Popular News Journal

03/02/2025

ဇာတ်လမ်းတွဲနဲ့အဆိုဘက်ကိုလှည့်နေလို့ရုပ်ရှင်ဘက်မရောက်နိုင်တဲ့ ဟန်ထူးစျာန်ကိုအကိုတော်ချင်သူတွေများနေ...

03/02/2025

အမေရိကန်နှင့် ဆက်ဆံရေး၊ အီးယူနိုင်ငံများ၏ ကာကွယ်ရေးတို့ကို အီးယူခေါင်းဆောင်များ ဆွေးနွေးကြမည်

အီးယူနိုင်ငံ ခေါင်းဆောင်များသည် ယူကရိန်းပဋိပက္ခ၊ ဆိုက်ဘာခြိမ်းခြောက်မှုများ၊ အရှေ့အလယ်ပိုင်းဒေသ၏ မတည်ငြိမ်မှုတို့ကို တုံ့ပြန်သည့်အနေဖြင့် အီးယူနိုင်ငံများ၏ ကာကွယ်ရေးအား မြှင့်တင်ရန်နှင့် ကာကွယ်ရေးအသုံးစရိတ်များ တိုးမြှင့်ရန် အစရှိသည်တို့ကို ဘရပ်ဆဲလ်မြို့တွင် ကျင်းပမည့် ပုံမှန်မဟုတ်သော ထိပ်သီးအစည်းအဝေးတွင် ဆွေးနွေးကြမည်ဖြစ်သည်။

ထို့အပြင်၊ အီးယူအရာရှိကြီးတစ်ဦးက ဘရပ်ဆဲလ်မြို့တွင် သတင်းထောက်များအား ပြောကြားရာတွင် ခေါင်းဆောင်များသည် ဒေါ်နယ်ထရမ့်ခေါင်းဆောင်သော အမေရိကန်နှင့် ဆက်ဆံရေးကို အထူးဂရုပြု၍ထည့်သွင်းဆွေးနွေးရန် ရည်ရွယ်ထားသည်ဟု သိရသည်။

နေတိုးအထွေထွေအတွင်းရေးမှူး နှင့် ဗြိတိသျှဝန်ကြီးချုပ် တို့ကိုလည်း အီးယူ၏ ပုံမှန်မဟုတ်သော ထိပ်သီးအစည်းအဝေးသို့ ဖိတ်ကြားထားသည်။

မူလက အဆိုပါ အစည်းအဝေးကို ဘယ်လ်ဂျီယမ်နိုင်ငံ Liege မြို့ အနီးရှိ ခံတပ်ဟောင်းတစ်ခုတွင် အနားယူဆွေးနွေးပွဲအဖြစ် ကျင်းပရန် စီစဉ်ထားခြင်းဖြစ်သည်။ အီးယူခေါင်းဆောင်များအား လွတ်လပ်စွာနှင့် ပွင့်လင်းစွာ ဆွေးနွေးနိုင်ရန် ရည်ရွယ်၍ အဆိုပါ သီးသန့်နေရာအား ရွေးချယ်ခဲ့ခြင်းဖြစ်ကြောင်း ဥရောပကောင်စီဥက္ကဋ္ဌ အန်တိုနီယိုကိုစ်တာက ဆိုသည်။ သို့သော်၊ ဥရောပကောင်စီသည် ခေါင်းဆောင်များ၏ လုံခြုံရေး သေချာစေရန်အတွက် လိုအပ်သော အစီအမံများကို ပြန်လည်သုံးသပ်ပြီးနောက် အစည်းအဝေးကျင်းပမည့်နေရာကို ဘရပ်ဆဲလ်မြို့ရှိ Egmont Palace သို့ ပြောင်းရွှေ့လိုက်ခြင်းဖြစ်ကြောင်း သိရသည်။

03/02/2025

ဧရာဝတီမြစ်ကြောင်းတစ်လျှောက်ရှိကျေးရွာများမှ ဒေသခံ(၆၈၃၃)ဦးကို ကျန်းမာရေးစောင့်ရှောက်ပေးခဲ့သည့် တပ်မတော်မြစ်တွင်းသွားဆေးရုံရေယာဉ်(ရွှေပုဇွန်)နှင့် မြစ်ရေယာဉ်(စကု)

တပ်မတော်နယ်လှည့်အထူးကုဆေးအဖွဲ့မှ ပါရဂူများ၊ ဆေးမှူးများနှင့် သူနာပြုများပါဝင်သော တပ်မတော်မြစ်တွင်းသွားဆေးရုံရေယာဉ်(ရွှေပုဇွန်)နှင့် မြစ်ရေယာဉ်(စကု)တို့သည် ဇန်နဝါရီ ၁၅ ရက်မှ ၃၀ ရက်အထိ ဧရာဝတီမြစ်ကြောင်းတစ်လျှောက်ရှိကျေးရွာများမှ ဒေသခံ(၆၈၃၃)ဦးကို ကျန်းမာရေးစောင့်ရှောက်မှုပေးခဲ့သည်။

ဆေးကုသမှုဆိုင်ရာရောဂါ(၂၀၀၂)ဦး၊ ခွဲစိတ်ကုသမှုဆိုင်ရာရောဂါ(၂၉၄)ဦး၊ သားဖွားမီးယပ်ရော ဂါ(၂၂၇)ဦး၊ ကလေ-းရောဂါ(၄၇၈)ဦး၊ အရိုးရောဂါ(၁၁၉၆)ဦး၊ နား၊ နှာခေါင်း၊ လည်ချောင်းရော ဂါ(၆၅၄)ဦး၊ မျက်စိရောဂါ(၁၂၇၈)ဦးနှင့် သွားနှင့် ခံတွင်းရောဂါ(၇၀၄)ဦးတို့ကို လိုအပ်သည့် ဆေးဝါးကုသမှုများဆောင်ရွက်ပေးခဲ့ကြသည်။

ထို့ပြင် ယင်းတို့အနက် အထွေထွေခွဲစိတ်လူနာ (၁၀၅)ဦး၊ မျက်စိခွဲစိတ်လူနာ(၄၂)ဦးတို့ကိုလည်း ဆေးရုံရေယာဉ်ပေါ်တွင် ခွဲစိတ်ကုသမှုများပြုလုပ်ပေးခဲ့ကြသည်။

ထို့ပြင် ဓာတ်မှန်ရိုက်လူနာ(၂၄၉)ဦး၊ အာထရာဆောင်းဖြင့်စမ်းသပ်စစ်ဆေးလူနာ(၄၇၄)ဦး၊ ECG စက်ဖြင့်နှလုံးစမ်းသပ်လူနာ(၄၀၄)ဦး၊ ဓာတ်ခွဲစမ်းသပ်လူနာ(၈၁၅)ဦးတို့ကိုလည်း ရောဂါရှာဖွေစမ်းသပ်ပေးခဲ့ပြီး ဆေးရုံရေယာဉ်ပေါ်ရှိ သားဖွားခန်း၌ ကိုယ်ဝန်ဆောင်မိခင်(၃)ဦးကို အောင်မြင်စွာမွေးဖွားပေးခဲ့ကာ ဆေးရုံတက်ရောက်ကုသရန်လိုအပ်သူ(၆၀)ဦးကိုလည်း သက်ဆိုင်ရာမြို့နယ်အသီးသီးရှိ တပ်မတော်ဆေးရုံများနှင့် ပြည်သူ့ဆေးရုံများသို့ တက်ရောက်ကုသနိုင်ရန် စီစဉ်ဆောင်ရွက်ပေးခဲ့ကြသည်။

