Yoyarlay

Yoyarlay သတင်းများစုစည်းရာ ရိုးရာလေးအွန်လိုင်းစာမျက်နှာ
(1165)

ရိုးရာလေး သတင်းစာမျက်နှာမှ စာပေ အနုပညာ မြတ်နိုးသူများ၊ မြန်မာ့အရေးနှင့် နိုင်ငံတကာအရေး စိတ်ဝင်စားသူများ၊ ကျန်းမာရေး လိုက်စားသူများ၊ ဖက်ရှင်နှင့် အလှဒီဇိုင်း ဖန်တီးသူများ၊ အိုင်တီ ပညာရှင်များ အားလုံးအတွက် အသုံးဝင်ပြီး အကျိုးရှိစေမည့် လတ်တလော သတင်းများကို သုတ ရသ ကဏ္ဍ စုံလင်စွာဖြင့် ထည့်သွင်းပေးထားပါသည်။

စီးပွားရေး လုပ်ငန်းရှင်များ အတွက် မိမိတို့ ပစ္စည်းများကို ဈေးကွက်၌ ရောင်းလိုအား ပိုမို ကောင်းမွန

်စေရန် အတွက် ကြော်ငြာ ထည့်သွင်းခြင်းများနှင့် မိမိတို့ လုပ်ငန်း အတွက် အလုပ်ကြော်ငြာ ထည့်သွင်းခြင်းများကိုလည်း ရိုးရာလေး သတင်းစာမျက်နှာရှိ ကြော်ငြာ ထည့်သွင်းမည့် နေရာများတွင် ကြော်ငြာ ထည့်သွင်းနိုင်ရန် ဖန်တီးပေးထားပါသည်။

အသုံးပြုသူများ အားလုံး တနေ့တာ စိတ်အပန်းဖြေ အမောပြေစေရန် အတွက် ရိုးရာလေး သတင်းစာမျက်နှာကို ဝင်ရောက် ကြည့်ရှုခြင်းဖြင့် သင့်ဘဝအတွက် အတွေးအမြင်သစ်များ တိုးတက်မှု ရရှိစေမှာဖြစ်ပါသည်။ ရိုးရာလေး သတင်းစာမျက်နှာမှ အားလုံးအတွက် အကျိုးရှိစေမည့် အစီအစဉ်များကို တင်ဆက်ပေးအုံးမှာဖြစ်လို့ အားပေးကြပါအုံးနော်။

Team (ရိုးရာလေး)
www.yoyarlay.com

ကွင်းထိုးဖိနပ်၊ စကတ်နဲ့ ပြိုင်ပွဲဝင်ပြီး အယ်ထရာမာရသွန်မှာ ရွှေတံဆိပ်ဆု ရခဲ့တဲ့ မက္ကဆီကိုတိုင်းရင်းသူနည်းပြနဲ့ စနစ်တကျ လေ...
07/08/2025

ကွင်းထိုးဖိနပ်၊ စကတ်နဲ့ ပြိုင်ပွဲဝင်ပြီး အယ်ထရာမာရသွန်မှာ ရွှေတံဆိပ်ဆု ရခဲ့တဲ့ မက္ကဆီကိုတိုင်းရင်းသူ

နည်းပြနဲ့ စနစ်တကျ လေ့ကျင့်ခဲ့တာမျိုး မရှိဘူး။ အသင်းအဖွဲ့လည်း မရှိဘူး။ ယုတ်စွအဆုံး အပြေးဖိနပ်တောင် မရှိခဲ့ဘူး။ ဒါပေမဲ့ သူက ၅၁ မိုင်ကျော် ပြေးရတဲ့ အယ်ထရာမာရသွန်ပြိုင်ပွဲမှာ ရွှေတံဆိပ်ဆု ဆွတ်ခူးခဲ့ပြီး စိတ်ပိုင်းဖြတ်မှုက အဓိက အရေးကြီးကြောင်း ပြသခဲ့ပါတယ်။

မက္ကဆီကိုနိုင်ငံမြောက်ပိုင်း ချီဟွာဟွာပြည်နယ်မှာ နေထိုင်တဲ့ ရာရာမူရီတိုင်းရင်းသူတစ်ဦးဖြစ်တဲ့ ရီဗာရာမို့စ်ဟာ လျှိုမြောင်၊ တောင်ကြားတွေထဲ သွားလာလှုပ်ရှားမှုနဲ့ ကျင့်သားရနေသူပါ။ သူဟာ ဝေးလံလွန်းတဲ့ ခရီးကြမ်းတွေကို ခြေညှပ်ဖိနပ်နဲ့ သွားလာနေကျဖြစ်လို့ သက်လုံ ကောင်းတာကလည်း အားသာချက် ဖြစ်ခဲ့ပါတယ်။

ရီဗာရာမို့စ်ဟာ သူ့အိမ်ကနေ ပြိုင်ပွဲကျင်းပမယ့် တာထွက်နေရာကို ရောက်ဖို့ ၁၄ နာရီတိုင်တိုင် လမ်းလျှောက်လာခဲ့ရပြီး ၆၃ ကီလိုမီတာ (၅၁.၅၇ မိုင်) အကွာအဝေးရှိတဲ့ Canyon Ultra Marathon ပြိုင်ပွဲမှာ ၇ နာရီ၊ ၃၄ မိနစ်နဲ့ ပထမဆုံး ပန်းဝင်ခဲ့တာပါ။

ဂွာချိုချီမြို့မှာ နှစ်စဉ်နှစ်တိုင်း အယ်လ်ထရာမာရသွန်ပြိုင်ပွဲ ကျင်းပလေ့ရှိတဲ့အကြောင်း သတင်းကြားရတဲ့ ရီဗာရာမို့စ်ဟာ ပြိုင်ပွဲဝင်သူတွေ လည်ပင်းမှာ ဆွဲလာကြတဲ့ ဆုတံဆိပ်ကို လိုချင်လို့ လာပြိုင်တာဖြစ်ကြောင်း မီဒီယာတွေ့ဆုံ မေးမြန်းမှုမှာ ဖြေဆိုခဲ့ပါတယ်။

'' နှစ်တိုင်း ပြိုင်ပွဲရှိတာ သိတယ်။ တစ်ခါမှတော့ မပြိုင်ဖြစ်ခဲ့လို့ ဒီနှစ် လာပြိုင်တာပါ။ ပြီးခဲ့တဲ့ဧပြီလကတည်းက စာရင်းပေးထားတာပါ။ ဒီအောင်ပွဲက မိသားစုအတွက် ရည်စူးပါတယ်''လို့ ရီဗာရာမို့စ်က ဆိုပါတယ်။ သူဟာ ပထမဆုရတဲ့အတွက် ဆုကြေးငွေ ပီဆို ၇၀၀၀ ( အမေရိကန်ဒေါ်လာ ၃၇၀) ရရှိခဲ့ပါတယ်။

ရီဗာရာမို့စ်ဟာ မာရသွန်ပြိုင်ပွဲတစ်ခုမှာ အောင်ပွဲရခဲ့ရုံသာ မကပါဘူး။ ဒီလိုပြိုင်ပွဲမှာ အနိုင်ရဖို့ဆိုရင် ငွေကြေးအင်အား၊ နည်းစနစ်တကျ သင်ကြားမှု၊ အတွေ့အကြုံ လိုအပ်တယ်ဆိုတဲ့ အစဉ်အလာ အယူအဆတစ်ရပ်ကိုပါ ချိုးဖျက်ပြခဲ့တာပါ။

Ref: Indigenous Runner Wins 63K Ultramarathon After Walking 14 Hours To Make It to the Starting Line

Team ( ရိုးရာလေး)

ရေကြီးရေလျှံမှုအတွင်း ဘူဒိုဇာနဲ့ လူ ၁၀၀ ကျော်ကို ကယ်တင်ခဲ့တာကြောင့် ဘူဒိုဇာသူရဲကောင်းလို့ နာမည်ပြောင်ရရှိခဲ့သူအမျိုးသားတ...
07/08/2025

ရေကြီးရေလျှံမှုအတွင်း ဘူဒိုဇာနဲ့ လူ ၁၀၀ ကျော်ကို ကယ်တင်ခဲ့တာကြောင့် ဘူဒိုဇာသူရဲကောင်းလို့ နာမည်ပြောင်ရရှိခဲ့သူ

