05/11/2025
Бидний анд нөхөр, хамтран зүтгэгч, хийн түлшний анхдагч “Дашваанжил групп” ХХК-ийг үүсгэн байгуулагч, Ерөнхий захирал Намсрайн Баатаржав 2025 оны 11 дүгээр сарын 3-ны өдөр зуурдаар ертөнцийн мөнх бусыг үзүүлж, бидэнд нөхөж баршгүй гарз тохиолоо.
Тэрбээр 1962 оны 09 дүгээр сарын 20-нд Улаанбаатар хотод Төр, нийгмийн зүтгэлтэн Намсрайн 3 дахь хүү болон мэндэлж, 1970-1980 онд Ховд аймгийн Булган сумын арван жилийн дунд сургуулийг дүүргэж, 1980-1986 онд ОХУ-ын Волгаград хотын Политехникийн дээд сургуулийг Автомашины зохион бүтээгч инженер мэргэжлээр төгссөн.
Н.Баатаржав 1986-1988 онд Дорнод аймгийн Геологийн экспедицэд Засварын механикаар ажил хөдөлмөрийн гараагаа эхэлж, 1988-1992 онд Шарын голын уурхайд Инженер-механикаар ажиллаж байгаад 1992 онд Дархан-Уул аймгийн Шарын гол суманд “Дашваанжил” ХЭАА нэртэйгээр “Дашваанжил групп” ХХК-ийг анх үүсгэн байгуулж, өдгөө 600 гаруй ажиллагсадтай, улсын хэмжээнд 75 салбар нэгжтэй, хийн түлшний салбарын хөгжлийн чиг хандлагыг тодорхойлсон үндэсний компанийг бий болгосон Монгол Улсын бизнесийн салбарын шилдэг удирдагч байлаа.
Н.Баатаржавын санаачлагаар “Дашваанжил групп” ХХК нь 2001 онд төмөр замын воганцистернээр хийг нэг дор хүлээж авах, хадгалах, баллон цэнэглэх МУ-ын анхны хий цэнэглэх станцыг ашиглалтад оруулж, хийн түлшийг дуудлагаар хэрэглэгчдэд хүргэх, аюулгүй ажиллагааны зааварчилгаа өгөх үйлчилгээг нэвтрүүлж, 2004 онд автомашиныг хийн түлшээр цэнэглэх ажлыг эхлүүлсэн байдаг.
Улмаар 2008 оноос хийгээр ажилладаг бие даасан халаалтын зуухыг хэрэглээнд нэвтрүүлж, 2010 онд ОХУ-ын “Теплацентраль” компаниар Монгол гэрт зориулсан хийн халаалтын зуухыг үйлдвэрлүүлж, хэрэглээнд нэвтрүүлсэн төдийгүй 2011 оноос Улсын хэмжээнд хийн хангамжийн сүлжээ байгуулах ажлыг эхлүүлж, өнөөгийн байдлаар 21 аймаг, орон нутагт байрлах хийн хангамжийн сүлжээгээр дамжуулан, хэрэглэгч, ард иргэдэд үйлчилгээ үзүүлж, хийн хэрэглээ дадлыг бий болгоход чухал хувь нэмэр оруулсан болно.
Түүнчлэн 2013 онд автомашин болон төрөл бүрийн хийн баллоныг хийгээр цэнэглэх далд савтай анхны суурин станц, “Хийн баллон баталгаажуулах лабротори”, ажиллагсад болон иргэд, хэрэглэгчдийг сургах анхны “Gas education“ сургалт, дадлагын төв, 2016 онд 220 граммаар савласан нэг удаагийн ахуйн хэрэглээний изобутан хийн дотоодын үйлдвэр, барилга байгууламж, хотхоныг хийн түлшээр халаах ажлыг ажил хэрэг болгосон зэрэг Монгол Улсын хийн түлшний салбарын хөгжилд зориулсан түүний амьдралын 33 жилийн түүхэн хугацааны хөдөлмөр зүтгэл, хувь нэмэр, үйл хэргийг тоочоод барагдахгүй юм.
Түүний санаачилж, хэрэгжүүлсэн ажил, бүтээн байгуулалт бүрийн цаана нь анхдагч, шинийг санаачлагч, тэргүүлэгч гэсэн алдар нэр үргэлж дагалдаж алсын хараатай, мэргэн ухаантай, энгийн хирнээ нөхөрсөг, бусдад туслагч, тууштай, уйгагүй хөдөлмөрөөр үлгэрлэн манлайлагч, хүнлэг энэрэнгүй, эвийг эрхэмлэгч, шударга зарчимч, өв соёлыг дээдлэгч, эх оронч, шилдэг удирдагчийн чанарууд түүнээс үргэлж мэдрэгддэг байлаа.
Тэрбээр “Дэлхийн шингэрүүлсэн хийн холбоо”-ны Монгол Улс дахь элч төлөөлөгч, “Монголын хийн түлшний холбоо” ТББ-ын үүсгэн байгуулагч, төлөөлөн удирдах зөвлөлийн дарга, Монгол төрийн тулганы эх загварыг зохион бүтээгч, жил бүрийн Улсын Их баяр наадмаар “Төрийн тулга”-ыг бадамлан асаах үйл хэргийн эзэн төдийгүй хурц оновчтой үг, алсын хараа, оюунлаг, эрүүл амьдралын хэвшил, сахилга бат, цуцалтгүй хөдөлмөрийн манлайлал, хүний журам, түмний ёсыг дээдэлж, эвтэй найртай, нэгэндээ түшигтэй явахыг үлгэрлэдэг олны талархал, хүндлэлийг хүлээсэн аав, ээжийн хайртай хүү, хань, халамжит аав, ах, дүү, эрхэм дотнын нөхөр, сурган хүмүүжүүлэгч, хамтран зүтгэгч нь байсан юм.
Н.Баатаржавын эх орныхоо хөгжил дэвшилд оруулсан хувь нэмэр, гавьяа зүтгэлийг үнэлж 2005 онд Газрын тосны тэргүүний ажилтан, 2012 онд Монголын үндэсний худалдаа аж үйлдвэрийн танхимын дээд шагнал “Хий морь” хүндэтгэлийн одон, ОХУ-ын “Манай мянганыхан” Фондын мянганы шилдэг хүнээр шалгаруулж, хүндэт одон, 2014 онд Уул уурхайн яамны “Хүндэт жуух” бичиг, 2015 онд Алтан гадас одон, 2020 онд Хөдөлмөрийн гавъяаны улаан тугийн одонг тус тус хүртээжээ.
Таны эгэл даруу, хүнлэг, нөхөрсөг, эвийг эрхэмлэгч, өв соёлыг дээдлэгч, ажилч хичээнгүй, тууштай, шинжлэх ухаанч, зарчимч, бүтээлч зан чанар бидний зүрх сэтгэлд мөнхөд оршиж, Монгол Улсын хийн түлшний салбарыг хөгжүүлэхэд оруулсан хувь нэмэр, үйл хэргийг үеийн үед хүндэтгэн дурсах болно.
АЖ ҮЙЛДВЭР, ЭРДЭС БАЯЛГИЙН ЯАМ