ထိုသို့ ကုသမှုများပြုလုပ်ပေးခဲ့ကြပြီးနောက် တပ်မတော်နယ်လှည့်အထူးကုဆေးအဖွဲ့များပါဝင်သော တပ်မတော်မြစ်တွင်းသွားဆေးရုံရေ ယာဉ်(ရွှေပုဇွန်)နှင့် မြစ်ရေယာဉ်(စကု)တို့သည် ဖေဖော်ဝါရီ ၁ ရက်နံနက်ပိုင်းက ရန်ကုန်မြို့ရှိ အမှတ်(၄)ရေတပ်ဗောတံတားသို့ပြန်လည်ရောက်ရှိခဲ့သည်။

03/02/2025

နေပြည်တော်ဇဗ္ဗူသီရိမြို့၏ အနောက်မြောက်ဘက် (၁၅) မိုင်ခန့်အကွာကို ဗဟိုပြု၍ (၂)ရက်အတွင်း ငလျင် (၂)ကြိမ် လှုပ်ရှားခဲ့

ယနေ့ ဖေဖော်ဝါရီ (၃) ရက်၊ နံနက်အစောပိုင်း (၂) နာရီ၊ (၁၄) မိနစ်၊ (၀၁) စက္ကန့် အချိန်က ဇဗ္ဗူသီရိမြို့၏ အနောက်မြောက်ဘက် (၁၅) မိုင်ခန့်အကွာကို ဗဟိုပြု၍ အင်အားအနည်းငယ်ရှိ မြေငလျင်တစ်ခု လှုပ်ရှားသွားကြောင်း မိုးလေဝသနှင့်ဇလဗေဒညွှန်ကြားမှုဦးစီးဌာန၏ မြေငလျင်သတင်း ထုတ်ပြန်ချက်အရ သိရသည်။

နေပြည်တော်မြေငလျင်စခန်းမှ အနောက်မြောက်ဘက် (၁၆) မိုင်ခန့်ကွာဝေးသော မြန်မာနိုင်ငံပြည်တွင်း ဇဗ္ဗူသီရိမြို့၏ အနောက်မြောက်ဘက် (၁၅) မိုင်ခန့်အကွာ၊ မြောက် လတ္တီတွဒ် (၁၉.၉၁) ဒီဂရီ၊ အရှေ့လောင်ဂျီတွဒ် (၉၅.၉၂) ဒီဂရီ၊ အနက် (၁၀) ကီလိုမီတာကို ဗဟိုပြု၍ အင်အားရစ်(ခ်)တာစကေး (၃.၈) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားကြောင်း တိုင်းထွာရရှိချက်အရ သိရသည်။

ထို့ပြင် ဖေဖော်ဝါရီ (၂) ရက်၊ နံနက် (၉)နာရီ၊ (၄၇)မိနစ်၊ (၄) စက္ကန့်အချိန်ကလည်း ဇမ္ဗူသီရိမြို့၏ အနောက်မြောက်ဘက် (၁၅) မိုင်ခန့်အကွာ)၊ မြောက်လတ္တီတွဒ် (၁၉.၉၂) ဒီဂရီ၊ အရှေ့လောင်ဂျီတွဒ် (၉၅.၉၅)ဒီဂရီ၊ အနက်(၁၀) ကီလိုမီတာကို ဗဟိုပြု၍ အင်အားရစ်(ခ်)တာ စကေး (၃.၂) အဆင့်ရှိ အင်အားအနည်းငယ်ရှိသော မြေငလျင်တစ်ခု လှုပ်ရှားသွားကြောင်း မိုး/ဇလ၏ တိုင်းထွာရရှိချက်အရ သိရသည်။

03/02/2025

အစ္စရေးဝန်ကြီးချုပ်နှင့် ထရမ့် တွေ့ကြမည်

အစ္စရေးဝန်ကြီးချုပ် ဘင်ဂျမင် နေတန်ယာဟုသည် လတ်တလော ဂါဇာ အကျဉ်းသားလဲလှယ်‌ရေး သဘောတူညီချက်၏ နောက်အဆင့်များကို အမေရိကန်သမ္မတ ဒေါ်နယ်ထရမ့်နှင့် ဆွေးနွေးရန် ဖေဖော်ဝါရီ ၂ ရက်နေ့တွင် အမေရိကန်သို့ သွားမည်ဖြစ်ကြောင်း နေတန်ယာဟု၏ အကြံပေး ဒီမီထရီ ဂန်ဒယ်မန်က ပြောကြားသည်။

"အစ္စရေးဝန်ကြီးချုပ်သည် ဖေဖော်ဝါရီ ၂ ရက်နေ့တွင် အမေရိကန်သို့ ပျံသန်းကာ ဒေါ်နယ်ထရမ့်နှင့် တွေ့ဆုံမည်။ ဂါဇာသဘောတူညီချက်၏ နောက်အဆင့်များအပါအဝင် ပြဿနာအမျိုးမျိုးကို ဆွေးနွေးကြမည်" ဟု သူကဆိုသည်။

နေတန်ယာဟု၏ ရုံးမှလည်း "ဝန်ကြီးချုပ်သည် ဖေဖော်ဝါရီ ၂ ရက်တွင် အမေရိကန်သမ္မတ ဒေါ်နယ်ထရမ့်နှင့် တွေ့ဆုံရန် အမေရိကန်သို့ လေယာဥ်ဖြင့်သွားမည်" ဟု အတည်ပြုခဲ့သည်။

"သမိုင်းဝင် အစည်းအဝေးတွင် ခေါင်းဆောင်နှစ်ဦးသည် ဂါဇာကမ်းမြှောင်ဒေသ အခြေအနေ၊ အကျဉ်းသားပြဿနာ၊ အီရန်ဝင်ရိုးစွန်းနိုင်ငံများမှ မဖြစ်သင့်သောကိစ္စများကို ရင်ဆိုင်ဖြေရှင်းရန် ကြိုးပမ်းမှုများနှင့် အခြားသောအဓိကပြဿနာများကို ဆွေးနွေးကြမည်" ဟု ဝန်ကြီးချုပ်ရုံးမှ ပြောကြားသည်။

ထရမ့်က နေတန်ယာဟုအား ဖေဖော်ဝါရီ ၄ ရက်နေ့တွင် အိမ်ဖြူတော်၌ တွေ့ဆုံရန် ဖိတ်ကြားခဲ့ကြောင်း အစ္စရေးဝန်ကြီးချုပ်ရုံးမှ ဇန်နဝါရီ ၂၈ ရက်နေ့ကတည်းက သတင်းထုတ်ပြန်ခဲ့သည်။

