03/04/2025
ДАНЦИГ
Хурдан морины ертөнцөд домог болсон Умардын бүжигчний хамгийн алдартай төлүүдийн нэг нь Данциг хэмээх хээр халзан азарга билээ.
Умардын бүжигчнийг цэвэр үүлдрийн адууны түүхэн дэх хамгийн шилдэг азарга гэдэг бол Данциг-ийг XX зууны сүүлийн хагас дахь хамгийн шилдэг азарганы нэг хэмээн үнэлдэг юм. Ер нь Хойд Америкийн шилдэг азаргаар 3 удаа шалгарсан Данциг-г мэдэхгүй хурдан морь сонирхогч гэж байхгүй биз ээ.
Түүнийг даага байхад нь Саратога-н дуудлага худалдаан дээрээс Хенрик Де Квайтковски гэдэг хүн 310,000 доллараар худалдан авч байжээ. Данциг ч үнэхээрийн хурдан байж уралдах бүртээ түрүүлж байв. Харамсалтай нь хөлний гэмтлийн улмаас эрт зодог тайлжээ. Ингээд Кентаки дахь Клейбон фарм-д үржүүлгэнд орж эхэлсэн ба улмаар дэлхий даяар алдаршиж, Хойд Америк, Испани, Арабын Нэгдсэн Эмират Улсын шилдэг азаргаар шалгарч байв.
Түүнийг яагаад дэлхийн шилдэг азарга гэж үнэлдэг вэ гэдэг асуултад дараах хэдхэн тоо баримт хариу болох байх.
Данциг-н 188 төл нь зэрэглэл бүхий уралдаануудад түрүүлж байсан бол 10 нь аварга цол хүртэж байжээ. Мөн түүний төлүүд нь нийтдээ 100 сая доллараас илүү бай шагнал хүртэж байв. Брийдерс Кап-ын түрүү магнай Чиефс Краун, Луре, Денс Смартли, Вар Чант, Прийкнес Стейкс-н түрүү Пайн Блаф зэрэг олон зуун алдартай хүлгүүд Данзиг-н төл юм.
Данциг-н хурдлах чадвар түүний үр удамд хэдэн үе дамжин баттай удамшиж, эдүгээ ч түүний 2-4 дэх үеийн төлүүд дэлхий даяар хурдалж байна. Тухайлбал 2008 оны Кентаки Дерби болон Прийкнес Стейкс-н түрүү Биг Браун бол Данциг-н төлийн төл юм. Мөн энэ жилийн Брийдерс Кап-ын Классик гарааны түрүү Дроселмэер ч Данзиг-н 3 дахь үеийн төл. Түүний эцэг Дистортед Хюмор хэмээх алдарт азарга нь Данцигийн охин төлөөс гарчээ. Өнгөрсөн жил Брийдерс Кап-н Жүвинайл гараанд түрүүлж, энэ жил их хурдан байсан Анкл Мо ч Данцигийн 4 дэх үеийн төл. Өдгөө дэлхийн чансааг өнгөлж байгаа алдарт Франкел ч Данзигийн 3 дэх үеийн төл.
Мөн өнгөрсөн жилийн дэлхийн шилдэг хүлэг Тэнгисийн одод, Францын алдарт гүү Гөлдикова нар Данциг-н шууд угсаа буюу төлийн төл нь билээ. Түүнчлэн Америкийн Оны шүдлэн, Оны хязаалан цолын эзэн, 2010 оны Прийкнес Стейксийн түрүү Лүүкин эт Лаки,
2011 оны Белмонт Стейкс-н түрүү Рүлер он Айс, 2010 оны Брийдерс Кап-н Классик гараанд ялагдашгүй Зенятта-г дийлж түрүүлсэн Блейм, 2010 оны Америкийн Оны хязаалан байдас Блайнд Лак нар бүгд Данциг-н үр удам юм. Эдгээр шилдэг хүлгүүдийн нэрийг сонсоод л та бүхэн Данциг-г ямар агуу азарга байсан гэдгийг мэдэж авсан байх.
Данциг болон Дэйнхил тэргүүтэй түүний төл 17 шилдэг азарганы үр төлүүд бүгд хээр зүстэй гарч байсан нь сонирхолтой баримт болон үлджээ.
Цэвэр үүлдрийн адууны үндсэн хоёр зүсний нэг болох зээрд зүстэй төл нэг ч гарч байгаагүй нь Данциг-н доминант шинжийг харуулж байна ч гэж үздэг байна.
