24/09/2025
အန်ဇိုမာရက်စ်ကာ ပွဲပြီးအင်တာဗျူး အပြည့်အစုံ…
Q. ပထမပိုင်းနဲ့ ဒုတိယပိုင်း အသင်းလိုက်စွမ်းဆောင်ရည်က သိသိသာသာ ကွာခဲ့တာ တွေ့ရတယ်။ အဲ့ဒါလေး အရင်ဆုံး သုံးသပ်ပေးပါဦး။
မာရက်စ်ကာ- ဒီလိုပွဲစဉ်မျိုးမှာ အသင်းငယ်တစ်သင်းအနေနဲ့ ပုံမှန်ထက်အနည်းဆုံး နှစ်ဆလောက်ပိုပြီး အားထည့်ကစားလာမယ်။ set-pieceတွေကို အဓိကအားထားပြီး ဂိုးရဖို့ ကြိုးစားလာမယ်။ ဒါကို ကျနော်တို့ ကြိုတင်မျှော်လင့်ထားပြီးသား၊ တတ်နိုင်သလောက်လည်း ကြိုတင်ပြင်ဆင်ပြီးသား ဖြစ်ပါတယ်။ ဒါပေမယ့် တကယ်တမ်းပွဲကစားချိန်မှာတော့ အဲ့ဒီလိုမလုပ်နိုင်ခဲ့ဘူး။ လိုအပ်ချက်တွေများခဲ့တယ်။ ဒုတိယပိုင်းမှာတော့ သိသိသာသာ ပိုကောင်းလာပါတယ်…
Q. ယော်ဂင်ဆန်ရဲ့ စွမ်းဆောင်ရည်ကိုရော ဘယ်လိုသုံးသပ်ချင်ပါသလဲ။
မာရက်စ်ကာ- သူ့အတွက်လည်း ခက်ခဲပါတယ်။ ပြိုင်ဖက်က ဂိုးဧရိယာထဲကို တစ်ချိန်လုံးလိုလို အမြင့်ဘောပေးပို့မှုတွေ ရှိခဲ့တယ်။ အထူးသဖြင့် set-pieceတွေမှာဆိုရင် ဂိုးရှေ့မှာ နှစ်ဖက်ကစားသမားတွေ ရှုပ်ထွေးနေပြီး ပြိုင်ဖက်တွေက ဂိုးသမားကို အဓိကပစ်မှတ်ထားပြီး တွန်းတွန်းတိုက်တိုက် ကစားတာမျိုးတွေရှိတယ်။ ဒီလိုအခြေအနေမျိုးတွေဟာ ဘယ်ဂိုးသမားအတွက်မဆို ခက်ခဲပါတယ်…
ယော်ဂင်ဆန်အတွက် ဒီရာသီ ပထမဆုံးပွဲစဉ်လည်း ဖြစ်နေတာဆိုတော့ ပိုပြီးတော့ ခက်ခဲပါတယ်။ ယော်ဂင်ဆန်တစ်ဦးထဲအတွက်တင် မဟုတ်ပါဘူး။ ဒီပွဲမှာ တစ်သင်းလုံးအတွက် ကျနော်အများကြီး စိတ်ပူခဲ့ရတယ်။ ဒါပေမယ့် နောက်ဆုံးတော့ ကျနော်တို့ နိုင်ပွဲရခဲ့ကြပါတယ်…
Q. ဘူနာနော့တီရဲ့ ခြေစွမ်းကတော့ ကျေနပ်စရာ ဖြစ်လိမ့်မယ်ထင်တယ်…
မာရက်စ်ကာ- အမှန်ပါပဲ။ ပထမပိုင်းမှာတော့ သူအပါအဝင် ကျနော်တို့ တစ်သင်းလုံးနီးပါး ရုန်းကန်ခဲ့ရတာပေါ့။ ဒါပေမယ့် ဒုတိယပိုင်းမှာတော့ သိသိသာသာ ပိုကောင်းလာပါတယ်…
Q. ဒုတိယပိုင်းမှာ ပိုကောင်းလာရတဲ့ အဓိကအကြောင်းရင်းကရော ဘာများဖြစ်မလဲ။
