Tedim Khuavak

Tedim Khuavak This is the publishing organ of Tedim Baptist Church - Yangon located in Yangon. To uplift Zolai a

This page is created for your information about the publishing materials of Tedim Baptist Church - Yangon. The Church named Tedim Khuavak as its organ, and it serves the literary works written mainly in the dialect of Tedim Chin (locally called Zopau). This page was under the direct control of Church's Executive Committee. And the Committee gives full authorities to the Communication Committee.

31/08/2023

LAIZING NI | AUGUST 31

LATE 142
Ka cih nading ka theih nawnloh ciangin, amah in ka mailam ding hong theihsak hi. [LATE 142:3]

THEIHLOH LAMZAWI

Gam lakah tai dingin Brian in hong zawn a, zui kei hoih leng ci kawm sa-in ka zui kha hi. Gamdang mi ka hih manin hih lampi a sauna, hih lei maitang omzia cihte ka theih om lo hi. Tua ban ah Brian pen a taihat khat hisawn ahih manin amah ka delhna lamin ka khe kihekkha diam? cih ka patau hi. Ama nung zui khin, muan ding simloh a dang om diam? Lampi ah tai kipan phet, ka lung himawhna khang semsem. Lampi phokliapluap, lopa pha lailai. Phadawm ei, Brain in hong leh-etkik zel, lampi nuam lo a om ciang hong gen khol den.

Lai Siangtho sunga mi pawlkhat, Canaan gamah Abraham, sehnel gamah Israel mite leh Lungdamna Thu a tangko Jesu’ nungzuite’ Pasian’ nasepna ah theihloh lamzawi a totna uhah tu-a, namdan lungsim vomtek ding uhhi. A khualzinna uhah hamsatna tuakkha thei ding cih simloh bang pianglai ding cih thei lo uhhi. Ahi zongin mai-a, zuih ding lampi a thei Khat in amaute’ makaih hi. Pasian in amaute mainawtzawh nading thahatna a piak banah amaute kemin dal ding cih pen upkul hi. Manawh nading mun, ciantheih mahmah ahih manin amaute in amah zui uhhi.

Hih kamkhap in David a galtai laitakin lungnoptuamna ngah hi. Bangmah kigenkhol thei lo dinmun a tun hunin “Ka cih nading ka theih nawnloh ciangin, amah in ka mailam ding hong theihsak hi” ci hi (LATE 142:3). Mailam i kalsuan nadingah i lau hun zong om thei ding hi. Ahi zongin eite in ahihleh eite hong tonpih i Pasian in i lampi hong theihsak hi. LESLIE KOH

Na nuntakna sungah na lunghimawh pen bang ahi hiam? Nang tawh Pasian tonkhawmin na mailam ading ama’n thei cih na theihna in nanglenang hong bangci kiphawnsak hiam?

Pa Pasian, mailamah bang piang ding cih ka theihloh hangin nang na thei hi. Nangmah in hong kemin hong kalsuanpih ding cih ka thei hi.

KUMTAWN LAI SIANGTHO | LATE 132-134; 1 KORIN 11:17-34

30/08/2023

NILAI NI | AUGUST 30

ISAIAH 26:1-13
Midik pa’ lampi tamkim a, nangmah in midik pa’ lampi na neelsak hi. [ISAIAH 26:7]

KALSUANNA DUNGAH SUAHTAKNA

Mit khua mulote adingin a kibawl Beep Baseball kici kimawlna nam khat om hi. “Batter” a kici ciangsatpa in baseball a sat khit ciangin tai vingveng dinga “buzzing base” a kici awging khuam va len ding hi. Tua khuam a let ma-in, tualpi sungah baseball mante (fielders) in ball a mat zawh leh ciangsatpa a si ahihi. Ciangsatpa in khuam a let man leh a zo ahihi. Hih kimawlna ah a kihel ngei khat in ball delhin ka tai ciangin “suakta mahmah ing,” ka taina ding mun awng cih thei ka hih man hi, ci hi.

Isaiah sungah Thutang Pasian in “Midik pa’ lampi tamkim a, namgmah in midik pa’ lampi na neelsak hi” ci hi (26:7). Hih lai a at hunin Israel-te’ lampi mom leh kilawm napi, a thumanloh manun Pasian’ thukhenna thuak uhhi. Isaiah in khatveivei, tot ding hamsaphial taleh lampi mom ahi, upna leh thumanna tawh a kalsuan nadingun hanthawn hi. Amau’ lungsim sungah thudang koih lo-in Pasian’ “min leh mithanna ding” mah deihpenin a neih dinguh ahi hi (26:8).

Thu um mite ihih mah bangin Pasian’ thu theihna khangin ama’ lampi zuihna tawh a muanhuai ama’ pianzia tungah i up, i muanna i lam ding hi. Nuntak kalsuanna ah i tot lampi pen neelden lo ding tawh a kibat hangin Pasian in eite hong tonpihin i suahtak nading lampi hong honsak cih um ihih manin i lungmuang thei hi. Eite’ ading lampi hong hahsiangsak Pasian’ thu zuihna tawh suaktatakin i tai thei hi. ANNE CETAS

Thumanna tawh na kalsuan na’ngin nasep ding bang kisam hiam? Tua pen bang hunin bangci sepsawm na hiam?

Pa Pasian, a mom nangma lampi panin ka ngahkhak suahtakna hangin ka lungdam.
Nangma lampite mah hong tawnsuaksak ta in.

