03/05/2025
The Hunt (2020)
General - Action/Thriller - 1h 30m
IMDb 6.6 , Rotten Tomatoes 57%
"ငါတို့ရဲ့သရုပ်မှန်အစစ်က ဒီလိုမဟုတ်ဘူး နင်တို့ဝိုင်းပြီးတော့ မကောင်းပြောလို့ ဒီလိုလုပ်တဲ့သူတွေ ဖြစ်လာရတာ"
ဒီဇာတ်ကားက ၂၀၂၀ ဝန်းကျင်တုန်းက ကိုဗစ်ကာလ ကပ်ရောဂါအရမ်းမဆိုးခင်အချိန်မှာ ရုံတင်ခဲ့တဲ့ဇာတ်ကားပါ lock down ချနေတဲ့ကာလမှာ အိမ်ထဲမှာပဲ နေရပြီး ဒီလို Thriller ဇာတ်ကားမျိုးကိုကြည့်ရတဲ့အရသာက မိုးအေးအေးနဲ့ ခေါက်ဆွဲပြုတ်ကလေးသောက်ပြီး Horror ကားတစ်ကားကို ဇိမ်နဲ့ကြည့်ရသလိုမျိုး ခံစားချက်ပါပဲ။
ဇာတ်လမ်းအကျဥ်းမှာ ကမ္ဘာ့နေရာပေါင်းစုံက လူတွေကို မေ့ဆေးခတ်၊ လေယာဥ်ပေါ်တင်ခေါ်လာပြီး အမည်မသိတဲ့ တောထဲမှာ လွှတ်ပေးပြီးမှ လူလူချင်း ဝိုင်းပြီးတော့ အမဲလိုက်တဲ့ပွဲကို ကစားကြတဲ့ ဂိမ်းတစ်ခုလိုမျိုး ပုံဖော်ထားတယ်၊ အမဲလိုက်ခံရတဲ့သူတွေကို သစ်သားပုံးကြီးတစ်ပုံးနဲ့ လိုအပ်တဲ့ လက်နက်ကိရိယာတွေလည်း သာတူညီမျှ အခွင့်အရေးပုံစံမျိုး ပေးထားတယ် ဆိုလိုတာက တောထဲခေါ်လာပြီးတော့ သက်သက်အနိုင်ကျင့်တာမျိုးမဟုတ်ဘဲ တရားမျှတစွာ အမဲလိုက်တဲ့သဘောကိုဆောင်ထားတယ် ဒီအချက်ကိုကြည့်ပြီးတော့ ကိုလိုနီခေတ်တွေမှာ အရင်းရှင်နိုင်ငံတွေ ကမ္ဘာကို ဖော်ပြတဲ့ပုံစံကို သွားသတိရမိတယ် အထူးသဖြင့် အင်္ဂလိပ်တွေပေါ့ ငါတို့ ဒီနယ်မြေတွေကို နယ်ချဲ့တာက ကိုယ်ကျိုးစီးပွားအတွက်တင်မဟုတ်ဘူး ဒီနယ်မြေတွေရဲ့ သံယံဇာတတွေကို ဘယ်လိုအသုံးချရမလဲ ဘယ်လိုတိုးတက်အောင်လုပ်ရမလဲဆိုတာ ဒီနယ်မြေခံတွေထက်ပိုပြီးတော့ သိလို့တတ်လို့ ပိုပြီးတော့ အကျိုးစီးပွားဖြစ်ထွန်းအောင်လို့ ထိန်းချုပ်ထားတာဆိုပြီး အုပ်ချုပ်ရေးစနစ်တွေမှာတောင် နယ်မြေခံတွေရဲ့ ခေါင်းဆောင်တွေကိုပါ အယောင်ပြထည့်သွင်းအုပ်ချုပ်ပြီး သာတူညီမျှအခွင့်အရေးမျိုး ပေးထားတယ်ဆိုတဲ့သဘော၊ အာဏာ'သိမ်း'တာမဟုတ်ဘဲ အာဏာ'ထိန်း'တာဆိုတဲ့အသုံးကို အာဏာရှင်တွေ ကြားလို့ကောင်းအောင် တွင်တွင်ကျယ်ကျယ်သုံးကြသလိုမျိုး အခွင့်အရေးတူညီစွာ ပေးထားတယ်ဆိုတဲ့ လက်တစ်လုံးခြားလီဆယ်မှုကို ပေါ်လွင်အောင်ရိုက်ပြထားတယ်လို့ ခံစားမိတယ်။
ထူးခြားချက်အနေနဲ့ကတော့ အမဲလိုက်ခံရတဲ့သူတွေကိုပေးထားတဲ့ သစ်သားပုံးကြီးထဲမှာ အင်္ကျီဝတ်ထားတဲ့ ဝက်တစ်ကောင်လဲပါလာတယ် အဲ့ဒီ့ဝက်က ကမ္ဘာကျော်စာရေးဆရာကြီး George Orwell ရဲ့ Animal Farm ဝတ္ထုထဲက Revolution ခေါင်းဆောင် ဝက်ကို ကိုယ်စားပြုတယ်လို့လည်း ဇာတ်သိမ်းပိုင်းမှာ ဖော်ပြထားပါတယ်။ ခုနကဟာကို