Myanmar Now

01/07/2025

နောင်ချို၊ သုံးဆယ်ရွာကို စစ်တပ်ဗုံးကြဲ၊၃ဦးသေဆုံး
----------
ရှမ်းပြည်မြောက်ပိုင်း၊ နောင်ချိုမြို့နယ်၊ သုံးဆယ်ကျေးရွာအား စစ်ကောင်စီတပ်က ယနေ့ (ဇူလိုင် ၁) နေ့လယ်ပိုင်း ၃ နာရီအချိန်တွင် လေကြောင်းမှ ဗုံးကြဲတိုက်ခိုက်ခဲ့သဖြင့် ရွာသား သုံးဦး သေဆုံးသည်ဟု ဒေသခံများက ပြောသည်။

သုံးဆယ်ကျေးရွာသည် စစ်ကောင်စီတပ်နှင့် TNLA တို့ တိုက်ပွဲဖြစ်နေသည့် အုမ္မသီးရွာနှင့် ခြောက်မိုင်နီးပါး ကွာဝေးပြီး တိုက်ပွဲဖြစ်ပွားခြင်းမရှိဘဲ စစ်တပ်က လေကြောင်းမှ ဗုံးကြဲခဲ့ခြင်းဖြစ်သည်ဟု သုံးဆယ်ရွာသား တစ်ဦးက ပြောသည်။

“တိုက်ပွဲက ရွာနဲ့ ဝေးပါတယ် ဖြစ်နေတာ။ ကျွန်တော်ဆီမှာ ဘာမှ မဖြစ်ဘူး။ အဲဒါ လေယာဉ် ဝဲပြီး ကြဲသွားတာ။ အရက်ချက်တဲ့ အိမ်က တစ်ယောက် သေတယ်။ ကျန်တာတော့ ဘယ်သူတွေ လဲ မသိရသေးဘူး”

စစ်တပ်က သုံးဆယ်ရွာအား နေ့လယ်ပိုင်း ၃ နာရီမှ စတင်ကာ ၃ နာရီခွဲအချိန်ထိ လေကြောင်းမှ ဗုံး ၁၁ လုံး ကြဲချတိုက်ခိုက်ခဲ့သည်ဟု TNLA ကလည်းသတင်းထုတ်ပြန်သည်။

ထိုသို့တိုက်ခိုက်မှုကြောင့် အမျိုးသား သုံးဦး သေဆုံးပြီး တစ်ဦး ထိခိုက်ခဲ့ကာ နေအိမ် နှစ်လုံးနှင့် ဘုန်းကြီးကျောင်း နှစ်ကျောင်း လည်း ပျက်စီးခဲ့သည်ဟု TNLA ကဆိုသည်။

လေကြောင်းတိုက်ခိုက်ခံရမှုကြောင့် သုံးဆယ်ကျေးရွာတွင် အိမ်စောင့်အဖြစ် ကျန်နေသူများပါ ဘေးလွတ်ရာကို ထွက်ပြေးနေရသည်ဟု ဒေသခံတို့က ဆိုသည်။

နောင်ချိုမြို့နယ်အတွင်း စစ်ကောင်စီတပ်နှင့် TNLA တို့ တိုက်ပွဲ ပြင်းထန်နေချိန်၊ စစ်ကောင်စီတပ်က TNLA ထိန်းချုပ်ရာ ကျောက်မဲ၊ နောင်ချို မြို့များအား နေ့စဉ်နီးပါး ဗုံးကြဲတိုက်ခိုက်နေသည်။

ဇွန်လ ၂၄ မှစတင်ကာ ဇွန်လ ၂၉ အထိ TNLA ထိန်းချုပ်ရာ ကျောက်မဲမြို့အား လေကြောင်းမှ လေးကြိမ်အထိ ဗုံးကြဲတိုက်ခိုက်ခဲ့ရာ အရပ်သား ငါးဦး သေဆုံးခဲ့သည်။

သတင်း -ကျော်ဇင်ဝင်း / Myanmar Now
ဓာတ်ပုံ - The Ta'ang Post

01/07/2025

စစ်တပ်ထိုးစစ်ကြောင့် မိုးဗြဲမြို့လမ်းပိုင်း သွားလာခွင့် ယာယီပိတ်
------------------------
ကယားပြည်နယ်နှင့် ရှမ်းပြည်တောင်ပိုင်းအား ဆက်သွယ်ရာတွင် အရေးပါသည့် မိုးဗြဲမြို့အား သိမ်းပိုက်နိုင်ရေးအတွက် စစ်တပ်သည် ညောင်ရွှေမြို့နယ်အတွင်းမှ စစ်ကြောင်းတစ်ကြောင်းဖြင့် ထပ်မံထိုးစစ်ဆင်နေသည်။

အပြည့်အစုံဖတ်ရန် > https://myanmar-now.org/mm/news/64613/

01/07/2025

မန္တလေးအိုးဘို​ထောင်တွင် မုံရွာ သပိတ်ခေါင်းဆောင် ကိုဝေမိုးနိုင် ရိုက်နှက်ခံရပြီး ဆေးဝါးကုသခွင့်မရ
--------------------------
ကိုဝေမိုးနိုင်ကို အဓိက ပစ်မှတ်ထားပြီး အိုးဘိုထောင်အရာရှိများက“ကိုဝေမိုးနိုင်ကိုက ပုဂ္ဂိုလ်ရေး မုန်းတီးမှုနဲ့ ထောင်အဝင်မှာကတည်းက မင်းလားကွ မုံရွာ သပိတ် ခေါင်းဆောင် ဝေမိုးနိုင်ဆိုတာ ဆိုတဲ့ စကားရပ်တွေကိုကျယ်ကျယ်လောင်လောင်ပြော ပြီး ရိုက်နှက်ခဲ့တာဖြစ်တယ်” ဟု မြန်မာနိုင်ငံလုံး ဆိုင်ရာ နိုင်ငံရေး အကျဉ်းသားများကွန်ရက်ပြောရေးဆိုခွင့်ရှိသူ ကိုသိုက်ထွန်းဦးကပြောသည်။