အမျိုးသားတစ်ယောက်ဟာ မိုးသည်းထန်စွာရွာသွန်းမှုကြောင့် ရေကြီးရေလျှံဖြစ်မှုအတွင်း လူပေါင်း ၁၀၀ ကျော်ကို မြေထိုးစက် (ဘူဒိုဇာ) နဲ့ ကယ်တင်ခဲ့တာကြောင့် ဘူဒိုဇာသူရဲကောင်းဖြစ်လာခဲ့ပါတယ်။ သူကတော့ ပေကျင်းမြို့က ဝမ်ထန်ယွီဆိုတဲ့ အသက် ၃၅ နှစ်အရွယ် ဆောက်လုပ်ရေးကုမ္ပဏီပိုင်ရှင်ပါ။

ဇူလိုင်လ ၂၈ ရက်နေ့က ဝမ်ထန်ယွီဟာ သူ့သူငယ်ချင်းဆီက ဖုန်းလာလို့ အိပ်နေရာကနေ နိုးလာခဲ့ပါတယ်။ သူ့သူငယ်ချင်းက ရွာတစ်ရွာမှာ ပိတ်မိနေတဲ့ သူ့မိသားစုကို ကယ်တင်ဖို့ အကူအညီလိုနေတယ်လို့ ပြောလာခဲ့တာပါ။ ဝမ်က ချက်ချင်းပဲ သူ့ကုမ္ပဏီက ဘူဒိုဇာကို မောင်းချလာခဲ့ပြီး လမ်းမှာ သူ့သူငယ်ချင်းကို ဝင်ခေါ်သွားခဲ့ပါတယ်။ ရွာမှာရှိတဲ့ ရေက အနည်းဆုံး ၁ မီတာမြင့်တက်နေပါတယ်။ သူတို့သူငယ်ချင်းနှစ်ဦးက လမ်းတစ်လျှောက်မှာ ရှိတဲ့ ရွာသူရွာသားတွေကို ခေါ်သွားခဲ့ပါတယ်။ တချို့က အမိုးပေါ်က တက်လိုက်ကြပြီး တချို့ကတော့ ဘူဒိုဇာရဲ့ဂေါ်ပြားအတွင်းက လိုက်ကြပါတယ်။

ဝမ်က ဘူဒိုဇာနဲ့ ကယ်တင်တာ လူ ၁၀၀ ကျော်ရှိတယ်။ တစ်ခါကယ်ရင် လူ ၁၀ ဦးရှိတယ်လို့ ဆိုပါတယ်။ ဝမ်က ကယ်ဆယ်ရေးကို မီးသတ်သမားတွေနဲ့ လုပ်ဆောင်ခဲ့တာပါ။ ဘူဒိုဇာက လူတော်တော်များများကို အချိန်မီကယ်ထုတ်နိုင်စေခဲ့တယ်လို့ မီးသတ်ဌာနအကြီးအကဲကလည်း ပြောပါတယ်။

ရေလွှမ်းမိုးမှုကြောင့် ဘူဒိုဇာက အကြိမ်ပေါင်းများစွာ ရေနစ်မြုပ်လုနီးပါးဖြစ်တဲ့အတွက် ဝမ်က ကြောက်စိတ်တော့ဖြစ်မိခဲ့ပါတယ်။ ရေတွေကလည်း ယာဉ်မောင်းခန်းထဲကို စီးဝင်ပါတယ်။ သူဟာ အဲ့ဒီနေ့က မနက် ၆ နာရီကနေ ည ၇ နာရီအထိ မရပ်မနား ကယ်ဆယ်ရေးတွေလုပ်ခဲ့တာပါ။ သူ့ရဲ့အခုလိုလုပ်ရပ်အတွက် ဘူဒိုဇာသူရဲကောင်းလို့ နာမည်ပြောင်ရလာခဲ့ပါတယ်။

Ref: China ‘Bulldozer Hero’ saves over 100 flood victims during heavy rain that lashes Beijing

Team (ရိုးရာလေး)

စာပို့သမားနဲ့ သူ စာပို့ရာလမ်းကြောင်းတစ်နေရာက ခွေးလေးတို့ကြား သံယောဇဉ်စာပို့သမားတစ်ဦးဟာ သူ စာပို့ရာလမ်းကြောင်းတစ်နေရာက ခွ...
07/08/2025

စာပို့သမားနဲ့ သူ စာပို့ရာလမ်းကြောင်းတစ်နေရာက ခွေးလေးတို့ကြား သံယောဇဉ်

စာပို့သမားတစ်ဦးဟာ သူ စာပို့ရာလမ်းကြောင်းတစ်နေရာက ခွေးလေးတစ်ကောင်အပေါ် သံယောဇဉ်ဖြစ်သွားခဲ့ပြီး ခွေးပိုင်ရှင် သေဆုံးတော့ အဲ့ဒီခွေးလေးကို မွေးဖို့ ဖြစ်လာခဲ့ပါတယ်။ စာပို့သမား အီအန် ဘာ့ခ်ဆိုတဲ့ စာပို့သမားက စာပို့ရင်း Floyd လို့ခေါ်တဲ့ တက်ကြွတဲ့ခွေးကလေးနဲ့ လွန်ခဲ့တဲ့ ၃ နှစ်က တွေ့ဆုံခဲ့တာပါ။ Floyd က သူ စာလာပို့ရင်း သူ့နောက်ကို ပြေးလိုက်လေ့ရှိပါတယ်။

နောက်တော့ အီအန်နဲ့ Floyd ကြား ခင်မင်ရင်းနှီးလာခဲ့ပါတယ်။ Floyd ရဲ့ပိုင်ရှင်က ဗီယက်နမ်စစ်မှုထမ်းဟောင်းတစ်ဦးဖြစ်တယ်ဆိုတာကို သိခဲ့ရပါတယ်။ Floyd ရဲ့နာမည်အရင်းက Pretty Boy Floyd ဖြစ်ပြီး ၁၉၃၀ ခုနှစ်ရဲ့ဘဏ်ဖောက်ထွင်းသူရဲ့နာမည်ကို ပေးထားတာပါ။

Floyd က အီအန်ကို ပွေ့ဖက်ရတာနှစ်သက်တယ်။ အရင်က သိခဲ့ကြတဲ့ သူငယ်ချင်းတစ်ယောက်လို ပြုမူလေ့ရှိပါတယ်။ ဒါပေမဲ့ လွန်ခဲ့တဲ့ ၁ နှစ်ကျော်လောက်မှာ အီအန်က စာပို့တဲ့လမ်းကြောင်းပြောင်းသွားတော့ ပုံမှန်သွားနေကျနေရာကို မသွားဖြစ်တော့ဘဲ Floyd နဲ့ မတွေ့ဖြစ်တော့ပါဘူး။ အခုနှစ် မေလမှာတော့ အီအန်က အခြားစာပို့သမားဆီကနေ Floydရဲ့သခင် ဆုံးသွားပြီး Floydက တိရစ္ဆာန်ဂေဟာမှာ နေနေရတယ်ဆိုတာကို သိခဲ့ရပါတယ်။

Floyd ကို တိရစ္ဆာန်ဂေဟာမှာ မနေစေချင်တာကြောင့် တိရစ္ဆာန်ဂေဟာကို သွားပြီးတော့ Floyd ကို မွေးစားဖို့လုပ်ခဲ့ပါတယ်။ Floyd ကို မွေးမယ့်သူမရှိသေးတာ အီအန်အတွက် ကံကောင်းသွားခဲ့ပါတယ်။ အခုဆို အီအန်က Floydနဲ့အတူရှိနေပါပြီ။

Ref: Mailman adopts longtime dog on his North Texas route after owner dies

Team (ရိုးရာလေး)

ကာလတို မှတ်ဉာဏ်ပျောက်ဆုံးခြင်းဆိုတာ ဘာလဲ?အခုလေးတင် မြင်လိုက်၊ ကြားလိုက်၊ လုပ်လိုက်တဲ့အရာတစ်ခုကို ခဏနေတော့ မေ့သွားတာမျိုး...
07/08/2025

ကာလတို မှတ်ဉာဏ်ပျောက်ဆုံးခြင်းဆိုတာ ဘာလဲ?