ပြန်ပြီးတော့ဆက်ရရင် လူတွေကိုတောထဲခေါ်လာပြီး အမဲလိုက်ရာကနေ အမဲလိုက်တဲ့မုဆိုးတွေကိုယ်တိုင် သားကောင်တွေရဲ့ အမဲလိုက်ခြင်းကို ပြန်ပြီးတော့ခံလာရတဲ့အခါ ဆက်ပြီးတော့ ဘာတွေဖြစ်လာမလဲ၊ သူတို့မေ့ဆေးပေးပြီး ဖမ်းခေါ်လာတဲ့သူတွေထဲမှာ အာဖဂန်နစ်စတန် စစ်ပြန်တစ်ယောက်ပါလာတယ် သူမရဲ့နာမည်က ခရစ်တယ်မေ ၊ တိုက်ရည်ခိုက်ရည်ကောင်းတယ် သူမ ခန္ဓာကိုယ်ထက် နှစ်ဆလောက်ရှိတဲ့ ဘဲတွေကိုတောင်မှ အမှောက်သိပ်နိုင်လောက်အောင်ကြမ်းတယ်။ Action ဇာတ်ကားတိုင်းလိုလိုနဲ့ Action အမျိုးအစားပါဝင်တဲ့ ဇာတ်ကားတွေရဲ့ ထုံးစံအတိုင်း အာဖဂန်နစ်စတန်စစ်ပြန် စစ်သားဟောင်းတစ်ဦးဖြစ်တယ်ဆိုတာကိုပါ ထည့်သွင်းဖော်ပြထားခြင်းက သူမဘာကြောင့် ကြမ်းတယ်၊ Martial Art စကေးတွေကကော ဘာကြောင့်ကောင်းမွန်တယ်ဆိုတာကိုပါ ပြချင်တဲ့သဘောပါပဲ။
ဇာတ်သိမ်းပိုင်းမှာ ဇာတ်ကားရဲ့ main villian အက်သီနာ ပြောသွားတဲ့ "လူတွေကို ငါ့ရဲ့အိမ်တော်ထဲခေါ်ပြီးတော့ အမဲလိုက်တယ်ဆိုတဲ့ ကောလဟာလဟာ အမှန်မဟုတ်ဘူး နင်တို့လုပ်လို့ပဲ ငါဒီလိုဖြစ်အောင်လုပ်လိုက်ရတာ" ဆိုတဲ့စကားမှာ "ငါတို့ရဲ့သရုပ်မှန်က နင်တို့ရဲ့မကောင်းတဲ့စကားတွေနဲ့ ပုံသွင်းမှုကြောင့် မကောင်းတဲ့အရာ ဖြစ်သွားတာ" ဆိုတဲ့ စကားမျိုးနဲ့ အဓိပ္ပာယ်သွားတူနေပါတယ်။ အကြမ်းဖက်မှုဗီဇ တစ်နည်းအားဖြင့် မကောင်းတဲ့ဗီဇ အခံရှိနေတဲ့သူတစ်ယောက်ဟာ ပတ်ဝန်းကျင်ကနေ ခါးခါးသီးသီး မကောင်းတဲ့လူတစ်ယောက်လို ပုံသွင်းခြင်းခံလာတဲ့အခါမှာ တကယ်တမ်းမကောင်းတဲ့သူတစ်ယောက်အဖြစ်ပြောင်းလဲသွားတဲ့ သဘောတွေရှိတတ်တာကို ပြထားပြန်ပါတယ်။ နောက်ပြီး ဒီဇာတ်ကားမှာ "Animal Farm" Novella ထဲက အဓိကဇာတ်ဆောင် "ဝက်"ကို ထည့်ပြီးရိုက်ပြသွားတာက "အကြမ်းဖက်မှုကို အကြမ်းဖက်မှုနဲ့ပဲ ဖြေရှင်းလို့ရမယ်ဆိုတဲ့သဘောထားနဲ့ အမဲလိုက်တဲ့ မုဆိုးတွေကို အနိုင်ယူဖို့အတွက် သူတို့ကိုပြန်ပြီးတော့ အမဲလိုက်မှပဲရမယ်ဆိုတဲ့သဘောကို ယှဥ်ပြသွားခဲ့ပါတယ်။
အာဏာရှင်ကိုဖြုတ်ချရင်းနဲ့ ကိုယ်တိုင်အာဏာရှင်တစ်ယောက်ဖြစ်လာရတယ်ဆိုတဲ့ သဘောကိုလဲ ဇာတ်သိမ်းပိုင်းမှာ မေ တစ်ယောက် အက်သီနာရဲ့နေရာကို ဝင်ယူလိုက်ပြီး လေယာဥ်ပေါ်မှာ လေယာဥ်မယ်လေးနဲ့ စကားပြောတဲ့အခန်းမှာ တွေ့မြင်ရမှာပါ။
The Hunt ကို Personal Rating အရ 7/10 ပေးပါတယ် ၊ ဘာဆက်ဖြစ်မလဲဆိုတဲ့အတွေးတွေနဲ့ ပေါ့ပေါ့ပါးပါး ကြည့်လို့ရတဲ့အပြင် တွေးကြည့်မယ်ဆိုရင်လဲ တွေးကြည့်သလောက် အဓိပ္ပာယ်ရှိတဲ့ ဇာတ်ကားတစ်ကားမလို့ စနေတနင်္ဂနွေ အားလပ်ရက်မှာကြည့်ဖို့အတွက် recommend ပေးပါတယ်။
