10/09/2026
အမှာစာ
( ၁ )
ဤစာအုပ် (အမေရယ်၊ ကျမရယ်၊ တရုတ်ပြည်ရယ်) သည် ငန်းရိုင်းများ၏ နောက်ဆက်တွဲစာအုပ် Fly, Wild Swans: My Mother, Myself and China ကို မြန်မာပြန်ထားသောစာအုပ် ဖြစ်ပါသည်။
ငန်းရိုင်းများ(Wild Swans)၌ စာရေးသူ
ယုံချန်း၏ အဖွားနှင့် ယုံချန်း၏မိဖနှစ်ပါးအကြောင်းကို နောက်ခံထားကာ တရုတ်
ပြည်၏ မြေရှင်ပဒေသရာဇ်ခေတ်နှင့် ကွန်မျူနစ်ခေတ်အကြောင်းကို ရေးဖွဲ့သည်။ မော်စီတုန်းလက်ထက်ဖြစ်ပွါးသော ယဉ်ကျေးမှုတော်လှန်ရေးနှင့် ယင်း၏သက်ရောက်မှုများကို ဖော်ပြသည်။ ကျွန်တော်တို့ငယ်ငယ်က ဖတ်ခဲ့ စွဲခဲ့ရသည့် အဂ္ဂါစနိုး၏ ‘ ဘဝချင်းမတူသည့် တရုတ်ပြည် ( Red China Today: The Other Side of the River) ကို ချေဖျက်ခဲ့လေရာ ငန်းရိုင်းများသည် ကမ္ဘာမှာ အုတ်အော်သောင်းသဲဖြစ်ခဲ့သော စာအုပ်ဖြစ်သည်။
(ငန်းရိုင်းများကို လောကသစ်စာပေမှ ၂၀၁၂ ခုနှစ်က ဆရာကျော်အောင် မြန်မာပြန်ဆို ထုတ်ဝေခဲ့ပါသည်။ )
(၂ )
ယခုစာအုပ်၌ စာရေးသူယုံချန်းနှင့် သူ့မိခင် အကြောင်းကို အဓိကထား ရေးဖွဲ့ပါသည်။
ယုံချန်းသည် မော်ခေတ်အလွန် တိန့်ရှောင်ဖိန် လက်ထက်၌ စကောလားရှစ် ပညာသင်ဆုရကာ လန်ဒန်တက္ကသိုလ်တွင် ပညာဆည်းပူးခဲ့သည်။ ပီအိတ်ချ်ဒီဘွဲ့ရပြီး လန်ဒန်တက္ကသိုလ်မှာ စာပေပို့ချရင်း Wild Swans ကို ရေးခဲ့သည်။ (ယခုတော့ စာရေးဆရာဘဝကို လုံးလုံးလျားလျား ခံယူလိုက်ပြီဖြစ်သည်)
တရုတ်ပြည်တွင်လည်း ရှီကျင်းပင်က တရုတ်ကွန်မျူနစ်ပါတီ အထွေထွေ အတွင်းရေးမှူးဖြစ်လာသည်။
ယုံချန်းသည် တရုတ်ပြည်မှ မိခင်ဖြစ်သူထံ အခါအားလျော်စွာ သွားရောက်လည်ပတ်ရင်း မော်အတ္ထုပ္ပတ္တိကို ရေးသည်။ မော်အတ္ထုပ္ပတ္တိအတွကိ သုတေသနလုပ်ရင်း အထင်နှင့် လက်တွေ့ တခြားစီဖြစ်နေတာ တွေ့ရသည်။အထူးသဖြင့် အဂ္ဂါစနိုး၏ တရုတ်ပြည်ပေါ်မှ ကြယ်နီ( Red Star over China )သည် ဂျင်းတွေဖြစ်နေတာ တွေ့ရသည်။