KUMTAWN LAI SIANGTHO | LATE 129-131; 1 KORIN 11:1-16

29/08/2023

PITHAI NI | AUGUST 29

MATTHEW 11:25-30
Na semin vangik pua-in a gim mite khempeuh aw, ka kiangah hong pai ta un. Note tungah lungsim tawldamna ka hong pia ding hi. [MATTHEW 11:28]

NA THAZAWM CIANG

Ni khat nasep ka man hun hita, ka laptop mai-ah tangvet lo-in ka tu hi. Ni khat sunga ka zawhsa nasepte tawh lungdam ding hinapi, tawllua ka hih manin ka tuacizo kei hi. Nasepna ah kilemlohna vai hangin ka lungbuaina in ka liang sagolhteng nasak zo hi. Tua pan taimang nuamin ka lungsim vakzau-a, TV peuh enhithiat leng noptuak ka samai hi.

Ahi zongin ka mitsi kawmin “T**a” ka ci hi. Tawllua ka hih manin thu ka ngetbeh thei kei hi. Ka thazawmna khempeuh tua kammal sungah avekin kihel hi. Thu khatah tua dan ding mah zong, ana hihzawk lam ka theihna hipah hi.

Jesu in vangik pua-in a gim eite khempeuh kiangah “Hong pai ta un”, note tungah “tawldamna ka hong pia ding hi” ci hi (MATTHEW 11:28). Zan ihmutna pan tawldamna hilo, nisim tuahkhak thute pan TV et sung, tawldamna hilo, buaina khatpeuh veng cih ciang bek hilo, hihte khempeuh tawlngakhna hoih ahihsam hangin khantawn kimang lo-a, thulela omziate tungah kinga bek hi.

Tua bang hilo-in, Jesu hong piak tawldamna pen kip tawntunga, a kikhel ngeilo ama pianzia tawh kamkhap hong kipia ahi hi. Amah hoih den hi. Na khempeuh ama’ khut sungah om cih itheih manin eite’ hamsatna sung nangawnah lungsim tawldamna taktak hong pia hi. Amah bek in i hamsat laitak nangawn thuakzawhna leh nuntakzawh nading thahatna, puahphatna hong pia ahih manin amah umin ama kiangah i niamlut thei hi.

“Hong pai ta un” “Hong pai un” ci-in T**a Jesu in eite hong sam hi.
KAREN HUANG

Na lungsim kha a zawm ciangin koi lai-ah tawldamna zong ding na hiam? Ama kiangah tawlnga dingin hong zawn Jesu, bangci dawntuahkik ding na hiam?

Van a, Pa aw, tawldamna taktak pen nang sung bekah om ahihlam hong phawktheisak ta in.

KUMTAWN LAI SIANGTHO | LATE 126-128; 1 KORIN 10:19-33

28/08/2023

PIZING NI | AUGUST 28

JOB 1:13-22
T**A in hong pia-a, T**A mah in hong lakik hi. T**A’ min kiphat tahen. [JOB 1:21]

NA KHEMPEUH BEIMANG

Cesar in leidawhna, mualsuang bawlna leh inn golpipi lamna ah sumbul tawm tawh a kihelna pan nasep maban a thak khat sep ding lunglut hi. A nasep masakna a, sumbulteng zuakin a sawtlo-in nasep thak kipat nadingin bank ah koih hi. Tua hun sungin k*mpite in mipite aituam sumkholteng luakmang uhhi. Cesar’ khantawn sumkhol pen tomkal sungin tuikhu bangin lengmang hi.

Cesar in tua pen thumanlo-a, nasepna lamin a muhloh nading leh Pasian in lam a lahtohtoh nadingin thungenzaw hi. Tua pan lungsim siangtak tawh amah kithakpat hi.

Hun sia tomno sung khatin Job in a neihsa a vekpi phialin beimang hi. A nasemte leh a tate avekin si hi (JOB 1:13-22). Tua pan ama’ cidamna sukha hi (2:7-8). Job’ dawntuahzia pen eite ading khantawn etteh ding limpha hi. Ama’n thungen a, “ka nu sung panin ka guaktangin ka suak a, guaktang mahin ka ciahkik ding hi. T**A in hong pia-a, T**A mah in hong lakik hi. T**A’ min kiphat tahen” ci hi (1:21). A thu khupna ah “Hih thu khempeuh Job khial lo a, Pasian zong mawhsak lo hi” (1:22).

Job bang mahin Cesar in zong Pasian mah muan ding teelzaw hi. Hun tomno sungin a nasep masapen sangin a lawhcingzaw nasep thakkhat phuangkhia thei hi. Cesar’ tangthu pen Job thukhupna tawh kivalak hi (Job 42 sim in). Ahi zongin Cesar in sum bawlna tawh lawhcingkik lo ding hiphialmah taleh zong a neihsa taktak pen hih leitungah omlo cih theilua hi (MATTHEW 6:19-20). Amah in Pasian muangsuak suak hi. TIM GUSTAFSON

Supna lianpi na tuah hun ciangin hong bangci phawn hiam?
Na supnate tawh kisai-in Kha Siangtho in bang hong theisak hiam?

Kong it Pasian, ka tel ka theih thu tam lo ahih manin tuni-in
nong itna thu kei, hong hilh in.