ပုံစာ - မုံရွာသပိတ်ခေါင်းဆောင် ကိုဝေမိုးနိုင်။

အပြည့်အစုံဖတ်ရန် > https://myanmar-now.org/mm/news/64610/

01/07/2025

ရုရှား-ယူကရိန်းစစ်ပွဲတွင် သေဆုံးခဲ့သည့် မြောက်ကိုရီးယားတပ်သားများကို ကင်ဂျုံအွန် ဂုဏ်ပြုနေပုံ နိုင်ငံပိုင် မီဒီယာတွင် ပြသ
--------------------------------
ယူကရိန်းနှင့် တိုက်ခိုက်ရာတွင် ရုရှားကိုကူညီရင်း ကျဆုံးခဲ့သော မြောက်ကိုရီးယားစစ်သားများ၏ အလံဖုံးအုပ်ထားသော ခေါင်းတလားများကို မြောက်ကိုရီးယားခေါင်းဆောင် ကင်ဂျုံအွန်က ဂုဏ်ပြုနေသည်ကို နိုင်ငံပိုင်မီဒီယာက ဖော်ပြခဲ့သည်။

မြောက်ကိုရီးယားအနေဖြင့် ၎င်း၏ တပ်ဖွဲ့ဝင်များကို ရုရှားသို့ ထပ်မံစေလွှတ်မည့် လက္ခဏာ မတွေ့ရသေးကြောင်း တောင်ကိုရီးယားကာကွယ်ရေးဝန်ကြီးဌာနက ဇူလိုင် ၁ ရက်က ထုတ်ပြန်ချက်ကို AFP သတင်းတွင် ဖော်ပြထားသည်။

နျူကလီးယားလက်နက်ပိုင်ဆိုင်ထားသည့် မြောက်ကိုရီးယားသည် ရုရှားက ယူကရိန်းကို ၃ နှစ်ကျော်ကြာ ထိုးစစ်အတွင်း ရုရှား၏ အဓိကမဟာမိတ်တစ်နိုင်ငံဖြစ်လာခဲ့ပြီး ကာ့စ်ခ်မှ ယူကရိန်းတပ်များကို ဖယ်ရှားရန် တိုက်ခိုက်နေသည့် ရုရှားကိုကူညီရန် ထောင်နှင့်ချီသော တပ်ဖွဲ့ဝင်များနှင့် လက်နက်များစွာကို ပေးပို့ခဲ့သည်။

ရုရှားအတွက် တိုက်ခိုက်ပေးခဲ့သည့် မြောက်ကိုရီးယားစစ်သား ၆၀၀ ခန့် သေဆုံးခဲ့ပြီး ထောင်နှင့်ချီသော ဒဏ်ရာရရှိခဲ့ကြောင်း တောင်ကိုရီးယားလွှတ်တော်အမတ် လီဆောင်းကွမ်က တောင်ကိုရီးယား ထောက်လှမ်းရေးအေဂျင်စီမှ ရရှိသော အချက်အလက်များကို ကိုးကား၍ ပြောကြားခဲ့သည်။

ခံစားချက်အပြည့်ဖြင့် ဝမ်းနည်းပူဆွေးနေပုံပေါ်သည့် ကင်ဂျုံအွန်၏ ရုပ်ပုံများကို ဖော်ပြထားသည့် အဆိုပါ ရုပ်သံဖိုင်တွင် စစ်မြေပြင်ရှိ မြောက်ကိုရီးယားစစ်သားများ၏ ပုံများကိုလည်း “ သူရဲကောင်းများ၊ ကျွန်ုပ်၏ ဇာတိမြေ၏ တောက်ပသော ကြယ်များ၊ ဂုဏ်သိက္ခာကို ကာကွယ်ရန် တွန့်ဆုတ်မနေဘဲ အသက်ပေးခဲ့သူများသည် တောက်ပသော ကြယ်များကဲ့သို့ ထွန်းလင်းနေသည်” ဟူသော စာတန်းများဖြင့် ဖော်ပြထားသည်။ (ရုပ်သံ− AFP)

01/07/2025

ဖားကန့်တွင် တစ်လအတွင်း လက်သည်မပေါ်ဘဲ သတ်ဖြတ်ခံရသူ ၁၁ ဦးအထိရှိလာ
---------------------------
မေလကုန်ခန့်က ဖားကန့်မြို့ကို စစ်ကောင်စီစစ်ကြောင်းရောက်လာပြီးနောက် မြို့တွင် တိုက်ပွဲများ ပြန်ဖြစ်ပွားလာသလို အကြောင်းအမျိုးမျိုးကြောင့် သေဆုံးသူ ဒေသခံ အရေအတွက်လည်း မြင့်တက် လာသည်။

ဖားကန့်တွင် စစ်ကောင်စီတပ်လက်ချက်ကြောင့် သေဆုံးသူ ၂၅ ဦး ထက်မနည်းရှိသလို လက်သည် မပေါ်ဘဲ သတ်ခံရသူ ၁၁ ဦး ရှိနေပြီ ဖြစ်သည်။

