနှစ်ခန့် မှစ၍ စာပေဗိမာန်၏ လုပ်ဆောင်ချက်များတွင် ပါဝင်ဆောင်ရွက်ခဲ့သည်။ ထိုစဉ်က ဆရာကြီးသည် ဆရာကြီး ဇော်ဂျီ၏ လက်ထောက်စာကြည့်တိုက် မှူးအဖြစ် တာဝန်ထမ်းဆောင်နေပြီ ဖြစ်သည်။ ဆရာကြီး ဇော်ဂျီ၏ တာဝန်ပေးလမ်းညွှန်မှုဖြင့် စာပေဗိမာန် စာကြည့်တိုက်သင်တန်းများ ကိုလည်း ဆရာတိုက်စိုးနှင့်အတူ တာဝန်ယူဆောင်ရွက်ခဲ့သည်။

၁၉၆၇ ခုနှစ်တွင် စာပေဗိမာန် ပြည်လမ်း၌ စာကြည့်တိုက် နှီးနှောဖလှယ်ပွဲ ပြုလုပ်ခဲ့ပြီး ယင်းဟောပြောချက်များကို စာကြည့်တိုက်လုပ်ငန်း နှင့် စာကြည့်တိုက်လက်စွဲစာအုပ်များ ပြုစုထုတ်ဝေ ခဲ့သည်။ ဆရာတိုက်စိုး၊ ဆရာမစမ်းစမ်းမေ တို့နှင့်အတူ ဆရာကြီးဦးသော်ကောင်း ပြုစုထားသည့် မြန်မာစာပေ စာစုစာရင်းကို စာပေဗိမာန် က ၁၉၈၃ ခုနှစ်တွင် စာအုပ်အဖြစ် ထုတ်ဝေခဲ့သည်။ နောက်ပိုင်းစာတည်းမှူးချုပ် ဆရာမ ဒေါ်အုန်းကြည် လက်ထက်တွင် “မြန်မာ့ရည်ညွှန်းစာအုပ်ဟူသည်” စာတမ်းကို ရေးသား တင်သွင်းခဲ့သည်။

ယင်းမှ ဘာသာပြန် စာပေစာတမ်းဖတ်ပွဲ (၁၉၈၇) တွင် ဆရာငြိမ်းကျော်နှင့်အတူ “ရှေးခေတ်ဘာသာပြန် သဘောနှင့် အထောက်အကူကျမ်းများ” စာတမ်းကို ရေးသားဖတ်ကြားခဲ့သည်။ အဓိကမှာ အစောဆုံး ဘာသာပြန်ကျမ်းများ၊ ဗုဒ္ဓသာသနာ၊ ပါဠိစာပေမှ မြန်မာပြန် စာပေများအကြောင်းဖြစ်သည်။

၁၉၈၇ ခုနှစ်တွင် စာပေဗိမာန်က မြန်မာ့စွယ်စုံကျမ်းနှစ်ချုပ်စာအုပ်ကို စတင်ထုတ်ဝေရာ စွယ်စုံကျမ်း နှစ်ချုပ်ပြုစုထုတ်ဝေရေး ကော်မတီတွင် အဖွဲ့ဝင်အဖြစ် ပါဝင်ခဲ့ပြီး ဥက္ကဋ္ဌမှာ ဆရာဦးမျိုးမင်း ဖြစ်သည်။ ထိုမှ ရည်ညွှန်းကျမ်းစာပေ ပြုစုထုတ်ဝေရေးအဖွဲ့တွင် ပါဝင်လာခဲ့ပြီး ဥက္ကဋ္ဌအဖြစ် တာဝန်ယူခဲ့သည်မှာ ယနေ့တိုင်ဖြစ်သည်။ ဆရာဦးမျိုးသန့် စာတည်းမှူးချုပ် ဖြစ်လာချိန်တွင် ဆရာကြီးသည် အမျိုးသားစာပေဆု အဖွဲ့ဝင်ဖြစ်လာခဲ့သည်။ အမျိုးသားစာပေ စိစစ်ရွေးချယ်ရေး ကော်မတီတွင် ဒုတိယဥက္ကဋ္ဌအဖြစ် နှစ်ပေါင်းများစွာ ဆောင်ရွက်ခဲ့ပြီး ၂၀၁၀ ပြည့်နှစ်မှစ၍ ၂၀၂၀ ပြည့်နှစ်အထိ ဥက္ကဋ္ဌတာဝန်ဆောင်ရွက်ခဲ့ကာ ကျန်းမာရေး အခြေအနေအရ စာပေတာဝန်များကို ရပ်နားခဲ့ရသည်။

ဆရာကြီးသည် စာပေဗိမာန်က ဆောင်ရွက်လျက်ရှိသည့် မြန်မာ့ စွယ်စုံကျမ်းတွဲသစ်များ ပြန်လည်ထုတ်ဝေရေးနှင့် မြန်မာဂန္ထဝင်အတွဲ ၁၀၀ စာစဉ်များ ထုတ်ဝေရေးတို့တွင် စာတည်း အဖွဲ့၏ စာတည်းမှူးချုပ်အဖြစ် တက်ကြွစွာ ဦးဆောင်ပါဝင် ဆောင်ရွက်ခဲ့သည်။ စာပေဗိမာန်၏ စာပေလုပ်ငန်းဟူသမျှတွင် ဆရာကြီး၏ အကြံဉာဏ်နှင့် ဦးဆောင် ကူညီမှုများ ပါဝင်ခဲ့သည် ချည်း ဖြစ်ပါသည်။

▪️◾️ နိဂုံး
ဆရာကြီးသည် မိမိသက်တမ်းတစ်လျှောက် စာကြည့်တိုက်လောက၊ စာပေလောကတွင် စိတ်အားထက်သန်စွာ၊ စိတ်ပါဝင်စားစွာ ဝန်ဆောင် မှုပေးလျက် နှစ်ပေါင်း ၇၀ နီးပါး မြန်မာစာပေအကျိုးကို ဆောင်ရွက်ခဲ့သူဖြစ်သည်။ ယခုအသက် ၈၄ နှစ် အရွယ်အထိ စာကြည့်တိုက်များ ဖွံ့ဖြိုးရေး၊ စာအုပ်များလှူဒါန်းရေးနှင့် ရှေးဟောင်းပေ။ ပုရပိုက်မှ စာကောင်းပေမွန်များကို ဒစ်ဂျစ်တယ်နည်း (Digitization) နှင့် ထိန်းသိမ်းဖြန့်ဝေရေးလုပ်ငန်း များကို ကူညီဆောင်ရွက်လျက်ရှိသည်။