KUMTAWN LAI SIANGTHO | LATE 123-125; 1 KORIN 10:1-18

27/08/2023

NIPI NI | AUGUST 27

1 KHANG. 28:2-3, 6-12
T**A’ Thuciamna Singkuang ading leh … biakinn khat lam dingin ka lungsimah om hi. [1 KHANGTANGTHU 28:2]

LUNGBUAINA KANTAN

Oklahoma High School pan sang zo ta ding sangnaupang pawlkhat “lenlai hun khualzin khawm ding” ci-in geelna tawh sum khol uh a, vanleng letmat zong lei khol uh hi. A hizongin vanleng tual a tun uh ciangin a letmat uh pen mikhemte kiang pan a lei khak uh ahih lam thei pan uh hi. “Khasiat huai buang ei” ci kawmkawmin, tua kiim a a et huai munteng ah ni nih sung va pha uh a, lutman kimaap ahih manin nuamsa veve uhhi.
Lawhsapna, gelnateng kilumletna in hong lunghamsak, hong khasia sak thei hi. Ahang pen tua ading i hunte, i sumte a kipan i lungsim khempeuh kiphum ahihman hi. K*mpi David in Pasian’ ading biakinn khat lam dingin “a lungsim sungah om hi” (1 KHANGTANGTHU 28:2), ahi zongin Pasian in ama kiangah “Keima min dingin biakinn na lam thei kei ding hi … Ka biakinn lam ding pa pen na tapa Solomon ahi hi” ci hi (28:3, 6), David lungkia tuanlo hi. Israel minamte uk ding k*mpi-in a koih manin Pasian tungah lungdam ko-a, biakinn lam nadinga a gelna khempeuh Solomon tungtawnin zo siangsak hi (28:11-13). Tua ciangin David in a tapa Solomon kiangah, “Thakhuahin hang inla, sem in. … T**A Pasian, … nang tawh hong om hi” ci-in thapia hi (28:20).

Eite’ gelna ngimnate ahang tuamtuam tawh kisongsawlaw taleh “eite hong kem” Pasian kiangah i lunghamna khempeuh tunpih ni (1 PETER 5:7). Ama’ hehpihna tawh eite’ lungkhamnate ama’n hong vaihawmpih ding hi. ALYSON KIEDA

Tampitak na gelna ciklai-in tangtung lo ngei na hiam?
Na lungneuna a ven na’ngin bang in hong huhthei ding hiam?

Kong it Pa Pasian, nangma kamciamte leh na gelnate cikmahin kisia ngeilo ahih manin ka lungdam. Kei’ ate ciangin zong hong huh in.

KUMTAWN LAI SIANGTHO | LATE 120-122; 1 KORIN 9

25/08/2023

LAITHAI NI | AUGUST 25

JOHN 11:25-36
Tua ahih manin amaute in, “Jesu in zong Lazaras nak it mahmah hi”
a ci uhhi. [JOHN 11:36]

LAWM HOIH JESU

Ka lawm lui khat tawh ka kimuhloh uh sawt mahmah hi. Tua sungin cancer natna ngah a, zatui kibawl hi. Lemetloh pi-in ama’ tenna ah khualzin nading thu hong omin ka kimukik thei uhhi. An sai khatah lutin ka khitui uh hong luang hi. Khan sung khata omkhoploh sawtkhin taleh tu-in sihna in hong nehteh nuntak hun a tomzia ka nihun hong phawng mahmah hi. Kote gel’ khitui pen vai tampi phutngam hun, hai kithutuah hun, gualnop hun, guallelh hun cih itna tawh sauveipi kithuahna pan hong phulkhia hi. Ki-it lua ka hih manun khatlekhat ka kimuh uhteh khitui hong luang ahi hi.

T**a Jesu zong kap hi. Jew te in “T**a aw, hong pai inla hong en in” (11:34) ci-a, Jesu zong a lawm hoih Lazaras hankhuk mai-ah ding hi cih Lungdamna John sungah kiciamteh hi. Tua banah mihingte’ gimthuakna Jesu in a thuakpihna a kilangsak kammal nih “Jesu kap hi” cih i sim hi (11:35). John’ ciaptehloh thu piangsuak a om tam? Om mah. Ahi zongin Jesu’ nasepna tungtawnin Jew-te dawntuahna ah “Jesu in zong Lazaras nak it mahmah” (11:36) a cih uh pen hi ka sapah hi. Hih laigual in i nasep khawlphotin i thanemna khempeuh hong thei i lawmhoih pen i biak nading s*ksan thulela a kicingzah sangin tamzaw lai hi. T**a Jesu in silesa nei, khitui nei, hong itin hong theisiam i honpa ahi hi.
JOHN BLASÉ

Jesu’ mihing mah hi ci-a, na ngaihsut a nunungpen ciklai hiam? Tuni, na khitui luanna Jesu in hong theihpih, hong puakpih cih na theihna in tha hong bangci guat hiam?

Kong it Jesu, hong honkhia Pa leh khitui hong luanpih Pa nong hih mahmah nuam lua ing.

KUMTAWN LAI SIANGTHO | LATE 119:1-88; 1 KORIN 7:20-40

24/08/2023

LAIZING NI | AUGUST 24

2 TIMOTHY 1:6-14
Pasian in eite tungah meidawina lungsim hong guan lo a, thahatna, ki-itna, pumpi ki-ukzawhna lungsim hong guan hizaw hi. [2 TIMOTHY 1:7]

LUNGSIM TAKPI TAWH CITNA

Laigelh siam Parker Palmer in sangtuah pawikhata a thugenna ah i sihkuan ciangin “Angsung theihna, aituam meetna leh sepna hangin ka lungdam ci-in sihkuan kam vaikhak a nei khat zong om lo hi” ci hi. Sang tuakte a hanthotna ah “Citna lungsim tawh mi’ ading, leitung’ ading … kipiakhia un” ci hi.