မော်အတ္ထုပ္ပတ္တိ ထွက်လာသောခါ တရုတ်အစိုးရနှင့် ယုံချန်းမပြေမလည် ဖြစ်ရပုံ၊ ယင်း၏သက်ရောက်မှုများကို ယခုစာအုပ်၌ ဖော်ပြထားသည်။
( ၃ )
ဤစာအုပ်နိဂုံး၌ ယုံချန်းက ဤသို့ရေးခဲ့သည်။
၂၀၁၈ခုနှစ်မှာ ဥက္ကဌ ရှီကျင်းပင်သည် မော် လက်သစ် နိုင်ငံတစ်ခုတည်ထောင်ပြီး ကမ္ဘာ
ကို လွှမ်းမိုးရန် ရည်မှန်းချက်ရှိကြောင်း သိရသဖြင့် ကြောက်ရွံ့မှုက ကျမကို ပြန်လည် ခြောက်လှန့်လာခဲ့သော်လည်း နောက်ပိုင်းမှာ ပြေလျော့သွားခဲ့ပါသည်။ ဤရည်မှန်းချက် များမှာ နောက်ဆုံးတွင် ပျက်စီးရလိမ့်မည် ဟူသော ယုံကြည်ချက်က တိုး၍တိုး၍ သေချာလာခဲ့သည်။ တရုတ်ပြည်တွင် မော်စတိုင် လူ့အဖွဲ့အစည်းတစ်ရပ် ပြန်လည် တည်ဆောက်ဖို့ အထပ်ထပ်ကြိုးပမ်းမှုများက ကန့်သတ်ထားသော ရလဒ်သာ ထွက်ပေါ်ခဲ့ သည်။ ပြီးတော့ ပိုမို ကျယ်ပြန့်လာသော ကမ္ဘာမှာ လူများက ဤရည်မှန်းချက်များ တည်ရှိခြင်းနှင့် ယင်းတို့၏အာဏာရှင် ဆန်သော သဘာဝကို သတိပြုမိလာကြသည်။ လူအများအပြားက ယင်းကို ဖယ်ရှားရန် ကြိုးစားလာကြသည်။ မော်ဝါဒသည် ဘယ်လို ပုံသဏ္ဍာန်နှင့်လာစေကာမူ ဒီမိုကရေစီကို အနိုင်ရမည် မဟုတ်။ ဤအချက်ကို ကျမ နှစ်နှစ်ကာကာ ယုံကြည်ပါသည်။’
ဆိုလိုတာက ရှီကျင်းပင်သည် မော်လက်သစ်ဝါဒ ကို တရုတ်ပြည်၌ တည်ဆောက်နေသည်။ ဒါပေမဲ့ အောင်မြင်မှာ မဟုတ်ဘူးဟု ယုံချန်းက ပြောခြင်းဖြစ်သည်။
(၄)
အမေရယ်၊ ကျမရယ်၊ တရုတ်ပြည်ရယ်ကို မြန်မာပြန်ပြီးသောခါ ‘ ငန်းရိုင်းများ၏ ပျံသန်းမှု ခရီးစဉ် ဤတွင်ပြီးဆုံးပါပြီ’ ဟု ကျွန်တော်မှတ်ချက်ရေးခဲ့သည်။
သို့ရာတွင် ငန်းရိုင်းများ၏ ပျံသန်းမှု တကယ်ပဲ ပြီးဆုံးသွားပြီလား။ တစ်ဘက်တွင် အာဏာနီ တည်ဆောက်လိုသော အုပ်စု၊ အခြားတဘက်တွင် ယုံချန်းတို့လို လစ်ဘရယ် ဒီမိုကရေစီသမားများ။ ပြီးတော့ ကမ္ဘာ့ အနေအထား အခင်းအကျင်းများက ရှေ့မှာ ဘယ်လို ဖြစ်လာမလဲ။
ယင်းအခြေအနေများက ငန်းရိုင်းများ ဆက်လက် ပျံသန်းနေ ရဦးမလား ဆိုတာကို ပြဌာန်းပေးလိမ့်မည်ဟု ယူဆမိပါကြောင်း။
မင်းကျော်စွာ