ဆရာကြီး၏ ဇနီးမှာ ဒေါ်ခင်သန်း (စာရင်းကိုင်ချုပ်ငြိမ်း) ဖြစ်ပြီး သားသမီးသုံးဦး ထွန်းကားခဲ့သည်။ ဦးမင်းသော်ကောင်း၊ ဒေါက်တာ သန့်သော်ကောင်း နှင့် ဦးမြတ်သော်ကောင်းတို့ဖြစ်သည်။ ယခုအခါ ဆရာကြီးသည် အမှတ် ၅၂ ဘီ သံလွင်လမ်း ရန်ကုန်မြို့တွင် မိသားစုနှင့်အတူ နေထိုင်လျက်ရှိသည်။ ဆရာကြီး ၏ အသက် ၇၅ နှစ်ပြည့် အထိမ်းအမှတ်အဖြစ် “ ဦးသော်ကောင်း ၇၅ နှစ်ပြည့် အထိမ်းအမှတ် မုဒိတာ စာစု” စာအုပ်ကို ထုတ်ဝေခဲ့ပြီး အသက် နှစ် ၈၀ ပြည့် အထိမ်းအမှတ်အဖြစ်လည်း “ဆရာကြီးဦးသော်ကောင်း နှစ် ၈၀ ပြည့်စာစုများ” စာအုပ်ကို ထုတ်ဝေခဲ့ပြီးဖြစ်ပါသည်။

သို့ပါ၍ ဆရာကြီး အသက် ၁၀၀ တိုင်အောင် မိသားစုနှင့်အတူ သက်ရှည် ကျန်းမာစွာ နေထိုင်ပြီး အသက်နှစ် ၁၀၀ ပြည့်အတွက် အမှတ်တရစာစုများ ဆက်လက်ထုတ်ဝေနိုင်ပါစေကြောင်း ဆုတောင်း မေတ္တာပို့သပါသည်။ စာကြည့်တိုက်လုပ်ငန်းများ၊ မြန်မာစာပေ၊ မြန်မာသမိုင်းနှင့် မြန်မာ့ယဉ်ကျေးမှု ဆိုင်ရာ သုတေသနပြုလုပ်ခြင်း၊ စာတမ်းများရေးသားခြင်း၊ အထက်ပါပညာရပ်နယ်ပယ်တွင် စွမ်းစွမ်း တမံ ပါဝင်ဆောင်ရွက်ခဲ့သည့်အတွက် ဆရာကြီးသည် စာကြည့်တိုက်တပည့်အပေါင်းတို့၏ ခိုနားရာအရိပ် သစ်ပင်ကောင်းကြီးဖြစ်ပါကြောင်း ဂါရဝတရား ရှေ့ထား၍ ဂုဏ်ပြုရေးသား လိုက်ရပါသည်။ ။

စာပေထဲကလူ၊ လူထဲကစာ
စာထဲမှာ သူနေ
စာပေမှာ မွေ့လျော်၏။
စာစားကာ အာဟာရနဲ့
ဘဝမှာ စာကိုစွဲ မြဲလှပါဘိ။
ဆရာသော်တဲ့
စာတော်က စာအဆင့်
မြင့်တဲ့ဂုဏ်ရည်။
သူသိရာ စာအကြောင်းတွေက
စာအပေါင်းရယ် မွှေကာမွေ့
စေ့လို့စုံသည်။
စာပန်းကို သူသီ
စာဝတ်ရည် သူစား။
စာအပွင့်တွေနဲ့
ဖြာဝင့်ကာ စာမြိုင်နန်းမှာဖြင့်
ကြိုင်လျှမ်း ရောင်စုံဖြာလို့
ရတနာ စာအသီးတွေနဲ့
ခိုင်ဖြိးကာ စာဓလေ့ရယ်ကြောင့်
စာစေ့တွေ မြေလွှာထဲ
ကြဲဖြန့်တကား။
စာအုပ်ပေမို့
စာအုပ်နဲ့သူမကွာ
သူ့ရင်မှာ စာအပြည့်။
ရှာကြံကာ ဖွေကာနှိုက်ပါလို့ စာဘဏ္ဍာ ရွှေရတနာသိုက်မှာ
ပျော်ပိုက်နေ၏။ ။ (စာဘဏ္ဍာစိုး ဆရာ ဒေါက်တာသော်ကောင်းသို့)
သူရဇော်

စာကိုး
၁။ ၂၀၀ပြည့်နှစ်အတွက်အမျိုးသားစာပေဆု တစ်သက်တာဆု၊ အမျိုးသားစာပေဆုနှင့် စာပေဗိမာန်စာမူဆုလက်ကမ်းစာစောင်။
၂။ ဦးသော်ကောင်း၏ စကားသံများ
၃။ ထွန်းဖောင်ဒေးရှင်းစာပေဆု (၂၀၁၆)
၄။ ဦးသော်ကောင်း ၇၅ နှစ်ပြည့် အထိမ်းအမှတ် မုဒိတာစာစု
၅။ ဆရာကြီး ဦးသော်ကောင်း နှစ် ၈၀ ပြည့်စာစုများ
၆။ စာပေဗိမာန် နှစ်၇၀ပြည့် (၁၉၄၇ -၂၀၁၇)

ပုံ့ပုံ့ (စာပေဗိမာန်)

မှတ်ချက် - ၂၀၂၁ ခုနှစ်၊ ဩဂုတ်လအတွင်း ပြန်ကြားရေးဝန်ကြီးဌာန သတင်းနှင့်စာနယ်ဇင်းလုပ်ငန်း website တွင်ဖော်ပြထားသည်ကို ပြန်လည်ကူးယူဖော်ပြခြင်းဖြစ်ပါသည်။

အပိုင်း(၂)
https://www.facebook.com/permalink.php?story_fbid=pfbid026AnyY4V1tFaSWKYJbeytp9T4WNGuN5Y2fVyVkWioGocVfsTjbdbdT4amFBtyQkXl&id=100063724248818

အပိုင်း(၁)
https://www.facebook.com/permalink.php?story_fbid=pfbid0tNdDLYcoHio9R63AK3gnyoNErJ95FyC9xnJE6cBPQetFV2VPMfw1Lf2CVPcroFk5l&id=100063724248818

⬛ စာကြည့်တိုက်ပညာ၏ ဖခင် ဆရာကြီး ဒေါက်တာ စည်သူသော်ကောင်း ✍✍ ရေးသားသူ - ပုံ့ပုံ့ (စာပေဗိမာန်) ✍✍ ------------------- အပို...
29/07/2026

⬛ စာကြည့်တိုက်ပညာ၏ ဖခင် ဆရာကြီး ဒေါက်တာ စည်သူသော်ကောင်း
✍✍ ရေးသားသူ - ပုံ့ပုံ့ (စာပေဗိမာန်) ✍✍
------------------- အပိုင်း(၂) -------------------
▪️◾️ စာကြည့်တိုက်တာဝန် သူကျေပွန်
ရန်ကုန်တက္ကသိုလ်၏ ပထမဆုံးစာကြည့်တိုက်မှူးအဖြစ် ဦးခင်ဇော် (ကလောင်အမည် - K) က ၁၉၃၀ ပြည့်နှစ်မှ ၁၉၄၅ ခုနှစ်အထိတာဝန်ယူဆောင်ရွက်ခဲ့ပြီး ၁၉၄၆ ခုနှစ်မှ ၁၉၆၈ ခုနှစ်အထိ ဦးသိန်းဟန် (ဆရာဇော်ဂျီ) က တာဝန်ယူခဲ့သည်။