A genbehna ah tua banga nuntak pen “Na theihna a tawmlam leh kilawhsam baih” ahihzia na theihkhakna zong hipah ding ci hi. Leitung’ ading semkhia dingin eile-ei i kipiakkhiat ciangin na khempeuh “A kisin pan khat ka hi hi, cih lungsim puak” neihzawh ding kisam hi. Tua hileh bek “Na theilohna maantak sangsiamin lawhsapna zong phulngam ding, a thak sinbeh dingin kithawikik zo ding” ci hi.

“Lungsim takpi tawh citna” cih pen hehpihna kici khuambul tungah i nuntakna a kilam ciang bekin kineingam thei pan hi. Paul in ta banga a pattah Timothy tungah a gen mah bangin eite’ nuntakna hong honkhia-in ngimna nei hong suaksak Pasian’ hehpihna i phawk cingin “kitawh kuangin” (2 TIMOTHY 1:6), Pasian hong piak siamnate a nuntakpih thei ihi hi (1:9). Kha Siangtho hong guat “thahatna, ki-itna, pumpi ki-ukzawhna” cihte om napi, tuate munah meidawi-a omlel ding cih ze-etna nangzawh nading thahatna hong guan pen Ama’ vangliatna hi (1:7). I puk ciangin hong honkhia ama’ hehpihna in hong phong a, tua in nuntak khualzinna i zopsuak theih nading ama itna sungah kiptakin hong omsak hi (1:13-14).
MONICA LA ROSE

Meidawina tawh na om nadingin bang in hong ze-et hiam? Pasian’ hehpihna leh vangliatna in kingamna tawh ama’ ading nuntakzawh sem na’ngin hong bangci huh hiam?

Kong it Pasian, guallelhna ahkl liamnate pan kikepna tawh meidawina leh launa om nawnlo-in ka nuntaktheih manun ka lungdam. Nong guat kingamna tungah hong kingasak in.

KUMTAWN LAI SIANGTHO | LATE 116-118; 1 KORIN 7:1-19

23/08/2023

NILAI NI | AUGUST 23

PIANCILNA 4:2-10
Na sanggampa’ sisan, leilak panin kei tungah hong kiko hi. [PIANCILNA 4:19]

TECI PANNA

Henry Wadsworth Longfellow (1807-1882) in “Teci pangte” cih kamlawh la (Peom) a gelhna sungah tuipi sunga tum sal tembaw khat thu gen hi. Tua sungah “kolbulh khaukhih misi guhte” a cih pen tembaw tumna a, min kithei lo, sala kiman a si tampi
tak hangin kahla banga a lawh ahi hi. Kamlawh la a khupna ah “Hih pen gimthuak salte hi. Dum thukpi sung pan hehmai tawh hong ento uh. Mun kithei lo hankhuk pan hong kapto uh. Ei pen teci ihi hi!”

Ahih hangin teci a kicite in kua kiang ko uhhiam? Kuama’ kiang ko lo uh hilo hiam?.
Tua khempeuh a mu Teci khat om hi. Kain in Abel a thah laitak, bangmah a theilo danin kineih a, “Kei, ka sanggam a kempa ka hi hiam?” ci-in thusimlohna tawh Pasian dawngkik hi. Ahih hangin Pasian in “Na sanggampa sisan, leilak panin kei tungah hong kiko hi. Na sanggampa’ sisan a hup dingin a kam a ka leitang tungah tu-in nang hong kisamsiat hi” ci hi (PIANCILNA 4:9-11).

Kain’ min kilosuak napi, hilhphawnna-in kizang hi. John in a nungzuite pilvang nadingin “Dawimangpa’ mi ahi, a naupa mahmah a that Kain bang kei ni.” ci-in hilh hi (1 JOHN 3:12). Abel’ min zong kilosuaka ahi zongin kilamdanna khat om hi. Hebrew lai-at pa in “A upna hang mah tawh Abel in Kain’ piakna sangin a santheih huaizaw biakpiakna Pasian’ tungah a na pia hi” a cih banah “Tu d**g mahin upna thu a hong gengen lai a suak hi” ci hi (HEBREW 11:4).

Abel in tu d**g mah gengen lai! Sauveipi a kimangngilh khin salte guhte zong tua bang mahin kikoko lai uhhi. Tua gimna a thuak mite phawkkawmin koikoi-a, i tuahkhak netniamna kici khempeuh i do ding hi. Tuate khempeuh Pasian in mu hi. Ama’ thutanna gualzo ding hi. TIM GUSTAFSON

Thutanlohna leh netniamna thu tawh kisai, na theih a om hiam? Tuni, bang sem dingin Pasian in hong sawl?

Kong it Pa Pasian, nang pen hong mu Pasian na hi hi. Kinetniamna a pian ciangin hong mutheisak inla, bangci nawkkhiat ding cih zong hong hilh in.

