MILI Radio

MILI Radio Contact information, map and directions, contact form, opening hours, services, ratings, photos, videos and announcements from MILI Radio, Radio Station, No. 17/19, Thar Yar Aye Street, Ward 3, Mayangone Township, Yangon.

22/01/2021

အညိုနှင့် နှစ်သစ်အားမာန်
*************************

ဇာတ်လမ်း - နေခြည်လင်းလက်(တောင်ကြီး)
တင်ဆက်သူ - တင်နီလာဝင်း

ကိုယ်အင်္ဂါမသန်စွမ်းသူ ကလောင်ရှင် နေခြည်လင်းလက်(တောင်ကြီး)ရေးသားပေးထားတဲ့ "အညိုနှင့် နှစ်သစ်အားမာန်" ဆိုတဲ့ ဇာတ်လမ်းတိုလေးတစ်ပုဒ်ကို တင်ဆက်ပေးလိုက်ရပါတယ် နားဆင်ပေးကြပါဦးခင်ဗျ....


21/01/2021

၂၀၂၀ ခုနှစ် ကုန်သွားပြီးတဲ့နောက်မှာ ၂၀၂၁ ခုနှစ်ကို ရောက်လာပါပြီ ၂၀၂၀ တစ်နှစ်တာလုံး မထင်မှတ်ဘဲ အခက်အခဲပေါင်းများစွာကို ရင်ဆိုင်ခဲ့ရပါတယ် ဒီအတွေ့အကြုံတွေအရ ၂၀၂၁ ခုနှစ်မှာ ဘာတွေကြိုတင်ပြင်ဆင်ထားသင့်လဲ ဘာတွေလုပ်သင့်လဲ ဆိုတာကို ဒီအစီအစဉ်မှာ ပြောပြပေးထားပါတယ် ပြင်ဆင်သင့်တာတွေကတော့ အများကြီး ရှိပါပေမယ့် ဒီအစီအစဉ်မှာတော့ အချက်(၃)ချက်ကိုပဲ အဓိကထားပြောပြပေးထားပါတယ် နားဆင်ပေးကြပါဦးခင်ဗျာ


15/01/2021

မီလီရေဒီယိုရဲ့ ပရိသတ်များအတွက် နားမထောင်လိုက်ရတဲ့ အစီအစဉ်များ မကြည့်လိုက်ရတဲ့ ဗီဒီယိုများကို အလွယ်တကူ ပြန်လည် ကြည့်ရှု့နားဆင်နိုင်ဖို့ အတွက် playlist တွေ series တွေ နဲ့တစ်စုတစ်စည်းထဲ လင့်ခ်တွေလုပ်ပေး ထားပါတယ်ခင်ဗျ အောက် လင့်ခ်မှာ နားထောင်ချင်တဲ့ အစီအစဉ်တွေကို ဝင်ရောက်နားဆင်နိုင်ပါပြီခင်ဗျာ ....

https://www.facebook.com/miliradio2013/videos

07/12/2020

"မသန်စွမ်းအမျိုးသမီးများအပါအဝင် အမျိုးသမီးများအပေါ် အကြမ်းဖက်မှုများရပ်တန့်ပေး" ၁၆ ရက်တာ အသိပညာပေး လှုပ်ရှားမှု

#ခေတ်မီနည်းပညာများအသုံးပြု၍ အမျိုးသမီးများအပေါ် အကြမ်းဖက်မှု

#အကြမ်းဖက်ခံရသော အမျိုးသမီးများအတွက် ဝန်ဆောင်မှုများ လက်လှမ်းမီစေရန်

#အန္တရာယ်ရှိသော ရှေးရိုးစွဲ ရိုးရာအစဉ်အလာများမှ အမျိုးသမီးများ အပေါ် အကြမ်းဖက်မှု

#အိမ်တွင်းအကြမ်းဖက်မှု နှင့် ကိုဗစ်-၁၉

#ရွေးကောက်ပွဲတွင် အမျိုးသမီးများ ပိုမိုပါဝင်လာစေရန်

ဒီလိုအကြောင်းအရာတွေကို နားဆင်နိုင်ဖို့အတွက် ဒီအစီအစဉ်လေးကို နားထောင်ပေးဦးနော် .......



02/12/2020

ဆွေထက်(ရေစကြို) ရေးသားပေးထားတဲ့ ဆောင်းပါးလေးတစ်ပုဒ်ကို တင်ဆက်ပေးချင်ပါတယ်

လပြည့်ဝန်းရဲ့ ဒိုင်ယာရီ
*************************
ကလောင်ရှင် - ဆွေထက်-ရေစကြို (ကိုယ်အင်္ဂါမသန်စွမ်းသူ ကလောင်ရှင်)