၁၉၆၄ ခုနှစ်တွင် အခေါ်အဝေါ်ပြောင်းလဲခဲ့သည့် တက္ကသိုလ်များ ဗဟိုစာကြည့်တိုက်၏ စာကြည့်တိုက်မှူးကြီးအဖြစ် ၁၉၆၈ ခုနှစ်မှ ၁၉၉၇ ခုနှစ်အထိ ဆရာကြီးဦးသိန်းဟန် (ဆရာ ဇော်ဂျီ) ၏ စာပေအမွေအနှစ်နှင့် စာကြည့်တိုက်အတတ်ပညာရပ်များကို ဆရာဦးသော်ကောင်းက ဆက်ခံခဲ့သည်။ တက္ကသိုလ်များ ဗဟိုစာကြည့်တိုက်သည် ဦးသော်ကောင်း လက်ထက်တွင် ပိုမို ပီပြင်လာပြီး မြန်မာနိုင်ငံ၏ အားအထားရ ဆုံးသော စာကြည့်တိုက်ဖြစ်လာသည့် အပြင် မြန်မာပြည်အကြောင်း လေ့လာ လိုသူများအတွက် နိုင်ငံတကာ၏ အားကိုးရာဖြစ်လာသည်။

ဆရာကြီး သည် မြန်မာစာနယ်ပယ်နှင့် ကမ္ဘာ့စာပေ နယ်များကို ပေါင်းကူးတံတားခင်းပေး ခဲ့သည်။ ကမ္ဘာ့စာကြည့်တိုက်များနှင့် ဆက်သွယ်၍ ဗဟုသုတတိုးပွားစေမည့် စာအုပ်စာတမ်း၊ ဂျာနယ်၊ မဂ္ဂဇင်းများကို စာအုပ်လဲလှယ်၍ ဖြစ်စေ၊ ငှားရမ်းဝယ်ယူ ၍ ဖြစ်စေ ဖြည့်ဆည်းပေးခဲ့သည်။

မူလ ရည်မှန်းချက်ဖြစ်သည့် မြန်မာမှုနှင့် ပတ်သက်၍လည်း အစုံလင်ဆုံးဖြစ်အောင် စုဆောင်းနိုင်ခဲ့သည်။ ဆရာကြီးသည် ရှေးဟောင်းစာပေ ဖြစ်သည့် ပေ၊ ပုရပိုက် လက်ရေးစာများအပေါ် ပိုစိတ်ဝင်စား သည်။ ဘုန်းတော်ကြီး ကျောင်းအိုများ နှင့် ကိုယ်ပိုင်စာကြည့်တိုက်များသို့ သွားရောက်၍ ဖုန်တက်နေသော ပေစာ လက်ရေးမူများကို စုဆောင်းခဲ့ကြသည်။ တချို့ကို ဝယ်ရသည်လည်း ရှိသည်။

အထက်မြန်မာပြည်ကို ဗြိတိသျှတို့ သိမ်းပိုက်စဉ်က မြန်မာပြည်က ယူဆောင် သွားသည့် ရှားပါးပေနှင့် ပုရပိုက်များကို လန်ဒန်က ဗြိတိန်သျှစာကြည့်တိုက်မှ တစ်ဆင့် အလှူပြန်လည်ရရှိအောင် ဆောင်ရွက်ခဲ့သည်။ ယခုအခါ ပေ၊ ပုရပိုက် အစည်းပေါင်း ၁၆၀၀၀ နီးပါးကို စုဆောင်း ထိန်းသိမ်းနိုင်ခဲ့သည်။

ထို့ကြောင့် ဆရာ ပါရဂူက “တက္ကသိုလ်များ ဗဟိုစာကြည့် တိုက်မှူး ဦးသော်ကောင်းသည် စာကြည့် တိုက်မှူးရာထူးနှင့် အလွန်တရာ အံဝင် ခွင်ကျသူဖြစ်သည်” ဟု ရေးသားဖူးသည်။ ရှားပါး ပေ၊ ပုရပိုက် စာအုပ်စာတမ်းများကို လက်ရေးမူကူးခြင်း၊ မိုက်ကရိုဖလင် ဖြင့် ရိုက်ကူးထိန်းသိမ်းခြင်းများကိုလည်း နိုင်ငံတကာနှင့်အညီ ဆောင်ရွက်ခဲ့သည်။ တက္ကသိုလ်များ ဗဟိုစာကြည့်တိုက်တွင် ပေ၊ ပုရပိုက်နှင့် လက်ရေးဌာနစိတ် တစ်ခု တည်ထောင် ဖွင့်လှစ်နိုင်ခဲ့သည်။

ထို့ကြောင့် ၂၀၀၅ ခုနှစ်တွင် ဂျပန်နိုင်ငံ ဖုကုအိုက အာရှဓလေ့ဆု ရွေးချယ်ရေး ကော်မတီက ဖုကုအိုက ပညာရှင်ဆု [Fukuoka Asian Culture Prize (Academies Laureate)] ပေးအပ် ချီးမြှင့်ခြင်း ခံရသည်။ ထိုဖုကုအိုက ယဉ်ကျေးမှု ဆုချီးမြှင့်ခြင်းနှင့် ပတ်သက်၍ ဆုရွေးချယ်ရေးအဖွဲ့က “ဒေါက်တာ သော်ကောင်းသည် အာရှတိုက်တွင် စာကြည့်တိုက်ပညာရပ် နယ်ပယ်၌ ဦးဆောင်ဦးရွက်ပြုသူတစ်ဦး ဖြစ်သည်။

အထူးသဖြင့် မြန်မာနိုင်ငံတွင် ရှေးရိုးရာ မှတ်တမ်းမှတ်ရာများကို ထိန်းသိမ်းရာ တွင် အထူးတလည် တာဝန်ကျေပွန်ခဲ့သူ ဖြစ်သည်” ဟု မှတ်ချက်ပြုခဲ့ဖူးသည်။ ၂၀၀၀ ပြည့်နှစ်တွင် ဖူကာအိုကာဆု ရရှိခဲ့ သည့် ကျော်ကြားသော မြန်မာသမိုင်း ပညာရှင် ဒေါက်တာသန်းထွန်းကလည်း “သူက သုတေသနအတွက် ရှားပါးစာရွက်၊ စာတမ်းလိုအပ်နေတဲ့သူ၊ နိုင်ငံသားဖြစ် ဖြစ်၊ နိုင်ငံခြားသားဖြစ်ဖြစ် စာနာကူညီ တယ်၊ သူ ကျွန်တော်တို့ကို အမြဲ ကူညီနိုင် ပါစေ” ဟုလည်း ရေးသားခဲ့ဖူးသည်။

ဆရာကြီးသည် ဝန်ထမ်းလုပ်သက် တစ်လျှောက်လုံး စာကြည့်တိုက်အသိုင်း အဝိုင်းနှင့် စာပေအဝန်းအဝိုင်းထဲမှာသာ ဘဝကို နစ်မြှုပ်ထားသူဖြစ်သည်။ ဂျပန်၊ သြစတြေးလျ၊ စင်ကာပူ၊ အင်္ဂလန်နှင့် အမေရိကန်နိုင်ငံများသို့ စာကြည့်တိုက် နှင့် စာကြည့်တိုက်ပညာသင်တက္ကသိုလ် များ၊ လေ့လာရေးခရီးများ ရောက်ခဲ့သည်။ ဆရာကြီးသည် စာကြည့်တိုက်မှူးတာဝန် နှင့် သင်ကြားရေးတာဝန်တို့ကို ပူးတွဲထမ်း ဆောင်ခဲ့ပြီး မြန်မာနိုင်ငံ၏ စာကြည့်တိုက် လောက ထွန်းလင်းတောက်ပရေးအတွက် စွမ်းစွမ်းတမံ ဆောင်ရွက်ခဲ့သူအဖြစ် သမိုင်းမှတ်တမ်းဝင်သူ တစ်ဦးဖြစ်သည်။