နေတန်ယာဟုသည် ဒေါ်နယ်ထရမ့်၏ ဒုတိယသမ္မတသက်တမ်းအတွင်း အိမ်ဖြူတော်သို့ ဖိတ်ကြားခံရသည့် ပထမဆုံးသော နိုင်ငံခြားခေါင်းဆောင် ဖြစ်လာမည်ဟု ဝန်ကြီးချုပ်ရုံးမှ ဖြည့်စွက်ပြောကြားခဲ့သည်။

03/02/2025

ရှမ်းအမျိုးသားနေ့အထိမ်းအမှတ် အားကစားပြိုင်ပွဲများ ကျင်းပမည်

ဖေဖော်ဝါရီလ (၇) ရက်၌ ကျရောက်မည့် (၇၈) ကြိမ်မြောက် ရှမ်းပြည်နယ်နေ့ ( ရှမ်းအမျိုးသားနေ့အထိမ်းအမှတ်)တွင် အားကစားပြိုင်ပွဲများ ထည့်သွင်းကျင်းပပြုလုပ်သွားမည်ဖြစ် ကြောင်း သိရသည်။

အားကစားပြိုင်ပွဲများကို ဖေဖော်ဝါရီ (၆)ရက် နံနက်(၈)နာရီအချိန်မှစတင်၍ ရှမ်းပြည်နယ် အရှေ့ပိုင်း ၊ တာချီလိတ်မြို့၊ ဆေးခမ်းရပ်ကွက်၊ ရှမ်းကွင်းရှိ ရှမ်းစာပေနှင့် ယဉ်ကျေးမှုအသင်းခန်းမတွင်ကျင်းပသွားမည်ဖြစ်ကြောင်း သိရသည်။

တာတိုအပြေးပြိုင်ပွဲ၊ လွန်ဆွဲပွဲ ၊ လျှောတိုင်တက်ပွဲ ၊ ဝါးခြေထောက်ပြိုင်ပွဲ၊ ဒိုးသီးပစ်ပွဲ၊ ဂျင်ပစ်ပြိုင်ပွဲ၊ ခေါင်းအုံးရိုက်ပြိုင်ပွဲ၊ စက်ဘီးပြိုင်ပွဲ၊ အကပြိုင်ပွဲနှင့် အိုးစည်ဗုံမောင်းတီးပြိုင်ပွဲ စသည့် အားကစားပြိုင်ပွဲ (၁၀) မျိုးထည့်သွင်း ကျင်းပမည်ဖြစ်ကြောင်း သိရသည်။

ယခုနှစ်ကျရောက်မည့် (၇၈)နှစ်မြောက် ရှမ်းပြည်အမျိုးဘသားနေ့ကို ရှမ်းပြည်တောင်ပိုင်း၊ လင်းခေးခရိုင်၊ မိုင်းပန်မြို့တွင်လည်း RCSS/SSAက ဒေသတွင်းပြည်သူများနှင့်ပူးပေါင်း၍ (၂)ရက် ကြာကျင်းပပြုလုပ်သွားမည်ဖြစ်သည်။

ထို အခမ်းအနားသို့ နိုင်ငံတော်စီမံအုပ်ချုပ်ရေးကောင်စီ၊ နိုင်ငံတော်ဝန်ကြီးချုပ် ဗိုလ်ချုပ်မှူးကြီး မင်းအောင်လှိုင် ကိုလည်းဖိတ်ကြားထားပြီး၊ တောင်ကြီးအခြေစိုက်(ရပခ)၊ ခိုလမ်အခြေစိုက် (ရလခ) နှင့် ကျိုင်းတုံအခြေစိုက် (တသခ) တို့မှ တိုင်းမှူးများ၊ ရှမ်းပြည်တွင်းရှိ နိုင်ငံရေးပါတီ (၇)ခုနှင့် အရပ်ဖက်အဖွဲ့အစည်းများကိုလည်း ဖိတ်ကြားထားသည်ဟု ဒေသတွင်း သတင်းရင်းမြစ်များထံက သိရသည်။

03/02/2025

02/02/2025

ပြည်နယ်နှင့် တိုင်းဒေသကြီးအချို့တွင် ပုံမှန်ထက် ညအပူချိန်ပိုမည်

ဖေဖော်ဝါရီလ၏ ပထမ (၁၀)ရက်အတွင်း ပြည်နယ်နှင့် တိုင်းဒေသကြီးအချို့တွင် ပုံမှန်ထက် ညအပူချိန်ပိုမည်ဖြစ်ကြောင်းမိုးလေဝသနှင့် ဇလဗေဒညွှန်ကြားမှုဦးစီးဌာနမှ သိရသည်။

မန္တလေးတိုင်းဒေသကြီး၊ မကွေးတိုင်းဒေသကြီးနှင့် စစ်ကိုင်းတိုင်းဒေသကြီး အောက်ပိုင်း၊ ကယား ပြည်နယ်နှင့် ရှမ်းပြည်နယ်(မြောက်ပိုင်းနှင့်တောင်ပိုင်း)တို့တွင် ဖေဖော်ဝါရီလ ပျမ်းမျှအပူချိန်၏ ၁.၅ ဒီဂရီစင်တီဂရိတ်နှင့် အထက် (သို့မဟုတ်) ၃.၅ ဒီဂရီဖာရင်ဟိုက်နှင့် အထက်ပိုနိုင်ကြောင်း သိရသည်။

ထို့ပြင် စစ်ကိုင်းတိုင်းဒေသကြီးအထက်ပိုင်း၊တနင်္သာရီတိုင်းဒေသကြီး၊ ကချင်ပြည်နယ်၊ ကရင်ပြည်နယ်၊ မွန်ပြည်နယ်၊ ရခိုင်ပြည်နယ်နှင့် ရှမ်းပြည်နယ်တို့တွင် (၇)ရက်မှ (၉) ရက်ခန့်၊ နေပြည်တော်၊ ရန်ကုန်တိုင်းဒေသကြီး၊ မန္တလေး တိုင်းဒေသကြီး၊ ပဲခူးတိုင်းဒေသကြီး(အရှေ့ပိုင်း)၊ စစ်ကိုင်းတိုင်းဒေသကြီးအောက်ပိုင်း၊ ဧရာဝတီတိုင်းဒေသကြီး၊ ကယားပြည်နယ်နှင့် ချင်းပြည်နယ်တို့တွင် (၃) ရက်မှ (၆) ရက်ခန့်၊ ပဲခူးတိုင်းဒေသကြီး (အနောက်ပိုင်း)နှင့် မကွေးတိုင်းဒေသကြီးတို့တွင် (၁) ရက်မှ (၂) ရက်ခန့် နံနက်ပိုင်းတွင် မြူထူမှုများ ပိုဆိုင်းနိုင်ကြောင်း သိရသည်။

02/02/2025

(၇၅)ရက်ကြာကျင်းပမည့် မန်းရွှေစက်တော်ဘု ရားကြီး၏ (၂၅၉၁)ကြိမ်မြောက် ဗုဒ္ဓပူဇနိယပွဲတော်စတင်ဖွင့်လှစ်

မကွေးတိုင်း၊ မင်းဘူး(စကု)မြို့နယ်ရှိ မန်းရွှေ စက်တော်ဘုရားကြီး၏ (၇၅)ရက်ကြာကျင်းပမည့် (၂၅၉၁)ကြိမ်မြောက် ဗုဒ္ဓပူဇနိယပွဲတော်အား ယနေ့ ဖေဖော်ဝါရီ ၂ ရက်နံနက်ပိုင်းမှစတင်၍ အခမ်းအနားဖြင့်ဖွင့်လှစ်ခဲ့ကြောင်း သိရသည်။