အခုလေးတင် မြင်လိုက်၊ ကြားလိုက်၊ လုပ်လိုက်တဲ့အရာတစ်ခုကို ခဏနေတော့ မေ့သွားတာမျိုး ဖြစ်ဖူးလား၊ ကိုယ့်ကိုယ်ကိုယ် သတိထားမိလား။ ဒါဆိုရင်တော့ သင့်မှာ ကာလတို မှတ်ဉာဏ်ပျောက်ဆုံးတဲ့ လက္ခဏာရှိနေနိုင်ပါတယ်။ အသက်ကြီးတဲ့သူတွေ၊ အလုပ်အရမ်းများတဲ့သူတွေမှာတော့ မေ့တတ်တဲ့အကျင့်ရှိတာ သိပ်ပြဿနာမရှိပေမဲ့ ဒါဟာ တခြားသော စိတ်နဲ့ခန္ဓာ ကျန်းမာရေးပြဿနာတွေရဲ့ နောက်ဆက်တွဲ လက္ခဏာလည်း ဖြစ်နိုင်ပါတယ်။

ကာလတို မှတ်ဉာဏ်ပျောက်ဆုံးခြင်းရဲ့ လက္ခဏာတွေက ဘာတွေလဲ?

ရုတ်တရက်ဖြစ်ပျက်ခဲ့တဲ့ အကြောင်းအရာ၊ အခြေအနေတွေကို မေ့သွားတတ်တာ၊ စဉ်းစားလို့ မပေါ်တော့တာကို ခေါ်တာဖြစ်ပါတယ်။ အတွေ့များတဲ့ ရောဂါလက္ခဏာတွေကတော့

မေးပြီးသားမေးခွန်းကို ထပ်ခါတလဲလဲ ပြန်မေးတတ်တာ-

အခုလေးတင် ထားခဲ့လိုက်တဲ့ ပစ္စည်းကို ဘယ်နားမှာထားခဲ့မှန်း စဉ်းစားရခက်တာ
လတ်တလော ဖြစ်ပျက်နေတဲ့ အကြောင်းအရာတွေကို မေ့လွယ်တာ အစရှိတာတွေပဲ ဖြစ်ပါတယ်။

ဘာကြောင့် မကြာခဏ မေ့တတ်လာတာလဲ?

အသက်ကြီးလာတာ၊ အယ်လ်ဇိုင်းမားရောဂါ အစပျိုးလာတာ၊ ဦးနှောက်အကျိတ်၊ ဦးနှောက်တွင်း သွေးထွက်နေတာ သို့မဟုတ် သွေးခဲပြီး ပိတ်ဆို့နေတာ၊ ဦးခေါင်းကို ပြင်းထန်စွာ ထိခိုက်မိတာ၊ ဦးနှောက်တွင်း သို့မဟုတ် ပတ်ပတ်လည်မှာ ရောဂါပိုးဝင်နေတာ၊ စိတ်ကျရောဂါ၊ စိတ်ဖိစီးမှု၊ စိုးရိမ်ပူပန်ခြင်း အစရှိတဲ့ စိတ်ကျန်းမာရေးပြဿနာတွေ၊ ဦးနှောက်တစ်သျှူးကို ထိခိုက်ပျက်စီးစေတဲ့ ပါကင်ဆန်ရောဂါ၊ လိုအပ်တဲ့ ဗီတာမင်နဲ့ သတ္တုဓာတ်တွေကို ကိုယ်ခန္ဓာက ပြည့်ဝစွာ မရရှိတာ၊ အိပ်ချိန်နည်းတာ၊ တချို့သော ရောဂါပျောက်ဆေးတွေကြောင့် ကာလတို မှတ်ဉာဏ်ပျောက်ဆုံးခြင်း ဖြစ်နိုင်ပါတယ်။

ကိုယ့်မှာ ဒီပြဿနာရှိနေပြီဆိုတာ သေချာလား?

မကြာခဏ မေ့တတ်တယ်ဆိုတာ ကိုယ့်မှာ ဒီပြဿနာရှိတယ်ဆိုတာ ဟုတ်ချင်မှ ဟုတ်မှာပါ။ အကောင်းဆုံးကတော့ ကိုယ်ပုံမှန်ပြနေကျ ဆရာဝန်ဆီမှာ ကိုယ့်ရဲ့ မေ့တတ်တဲ့လက္ခဏာတွေနဲ့ ဖြစ်တာဘယ်လောက်ကြာပြီဆိုတာ ပြောပြဖို့ လိုပါတယ်။

တစ်ဆက်တည်းမှာပဲ ကိုယ့်ရဲ့ ကျန်းမာရေးနဲ့ နေထိုင်စားသောက်မှုပုံစံ၊ လတ်တလော ဦးခေါင်းနဲ့ ဦးနှောက်ကို ထိခိုက်မိတာ၊ ဖျားနာခြင်းရှိ၊ မရှိ၊ သောက်နေတဲ့ ဆေးဝါးတွေ၊ အရက်ပမာဏ ဘယ်လောက်သောက်လဲ၊ စိတ်ကျန်းမာရေးပြဿနာတွေနဲ့ အိပ်ချိန် မှန်၊ မမှန်ကို ဆရာဝန်ကို မေးသွားမှာဖြစ်ပြီး လိုအပ်ရင် သွေးဖောက်စစ်တာ၊ တခြားကိုယ်တွင်းအင်္ဂါ စစ်ဆေးမှုတွေပါ ပြုလုပ်ပေးသွားမှာပါ။

ကိုယ့်မှာရှိနေတဲ့ ကျန်းမာရေးပြဿနာတွေနဲ့ ကာလတိုမှတ်ဉာဏ် ပျောက်ဆုံးမှုကို ဖြစ်စေတဲ့ အကြောင်းရင်းကို ရှာဖွေပြီးမှသာ စိတ်ကျန်းမာရေး ဆရာဝန် သို့မဟုတ် ရောဂါအထူးကုဆရာဝန်နဲ့ ပြသဖို့ ညွှန်ပေးမှာ ဖြစ်ပါတယ်။ ကာလတို မှတ်ဉာဏ်ပျောက်ဆုံးမှုကို မကုသဘဲ ပစ်ထားလိုက်မယ်ဆိုရင် သူ့အလိုလို ပျောက်ကင်းသွားတာမျိုး ရှိသလို အယ်လ်ဇိုင်းမားရောဂါ၊ ပါကင်ဆန်ရောဂါလိုမျိုး မှတ်ဉာဏ်နဲ့ အသိစိတ်ပျောက်ဆုံးတဲ့ ပြဿနာတွေပါ ဖြစ်လာနိုင်တာကြောင့် ပေါ့ဆလို့တော့ မဖြစ်ပါဘူး။

အလွယ်တကူ ကုသလို့ ရတဲ့ အိမ်တွင်းနည်းလမ်းတွေရော ရှိလား?

ပုံမှန်သတိမေ့တာကိုတော့ ကိုယ့်ရဲ့ နေထိုင်စားသောက်မှုပုံစံကို ပြင်လိုက်ရုံနဲ့ ပျောက်ကင်းသွားစေနိုင်ပါတယ်။ ကျန်းမာရေးနဲ့ ညီညွတ်ပြီး အာဟာရလည်းရှိတဲ့ အစားအစာတွေကို မျှတစွာ စားသုံးမယ်။ ဆေးလိပ်၊ အရက်၊ ကဖင်းဓာတ်ပါတဲ့ ဖျော်ရည်တွေကို လျှော့သောက်မယ်။ ညဘက်အိပ်ချိန်ဟာ တစ်နေ့ ၇ နာရီအနည်းဆုံး ရှိရမယ်။ တစ်နေရာထဲမှာ မလှုပ်မယှက်နဲ့ အကြာကြီးထိုင်နေတာမျိုးထက် လှုပ်လှုပ်ရှားရှား တက်တက်ကြွကြွဖြစ်အောင် နေရမယ်။ လေ့ကျင့်ခန်းကို ပုံမှန်လုပ်ပေးရမယ်။ ဖြည့်စွက်အားဆေးအနေနဲ့ ငါးကြီးဆီ၊ ဗီတာမင် ဘီ-၁၂ အားဆေးတွေကို သောက်ပေးလို့လည်း ရပါတယ်။ ဦးနှောက်ကို အနားပေးမယ်၊ အားတဲ့အချိန်မှာ ဦးနှောက်အလုပ်လုပ်စေမယ့် ပဟေဠိ ကစားနည်းလေးတွေ ကစားပေးမယ်ဆိုရင် ခဏခဏ မေ့တတ်တဲ့ အကျင့်ကို ပျောက်သွားအောင် ကူညီပေးနိုင်မှာပါ။