ဆရာကြီးလက်ထက် ၁၉၇၁ ခုနှစ်မှာပင် စာကြည့်တိုက်ပညာဌာန (Department of Library Science) ကို တည်ထောင် ဖွင့်လှစ်နိုင်ခဲ့ပြီး သင်တန်းအပတ်စဉ် (၁) ကစပြီး စာကြည့်တိုက်ပညာ ဒီပလိုမာဘွဲ့ ကို ပေးအပ်နိုင်ခဲ့သည်။ စာကြည့်တိုက် ပညာဖြင့် အသက်မွေးမည့်သူ သုံးရာကျော် ကိုလည်း မွေးထုတ်ပေးခဲ့သည်။ ယခုအခါ ဆရာကြီးပျိုးထောင်ခဲ့သော စာကြည့် တိုက်သင်တန်းသည် ယခုအခါ ဘွဲ့လွန် ဒီပလိုမာသင်တန်းအပြင် မဟာတန်း၊ ပါရဂူတန်းများအထိ တိုးချဲ့သင်ကြားနေပြီ ဖြစ်သည်။

၁၉၅၇ ခုနှစ်မှ ၁၉၉၇ ခုနှစ် ဒီဇင်ဘာ လ ၁၇ ရက်အထိ ရန်ကုန်တက္ကသိုလ် ပင်မနယ်မြေရှိ ရန်ကုန်တက္ကသိုလ် စာကြည့်တိုက်၊ တက္ကသိုလ်များ ဗဟို စာကြည့်တိုက်တို့တွင် စာကြည့်တိုက်မှူး အဖြစ် နှစ်ပေါင်း ၄၀ ခန့် တာဝန်ယူ လုပ်ကိုင်ခဲ့သည်။

ဆရာကြီးသည် ၁၉၉၈ ခုနှစ်မှ ၂၀၀၇ ခုနှစ်အထိ ရန်ကုန်တက္ကသိုလ် စာကြည့် တိုက်နှင့် သုတပညာဌာန၊ ရန်ကုန် အရှေ့ပိုင်းတက္ကသိုလ် စာကြည့်တိုက် နှင့် သုတပညာဌာနတို့တွင် အချိန်ပိုင်း ပါမောက္ခအဖြစ် စာကြည့်တိုက်ပညာ ဆက်လက်သင်ကြားပို့ချသည်။ ထို့နောက် ဆရာကြီး၏ဖခင် တည်ထောင်ခဲ့သည့် မြန်မာ့သမိုင်းအဖွဲ့တွင် ၁၉၉၈ ခုနှစ် ဇန်နဝါရီလမှစတင်၍ နှစ်ပေါင်း ၃၀ ကျော် တာဝန်ယူလုပ်ဆောင်ခဲ့ပြီး ယခုအခါ မြန်မာ့သမိုင်းအဖွဲ့ အချိန်ပိုင်းအဖွဲ့ဝင် ဖြစ်သည်။

▪️◾️ စာပေတာဝန် သူကျေပွန်
အမျိုးသားစာပေဆု စိစစ်ရွေးချယ် ရေးကော်မတီတွင် ဒုတိယဥက္ကဋ္ဌအဖြစ် လည်းကောင်း၊ ၂၀၁၂ ခုနှစ်မှစ၍ ဥက္ကဋ္ဌ အဖြစ်လည်းကောင်း၊ ဆရာဝန်တင်ရွှေဆု၊ ထွန်းဖောင်ဒေးရှင်းစာပေဆု၊ ပခုက္ကူ ဦးအုံးဖေ စာပေဆု၊ သုတစွယ်စုံစာပေဆု စသည့် စာပေဆိုင်ရာ ဆုရွေးချယ်ရေး အဖွဲ့များ၌လည်း ဥက္ကဋ္ဌအဖြစ် ပါဝင် ဆောင်ရွက်ခဲ့သည်။ မြန်မာစာကော်မရှင် တွင် အတွင်းရေးမှူးအဖြစ် ၁၉၇၁ ခုနှစ်မှ ၁၉၇၆ ခုနှစ်အထိ ဆောင်ရွက်ခဲ့ပြီး မြန်မာ- အင်္ဂလိပ်အဘိဓာန်ပြုစုရေးအဖွဲ့၏ ပထမ ဆုံးသဘာပတိအဖြစ် (၁၉၈၁ - ၁၉၈၂) ၌ ဆောင်ရွက်ခဲ့သည်။

၁၉၉၂ ခုနှစ်တွင် မြန်မာနိုင်ငံစာကြည့်တိုက်အသင်း ဖြစ်မြောက်အောင် စီစဉ်ဆောင်ရွက် တိုက် တွန်းခဲ့ပြီး အသင်း၏ နာယကအဖြစ် ယနေ့အထိ ဆောင်ရွက်လျက်ရှိသည်။ ၁၉၉၃ ခုနှစ်မှစ၍ မြန်မာနိုင်ငံ စာပေနှင့် စာနယ်ဇင်းအဖွဲ့ ပူးတွဲပြီး မြန်မာနိုင်ငံ တွင် ထင်ရှားကျော်ကြားခဲ့သော စာရေး ဆရာကြီးများ၏ စာပေါင်းချုပ်များကို ထုတ်ဝေနိုင်ရန် ဦးဆောင်စီစဉ်ပေးခဲ့ရာ ဆရာဇော်ဂျီ စာပေါင်းချုပ်၊ ပီမိုးနင်း စာပေါင်းချုပ်၊ လယ်တီပဏ္ဍိတ ဦးမောင် ကြီး စာပေါင်းချုပ်နှင့် မှော်ဘီဆရာ သိန်းကြီး စာပေါင်းချုပ်တို့ကို ပုံနှိပ် ထုတ်ဝေခဲ့သည်။ ဆရာကြီးသည် မြန်မာစာပေဖွံ့ဖြိုးရေးလုပ်ငန်းအဖြစ် ပုဂ္ဂလိကစာပေဆုများ တီထွင်ချီးမြှင့် သည့်အခါတွင်လည်း ပါဝင်ကူညီ ဆောင်ရွက်ခဲ့သည်။