ဖွင့်ပွဲအခမ်းအနားသို့ နိုင်ငံတော်သံဃမဟာနာယကအဖွဲ့ဝင် ဆရာတော်ကြီးနှင့် မန်းရွှေစက်တော်ဘုရားကြီး၏ ဩဝါဒါစရိယဆရာတော်ကြီးများကြွရောက်တော်မူခဲ့ကြပြီး မကွေးတိုင်းဝန်ကြီးချုပ်ဦးတင့်လွင်နှင့်တာဝန်ရှိသူများ တက်ရောက်ကြည်ညိုပူဇော်ခဲ့ကြသည်။

အခမ်းအနားတွင် မန်းရွှေစက်တော်ဘုရား၏ ဗုဒ္ဓ ပူဇနိယပွဲတော် ဖွင့်ပွဲအထိမ်းအမှတ် မင်္ဂလာမုခ်ဦးဆိုင်းဘုတ်အား ဖဲကြိုးဖြတ်ခြင်း၊ မင်္ဂလာမုခ်ဦး ဆိုင်းဘုတ်အား စက်ခလုတ်နှိပ်ဖွင့်လှစ်ခြင်း၊ ဇီဝိတဒါနအဖြစ် ငှက်လွှတ်ခြင်းနှင့် ငါးလွှတ်ခြင်း ၊ အောက်စက်တော်ရာ(ခြေတော်ရာ)အလင်း ပေါက်ဖန်အုပ်စောင်းတော်အား စက်ခလုတ်နှိပ် ဖွင့်လှစ်ခြင်း၊ အထက်စက်တော်ရာ ပါဒစေတီတော်မြတ်သံတံခါးအား ဖွင့်လှစ်ပေးခြင်း၊ ရွှေသင်္ကန်းများကပ်လှူပူဇော်ခြင်းများပြုလုပ်ခဲ့ကြသည်။

ထို့နောက် ကြွရောက်တော်မူလာကြသည့် ဆရာ တော်/သံဃာတော်များက ဗုဒ္ဓပါဒစေတီတော် (ခြေတော်ရာ)နှစ်ဆူနှင့် အောက်စက်တော်ရာ (ခြေတော်ရာ)အနီး၌ အသစ်တည်ထားကိုးကွယ်သည့် ဆုတောင်းပြည့်လိုတရ နမ္မဒါ နဂါးရုံဘုရားအား ဗုဒ္ဓါဘိသကေအနေကဇာတင်တော်မူခဲ့ကြသည်။

မန်းရွှေစက်တော်ဘုရား၏ (၂၅၉၁)ကြိမ်မြောက် ဗုဒ္ဓပူဇနိယပွဲတော်အား ဖေဖော်ဝါရီ ၂ ရက်မှ ဧပြီ ၁၇ ရက်အထိ (၇၅)ရက်ကြာကျင်းပသွားမည်ဖြစ်ကာ အနယ်နယ်ရပ်ရပ်မှဘုရားဖူးများ ညအိပ်တည်းခိုနားနေနိုင်ရန် တည်းခိုဆောင်အခန်း (၃၀၀)ကျော်နှင့် ဈေးဆိုင်ခန်းပေါင်း(၃၅၀)ခန့်ဆောက်လုပ်ပေးထားသည်။

02/02/2025

မိုးယွန်းကြီးအင်းတောရိုင်းတိရစ္ဆာန်ဘေးမဲ့တောအား အာဆီယံအမွေအနှစ်ဥယျာဉ်အဖြစ်သတ်မှတ်နိုင်ရန် အဆိုပြုတင်သွင်းခြင်းလုပ်ငန်းများဆောင်ရွက်နေ

ပဲခူးတိုင်း၊ ပဲခူးမြို့နယ်ရှိ မိုးယွန်းကြီးအင်းတောရိုင်းတိရစ္ဆာန်ဘေးမဲ့တောအား အာဆီယံအမွေအနှစ်ဥယျာဉ်အဖြစ်သတ်မှတ်နိုင်ရန် အဆိုပြုတင်သွင်းခြင်းလုပ်ငန်းများဆောင်ရွက်နေသည်ဟု ပဲခူးတိုင်းဝန်ကြီးချုပ်ဦးမျိုးဆွေဝင်း၏ ပြောကြားချက်အရ သိရသည်။

ယနေ့ ဖေဖော်ဝါရီ ၂ ရက်နံနက်ပိုင်းက မိုးယွန်းကြီးအင်းတောရိုင်းတိရစ္ဆာန်ဘေးမဲ့တော၌ကျင်းပသည့် ၂၀၂၅ ခုနှစ်၊ ကမ္ဘာ့ရေဝပ်ဒေသများနေ့ အထိမ်းအမှတ်အခမ်းအနားတွင် ပြောကြားခဲ့ခြင်းဖြစ်သည်။

မိုးယွန်းကြီးအင်းသည် ကုန်းတွင်းရေဝပ်ဒေသဖြစ်ကာ ဆောင်းခိုငှက်များ၊ မျိုးသုဉ်းရန်အန္တ ရာယ်ရှိသော ငှက်မျိုးစိတ်များကျရောက်ကျက်စားပြီး အရှေ့အာရှ-ဩစတြေးလျ ငှက်ပျံသန်းရာလမ်းကြောင်းကွန်ရက်နယ်မြေတစ်ခုဖြစ်ကာ သဘာဝဂေဟစနစ်များကောင်းမွန်မှုရှိခြင်း၊ ဇီဝမျိုးစုံမျိုးကွဲများပေါကြွယ်ဝခြင်း၊ သဘာဝအခြေခံခရီးသွားလုပ်ငန်းဆိုင်ရာအလာအလားကောင်းများရှိသည်ဟု ပြောသည်။

" အဲဒီလို အလားအလာကောင်းတွေရှိတာကြောင့် မိုးယွန်းကြီးအင်းတောရိုင်းတိရစ္ဆာန်ဘေးမဲ့တောကို အာဆီယံအမွေအနှစ်ဥယျာဉ်အဖြစ်သတ်မှတ်နိုင်ဖို့ အဆိုပြုတင်သွင်းခြင်းလုပ်ငန်းစဉ်တွေကို ဆောင်ရွက်နေပါတယ်"ဟု တိုင်းဝန်ကြီးချုပ်ဦးမျိုးဆွေဝင်းက ပြောသည်။

ထို့ကြောင့် မိုးယွန်းကြီးအင်းရေဝပ်ဒေသ၏ ဝန် ဆောင်မှုနှင့် သယံဇာတများအား ရေရှည်ထုတ် ယူသုံးစွဲနိုင်ရန် ဂေဟစနစ်များ သဘာဝအတိုင်း ကောင်းမွန်စွာတည်ရှိနိုင်ရေးအတွက် ပြည်သူလူထုအား အသိပညာပေးခြင်း၊ လူထုအခြေပြု ထိန်းသိမ်းရေးလုပ်ငန်းများတိုးမြှင့်ဆောင်ရွက်ခြင်းများကိုဆောင်ရွက်သွားကြရမည်ဟုလည်း ပြောကြားခဲ့သည်။