KUMTAWN LAI SIANGTHO | LATE 113-115; 1 KORIN 6

22/08/2023

PITHAI NI | AUGUST 22

EFESA 2:14-22
Sihna nangawn in zo zo ngeilo ding hi. [MATTHEW 16:18]

PASIAN’ PAWLPI OM TAWNTUNG

Nipi ni khat, kikhop man kuanin nupila khat a tate nih lenkawmin “Kikhop manta maw?” ci-in d**g hi. Zinmuakpa in pam lama pawlpite-in Nipi ni kikhop nihvei nei, a nihna kipankuan ta ding cih gen hi. Mawtaw tawh kong kha diam? a cihleh nupi nu in aw ci-in, adang biakinn khatah a paiphei ding lawptuak zawzen hi. Hih thu, zinmuakpa in genkik a, a thukhupna ah “Kikhop manta maw?. Man ngeilo ding. Pasian pawlpi pen omden ahihman hi” ci hi.

Pawlpi cih pen a kisiabaih mahmah khut tawh kilam “innlelo” cih bang hi lo hi. Pawlpi cih pen Pasian’ “innkuan sung mite” ci-in Paul’ genna ah, “Sawltakte leh kamsangte in a phuhsa innkhuam tungah a kilam na hi uh a, tua inn sutpi pen Jesu mahmah ahi hi. Tua inn sutpi Khris pen inn-a a kilam khempeuh a puapi pen hi a, T**a adingin biakinn siangtho a suah d**gin tua inn a khangsak hi. Note zong midangte tawh kigawmin ama tungah na kilam uh a, Kha Siangtho in Pasian a ten nading inn na suak uhhi” (EFESA 2:19-22).

T**a Jesu in tawntung hun ading ama’ pawlpi phuh hi. Ama’ phuh pawlpi in haksatna (ahkl) tona tuamtuamte tuak ding himah taleh ama’n “sihna nangawn in zo zo ngeilo ding hi” ci-in tangko hi (MATTHEW 16:18).

Hong thahatsak ama’ kammalte tawh enkak leng, leitungah a phualphual a, om pawlpi khempeuh pen Pasian’ pawlpi sunga kihel khin hi a, “Khris Jesu tawh a kipawl mi khempeuh in a khang khangin a tawntungin” a kilamtoto ahihna i mu thei hi (EFESA 3:21). PATRICIA RAYBON

Na kihelna tualsung pawlpi in nang hong bangci lungdamsak hiam? Leitung bupa Pasian’ pawlpi a khangliat na’ngin bangci panpih ding na hiam?

Kong it Jesu aw, nangma pawlpite lakah ka kiheltheih na’ngin nang sungah hong kilamtosak in.

KUMTAWN LAI SIANGTHO | LATE 110-112; 1 KORIN 5

21/08/2023

PIZING NI | AUGUST 21

1 SAMUEL 23:14-23
Khatlekhat kihanthawnin na kihuh ciat un. [1 THESALONIKA 5:11]

THAPIAK SIAMNA

“Na khuaiteng lomlen mang e.” Ka zi in kongkhak pan hong dakkawmin khuai khawi khempeuh’ zaknoploh thu hong gen hi. Ka pusuahkhiat leh khuaibu pan a tul a, simin takkung sang dawnah lengto henhan uh a, hong kilehkik nawn lo ding hilai hi.

Hih khuaite’ lomlen hun ding pen amau’ omzia kikheltohna tungtawnin theihhuai cih pen ka phawkkha kei hi. Kaalkhat val huihpi nunna hangin khuaibu hoihtak ka enkha kei hi. Zingsang huihpi ven lianin khuaite lengkhia ta hi. A kibusakna mun pen a thak a hoihkhat hi a, a taktakin khuaibu a thakkhat a pankik dinga a lengkhia hizaw uhhi. Khuai khawina lam a kiva mi khat in ka lungnoploh lam a theih ciang maitai takin “Lungnop mawhna in nei kei oo, mi khempeuh tunga piang thei thu hi” hong ci hi.

Thapiakna cih pen mi lungsim laksiamna namkhat hi. David pen k*mpi Saul’ thahnopna hangin a lungsim a neu ciangin Saul’ tapa Jonathanin David thapia a, “Lau kei in,” ci hi. Tua banah “ka pa Saul in nang hong sukhalo ding hi. Nang pen Israel-te k*mpi na hiding a, kei pen nangma zom ka hi ding hi; ka pa Saul in zong hih thu thei hi” a ci hi (1 SAMUEL 23:17).

Hih kammal pen k*mpi’ za a luahto ding pa kiang pan, aituam metna ding kihel lo a lamdang thapiakna hi. Pasian in David a ompih lam Jonathan in phawk ahih manin kiniamkhiatna tawh a gen hiding hi.

I kiimlepaama om mi khempeuh thapiak ding a kisam vive hi. Pasian’ mai-ah ei mahmah kiniamkhiatin eite’ tungtawnin Pasian in midangte zong a it nadingin thu i nget ciangin ama’n hong huh ding hi. JAMES BANKS

Thapiak ding a kisam mi na theih a om hiam? Tuni, amaute’ ading kiniamkhiatna tawh bang na sepsak diam?

Kong it Pasian, a tawntungin thapiakna leh lametna hoihte nong guan hi. Tuni, tua nong itna thu khatpeuh tungah ka lahzawh na’ngin hong huh in.