ဦးသော်ကောင်းသည် စာကြည့်တိုက်မှူးဘဝဖြင့် မြန်မာနိုင်ငံအပြင် ဗြိတိန်၊ ဂျပန်နှင့် စင်ကာပူတို့ရှိ စာကြည့် တိုက်ကြီးအချို့တွင် ကျောင်းသားများ၊ ပညာရှင်များ၊ သုတေသီများနှင့် အခြား စာရှာသူများစွာတို့ကို ကူညီပေးခဲ့ပြီး ကိုယ်တိုင်လည်း သုတေသနစာတမ်း များစွာတို့ကို ရေးသားဖတ်ကြားခဲ့သည်။ အငြိမ်းစားယူပြီးနောက်ပိုင်း ကမ္ဘာတစ်ဝန်း ရှိ သုတေသီများနှင့် ကျောင်းသားများ လေ့လာကိုးကားနိုင်စေရန် ရှေးဟောင်း ပေစာ၊ ပုရပိုက်စာများအား ထိန်းသိမ်း စုဆောင်းလျက် အင်္ဂလိပ်ဘာသာသို့ ပြန်ဆိုပေးခြင်း၊ မြန်မာသမိုင်းနှင့် မြန်မာ စာပေဆိုင်ရာ စာတမ်းနှင့် စာအုပ် စုစုပေါင်း ၁၈ဝ ကျော်တို့ကို ရေးသား ထုတ်ဝေခဲ့ပြီး ယင်းတို့အနက် အများစု မှာ တစ်ကမ္ဘာလုံး လေ့လာဖတ်ရှုနိုင်ရန် အင်္ဂလိပ်ဘာသာဖြင့် ရေးသားထုတ်ဝေ ခဲ့ခြင်း ဖြစ်သည်။

ဆရာကြီးသည် အင်္ဂလိပ်-မြန်မာ နှစ်ဘာသာစလုံးတွင် ပင် ကျွမ်းကျင်သူ စာရေးကောင်းသူ တစ်ဦးလည်း ဖြစ်သည်။ ဒေါက်တာ ညီညီက “သူ့လို မြန်မာမှုပညာရပ် များ၊ မြန်မာပြည်အကြောင်းရပ်များကို ပြည့်စုံစွာဖတ်ရှုတတ်ကျွမ်း၊ သိနားလည် ပြီး အင်္ဂလိပ်-မြန်မာ နှစ်ဘာသာဖြင့် ရှင်ရိုသေ၊ လူရိုသေရေးနိုင်သူ မြန်မာပြည် တွင် သိပ်မရှိတော့ပါ” ဟု မှတ်တမ်းတင် ဂုဏ်ပြုခဲ့ပါသည်။

ကိုးကွယ်ယုံကြည်သည့် ဘာသာအယူဝါဒ အမျိုးမျိုးကွဲပြားကြသော ကမ္ဘာပေါ်ရှိ လူမျိုးအသီး သီး ငြိမ်းချမ်းရေးနှင့် ချစ်ကြည်ရေးကို ရှေးရှုလျက် သင့်မြတ်စွာ နေထိုင်ရေးကိုရည်မှန်း၍ အိန္ဒိယ နိုင်ငံတွင် ရှေးကထွန်းကားခဲ့သော နာလန္ဒတက္ကသိုလ်ကို ပြန်လည် တည်ထောင်ရန် အိန္ဒိယ၊ တရုတ်၊ ဂျပန်နှင့် အရှေ့တောင်အာရှနိုင်ငံများမှ ရွေးချယ်သော အကြံပေးပညာရှင် အဖွဲ့တွင် ၂၀၀၇ ခုနှစ်မှစ၍ ဆောင်ရွက်လျက်ရှိသည်။

အင်္ဂလန်၊ အမေရိကန်၊ သြစတြေးလျ၊ ဂျပန်၊ တရုတ်၊ ထိုင်း၊ မလေးရှားနှင့် စင်ကာပူ စသည့် နိုင်ငံ များတွင် မြန်မာစာပေ၊ စာကြည့်တိုက်နှင့် သုတပညာ၊ မြန်မာ့သမိုင်းနှင့် မြန်မာယဉ်ကျေးမှု ဆိုင်ရာ သုတေသနစာတမ်းများစွာကို သွားရောက်ဖတ်ကြား ခဲ့သည်။ မြန်မာနှင့် အင်္ဂလိပ်ဘာသာ ဖြင့် ဆောင်းပါး၊ စာတမ်း၊ စာအုပ်များ ပြုစုခဲ့သည်။

ဘုရင့်နောင်မင်းတရားကြီးအကြောင်းစာတမ်း (Accounts of King Bayin naung's Life and Hanthawady Hsinbyu-mya-shin Ayed awbone arecord of his Campaigns) နှင့် မြန်မာ့စာပေဖန်ရေး စစ်တမ်းအကျဉ်းချုပ် (Brief survey of Myanmar literary criticism) စသည့်စာတမ်းများနှင့် ၁၈ရာစုက မဟာရတနာပုံတိုက်တော်စိုး ရာဇသင်္ကြန် အမတ်ကြီးရေး သည့် ဇင်းမယ်သမိုင်းရာဇ၀င်ပေစာကို အင်္ဂလိပ်ဘာသာသို့ ပြန်ဆိုတည်းဖြတ်ထုတ်သော "Sithu Gamani Thingyan (Maha Yadanabon Tike Taw Sowe). Zinme Yazawin "စာအုပ်တို့မှာ ထင်ရှားသည်။

ထို့ပြင် From the Librarian's Window, Aspects of Myanmar History and Culture, Myanmar Wonderland အစရှိသည့် စာအုပ်များမှာ ရေးသားထုတ်ဝေပြီး ဖြစ်သည်။ ထွန်းဖောင်ဒေးရှင်း စာပေဆုကို ၂၀၀၉ ခုနှစ်တွင် မြန်မာစာပေ၊ မြန်မာ စာကြည့်တိုက်ပညာနှင့် ပေ၊ ပုရပိုက်အကြောင်း ရေးသားထားသည့် From the Librarian's Window စာအုပ်ဖြင့် လည်းကောင်း၊ ၂၀၁၁ ခုနှစ်တွင် Aspects of Myanmar History And Culture စာအုပ်ဖြင့် လည်းကောင်း ရရှိခဲ့သည်။ ယင်းစာအုပ်သည် ရန်ကုန်၊ ဘန်ကောက်၊ ပီနန်၊ စင်ကာပူ၊ အိုဆာကာ နှင့် မီချီကန် စသည်တို့တွင် ကျင်းပသည့် နိုင်ငံတကာညှိနှိုင်း ဆွေးနွေးပွဲများတွင် ဖတ်ကြား ခဲ့သည့် စာတမ်းအချို့ကို စုစည်းထုတ်ဝေ ခဲ့ခြင်း ဖြစ်ပါသည်။

ယင်းစာအုပ်ထဲတွင် မြန်မာ့သမိုင်း ဆိုင်ရာနှင့် မြန်မာ့ယဉ်ကျေးမှုဆိုင်ရာဟူ၍ အခန်းနှစ်ခန်းခွဲကာ စာတမ်း ၁၀ စောင်ကို ထည့်သွင်းရေးသားထားသည်။ ယခုအခါ ဆရာကြီးသည် မြန်မာ့စာပေဆိုင်ရာ၊ ယဉ်ကျေးမှု ဆိုင်ရာနှင့် သမိုင်းဆိုင်ရာ စာတမ်းပေါင်း ၅၀ ပါဝင်သည့် “Papers From My Shoulder Bag” စာအုပ်ကို ရေးသားထုတ်ဝေပြီး ဖြစ်ပါသည်။

ဓာတ်ပုံ - မူရင်းဓာတ်ပုံပိုင်ရှင်အား credit ပေးပါသည်။
(ဆရာဇော်ဂျီနှင့်ဆရာဦးသော်ကောင်း)

