04/09/2025
အဆိုတော် တာရာက သူ့မွေးလမှာပဲ ကွယ်လွန်ခဲ့ပါတယ်။ စက်တင်ဘာ ၂ ရက် ဆို သူထွက်ခွာသွားတာ ၈ နှစ်တိုင်ခဲ့ပြီပေါ့။ တာရာ က တစ်ကိုယ်တော် အယ်လ်ဘမ် ၄ ချပ်ထွက်ခဲ့တယ်။ ကျွန်တော် တာရာကို စနားထောင်ဖူးတာ သူ့ရဲ့ ဒုတိယ အယ်လ်ဘမ် ပုလဲသီတကွဲစီ(၁၉၉၄)မှာ။ ပုလဲသီတကွဲစီကို သီချင်း နာမည်တွေ အကုန်ဖတ်ကြည့်တာတောင် ရှာမတွေ့ခဲ့လို့ တစ်ခွေလုံး နားထောင်ပြီးတော့မှ ထူးအိမ်သင်ရေးတဲ့ တမ်းတခွင့်ပြုပါရဲ့ Chorus က စာသားကို ခေါင်းစီးနာမည် ပေးထားမှန်းသိလိုက်ရတယ်။
တာရာ့သီချင်း တွေထဲမှာ မောင်မောင်ဇော်လတ်နဲ့ အယ်ဖြူရဲ့ တေးရေး ဆရာဘဝ အစောပိုင်းက သီချင်းတွေရှိတယ်။ သူတို့နှစ်ယောက်နဲ့ ညီညီစံနဲ့ တွဲဖက်ပြီး တောင်ကြီးမြို့အကြောင်း ရေးထားတဲ့ ကိုယ်တို့မြို့လေးဆီ သီချင်းကို ကျွန်တော် သိပ်ကြိုက်တယ်။ တာရာရယ်လို့ လူသိများတဲ့ သီချင်းကတော့ ဇော်မိုးသွင်ရေးတဲ့ အစဥ်အမြဲ သီချင်းဖြစ်ပါလိမ့်မယ်။ နှစ်တွေကြာပြီးခဲ့တဲ့အထိ အစဥ်အမြဲကို လူတွေ တခုတ်တရ နားထောင်နေကြတုန်း ပြန်ပြီးသီဆိုနေကြတုန်းပဲ။
ပုလဲသီတကွဲစီ ကို နားထောင်ပြီးတော့မှ တာရာရဲ့ ပထမဆုံးအယ်လ်ဘမ်ကို ပြန်ရှာနားထောင်ရတယ်။
အသည်းကွဲညနေခင်းနဲ့ မျက်စိမှိတ်ထားတယ်ကို တော်တော်ကြိုက်ခဲ့တာ။
အခုစာတွေရေးနေတဲ့ လွင်မောင်မောင် ဆိုတဲ့ နာမည်ကို တာရာ့ သီချင်းတွေမှာ တေးရေး အနေနဲ့ သိခဲ့ရတယ်။
(သူ့စာအုပ်တွေက အလင်းဆိုင်နှစ်များသို့၊ နွေသစ်ကိုင်းတွေငြိတွယ်၊ ဂရင်းဝှစ်ချ်တရုတ်တန်းအမှတ်(၅၁)၊ သတိရခြင်းများ တစိမ့်စိမ့်၊ ခုနောက်ဆုံးထွက်တဲ့ တို့နှစ်ယောက်အချစ်၊ ကျွန်တော်တော့ သူ့ကို တေးရေးအနေနဲ့ရော စာရေးဆရာအနေနဲ့ရော သိပ်ကြိုက်ပါတယ်။) သူရေးတဲ့ တာရာ့သီချင်းထဲမှာဆို နာကျဥ်းသွားပြီလား နဲ့ ကျွန်တော့်ရဲ့မိုက်မဲမှုကို ကြိုက်တယ်။
သူ့ တတိယအယ်လ်ဘမ်က မြင့်မိုးအောင် တကိုယ်တော်ရေးတဲ့ ကော်ပီသီချင်းတွေ။ ကျွန်တော့်အကြိုက်ဆုံးက