02/02/2025

မုံရွာမြို့ရှိ ပရိယတ္တိစာသင်တိုက်ကြီး(၄)တိုက်မှ ဆရာတော်/သံဃာတော်များအား ဆွမ်းနှင့်ဆွမ်း ဟင်းလောင်းလှူ

စစ်ကိုင်းတိုင်း၊ မုံရွာမြို့ရှိ ပရိယတ္တိစာသင်တိုက်ကြီး(၄)တိုက်မှ ဆရာတော်/သံဃာတော်များအား ဆွမ်းနှင့်ဆွမ်းဟင်းလောင်းလှူပူဇော်ပွဲကို တိုင်းအစိုးရအဖွဲ့မှကြီးမှူး၍ ယနေ့ ဖေဖော်ဝါရီ ၂ ရက်နံနက်ပိုင်းက တိုင်းအစိုးရအဖွဲ့ရုံးဝန်းအတွင်း၌ ကျင်းပရာ တိုင်းဝန်ကြီးချုပ်ဦးမြတ်ကျော်နှင့်ဇနီးတို့ တက်ရောက်လောင်းလှူခဲ့ကြသည်။

တိုင်းဝန်ကြီးချုပ်နှင့်ဇနီး၊ တာဝန်ရှိသူများက ပရိယတ္တိစာသင်တိုက်ကြီး(၄)တိုက်မှ ဆရာတော်/သံဃာတော်များအား ဆွမ်း၊ ဆွမ်းဟင်း၊ သစ်သီး၊ အချိုပွဲများနှင့် ဝတ္ထုငွေများကို လောင်းလှူပူဇော်ခဲ့ကြသည်။

ထို့ပြင် မုံရွာမြို့ရှိ သီလရှင်ကျောင်း(၉)ကျောင်းမှ သီလရှင်ဆရာကြီး/ဆရာလေးများကိုလည်း တိုင်းဝန်ကြီးချုပ်နှင့်ဇနီး၊ တာဝန်ရှိသူများက ဆွမ်းဆန်စိမ်း၊ စားသုံးဆီနှင့် ဝတ္ထုငွေများလောင်းလှူခဲ့ကြသည်။

စစ်ကိုင်းတိုင်းအစိုးရအဖွဲ့မှကြီးမှူး၍ မုံရွာမြို့ရှိ ဆရာတော်၊သံဃာတော်များနှင့် သီလရှင်ဆရာ ကြီး၊ ဆရာလေးများအား ဆွမ်းနှင့်ဆွမ်းဟင်း၊ ဆွမ်းဆန်စိမ်းတို့ကို လစဉ်လောင်းလှူပူဇော်သွားမည်ဖြစ်သည်။

02/02/2025

ရေးမြို့ ကျေးရွာ(၄)ရွာရှိ စစ်ရှောင်အများစု နေရပ်ပြန်

ရေးမြို့နယ်အတွင်းရှိ ကျုံလောင်းကျေးရွာ အပါအဝင် ကျေးရွာ (၄)ရွာရှိ ဒေသခံစစ်ရှောင်ပြည်သူအများစု ၎င်းတို့၏ မူရင်း နေရပ်ကျေးရွာများသို့ ပြန်ကြပြီဖြစ်ကြောင်း ဒေသခံသတင်းရင်းမြစ်တစ်ဦးထံက သိရသည်။

ယခုလ ဇန်နဝါရီ (၉)ရက်မှစတင်၍ ကျုံလောင်းကျေးရွာအနီး နှစ်ဖက်ထိတွေ့တိုက်ပွဲများဖြစ်ပွားခဲ့ရာ အဆိုပါ ကျုံလောင်း‌ကျေးရွာအပါအဝင် ဝယ်ပေါင်၊ ဝယ်ဇင်၊ ကျောက်မိချော င်းကျေးရွာတို့မှ ဒေသခံ ၁၀၀၀ ကျော်မှာ ထားဝယ်မြို့ ရေးချောင်းဖျားဒေသရှိ ဓမ္မပါလကျေးရွာသို့ နေရပ်စွန့်ခွာ ထွက်ပြေးတိမ်းရှောင်ကြရခြင်းဖြစ်သည်။

ဇန်နဝါရီ(၉)ရက်မှစတင်ဖြစ်ပွားခဲ့သော နှစ်ဖက်ထိတွေ့တိုက်ပွဲများသည် (၁၀) ရက်ကျော်အကြာ ပြန်လည်ငြိမ်သက်ခဲ့ခြင်းကြောင့် ဝယ်ပေါင်၊ ဝယ်ဇင်ဒေသခံ စစ်ရှောင်တို့ နေရပ်သို့ ပြန်ကြခြင်းဖြစ်ပြီး၊ ကျုံလောင်းနှင့် ကျောက်မိချောင်းကျေးရွာဒေသခံ စစ်ရှောင်များမှာ ရေးချောင်းဖျားဒေသရှိ ဓမ္မပါလကျေးရွာအတွင်း ဆက်လက်ခိုလှုံနေဆဲရှိသေးကြောင်း သိရသည်။

"ကျုံလောင်းနဲ့ တိုက်ပွဲဖြစ်တဲ့နေရာက လေးမိုင်လောက်ဘဲဝေးတော့ အဲ့ဒီရွာက သူ‌တွေကတော့ မပြန်ရဲကြသေးဘူး။ တိုက်ပွဲတွေကတော့ ငြိမ်သွားပါပြီ။ တိုက်ပွဲနဲ့ဝေးတဲ့ ဝယ်ပေါင်၊ ဝယ်ဇင်ဒေသခံနွေက ပြန်ကုန်ကြပြီ။ ပြန်တဲ့ကျေးရွာသား ရာချီတော့ရှိမှာပေါ့။ ကျန်နေသေးတဲ့ စစ်ရှောင်တွေလည်းစားသောက်ရေးအခက်အခဲတွေရှိတယ်၊ ဆန်တွေလည်းပြတ်နေတော့ တိုက်ပွဲလည်း ငြိမ်သွားပြီဆိုတော့ အချို့စစ်ရှောင်တွေ ပြန်ကြတာပေါ့"ဟု ၎င်းက ရှင်းပြသည်။

လက်ရှိတွင် ကျုံလောင်း၊ ကျောက်မိချောင်းဒေသခံ စစ်ဘေးရှောင်တို့မှာ ရေးချောင်းဖျားဒေသရှိ ဓမ္မပါလရွာအတွင်း ဆက်လက်ခိုလှုံနေကြရဆဲဖြစ်ကာ စားနပ်ရိက္ခာ၊ ဆေးဝါး မလုံလောက်သည့် အခြေအနေနှင့် ရင်ဆိုင်နေရကြောင်း သိရသည်။

02/02/2025

ဒုတိယမြိုင်ကြီးငူဆရာတော်အား Model Honer Of Buddhism For Propagation and Reservations.(Thailand)ဘွဲ့တော်ကို ထိုင်းနိုင်ငံကဆက်ကပ်