Team ( ရိုးရာလေး)

အပတ်စဉ် ဗုဒ္ဓဟူးနေ့ ညတိုင်း တင်ဆက်ပေးသွားမယ့် '' တွေးကြည့် ဖြေကြည့် '' အစီအစဉ်ရဲ့ ပထမဆုံးဉာဏ်စမ်းအဖြစ် နံပါတ် (၅) ခုမြော...
06/08/2025

အပတ်စဉ် ဗုဒ္ဓဟူးနေ့ ညတိုင်း တင်ဆက်ပေးသွားမယ့် '' တွေးကြည့် ဖြေကြည့် '' အစီအစဉ်ရဲ့ ပထမဆုံးဉာဏ်စမ်းအဖြစ် နံပါတ် (၅) ခုမြောက် နာရီရဲ့ အချိန်ကို ဖြေဆိုပေးရမှာပါ။ နောက်တစ်ပတ် ဒီအစီအစဉ်ရဲ့ ပထမဆုံး ကော့မန့်မှာ အဖြေတိုက်ကြမယ်နော်။

Team ( ရိုးရာလေး)

ကုန်းကြောင်း၊ လေကြောင်း၊ ရေကြောင်း ၃ မျိုးလုံးဖြင့် ကမ္ဘာပတ်နိုင်တဲ့ ပထမဆုံးအဖြစ် မှတ်တမ်းဝင်ဖို့ ကြိုးစားနေသူဗြိတိန်နို...
06/08/2025

ကုန်းကြောင်း၊ လေကြောင်း၊ ရေကြောင်း ၃ မျိုးလုံးဖြင့် ကမ္ဘာပတ်နိုင်တဲ့ ပထမဆုံးအဖြစ် မှတ်တမ်းဝင်ဖို့ ကြိုးစားနေသူ

ဗြိတိန်နိုင်ငံသား ဂျိမ်းစ်ကက်ချယ်ဟာ သူ့ရဲ့ရွက်လှေကို ဟမ်ရှိုင်းယားဆိပ်ကမ်းကနေ စတင်ထွက်ခွာခဲ့ပြီဖြစ်ပြီး ကုန်းကြောင်း၊ လေကြောင်း၊ ရေကြောင်း ၃ မျိုးလုံးဖြင့် ကမ္ဘာပတ်နိုင်တဲ့ ပထမဆုံးလူသားအဖြစ် မှတ်တမ်းဝင်ဖို့ ကြိုးစားနေပါပြီ။

ဂျိမ်းစ်ကက်ချယ်ဟာ မိုင် ၃၀၀၀၀ အကွာအဝေးရှိပြီး ၉ လ ကြာမြင့်မယ့်ခရီးကို တစ်ကိုယ်တော်ခရီးနှင်မှာ ဖြစ်ပါတယ်။ ကက်ချယ်ဟာ ၂၀၁၃ ခုနှစ်က ကမ္ဘာတစ်ပတ် စက်ဘီးစီးခဲ့သူဖြစ်ပြီး ၂၀၁၉ ခုနှစ်က gyrocopter ရဟတ်ယာဉ်ငယ်နဲ့အတူ ၆ လအတွင်း လေကြောင်းခရီးစဉ် ၁၂၂ ခု မောင်းနှင်ကာ ကမ္ဘာပတ်ခဲ့သူပါ။ ကက်ချယ်ဟာ ၂၀၂၄ ခုနှစ်က ကမ္ဘာတစ်ပတ် ရွက်လွှင့်ဖို့ ပထမအကြိမ် ကြိုးပမ်းခဲ့ပေမဲ့ မအောင်မြင်ခဲ့ဘဲ အခုတစ်ကြိမ် ထပ်မံကြိုးပမ်းတာ ဖြစ်ပါတယ်။

Ref: British Adventurer Sets Sail to Become First Person to Circumnavigate the Globe by Land, Air and Sea

Team ( ရိုးရာလေး)

ကောလိပ်ဝင်ခွင့်လက်ခံကြောင်းစာရပြီးနောက် ကိုမာဖြစ်နေရာကနေ ပြန်နိုးလာခဲ့တဲ့ ဆယ်ကျော်သက်ကောင်မလေးနှလုံးပိုးဝင်ပြီး ကိုမာဖြစ...
06/08/2025

ကောလိပ်ဝင်ခွင့်လက်ခံကြောင်းစာရပြီးနောက် ကိုမာဖြစ်နေရာကနေ ပြန်နိုးလာခဲ့တဲ့ ဆယ်ကျော်သက်ကောင်မလေး

နှလုံးပိုးဝင်ပြီး ကိုမာဖြစ်သွားခဲ့တဲ့ ဆယ်ကျော်သက်ကောင်မလေးတစ်ဦးဟာ ကောလိပ်ဝင်ခွင့်လက်ခံကြောင်းစာရကြောင်း သူ့အဖေ ပြောပြပြီးတဲ့နောက်မှာ ပြန်နိုးလာခဲ့ပါတယ်။ အဲ့ဒီကောင်မလေးဟာ ဟယ်နန်ပြည်နယ်က အသက် ၁၈ နှစ်အရွယ် ကျန်ချန်နန်ဆိုသူပါ။

ချန်နန်က ဇွန်လမှာ အမျိုးသားကောလိပ်ဝင်ခွင့်စာမေးပွဲဖြေဆိုပြီး ဇူလိုင် ၁၁ ရက်နေ့မှာ အဖျားတတ်ပြီး ရင်ဘတ်အောင့်လို့ ဆေးရုံတက်ခဲ့ရပါတယ်။ ဆရာဝန်တွေက ချန်နန်မှာ ပြင်းထန်တဲ့ နှလုံးပိုးဝင်ခြင်းကို စစ်ဆေးတွေ့ရှိခဲ့ရပါတယ်။ အခုလိုဖြစ်ရတဲ့ အကြောင်းအရင်းအတိအကျကို မသိရပါဘူး။

အခြားဆေးရုံတစ်ခုကို ပြောင်းရွေ့ပြီးတဲ့နောက် ချန်နန်က ကိုမာဖြစ်သွားခဲ့ပြီး အထူးကြပ်မတ်ကုသဆောင်မှာ နှလုံး-အဆုတ်အတုထောက်ပံ့စက်နဲ့ အသက်ဆက်ရှင်နေခဲ့ပါတယ်။ ချန်နန်တို့မိသားစုက ငွေကြေးခက်ခဲကြပါတယ်။ အဖေဖြစ်သူဟာ ၂၀၂၃ခုနှစ်က ကားမတော်တဆမှုကြောင့် ထိခိုက်ဒဏ်ရာရခဲ့ပြီး အကြွေးတင်ခဲ့သလို လမ်းလျှောက်ရခက်လို့ အိမ်မှာပဲ အနားယူနေခဲ့ရတာပါ။ မိခင်ဖြစ်သူက လမ်းဘေးမှာ ဈေးရောင်းပါတယ်။ ချန်နန်ရဲ့ဆေးကုသစရိတ်က ကန်ဒေါ်လာ ၂၈၀၀၀ ရရှိသွားပါပြီ။

ကိုမာဖြစ်ပြီး ၈ ရက်မြောက်မှာ ချန်နန်ရဲ့အဖေက ကောလိပ်ဝင်ခွင့်လက်ခံကြောင်းစာရရှိခဲ့ပြီး ဆေးရုံကို ယူသွားကာ "အဖေတို့အားလုံး အရမ်းပျော်တာပဲ...သမီးလေး တက္ကသိုလ်တက်ရပြီ"လို့ ပြောလိုက်ပါတယ်။ အဲ့ဒီအချိန်မှာ ချန်နန်ရဲ့မျက်ခွံတွေ လှုပ်နေတာကို မြင်ခဲ့ရပြီး မိသားစုအတွက် မျှော်လင့်ချက်ရှိလာခဲ့ပါတယ်။