မှတ်ချက် - ၂၀၂၁ ခုနှစ်၊ ဩဂုတ်လအတွင်း ပြန်ကြားရေးဝန်ကြီးဌာန သတင်းနှင့်စာနယ်ဇင်းလုပ်ငန်း website တွင်ဖော်ပြထားသည်ကို ပြန်လည်ကူးယူဖော်ပြခြင်းဖြစ်ပါသည်။

ဆက်လက်ဖော်ပြပါမည်။
လေးစားစွာဖြင့်

#ငြိမ်းချမ်းခေတ်စာအုပ်ဆိုင် #ဆရာဇော်ဂျီ #ဆရာဦးသော်ကောင်း #စာကြည့်တိုက် #စာကြည့်တိုက်ပညာရှင် #စာပေပညာရှင်များ

⬛ စာကြည့်တိုက်ပညာ၏ ဖခင် ဆရာကြီး ဒေါက်တာ စည်သူသော်ကောင်း ✍✍ ရေးသားသူ - ပုံ့ပုံ့ (စာပေဗိမာန်) ✍✍ ------------------- အပို...
29/07/2026

⬛ စာကြည့်တိုက်ပညာ၏ ဖခင် ဆရာကြီး ဒေါက်တာ စည်သူသော်ကောင်း
✍✍ ရေးသားသူ - ပုံ့ပုံ့ (စာပေဗိမာန်) ✍✍
------------------- အပိုင်း(၁) -------------------
၂၀၁၀ ပြည့်နှစ်အတွက် အမျိုးသားစာပေ ဆုနှင်းသဘင်ကို (၂၇ - ၁၂- ၂၀၁၁) ရက် တွင် နေပြည်တော်၊ ပြန်ကြားရေးဝန်ကြီး ဌာန၌ ကျင်းပရာ အမျိုးသားစာပေ တစ်သက်တာဆုကို ဆရာကြီး ဦးသော်ကောင်းအား ချီးမြှင့်ခဲ့သည်။

အမျိုးသားစာပေတစ်သက်တာဆုကို ၂၀၀၁ ခုနှစ်တွင် စတင်တီထွင်ချီးမြှင့် ခဲ့ခြင်းဖြစ်ပြီး မိမိ၏ ဘဝတစ်လျှောက်လုံး ကို စာပေထဲတွင် မြှုပ်နှံပြီး မြန်မာစာပေ အကျိုးကို ထူးချွန်ပြောင်မြောက်စွာ ဆောင်ရွက်လျက်ရှိသည့် သက်ရှိ ထင်ရှား စာပေပညာရှင်ကြီးများကို ရွေးချယ်ချီးမြှင့်သည့် စာပေဆိုင်ရာ အမြင့်ဆုံးဆု ဖြစ်သည်။

ဆရာကြီး ဒေါက်တာစည်သူ သော်ကောင်းသည် အသက် ၇၁ နှစ် အရွယ် ၂၀၀၈ ခုနှစ်တွင် ပခုက္ကူဦးအုံးဖေ တစ်သက်တာစာပေဆု၊ အသက် ၇၃ နှစ်တွင် ၂၀၁၀ ပြည့်နှစ်အတွက် အမျိုးသား စာပေတစ်သက်တာဆုတို့ကို ချီးမြှင့်ခံရသူ ဖြစ်သည်။ ထို့နောက် ၂၀၁၆ ခုနှစ်တွင် ထွန်းဖောင်ဒေးရှင်း တစ်သက်တာစာပေဆု၊ ၂၀၁၅ ခုနှစ်တွင် သုတစွယ်စုံစာပေ တစ်သက်တာဆု၊ ၂၀၁၆ ခုနှစ်တွင် ဆရာဝန်တင်ရွှေ စာပေတစ်သက်တာဆုတို့ကိုလည်း ရရှိ ခဲ့သူဖြစ်သည်။

ဆရာကြီးသည်စာကြည့်တိုက်မှူးဘဝကတည်းက မြန်မာစာပေလောကတိုးတက်ရေးအတွက် အကျိုးပြုစာပေများစွာကိုရေးသားခဲ့သည့်အလျောက် လက်ရှိအချိန်အထိ မြန်မာစာပေအတွက် ကြိုးပမ်းဆောင်ရွက်နေသူတစ်ဦးဖြစ်သည်။ ထို့အတွက်ကြောင့်လည်း တစ်သက်တာစာပေဆုရှင်အဖြစ်ထိုက်ထိုက်တန်တန်ချီးမြှင့်ခံခဲ့ရခြင်းဖြစ်သည်။ ထို့ပြင် ၂၀၁၂ ခုနှစ်တွင် ဆရာကြီးကို ဝိဇ္ဇာပညာထူးချွန်တံဆိပ်(ဒုတိယအဆင့်) နှင့် စည်သူဘွဲ့တို့ကိုနိုင်ငံတော် အစိုးရကချီးမြှင့်ခဲ့သည်။

ဆရာကြီးသည်စာကြည့်တိုက်ပညာကို တက္ကသိုလ်အဆင့်တွင်သင်ကြားနိုင်ရန်ကြိုးပမ်းခဲ့သည့်အပြင် မြန်မာနိုင်ငံ၏စာကြည့်တိုက်လှုပ်ရှားမှုကို အားပေးလှုံ့ဆော်ကာလေ့ကျင့်ပျိုးထောင်ပေးခဲ့သည့်အတွက်ကြောင့် မြန်မာနိုင်ငံတွင်သာမက နိုင်ငံတကာတွင်ပါ ကျော်ကြားသော မြန်မာ့စာကြည့်တိုက်ပညာရှင်တစ်ဦးဆိုလည်း မမှားနိုင်ပေ။ “ပညာရှာသူ တို့ဝိုင်းကူ” ဟူသော ဆောင်ပုဒ်ကိုနှလုံးသွင်း၍ ကိုယ်ကျိုးမဖက်စေတနာရှေ့ထား ကူညီတတ်သူတစ်ဦးဖြစ်ပြီး ဖခင်၏ ပညာခြေရာကို အမီလိုက်နိုင်ခဲ့ သည့် တစ်ဦးတည်းသော စာကြည့်တိုက် ပညာရှင်ကြီးလည်း ဖြစ်သည်။

ဦးသော်ကောင်းကို စည်သူဦးကောင်း၊ အမိဒေါ်သိန်းတို့က ၁၉၃၇ ခုနှစ် ဒီဇင်ဘာလ ၁၇ ရက်နေ့ မြန်မာသက္ကရာဇ် ၁၂၉၉ ခု နတ်တော်လပြည့် သောကြာ နေ့တွင် ရန်ကုန်မြို့၌ ဖွားမြင်ခဲ့သည်။ ဆရာကြီး၏ဖခင်သည် လွတ်လပ်ရေး ကာလတွင် အင်္ဂလန်နိုင်ငံ ပညာတော်သင် များအတွက် အကြံပေးအရာရှိ၊ အင်္ဂလန် နိုင်ငံရှိ မြန်မာသံရုံးပညာရေးသံမှူးတာဝန် တို့ကို တာဝန်ထမ်းဆောင်စဉ် ၁၉၄၇-၄၉ ခုနှစ်၌ မြန်မာနိုင်ငံတော် ငွေကြေး ဘုတ်အဖွဲ့ဝင်အဖြစ်ခန့်အပ်ခံရကာ ငွေစက္ကူ များပေါ်တွင် “ မောင်ကောင်း” ဟူ၍ လက်မှတ်ရေးထိုးခဲ့သူ ဖြစ်သည်။ ဦးကောင်းသည် ပညာမင်းကြီးဖြစ်သည့် အပြင် ပထမဆုံး မြန်မာ့သမိုင်းကော်မရှင် ဥက္ကဋ္ဌအဖြစ် တာဝန်ထမ်းခဲ့သူလည်း ဖြစ် သည်။