ငယ်ငယ်ကတည်းက စိတ်ဆန္ဒအင်အား ကြီးမားခဲ့တဲ့ကျွန်တော်၊ ဘဝရဲ့ အလှည့်အပြောင်း တွေကြောင့် မသန်စွမ်းဖြစ်ခဲ့တဲ့ ကျွန်တော် ၊ မေ့ပျောက်ခံ အသိုင်းအဝိုင်းကြားမှာ ကြီးပျင်းခဲ့ရတဲ့ ကျွန်တော် ၊ ဆုံးရှုံးမှုတွေအများကြီးကို ကြံ့ကြံ့ခံရင်ဆိုင်ခဲ့ရတဲ့ ကျွန်တော်၊ ထိုကဲ့သို့ ဘဝရဲ့ဇာတ်ခုံပေါ်မှာ အပြုံးမပျက်လှလှကြီးကနေနိုင်အောင် ကျွန်တော့်ရဲ့စိတ်ဓာတ်ကို မသန်ပေမယ့် စွမ်းဆောင်နိုင်သူ တစ်ယောက် ဖြစ်အောင် ကြိုးစားရပ်တည်ခဲ့ရပါတယ်။ ကျွန်တော့်ဟာ အညာအရပ်လို့ခေါ်တဲ့ ချင်းတွင်းမြစ် အထက်ပိုင်း ထမံသီမြို့နယ် ပင့်မာရွာခြေ သောင်ပြင်ကမ်းစပ်မှာ တတိယမြောက် သား အဖြစ် မွေးဖွားခဲ့ပါတယ်။ ကျွန်တော်ရဲ့ မိဘများကတော့ ကြိမ်ခုတ်၊ဝါးခုတ် လုပ်ငန်းများနဲ့ အသက်မွေး ကြပါတယ်။ ကျွန်တော့်အမေက ပခုံးထမ်းဈေးသည်အဖြစ်လည်း ရွာစဉ်လှည့် ဈေးရောင်းရပါသေးတယ်။ ကျွန်တော်အသက်သုံးနှစ်အရွယ်မှာတော့ ကျွန်တော့် အဖေဆုံးပါးသွားတဲ့အတွက် အဘိုးအဖွားများ ရှိရာ မကွေးတိုင်းဒေသကြီး ရေစကြိုမြို့နယ် နှောပင်ရွာကို မိသားစုနဲ့အတူ လိုက်ပါလာခဲ့ရပါတော့တယ်။
ကျွန်တော်ဟာ ကျန်းမာစွာမွေးဖွားခဲ့ပေမယ့်လည်း အသက်ရှစ်နှစ်အရွယ်မှာတော့ အပြင်းဖျားခဲ့ ပြီး ကျန်းမာရေးချူခြာ လာခဲ့ပါတယ်။ အသက်ကိုးနှစ်အရွယ်ရောက်တဲ့အခါ နားနှာခေါင်း လည်ချောင်း ရောဂါနဲ့ မုံရွာမြို့ဆေးရုံမှာတက်ရောက် ခွဲစိတ်ခံခဲ့ရတယ်။ အဲ့ဒီအချိန်ကစပြီး ခြေဆစ်လက်ဆစ်များ ရောင်ရမ်းနာကျင်လာခဲ့ပါတယ်။ အရပ်ဆေးဝါးများ၊ ဆေးရုံဆေးခန်းများသို့ သွားရောက်ကုသ ခဲ့ပေမယ့်လည်း တစ်နှစ်ပီးတစ်နှစ် ပိုမိုဆိုးဝါးလာခဲ့ပြီး လေးဘက်နာရောဂါဝေဒနာကို စတင်ခံစားခဲ့ရပါ တော့တယ်။ ကျွန်တော့်အသက် ဆယ်လေးနှစ် အဌမတန်း အတန်းတင် စာမေးပွဲနောက်ဆုံး ဖြေဆိုပြီးချိန်မှာတော့ အိပ်ယာထဲ ဗုန်းဗုန်းလဲခဲ့ရပါသည်။ သူငယ်ချင်းများက နဝမတန်းမှာ တက်ရောက် ပညာသင်ကြားနေချိန်မှာတော့ ကျွန်တော်မတတ်ရောက်နိုင်ခဲ့တော့ပါဘူး။ ကျွန်တော့်ရဲ့ အထီးကျန်ချိန် တွေကို ကျွန်တော့်မိဘ မောင်နှမတွေအပါအဝင် ကျနော် ဦးလေးရဲ့ ဗဟုသုတရစရာ စာအုပ်များနှင့် သာကုန်ဆုံးခဲ့ရပါသည်။ ကျွန်တော့်အိမ်ဝိုင်းလေးဟာ ကျွန်တော်ကမ္ဘာဖြစ်ခဲ့တဲ့ အချိန်တွေ ငါးနှစ်လောက် ကြာခဲ့ပါသည်။
အဲ့ဒီအချိန် ငါးနှစ်အတွင်း ကျွန်တော့်ကျန်းမာရေး အခြေအနေဆိုးဝါးလာပြီး ကျွန်တော့်ရဲ့ ခြေထောက်တွေဟာလည်း သေးသိမ် ကွေးကောက် ခဲ့ရပါသည်။ ကျွန်တော့်အမေရဲ့ ဆုံးမ လမ်းညွှန်မှု ကြောင့် ဘုရား တရား သံဃာ ရတနာမြတ်သုံးပါးအပေါ် သက်ဝင်ယုံကြည်ပြီး စိတ်ဓာတ်အင်အား မွေးမြူခဲ့ရပါသည်။ ဒီလိုနေခဲ့ရင်းကနေ ရေစကြိုမြို့မှာနေထိုင်တဲ့ ရပ်ဆွေရပ်မျိုးတစ်ဦးဖြစ်တဲ့ ကျောင်း ဆရာလေး ဦးတင့်လွင်ဦးက ကျွန်တော့်ရဲ့ မကျန်းမာမှုသတင်းကို ကြားသိခဲ့ပြီး ဆရာရဲ့ အကူအညီနဲ့ပဲ ကျနော်ဆေးဝါးကုသခွင့် ရရှိခဲ့ပါတယ်။ တဖြည်းဖြည်းနဲ့ကျွန်တော့်ရောဂါအခြေအနေ သက်သာလာပြီး ထိုင်နိုင်လှုပ်ရှားလာနိုင်ခဲ့ပါသည်။ ဒါပေမယ့် လမ်းတော့မလျှောက်နိုင်တော့ပါဘူး။ ကျွန်တော်ရဲ့ ညီလေးက သူရဲ့ဝင်ငွေနဲ့ ဘီးတပ်ကုလားထိုင်လို့ခေါ်တဲ့ ဝှီးချဲလ်တစ်စီးကို ဝယ်ပေးပါသည်။ ကျွန်တော်အလွန်ပျော်ခဲ့ရပါတယ်။ အဲ့ဒီဝှီးချဲလ်နဲ့ ကျွန်တော့်ဘဝသည် ပြန်လည်နိုးကြား သက်ဝင်လာခဲ့ပါတယ်။
ကျွန်တော်သည် ဝီချဲလ် တစ်စီးဖြင့် ရွာထဲကို စထွက်တဲ့အခါမှာတော့ လူအများစုရဲ့ အံ့ဩတဲ့အကြည့်၊ သနားဂရုဏာဖြစ်တဲ့အကြည့် ၊ ရွံ့ရှာနေတဲ့အကြည့် ၊ မျက်လုံးပေါင်းစုံရဲ့ အကြည့်ကို ခံခဲ့ရပါသည်။ ကျွန်တော် အားငယ်ခဲ့ရသော အချိန်များလို့လည်း ဆိုနိုင်ပါတယ်။ ကျွန်တော့်စိတ်ကို မာန်တင်းအားယူခဲ့ရသော အချိန်များလည်း ဖြစ်သည်။ အဲ့ဒီလိုခံစားနေရချိန်မှာ ကျွန်တော်တို့ရွာက ကျူရှင်ဆရာ ဆရာအောင်သူနှင့် တွေ့ဆုံစကားပြောဖြစ်ခဲ့ပြီး ဆရာ၏လမ်းဖွင့်ပေးမှုဖြင့် ကျွန်တော် ဆရာ့ရဲ့အိမ်ကို အလည်အပတ် သွားရဲလာရဲ ရှိလာခဲ့သည်။ ဆရာနှင့် မကြာခဏဆိုသလို စကား ပြောဖြစ် ကြရင်းကနေ ပညာရေးအသိ ရလာခဲ့ပြီး အတန်းပညာ ဆက်လက်သင်ကြား ဖြစ်ခဲ့ပါသည်။ ရွာကျောင်းမှာ ကျွန်တော် နဝမတန်းနဲ့ ဒဿမတန်း ပြန်လည်တတ်ရောက်ခဲ့ပြီး ဆယ်တန်း စာမေးပွဲကို 2019 ခုနှစ်မှာ အောင်မြင်ခဲ့ပါသည်။
ကျွန်တော် ဆယ်တန်းအောင်ပြီးချိန်မှာတော့ မသန်စွမ်းအဖွဲ့အစည်းများရှိတယ် ဆိုတာကို အဒေါ်တစ်ယောက်ထံကနေတစ်ဆင့် သိခဲ့ရပါသည်။ မသန်စွမ်းအဖွဲ့အစည်းများနဲ့ ဆက်သွယ်ဖို့အတွက် ကြိုးစားခဲ့ရင်း ရွာကျောင်းမှာ အချိန်ပိုင်း မူလတန်း လုပ်အားပေးကျောင်းဆရာ အဖြစ် ဝင်ရောက် လုပ်ကိုင်နေခဲ့ပါသည်။ ဒီလိုနဲ့ကျွန်တော်မသန်စွမ်းအဖွဲ့အစည်းတစ်ခုနဲ့ အဆက်အသွယ်ရရှိခဲ့ပြီး အဖွဲ့ဝင် ဘဝတူ မသန်စွမ်းအကိုတစ်ယောက်ရဲ့ မိတ်ဆက်ပေးမှုကြောင့် ဆရာတစ်ယောက်နဲ့ တွေ့ဆုံခွင့်ရရှိ ခဲ့ပါတယ်။ ဆရာကိုယ်တိုင်လည်း ကိုယ်အင်္ဂါမသန်စွမ်းသူတစ်ယောက်ဖြစ်ပါတယ်။ ဆရာရဲ့ ဆက်သွယ် ပေးမှုကြောင့် ရေစကြိုမြို့မှာ မသန်စွမ်းမှုဆိုင်ရာသင်တန်းတစ်ခုကို တတ်ရောက်ခွင့်ရခဲ့ ရာမှတဆင့် နိုင်ငံတော်ရဲ့ မသန်စွမ်းသူများအခွင့်အရေးဆိုင်ရာဥပဒေ 2015 နဲ့ နည်းဥပဒေ 2017 ပြဌာန်း ချက်တွေကို သိရှိခဲ့ပါသည်။
ကျွန်တော်တို့ မသန်စွမ်းသူများဟာ မသန်သော်လည်း စွမ်းဆောင်နိုင်ကြောင်းနှင့် မိမိရဲ့ မသန်စွမ်းမှုအပေါ်မှာ စိတ်ဓာတ်ကျမနေသင့်ကြောင်း၊ လက်လျော့အရှုံးမပေးသင့်ကြောင်း သိလာခဲ့ရ ပါသည်။ မိမိနှင့်ဘဝတူ မသန်စွမ်းညီအစ်ကိုမောင်နှမများလည်း တွေ့ဆုံရင်းနီးခွင့် ရခဲ့ပါသည်။ ဒီလိုနဲ့ ကျနော်ဒေသမှာ မသန်စွမ်းအဖွဲ့တစ်ခု ဖွဲ့စည်းဖြစ်ခဲ့ရင်းကနေ အများရဲ့ထောက်ခံအားပေးမှုကြောင့် အဖွဲ့ရဲ့ အလုပ်အမှုဆောင်တစ်ယောက်အဖြစ် ရွေးချယ်ခံခဲ့ရပါသည်။ ဒီနေရာမှာ ကျနော်နဲ့ဘဝတူ မသန်စွမ်း ညီအစ်ကိုမောင်နှမများကိုပြောပြချင်တာလေး တစ်ခုရှိပါတယ်။ ကျွန်တော်တို့ဟာ မွေးရာပါအခြေအနေများကြောင့် ရုပ်ပိုင်းဆိုင်ရာ စိတ်ပိုင်းဆိုင်ရာ ချို့ယွင်းအားနည်းချက်များ ဖြစ်ခဲ့ရသလို၊ ပြင်ပထိခိုက်မှုများကြောင့်လည်း ချို့ယွင်းအားနည်းချက်များ ဖြစ်ခဲ့ကြပါတယ် ဒါအပြင် ကျန်းမာရေး အသိပညာ နည်းပါးမှု ၊ စာပေဗဟုသုတ အားနည်းမှုများကြောင့်လည်း ရုပ်ပိုင်း စိတ်ပိုင်း ချို့ယွင်းအားနည်းချက် ဖြစ်ခဲ့ကြပါတယ်။ ဒီလိုမျိုး ကျနော်တို့ရဲ့ ရုပ်ပိုင်း စိတ်ပိုင်း ချို့ယွင်းအားနည်းချက် များနဲ့ ပတ်ဝန်းကျင်မှာရှိနေတဲ့ ရုပ်ပိုင်း စိတ်ပိုင်း မူဝါဒပိုင်း စတဲ့အတားအဆီးတွေနဲ့ တွေ့ကြုံခဲ့ရာကနေ မသန်စွမ်းမှုဆိုတာ ဖြစ်လာခဲ့ရပါတယ်။
ဒီတော့ ကျနော်တို့ရဲ့ မသန်စွမ်းမှုဆိုတာဟာ ကျနော်တို့တန်းတူအခွင့်အရေးမရရှိခြင်းရဲ့ အဓိက ပြဿနာမဟုတ်ပဲ အတားအဆီးများကသာ အဓိကပြဿနာ ဖြစ်တဲ့အတွက်ကြောင့် အဲ့ဒီ ပြဿနာများ ကို ကြိုးစားဖြေရှင်းရမည်ဖြစ်ပါသည်။ မသန်စွမ်းသူများလည်း လူဘောင်အသိုက်အဝန်းအတွင်းမှာ အများနှင့် တန်းတူ ပါဝင်လာနိုင်စေရန်အတွက် 2020 ခုနှစ် ဒီဇင်ဘာလ 3 ရက်နေ့မှာ ကျရောက်တဲ့ အပြည်ပြည်ဆိုင်ရာ မသန်စွမ်သူများနေ့ ဆောင်ပုဒ် ဖြစ်သော "Building Back Better: toward a disability-inclusive, accessible and sustainable post COVID-19 World" “ပိုမိုကောင်းမွန်သည့် ကိုဗစ်-၁၉ အလွန် ကမ္ဘာကို တည်ဆောက်ဖို့ မသန်စွမ်းသူများ လက်လှမ်းမီပါဝင်ပြီး ရေရှည်တည်တံ့ရန် ကြိုးစားစို့” ဆိုတဲ့ ဆောင်ပုဒ်လေးနဲ့အတူ မသန်စွမ်းသူများအပေါ် သနားဂရုဏာဖြစ်မယ့်အစား ကိုယ်ချင်းစာနာမှုများ ထားရှိနိုင်ကြပါစေလို့ ဆန္ဒပြုလိုက်ရပါတော့တယ်ခင်ဗျာ။

ဆွေထက်_ရေစကြို




02/12/2020

မနက်ဖြန် ၂၀၂၀ ခုနှစ်၊ ဒီဇင်ဘာလ (၃) ရက်နေ့မှာ ကျရောက်တဲ့ အပြည်ပြည်ဆိုင်ရာ မသန်စွမ်းသူများနေ့ အထိမ်းအမှတ် အစီအစဉ်တစ်ခုအနေနဲ့ မြန်မာနိုင်ငံမသန်စွမ်းသူများရှေ့ဆောင်အဖွဲ့(မီလီ)၏ အတိုင်ပင်ခံအရာရှိ ဦးနေလင်းစိုးရဲ့ မသန်စွမ်းသူများနေ့နဲ့ ပတ်သက်တဲ့ သိမှတ်စရာများအား ပြောကြားပေးထားတဲ့ အစီအစဉ်လေးကို တင်ဆက်ပေးလိုက်ရပါတယ် .....