အပြည့်အစုံဖတ်ရန် > https://myanmar-now.org/mm/news/64606/

01/07/2025

ဖြူးက အရပ်သား ၂၀ ကျော်ဒဏ်ရာရမှု စစ်ကောင်စီနှင့် တော်လှန်ရေးတပ် အပြန်အလှန်စွပ်စွဲ

စောရယ် ၊ ဇူလိုင် ၁ ၊ ၂၀၂၅

ပဲခူးတိုင်းအရှေ့ပိုင်း ဖြူးမြို့နယ်တွင် တော်လှန်ရေးတပ်နှင့် စစ်ကောင်စီတပ် တိုက်ပွဲဖြစ်နေစဉ် အရပ်သား ၂၅ ဦးဒဏ်ရာရခဲ့သည့် အပေါ် စစ်ကောင်စီတပ်နှင့် ပဲခူးတိုင်းအခြေစိုက် တော်လှန်ရေးတပ်တို့ အပြန်အလှန် စွပ်စွဲကြသည်။

ဖြူးမြို့အရှေ့မြောက်ဘက် ၇ မိုင်ကျော်အကွာ အုတ်ဖြတ်-မုန်းကားလမ်းဘေးရှိ ဝဲကြီးတောင်ရွာသည် ဇွန်လ ၂၉ ရက် နံနက် ၅ နာရီ ၂၀ မိနစ်တွင် ကရင်အမျိုးသားလွတ်မြောက်ရေးတပ် (KNLA) နှင့် ပြည်သူ့ကာကွယ်ရေးတပ် (PDF) တို့၏ လက်နက်ကြီး လက်နက်ငယ်ဖြင့် ပစ်ခတ်မှုကို ခံရကြောင်း စစ်ကောင်စီဘက်က ဇွန်လ ၃၀ ရက်တွင် ထုတ်ပြန်သည်။

ဝဲကြီးတောင်ရွာသည် ရန်ကုန်-မန္တလေး အမှတ် (၂) ကားလမ်းနှင့် ရထားလမ်းဖြတ်သန်းရာ ဇေယျဝတီမြို့၏ အရှေ့ဘက် ၇ မိုင်အကွာတွင်ရှိသည်။

KNLA နှင့် PDF များ၏ ပစ်ခတ်မှုကြောင့် အသက် ၇ နှစ်အရွယ် ကလေး ၁ ဦးနှင့် အသက် ၅၆ နှစ်အရွယ် အမျိုးသမီးတစ်ဦး၊ အသက် ၃၅ နှစ်အရွယ်အမျိုးသမီးတစ်ဦး ဗုံးပေါက်ကွဲစ ထိမှန်ဒဏ်ရာဖြင့် သေဆုံးကြောင်း စစ်ကောင်စီ၏ ထုတ်ပြန်ချက်တွင် ဖော်ပြသည်။

ထို့အပြင် ဝဲကြီးတောင်ရွာနေပြည်သူ ၂၂ ဦးနှင့် ဝဲကြီး (မြောက်) ရွာမှာ အရပ်သား ၂ ဦး ၊ ဝဲဒေါင့်ရွာမှ အမျိုးသား ၁ ဦးဒဏ်ရာရကြောင်း၊ ဒဏ်ရာရသူများကို ဖြူးမြို့နယ် ပြည်သူ့ဆေးရုံတွင် ဆေးကုပေးနေကြောင်း စစ်ကောင်စီဘက်က ဆိုသည်။

ပဲခူးတိုင်းအတွင်းရှိ စစ်ကောင်စီတပ်စခန်းများကို တိုက်ခိုက်နေသည့် အမျိုးသားညီညွတ်ရေးအစိုးရ (NUG) တောင်ပိုင်းတိုင်း အမှတ် (၂) စစ်ဒေသခွဲမှုး ဦးတင်ဦးကမူ အရပ်သားများသေကြေဒဏ်ရာရခြင်းသည် စစ်ကောင်စီဘက်က လေကြောင်းမှ ဗုံးကြဲခြင်းနှင့် လက်နက်ကြီးပစ်ခတ်ခြင်းတို့ကြောင့် ဖြစ်ကြောင်း Myanmar Now ကိုပြောသည်။

၎င်းက တော်လှန်ရေးပူးပေါင်းတပ်များ ဇွန်လ ၂၉ ရက်တွင် ဝင်တိုက်ခဲ့သည့် နေရာသည် ရန်ကုန်-မန္တလေး ကားလမ်းပေါ်ရှိ ဝဲဒေါင့်ရွာက စစ်ကောင်စီစစ်ဆေးရေးဂိတ်ဖြစ်ပြီး ဝဲကြီးတောင်ရွာမဟုတ်ကြောင်း ရှင်းပြသည်။

ဝဲဒေါင့်ရွာသည် ဖြူးမြို့နှင့် ဇေယျဝတီမြို့ကြားတွင် တည်ရှိသည်။
အမှတ် (၂) စစ်ဒေသခွဲမှူး ဦးတင်ဦးက “တိုက်ပွဲဖြစ်တာက ဝဲဒေါင့်ဘက်မှာပါ။ ဒါကို သူတို့ကလေကြောင်းနဲ့ တိုက်တော့ ဝဲကြီးတောင်ဘက်ကို ရည်ရွယ်ချက်ရှိရှိလေကြောင်းတိုက်ခိုက်မှုပြုလုပ်တာပါ။ လေကြောင်းကတိုက်ခိုက်တာတော့ ၁ ကြိမ်တည်းပါပဲ။ နံနက် ၈ ခွဲ တိုက်ပွဲပြီးတဲ့အချိန်ပါ။ လက်နက်ကြီးပစ်ခတ်မှုက တစ်နေကုန် ရည်ရွယ်ချက်ရှိရှိ လုပ်တယ်” ဟု ဆိုသည်။