KUMTAWN LAI SIANGTHO | LATE 107-109; 1 KORIN 4

20/08/2023

NIPI NI | AUGUST 20

PAIKHIATNA 33:1-4, 7-11
Tua bangin, mi khat in a lawmpa a hopih bangin maitang kituahin T**A in Moses hopih zel hi. [PAIKHIATNA 33:11]

MUN TANZAU ZONNA

Margin (huanggi) kici laibu khat Dr Richard Swenson in gelh hi. Tua sungah “Huihdik nading inndei khat kisam hang. Suakta takin thu ngaihsuttheih nading mun leh kibawl dam ding mun zong kisam hang. Leitung khua hun paizia pen manlang mahmah in kinawh pai lua ahih manin kikeugaw ta a, i tate zong deihsakna tawh i nawhhawl manin lei lakah a liambaangin tuk ngeingai ta hi. Pasian in zong tuhun teh gimluatna lam tha a pia ta maw leh? Tanglai bangin tuidam luanna ah hong kha nawn lo hiam? Tanglai a, mun tanzaupipite kua’n susia, bangci ngah kik ding? I nuntakna sung ah Pasian tawh kimu a, i tawlngakh nading a gamdai munnuam “leitang” kisam mahmah hihang, ci-in gelh hi.

A ngaihsut tak mah hiam? Hih dan mun tanzau zon’ pen Moses sintoh sa thute hi. Moses’ makaihte pen “a lungkhauh, a lehdo” thei minamte ahih manun (PAIKHIATNA 33:5), Pasian’ ompihna ngah nading mun awng zong dingin paikhia zelzel hi. Ama’ lamsa “biak buk” sungah (33:7), “mi khat in a lawmpa a hopih bangin maitang kituahin T**A in Moses hopih zel hi” (33:11). Tua dan mahin Jesu zong “gamdaihna munah paikhia-in thu a ngen hi” (LUKE 5:16). Amaute nih in Pasian bek tawh hun zatkhopna a thupizia hong phawksak uhhi.

Eite in zong i nuntakna sungah huanggi neihtheih ding kisam a, i tawlngakh nading leh Pasian’ ompihna sungah i luttheih nading mun tanzau i kisam hi. T**a tawh hun zatkhopna in i thu khentatnate hong hoihsakzaw dinga Pasian leh midangte a itzawsem ihih nading i nuntak sungah huangledai gite a hoihzawin i khungthei ding hi.

Tuni, mun tanzauna munah i Pasian zong ni. TOM FELTEN

Na nuntakna sungah bang hangin huanggi khen ding kisam hiam? Na nisim hunzekna ah Pasian tawh na hun zatkhop na’ngin mun pawlkhat bangci awnsak ding na hiam?

T**a Jesu aw, nisimin nang tawh daitaka kikholhna mun ka zontheih na’ngin hong huh in.

KUMTAWN LAI SIANGTHO | LATE 105-106; 1 KORIN 3

19/08/2023

KIGIN NI | AUGUST 19

MARK 4:35-41
‘’Huihpi leh tuihualte nangawn, ama saw bangin a gamta uhhi. [MARK 4:41]

JESU’ VANGLIATNA

2003 k*min Grand Canyon gamlak a, suangmual kenkawmlakah Nik Wallenda kici pa in pi 1400 a sau, a zai suangmual nih kikal ah khau khungin tua tungah lam pai hi. A phual panin a en mi 600 val pha a, a khau pen letmat 2 a sah s*k khuahual khat hi. A lu tungah camera khat thuahin a mai-ah dawksak ahih manin a nuailam muthei hi. Thungenin Jesu’ min a phatkawmin lungsim kiptakin tangban nei khe lampi ah a pai danin pai hithiat hi. Huih a khauh ciangin khawlphotin kuncip hi.

Tua pan dingkik a, a kilanglekloh nading lemtuah kawmin “a khau a kilokloh” manin Pasian tungah lungdam ko hi. Khau tungah kaalkhat a suan simin Khris’ vangliatna tunga a kingakh pen mi khempeuh theih dingin lakthei a, Video kizaihna ah ama’ thungetnate kiza hi.

Galilee tui tungah huihpi a nun ciangin nungzuite launa tawh kidimin huhna ngen uhhi (MARK 4:35-38). Jesu in tuihual leh huihpi a daihsak ciangin huihpi leh na khempeuh a ukpa ahihlam amaute in thei uhhi (4:39-41). Tua panin amaute in T**a muanna lamah damdamin khangto uhhi. Amau’ aituam tuahkhak thute in Jesu’ angvanna leh a lamdang a thahatna midangte phawksaktuam uhhi.

Eite in nuntakna huihpi tuihual i tuah laitak ahkl haksatna guam thukpi dunga kikhung khau tungah upna tawh i kalsuan laitakin Khris’ vangliatna tawh lungmuangtakin i upna i lakkhia thei hi. Pasian in tua bang upna tawh i kalsuanna pen midangte in zong Ama sungah lametna a neih nadingin hong zatsak thei hi. XOCHITL DIXON

Midangte nuntakna sungah Khris’ vangliatna na muhna in tha hong bangci piak hiam? Lungmuang takin upna tawh na kalsuantheih na’ng thungetna in hong bangci huh hiam?

Pa aw, nuntak hamsatna tuihual bang ka nawk laitak, lungsim daihna nong guat manin ka nuam hi.