01/12/2020

(၂၀၂၀ ပြည့်နှစ် အပြည်ပြည်ဆိုင်ရာ မသန်စွမ်းသူများနေ့ အကြို
ဂုဏ်ပြုဆောင်းပါး)

"ပိုမိုကောင်းမွန်သည့် ကိုဗစ်-၁၉ အလွန်ကမ္ဘာ တည်ဆောက်ဖို့ မသန်စွမ်းသူများ လက်လှမ်းမီပါဝင်ပြီး ရေရှည်တည်တံ့စေရန် ကြိုးစားစို့ "

ကြည်ထွန်း(လူမှု)

မျက်မှောက်ခေတ်တွင် စီးပွားရေးအားပြိုင်မှုများ၊ တဟုန်ထိုး တိုးတက်ပြောင်းလဲလာသည့် နည်းပညာများ၊ ရာသီဉတု ဖောက်ပြန်ပြောင်းလဲမှုများ၊ မသေချာမရေရာမှုများ၊ သဘာဝဘေးအန္တရာယ်များ စသည့် စိန်ခေါ်မှုများစွာကို ကမ္ဘာ့နိုင်ငံအသီးသီး၌ ရင်ဆိုင်ကြုံတွေ့နေရပေသည်။ ပို၍ဆိုးရွားသော စိန်‌ခေါ်မှုမှာ စီးပွားရေးနှင့် လူ့အဖွဲ့အစည်းအပေါ် ကြီးမားသော ဖိစီးမှုများ ကျရောက်စေသည့် ကိုဗစ်-၁၉ ကမ္ဘာ့ကပ်ရောဂါဘေး အကျပ်အတည်းကြီးပင် ဖြစ်သည်။ ၂၀၁၉ ခုနှစ်ကုန်ပိုင်းက စတင်ခဲ့သည့် ဤကပ်‌ရောဂါဆိုးကြီးသည် ၂၀၂၀ ပြည့်နှစ် တစ်နှစ်လုံးတွင် အလုပ်အကိုင်နှင့် အသက်မွေးဝမ်းကျောင်း လုပ်ငန်းဆုံးရှုံးမှုများ၊ ဆင်းရဲနွမ်းပါးမှုများကို ဆိုးရွားစွာ ဖြစ်ပေါ်စေခဲ့သည်။ အထူးသဖြင့် ထိခိုက်လွယ်၍ အင်အားနည်းသော မသန်စွမ်းသူများ၏ ဖွံ့ဖြိုးတိုးတက်မှုကို ကြီးစွာသော အဟန့်အတား ဖြစ်စေခဲ့သည်။
သို့ဖြစ်၍ ကုလသမဂ္ဂအဖွဲ့ကြီးက မသန်စွမ်းသူများ၏ စိတ်ဓာတ်ခွန်အားကို မြင့်မားစေရန်အလို့ငှာ ၂၀၂၀ ပြည့်နှစ် ဒီဇင်ဘာလ ၃ ရက်‌နေ့တွင် ကျရောက်မည့် အပြည်ပြည်ဆိုင်ရာ မသန်စွမ်းသူများနေ့ ဦးတည်ချက်ဆောင်ပုဒ်ကို “ပိုမိုကောင်းမွန်သည့် ကိုဗစ်-၁၉ အလွန် ကမ္ဘာကို တည်ဆောက်ဖို့ မသန်စွမ်းသူများ လက်လှမ်းမီပါဝင်ပြီး ရေရှည်တည်တံ့ရန် ကြိုးစားစို့” (Building Back Better : toward a disability inclusive accessible and sustainable post COVID-19 World”) ဟု သတ်မှတ် နှိုးဆော်လိုက်ခြင်းပင် ဖြစ်သည်။
ကမ္ဘာ့ကျန်းမာရေးအဖွဲ့၏ ခန့်မှန်းချက်အရ တစ်ကမ္ဘာလုံး၏ လူဦးရေ ၁၅ ရာခိုင်နှုန်းသည် မသန်စွမ်းသူများ ဖြစ်ကြသည်။ မသန်စွမ်းသူ ၆၀ ရာခိုင်နှုန်းသည် အမျိုးသမီးများ ဖြစ်ကြသည်။ အရှေတောင်အာရှ အာဆီယံဒေသတွင်း နိုင်ငံများတွင် မသန်စွမ်းသူဦးရေ သန်းပေါင်း ၉၀ ခန့်ရှိသည်။ အလုပ်သမား၊ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန၏ ၂၀၁၉ ခုနှစ် ကြားဖြတ် သန်းခေါင်စာရင်း အရ မြန်မာနိုင်ငံတွင် မသန်စွမ်းသူဦးရေ ၆ သန်းခန့် (ရာခိုင်နှုန်းအားဖြင့် ၁၂ ဒသမ ၈ ရာခိုင်နှုန်း ရှိသည်။ မသန်စွမ်းသူများ၏ ဘဝတွင် ခံစားတွေ့ကြုံနေရသည့် အခက်အခဲအတားအဆီးများသည် ၎င်းတို့၏ “ချွတ်ယွင်းအားနည်းမှု” ကြောင့်မဟုတ်ဘဲ ၎င်းတို့ ပတ်ဝန်းကျင်တွင် ရင်ဆိုင်ကြုံတွေ့နေရသည့် အတားအဆီးများကြောင့် ဖြစ်သည်။
မသန်စွမ်းသူများ လူ့အဖွဲ့အစည်းအတွင်း အများနည်းတူ နေထိုင်နိုင်ရေးအတွက် ကြုံတွေ့နေရသည့် အခြေခံအဆောက်အဦဆိုင်ရာ၊ လူ့အဖွဲ့အစည်းဆိုင်ရာ အတားအဆီးများစွာ ရှိပါသည်။ အဆိုပါ အတားအဆီးများ ကို အနှစ်ချုပ်ကြည့်လျှင် (၁) ပတ်ဝန်းကျင်ရှိ ရုပ်ပိုင်းဆိုင်ရာ အတားအဆီး (Physical Barriers) (၂) မသန်စွမ်း ဖြစ်မှုအပေါ် သဘောထားခံယူချက်ပိုင်းဆိုင်ရာ အတားအဆီးများ (Attitudinal Barriers) (၃) ဉပဒေနှင့် မူဝါဒပိုင်း ဆိုင်ရာ အတားအဆီးများ (Policies Barriers) (၄) ဆက်သွယ်မှုပိုင်းဆိုင်ရာ အတားအဆီးများ (Communication Barriers) ဟူ၍ အတားအဆီး လေးမျိုးကို တွေ့မြင်ရသည်။
စင်စစ် “မသန်စွမ်းမှု” ဆိုသည်မှာ ပတ်ဝန်းကျင် ရုပ်ပိုင်းဆိုင်ရာ၊ စိတ်သဘောထားအမြင်ပိုင်းဆိုင်ရာနှင့် အခြားအတားအဆီးများကြောင့် လူ့အဖွဲ့အစည်းအတွင်း အပြည့်အဝ ပါဝင်လှုပ်ရှားနိုင်မှု မရှိခြင်းကို ဆိုလိုသည် ဖြစ်ရာ အထက်ဖော်ပြပါ အတားအဆီးအဟန့်အတားများ လျော့ပါး ပပျောက်သွားအောင် မလုပ်နိင်သ၍ ကာလပတ်လုံး လူ့အခွင့်အရေးဆုံးရှုံးကာ ဆင်းရဲခြင်းတည်းဟူသော နွံအတွင်းမှ ရုန်းထွက်နိုင်မည် မဟုတ်ပေ။
မသန်စွမ်းသူများအတွက် “လက်လှမ်းမီ ရယူသုံးစွဲခြင်းနှင့် အတားအဆီးကင်းသည့် ပတ်ဝန်းကျင်” ဖန်တီး ပေးဖို့ လိုပြီ။ ထိုသို့ ဖန်တီးရာ၌ ကမ္ဘာသုံးပုံစံ (အများသုံးပုံစံ)ဖြစ်သော Universal Design ကို အသုံးပြုရပါမည်။ Universal Design ဆိုသည်မှာ - (၁) လူတိုင်းလက်လှမ်းမီရယူအသုံးပြုနိုင်သော အရာများကို ဖန်တီး‌ဖော်ဆောင် ခြင်း၊ (၂) လူတိုင်းပါဝင်လှုပ်ရှားသွားလာအသုံးပြုနိုင်သော ပတ်ဝန်းကျင်ကို ဖော်ဆောင်ခြင်း၊ (၃) လူတိုင်း လက်လှမ်းမီ ရယူအသုံးပြုနိုင်သော ဝန်ဆောင်မှုများကို ပြင်ဆင်ထားခြင်း၊ (၄) လူတိုင်းကို တန်းတူ အကျိုးပြု ပြီး ခွဲခြားမှုမရှိသော မူဝါဒများကို ပြဌာန်းကျင့်သုံးခြင်း၊ တနည်းအားဖြင့် မသန်စွမ်းသူများ၊ စွမ်းဆောင်ရည် မတူကွဲပြားသူများ၊ သွင်ပြင်လက္ခဏာ အမျိုးမျိုးရှိသူများ လက်လှမ်းမီရယူအသုံးပြုနိုင်သောပတ်ဝန်းကျင်၊ ဆက်သွယ်ရေး နည်းပညာများနှင့် ထုတ်ကုန်ပစ္စည်းများကို ဖန်တီးပြုလုပ်ခြင်း ဖြစ်သည်။ အချုပ်အားဖြင့် ထုတ်ကုန် ပစ္စည်းများ၊ ဆက်သွယ်ရေးနည်းလမ်းများ၊ ဝန်‌ဆောင်မှုများ၊ ရုပ်ပိုင်းဆိုင်ရာ ပတ်ဝန်းကျင်ကို သက်ကြီးရွယ်အို၊ သန်စွမ်းသူ၊ မသန်စွမ်းသူ၊ ဆင်းရဲချမ်းသာ မခွဲခြားဘဲ နဂိုမူလ လျာထား ကုန်ကျစရိတ်ထက်မပိုဘဲ လူတိုင်းအသုံးပြု နိုင်ရန် ဆောင်ရွက်ထားမှုများ အားလုံးသည် အတားအဆီးကင်းသော ပတ်ဝန်းကျင်ကို ဖန်တီးပေးခြင်းပင် ဖြစ်ပါသည်။ သာဓကအားဖြင့် နေပြည်တော် မြို့မဈေးနှင့် ရေပန်းဉယျာဉ်တို့၌ မသန်စွမ်းသူများ လက်လှမ်းမီ ရယူ သုံးစွဲနိုင်ရေးနှင့် အတားအဆီးကင်းသော ဝန်းကျင်ဖြစ်အောင် ဖန်တီးထားသည်ကို ကြည်နူးဖွယ်ရာ တွေ့မြင် နိုင်ပါသည်။
(၆၁) ကြိမ်မြောက် ကုလမဂ္ဂအထွေထွေညီလာခံကြီးက မသန်စွမ်းသူတိုင်း လူ့အခွင့်အရေးအားလုံးနှင့် အခြေခံလွတ်လပ်ခွင့်များ ညီမျှစွာ အပြည့်အဝ ရရှိရေးကို ကာကွယ်‌ဆောင်ရွက်ရန်၊ တိုးမြှင့်လုပ်ဆောင်ရန်၊ သေချာစေရန်နှင့် မသန်စွမ်းသူများ၏ မွေးရာပါဂုဏ်သိက္ခာကို ပိုမိုလေးစားမှု ရှိစေရန် ရည်ရွယ်လျက် “ကုလသမဂ္ဂ မသန်စွမ်းသူများ အခွင့်အရေးများဆိုင်ရာ ကွန်ဗင်းရှင်း” United Nations Convention on the Rights of Persons with Disabilities – UNCRPD) ကို ၂၀၀၆ ခုနှစ် ဒီဇင်ဘာ ၁၃ ရက်တွင် အတည်ပြုချမှတ်ခဲ့သည်။ မြန်မာနိုင်ငံက ၂၀၁၁ ခုနှစ် ဒီဇင်ဘာလ ၇ ရက်နေ့တွင် အဆိုပါ ကွန်ဗင်းရှင်းတွင် ပါဝင်အတည်ပြု လက်မှတ်ရေးထိုးပြီး အဖွဲ့ဝင်နိုင်ငံ တစ်နိုင်ငံ ဖြစ်လာသည်။
UNCRPD ပါ ပြဌာန်းချက်များကို ပိုမိုထိရောက်စွာ အကောင်အထည်ဖော်ဆောင်ရွက်နိုင်ရန်၊ နိုင်ငံသားများ ခံစားခွင့်ရှိသည့် လူ့အခွင့်အ‌ရေးနှင့် အခြေခံလွတ်လပ်ခွင့်များကို မသန်စွမ်းသူအားလုံး တန်းတူညီမျှ အပြည့်အဝ ရရှိ စေရန်၊ နိုင်ငံရေး၊ လူမှုရေး, ပညာရေး၊ ကျန်းမာရေး၊ စီးပွား‌ရေး၊ ယဉ်ကျေးမှုနှင့် ပြည့်သူ့‌ရေးရာနယ်ပယ်အသိးသီး တွင် အခြားသူများနှင့်တန်းတူ လူမှုအဖွဲ့အစည်းတွင် ပေါင်းစည်းပါဝင်နိုင်ရန် စသည့်ရည်ရွယ်ချက်များဖြင့် ၂၀၁၅ ခုနှစ် ဇွန်လ ၅ ရက်တွင် ပြည်ထောင်စုလွှတ်တော်က “မသန်စွမ်းသူများ အခွင့်အရေးဉပဒေ”(၂၀၁၅ ခုနှစ်) ကို ပြဌာန်းခဲ့သည်။