ဆက်လက်၍ ဦးတင်ဦးက စစ်ကောင်စီတပ်သည် ဇူလိုင်လ ၁ ရက်နေ့အထိ ၎င်းတို့ ထိန်းချုပ်ထားသော ရန်ကုန်-မန္တလေး ကားလမ်းတစ်လျှောက်မြို့များမှတစ်ဆင့် ကားလမ်းအရှေ့ဘက်ကျေးရွာများသို့ လက်နက်ကြီးပစ်ခတ်မှုများ ဆက်လုပ်နေကြောင်း ဆိုသည်။

စစ်ကောင်စီ၏ လက်နက်ကြီးပစ်ခတ်မှုနှင့် လေကြောင်းတိုက်ခိုက်မှုကြောင့် အရပ်သားသေဆုံးမှုများရကြောင်း ၎င်းက မှတ်ချက်ပေးသည်။
ပြီးခဲ့သည့် မေလ ၂၅ ရက်ကလည်း ပဲခူးတိုင်းအရှေ့ပိုင်း ကျောက်ကြီးမြို့နယ် ကျွန်းကြီးရွာရှိ မင်္ဂလာဆောင်တစ်ခုကို စစ်ကောင်စီဘက်က စစ်လေယာဉ်ဖြင့် ဗုံး ၂ လုံးကြဲချတိုက်ခိုက်ခဲ့သည်။

တိုက်ခိုက်မှုအတွင်း သူတို့သမီး အပါအဝင် လူ ၁၂ ဦးသေပြီး ဒဏ်ရာရသူ ၃၀ ကျော်ရှိကြောင်း ၊ ဒဏ်ရာရသူ ထက်ဝက်နီးပါးမှာ ကလေးများဖြစ်ကြောင်း ကရင်အမျိုးသားအစည်းအရုံး (KNU)က ထုတ်ပြန်သည်။

ပုံစာ-ဖြူးမြို့နယ်တွင်သေဆုံးသည့်အရပ်သားနှင့်ဒဏ်ရာရသည့်အရပ်သားများ/Photo Credit-Truth Waves Media တယ်လီဂရမ်

01/07/2025

ခင်ဦးမြို့ပေါ်တွင် တစ်နာရီနီးပါး ထိတွေ့တိုက်ပွဲဖြစ်
--------------------------
တိုက်ပွဲများ ငြိမ်သက်နေသော ခင်ဦးနယ်တွင် မြို့ပေါ်၌ တစ်နာရီခန့်ကြာမြင့်သော ထိတွေ့တိုက်ပွဲ ပေါ်ပေါက်ခဲ့သော်လည်း အခြေအနေပုံမှန်အတိုင်းရှိသည်ဟု ဆိုသည်။

ခင်ဦးမြို့နယ်သည် တောင်ဘက်တွင် ရွှေဘို၊ အနောက်ဘက်တွင် ရေဦး၊ မြောက်ဘက်တွင် ကန့်ဘလူနှင့် အရှေ့ဘက်တွင် ဧရာဝတီမြစ်တစ်ဖက်ကမ်း မန္တလေးတိုင်းနှင့် နယ်မြေထိစပ်နေကာ ယခင်က စစ်ကောင်စီ စစ်ကြောင်းများ မကြာခဏ ဝင်ရောက်လေ့ရှိသည်။

ခင်ဦးမြို့ပေါ်တွင် စစ်ကောင်စီတပ်တချို့ ရှိပြီး ကျန်ကျေးလက် ဒေသအများစုတွင် တော်လှန်ရေးတပ်ဖွဲ့ များက နယ်မြေစိုးမိုးထားသည်။

အပြည့်အစုံဖတ်ရန် > https://myanmar-now.org/mm/news/64602/

01/07/2025

ထိုင်းပြည်တွင်းရေးကို မှတ်ချက်မပေးသော်လည်း တည်ငြိမ်မှု ထိန်းသိမ်းရန် တရုတ်ပြော
−−−−−−−−−−−−−−−−−−−−−−−−−−−
ထိုင်းနိုင်ငံ၏ ပြည်တွင်းရေးကိစ္စတွင် မှတ်ချက်မပေးလိုသော်လည်း နိုင်ငံတည်ငြိမ်ရေးကို မျှော်လင့်ကြောင်း တရုတ်အစိုးရက ဇူလိုင် ၁ ရက်တွင် တိုက်တွန်းလိုက်သည်။

ဝန်ကြီးချုပ် ပေထောင်တန် ရှင်နာဝပ်ကို ထိုင်းဖွဲ့စည်းပုံအခြေခံဥပဒေဆိုင်ရာခုံရုံးက ရာထူးမှ ဆိုင်းငံ့လိုက်ခြင်းနှင့် ပတ်သက်၍ တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ မော်နင်က ပုံမှန်သတင်းစာရှင်းလင်းပွဲတွင် "ဒါက ထိုင်းနိုင်ငံရဲ့ ပြည်တွင်းရေးဖြစ်လို့ ကျွန်မ မှတ်ချက်မပေးပါဘူး။ ဒါပေမယ့် မိတ်ဆွေကောင်းအိမ်နီးချင်းတစ်ဦးအနေနဲ့ ထိုင်းနိုင်ငံအနေနဲ့ တည်ငြိမ်မှုနဲ့ ဖွံ့ဖြိုးတိုးတက်မှုကို ထိန်းသိမ်းထားနိုင်လိမ့်မယ်လို့ ကျွန်မတို့ မျှော်လင့်ပါတယ်" ဟု ပြောကြားခဲ့ကြောင်း AFP သတင်းတွင် ဖော်ပြထားသည်။

