25/06/2025
အမ်ဗျူမိုရဲ့အပြောင်းအရွှေ့က ကွန်ညာနည်းတူ ၆၂.၅ သန်းနဲ့ သဘောတူညီမှုရဖို့ နီးစပ်နေပါပြီ။ ၅ နှစ်စာချုပ်+တစ်နှစ်သက်တမ်းတိုးခွင့်ပါမယ်လို့ သိရတယ်။ ကနဦးပြောင်းရွှေ့ကြေး ပေါင် ၅၅သန်းနဲ့ အပိုဆုကြေး ပေါင် ၈သန်းလို့လည်း ပြောကြပါတယ်။ ဒါပေမယ့် ဒီအချက်တွေက အားလုံး Here we go မှာ တိတိကျကျ သိရမှာပါ။
အမ်ဗျူမို အပြောင်းအရွှေ့မှာ စပါးဘက်က အသံထွက်ခဲ့ပေမယ့် ဘယ်တုန်းကမှ အလေးအနက်မထားခဲ့ပါဘူး။ ကင်မရွန်းသားကိုယ်တိုင်ကလည်း မန်ယူနိုက်တက်မှ မန်ယူနိုက်တက်ပဲလို့ ပြတ်ပြတ်သားသား ဘရန့်ဖို့ဒ်ကို အသိပေးပြီးသားပါ။ ဒါကြောင့်မို့ မန်ယူနိုက်တက်ကိုယ်တိုင်ကလည်း ဘရန့်ဖို့ဒ်နဲ့ အေးအေးဆေးဆေး ဆွေးနွေးနိုင်ခဲ့တယ်။
ဘရန့်ဖို့ဒ်မှာလည်း လုပ်စရာတွေအများကြီးရှိနေပါတယ်။ အမ်ဗျူမိုကို ယူနိုက်တက်လက်ထဲ ထည့်ပေးပြီးသွားရင် သူ့နေရာမှာ ဘယ်သူ့ကိုအစားထိုးမလဲ ရွေးချယ်ရဦးမယ်။ ဒါမှမဟုတ် ဝစ်ဆာ၊ သီယာဂို၊ ကီဗင်ရှာဒါတိုက်စစ်အတွဲအဖက်သစ် ဖြစ်လာမလား စောင့်ကြည့်ရမှာပါ။
ဝစ်ဆာကတော့ သူ့လက်တစ်ဖက်ပြုတ်သွားသလို ခံစားရတော့မှာ အသေအချာပါပဲ။ လေးနှစ်တာ အတူရှိခဲ့တဲ့ အချိန်အတွင်းမှာ ညီအစ်ကိုအရင်းတမျှ ချစ်ခဲ့ကြတယ်။ အီဗရာနဲ့ ပက်ဂျီဆန်တို့လို၊ ဂရီးလစ်ချ်နဲ့ အာလင်းဟာလန်တို့လို၊ လော်ဗရန်နဲ့ ဆာလာ၊ စီရော်နယ်ဒိုနဲ့ မာဆယ်လို၊ ဆွန်နဲ့ဟယ်ရီကိန်း၊ မာကိုရူးစ်နဲ့ ဂေါ့ဇီတို့လို သူတို့က ရင်းနှီးခဲ့ကြ၊ အတွဲညီခဲ့ကြ၊ ချစ်ခဲ့ကြတာပါ။
ခွဲကြခွါကြ၊ ဝေးကွာကြဆိုတာ ဖြစ်မြဲဓမ္မတာပါပဲ။ နေရာအသစ်ကိုရောက်သွားသူနဲ့ နေရာဟောင်းမှာ ကျန်ရစ်ခဲ့သူ ကိုယ်စီကိုယ်စီ တောက်ပနိုင်အောင် ကြိုးစားကြရမှာပါ။ ဝစ်ဆာ အိုးထရက်ဖို့ဒ်ကို သွားတဲ့အခါ၊ အမ်ဗျူမို ဘရန့်ဖို့ဒ်ကို ပြန်ရောက်တဲ့အခါ နွေးထွေးစွာနဲ့ ကြိုဆိုနေကြမှာပါ။ သူတို့နှစ်ယောက် ပြိုင်ဘက်တွေအဖြစ် ရင်ဆိုင်ကြတဲ့အခါ မာကိုရူးစ်နဲ့ လီဝန်ဒေါစကီးတို့လို ဖြစ်ကြမလားပါပဲ။
သူငယ်ချင်းဖြစ်ခဲ့ပေမယ့် ပြိုင်ဘက်တွေအဖြစ် ပြန်တွေ့ကြတဲ့အခါ ဖြုတ်မယ်ဆိုပြီး ပြင်ဆင်ထားပြီးခါမှ မနေနိုင်ပဲ ရှက်ပြုံးတွေ ပြုံးခဲ့ကြသလိုမျိုးပေါ့။
![အမ်ဘီမို [မန်ယူနိုက်တက်]နီကိုးဝီလျံ[ဘာစီလိုနာ]ဂစ်တန် [ချဲလ်ဆီး]🔜⏳️✅️](https://img5.medioq.com/429/914/122198072624299148.jpg)