ကရင်ပြည်နယ်၊ မြိုင်ကြီးငူအထူးဒေသရှိ ဒုတိယမြိုင်ကြီးငူဆရာတော် သီရိပျံချီဘဒ္ဒန္တဉာဏိက အား Model Honer Of Buddhism For Propagation and Reservations.(Thailand)ဘွဲ့တော်ကို ထိုင်းနိုင်ငံကဆက်ကပ်ခဲ့သည်။

အဆိုပါ ဘွဲ့တံဆိပ်တော်အား ထိုင်းနိုင်ငံ၊ ပညာ ရေးဝန်ကြီးဌာနမှ ယနေ့ ဖေဖော်ဝါရီ ၂ ရက်နံနက် ၁၀ နာရီက ဗန်ကောက်မြို့တွင် အခမ်းအနားဖြင့် ဆက်ကပ်ခဲ့ခြင်းဖြစ်သည်။

ထိုင်းနိုင်ငံ၊ ပညာရေးဝန်ကြီးဌာနမှ ဒုတိယမြိုင်ကြီးငူဆရာတော်အပြင် အရဟံဖောင်ဒေးရှင်း၊ အရဟံဓမ္မကောလိပ်၏ နာယကဆရာတော်များကိုလည်း Model Honer Of Buddhism For Propagation and Reservations.(Thailand)ဘွဲ့တော်ဆက်ကပ်ခဲ့သည်။

ဒုတိယမြိုင်ကြီးငူဆရာတော်သည် အရဟံဖောင်ဒေးရှင်း၊ အရဟံဓမ္မကောလိပ်၏ သြဝါဒါစရိယဆရာတော်ဖြစ်သည်။

02/02/2025

ပြောင်းဆံများတင်လာသည့် Nissan ၁၂ ဘီးကားဘရိတ်ပေါက်တိမ်းမှော-က် ယာဥ်နောက် လိုက်‌ေ-သဆုံး

မန္တလေးတိုင်း၊ ပြင်ဦးလွင်မြို့နယ်ရှိ ပြင်ဦးလွင်- မန္တလေးသွားကားလမ်း၏အဆင်းလမ်းတွင် ပြောင်းဆံများတင်လာသည့် Nissan ၁၂ ဘီးကားဘရိတ်ပေါက်၍တိမ်းမှော-က်ခဲ့မှု ယနေ့ ဖေဖော်ဝါရီ ၂ ရက်ညနေ ၅ နာရီ ၅၀ မိနစ်ခန့်ကဖြစ်ပွားခဲ့ကြောင်း မီးသတ်တပ်ဖွဲ့ထံမှ သိရသည်။

ပြင်ဦးလွင်မြို့နယ်၊ ပြင်ဦးလွင်-မန္တလေးသွားကားလမ်း၏အဆင်းလမ်းအတိုင်း ပြောင်းဆံများတင်ဆောင်၍ နောင်မွန်ဘက်မှ မန္တလေးဘက်သို့မောင်းနှင်လာသော Nissan (နက်ပြာ ရောင်) ၁၂ ဘီးကားသည် အခင်းဖြစ်နေရာ မိုင် တိုင်အမှတ် ၂၆ အရောက် ဘရိတ်ပေါက်ကာ အရှိန်မထိန်းနိုင်ဘဲ လမ်းညာဘက်ခြမ်းသို့တိမ်းမှော-က်သွားခဲ့ကြောင်း သိရသည်။

ဖြစ်စဥ်ကြောင့် ယာဥ်နောက်လိုက်ဖြစ်သူမှာ ကားအတွင်းည-ပ်၍ အခင်းဖြစ်နေရာတွင်‌ေ-သဆုံးသွားခဲ့သဖြင့် ပြင်ဦးလွင်မြို့နယ်မီးသတ်စခန်း၊ ရတနာမြို့သစ်နယ်မြေမီးသတ်စခန်းတို့မှတပ်ဖွဲ့ဝင်များက ရုပ်အလော-င်းအားသယ်ထုတ်မှုများပြု လုပ်ခဲ့ကြကြောင်း သိရသည်။

ထို့ကြောင့် ယာဥ်နောက်လိုက်၏ရုပ်အလေ-ာင်းအား ည ၆ နာရီ ၁၀ မိနစ်၌ သယ်ထုတ်နိုင်ခဲ့ကြပြီး ရွှေမြင်သာလူမှုကူညီရေးအသင်းမှ ပြင်ဦးလွင်မြို့နယ်ပြည်သူ့ဆေးရုံသို့ပို့ဆောင်ပေးခဲ့ကြကြောင်း သိရသည်။

02/02/2025

မန္တလေးမြို့၌ ဒုတိယအကြိမ်မီးလောင်မှု ပြည်ကြီးတံခွန်မြို့နယ်တွင်ဖြစ်ပွား

မန္တလေးတိုင်း၊ မန္တလေးမြို့တွင် ယနေ့ ဖေဖော်ဝါရီ ၂ ရက်နံနက် ၁၀ နာရီ ၅ မိနစ်က ဒုတိယအကြိမ်မြောက်မီးလောင်မှုအဖြစ် ပြည်ကြီးတံခွန်မြို့နယ်တွင်ဖြစ်ပွားခဲ့ကြောင်း မီးသတ်တပ်ဖွဲ့ထံ မှ သိရသည်။

ပြည်ကြီးတံခွန်မြို့နယ်၊ ၁၂၀ လမ်းနှင့် ၇၄ လမ်းရှိနေအိမ်တစ်လုံးတွင် မီးလောင်မှုဖြစ်ပွား၍ ပြည်ကြီးတံခွန်မြို့နယ်မီးသတ်စခန်းမှတပ်ဖွဲ့ဝင်များနှင့် လူမှုကူညီရေးအသင်းဝင်များက ပူးပေါင်းငြှိမ်းသတ်ခဲ့ကြကြောင်း သိရသည်။

ထို့ကြောင့် နံနက် ၁၀ နာရီ ၁၅ မိနစ်တွင် မီးထိန်းနိုင်ခဲ့ပြီး နံနက် ၁၀ နာရီ ၁၉ မိနစ်၌ မီးငြိမ်းသွားခဲ့သဖြင့် စတင်လောင်ကျွမ်းရသည့်အကြောင်း ရင်းနှင့် ပျက်စီးဆုံးရှုံးမှုတန်ဖိုးကို မီးသတ်တပ်ဖွဲ့တာဝန်ရှိသူများက စစ်ဆေးခဲ့ကြကြောင်း သိရသည်။

နံနက် ၇ နာရီ ၅၂ မိနစ်ခန့်ကလည်း မန္တလေးမြို့၊ အောင်မြေသာစံမြို့နယ်၊ ၂၂ လမ်း၊ ၈၂ လမ်းနှင့် ၈၃ လမ်းကြားရှိ နေအိမ်တစ်လုံးတွင်မီးလောင်မှုဖြစ်ပွား၍ မီးသတ်တပ်ဖွဲ့ဝင်များက Level 1 အဆင့်ဖြင့်ငြှိမ်းသတ်ခဲ့ကြ၍ နံနက် ၈ နာရီ ၆ မိနစ်တွင် မီးထိန်းနိုင်ခဲ့ပြီး နံနက် ၈ နာရီ ၁၂ မိနစ်၌ မီးငြိမ်းသွားခဲ့ကြောင်း သိရသည်။