ပေထောင်တန်က ဖွဲ့စည်းပုံအခြေခံဥပဒေဆိုင်ရာခုံရုံး၏ ဆုံးဖြတ်ချက်ကို လက်ခံကြောင်း၊ ဟွန်ဆန်နှင့် တယ်လီဖုန်းပြောဆိုမှုသည် ထိုင်းနိုင်ငံအတွက် ကောင်းမွန်သောရည်ရွယ်ချက်ဖြင့် ဖြစ်ကြောင်း ရှင်းပြကာ တရားရုံးတွင် သူမကိုယ်သူမ ကာကွယ်ပြောဆိုမည်ဟု ကတိပြုခဲ့သည်ဟု Bangkok Post သတင်းတွင် ဖော်ပြထားသည်။

“အခု တရားရုံးက ဆုံးဖြတ်ချက်ချလိုက်ပြီဖြစ်လို့ ကျွန်မအနေနဲ့ နှိမ့်ချစွာ လက်ခံပြီး ဝန်ကြီးချုပ်အဖြစ် ဆိုင်းငံ့ထားတဲ့ ကာလအထိ အလုပ်မလုပ်တော့ပါဘူး။ ဒါပေမယ့် ဟွန်ဆန်ကို ကျွန်မခေါ်ဆိုခဲ့တဲ့ ဖုန်းခေါ်ဆိုမှုရဲ့ နောက်ကွယ်က တကယ့်ရည်ရွယ်ချက်ကို တင်ပြပြီး ရှင်းပြဖို့ ကျွန်မမှာ ၁၅ ရက် အချိန်ရှိပါတယ်” ဟု သူမက ဆိုသည်။

ထို့အပြင် ဟွန်ဆန်နှင့် သူမ၏ တယ်လီဖုန်းပြောဆိုမှုအတွင်း နိုင်ငံ၏ အချုပ်အခြာအာဏာကို ကာကွယ်ရန်နှင့် ထိုင်းစစ်သားများ၏ ဘေးကင်းလုံခြုံမှုကို သေချာစေရန်သာ သူမ၏ ရည်ရွယ်ခဲ့သည်ဟုလည်း ပြောသည်။ ပေထောင်တန်သည် ဇူလိုင် ၁ ရက် မွန်းလွဲ ၃ နာရီမတိုင်မီ အစိုးရအိမ်တော်မှ ထွက်ခွာသွားခဲ့ကြောင်း ထိုင်းပြည်တွင်း မီဒီယာများက ဖော်ပြခဲ့သည်။

ပုံစာ − ဝန်ကြီးချုပ် ပေထောင်တန် ရှင်နာဝပ်ကို ထိုင်းဖွဲ့စည်းပုံအခြေခံဥပဒေဆိုင်ရာခုံရုံးက ရာထူးမှ ဆိုင်းငံ့လိုက်ပြီးနောက် အစိုးရအိမ်တော်မှ ပြန်လည်ထွက်ခွာလာစဉ်။ (ဓာတ်ပုံ − EPA)

01/07/2025

အဇာဘိုင်ဂျန်နိုင်ငံ ရဲတပ်ဖွဲ့က ရုရှားအစိုးရပိုင် Sputnik သတင်းအေဂျင်စီရုံးကို ဝင်ရောက်စီးနင်းခဲ့ပြီး သတင်းထောက် ၃ဦးကို ဖမ်းဆီးခဲ့ကြောင်း တာဝန်ရှိသူများနှင့် အေဂျင်စီက ဇွန်လ ၃၀ ရက်တွင် ထုတ်ပြန်ခဲ့သည်။

မြို့တော်ဘာကူရှိ အဆိုပါ သတင်းဌာနကို အဇာဘိုင်ဂျန်အစိုးရက လုပ်ငန်းများလုပ်ခွင့် ဖေဖော်ဝါရီလအတွင်းက တားမြစ်ခဲ့သော်လည်း ဆက်လက်လုပ်ဆောင်နေသောကြောင့် ယခုကဲ့သို့ ဝင်ရောက် ဖမ်းဆီးခြင်း ဖြစ်ကြောင်း သိရသည်။

ယခုကဲ့သို့ ဝင်ရောက်စီးနင်း ဖမ်းဆီးခဲ့ခြင်းအပေါ် ရုရှားနိုင်ငံခြားရေးဝန်ကြီးဌာနက အဇာဘိုင်ဂျန်သံအမတ်ကို ဆင့်ခေါ်ခဲ့သည်။

ဘာကူမြို့ရှိ Sputnik ၏ ဌာနမှူး အီဂေါ ကာတာယက်ဗ်၊ အယ်ဒီတာချုပ် ယက်ဗ်ဂန်နီ ဗီလူဆော့ဗ်တို့ကို ဖမ်းဆီးခဲ့ကာ ရုရှား၏ ဖက်ဒရယ်လုံခြုံရေးအဖွဲ့ (FSB) ၏ ထောက်လှမ်းရေးများအဖြစ် စွပ်စွဲထားပြီး ဖမ်းဆီးခံထားရသူများကို ရုရှားသံတမန်များကို တွေ့ဆုံခွင့် မပြုသေးကြောင်းအဆိုပါ သတင်းဌာနက ထုတ်ပြန်ထားသည်။