နိုင်ငံတော်အစိုးရက မသန်စွမ်းသူများ၏ လူမှုစီးပွားဘဝ ဖွံ့ဖြိုးတိုးတက်ရေး၊ ဆင်းရဲနွမ်းပါးမှု လျော့နည်းရေး၊ မသန်စွမ်းသူများ၏ ပညာရေးအဆင့်အတန်း မြင့်မားရေး၊ အသက်မွေးဝမ်းကျောင်း အတတ်ပညာ နှင့် အလုပ်အကိုင်အခွင့်အလမ်း တိုးတက်ရေး၊ ကျန်းမာရေးစောင့်ရှောက်မှု မြှင့်တင်‌ပေးရေး၊ ပတ်ဝန်းကျင်အသိုက် အဝန်းအတွင်း ဝင်ဆံ့မှု မြှင့်တင်ရေး၊ စွမ်းဆောင်နိုင်ရည်နှင့် စိတ်ဓာတ်ခွန်အား မြင့်မားရေး စသည်တို့အတွက် “မြန်မာနိုင်ငံ မသန်စွမ်းသူများ ဖွံ့ဖြိုးတိုးတက်ရေး အမျိုးသားအဆင့် မဟာဗျူဟာ (၂၀၁၆-၂၀၂၅) ကို ရေးဆွဲ ဆောင်ရွက်လျက်ရှိသည်။
မသန်စွမ်းသူများ၏အခွင့်အရေးများဉပဒေပါ ပြဌာန်းချက်များကို ထိရောက်အောင်မြင်စွာ အကောင်အထည် ဖော်ဆောင်ရွက်နိုင်ရေးအတွက် နိုင်ငံတော် ဒုတိယသမ္မတ (၂) ဦး‌ဆောင်‌သော “မသန်စွမ်းသူများ၏ အခွင့်အရေး ဆိုင်ရာ အမျိုးသားကော်မတီ” ကို ၂၀၁၇ ခုနှစ် စက်တင်ဘာလ ၁၄ ရက် တွင် ဖွဲ့စည်းဆောင်ရွက်သည်။ အဆိုပါ ကော်မတီနှင့် လုပ်ငန်းကော်မတီတို့ကို အထောက်အကူဖြစ်စေရန် ပညာရေး၊ ကျန်းမာရေး၊ အလုပ်အကိုင်ရေးရာ၊ သုတေသန၊ စောင့်ကြည့်အကဲဖြတ်၊ မသန်စွမ်းအမျိုးသမီးနှင့် ကလေးသူငယ်ရေးရာ၊ သတင်းအချက်အလက်နှင့် နည်းပညာ၊ အလွယ်တကူသွားလာနိုင်ရေး၊ သဘာဝဘေးနှင့် အ‌‌ရေးပေါ်အခြေအနေဆိုင်ရာ၊ တရားမျှတမှု ရရှိပိုင်ခွင့် ဆိုင်ရာ ဟူသည့် အထောက်အကူပြု ဆပ်ကော်မတီ (၉) ခုကိုလည်း ဖွဲ့စည်းထားပြီး ဖြစ်သည်ကို တွေ့ရသည်။
ဉပဒေပါ ပြဌာန်းချက်များကို ရှင်းလင်းလွယ်ကူစွာ လက်တွေ့ဆောင်ရွက်နိုင်ရန် လူမှုဝန်ထမ်း၊ ကယ်ဆယ်ရေးနှင့် ပြန်လည်နေရာချထားရေး ဝန်ကြီးဌာနက “မသန်စွမ်းသူများ၏အခွင့်အရေးနည်းဉပဒေများ” ကို ၂၀၁၇ ခုနှစ် ဒီဇင်ဘာ ၂၇ ၇က်တွင် ထုတ်ပြန်ခဲ့သည်။ ရှေးဦးအရွယ်ကလေးသူငယ်ဖွံ့ဖြိုး‌ရေး အခြေအနေတိုင်းတာ စစ်ဆေးမှုများနှင့် ပြန်လည်ထူထောင်ရေးဆိုင်ရာ မဟာဗျူဟာ အစီအစဉ် (Early Childhood Intervention – ECI) (၂၀၁၇ – ၂၀၂၁) ကို ၂၀၁၇ ဧပြီလ ၇ ရက်တွင် ချမှတ်ခဲ့ပြီး ကနဦးစီမံကိန်းများကို ရန်ကုန်တိုင်း၊ ဧရာဝတီတိုင်း၊ စစ်ကိုင်းတိုင်းနှင့် မွန်ပြည်နယ်တို့ရှိ မြို့နယ်ရှစ်မြို့နယ်ရှိ ကျေးလက်၊ မြို့ပြ နေရာ ကိုးခုတို့တွင် စတင်‌ဆောင်ရွက် ခဲ့သည်။
မြန်မာနိုင်ငံသည် ကုလသမဂ္ဂအဖွဲ့ဝင်နိုင်ငံ တစ်နိုင်ငံ ဖြစ်သည့်အပြင် အာရှပစိဖိတ်ဒေသနှင့် အာဆီယံဒေသတို့တွင် အဖွဲ့ဝင်နိုင်ငံဖြစ်သည့် အားလျော်စွာ အာရှပစ္စိဖိတ်ဒေသဆိုင်ရာ မသန်စွမ်းသူများ ဆယ်စုနှစ် ဖြစ်သည့် အင်ချွန်းမဟာဗျူဟာနှင့် အာဆီယံအသိုက်အဝန်းအတွင်း မသန်စွမ်းသူများ ပါဝင်မှုနှင့် မသန်စွမ်းသူများ၏ အခန်းကဏ္ဍမြင့်မားရေးဆိုင်ရာ ဘာလီကြေညာချက်၊ အာဆီယံမသန်စွမ်းသူများဆိုင်ရာ ဆယ်စုနှစ် လုပ်ငန်းစဉ် (၂၀၁၁ - ၂၀၂၀) တို့ကိုလည်း ဒေသတွင်းနိုင်ငံများနှင့်အတူ လက်တွဲပူးပေါင်း အကောင် အထည်ဖော် ဆောင်ရွက်လျက်ရှိသည်ကို တွေ့ရသည်။
နိုင်ငံတော်အစိုးရအနေဖြင့် မသန်စွမ်းသူများ၏ လိုအပ်ချက်များကို ရေရှည်ဖြည့်ဆည်းပေးနိုင်ရန် ရည်ရွယ်၍ မသန်စွမ်းမှုအဆင့်သတ်မှတ်ခြင်းနှင့် မသန်စွမ်းသူများ မှတ်ပုံတင်ခြင်း စနစ်တစ်ရပ်ကို ဖော်ဆောင်လျက် ရှိသည်။ ၂၀၁၉ ခုနှစ် စက်တင်ဘာလမှ စတင်၍ ကနဦးစီမံကိန်းကာလ ရှစ်လ သတ်မှတ်ပြီး မသန်စွမ်းမှု အဆင့်သတ်မှတ်ခြင်း ပထမအဆင့်နှင့် ပတ်သက်သည့် ပုံစံများ၊ လုပ်ငန်းစဉ်များ၊ အသိပညာပေး သင်တန်းများ၊ ကွင်းဆင်းဆောင်ရွက်ခြင်းလုပ်ငန်း စသည်များကို စီမံကိန်းနယ်ပယ်များဖြစ်သည့် ရန်ကုန်တိုင်းဒေသကြီး လှိုင်သာယာ၊ ကရင်ပြည်နယ် ဘားအံ၊ ပဲခူးတိုင်းဒေသကြီး ညောင်လေးပင်တို့တွင် အကောင်အထည်ဖော် ဆောင်ရွက်လျက်ရှိသည်။
ဤသို့ နိုင်ငံတော်အစိုးရ၏ ဦးဆောင်မှု၊ ဌာနဆိုင်ရာအဖွဲ့အစည်းများနှင့် ကဏ္ဍပေါင်းစုံမှ ပါဝင်ပတ်သက်သူ များ၏ ကူညီပံ့ပိုးမှုဖြင့် မသန်စွမ်းသူများ၏ အခွင့်အရေးများနှင့် ဖွံ့ဖြိုးတိုးတက်ရေး လုပ်ငန်းများ အရှိန်အဟုန် ရနေဆဲတွင် ကိုဗစ်ရောဂါ ကြမ္မဆိုးကြီးက ဝင်ရောက်လာသည်။ မသန်စွမ်းသူများသည် အခြားသူများနှင့် နှိုင်းယှဉ် ပါက လူမှုရေး၊ ကျန်းမာရေး၊ စီးပွားရေးအခြေအနေတို့တွင် အဆိုးရွားဆုံးပုံစံဖြင့် ရင်ဆိုင်ကြုံတွေ့နေရသူများ ဖြစ်သည်။ သို့ဖြစ်၍ လူမှုဝန်းထမ်း ကယ်ဆယ်ရေးနှင့်ပြန်လည်နေရာချထားရေး ဝန်ကြီးဌာနအနေဖြင့် မသန်စွမ်း သူများ၏အခွင့်အရေး၊ ပြန်လည်ထူထောင်ရေးနှင့် ဖွံ့ဖြိုးတိုးတက်ရေးကို အရှိန်အဟုန်မပြတ် ဆောင်ရွက်နိုင်ရန် Video Conferencing စနစ်ဖြင့် ဆောင်ရွက်လျက်ရှိသည်ကို ဝမ်းမြောက်ဖွယ် တွေ့ရသည်။
ယခုကြုံတွေ့နေရသော ကိုဗစ်-၁၉ ကပ်ရောဂါကာလအတွင်း ဌာနဆိုင်ရာများ၊ မြန်မာနိုင်ငံ မသန်စွမ်းသူများ အသင်းချုပ်နှင့် ပူးပေါင်း၍ မသန်စွမ်းမှုအလိုက် အသိပညာပေးအစီအစဉ်များ ပြုလုပ်ခြင်း၊ မသန်စွမ်းသူများ ကိုဗစ်-၁၉ အရေးပေါ်တုံ့ပြန်ရေး ပူးပေါင်းကော်မတီနှင့် ညှိနှိုင်း၍ မသန်စွမ်းသူများနှင့် ၎င်းတို့၏ မိသားစုများအတွက် ငွေကြေးထောက်ပံ့ခြင်း၊ ကိုဗစ်-၁၉ ရောဂါကူးစက်ခံရသည့် မသန်စွမ်းသူများကို ငွေကြေးထောက်ပံ့ခြင်း၊ ကိုဗစ်-၁၉ ရောဂါကာလအတွင်း မသန်စွမ်းသူများ ချန်ရစ်ခဲ့ခြင်း မရှိစေရန် စီမံချက်ရေးဆွဲ ဆောင်ရွက်လျက်ရှိသည်။ ၂၀၂၀ ပြည့်နှစ် မေလ ၃ ရက်နေ့က ကျင်းပပြုလုပ်သော မသန်စွမ်းသူများ၏ အခွင့်အရေးများဆိုင်ရာ လုပ်ငန်းကော်မတီ ပဉ္စမအကြိမ်အစည်းအဝေးက ကိုဗစ်-၁၉ လွန်ကာလတွင် မသန်စွမ်းသူများ၏ အခွင့်အရေးများကို ပေါင်းစပ်ဆောင်ရွက်သော အမျိုးသားအဆင့် မဟာဗျူဟာငါးနှစ် စီမံကိန်း (National Strategic Plan in Mainstreaming the Rights of Persons with Disabilities) ကို အမြန်ဆုံး ရေးဆွဲချမှတ် ဆောင်ရွက်မည်ဟု သိရ၍ အားတက်ကြည်နူးမိပါသည်။
ကမ္ဘာပေါ်တွင် ကပ်ရောဂါများသည် အခါအားလျော်စွာ ပေါ်ပေါက်လာစမြဲဖြစ်ပါသည်။ ကျောက်ရောဂါ၊ ဝက်သက်ရောဂါ၊ ကာလဝမ်းရောဂါ၊ အီဘိုလာရောဂါ၊ အေအိုင်ဒီအက်စ်ရောဂါ၊ အနာကြီးရောဂါ စသဖြင့် ကပ်ရောဂါ များ ဖြစ်ပွားခဲ့သော်လည်း ကာကွယ်ဆေး၊ ကုသဆေးများဖြင့် နှိမ်နင်းအောင်မြင်ခဲ့သည်သာ ဖြစ်ပါသည်။ ယခု ဖြစ်ပွားလျက်ရှိသော ကိုဗစ်-၁၉ ကူးစက်မြန်ရောဂါအတွက်လည်း ကာကွယ်ကုသဆေးများ ပေါ်ပေါက်လာ တော့မည်ဖြစ်ရာ များမကြာမီတွင် ပိုနေမြဲ ကျားနေမြဲ ဖြစ်လာမည်မှာ မလွဲပေ။ သို့ဖြစ်ရာ ပွဲမဝင်ခင် အပြင်က ကျင်းပဆိုသည့်အတိုင်း မသန်စွမ်းသူများ လက်လှမ်းမီပါဝင်ပြီး ရေရှည်တည်တံ့သော အစီအမ့များကို ကြိုတင် ချမှတ် ဆောင်ရွက်ကြခြင်းဖြင့် ပိုမိုကောင်းမွန်သော ကိုဗစ်-၁၉ လွန် ကမ္ဘာဆီသို့ ရှေးရှုဆောင်ရွက်ကြရန် တိုက်တွန်း နှိုးဆော်အပ်ပါသည်။