နောက်နေ့ရောက်တော့ ချန်နန်က ကိုမာကနေ ပြန်နိုးလာခဲ့ပြီး သူ့မိဘတွေနဲ့ Video Call တောင် ခေါ်ခဲ့ကြပါတယ်။ ပြန်နိုးလာခါစမို့ စကားပြောရမှာ ခက်ခဲနေတုန်းပါပဲ။ ချန်နန်ရဲ့နှလုံးလုပ်ဆောင်ချက်က အပြည့်အဝပြန်လည်ကောင်းမွန်လာပြီး သူ့ရဲ့အခြေအနေက တည်ငြိမ်သွားခဲ့ပြီလို့ ဆရာဝန်က ပြောပါတယ်။

ချန်နန်ကို အထူးကြပ်မတ်ဆောင်ကနေ ပုံမှန်ကုသဆောင်ကို ပြောင်းလိုက်ပါပြီ။ စက်တင်ဘာလမှာ ကောလိပ်စတတ်ဖို့ မျှော်လင့်ရပါတယ်။ ချန်နန်က Huanghe Transportation University ကို တက်ခွင့်ရတာဖြစ်ပါတယ်။ သူတို့ ဘယ်လောက်ငွေကြေးခက်ခဲပါစေ။ တက္ကသိုလ်တက်ဖို့က ချန်နန်ရဲ့အိပ်မက်ဖြစ်တာကြောင့် တက္ကသိုလ်ထားပေးမှာပါလို့ ချန်နန်ရဲ့အဖေက ဆိုထားပါတယ်။

Ref: China girl with heart infection wakes up from coma when shown college acceptance letter

Team (ရိုးရာလေး)

အိမ်ရာမဲ့အမျိုးသားကို သူတို့စားပြီးသားကြက်ရိုးတွေ ကျွေးတဲ့ ဗီဒီယိုကြောင့် မလေးရှားအစိုးရရဲ့စုံစမ်းစစ်ဆေးမှုခံနေရတဲ့ လူငယ...
06/08/2025

အိမ်ရာမဲ့အမျိုးသားကို သူတို့စားပြီးသားကြက်ရိုးတွေ ကျွေးတဲ့ ဗီဒီယိုကြောင့် မလေးရှားအစိုးရရဲ့စုံစမ်းစစ်ဆေးမှုခံနေရတဲ့ လူငယ် Influencer ၃ဦး

မလေးရှားလူမျိုး Influencer ၃ ဦးဟာ အိမ်ရာမဲ့အမျိုးသားတစ်ဦးကို သူတို့စားပြီးသား ကြက်ရိုးတွေကို ကျွေးခဲ့တဲ့ ဗီဒီယိုတစ်ခု ပျံ့နှံ့သွားပြီးတဲ့နောက်မှာ မလေးရှားဆက်သွယ်ရေးနှင့် မာလ်တီမီဒီယာကော်မရှင် (MCMC) ရဲ့ စုံစမ်းစစ်ဆေးမှုခံနေရပါတယ်။

ကောင်းမှုကုသိုလ်လုပ်တယ်ဆိုတဲ့ အကြောင်းပြချက်နဲ့ ပြုမူလိုက်တဲ့ ဒီလုပ်ရက်က လူမှုကွန်ယက်ပေါ်မှာ ပျံ့နှံ့သွားခဲ့ပြီး လူမဆန်တဲ့လုပ်ရက်ဖြစ်တယ်ဆိုပြီး ဝေဖန်ပြောဆိုမှုတွေရှိခဲ့ပါတယ်။ အဲ့ဒီဗီဒီယိုကို Influencer ၃ဦးထဲက တစ်ဦးက Douyin မှာ တင်ခဲ့တာပါ။ အခုတော့ သူ့ရဲ့လူမှုကွန်ယက်အကောင့်တွေကနေ ဗီဒီယိုကို ဖယ်ရှားလိုက်ပေမဲ့ အခြားလူမှုကွန်ယက်အသုံးပြုသူတွေက ကူးယူကာ ပြန်တင်ခဲ့ကြပါတယ်။

အဲ့ဒီ Influencer က "ဒီနေ့ ကျွန်တော်တို့ ကောင်းမှုကုသိုလ်လုပ်တော့မှာပါ" လို့ ဗီဒီယိုမှာ ပြောထားပါတယ်။ Influencer ၃ ဦးက KFC ကြက်ကြော်တွေကို စားခဲ့ကြတာပါ။ အရိုးတွေကို စွန့်ပစ်ရမှာအလဟဿဖြစ်တယ်လို့ ဗီဒီယိုမှာ ပြောထားတာတွေ့ရပါတယ်။ အဲ့ဒီနောက် ကြက်ရိုးတွေကို စက္ကူနဲ့ထုတ်ပိုးထားတဲ့ ထမင်းထဲထည့်လိုက်ပြီးတော့ လိုအပ်နေတဲ့ တစ်စုံတစ်ယောက်ကို လှူတော့မှာပါလို့လည်း ဆိုထားပါတယ်။

အဲ့ဒီ ၃ ဦးက လဲလျောင်းနေတဲ့ အိမ်ရာမဲ့အမျိုးသားဆီသွားပြီး အဲ့ဒီထမင်းထုပ်ကို ပေးလိုက်ပါတယ်။ အိမ်ရာမဲ့အမျိုးသားလည်း အထုပ်ကို ဖွင့်ကြည့်ပြီး အရိုးတွေမြင်တော့စိတ်ရှုပ်သွားပုံရပါတယ်။ မစားဘဲနေခဲ့ပါတယ်။

လူမှုကွန်ယက်အသုံးပြုသူတွေက အဲ့ဒီအပြုအမူကို မြင်တဲ့အချိန် Influencer တစ်ယောက်မဖြစ်ခင် လူသားဆန်အောင်နေတတ်ဖို့ သင်ယူသင့်တယ်လို့ ပြောဆိုခဲ့ကြပါတယ်။ ဝေဖန်ပြောဆိုမှုတွေများလာပြီးတဲ့နောက် အကောင့်ပိုင်ရှင်က အင်စတာဂရမ်မှာ သီးခြားဗီဒီယိုတစ်ခုတင်ခဲ့ပါတယ်။ ဒီအပြုအမူက ဇာတ်လမ်းဆင်ထားတာဖြစ်တယ်လို့ ဖြေရှင်းလာခဲ့ပါတယ်။ အိမ်ရာမဲ့အမျိုးသားကို ကြက်ရိုးတွေ မပေးခဲ့ပါဘူး။ ထမင်းနဲ့ ကြက်ကြော်အကောင်းတွေပဲပေးခဲ့တယ်ဆိုတဲ့ ဗီဒီယိုကို တင်ပြခဲ့ပါတယ်။ လူ့အဖွဲ့အစည်းကို ပြန်ပေးဆပ်ဖို့ ပိုကောင်းတဲ့အခွင့်အရေးပေးပါဆိုပြီး တောင်းပန်လာခဲ့ပါတယ်။

Influencer တွေ တောင်းပန်လာခဲ့ပေမဲ့ လူမှုကွန်ယက်အသုံးပြုသူတွေက အဲ့ဒီလိုဗီဒီယိုရိုက်တာက အကြောင်းအရာကောင်းလို့ ထင်ရတာလဲ....အဓိကအချက်က အိမ်ရာမဲ့ကို ကြက်ကြော်ပေးလားမပေးလားမဟုတ်ဘူး။ အိမ်ရာမဲ့ကို ကြက်ရိုးပေးမယ်ဆိုတဲ့ Idea ကို စဉ်းစားခဲ့တာက ပြဿနာ...တကယ်ပြဿနာက ဘာလဲဆိုတာတောင် နားမလည်ဘူးလို့ ဆိုခဲ့ကြပါတယ်။

