03/04/2026
နဝမတန်း စနစ်ဟောင်း အောင်မြင်ထားတဲ့ CDM ကျောင်းသားတွေ BECA အစီအစဉ်မှာ စာရင်းသွင်းနိုင်ပြီ
မဲခေါင်၊ ဒီဇင်ဘာ ၁၅
နဝမတန်း စနစ်ဟောင်း အောင်မြင်ထားပြီး အသက် ၁၇ နှစ် မပြည့်သေးတဲ့ CDM ကျောင်းသားတွေအနေနဲ့ အခြေခံပညာ ပြီးမြောက်ကြောင်း စစ်ဆေးအကဲဖြတ်ခြင်း Basic Education Completion Assessment (BECA) အစီအစဉ်မှာ ဒီဇင်ဘာ ၅ ရက်က စတင်ပြီး တစ်လအတွင်း စာရင်းသွင်းနိုင်မှာ ဖြစ်တယ်လို့ သိရပါတယ်။
စာရင်းသွင်းမှုကို ဒီဇင်ဘာလ ၅ ရက်မှစပြီး တစ်လတိတိ ဖွင့်ထားပေးတာ ဖြစ်တယ်လို့ အမျိုးသား ညီညွတ်ရေး အစိုးရ၊ ပညာရေးဝန်ကြီးဌာန အောက်မှာရှိတဲ့ Myanmar Basic Education Home ရဲ့ လူမှုကွန်ရက် စာမျက်နှာမှာ ဖော်ပြထားတာပါ။
နဝမတန်း စနစ်ဟောင်း အောင်မြင်ထားပြီးတဲ့ ကျောင်းသားတွေအတွက် အသက်အရွယ် ကန့်သတ်ချက်ကို (၂၀၀၅ ဒီဇင်ဘာ ၃၁ ရက်အထိ) နောက်ဆုတ်ကာ ဖြေလျှော့ ဆောင်ရွက်ပေးထားတယ်လို့ သိရပါတယ်။
အသက် ၁၇ နှစ် မပြည့်သေးတဲ့ ကျောင်းသားတွေ အနေနဲ့ နဝမတန်း စနစ်ဟောင်း အောင်မြင်ပြီးကြောင်း အထောက်အထားအဖြစ် ကျောင်းသားကဒ်၊ မြို့နယ်ဘုတ် ထောက်ခံချက်၊ ကြားကာလ ကျောင်းထောက်ခံချက် နဲ့ မိမိကိုယ်တိုင် ကတိခံဝန်ချက် စတဲ့ အချက်တွေထဲက သက်သေ အနေနဲ့ ၃ ခု အထိ တွဲပေးနိုင်တယ်လို့လည်း သိရပါတယ်။
သက်သေ အထောက်အထား ထောက်ခံပေးမယ့်သူ မရှိပါက ကတိခံဝန်ချက် ပုံစံနဲ့သာ စာသားနဲ့ (သို့) လက်ရေးနဲ့ ကူးရေးပြီး ခံဝန်ချက်ပုံကို ပူးတွဲ တင်ပြနိုင်တယ်လို့ သိရပါတယ်။
“တတ်မြောက်မူအပေါ် မူတည်ပြီး အကဲဖြတ်ရမှာ၊ အဆင်ပြေတယ်ဆိုရင် ဒသမတန်း စနစ်ဟောင်းကိုလည်း ကြိုတင် လေ့လာစေချင်တယ်။ နားလည်ပြီး ကျွမ်းကျင်အောင် ရေးတတ်ဖတ်တတ် လက်တွေ့မှာလည်း အသုံးပြုနိုင်တယ်လို့” Myanmar Basic Education Home တာဝန်ရှိသူတစ်ဦးက ပြောပါတယ်။
အခြေခံပညာ ပြီးမြောက်ကြောင်း စစ်ဆေး အကဲဖြတ်ခြင်း Basic Education Completion Assessment (BECA) ဖြေဆိုခွင့်ကို https://mes.moeedu.org မှာ လျှောက်ထားနိုင်ပါတယ်။
တော်လှန်ရေးမှာ ပါဝင်နေသူတွေ၊ မသန်စွမ်းတွေ၊ စစ်ဘေးသင့် ပြည်သူတွေအတွက် သင့်လျော်မယ့် ကြားကာလ ဒါမှမဟုတ် တော်လှန်ရေးလွန်ကာလမှာ အထူးပညာသင်ကြားရေးနဲ့ စစ်ဆေးအကဲဖြတ် အသိအမှတ်ပြုရေး အစီအစဉ်တွေကို သီးသန့် အကောင်အထည်ဖော် ဆောင်ရွက်ပေးသွားမှာဖြစ်တယ်လို့လည်း အမျိုးသားညီညွတ်ရေးအစိုးရ၊ ပညာရေးဝန်ကြီးဌာနက ထုတ်ပြန်ထားပါတယ်။
ကျောင်းသား ကျောင်းသူတွေ အနေနဲ့ ဒသမတန်း စနစ်ဟောင်း သင်ခန်းစာတွေကို ကြိုတင် လေ့လာထားကြဖို့လည်း ပညာရေးဝန်ကြီးဌာနက တိုက်တွန်းထားပါတယ်။
MK-010