ဆရာကြီး ဦးသော်ကောင်းသည် မွေးချင်းသုံးဦးအနက် အကြီးဆုံးသား ဖြစ်သည်။
ဆရာကြီးသည် ငယ်စဉ်ကလေးဘဝ တွင် အရိုးအဆစ် နာကျင်ကိုက်ခဲသော ရောဂါကို ခံစားရသဖြင့် တခြားကလေး များကဲ့သို့ ကစားခုန်စားမလုပ်နိုင်ခဲ့ပေ။ စာပေဝါသနာကြီးမားသည့် ဖခင်ဦးကောင်း ဝယ်ယူစုဆောင်းထားသည့် စာအုပ်များက အိမ်အပြည့်ပင်ရှိသည့်အတွက် ထိုစာအုပ် များဖြင့်သာ အဖော်ပြုခဲ့ရသည်။ ထို့ပြင် အိမ်၌ပင် မိခင်ဖြစ်သူနှင့် ဆရာ/ ဆရာမ များက ပညာသင်ကြားပေးခဲ့ကြသည်။ ၁၉၄၇ ခုနှစ်တွင် အစိုးရက ဖခင်ဦးကောင်း ကို မြန်မာနိုင်ငံက စေလွှတ်သော ပညာ တော်သင်များအား ကြည့်ရှုစောင့်ရှောက် ရန်တာဝန်ဖြင့် အင်္ဂလန်သို့ စေလွှတ်ခဲ့ရာ မိသားစုနှင့်အတူ လန်ဒန်မြို့သို့ လိုက်ပါ သွားခဲ့သည်။

၁၉၅၀ ပြည့်နှစ်ကုန်ပိုင်းတွင် မိသားစု နှင့်အတူ ရန်ကုန်သို့ ဆရာလိုက်ပြန်လာ ခဲ့သော်လည်း နေမကောင်းပြန်သဖြင့် ကျောင်းမတက်နိုင်ခဲ့ပေ။ ၁၉၅၂ ခုနှစ်တွင် အင်္ဂလိပ်မက်သဒစ်အထက်တန်းကျောင်း (ယခု ဒဂုံ အ.ထ.က ၁) ၌ သတ္တမတန်း နှစ်လယ်မှစ၍ ကျောင်းနေခဲ့သည်။ ၁၉၅၄ ခုနှစ်တွင် တက္ကသိုလ်ဝင်တန်းစာမေးပွဲ ကို အင်္ဂလိပ်စာနှင့် ပထဝီဝင်ဂုဏ်ထူး နှစ်ဘာသာဖြင့် ပထမအဆင့် (1st Division) မှ အောင်မြင်ခဲ့သည်။ ၁၉၅၉ ခုနှစ်တွင် ရန်ကုန်တက္ကသိုလ်မှ ဝိဇ္ဇာဂုဏ်ထူး (အင်္ဂလိပ်စာ) ဘွဲ့ကို ပထမအဆင့်ဖြင့် အောင်မြင်ခဲ့သောကြောင့် ဦးဘိုးနှစ် ရွှေတံဆိပ်ဆုကို ချီးမြှင့်ခြင်းခံခဲ့ရသည်။

ဝိဇ္ဇာဂုဏ်ထူးဘွဲ့မရမီ ၁၉၅၇ ခုနှစ် အသက် ၁၉ နှစ်အရွယ်က စတင်လျက် ရန်ကုန်တက္ကသိုလ် အင်္ဂလိပ်စာဌာန၊ စာကြည့်တိုက်တွင် အချိန်ပိုင်းအလုပ်လုပ် ခဲ့သည်။ အသက် ၂၁ နှစ်ကျော် ၁၉၅၉ ခုနှစ် မတ်လတွင် ဝိဇ္ဇာဂုဏ်ထူးတန်း စာမေးပွဲဖြေဆိုခဲ့ပြီး ထိုနှစ် ဧပြီလ ၁ ရက် တွင် ဆရာဇော်ဂျီလက်အောက်ရှိ လူမှုရေး သိပ္ပံစာကြည့်တိုက် (ယခု ရန်ကုန်စီးပွား ရေးတက္ကသိုလ် စာကြည့်တိုက်) တွင် အလုပ်စတင် ဝင်ရောက်ခဲ့သည်။

၁၉၆၂ ခုနှစ်တွင် လန်ဒန်တက္ကသိုလ်မှ စာကြည့်တိုက်ပညာဘွဲ့လွန်ဒီပလိုမာ ရရှိသည်။ ယင်းနောက် AALIA (Associate of the Australian Library and Information Association)ဘွဲ့၊ အင်္ဂလန် နိုင်ငံ၏ အမြင့်ဆုံးဘွဲ့ FLA (Fellow of the Library Association) တို့ကိုလည်း ရရှိခဲ့သည်။ ၁၉၈၃ ခုနှစ်၌ အင်္ဂလန်နိုင်ငံ စာကြည့်တိုက်အသင်းက ဂုဏ်ထူးဆောင် အဖွဲ့ဝင် [Hon. Follow of the Library Association (FLA)] အဖြစ် ရွေးချယ် တင်မြှောက်သည်။ ၁၉၉၉ ခုနှစ်တွင် သြစတြေးလျနိုင်ငံ၊ အနောက်ဆစ်ဒနီ တက္ကသိုလ်က ဂုဏ်ထူးဆောင် စာပေ ပါရဂူဘွဲ့ [Doctor of Letters (Honori- scausa)] ကို ချီးမြှင့်ခြင်းခံရသဖြင့် ဒေါက်တာသော်ကောင်းဟု မော်ကွန်းထိုး ခေါ်ဆိုခြင်းခံရသူ ပုဂ္ဂိုလ်ကြီးတစ်ဦး ဖြစ်လာခဲ့သည်။ ၂၀၀၅ ခုနှစ်တွင် ဂျပန် နိုင်ငံ ဖုကုအိုက အာရှဓလေ့ဆုရွေးချယ် ရေးကော်မတီက ဖုကုအိုက ပညာရှင်ဆု [ Fukuoka Asian Culture Prize (Acad-emis Laureate)] ပေးအပ်ချီးမြှင့်ခြင်း ခံရသည်။