အဲ့ဒီကိစ္စက MCMC ဆီ ရောက်သွားခဲ့ပြီး လူထုရဲ့တိုင်ကြားချက်တွေပေါ် အခြေခံပြီး သူတို့ စုံစမ်းစစ်ဆေးမှုကို စတင်နေပါပြီလို့ ဩဂုတ် ၅ ရက်နေ့က ကြေညာခဲ့ပါတယ်။ Influencer ၃ဦးက မသတီစရာအကြောင်းအရာကို ဖန်တီးဖို့ ကွန်ရက်ပံ့ပိုးမှု (သို့) ကွန်ရက်ဝန်ဆောင်မှုကို မလျော်ကန်စွာ အသုံးပြုခြင်း ဆက်သွယ်ရေးနှင့် မာလ်တီဗီဒီယာအက်ဥပေဒေ ၁၉၉၈ ရဲ့ ပုဒ်မ ၂၃၃ အရ ပြစ်မှုကျူးလွန်ခြင်းဖြစ်နိုင်တယ်လို့ MCMC က ဆိုထားပါတယ်။ အပြစ်ရှိကြောင်း တွေ့ရှိမယ်ဆိုရင် Influencer ၃ ဦးက ဒဏ်ငွေ ရင်းဂစ် ၅၀၀၀၀၀ (စင်ကာပူဒေါ်လာ ၁၅၁၆၂၂)၊အများဆုံးထောင်ဒဏ် ၂ နှစ် (သို့) ဒဏ် ၂ ရပ်လုံးချမှတ်ခံရနိုင်ပါတယ်။

Ref: M'sia influencers eat KFC chicken, offer bones to homeless man as a 'kind deed

Team (ရိုးရာလေး)

လေ့ကျင့်ခန်းအလွန်အကျွံလုပ်ခြင်းက ကိုယ်ခံအားကျစေသလားခန္ဓာကိုယ်အချိုးအစားလှပချင်လို့ဆိုပြီး တစ်ရက်မပျက် Gym သွားပြီးလေ့ကျင...
06/08/2025

လေ့ကျင့်ခန်းအလွန်အကျွံလုပ်ခြင်းက ကိုယ်ခံအားကျစေသလား

ခန္ဓာကိုယ်အချိုးအစားလှပချင်လို့ဆိုပြီး တစ်ရက်မပျက် Gym သွားပြီးလေ့ကျင့်ခန်းပြင်းပြင်းထန်ထန်လုပ်နေသူတွေများရှိနေလား။ ဒါဆိုရင်တော့ ဒီဆောင်းပါးလေးကိုဖတ်ကြည့်ဖို့လိုမယ်ထင်ပါတယ်နော်။

ဒီအချက်တွေကြောင့်ဖျားနာနိုင်ပါတယ်

လူတစ်ယောက်က ဒီအချက်တွေကြောင့်ဖျားနာနိုင်ပါတယ်။

- စိတ်ဖိစီးမှုများတာ

- အာဟာရပြည့်ဝလုံလောက်အောင်မစားသုံးတာ

- ပင်ပန်းနွမ်းနယ်တာ

- အိပ်ရေးပျက်များတာ

- ဆေးလိပ်သောက်တာ

- အသက်အရွယ်အရမ်းကြီးနေတာ

- လေ့ကျင့်ခန်းတွေ အလွန်အကျွံလုပ်တာ

- လေ့ကျင့်ခန်း နဲ့ ကိုယ်ခံအား

အရင်ဆုံး သုတေသနတွေ့ရှိချက်လေးတွေအကြောင်းပြောပြပေးမယ်နော်။ လေ့ကျင့်ခန်းပုံမှန်လုပ်ခြင်းနဲ့ ကိုယ်ခံအားတို့ကြားက ဆက်စပ်မှုကိုလေ့လာခဲ့တဲ့အခါမှာတော့ နေ့စဉ်နေ့တိုင်းလေ့ကျင့်ခန်းတွေ ပြင်းပြင်းထန်ထန်လုပ်တာက ကိုယ်ခံအားကို ကျစေနိုင်ပြီး ဖျားနာတာမျိုးဖြစ်စေနိုင်တယ်၊လို့ လေ့လာတွေ့ရှိခဲ့ပါတယ်။

လေ့ကျင့်ခန်းလုပ်တာက ကြွက်သားတွေကို သန်မာစေနိုင်တယ်။ နှလုံးကျန်းမာပြီး ခန္ဓာကိုယ်ကို သန်စွမ်းစေနိုင်တယ်ဆိုပေမယ့် အမြဲတမ်းနဲ့ အလွန်အကျွံ လုပ်မယ်ဆိုရင်တော့ ကိုယ်ခံအားပေါ်မှာ ထိခိုက်မှုတွေရှိလာနိုင်ပါတယ်။ တစ်နေ့တာလုံးမှာ ဗိုင်းရပ်စ်တွေနဲ့ ထိတွေ့နေရသူတွေက အအေးမိတုပ်ကွေးဖြစ်နိုင်ခြေပိုများတယ်ဆိုတာကို ပြောနေစရာတောင်မလိုအောင်ပါ။

လူတစ်ယောက်ဟာ နာရီဝက်လောက် ဆက်တိုက်လေ့ကျင့်ခန်းတွေကို ပြင်ပြင်းထန်ထန်လုပ်မယ်ဆိုရင် ကိုယ်ခံအားစနစ်ရဲ့လုပ်ဆောင်နိုင်စွမ်းက ယာယီကျဆင်းသွားနိုင်ပါတယ်။ လေ့လာမှုတွေအရကတော့ လေ့ကျင့်ခန်းတွေကို ပြင်းပြင်းထန်ထန်လုပ်တဲ့အခါ ခန္ဓာကိုယ်က ဟော်မုန်းတွေကိုထုတ်လုပ်ပေးတဲ့အတွက် ကိုယ်ခံအားယာယီကျဆင်းသွားတာမျိုးဖြစ်နိုင်ပါတယ်။

မကြာသေးခင်ကလေ့လာမှုတွေအရ လူတစ်ယောက်နေ့စဉ်လုပ်ဆောင်နေတဲ့ ကိုယ်လက်လှုပ်ရှားမှုပမာဏက အသက်ရှုလမ်းကြောင်းကနေတဆင့်ရောဂါပိုးတွေ ကူးစက်ခံရနိုင်မှု၊ အအေးမိတာ၊ ဖျားနာတာနဲ့ ကိုယ်ခံအားစနစ်ကို ထိခိုက်စေနိုင်မှုတို့အပေါ်မှာ တိုက်ရိုက် အချိုးကျနေပါတယ်။ လူတော်တော်များများယူဆထားတာက နေ့တိုင်းလေ့ကျင့်ခန်းလုပ်မယ်ဆိုရင် အအေးမိဖျားနာမှုကနေ ခပ်ကင်းကင်းနေနိုင်မယ်လို့ပေါ့။ တကယ်တော့ ဒီအယူအဆက အပြည့်အဝမမှန်ပါဘူး။ လိုအပ်တဲ့ပမာဏထက်ကျော်ရင်တော့ ပြဿနာရှိစမြဲပါ။

စိတ်ဖိစီးမှုကိုဖြစ်စေတဲ့ ဟော်မုန်းတွေလို့သိကြတဲ့ ကော်တီစော နဲ့ အက်ဒရီနယ်လင်ဟော်မုန်းတွေက သွေးတိုးစေနိုင်သလို သွေးတွင်းကိုလက်စထရာပမာဏကို မြင့်တက်စေနိုင်ပြီး ကိုယ်ခံအားနည်းစေနိုင်ပါတယ်။ လေ့ကျင့်ခန်းကို မလုပ်ရဘူးလို့မဆိုလိုပါဘူး။ အရာရာကတန်ဆေးလွန်ဘေးဆိုသလိုပေါ့။ နေ့စဉ်ကို တစ်နာရီခွဲလောက်နှုန်းနဲ့ တစ်ပတ်လုံးကို ပြင်းပြင်းထန်ထန်လေ့ကျင့်မှုတွေလုပ်မယ်ဆိုရင်တော့ ခန္ဓာကိုယ်က ခံနိုင်ရည်နည်းသွားတာမျိုးဖြစ်ပြီး မလိုအပ်ဘဲ ဖျားနာမှုကို ခံစားရမှာဖြစ်ပါတယ်။ တကယ်ကို ကျန်းမာလှပချင်တယ်ဆိုရင် တစ်ပတ်တာမှာ တစ်နေ့ကို (၄၅) မိနစ်လောက်နှုန်းနဲ့ တစ်ပတ်မှာ (၅) ရက်လောက်ပဲလုပ်ပေးရင်ကို အဆင်ပြေနေပါပြီ။ ပုံမှန်အားဖြင့်တော့ ဖျားချင်သလိုဖြစ်လာတဲ့အခါ ကိုယ်လက်လှုပ်ရှားမှုလေးလုပ်ပေးပြီး ချွေးလေးထွက်အောင်လုပ်ပေးမယ်ဆိုရင် နေလို့ကောင်းသွားတာ အသေအချာပါ။

