11/06/2025
Одоогоор миний төсөл анхны алхмаа хийж, үндсэн концепцийг харуулсан 3 минутын видео нийтлэгдлээ. Энэ богино хэмжээний видео, дуу, санаа, визуал концепцийг бүтээхэд маш их хугацаа, хүч хөдөлмөр шингэсэн билээ. Миний хийж буй ажлын зорилго, уран бүтээлийн санааг ойлгож, дэмжиж байгаа хүн бүхэнд чин сэтгэлийн талархал илэрхийлье.
Нэгэн урамтай мэдээ дуулгахад, хэд хэдэн газраас DJ set болон аудиовизуал перформанс хийх санал ирж эхэлсэн нь маш том урам, итгэл өгч байна. Гэвч одоогийн энэхүү концепт маань бүрэн хэмжээний тоглолт хийхэд хүрэлцээтэй биш тул төслөө дараагийн шатанд гаргаж, бүрэн хэмжээний аудиовизуал перформанс бүтээх зайлшгүй шаардлага үүсээд байна.
Миний гол зорилго бол өвөрмөц, хүчтэй уур амьсгалтай, уран сайхны өндөр түвшинд хүрсэн, Монголын өв соёлыг шингээж шинэчлэн орчин үеийн хэлбэрт оруулсан бүрэн хэмжээний цомог бүтээж, түүний үндсэн дээр аудиовизуал лайв перформанс хийх юм.
Энэхүү санаачилж буй төслийг дараагийн түвшинд хүргэхэд санхүүгийн дэмжлэг шаардлагатай байгааг хуваалцаж байна. Учир нь хөгжмийн продакшн, визуал бүтээл, техник хэрэгсэл гээд олон хүний хүч хөдөлмөр, цаг хугацаа, хөрөнгө нэгдэн бүтэх иж бүрэн уран бүтээл болох юм.
Хэрэв миний хөгжмийн санаа, бүтээл тантай нийцэж байвал репост хийх, санал бодлоо хуваалцах, зөвлөгөө өгөх, эсвэл хамтран ажиллах санал гаргах зэргээр дэмжлэг үзүүлбэл маш их талархах болно. Энэхүү төслийг үнэт зүйл хэмээн хүлээн зөвшөөрч, дэмжих хүсэлтэй хэн бүхэнд нээлттэй байх болно. Та бүхэнд баярлалаа.