ကြည်ထွန်း (လူမှု)

19/10/2020

အတ္တစေရာ
***********
ဇာတ်သိမ်းပိုင်း
***************
(၁)
ကျော်စွာ - ဒေါက်တာ နေကောင်းရဲ့နော် မတွေ့တာတောင် အတော်ကြာပြီပဲဗျ
ဘဟိန်း - ဪ မိတ်ဆွေကြီးက ဘယ်သူများပါလိမ့်ဗျာ
ကျော်စွာ - ကျွန်တော်က ရဲအုပ်ကျော်စွာ ပါ
ဘဟိန်း - ခင်ဗျားကို ကျွန်တော်မဖိတ်မိဘူးထင်တယ်ဗျ
ကျော်စွာ - မဖိတ်ဘဲလာတဲ့ ဧည့်သည်ပေါ့ဗျာ တကယ်တော့ ခင်ဗျားရဲ့မိတ်ဆွေ ရဲမှူးကြီးက မအားလို့ သူ့တပည့်ကျွန်တော့်ကို လွှတ်လိုက်တာပါ
ဘဟိန်း - ဘာပဲဖြစ်ဖြစ်ရောက်လာမှတော့ ကျွန်တော့်ဧည့်သည်ပေါ့ဗျာ ထိုင်ပါ ထိုင်ပါ
ကျော်စွာ - ဟောဟိုက ဒေါက်တာလွမ်းဝေတို့ စားပွဲမှာ သွားထိုင်လိုက်ပါ့မယ်
ဘဟိန်း - ကိုလွမ်းဝေကို ခင်ဗျားက သိနေတာလား
ကျော်စွာ - ဒေါက်တာလွမ်းဝေနဲ့ ကျွန်တော်က တက္ကသိုလ်ပေါင်းစုံ လက်ဝှေ့ပွဲမှာ ထိုးဖော်ထိုးဖက်တွေပါဒေါက်တာ
ဘဟိန်း - ဪ ဪ ဒီလိုလား ကောင်းပါပြီဗျာ