နာရီအနည်းငယ်အကြာတွင် ရုံးအတွင်းသို့ ဝင်ရောက်စီးနင်းမှုကို ရိုက်ကူးရန် ရောက်ရှိလာသည့် ရုရှားသတင်းထောက် အီတီကင်ဂူဆီနိုဗာဆိုသူ အမျိုးသမီးကိုလည်း ဖမ်းဆီးခဲ့ကြောင်း ရုရှား အစိုးရက ထောက်ပံ့ထားသည့် ဗီဒီယိုသတင်းအေဂျင်စီ Ruptly က ဖော်ပြခဲ့သည်။

ပြီးခဲ့သည့် သီတင်းပတ်ကုန်အတွင်းက ရုရှားနိုင်ငံ ရီကာတာရင်ဘာ့ဂျ်မြို့ရှိ အဇာဘိုင်ဂျန်လူမျိုးများ နေထိုင်သည့်နေရာကို ရဲများက ဝင်ရောက်ဖမ်းဆီးမှုများ လုပ်ဆောင်ခဲ့ရာတွင် ၂ ဦးသေဆုံးခဲ့ကာ ၆ ဦး ဖမ်းဆီးခံခဲ့ရသည်။

အဆိုပါ စစ်ဆင်ရေးသည် ၂၀၀၁ ခုနှစ်မှ ၂၀၁၁ ခုနှစ်အတွင်း ဖြစ်ပွားခဲ့သော လူသတ်မှုများအတွက် စုံစမ်းစစ်ဆေးရေးရန် လုပ်ဆောင်ခြင်းဖြစ်ကြောင်း ရုရှားက ထုတ်ပြန်ထားသည်။ ရုရှားတပ်ဖွဲံများ၏ စီးနင်းမှုတွင် တစ်ဦးသည် နှလုံးရောဂါဖြင့် သေဆုံးခဲ့ခြင်းဖြစ်ပြီး အခြားတစ်ဦး သေဆုံးရသည့်အကြောင်းကို စုံစမ်း စစ်ဆေးနေဆဲ ဖြစ်ကြောင်း ပြောကြားထားသည်။

အဇာဘိုင်ဂျန်ကမူ ၂ ဦးစလုံး ရဲတပ်ဖွဲ့၏ သတ်ဖြတ်ခြင်းခံရခြင်းဖြစ်ကြောင်း ပြောသည်။ ပြီးခဲ့သည့်နှစ် ဒီဇင်ဘာလအတွင်း ရုရှားက လေယာဉ်ပစ်ဒုံးကျည်ဖြင့် ခရီးသည်တင်လေယာဉ်တစ်စင်းကို ပစ်ချခဲ့ခြင်းကြောင့် လူ ၃၈ ဦး သေဆုံးခဲ့သည်ဟု အဇာဘိုင်ဂျန်က စွပ်စွဲခဲ့ပြီးနောက် နှစ်နိုင်ငံအကြား ဆက်ဆံရေး ပိုမိုဆိုးရွားလာခဲ့သည်။

ပုံစာ − အဇာဘိုင်ဂျန်နိုင်ငံ ရဲတပ်ဖွဲ့ဝင်များကို ၂၀၂၃ ခုနှစ် စက်တင်ဘာလအတွင်း တွေ့ရစဉ်။ (ဓာတ်ပုံ − AFP)

01/07/2025

ရှေးဟောင်းယဉ်ကျေးမှုနယ်မြေ မင်းကွန်းမှာ စစ်တပ်က ရွာလုံးကျွတ် မီးရှို့ဖျက်ဆီး
-----------
ငလျင်ဒဏ်သင့် စစ်ကိုင်းတိုင်း မင်းကွန်းဒေသမှာ စစ်ကောင်စီတပ်ဖွဲ့ဝင်တွေက အင်အားအလုံးအရင်းနဲ့ စစ်ကြောင်းထိုးနေပြီး ရွာလုံးကျွတ် မီးတင်ရှို့တာကြောင့် ဒေသခံပြည်သူ ထောင်နဲ့ချီ ထွက်ပြေးတိမ်းရှောင်နေကြရပါတယ်။

ဒေသခံပျူစောထီးတွေနဲ့ စစ်ကောင်စီ ပူးပေါင်းတပ်တွေဟာ ဧရာဝတီမြစ်ကမ်းတလျောက် မြောက်ဖက်ကို ဦးတည် စစ်ကြောင်းထိုးခဲ့ပြီး စစ်ကြောင်းဖြတ်သန်းရာ လမ်းတလျောက်က ကျေးရွာတွေကို ရွာလုံးကျွတ် မီးရှို့ဖျက်ဆီးမှုတွေ ပြုလုပ်ခဲ့တာပါ။

လက်ရှိအချိန်မှာ မင်းကွန်းဒေသက ရှားရောင်း၊ ကင်း၊ ချောင်းမကြီးနဲ့ အုန်းသဇင်ကျေးရွာတွေက အိမ်ခြေပေါင်း ၅၀၀ ကျော်ဟာ မီးလောင်ပျက်စီးခဲ့ရတယ်လို့ ဒေသခံတွေက ပြောပါတယ်။

ကိုလှိုင်း/ Myanmar Now

ရှေးဟောင်းယဉ်ကျေးမှုနယ်မြေ မင်းကွန်းမှာ စစ်တပ်က ရွာလုံးကျွတ် မီးရှို့ဖျက်ဆီး-----------ငလျင်ဒဏ်သင့် စစ်ကိုင်းတ.....