အချစ်နဲ့သိမ်းပိုက်ခြင်း အယ်လ်ဘမ်ဖြစ်နေခဲ့တာ။ ခုချိန် ဖွင့်နားထောင်ရင်တောင် သီချင်းတွေ အကုန်ရနေတုန်း။ မင်းလက်ထဲမှာ အားလုံးရှိတယ် ဆိုတဲ့ သီချင်းကို နားထောင်တိုင်း Positive Vibe ကို အမြဲရတယ်။ ဖိုးဖန် ပြန်ဆိုတော့လည်း နားထောင်ဖြစ်ပါတယ်။ Queen ရဲ့ Too Much Love Will Kill You ကို အချစ်က ဘဝကိုသတ်တယ် ဆိုတဲ့ နာမည်နဲ့ ဆိုထားတာ။
စတုတ္တ အယ်လ်ဘမ်က ချစ်ခြင်းရဲ့မျက်နှာများ၊ သီချင်းဟောင်းတွေ ပြန်ဆိုတာ ၂ပုဒ်ပါတယ်။ စိုးလွင်လွင် ရဲ့ ဂန္ထ၀င်ဆည်းဆာ နဲ့ ထူးအိမ်သင်နဲ့ ဆိုခဲ့တဲ့ မျက်စိမှိတ်ထားတယ်ကို ပိုးဒါလီသိန်းတန်တဲ့ ပြန်ဆိုထားတဲ့သီချင်း။
ယူမိုးကို တေးရေးဆရာနေရာမှာ သတိထားမိခဲ့တဲ့ အခွေပါပဲ။
ပြန်နားထောင်လိုက်တိုင်း အတိတ်ကို ခရီးပြန်သွားမိတယ်။ သူရဲ့ ပုလဲစီတကွဲစီ အခွေကို ကျွန်တော့် ရဲ့ Panasonic ကက်ဆက်ထဲ ထည့်ပြီး နားထောင်ခဲ့တာ၊ အစဥ်အမြဲသီချင်းကို ရစ်ပြီး အစက ခဏခဏပြန်နားထောင်ခဲ့တာ၊ သိပ်ဆိုးတဲ့ကောင်မလေးကို ချစ်ခဲ့မိတာ၊ အသည်းကွဲခဲ့ရတဲ့ ညနေခင်းများနဲ့ ပြန်မရောက်ဖြစ်တော့တဲ့ ကိုယ်တို့မြို့လေးဆီရယ်။ လွမ်းရပါတယ် ကိုတာရာရယ်။ ကျွန်တော်နေတဲ့ နယ်မြို့လေးကနေ ရန်ကုန်ကျောင်းကို ပြောင်းလာတော့ တာရာ တက်ခဲ့တဲ့ကျောင်းမှာ တက်ရလို့ စိတ်ထဲကြည်နူးခဲ့ရတာရော။ တာရာအမေက ဒီကျောင်းက ဆရာမပဲလို့ သိခဲ့ရတာရော။ ဒီအဖြစ်အပျက်တွေ အားလုံးက ဆယ်စုနှစ်သုံးခုကျော် ကြာခဲ့ပြီဆိုတာ မယုံနိုင်အောင်ပါပဲ။
မောင်ညို
1 September 2025
တာရာ Discography
1992 အလင်းတန်းများ
1994 ပုလဲသီတကွဲစီ
1996 အချစ်နဲ့သိမ်းပိုက်ခြင်း
1997 ချစ်ခြင်းရဲ့မျက်နှာများ
Others
1996 လွန်ပွဲ Duet With ခင်ဦးသစ္စာ မှန်တယ်ရှင်
2010 အာလူးစားသူများအကြောင်း
2014 ပုလဲသီတကွဲစီ ထူးအိမ်သင်ဂီတပွဲတော်
Unreleased Songs
ဂျပ်ဆင်ရှေ့ကသတို့သမီး
အချစ်တစ္ဆေ တာရာ x J-Me
လူမိုက်
အစဉ်အမြဲ(၂)
တနေ့နေ့တော့ချစ်လာလိမ့်မည် x ခေါင်းလောင်းလေးတွေမြည်နေပြီ
#တာရာ