KUMTAWN LAI SIANGTHO | LATE 103-104; 1 KORIN 2

18/08/2023

¹ Moses in Kush numei khat tenpih ahih manin, ama tenpih Kush numei’ hangin Miriam le Aaron in amah gensia-in,
² “T**a in Moses’ tung bek tawnin thu gen ahi hiam? Eite’ tung zong tawnin hong gen hi lo ahi hiam?” a ci uh hi. T**a in tua thu a za hi.
³ Moses a lungnem mahmah hi a, leitung a om mi khempeuh sangin a lungnemzaw ahi hi.
⁴ T**a in thakhatthu-in Moses le Aaron le Miriam kiangah, “Kikhopna bukah no mihing thumte hong pai un,” a ci hi. Amau thumte a pai uh hi.
⁵ Meii khuam sungah T**a hong k*msukin, kikhopna bukkongah ding a, Aaron le Miriam a sam hi. Amau tegel mailam nehin hong pai uh hi.
⁶ T**a in, “Ka thu za un: Note’ lakah kamsang a om leh T**a keimah in ama tungah maangmuhna tawh ka kilak a, amah tawh mang sungah ka kiho hi.
⁷ Ka nasempa Moses tawh tua bang hi lo hi; ka innsung thu khempeuh amah ki-ap hi.
⁸ Amah tawh kam le kam kiho-in, a kitel lo kampaute tawh hi loin, a kitel takin thu ka gen uh a, amah in T**a’ mel a mu hi. Tua bang ahih ciangin bang hangin ka nasem Moses gensiat ding lau lo na hi uh hiam?” a ci hi.
⁹ Amaute tungah T**a heh mahmah a, a hehsapi-in a paikhia hi.
¹⁰ Puanbuk tung san panin meiipi a kilakkhiat ciangin Miriam phak a, vuk bangin a pak hi. Miriam’ lamah Aaron kihei a, tua numei a na phak hi.
¹¹ Aaron in Moses kiangah, “Ka t**a aw, kote hai gamtatin ka khialhna hangun gim hong pia kei in.
¹² A nu’ sung panin a suahkhiat ciangin a pum phel langkhat a bei misi bangin Miriam hisak kei in,” a ci hi.
¹³ Tua ciangin Moses in T**a’ tungah, “Amah damsak in, Pasian aw, kong thum hi,” ci-in a kiko hi.
¹⁴ Ahih hangin T**a in Moses kiangah, “Tua numei’ maitang, a pa in cil phih leh tua numei ni sagih sung maizum ding hi lo ahi hiam? Giahphual pualamah ni sagih sung kikhumcipsak in; tua khit ciangin amah hong kipaipih kik thei ding hi,” a ci hi.
¹⁵ Tua ahih ciangin giahphual pualamah ni sagih sung Miriam kikhumcip hi. Miriam a kipaipih kik mateng khualzin a zom dingin mite ding khia lo uh hi.
¹⁶ Tua khit ciangin Hazeroth panin mite ding khia uh a, Paran gamlakah giahphual a sat uh hi.

GAMLAK VAKNA 12:1‭-‬16 TDB

18/08/2023

LAITHAI NI | AUGUST 18

THU HILHKIKNA 16:9-16
T**A na Pasian uh mai, ama min om nadingin T**A na Pasian un a teelna munah … na lungdam khawm ding uhhi. [THU HILHKIKNA 16:11]

BIAKPIAKNA PAWITE

Pawi thupi khata kihelna in vai tampi kikhelsak thei hi. Daniel Yudkin leh a lawmte in UK, USA a, mipi kikaihkhopna pawite-a, kihel mi 2000 val tawh kihona pan a theihkhiat uh pen pawi lianpite in i lungsim gamtat huzapzo-in i neihsa sumlepaii, thalengal hopkhiat nopna nangawn piangsak ci uhhi. Amau’ kankhiatna ah pawi lianpi a, kihelte lakah 63% in tua pawi sung pan “puahphatna” ngahin tua in mi tawh kizopna, veina, khangsakin lawmte, innkuante leh midangte tung nangawnah ciingtuamsak ci hi.

Ahi zongin Pasian bia dingin midangte tawh i kikholh ciangin, i ngahkhak pen leitung pawikhat pana khualetual limlemel “laihna puahna” ciang bek hilo-in Pasian ngiat tawh a kiho ihi hi. Tanglai-in, Pasian’ mite in amau’ biakna pawi bawl dingin Jerusalem ah a kikaihkhop ciangun Pasian tawh kizopna nam a ngahlua uh ahi hi. Tu hun a, khualzin nam hilo napi, k*m khat, thumvei “silngo sawhloh anlum pawi, nipikal pawi leh buk pawi-ah” kihel dingin Jerusalem biakinn pai den uhhi (THU HILHKIKNA 16:16). Hih kikaihkhopna pen “Pasian mai-ah” pupite phawkkikna hun, biakpiakna hun leh innkuante, nasemte, pemtate leh midangte tawh lungdamkhopna hun ahi hi (16:11).

T**a sungah nopsakna leh amah i muanna a kizopsuak theih nadingin khatlekhat kihuhin midangte tawh kikhawl khawmin lungdam ni.
KIRSTEN HOLMBERG

Biakpiakna piakhawm dingin midangte tawh na kisuktuah ciangin Pasian tawh kizom ahihlam bangci phawkkhak na hiam? Midangte’ ompihna in bang hong panpih thei hiam?

Pasian, nangmah biakhawm dingin nangma’ mite nong kaihkhop manin ka nuam hi.

KUMTAWN LAI SIANGTHO | LATE 100-102; 1 KORIN 1

17/08/2023

LAIZING NI | AUGUST 17

2 KORIN 5:11-20
Tua ahih ciangin kote pen Khris tangin nasem ka hi uh a, … Pasian tawh kilemin pawlkhatin na om nadingun Khris tangin a hong thum ka hi uhhi. [2 KORIN 5:20]

TANGMI CIAPTEHNA CIANG BEK AHI LO

Internent khang hun a, kidemna khauhpai mahmah hi. Company te in mi’ leinop theihtheih dingin gelna tuamtuam nei uhhi. Subaru mawtawte enleng, a neite pen mi citak hideuhin minthang ahih manun company in zong, a leimun zawdeuhte pen company ii tangmi in ciamteh uh a, “brand ambassadors” cih min vawh uh hi.

