12/05/2026
စစ်ကောင်စီသတင်းပေးတွေထံကနေ မူးယစ်ဆေးဝါးတွေဖမ်းမိဟု ကော့သောင်းမြို့နယ်ပကဖထုတ်ပြန်
Connect Burma | မေ ၁၂
တနင်္သာရီတိုင်း၊ ကော့သောင်းမြို့နယ်အတွင်း နယ်မြေရှင်းလင်းရေးနဲ့ မူးယစ်ဆေးဝါးတိုက်ဖျက်ရေးလုပ်ငန်းစဉ်တွေ ဆောင်ရွက်ချိန် စစ်တပ်သတင်းပေး ၃ဦးကို မူးယစ်ဆေးဝါးတွေနဲ့ အတူ ဖမ်းဆီးရမိခဲ့တယ်လို့ ကော့သောင်းမြို့နယ် ပြည်သူ့ကာကွယ်ရေးအဖွဲ့က ထုတ်ပြန်ပါတယ်။
ပြီးခဲ့တဲ့ မေလ ၁၀ရက်နေ့က တနင်္သာရီ ပကဖ တိုက်ခိုက်ရေးတပ်ရင်းက အဖွဲ့တွေနဲ့ ကော့သောင်းမြို့နယ် ပကဖအဖွဲ့တို့ နယ်မြေရှင်းလင်းရေးနဲ့ မူးယစ်ဆေးဝါးတိုက်ဖျက်ရေးလုပ်ငန်းစဉ်တွေ ဆောင်ရွက်ချိန် မူးယစ်ဆေးဝါးရောင်းဝယ်သုံးစွဲပြီး စစ်တပ်သတင်းပေးလုပ်ကိုင်နေတယ်လို့ သတင်းရတာကြောင့် နေအိမ်အတွင်း ဝင်ရောက်ရှာဖွေရာမှာ လူ၃ဦးကို ဖမ်းဆီးရမိခဲ့တာလို့ ဆိုပါတယ်။
ဖမ်ဆီးရမိတဲ့ အသက် ၃၆နှစ်အရွယ် မောင်ဖြူ (အမည်လွှဲ)ဆီကနေ WYစိတ်ကြွရူးသွပ်ဆေးပြား ၆၃၀ပြား၊ မူးယစ်ဆေးဝါးသုံးစွဲတဲ့ဆက်စပ်ပစ္စည်းတွေ၊ ဖုန်း၂လုံးနဲ့ ထိုင်းဘတ်ငွေ ၉၂၈၀ဘတ်တို့ သိမ်းဆည်းရမိခဲ့တယ်လို့ ဆိုပါတယ်။
အလားတူ အသက် ၅၃နှစ်အရွယ် မောင်နီ (အမည်လွှဲ)ဆီက WY ဆေးပြား ၄၆ပြားနဲ့ ဆက်စပ်ပစ္စည်းတွေ၊ အသက် ၄၃နှစ်အရွယ် မောင်မဲ (အမည်လွှဲ)ဆီက WYဆေးပြား၁၈ပြား၊ မူးယစ်ဆေးဝါးသုံးဆက်စပ်ပစ္စည်းတွေ၊ 380.v ပစ္စတိုတစ်လက် ၎င်းကျည် ၅၈တောင့်၊ ဖုန်းတစ်လုံးနဲ့ ထိုင်းဘတ်ငွေ ၁၈၅၀ဘတ်တို့ကို သိမ်းဆည်းရမိခဲ့တယ်လို့ ဆိုပါတယ်။
သူတို့ကို စစ်ဆေးမေးမြန်းခဲ့ရာမှာ မူးယစ်ဆေးဝါးရောင်းဝယ်သုံးစွဲတယ်ဆိုတာ မှန်ကန်ကြောင်း ဝန်ခံခဲ့တယ်လို့ ကော့သောင်းမြို့နယ် ပကဖက ဆိုပါတယ်။
ဒါ့အပြင် သူတို့ရဲ့ လက်ကိုင်ဖုန်းတွေကို စစ်ဆေးခဲ့ရာမှာ စစ်ကော်မရှင်အဖွဲ့တွေနဲ့ ပတ်သက်ဆက်နွယ်ပြီး သတင်းပေးပို့ပြောဆိုထားတာတွေကို စစ်ဆေးတွေ့ရှိရလို့ မူးယစ်ဆေးဝါးနဲ့ဆက်စပ်ပစ္စည်းတွေကို မီးရှို့ဖျက်ဆီးပြီး တရားခံတွေနဲ့ လက်နက်ခဲယမ်းတွေကိုဥပဒေအတိုင်း လုပ်ထုံးလုပ်နည်းနဲ့ အညီ ဆက်လက်အရေးယူဆောင်ရွက်သွားမယ်လို့ ကော့သောင်းမြို့နယ် ပြည်သူ့ကာကွယ်ရေးအဖွဲ့ရဲ့ ထုတ်ပြန်ချက်မှာ ဖော်ပြထားပါတယ်။