လမ်းသစ်ဖောက်သူ
ဆရာကြီးသည် အရပ်ထောင်ထောင် မောင်းမောင်း၊ အသားဖြူဖြူ၊ နှာတံပေါ် ပေါ်နှင့် အမြဲပြုံးရွှင် နေတတ်သည်။ လူတိုင်းအပေါ်လည်း အစဉ်မြဲ နှစ်လိုဖွယ် အပြုံးဖြင့် ဆက်ဆံတတ်သူ တစ်ဦးလည်း ဖြစ်သည်။ စကားပြောဆိုရာတွင်လည်း နူးညံ့သိမ်မွေ့သူ ဖြစ်သည်။ စာပေနှင့် ပတ်သက်လာလျှင် မည်သူ့ကိုမဆို ထိထိရောက်ရောက် ကူညီတတ်သူဖြစ် ပြီး စာဖတ်ခြင်းကို မွေ့လျော်သူ ဖြစ် သည်။ ဆရာကြီးသည် ငယ်စဉ်ကတည်း ကပင် စာပေဝါသနာပါခဲ့သည်။ ဆရာ သူရဇော် ရေးသားထားသည့် “စာထဲမှာ သူနေ စာပေမှာ မွေ့လျော်၏။ စာစား ကာ အာဟာရနဲ့ ဘဝမှာ စာကိုစွဲ၊ မြဲလျပါဘိ” ကဗျာတွင် ဆရာသော် ကောင်း၏ ဘဝပုံရိပ်ကို ထင်ဟပ်စေ သည်ဟုလည်း ဆရာဟိန်းလတ်က ဆိုထားဖူးသည်။ ဆရာကြီးသည် လက်လှမ်းမီသမျှ မြန်မာပြည်နှင့် ပတ်သက်သော စာအုပ်၊ စာစောင်၊ စာတမ်းများ အကုန်လုံးကို ဖတ်ခဲ့ဖူးပြီး မည်သည်တို့အကြောင်းကို မည်သူ ရေးသားထားခဲ့သည်ကို အလွတ်နီးပါး သတိရသည်။ စာဖတ်မြန်၍ မှတ်ဉာဏ် ကောင်းသူ ဖြစ်သည်။ ယင်းကလည်း ဆရာ၏ လုပ်ငန်းကို အထူးအကျိုးပြု ခဲ့ပေသည်။ ဆရာ ဒေါက်တာညီညီက “ မြန်မာ ပြည်အကြောင်း၊ အင်္ဂလိပ် - မြန်မာ နှစ်ဘာသာဖြင့် ရေးသားထား သော စာအုပ်စာတမ်း အကုန်လုံးနီးပါး ဖတ်ဖူးပြီး သိကျွမ်းသူ ကမ္ဘာပေါ်တွင် နှစ်ဦးသာ ရှိသည်ထင်ပါသည်။ ထိုသူ တို့မှာ ဦးသော်ကောင်းနှင့် အင်္ဂလိပ် အမျိုးသမီးပညာရှင် Patricia Hebert တို့ ဖြစ်သည်” ဟု ချီးကျူးဂုဏ်ပြု ရေးသားခဲ့သည်။

ဆရာကြီးသည် စာကြည့်တိုက်မှူး အလုပ် ရွေးချယ်ခဲ့သည့် အချိန်တုန်းက ယခုကဲ့သို့အလုပ်မျိုး မြန်မာနိုင်ငံတွင် မတွင်ကျယ်သေးသည့်အပြင် မြန်မာ နိုင်ငံရှိ တက္ကသိုလ်များတွင်လည်း စာကြည့်တိုက်ပညာကို စနစ်တကျ သင်ယူ၍ မရသေးပေ။ သို့ပါ၍ ဆရာကြီး ရွေးချယ်လိုက်သည့်လမ်းသည် အများ မလျှောက်သေးသည့် လမ်းသစ်ဖြစ် သည့်အတွက် တီထွင်ကြံဆစမ်းတဝါး စလျှောက်ခဲ့ရသည်။ အထူးအားထုတ် ကြိုးပမ်းဆောင်ရွက်ခဲ့ရသည်။ အခက် အခဲအမျိုးမျိုး၊ ဆူးငြောင့်ခလုတ် အသွယ်သွယ်တို့ကို ကျော်လွှားခဲ့ရသည်။

ဆရာကြီးသည် လူပုံ အေးဆေးတည်ငြိမ် ၍ စိတ်သဘောထားနူးညံ့ပျော့ပျောင်း သော်လည်း စာပေနှင့်ပတ်သက်လာလျှင် အလွန်သတ္တိရှိသော ပုဂ္ဂိုလ်ကြီး ဖြစ် သည်။ ဆရာကြီးကို ၁၉၈၀ ပြည့်နှစ်ခန့် တွင် အစိုးရဌာနတစ်ခု၌ ညွှန်ကြားရေးမှူးချုပ်ရာထူးပေးရန် သက်ဆိုင်ရာ လူကြီးများက စီမံခဲ့ဖူးသော်လည်း ဆရာ ကြီး၏ ပြင်းပြသော စာပေစိတ်ဓာတ် ကြောင့်ပင် မိမိဝါသနာကြီးမားသည့် စာကြည့်တိုက်မှူးဘဝကိုသာ နှစ်ခြိုက် သည့်အတွက် ငြင်းပယ်ခဲ့သည်။ ခေတ် အဆက်ဆက်တွင် မြန်မာနိုင်ငံသို့ မြန်မာ့ စာပေ၊ သမိုင်း၊ ဓလေ့ထုံးစံများ လေ့လာ ရန်ရောက်ရှိလာသော နိုင်ငံခြားသား ပညာရှင်များကို စာအုပ်စာပေအားဖြင့် များစွာ ကူညီပံ့ပိုးပေးနိုင်ခဲ့သည်။

ထို့ကြောင့် နိုင်ငံခြားသားပညာရှင်များ က ကြည်ညိုလေးစားကြ၏။ ဤသည် မှာ ဆရာ့သန္တာန်တွင် ကိန်းဝပ်နေသော မေတ္တာတရား၏ သင်္ကေတ ဖြစ်သည်။ ဆရာကြီးက လူလူချင်းဆက်ဆံသည့် အခါ ရိုးသားဖို့၊ စာနာတတ်ဖို့၊ နှိမ့်ချ တတ်ဖို့ လိုအပ်ကြောင်းနှင့် ထိုကဲ့သို့ တစ်ဦးကိုတစ်ဦး လေးလေးစားစား၊ မှန်မှန်ကန်ကန် ဆက်ဆံနိုင်ကြရင် သာယာသည့် လူမှု အသိုက်အဝန်းဖြစ် လာမှာ မလွဲမသွေဟုဆိုဆုံးမတတ်သူ ဖြစ်သည်။

၂၀၂၁ ခုနှစ်၊ ဩဂုတ်လအတွင်း ပြန်ကြားရေးဝန်ကြီးဌာန သတင်းနှင့်စာနယ်ဇင်းလုပ်ငန်း website တွင်ဖော်ပြထားသည်ကို ပြန်လည်ကူးယူဖော်ပြခြင်းဖြစ်ပါသည်။

ဆက်လက်ဖော်ပြပါမည်။

လေးစားစွာဖြင့်
#ငြိမ်းချမ်းခေတ်စာအုပ်ဆိုင် #ဦးသော်ကောင်း #စာကြည့်တိုက် #စာကြည့်တိုက်ပညာရှင် #အမျိုးသားစာပေဆု

Address

Nyein Chan Khit/484 Books Shop, သင်းဝင်လမ်းနှင့်လောပိတလမ်းထောင့် ၃၄ ရပ်ကွက် မ, Yangon 11421
Yangon

Telephone

09261778607

Website

Alerts

Be the first to know and let us send you an email when Nyein Chan Khit Books posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Nyein Chan Khit Books:

Shortcuts

Share

Category