02/02/2025

မက္ကဆီကို၊ ကနေဒါ၊ တရုတ်ကုန်စည်များကိုယူအက်စ်က အခွန်တိုးကောက်

အမေရိကန်သမ္မတ ဒေါ်နယ်ထရမ့်ပ်သည် မက္ကဆီကို၊ ကနေဒါနှင့် တရုတ်နိုင်ငံတို့မှ ကုန်စည်များအပေါ် အခွန်တိုးမြှင့်စည်းကြပ်ရန် ဖေဖော်ဝါရီ ၁ ရက်နေ့တွင် အမိန့်ထုတ်ပြန်လိုက်သည်။ ဤလုပ်ရပ်သည် ကမ္ဘာလုံးဆိုင်ရာ တိုးတက်မှုကို ထိခိုက်စေနိုင်ကာ ငွေကြေးဖောင်းပွမှု မြင့်တက်လာ‌စေနိုင်သည့် ကုန်သွယ်ရေးစစ်ပွဲကို အစပြုလိုက်ခြင်းပင်ဖြစ်သည်။ မက္ကဆီကို၊ ကနေဒါနိုင်ငံများအနေဖြင့် အမေရိကန်ပြည်ထောင်စုအတွင်းသို့ ဖန်တနိုင်းလ်နှင့် တရားမဝင်လူဝင်ရောက်မှုများကို တားဆီးရန် တောင်းဆိုထားသည်။

မက္ကဆီကိုနှင့် ကနေဒါနိုင်ငံတို့က တန်ပြန် အခွန်စည်းကြပ်များ လုပ်ဆောင်မည်ဟု ချက်ချင်းဆိုသလို ကတိပြုလိုက်ကြပြီး တရုတ်နိုင်ငံကမူ မစ္စတာထရမ့်ပ်၏ လုပ်ဆောင်ချက်အပေါ် ကမ္ဘာ့ကုန်သွယ်ရေးအဖွဲ့သို့ အရေးဆိုသွားကာ တန်ပြန်ဆောင်ရွက်ချက်များ လုပ်ဆောင်မည်ဟု ဆိုခဲ့သည်။

ဖလော်ရီဒါတွင် အချိန်အတော်ကြာ ဂေါက်သီးရိုက်ကစားခဲ့ပြီးနောက် သမ္မတအမိန့် သုံးရပ်ကို မစ္စတာထရမ့်ပ်က လက်မှတ်ရေးထိုးခဲ့ပြီး အမေရိကသို့ ဖန်တနိုင်းလ်နှင့် တရားမဝင် လူဝင်ရောက်မှုများ မရပ်မခြင်း သူ၏ နိုင်ငံတော်အရေးပေါ်အခြေအနေဆိုဆိုင်ရာ အခွန်စည်းကြပ်မှုများကို ထားရှိသွားမည်ဟု ကတိပြုခဲ့သည်။

ရေနံချက်နိုင်ငံများ၊ အနောက်အလယ်ပိုင်းနိုင်ငံများ၏ စိုးရိမ်ပူပန်ချက်အရ ကနေဒါမှ စွမ်းအင်ထုတ်ကုန်များအပေါ် ၁၀ ရာခိုင်နှုန်းသာ သူက အခွန်စည်းကြပ်ခဲ့ပြီး မက္ကဆီကို စွမ်းအင်သွင်းကုန်များသည်မူ ၂၅ ရာခိုင်နှုန်းအပြည့် အခွန်စည်းကြပ်မှုနှင့် ရင်ဆိုင်ရမည်ဖြစ်သည်။

ကနေဒါဝန်ကြီးချုပ် Justin Trudeau က ကနေဒါသည် ဘီယာ၊ ဝိုင်၊ သစ်ခွဲသားနှင့် အသုံးအဆောင်ပစ္စည်းများအပါအဝင် ကနေဒါဒေါ်လာ ၁၅၅ ဘီလျံတန်ဖိုးရှိ အမေရိကန်ကုန်စည်များအပေါ် ၂၅ ရာခိုင်နှုန်း တုန့်ပြန်အခွန်စည်းကြပ်သွားမည်ဖြစ်ကာ ဖေဖော်ဝါရီ ၄ ရက်တွင် ကနေဒါဒေါ်လာ ဘီလျံ ၃၀ တန်ဖိုးရှိ ကုန်စည်များအပေါ် စတင်စည်းကြပ်မည်ဖြစ်ကာ နောက် ၂၁ ရက်အကြာတွင် ကနေဒါဒေါ်လာ ၁၂၅ ဘီလျံဖိုးရှိ ကုန်စည်များအပေါ် စည်းကြပ်သွားမည်ဟု ပြောဆိုခဲ့သည်။

ထို့အပြင် ကနေဒါနိုင်ငံသားများ အမေရိကသို့ ခရီးမသွားရန်နှင့် အမေရိကန်ထုတ်ကုန်များကို သပိတ်မှောက်ရန်လည်း သူက တိုက်တွန်းခဲ့သည်။

မက္ကဆီကို သမ္မတ Claudia Sheinbaum ကလည်း တန်ပြန်အခွန်စည်းကြပ်မှုများလုပ်ဆောင်ရန် သူ၏ စီးပွားရေးဝန်ကြီးကို ညွှန်ကြားထားသည်ဟု X ပေါ်တွင် ပို့စ်တင်ပြောဆိုခဲ့သော်လည်း အသေးစိတ်အချက်အလက်များကို မဖော်ပြခဲ့ပေ။

မစ္စတာထရမ့်ပ်၏ အခွန်စည်းကြပ်မှုများကို ရင်ဆိုင်ရန် အတူတကွလုပ်ဆောင်နေသည်ဟု ကနေဒါနှင့် မက္ကဆီကိုတို့က ပြောဆိုခဲ့သည်။

တရုတ်နိုင်ငံ ကူးသန်းရောင်းဝယ်ရေးဝန်ကြီးဌာနက ၎င်း၏ တန်ပြန်ဆောင်ရွက်မှု အစီအစဉ်များကို တိတိကျကျ မဖော်ပြခဲ့ပေ။ ၎င်း၏ သတင်းထုတ်ပြန်ချက်အရ ဝါရှင်တန်နှင့် ပေကျင်းအကြား ဆွေးနွေးမှုများလုပ်နိုင်ရန် တံခါးဖွင့်ထားခဲ့သည်။

Ref: သည်စထရိတ်တိုင်းမ်စ်

02/02/2025

မိန်းမလှကျွန်း တောရိုင်းတိရစ္ဆာန်ဘေးမဲ့တောတွင် နှစ်လအတွင်း ငှက်မျိုးစိတ်( ၁၄၄) မျိုးကျက်စားဆောင်းခို

မိန်းမလှကျွန်းတောရိုင်းတိရစ္ဆာန်ဘေးမဲ့တောတွင် နိုဝင်ဘာလမှ ဇန်နဝါရီလ အတွင်း ငှက်မျိုးစိတ် (၃၈) မျိုးနှင့် ဌာနေငှက် (၁၀၆) မျိုး ၊ စုစုပေါင်း ငှက်မျိုးစိတ်( ၁၄၄) မျိုး ကျရောက် ကျက်စားဆောင်းခိုခဲ့ကြကြောင်း သိရသည်။