(၂)
ဘဟိန်း - ကဲ ကဲ ဧည့်သည်တွေလဲ စုံပြီလို့ထင်ပါတယ် ဆိုတော့ကာ ကျွန်တော်ဒီနေ့ ပါတီလေးလုပ်ဖြစ်ရတဲ့ အကြောင်းအရင်းလေးကို ရှင်းပြချင်ပါတယ်၊ ကျွန်တော်ဟာ လွန်ခဲ့တဲ့ ၁၇ နှစ်လောက်မှာ ဆေးတက္ကသိုလ်ကို တက်ရောက်ခဲ့ပြီး ဆေးပညာကို သင်ယူခဲ့ပါတယ်။ တဖက်မှာလည်း တကယ်ကို စိတ်ဝင်စားတဲ့ စိတ်ပညာကိုလဲ တစိုက်မတ်မတ်လေ့လာခဲ့ပါတယ်။ ဆေးကျောင်းပြီးလို့ ဆရာဝန်ပေါက်စဘဝမှာ မြန်မာပြည် အနှံ့က စိတ်ပညာကို ကျွမ်းကျင်တဲ့ ဆရာတွေဆီမှာ ပညာတွေ ဆည်းပူးလေ့လာခဲ့ပါတယ်၊ အဲဒီနောက် စိတ်ပညာအပေါ် ကျွန်တော့်ရဲ့စိတ်ပါဝင်စားမှုက ပို ပြင်းထန်လာလို့ အင်္ဂလန်အထိ သွားရောက်လေ့လာခဲ့ပါ တယ်။ အင်္ဂလန်မှာ ၃ နှစ်လောက်လေ့လာပြီးချိန်မှာ အန္ဒိယက သူငယ်ချင်းရဲ့ အကူအညီနဲ့ အန္ဒိယကိုသွားပြီး စိတ်ညှို့တဲ့ အတတ်ပညာကို သင်ယူခဲ့ပါတယ်။ ကျွန်တော့်ရဲ့မိတ်ဆွေအတော်များများကတော့ ကျွန်တော် အင်္ဂလန်ကို သွားတာပဲသိပြီး အန္ဒိယကို သွားတာတော့ မသိလိုက်ကြပါဘူး။ ဒီပညာတွေကို သင်ယူတာကတော့ စိတ်ရောဂါဝေဒနာရှင်တွေကို ကုသပေးချင်လို့ပါ အခု ကျွန်တော်ဟာ ဆေးပညာနဲ့ စိတ်ညှို့ပညာကို သုံးပြီး ကုသမှုတွေကို လုပ်နိုင်တော့မှာမို့လို့ ကျွန်တော့်ရဲ့အောင်မြင်မှုကို မိတ်ဆွေတွေနဲ့အတူ မျှဝေချင်လို့ ဒီပါတီပွဲလေးကို လုပ်ရတာပါ
ဧည့်သည်များ - “ဖြောင်း ဖြောင်း ဖြောင်း ဖြောင်း”
လွမ်းဝေ - ဖြောင်း ဖြောင်း ဖြောင်း ဖြောင်း ….. ခင်ဗျားသိပ်တော်ပါတယ် ကိုဘဟိန်း ခင်ဗျားဟာ ခင်ဗျားရဲ့ ကျော်ဇောလိုမှု အတ္တကြောင့် ကိုယ့်ညီမအရင်းကို တောင် ကြွက်ကလေးတွေလို စမ်းသပ်နိုင်တဲ့ သိပ်ရက်စက်တဲ့သူပဲဗျ ခင်ဗျားကုသတယ်ဆိုတာကလဲ လျှပ်စစ်လှိုင်းနဲ့ ဦးဏှောက်ကို ရှော့တိုက်ပြီး မှတ်ဉာဏ်ဖျောက်တာပါ ပြီးမှစိတ်ညှို့ပြီး ခင်ဗျားလိုရာကို ခိုင်းတာပါ
ဘဟိန်း - ဪ မင်းက အားလုံးကို သိပြီးမှကိုး အေး ငါ့ကို အခက်တွေ့အောင်လုပ်တဲ့သူတွေအားလုံး သေကြရ တာချည်းပဲကွ တိုက်ဂါး ဂျာဂွာ Coming
ခင်ဇော် - ခင်ဗျားရဲ့ ဂျာမန်ခွေးကြီးနှစ်ကောင်ကို ခေါ်နေတာလား ခင်ဗျားခွေးတွေက ဂျာမန်ကဆိုပေမယ့် မြန်မာ့ထန်းလျှက် ကိုတော့ ကြိုက်တာပါပဲဗျာ ခင်ဗျားခွေးတွေကို ထညက်နဲ့ စည်းရုံးပြီး လှောင်အိမ်ထဲ ထည့်ထားလိုက်ပြီ သော့က ကျုပ်ဆီမှာ အဲ အဲ အောင်ကြီးကိုလဲမခေါ်နဲ့ဗျ ရဲအုပ် ကိုကျော်စွာရဲ့ လူတွေက ဖမ်းထားပြီးပြီ
ကျော်စွာ - ကိုဘဟိန်း ခင်ဗျား အသာတကြည်အဖမ်းခံလိုက်ဗျာ ကျွန်တော် လူတွေကြားထဲ ပစ်လားခတ်လား မလုပ်ချင်ဘူး
ဘဟိန်း - ဟား ဟား ဟား ဟား မင်းတို့က ငါ့ကို ဖမ်းချင်တယ်ပေါ့ အေးလေ ငါ့ စိတ်ညှို့ပညာ ဘယ်လောက်စွမ်းလဲပြရသေးတာပေါ့ ကဲ ကျော်စွာ ငါ့ကိုကြည့်စမ်း အေး မင်းအခုက စပြီး ငါပြောတဲ့အတိုင်းလုပ်ရမယ် မင်းသေနတ်နဲ့ လွမ်းဝေရဲ့ ဘယ်ဖက်ရင်အုံကို ချိန်လိုက်စမ်း အေး ဟုတ်ပြီ ပြီးရင် မင်းသေနတ်နဲ့ ---
----- ဒိုင်း ဒိုင်း ---- အား

(၃)
ခင်ဇော် - ဆရာ သတိရပြီလား
လွမ်းဝေ - ကိုခင်ဇာ် ကျွန်တော်ဘယ်ရောက်နေတာတုန်း
ခင်ဇော် - ဆေးခန်းမှာလေဆရာ
လွမ်းဝေ - ဟိုလူ ကိုဘဟိန်းရော ဘယ်လိုဖြစ်သွားပြီလဲ
ကျော်စွာ - သူ့ကတော့ သေရှာပြီဗျာ သူက မသေလဲ သေဒဏ်ကျနိုင်တယ်ဗျ သူစမ်းသပ်ရင်း လျှပ်စစ်ဓါတ်အပေး လွန်သွားတဲ့ သူ့ဆန်စက်က အလုပ်သမားလေး ၂ ယောက်ရဲ့အလောင်းကို ခြံနောက်မှာ မြှုပ်ထားတာ တွေ့တယ် အောင်ကြီးကလဲ သူ့ဆရာလုပ်တာကို ဖြောင့်ချက်ပေးပြီးပြီ
လွမ်းဝေ - ကျွန်တော့်ခေါင်းက သေနတ်ထိတာလား နာလိုက်တာဗျာ
ကျော်စွာ - ခင်ဗျားကို ခင်ခင်မြက ကယ်လိုက်တာပဲ ဒေါက်တာ ကိုဘဟိန်းဟာ တကယ်တော်တဲ့ စိတ်ညှို့ပညာရှင်ဗျ ကျွန်တော့်ကို စိတ်ညှို့တုန်းက ကျွန်တော်ဆို ခင်ဗျားကို သေနတ်နဲ့ ပစ်မိတော့မလို့ သူအမိန့်ပေးတာမဆုံးခင် ခင်ခင်မြက အားလုံးကိုနားလည်သွားပြီး ကိုဘဟိန်းကို သေနတ်နဲ့ပစ်လိုက်လို့ တော်တော့တာ သူအမိန့်ပေးတာသာ အဆုံးထိဖြစ်ရင် မလွယ်ဘူး
လွမ်းဝေ - ဟုတ်တယ်ဗျ သူအမိန့်ပေးတာ အတိအကျ နှလုံးရှိတဲ့ နေရာဖြစ်တဲ့ ဘယ်ရင်အုံကပစ်ခိုင်းတာ အသေသတ်တဲ့သဘောဗျ သူ့ရဲ့ထင်ပေါ်လိုမှုနဲ့ အတ္တကြီးမှုက သူ့ကို ပြန်သတ်သွားတာပဲဗျာ တနည်းအားဖြင့် အတ္တရဲ့ ကျေးကျွန်ဖြစ်သွားတာပေါ့ဗျာ ဒါနဲ့ ခင်ခင်မြက ဘယ်က သေနတ်ရသွား တာလဲဗျ
ကျော်စွာ - သူ့အစ်ကိုက ကာကွယ်ဖို့ပေးထားတဲ့ သေနတ်လေးဗျ ဝေါလ်တာပီပီကေ ခေါ်တယ် ကျည်ဆံက ပွိုင့်သေးပေမယ့် အနီးကပ် ၂ ချက်ပစ်ခံရတော့ ဆေးရုံပို့တုန်း လမ်းမှာတင် ဆုံးတာပဲ သူ့လက်နက်နဲ့ သူပြန်ထိတဲ့ သဘောပါပဲဗျာ
လွမ်းဝေ - ခင်ခင်မြက လူသတ်မိတဲ့သဘောလားကိုကျော်စွာ
ကျော်စွာ - အင်း သူက ကာကွယ်တဲ့သဘောဆိုတော့ အပြစ်လွတ်လောက်ပါတယ် အခုတော့ စခန်းမှာ ခေါ်ထားရတာပေါ့။
ခင်ဇော် - အေးဗျာ ဆရာရေ ဆရာကတော့ ခင်ခင်မြကယ်လို့ အသည်းနှလုံးကို မထိပဲ အသက်ရှင်ပေမယ့် ဆရာ အသည်းတော့ ကွဲရဦးမှာပဲဆရာရေ
လွမ်းဝေ - ကိုခင်ဇော် ဘာပြောချင်တာလဲဗျ ကျွန်တော်နားမလည်တော့ဘူး
ခင်ဇော် - နန္ဒာရဲ့ သူငယ်ချင််းနဲ့ ခင်ခင်မြနဲ့က အရမ်းချစ်ကြတဲ့ ချစ်သူတွေလေ ပြီးတော့ နန္ဒာနဲ့ ခင်ခင်မြကလည်း အရမ်းချစ်ကြတဲ့ သူငယ်ချင်းတွေဗျ ဒါကြောင့် သူ့အစ်ကို လက်က ကယ်ခဲ့တာလေ။ အခုတော့ ခင်ခင်မြကို နန္ဒာရဲ့ သူငယ်ချင်းက အနားကမခွာပဲ အရိပ်တကြည့်ကြည့် စောင့်ရှောက်နေပြီ ခင်ခင်မြကလဲ မှတ်ဉာဏ်တွေ ဖျောက်ထားခံရတယ်ဆိုပေမယ့် မေတ္တာတရားက ဆန်းကျယ်တယ်လေ အခု ဆိုရင် မကြာခင် သူတို့ လက်ထပ်ကြတော့မယ်လို့ ဒေါ်ဒေါ်ကြွေကပြောတယ်ဗျ
လွမ်းဝေ - ဗျာ …………….
(ပြီး၏)