01/07/2025

ထိုင်းဝန်ကြီးချုပ် ပေထောင်တန်ကို ဖွဲ့စည်းပုံအခြေခံ ဥပဒေဆိုင်ရာခုံရုံးက ရာထူးမှ ဆိုင်းငံ့
--------------------------------
ထိုင်းဝန်ကြီးချုပ် ပေထောင်တန်ရှင်နာဝပ်အား ရာထူးမှ ဆိုင်းငံ့ရန် ဖွဲ့စည်းပုံအခြေခံဥပဒေဆိုင်ရာခုံရုံးက ဇူလိုင် ၁ရက်တွင် ၇ မဲ ၂ မဲဖြင့် ဆုံးဖြတ်လိုက်ကြောင်း Thai Enquirer သတင်းတွင် ဖော်ပြထားသည်။

ကမ္ဘောဒီးယား အထက်လွှတ်တော်ဥက္ကဋ္ဌ ဟွန်ဆန်နှင့် ဖုန်းပြောဆိုမှု ပေါက်ကြားခြင်းအပေါ် စစ်ဆေးရန် အထက်လွှတ်တော်အမတ် ၃၆ ဦးက တင်ပြခဲ့ရာ ခုံရုံးက ၉ မဲ မဲမရှိဖြင့် သဘောတူ ဆုံးဖြတ်ခဲ့သည်။

သူမ၏ အမှုအား စစ်ဆေးကြားနာစဉ် ကြားကာလတွင် ဒုတိယဝန်ကြီးချုပ်နှင့် ပို့ဆောင်ရေးဝန်ကြီး ဆူရီယာ ဂျန်ဂရွန်ဂရီယန်ဂစ်က ယာယီ ဝန်ကြီးချုပ်အဖြစ် ဆောင်ရွက်မည်ဖြစ်သည်။

ပုံစာ − ရာထူးမှဆိုင်းငံ့ခံထားရသည့် ပေထောင်တန်ရှင်နာဝပ်နှင့် ယင်းကို ကန့်ကွက်ဆန္ဒပြနေသူများ (ဓာတ်ပုံ − EPA)

01/07/2025

အွန်လိုင်း ငွေလိမ်ဂိုဏ်းများ ကမ္ဘာအနှံ့ပျံ့နှံ့လာခြင်းနှင့်အတူ လူကုန်ကူးမှုများ မြင့်တက်လာအကြောင်း Interpol ထုတ်ပြန်
----------------------------
လူကုန်ကူးခံထားသူများဖြင့် လည်ပတ်နေသော ငွေလိမ်ဂိုဏ်းများသည် ကမ္ဘာအနှံ့သို့ သိသိသာသာ ချဲ့ထွင်လာကြောင်း Interpol ၏ ဇွန်လ ၃၀ ရက် ထုတ်ပြန်ချက်ကို DW သတင်းဌာနက ဖော်ပြထားသည်။ ယခင်က အရှေ့တောင်အာရှဒေသတွင်သာ အဖြစ်များခဲ့သည့် အဆိုပါ ဒုစရိုက်ကျူးလွန်မှုပုံစံသည် တဖြည်းဖြည်းကျယ်ပြန့်လာပြီး AI နည်းပညာကိုပါ အသုံးပြုလာကြသည်ဟုဆိုသည်။

ငွေလိမ်ဂိုဏ်းများအတွက် လူကုန်ကူးခံရသူများတွင် ကမ္ဘာ့ဒေသအသီးသီးရှိ နိုင်ငံပေါင်း ၆၆ နိုင်ငံမှ လူပေါင်းသိန်းနှင့်ချီ ပါဝင်ပြီး ကမ္ဘာ့ပြဿနာတစ်ရပ် ဖြစ်လာကြောင်း Interpol ၏ ထုတ်ပြန်ချက်တွင် ဖော်ပြထားသည်။

ငွေလိမ်ဂိုဏ်းများကို ယခုအခါ အရှေ့အလယ်ပိုင်း၊ အနောက်အာဖရိကနှင့် ဗဟိုအမေရိက အပါအဝင် အခြားဒေသများတွင် ပိုမိုတွေ့ရှိလာရသည်။ လူကုန်ကူးခံရသူများသည် အများအားဖြင့် အတုအယောင်အလုပ်အကိုင် ကမ်းလှမ်းမှုများဖြင့် သွေးဆောင်ခေါ်ယူပြီးနောက် ငွေလိမ်ဂိုဏ်းများ၏ အဆောက်အအုံများအတွင်း ဖမ်းဆီးချုပ်နှောင် ခံထားရလေ့ရှိသည်။

ဖမ်းဆီးခံထားရသူ အများအပြားသည် ကြွေးမြီများတင်သည်ဟုဆိုကာ ခြိမ်းခြောက်ခံရခြင်း၊ ရိုက်နှက်ခံရခြင်း၊ လိင်ပိုင်းဆိုင်ရာ အမြတ်ထုတ်ခံရခြင်း၊ အချို့သည် နှိပ်စက်ခံရခြင်း သို့မဟုတ် အဓမ္မပြုကျင့်ခံရခြင်းများပင် ရှိသည်ဟုလည်း Interpol က ဖော်ပြထားသည်။

၂၀၂၄ ခုနှစ်က ဖိလစ်ပိုင်ရှိ စီးပွားရေးလုပ်ငန်းအဆင့်လုပ်ကိုင်နေသည့် ငွေလိမ်ဂိုဏ်းတစ်ခုကိုလည်း ဝင်ရောက်စီးနင်းခြင်းအပါအဝင် Interpol ဦးဆောင်သော စစ်ဆင်ရေးတွင် ထောင်နှင့်ချီသော လူကုန်ကူးခံရသူများကို လိမ်လည်မှုများ ကျူးလွန်ရန် ခိုင်းစေခဲ့သည့် အမှုများကို ဖော်ထုတ်နိုင် ခဲ့သည်။