တကယ်လို့ သင့်အနေနဲ့ လေ့ကျင့်ခန်းကို ပြင်းပြင်းထန်ထန်လုပ်နေတာမဟုတ်ဘဲ ဖျားချင်သလိုလိုဖြစ်တယ်၊ နှာစေးတာမျိုးဖြစ်မယ်ဆိုရင်တော့ လေ့ကျင့်ခန်းလုပ်တဲ့နေရာမှာ သင်နဲ့ ဓာတ်မတည့်တာတစ်ခုခုရှိနေတာမျိုးဖြစ်နိုင်တာကြောင့် ဆရာဝန်နဲ့ သွားရောက်ပြသကြည့်သင့်ပါတယ်။

ကျန်းမာစေဖို့ လေ့ကျင့်ခန်းလုပ်ဆောင်သင့်တဲ့ အတိုင်းအတာ -

လေ့ကျင့်ခန်းလုပ်တာက နှလုံးရောဂါခံစားရနိုင်ခြေကို ကျဆင်းစေနိုင်သလို အရိုးတွေကို ကျန်းမာသန်စွမ်းစေနိုင်ပါတယ်။ ဒါတွေအပြင်လေ့ကျင့်ခန်းလုပ်တာကြောင့် ခန္ဓာကိုယ်မှာ အခုလိုပြောင်းလဲမှုတွေဖြစ်လာနိုင်ပါသေးတယ်။

၁ ။ အဆုတ်နဲ့လေပြွန်တလျှောက်က ဘက်တီးရီးယားတွေကို ခန္ဓာကိုယ်ပြင်ပကိုရောက်ရှိအောင်လုပ်ဆောင်ပေးနိုင်တယ်။

၂ ။ သွေးဖြူဥဆဲလ်တွေဖြစ်ပေါ်စေနိုင်တယ်။

၃ ။ ခန္ဓာကိုယ်အပူချိန်ကို ထိန်းညှိပေးပြီး ဘက်တီးရီးယားတွေပေါက်ဖွားတာမျိုးမဖြစ်အောင်ကာကွယ်ပေးပါတယ်။

၄ ။ စိတ်ဖိစီးမှုကိုကျဆင်းစေတယ်။

၅ ။ ကိုယ်ခံအားကောင်းစေနိုင်တယ်။

လေ့ကျင့်ခန်းလုပ်တာက ကောင်းမွန်တဲ့အလေ့အထဆိုပေမယ့် အလွန်အကျွံတော့မဖြစ်သင့်ပါဘူး။ ကိုယ်ခံအားကိုကောင်းစေနိုင်တဲ့အဆင့်လောက်ပဲလုပ်သင့်ပါတယ်။ အပေါ်မှာပြောပြခဲ့တဲ့ အကျိုးကျေးဇူးတွေရရှိစေဖို့ လုပ်ဆောင်ပေးသင့်တဲ့ လေ့ကျင့်ခန်းအတိုင်းအတာကတော့

- တစ်ရက်ကို နာရီဝက်၊ ၄၅ မိနစ်နှုန်းလောက်နဲ့ တစ်ပတ်ကို ၃ ကြိမ် ကနေ ၅ကြိမ်လောက် စက်ဘီးနင်းမယ်

- နေ့တိုင်း မိနစ် ၂၀ ကနေ နာရီဝက်လောက် လမ်းလျှောက်မယ်

- နှစ်ရက်ခြားတစ်ခါ Gym သွားမယ်

- နေ့တိုင်း နာရီဝက်လောက် အေရိုးဗစ်ဆော့မယ်

- တစ်နေ့ကို (၄၅) မိနစ်လောက် ယောဂဆော့မယ်။

ဒါတွေအပြင် လေ့ကျင့်ခန်းလုပ်တဲ့အခါ အသုံးပြုတဲ့ ပစ္စည်းတွေကို သန့်သန့်ရှင်းရှင်းထားဖို့၊ တစ်ကိုယ်ရေသန့်ရှင်းရေးကိုဂရုစိုက်ဖို့။ အာဟာရပြည့်ဝအောင်စားသုံးဖို့၊ စိတ်ဖိစီးမှုခပ်ကင်းကင်းနေဖို့လည်း မမေ့ဖို့ပြောပါရစေနော်။

Team (ရိုးရာလေး)

နှစ် ၃၀ ကျော် အေးခဲထားတဲ့ သန္ဓေသားကနေ ကလေးမွေးဖွားဇူလိုင်လ ၂၆ ရက်နေ့က အမေရိကန်နိုင်ငံ၊ အိုဟိုင်းအိုးပြည်နယ်မှာ မွေးဖွားခ...
05/08/2025

နှစ် ၃၀ ကျော် အေးခဲထားတဲ့ သန္ဓေသားကနေ ကလေးမွေးဖွား

ဇူလိုင်လ ၂၆ ရက်နေ့က အမေရိကန်နိုင်ငံ၊ အိုဟိုင်းအိုးပြည်နယ်မှာ မွေးဖွားခဲ့တဲ့ ကလေးကို ''ကမ္ဘာ့အသက်အကြီးဆုံးကလေး''လို့ သတ်မှတ်ထားကြပါတယ်။ ဘာကြောင့်လဲဆိုတော့ လွန်ခဲ့တဲ့ နှစ်ပေါင်း ၃၀ ကျော်ကတည်းက အေးခဲထားတဲ့ သန္ဓေသားကနေ မွေးဖွားလာခဲ့တာကြောင့်ပါပဲ။

MIT Technology Review သတင်းဌာနရဲ့ ဖော်ပြချက်အရ လင်ဒါအာချက်ဆိုသူ အမျိုးသမီးက ၁၉၉၄ ခုနှစ်မှာ ဖန်ပြွန်သန္ဓေနည်းပညာနဲ့ ဒီသန္ဓေသားကို ဖန်တီးခဲ့တာဖြစ်ပြီး နောက်ပိုင်းမှာတော့ Snowflakes လို့အမည်ရတဲ့ အစီအစဉ်ကတစ်ဆင့် ဒီသန္ဓေသားကို လှူဒါန်းခဲ့တာပါ။

၁၁၁၄၈ ရက်ကြာ အေးခဲထားတဲ့ သန္ဓေသားကနေ မွေးဖွားလာခြင်းကြောင့် ကလေးငယ် သာဒီယက်ကို ကမ္ဘာ့အသက်အကြီးဆုံးကလေးလို့ ခေါ်ဆိုကြတာပါ။ ၂၀၂၂ ခုနှစ်က နှစ် ၃၀ စွန်းစွန်း အေးခဲထားတဲ့ သန္ဓေသားကနေ အမြွှာကလေးငယ် မွေးဖွားလာတဲ့ စံချိန်ဟောင်းကို ချိုးဖျက်ခဲ့တာ ဖြစ်ပါတယ်။

သင့်တော်တဲ့ နည်းပညာအတိုင်း အတိအကျ ဆောင်ရွက်မယ်ဆိုရင် ကာလရှည် အေးခဲထားမှုက သန္ဓေသားကို ထိခိုက်မှုမရှိစေနိုင်ကြောင်း ဒီဖြစ်ရပ်က သက်သေပြနေတယ်လို့ ကျွမ်းကျင်ပညာရှင်တွေက ဆိုပါတယ်။

Ref: A record-breaking baby has been born from an embryo that’s over 30 years old

Team ( ရိုးရာလေး)

အလုပ်ပြန်နောက်ကျတဲ့အမျိုးသမီးတွေအတွက် အကူအညီဖြစ်စေဖို့ စတိုးဆိုင်မီးတွေကို တစ်ညလုံးထွန်းပေးထားတဲ့ ဆိုင်ပိုင်ရှင်စတိုးဆို...
05/08/2025

အလုပ်ပြန်နောက်ကျတဲ့အမျိုးသမီးတွေအတွက် အကူအညီဖြစ်စေဖို့ စတိုးဆိုင်မီးတွေကို တစ်ညလုံးထွန်းပေးထားတဲ့ ဆိုင်ပိုင်ရှင်