03/10/2020

အတ္တစေရာ
***********
အပိုင်း(၂)
*********
(၁)
ခင်ဇော် - ဘယ်လိုလဲဆရာ ထူးဆန်းတယ်လို့မခံစားမိဘူးလား ကျွန်တော့်ရဲ့ နှစ်ပေါင်းများစွာတွေ့ကြုံလာခဲ့ရတဲ့ လူကဲခတ်ပညာနဲ့ ပြောရမယ်ဆိုရင် ---
Dr.လွမ်းဝေ - ကိုခင်ဇော် ခင်ဗျားတော့ လုပ်လာပြီ ပြောစရာရှိတာပြောပါဗျ
ခင်ဇော် - ဟဲ ဟဲ ဒီလိုပါဆရာ အဲ့ဒီ နတ်သမီးလေးခင်ခင်မြကို ဆရာကြည့်တဲ့အကြည့်အရ ဆရာတို့ကြားမှာ တခုခုတော့ရှိမယ်လို့ ထင်မိလို့ပါဆရာ ပြီးတော့ ကိုဘဟိန်းက သူ့ညီမကို အတော်လေးချစ်ပုံရတယ်ဗျ စကားကို အတင်းဖြတ်ပစ်လိုက်တာကိုလဲ သတိထားမိလို့ပါ
Dr.လွမ်းဝေ - ခင်ဗျားကို အထင်ကြီးသလိုလိုတော့ဖြစ်လာပြီ ကဲ ခင်ဗျား တွေးမိတာ ဆက်ပြောပါဦး
ခင်ဇော် - အင်း ဆရာနဲ့ ခင်ခင်မြတို့ သမီးရည်းစားဖြစ်ခဲ့ရမယ်ဗျာ ကဲ သူ့အစ်ကို ကိုဘဟိန်းက ခွဲတာဖြစ်ရမယ် ဟုတ်တယ်မှလား
Dr.လွမ်းဝေ - နီးစပ်ပါတယ် အဲ့ဒီလောက်တော့ ခရီးမရောက်ခဲ့ကြဘူးဗျ သူ့အိမ်ကိုလိုက်လည်ရင်း ခင်ခင်မြနဲ့တွေ့တာ အမှန်ပြောရရင် သူက အရင်ဇာတ်လမ်းစလာတယ်လို့ပဲ ပြောရမှာ ကိုခင်ဇော်ရေ့ ချိတ်တိတ်တိတ် ဖြစ်ခဲ့တာလောက်ပါ နောက်တော့ ကိုဘဟိန်းက ရိပ်မိသွားတယ်ထင်ပါတယ် သူတို့အမျိုးတွေရှိတဲ့ တောင်ကြီးကို လွှတ်လိုက်တယ်ပြောတာပဲ ဒါပေမယ့် သူ့ကို ကျွန်တော်လွန်ခဲ့တဲ့ ခြောက်လလောက်က ရန်ကုန်မှာတွေ့တော့ စကားတွေပြောခဲ့သေးတယ် ဒီနေ့ကျမှ ကျွန်တော့်ကို မသိသလိုဖြစ်နေတာကို အံ့ဩတာဗျ ဟန်လုပ်နေတာလဲမဟုတ်ဘူး တကယ်ကို မသိသလိုဖြစ်နေတာ
ခင်ဇော် - နောက်နေ့တွေကျရင် တွေ့ကြည့်ပေါ့ဆရာ ဆရာတို့တွေ့ရအောင် တပည့်ကြံပါမယ် ကောင်မလေးက တော်တော်လှတာနော် ဆရာရအောင်ကြံဖို့လိုတယ်
Dr.လွမ်းဝေ - ဟာ အဲလိုကြီးတော့လဲ ----
ခင်ဇော် - ဘာလဲဆရာ အဆင်မပြေဘူးလား
Dr.လွမ်းဝေ - ဟဲ ဟဲ ခင်ဗျားကူညီရင်တော့ အဆင်ပြေတာပေါ့ ကျွန်တော်ကလဲ သူ့အစ်ကိုကြောင့်သာ နောက်ဆုတ်လိုက်ရတာဆိုတော့ ဇာတ်လမ်းပြန်ဆက်ရတာပေါ့ဗျာ
ခင်ဇော် - ဟုတ်ပြီဗျာ တပည့်တာဝန်သာထားလိုက်တော့ဆရာ

(၂)
ဘဟိန်း - ခင်ခင်မြ ညီမလေး ဒီနေ့လာတဲ့ ဧည့်သည်တွေကို ညီမလေး သိနေတာလား စကားတွေပြောနေတာ ကိုကို တွေ့လိုက်တယ်နော်
ခင်ခင်မြ- မသိပါဘူး ကိုကိုရယ် သူတို့က လာနှုတ်ဆက်လို့ ပြန်နှုတ်ဆက်ရတာပါ
ဘဟိန်း - အေး ကောင်းတယ် သူတို့နဲ့ အရောတဝင်မနေနဲ့ မဆက်ဆံနဲ့ကြားလား ဒီလူတွေက လူရှုပ်တွေ ဧည့်ခံဖို့ကိစ္စကို ဒေါ်ဒေါ်ကြွေ တာဝန်ယူပေးလိမ့်မယ်
ခင်ခင်မြ - ဟုတ်ကဲ့ပါ ကိုကို ညီမလေးသတိထားပါ့မယ်
ဘဟိန်း - အေး အေး ကောင်းတယ် ညီမလေး ဆေးတွေရော ပုံမှန်သောက်ရဲ့လား
ခင်ခင်မြ - သောက်ပါတယ်ကိုကိုရဲ့ စိတ်ချပါ
ဘဟိန်း - အေး အေး ကောင်းတယ် ညီမလေး
ခင်ခင်မြ - ဒါနဲ့ကိုကို ညီမလေး ပြောစရာရှိတယ် ညီမလေးရဲ့ အိပ်ခန်းထဲက ခုတင်ခေါင်းရင်းက ပြတင်းပေါက်မှာ လူတစ်ယောက်လာလာကြည့်နေသလိုပဲ ညတိုင်းတော့မဟုတ်ဘူး ဒါပေမယ့် သတိထားမိတာ ၃ ခါလောက်ရှိပြီ ကိုကိုရဲ့
ဘဟိန်း - ဟေ ဟုတ်လား ဒါဖြင့် ကိုကို အောင်ကြီးကို လုံခြုံရေးသေချာတင်းကြပ်ဖို့ပြောထားမယ် ညီမလေး တစ်ယောက်ထဲအိပ်ရဲလား ဒေါ်ဒေါ်ကြွေ့ကို လာအိပ်ခိုင်းရမလား
ခင်ခင်မြ - ရပါတယ်ကိုကိုရဲ့ အိပ်တာက အိပ်ရဲပါတယ် ညီမလေး မအိပ်ရဲရင် ကိုကို့ ကို ပြောပါ့မယ်
ဘဟိန်း - အေး အေး ရော့ လောလောဆယ် ဒီ ခြောက်လုံးပြူးလေးကိုယူထား ကိုကို သင်ပေးထားတာ မှတ်မိတယ်မှလား ဟောဒီလုံခြုံရေးခလုပ်လေးကိုဖြုတ်ပြီး ပစ်ချင်တဲ့နေရာကို ထိုးချိန်ပြီး သေနတ်မောင်းကို ဆွဲလိုက်ရုံပဲ
ခင်ခင်မြ - ဟုတ်ကဲ့ပါ ကိုကို ညီမလေး မှတ်မိပါတယ်
ဘဟိန််း - အေး အောင်ကြီး မင်းလာတာအတော်ပဲ ငါ့ ညီမ ခင်ခင်မြအိပ်ခန်းနားက ပြတင်းပေါက်မှာ လူရိပ်တွေ့တယ်လို့ ပြောတယ် တအိမ်လုံးက ပြတင်းပေါက်တွေကို သံပန်းတွေနဲ့ ပိတ်ပစ် ဒီနေ့စလုပ် မနက်ဖြန်ညနေမှာ ပြီးနေတာတွေ့ချင်တယ် ပြီးတော့ လုံခြုံရေးအတွက် လူတွေ ထပ်တိုးချထားပါ ငါ ဘာပြသနာမှ မကြားချင်ဘူး ကြားလား အောင်ကြီး
အောင်ကြီး - ဟုတ်ကဲ့ပါ ဆရာကြီး ဆရာကြီးပြောထားတာတွေအားလုံး အခုပဲသွားဆောင်ရွက်လိုက်ပါ့မယ်
ဘဟိန်း - အေး ငါ့ခြံထဲကို အပြင်က ခွေးတကောင် ကြောင်တမြီးမှ ကျူးမလာစေနဲ့ သွားတော့ မင်း လုပ်စရာရှိတာ သွားလုပ်တော့