မြန်မာ့သဘာဝထိန်းသိမ်းရေးအဖွဲ့ (Nature Conservation Society– Myanmar) အဖွဲ့နှင့် သံယံဇာတနှင့် သဘာဝပတ်ဝန်းကျင်ထိန်းသိမ်းရေးဝန်ကြီးဌာနတို့ ပူးပေါင်း၍ ဇန်နဝါရီ လ (၁၇) ရက်မှ (၁၉) ရက်အထိ စာရင်းကောက်ယူခဲ့ခြင်းဖြစ်သည်။

ထိုသို့ကောက်ယူရာတွင် မြစ်တွေးနှုတ်နီ (Caspian Tern) ၊ ဗျိုင်းအောက်ခေါင်းညို (Chinese Pond Heron)၊ ရေ ညှောင့်ကောင် (Common Sandpiper)၊ ရေညှောင့်နှုတ်သီးကောက် (Curlew Sandpiper)၊ နှုတ်သီးကောက်ကြီး (Eura sian Curlew)၊ တစ်တီတူးခေါင်းမွဲ (Grey-headed Lapwi ng)၊ ဒုံးမြီးခွက် (Lesser Adjutant)၊ ဥပန်း (Oriental Darte r)၊ ငဟစ် (Purple Heron)၊ ခရုစုပ်/ကုလားကောက်/မိန်းမလက် (Whimbrel) စသည်တို့ ကျက်စားနေထိုင်ကြောင်း မှ တ်တမ်းတင်နိုင်ခဲ့သည်ဟု ဆိုသည်။

မိန်းမလှကျွန်းတောရိုင်းတိရစ္ဆာန်ဘေးမဲ့တော သည် ၂၀၀၃ ခုနှစ်တွင် အာဆီယံအမွေအနှစ် ဥယျာဉ် အဖြစ်လည်းကော င်း၊ ၂၀၁၇ ခုနှစ်တွင် ရမ်ဆာရေဝပ်ဒေသအဖြစ် လည်းကောင်း သတ်မှတ်ခြင်းခံထားရပြီး မိန်းမလှကျွန်းတောရိုင်းတိရ စ္ဆာန်ဘေးမဲ့တောသည် အရှေ့အာရှ-ဩစတြေးလျ ငှက်ပျံသန်းရာလမ်းကြောင်း၏ ကွန်ရက် နယ်မြေတစ်ခုလည်းဖြစ်သည်။

ဆောင်းခိုငှက်များသည် မိန်းမလှကျွန်းတောရိုင်း တိရစ္ဆာန်ဘေးမဲ့တောသို့ နိုဝင်ဘာလ (ဒုတိယအပတ်) တွင် လာရောက် ဆောင်းခိုလေ့ရှိပြီး ဧပြီလတွင် ၎င်းတို့ နေရပ်သို့ ပျံသန်းပြီး သားပေါက်ကြသည်ဟု သိရသည်။

စာရင်းကောက်ယူမှုကို မိန်းမလှကျွန်း ဘေးမဲ့တော ဧရိယာများ၊ ဆောင်းခိုငှက်များ၊ ရေပျော်ငှက်များ ကျရောက်ကျက်စားလျှက်ရှိသည့် ရမ်ဆာရေဝပ် ဒေသဧရိယာများပါဝင်သော ငမန်းသောင်၊ ဂဒုံကလေးကျွန်းနှင့် ဂယက်ကြီးကျွန်းများတွင် ကောက်ယူခဲ့ကြခြင်း ဖြစ်သည်။

02/02/2025

အာဆီယံအထူးသံ နေပြည်တော် လာမည်

အာဆီယံအလှည့်ကျဥက္ကဌ မလေးရှားနိုင်ငံ၏ မြန်မာနိုင်ငံဆိုင်ရာ အာဆီယံအထူးသံတမန် Othman Hashim သည် ယခုသီတင်းပတ်တွင် နေပြည်တော်သို့ လာရောက်မည်ဖြစ်ကာ နိုင်ငံတော်စီမံအုပ်ချုပ်ရေးကောင်စီ အကြီးတန်းအရာရှိများနှင့် တွေ့ဆုံသွားမည်ဖြစ်သည်ဟု သံတမန်သတင်းရင်းမြစ်တစ်ခုအရ သိရသည်။

Hashim သည် ဖေဖော်ဝါရီ ၆ ရက်‌နေ့မှ ၈ ရက် နေ့အထိ သူ၏ သုံးရက်ကြာခရီးစဉ်အတွင်း ဗိုလ်ချုပ်မှူးကြီး မင်းအောင်လှိုင်နှင့် ဆွေးနွေးသွားမည်ဖြစ်သကဲ့သို့ အခြားသက်ဆိုင်သူများနှင့်လည်း တွေ့ဆုံသွားမည်ဖြစ်သည်ဟု အဆိုပါသတင်းရင်းမြစ်က ဆိုသည်။

လက်နက်ကိုင်အဖွဲ့များနှင့် နိုင်ငံရေးအရ တွေ့ဆုံဆွေးနွေးလိုကြောင်း မကြာသေးမီသီတင်းပတ်များတွင် မြန်မာ အစိုးရ ‌ပြောကြားထားခဲ့သည်။

ဝါရင့်သံတမန်တစ်ဦးဖြစ်သော Hashim ကို ဇန်နဝါရီ ၁၉ ရက်က ပြုလုပ်ခဲ့သော အစည်းအဝေး၌ အာဆီယံနိုင်ငံခြားရေးဝန်ကြီးများက အာဆီယံအထူးသံအဖြစ် ထောက်ခံအတည်ပြုခဲ့သည်။ မလေးရှားနိုင်ငံခြားရေးဝန်ကြီးဌာ အတွင်းဝန်ချုပ်ဟောင်းဖြစ်သော သူ့ကို မြန်မာနိုင်ငံတွင် အာဆီယံ၏ ငြိမ်းချမ်းရေး အစီအစဉ် ငါးရပ်ကို အထောင်အထည်ဖော်ရာတွင် ကူညီဆောင်ရွက်ရန် တာဝန်ပေးအပ်ထားသည်။

မလေးရှားနိုင်ငံသည် ၎င်း၏ အာဆီယံဥက္ကဌသက်တမ်းတွင် တိုးတက်မှုအနည်းငယ်မျှသာရှိနေသော မြန်မာ့ငြိမ်းချမ်းရေးလုပ်ငန်းစဉ်ကို ဦးစားပေးဆောင်ရွက်သွားမည်ဖြစ်ကြောင်း ထပ်လောင်းပြောကြားခဲ့သည်။

တိုက်ခိုက်မှုများ ရပ်စဲရေး၊ အားလုံးပါဝင်သော နိုင်ငံရေးဆွေးနွေးပွဲများနှင့် လူသားချင်းစာနာထောက်ထားမှုဆိုင်ရာ အကူအညီများပေးနိုင်ရေးတို့ကို အဓိက ထား၍ ဆွေးနွေးကြမည် ဟု ဆိုသည်။

Ref: ထိုင်းပီဘီအက်စ်ဝေါလ်