စတိုးဆိုင်ပိုင်ရှင်တစ်ဦးဟာ မှောင်တဲ့အချိန်မှ အိမ်ပြန်လာရတဲ့သူတွေအတွက် အကူအညီဖြစ်စေဖို့ ၁၃ နှစ်တာလုံး သူ့ဆိုင်ရဲ့မီးကို တစ်ညလုံးထွန်းပေးနေခဲ့တာပါ။ သူကတော့ အသက် ၆၀ အရွယ် စန်းမေဟွာဆိုတဲ့ အမျိုးသမီးကြီးပါ။ သူဟာ သူ့ဆိုင်လေးကို ၂၀၁၂ ခုနှစ်မှာ တရုတ်နိုင်ငံအလယ်ပိုင်း၊ဟူနန်ပြည်နယ်၊ ချန်ရှမြို့ဟောင်းမှာ ဖွင့်ခဲ့တာပါ။

ဆိုင်စဖွင့်တဲ့ပထမလမှာတော့ ငယ်ရွယ်တဲ့အမျိုးသမီးတချို့က သူ့ကို ဆိုင်ရှေ့မီးက သူတို့ အိမ်ပြန်နောက်ကျတဲ့အချိန် လုံခြုံသလို ခံစားရစေတယ်လို့ ပြောပါတယ်။ အဲ့ဒီကတည်းကစပြီး စန်းဟာ တစ်ညလုံးထွန်းပေးခဲ့တာပါ။ ဆိုင်ပိတ်ချိန်ကိုလည်း လိုအပ်နေတဲ့သူတွေအတွက် မနက် ၂ နာရီထိ အချိန်ညှိပေးခဲ့ပါတယ်။ တချို့သူတွေက စန်းကို "လမ်းမီးတိုင်အန်တီ" (Street Light Auntie) လို့နာမည်ပြောင်ပေးထားပါတယ်။

စန်းက သူ့အိမ်က ကြိုးဖုန်းကိုလည်း ဆိုင်မှာ ရွေ့ပေးထားခဲ့ပါတယ်။ အသက်ကြီးတဲ့သူတွေနဲ့ ကလေးသူငယ်တွေ သူ့မိသားစုတွေဆီ ဖုန်းဆက်လို့ရစေဖို့အတွက်ပါ။ သူ့ရပ်ကွက်ထဲမှာ စမတ်ဖုန်းနဲ့ အကျွမ်းတဝင်မရှိတဲ့ သက်ကြီးရွယ်အိုတွေနဲ့ ဖုန်းကိုင်ခွင့်ပေးမထားတဲ့ ကလေးသူငယ်တွေရှိတယ်လို့ စန်းက ပြောပါတယ်။

ကြိုးဖုန်းအထိုင်ပျက်သွားရင် နှစ်တိုင်းလဲရပေမဲ့ ဖုန်းအခမဲ့ဆက်ခွင့်ပေးတဲ့ဝန်ဆောင်မှုကို ဘယ်တော့မှ ရပ်မပစ်ခဲ့ပါဘူး။ စန်းက "အကူအညီလိုအပ်နေတဲ့သူတွေကို ကူညီပေးချင်ရုံပါ"တဲ့။ တစ်ခါတလေ ဖုန်းခေါ်လို့မရရင် စန်းက သူ့အိမ်နီးနားချင်းတွေအတွက် မက်ဆေ့ချ်ပို့ပေးပါတယ်။ စန်းက အိမ်နီးနားချင်းတွေအတွက် ဆိုင်သော့အပိုထားပေးထားပါတယ်။

စန်းနဲ့ သူ့ခင်ပွန်းက ဒီရပ်ကွက်မှာ နေတာ ဆယ်စုနှစ် ၂ ခုကျော်ပါပြီ။ သူတို့မှာ အချိန်ပြည့်အလုပ်မရှိပေမဲ့ ဆိုင်က ရတဲ့ ပုံမှန်ဝင်ငွေလေးနဲ့ နေထိုင်ပါတယ်။ သူ့ရဲ့ရပ်ကွက်အသိုင်းအဝိုင်းကနေ အကူအညီများစွာရရှိခဲ့ပြီး ဒါကို ပြန်လည်ပေးဆပ်လိုတယ်လို့ စန်းက ဆိုထားပါတယ်။

Ref: Caring China shop owner keeps store lights on for 13 years to aid women coming home late

Team (ရိုးရာလေး)

ပြင်သစ်ဖျော်ဖြေပွဲအတွင်း မိုက်ကယ်ဂျက်ဆင် ဝတ်ဆင်ခဲ့တဲ့ ခြေအိတ်ကို ကန်ဒေါ်လာ ၈ ထောင်ကျော်နဲ့ ရောင်းချ၁၉၉၀ ပြည့်နှစ်ဝန်းကျင...
05/08/2025

ပြင်သစ်ဖျော်ဖြေပွဲအတွင်း မိုက်ကယ်ဂျက်ဆင် ဝတ်ဆင်ခဲ့တဲ့ ခြေအိတ်ကို ကန်ဒေါ်လာ ၈ ထောင်ကျော်နဲ့ ရောင်းချ

၁၉၉၀ ပြည့်နှစ်ဝန်းကျင်က ပြင်သစ်ဖျော်ဖြေပွဲတစ်ခုအတွင်း ပေါ့ပ်ဘုရင် မိုက်ကယ်ဂျက်ဆင် ဝတ်ဆင်ခဲ့တဲ့ ပြောင်လက်လက်ခြေအိတ်ကို ကန်ဒေါ်လာ ၈၀၀၀ ကျော်နဲ့ ပြီးခဲ့တဲ့ဗုဒ္ဓဟူးနေ့က လေလံတင်ရောင်းချခဲ့ပါတယ်။ ဖျော်ဖြေပွဲအပြီး မိုက်ကယ်ဂျက်ဆင်ရဲ့အဝတ်လဲခန်းအနီး လွှင့်ပစ်ထားတဲ့ ဒီခြေအိတ်ကို စက်ဆရာတစ်ဦးက တွေ့ရှိခဲ့တာပါ။ အခုလိုရောင်းမချခင် မှန်ဘောင်တစ်ခုအတွင်း ထည့်ထားပြီး ၂၈ နှစ်ကြာအောင် ထိန်းသိမ်းထားခဲ့တာပါ။

ကိုယ်ပိုင်စတိုင်နဲ့ မိုက်ကယ်ဂျက်စတင်ဟာ ၁၉၉၇ ခုနှစ်က HIStory World Tour အတွင်း စိန်အတုတွေနဲ့တန်ဆာဆင်ထားတဲ့ အဖြူရောင်အားကစားခြေအိတ်ကို ဝတ်ဆင်ခဲ့တာပါ။ Billie Jean သီချင်းကို ဖျော်ဖြေတင်ဆက်နေစဉ်အတွင်း အဲ့ဒီခြေအိတ်ကို ဝတ်ဆင်ခဲ့တာမြင်တွေ့ရနိုင်ပါတယ်။ ဆယ်စုနှစ်တွေကြာလာတာနဲ့ အဲ့ဒီပစ္စည်းက အစွန်းအထင်းတွေဖုံးလွှမ်းသွားက အလှဆင်ထားတဲ့ ကျောက်တွေကလည်း အရောင်ပြောင်းလာခဲ့ပါတယ်။

အစက ခြေအိတ်ကို ဒေါ်လာ ၃၄၀၀-၄၅၀၀ နဲ့ တန်ဖိုးဖြတ်ခဲ့ပေမဲ့ ကန်ဒေါ်လာ ၈၈၂၂ နဲ့ လေလံအောင်သွားခဲ့ပါတယ်။

Ref: Michael Jackson's dirty sock sells for over $8K

Team (ရိုးရာလေး)

Address

No.132, 7F, Anawrahta Road (Corner Of Bo Myat Tun St.) Botahtaung Township
Yangon
11162

Opening Hours

Monday 08:30 - 17:30
Tuesday 08:30 - 17:30
Wednesday 08:30 - 17:30
Thursday 08:30 - 17:30
Friday 08:30 - 17:30

Telephone

+959400000661

Website

Alerts

Be the first to know and let us send you an email when Yoyarlay posts news and promotions. Your email address will not be used for any other purpose, and you can unsubscribe at any time.

Contact The Business

Send a message to Yoyarlay:

Shortcuts

Share

Category