မာရက်စ်ကာ- ကျနော်တို့ အသင်းလိုက်ကစားကွက်ကို နည်းနည်းအပြောင်းအလဲလုပ်ခဲ့လို့ပါပဲ။ အထူးသဖြင့် ဟာတိုရဲ့ role & functionကို ကျနော်တို့ သိသိသာသာ အပြောင်းအလဲလုပ်ခဲ့တယ်။ ဒုတိယပိုင်းစပြီး သိပ်မကြာခင်မှာ ချေပဂိုးရခဲ့တာကြောင့်လည်း ကျနော်တို့အတွက် နည်းနည်းကံကောင်းသွားပါတယ်…
Q. နည်းစနစ်ပိုင်း အပြောင်းအလဲတွေကြောင့်ပဲလား။ ခင်ဗျားအနေနဲ့ ပထမပိုင်းအပြီး အဝတ်လဲခန်းထဲမှာ ပေါက်ကွဲခဲ့တာမျိုးရော ရှိခဲ့ပါသလား။
မာရက်စ်ကာ- ရှိတာပေါ့။ ရှိတာပေါ့…
Q. ဘယ်လောက်ထိ ပေါက်ကွဲခဲ့သလဲ…
မာရက်စ်ကာ- ပြိုင်ဖက်က လိဂ်ဝမ်းက ကလပ်အသင်းဖြစ်နေတယ်။ ဒီလိုအသင်းတစ်သင်းအနေနဲ့ ချယ်လ်ဆီးနဲ့ ထိပ်တိုက်တွေ့တယ်ဆိုတာ ဒီရာသီသူတို့အတွက် အရေးအကြီးဆုံး ပွဲစဉ်တစ်ပွဲလိုသဘောမျိုးလည်းရှိတယ်။ အဲ့ဒီအတွက် သူတို့ကတော့ အကောင်းဆုံးအားထည့်ကစားလာမှာပဲ။ ဒါကြောင့် ကျနော်တို့အနေနဲ့လည်း သာမန်ပွဲတစ်ပွဲလိုမျိုး တုံ့ပြန်လို့မရဘူး။ ဒီလိုပွဲမျိုးကို အသင်းကြီးတစ်သင်းအနေနဲ့ ကစားရမယ့် ပုံစံက သက်သက်ရှိပါတယ်။ အဲ့ဒါကိုလည်း ကျနော်တို့ အများကြီးကြိုတင်ပြင်ဆင်ခဲ့ပြီးသားပါပဲ…
ဒါပေမယ့် တကယ်တမ်းပွဲကစားချိန်မှာတော့ ပြင်ဆင်ထားတဲ့အတိုင်း ဖြစ်မလာဘူး။ ရုန်းကန်ခဲ့ရတယ်။ အဲ့ဒီအတွက် နည်းနည်းတော့ ပေါက်ကွဲခဲ့ရပါတယ်…
Q. ဒီပွဲက ချယ်လ်ဆီးကစားသမားတွေအတွက် သင်ခန်းစာတစ်ခုလို့ရော ပြောလို့ရမလား။
မာရက်စ်ကာ- အဲ့ဒါကတော့ ပြောရခက်တယ်။ ကျနော်တို့ ဘယ်အချိန်ကျမှ လိဂ်ဝမ်းလိဂ်တူးအသင်းတွေနဲ့ ထပ်တွေ့ရမလဲ ကျနော်လည်း မသိနိုင်ဘူးလေ။ ဘာပဲဖြစ်ဖြစ် ပွဲစဉ်တိုင်းကတော့ သင်ခန်းစာယူစရာ၊ ပြန်လည်သုံးသပ်စရာ၊ ပိုတိုးတက်အောင် ကြိုးစားစရာ တစ်ခုမဟုတ်တစ်ခုတော့ အမြဲရှိနေတာပါပဲ။ ဒီပွဲကနေလည်း ကျနော်တို့အတွက် သင်ခန်းစာယူစရာတွေ၊ အနာဂတ်အတွက် အကျိုးရှိသွားစေမယ့်အချက်တွေ ရှိနေမှာ သေချာပါတယ်…
ကျေးဇူးတင်ပါတယ်…
--- Football London ---