(၃)
အား အင်း ဟင်း ဟင်း
ခင်ဇော် - ဟ ဘာသံပါလိမ့် တော်တော်နာနာကျင်ကျင်နဲ့ အော်လိုက်တဲ့အသံမျိုးပဲ --- အင်း ည တစ်နာရီတောင်ခွဲနေပြီ တခုခုဆိုကူညီလို့ရအောင် သွားကြည့်မှကောင်းမယ် ဆရာ့ကိုတော့ မနှိုးတော့ပါဘူး
အောင်ကြီး - သေစမ်းကွာ ငါတို့ခြံထဲများ ကျူးကျူးကျော်ကျော်နဲ့
နန္ဒာ - အား ရှင်တို့ မတရားမလုပ်နဲ့နော် အ အ
ဘဟိန်း - ဘာကွ မတရားမလုပ်နဲ့ ဟုတ်လား မင်းက ငါ့ခြံထဲလဲခိုးဝင်သေးတယ် ငါ့ ညီမအခန်းနားကိုလဲ ကပ်သေးတယ် မင်းကပဲ မတရားမလုပ်နဲ့ ပြောသေးတယ် ကျလဲကျတဲ့ကောင်မလေး အောင်ကြီး သူ့ကို ဟို အခန်းထဲခေါ်သွားစမ်းကွာ
နန္ဒာ - ရှင်တို့ ကျမကိုလွှတ်နော် ရှင်တို့ အဲဒီအခန်းထဲမှာ ဘာလုပ်ကြတယ်ဆိုတာ ကျမသိပြီးပြီ ရှင်တို့ ကျမကိုမလွှတ်ရင် အားလုံးသိအောင် ဖော်ထုတ်ပစ်မယ် ကျမလာတာကလဲ ခင်ခင်မြကို သတိပေးဖို့လာတာ လွှတ်‌ေနာ် ကျမကို
ဘဟိန်း - ဟေ့ကောင်မလေး ငါ့အိမ်မှာ ဧည့်သည်တွေရောက်နေတယ် မင်းပါးစပ်ကိုပိတ်ထားစမ်း မင်းလိုကောင်မ‌ေလးမျိုးကို သတ်ပစ်လိုက်လို့ရတယ်နော် အောင်ကြီး ဒီကောင်မ‌ေလးပါးစပ်ကို အဝတ်ဆို့ထားစမ်းကွာ
ခင်ဇော် - ဟိုက် ဘာဖြစ်တာလဲဟ ဒေါက်တဘဟိန်း အသံလဲကြားတယ် သွားစပ်စုဦးမှ ဖြစ်မယ် ဪ ဩ ဟိုအဆောင်ကြီးမှာ မီးတွေလင်းနေပါ့လား သွားကြည့်မှ
ဘဟိန်း - အောင်ကြီး အဲ့ဒီကောင်မ‌ေလးကို ခုတင်ပေါ်တင်လိုက်စမ်းကွာ အေး ဟုတ်ပြီ ခြေလက်တွေကို သေချာ ချုပ်ထား အဲ့ဟိုက ခါးပတ်နဲ့ သေချာကို ပတ်ပြီး ချုပ်ထား မလှုပ်စေနဲ့။ ဒီမယ်နန္ဒာ ပါတီပွဲလုပ်ပြီးသွားရင်တော့ မင်းဟာ ဟောဟိုလှောင်အိမ်ထဲက ကြွက်ကလေးလိုပဲ ငါ့ရဲ့ အစမ်းသပ်ခံ ဖြစ်ပြီပေါ့ကွာ ဟား ဟား ဟား ဟား ဟေ့ အောင်ကြီး မင်း ဒီကောင်မ‌ေလးကို သေချာကြည့်ထား မင်းတပည့်တွေကို သေချာအစောင့်ချထား ကြားလား
အောင်ကြီး - ဟုတ်ကဲ့ပါဆရာကြီး
ဝုတ် ဝုတ်
ခင်ဇော် - အောင်မယ်လေးဗျ နည်းတဲ့အကောင်ကြီးမဟုတ်ဘူး လုပ်ကြပါဦးဗျ ကယ်ကြပါဦီး ….
ခွီး ဝုတ် ဝုတ်
ဘဟိန်း - တိုက်ဂါး Stop ----- Sit Here ----- ကိုခင်ဇော်မဟုတ်လား ခင်ဗျားဘာဖြစ်သွားသေးတုန်း ဒီအချိန်ကြီး ခြံထဲလမ်းလျှောက်နေတာလား ဟင်း ဟင်း
ခင်ဇော် - မဟုတ် မဟုတ်ပါဘူးခင်ဗျ အသံတွေကြားလို့ ထကြည့်ရင်း ဒီခွေးကြီးတွေနဲ့တွေ့တာခင်ဗျ
ဘဟိန်း - အေးဗျာ ခင်ဗျားတို့ကို ဒီကောင်ကြီးတွေအကြောင်း မပြောလိုက်ရဘူး
ခင်ဇော် - အောင်မယ်လေး ဒီကောင်ကြီးတွေဆိုတော့ ဘယ်နှကောင်များ နောက်ထပ်ရှိသေးလို့တုန်းဗျ
ဘဟိန်း - ဟား ဟား နောက်ထပ် တစ်ကောင်ရှိသေးတယ် ဂျာဂွာတဲ့ ဒီနှစ်ကောင်က အိမ်သိပ်လုံတယ် ဂျာမာန်မျိုးဗျ တိုက်ခိုက်ရေးအတွက် လေ့ကျင့်ထားတာ အင်္ဂလိပ်လို အမိန့်ပေးမှရတယ် ကိုခင်ဇော်ကို သတိပေးတာပါ စပ်စုတတ်တဲ့ စိတ်ကမကောင်းဘူးဗျနော် ပြီးတော့ ဒီကောင်နှစ်ကောင်က လူစိမ်းလို့ထင်ရင် သူတို့ဝိုင်းဆွဲလို့ အရိုးအသားတခြားစီဖြစ်သွားမယ် ဆိုတော့ကာ ခင်ဗျားသတိထားဖို့ပါ
ခင်ဇော် - ဟုတ်ကဲ့ ဟုတ်ကဲ့ နောင်ညဘက် လမ်းလျှောက်မထွက်တော့ပါဘူးခင်ဗျ

(၄)
ခင်ဇော် - ဆရာကတော့ဗျာ ပညာရှာတဲ့နေရာမှာ တကယ့်ကို ဇွဲသန်တဲ့သူပဲ ဒီစာအုပ်တွေ အကုန် ကုန်အောင်ဖတ်မှာဆိုတော့ ကျွန်တော်တော့အရမ်းညောင်းလာပြီဗျာ အပြင်ထွက်ပြီး လေကောင်းလေသန့် လေးရှူဦးမယ် ဆရာရေ့ ပြီးမှ ပြန်လာခဲ့မယ်
လွမ်းဝေ - သွားပါ ကိုခင်ဇော် ကျွန်တော်တော့ စာဆက်ဖတ်လိုက်ပါဦီးမယ်
ခင်ဇော် - ဟုတ်ကဲ့ --------- (တီးလုံးသံတခုခု နည်းနည်းကြာသွားတဲ့သဘော)
ခင်ဇော် - အင်း ခြံကြီးကကျယ်တော့ လေကောင်းလေသန့်တော့ရပါရဲ့ ဟိုခွေးကြီးနှစ်ကောင်တော့ ကြောက်ရသေးတယ် ဟင် ဒေါက်တာဘဟိန်းတပြည့်တွေ အရက်သောက်နေကြပါလား ဟိုနေ့က သူတို့ထိုးကြိတ်နေတဲ့သူ ဘာဖြစ်သွားလဲမသိ အဲ့အဆောင်နား သွားကြည့်ဦီးမှ
နန္ဒာ - ဝူး ဝူး (ပါးစပ်တွင် အဝတ်ဆို့ခံထားရသည့်အသံ)
ခင်ဇော် - ဟင် ဘာသံပါလိမ့် အလို ကောင်မလေးတစ်ယောက်ကို ခုတင်ပေါ်တင်ပြီး ကြိုးတွေတုပ်ထားပါလား အင်း ဒီတခါးက သေချာမပိတ်ထားပဲကိုး ဝင်ကြည့်ပြီး ကယ်သင့်ရင်တော့ကယ်ရမှာပဲ ဟေ့‌ေကာင်မ‌ေလး အသံမထွက်နဲ့ ကျုပ်လာပြီ ပါးစပ်ထဲဆို့ထားတဲ့အဝတ်ကိုထုတ်ပေးမယ် ခဏလေး အဲ အဲ ရပြီ
နန္ဒာ - ဟူး ......

အပိုင်း(၃)မျှော်



Address

No. 17/19, Thar Yar Aye Street, Ward 3, Mayangone Township
Yangon

Opening Hours

Monday 09:30 - 17:00
Tuesday 09:30 - 17:00
Wednesday 09:30 - 17:00
Thursday 09:30 - 17:00
Friday 09:30 - 17:00

Website

Alerts

Be the first to know and let us send you an email when MILI Radio posts news and promotions. Your email address will not be used for any other purpose, and you can unsubscribe at any time.

Shortcuts

Share

Category