ထိုနှစ်မှာပင် နမီးဘီးယားရှိ ငွေလိမ်ဂိုဏ်းတစ်ခုကို ရဲတပ်ဖွဲ့က စီးနင်းဖမ်းဆီးခဲ့ရာတွင် လိမ်လည်မှုများအတွက် လူငယ် ၈၈ ဦးကို အတင်းအကျပ် ခိုင်းစေနေကြောင်း တွေ့ရှိရသည်။ နည်းပညာအသစ်များကို အသုံးပြုလုပ်သည့် ငွေလိမ်ဂိုဏ်းများသည် အတုအယောင်အလုပ်ကြော်ငြာများ ဖန်တီးခြင်းမှသည် လိင်ပိုင်းဆိုင်ရာခြိမ်းခြောက်မှုနှင့် အလိမ်အညာအချစ်ရေးကိစ္စများအတွက် ပရိုဖိုင်အတုများ ဖန်တီးခြင်းအထိ ဉာဏ်ရည်တု (AI) အသုံးပြုမှု မြင့်တက်လာသည်ကို တွေ့ရှိရကြောင်း Interpol က သတိပေးထားသည်။

ယခင်က လူကုန်ကူးခံရသူများသည် အများအားဖြင့် တရုတ်စကားပြောသူများဖြစ်ပြီး ၎င်းတို့သည် တရုတ်၊ မလေးရှား၊ ထိုင်း သို့မဟုတ် စင်ကာပူနိုင်ငံများမှ ရောက်လာကြသူများ ဖြစ်သော်လည်း ယခုအခါ တောင်အမေရိက၊ အရှေ့အာဖရိကနှင့် အနောက်ဥရောပတို့မှ လူများလည်း ငွေလိမ်ဂိုဏ်းများသို့ လူကုန်ကူးခံလာရသည်ဟုဆိုသည်။ ထိုငွေလိမ်ဌာနများသို့ ရောင်းဝယ်ဖောက်ကားလာကြသည်။

"ဒီလို ကမ္ဘာအနှံ့အပြားကို လျင်မြန်စွာ ပျံ့နှံ့နေတဲ့ ခြိမ်းခြောက်မှုကို ကိုင်တွယ်ဖြေရှင်းဖို့ နိုင်ငံတကာ ပူးပေါင်းဆောင်ရွက်မှု လိုအပ်ပါတယ်" ဟု Interpol ၏ ရဲလုပ်ငန်းဆိုင်ရာဌာန ယာယီအကြီးအကဲ ခရေးဂေါက်က ပြောသည်။

Interpol ၏ အစီရင်ခံစာအရ လူကုန်ကူးမှုတွင် ကူညီဆောင်ရွက်သူများ၏ ၉၀ရာခိုင်နှုန်းနီးပါးခန့်သည် အာရှမှဖြစ်ပြီး ၁၁ရာခိုင်နှုန်းမှာ တောင်အမေရိက သို့မဟုတ် အာဖရိကမှ ဖြစ်ကြောင်း တွေ့ရှိရသည်။ ထို့ပြင် လူကုန်ကူးမှုတွင် ကူညီဆောင်ရွက်သူများ၏ ၈၀ ရာခိုင်နှုန်း ခန့်သည် အမျိုးသားများဖြစ်ပြီး ၆၁ရာခိုင်နှုန်း မှာ အသက် ၂၀ မှ ၃၉ နှစ်ကြား ဖြစ်ကြသည်။

အွန်လိုင်းငွေလိမ်ဂိုဏ်းများသည် ကနဦးတွင် ကမ္ဘောဒီးယားတွင် အများဆုံး အခြေစိုက်ခဲ့ပြီး နောက်ပိုင်းတွင် လာအိုနှင့် မြန်မာတို့တွင်လည်း လူကုန်ကူး ငွေလိမ်ဂိုဏ်းများကို အာရှနိုင်ငံ ၄နိုင်ငံထက်မနည်းတွင် တွေ့ရှိခဲ့ရာ အလားတူပုံစံသည် ဆိုက်ဘာရာဇဝတ်မှုများ မြင့်တက်နေသည့် အနောက်အာဖရိကကဲ့သို့သော အခြားဒေသများသို့ ပျံ့နှံ့နေကြောင်း Interpol က တွေ့ရှိထားသည်ဟု ဆိုသည်။

လူကုန်ကူးမှုလမ်းကြောင်းများကို ဖြတ်တောက်ရန်နှင့် လူကုန်ကူးခံရသူများကို ကူညီပံ့ပိုးရန် အရေးပေါ်၊ ပူးပေါင်းဆောင်ရွက်သော လုပ်ဆောင်မှု လိုအပ်ကြောင်း Interpol က သတိပေးထားသည်။

ပုံစာ − ထိုင်းနိုင်ငံ ဗဟိုစုံစမ်းစစ်ဆေးရေးဗျူရို ရဲအရာရှိများက ဖမ်းဆီးရမိသည့် အွန်လိုင်းလိမ်လည်မှုများတွင် အသုံးပြုသည့် Sim Box၊ GSM Gateway၊ ပြည်တွင်းပြည်ပ Sim Card များနှင့် Starlink ဂြိုဟ်တုအင်တာနက်ပစ္စည်းများကို ၂၀၂၄ ခုနှစ်၊ မေလ ၃၁ ရက်နေ့က ပြုလုပ်သည့် သတင်းစာရှင်းလင်းပွဲတွင် ပြသထားစဉ်။ (ဓာတ်ပုံ − EPA)