Hih company te in a website ah “Subaru tangmite pen Subaru ii mailam khantohna dingin deihsakna leh lawpna tawh kipumpiakin a semkhiate ahi uhhi” ci-in pahtawina lai gelh uh hi. Hih company ii ngimna pen mipite in Subaru mawtaw neih loh phamawh bangin a deihna ding uh leh tua deihna lungsim midangte tungah a hawpsawn ding uh ahihi.

2 Korin 5 sungah Paul in “tangmi” adang khat gen a, tua pen Jesu’ nungzui dingin hong zawtna hi. “Tua a kipan Pasian zahtak ding thu ka lungsim uhah om tawntung ahih nungsang, mite ka zolzawh nadingun ka hanciam uhhi” ci hi (5:11). Tua banah Paul in “Tua kilemna thu a gen dingin kote hong seh hi. Tua ahih ciangin kote pen Khris tangin nasem ka hi uh a, Pasian in kote zangin note tungah thu a hong gen ahi hi. Pasian tawh kilemin pawlkhatin na om nadingun Khris tangin a hong thum ka hi uhhi” ci hi (5:19-20).

Vanlena kibawl tampite in eite’ kisap lungnopna, kicinna, ngimna cihte ngah ding ci-in hong kamciam uhhi. Ahi zongin Jesu umte hihna tawh ei tunga hong ki-ap kilemna thu khat bek om a, tua pen Lungdamna Thu laigil ahi hi. Tua banah lamet beina hih leitungah thuhoih puak thei dingin hamphatna i ngah hi. ADAM R. HOLZ

Jesu’ tangmi khat hihna i cih pen na bangci ngaihsut hiam?
Tua sapna pen bangci nuntakpih thei ding?

Kong it Jesu, nangma tangmi hidingin nong zawt manin ka lungdam.

KUMTAWN LAI SIANGTHO | LATE 97-99; ROM 16

13/08/2023

NIPI NI | AUGUST 13

1 KORIN 9:19-23
Tua ahih manin ahihtheihna lam peuhpeuhah mite ka ngahzawh nadingin mi khempeuh’ ngeina ka zui hi. [1 KORIN 9:22]

PANSAN LAKZIA A TUAM

1900 tun ma-a, (tun Nigeria) kici Africa gam, Calabar ah Mary Slessor a zin lai-in hong nusiasa missinary David Living Stone’ maban a zop ding lawp mahmah hi. A sep dinga a kisawl masapen ahihleh gamthak nasemte tawh kithuah kawma sang lai hilh ding cih ahih manin a namtuam khat tawh a septheih ding lunggulhna nei hi. Tua gam a, om nailo khat a patkhiat pen tualsung mite lakah kituahin amau tawh tengkhawm hi. Mary in tuate’ pau sin, a tatzia ciing, amau’ nek bang ne hi. Tua banah naupang kipaidak tampi kem hi. K*m 40 kiim bang, tua mite kisap mahmah lametna leh lungdamna thu a nihin piakhawm thei hi.

Paul in i kiimlepaama om, mite kitangsapna lungsim takpi tawh i dinpih a thupina thei hi. Tua hangin 1 Korin 12:4-5 sungah “Siamna a nam tuamtuam om a, ahi zongin a hong pia Kha Siangtho a kibang hi. Nasepna a nam tuamtuam om a, ahi zongin a na i sepsak T**a a kibang ahi hi” ci hi. Tua hangin mite kisapna khawk zui-in amaute huh hi. Gentehna-in, “A thanemte kiangah a thanem bangin om hi” (9:22).

Pawlpi khat ii thu tangkona khat ka theikha hi. “Na khempeuh semthei kim” cih nasep kipawlna ah nam khatpeuh tawh d**g-kholhsak cih a omloh nading leh tua lakah cinglo hatte (disabilities) kiheltheih nadingin kivaihawm hi. Tua in mi’ lungsim a la, khualetual sungah Lungdamna Thu a pung a khangsak thei, Paul ngaihsut namte ahi hi.

Kiimlepaam a, om mite muhna ah i upna i nuntakpih laitak a namtuam pansan lakna tawh Jesu thu amau’ kiang a va puakthei dingin Pasian in hong makaih tahen. DAVE BRANON

Mite kiangah Jesu’ thu na tunpih na’ngin na lungsim sungah bang lampi namtuam khat Pasian in hong koih hiam?
Bangci tangtut ding na hiam?

Kong it Pa aw, midangte ka panpih na’ng, lampi maan ka muhtheih na’ngin pilna hong guan in.

KUMTAWN LAI SIANGTHO | LATE 87-88; ROM 13

Address

Yangon

Website

Alerts

Be the first to know and let us send you an email when Tedim Khuavak posts news and promotions. Your email address will not be used for any other purpose, and you can unsubscribe at any time.

Shortcuts

Share

Category

Our Story

This page is created for your information about the publishing materials of Tedim Baptist Church - Yangon. The Church named Tedim Khuavak as its organ, and it serves the literary works written mainly in the dialect of Tedim Chin (locally called Zopau). This page was under the direct control of Church's Executive Committee. And the Committee gives full authorities to the Communication Committee.