23/04/2025
Өнөөдөр дэлхийн номын өдөр тохиож байна.
ЮНЕСКО 1995 онд анх дөрөвдүгээр сарын 23-ны өдрийг дэлхийн номын болон зохиогчийн эрхийн өдөр болгон зарлажээ.
Энэ өдрийг дэлхий даяар буюу 100 гаруй оронд ном уншихыг сурталчлах зорилготойгоор тэмдэглэн өнгөрүүлж ирсэн. ЮНЕСКО-гоос дэлхийн номын өдрөөр зохиолч, хэвлэн нийтлэгчдэд хүндэтгэл үзүүлэх, нийт хүмүүс, ялангуяа залуучуудын дунд ном уншихыг сурталчлах, нийтийн уншлагыг дэмжих өдөр болгон тэмдэглэдэг юм байна.
Энэ өдрийг сонгох болсон шалтгаан нь уг өдөр нь алдарт зохиолч М.Сервантес, У.Шекспир, Оросын алдарт зохиолч В.Набаков болон бусад олон алдар цуутай зохиолчдын мэндэлсэн болон нас барсан өдөр тохиодог аж.
Дэлхийн номын өдөр бол хэвлэлийн компани, номын худалдаачид болон сонирхолын бүлгийхэн хамтран ажиллах, ном болон ном унших нь хичнээн чухал болохыг сурталчлах өдөр юм.Энэ өдрийн гол зорилго нь хүүхдүүдэд ном уншсанаар олон зүйлийг мэдэж авах сайхан боломж бий гэдгийг ойлгуулах, тэдэнд туслахад оршино. Сонирхуулахад дэлхийн зарим оронд номын дэлгүүрүүд нь энэ өдөр бүх номоо хямдруулан зарим дэлгүүр бүх номоо тус бүр 1$ үнэтэйгээр зардаг байна. Түүнчлэн номын дэлгүүр болон номын клубуудэд цаасан болон электрон ном солилцох арга хэмжээ ч зохиогддог байна.
Манай улсад жил бүр “Дэлхийн номын өдөр”-ийг тэмдэглэж, номын сангууд, хэвлэх үйлдвэр, хэвлэлийн газрууд, зохиолчид өргөнөөр оролцож, иргэд, хүүхэд залуучуудын дунд ном эрдмийг сурталчлах, зохиолч, хэвлэн нийтлэгчдийн ном бүтээлийг алдаршуулж, олон нийтэд түгээх, хямдралтай номын худалдаа хийх ажлыг өргөнөөр зохион байгуулж иржээ.
“ЗЭРЛЭГ АМЬТДЫН ИНЖЕНЕР БУЮУ АМЬТНЫГ ХАЙРЛАХУЙ”
Энэ номонд жинхэнэ "күүл" охины тухай гарна. Тэр охины нэрийг Мүүч гэдэг. Та амьтанд дургүй, бүр айдаг ч байж болно. Бас зэрлэг онгон байгальд тэр бүр очдоггүй, хол ч байж мэднэ. Харин та нэг ч амьд амьтангүй, бүх зүйл нь хиймэл дэлхийд амьдарч байна гээд төсөөл дөө!
Хүн төрөлхтний хурдацтай өсөлт, технологийн дэвшил, байгаль орчинд нөлөөтэй буруутай үйлдэл зэргээс үүдсэн экологийн сүйрэл дэлхийг хорт агаар, үхмэл хөрстэй, зэрлэг амьтангүй, зэлүүд хоосон газар болгож хувиргана. Хүмүүс бөмбөгөр дээвэртэй битүү хотуудад амьдрахаас аргагүй болжээ. Тэдгээр хотуудын сүлжээ бий болов. Байгалийн гамшиггүй, аюул заналгүй, эмх цэгцтэй, техникжсэн, хиймэл нар, хиймэл уул, хиймэл агаар гээд л байгалийн жинхэнэ зүйл ерөөс үгүй, бүх зүйл нь хиймэл энэхүү шинэ ертөнцөд амьд амьтан тэжээхийг хориглодог. Эдгээр хотуудын нэг Шинэ Бостонд робот амьтны хүрээлэн ажиллуулдаг, зэрлэг амьтдын инженер Орландо Спинкс амьдардаг. Нэгэн удаа 13 настай Мүүч амьтны хүрээлэнд ирж, механикжсан арслангийн дуу хоолойг амьд мэт болгон өөрчилснөөр адал явдал эхэлнэ. Асрамжийн газрын өнчин охин Мүүчийн зохион бүтээх, механикийн гоц авьяас, хүсэл тэмүүлэл, гал цогтой чанар, байгаль дэлхий, ан амьтдыг хайрлах үзэл инженер Орландогийн зүрх сэтгэлийг төрсөн охин нь мэт татаж, улмаар охины асран хамгаалагч болохыг хүсдэг. Охин өөрийн төрсөн түүхийг инженерт ярих ч угтаа тэр бодит түүх биш гэдгийг Орландо охиныг дадлагажигчаа болгон авахаар асрамжийн газарт очих үедээ мэдэж авна. Охины энэ хорвоо дээр төрсөн үнэн түүх юу болохыг та зохиолоос уншаарай.
