23/10/2025
ကမ္ဘာတဝှမ်းရောက် မြန်မာများ လွယ်ကူစွာငွေလွှဲနိုင်ရန် ဧရာဘဏ်နဲ့ MoneyGram စတင်ပူးပေါင်း
ကမ္ဘာ့တဝှမ်းက ငွေလွှဲသူတွေနဲ့ ငွေလွှဲလက်ခံသူတွေ ပိုမိုအဆင်ပြေစေဖို့အတွက် ဧရာဘဏ်နဲ့ နိုင်ငံတကာငွေလွှဲအဖွဲ့အစည်းကြီးတစ်ခုဖြစ်တဲ့ MoneyGram တို့ မိတ်ဖက်အဖွဲ့အစည်းအဖြစ် အောင်မြင်စွာ ပူးပေါင်းလိုက်ပြီဖြစ်ကြောင်း ဧရာဝတီဘဏ်က သတင်းထုတ်ပြန်ပါတယ်။
ကမ္ဘာ့နိုင်ငံတဝှမ်းက MoneyGram ငွေလွှဲတွေကို ဧရာဘဏ်ငွေစုစာရင်းနဲ့ AYA Pay အကောင့်ဆီ တိုက်ရိုက်ငွေလွှဲနိုင်ပြီး အကောင်းဆုံးငွေလဲနှုန်းထားနဲ့ ငွေလွှဲပမာဏအပြည့်အဝကို ငွေသားနဲ့ ချက်ချင်းထုတ်ယူနိုင်မှာဖြစ်တယ်လို့ သိရပါတယ်။
နိုင်ငံတကာမှာရှိနေတဲ့ MoneyGram ကတစ်ဆင့်ငွေလွှဲမယ်ဆို နည်းလမ်း (၃) ခုနဲ့ ငွေလွှဲနိုင်ပြီး နီးစပ်ရာ MoneyGram ကောင်တာတွေမှာ ငွေလွှဲသူရဲ့ Identity Card (ID card) နဲ့ ငွေလွှဲနိုင်တာ၊ MoneyGram App မှာ အချက်အလက်တွေ ဖြည့်စွက်ပြီး Sign Up လုပ်ကာ ငွေလွှဲနိုင်တာ၊ MoneyGram Website ကတစ်ဆင့် အချက်အလက်တွေ ဖြည့်စွက်ပြီး ငွေလွှဲနိုင်တာ စတဲ့ နည်းလမ်းသုံးခုနဲ့ လုပ်ကိုင်နိုင်သလို ငွေထုတ်ယူသူကလည်း မှတ်ပုံတင်နဲ့အတူ နီးစပ်ရာ ဧရာဘဏ်ခွဲပေါင်း (၂၄၀) ကျော်မှာ ငွေသားထုတ်ယူတာနဲ့ AYA Mobile ၊ AYA Pay App တွေနဲ့ ချိတ်ဆက်ပြီး AYA ATM တွေမှာ 24/7 ငွေသားထုတ်ယူတာ၊ AYA Pay Agent တွေမှာ ငွေသားထုတ်ယူနိုင်တာ စသလို ငွေထုတ်ယူနိုင်မှာပါ။
MoneyGram ဟာ လက်ရှိအချိန်မှာ နိုင်ငံနဲ့ ဒေသပေါင်း ၂၀၀ ကျော်မှာ ငွေလွှဲဝန်ဆောင်မှုတွေကို ဖြန့်ကျက်ထားပြီး သူ့ရဲ့ ကမ္ဘာလုံးဆိုင်ရာကွန်ရက်မှာ လက်လီကိုယ်စားလှယ် (Agent) နေရာပေါင်း ၄၀၀,၀၀၀ ကျော် ပါဝင်သလို ငွေကိုင်ဆောင်ခြင်း (Cash pickup) အပြင် ဘဏ်အကောင့်၊ မိုဘိုင်းလ်ပိုက်ဆံအိတ် (Mobile wallet) နဲ့ ကတ်တွေဆီ တိုက်ရိုက် လွှဲပြောင်းနိုင်တဲ့ နည်းလမ်းများစွာနဲ့ပါ ဝန်ဆောင်မှုပေးနေတာဖြစ်ပါတယ်။
