12/09/2025
Алла Пугачёва юу ярив?
Cэтгүүлч Катерина Гордеевагийн Алла Пугачеватай ярилцсан ярилцлага 2025 оны есдүгээр сарын 10 нд нийтлэгджээ. Энэ нь Пугачевагийн Оросоос явснаас нь хойшхи анхны томоохон хэмжээний ярилцлага юм. 3.5 цаг гаруй үргэлжилсэн энэ ярилцлагын туршид Алла Борисовна өөрийн хайртай хүмүүс, гэр бүлийн харилцааныхаа тухай, Оросыг орхих болсон тухайгаа, үе үеийн улстөрчид, дайн эхэлснээс хойш болж буй бүх зүйлд хандах хандлагынхаа талаар ярьлаа. Мөн тэр өөрийн дуунууд болон амьдралынхаа туршид түүнийг шүтэн биширч, үзэн ядаж байсан бүх хүмүүст юу үлдээхийг хүсдэг талаараа илэн далангүй ярьсан байна. Дашрамд өгүүлэхэд Алла Пугачева ийм урт ярилцлага тун ховорхон өгч байсан бөгөөд зөвхөн 2012 онд Владимир Познерт, мөн 2017 онд жүжигчин Олег Меньшиковт өгсөн байдаг. Зөвлөлтийн үеийн болон Оросын хөгжмийн ертөнц, тайз, тэдгээрийн арын амьдрал, тэнд юу болдог байсан тухай түүхийг өгүүлсэн тэдгээр ярилцлагууд нь тухайн үедээ дуулиан дэгдээж байсаныг санаж байна.
Харин энэ удаа сэтгүүлч Катерина Гордееватай хийсэн түүний энэ ярилцлагын өнгө аяс арай өөр байна. Энэ ярилцлагынхаа зорилгыг тэр "Ард түмэнд зориулсан үнэн баримт байгаасай" гэж тодорхойлов.
Алла Пугачевагийн нөхөр Максим Галкин, Украины дайн эхлэсэний дараа энэ дайныг эсэргүүцэн үзэл бодлоо илэрхийлсэний төлөө буруушаагдсан. Харин Пугачева 2024 оны долдугаар сард Киевийн "Охматдет" эх хүүхдийн эмнэлэгт гарсан халдлагын дараа "Бурхан тэвчээртэй. Гэхдээ бүх зүйлд хязгаар бий" гэж бичжээ. Максим Галкин, цэргийн ажиллагааны эсрэг үг хэлсний дараа Кремлийн засаг захиргаанаас Алла Пугачевад хандан түүнтэй ярилцахыг хүсч байна гэж мэдэгджээ.
Пугачева, хуучны танил Ерөнхийлөгчийн тамгын газрын орлогч дарга Сергей Кириенкотой уулзаж ярилцсан дурсамжаа хуваалцав: Кириенкогийн ширээн дээр Галкин хэзээ юу гэж хэлсэн тухай маш олон тооны “материал”-ын цуглуулга байсан. Пугачева түүнд гэр бүл рүү нь байнга дайралт хийж халдаад байгаа хүмүүсийн үйлдэлд сэтгэл дундуур байгаагаа хэлэв. Харин Сергей Кириенко, түүнд “санаа зовох зүйлгүй” гэж хариулсан. Би өрөөнөөс гарахын өмнө бүр түүнийг үнсэж, "Баяртай, Серёжа" гэж хэлсэн. Гэхдээ би магадгүй түүнийг дахиж бараг харахгүй гэдгийг мэдэрсэн. Надад бүх зүйл маш тайван, хэтэрхий "хялбар" болоод байгаа нь сэжигтэй санагдаж байв. Хоёр хоногийн дараа тэд Галкиныг “гадаадын агент”-аар зарласан гэлээ.
Галкины энэ статусын үр дагавар юуны түрүүнд тэдний хүүхдүүдэд хүнд тусч эхлэжээ. Москвагийн 1-р гимназид сурч байсан тэдний ихэр хүүхдүүдийг ангийнхан нь Анатолий Рыбаковын 1930-аад оны хэлмэгдүүлэлтийн тухай "Арбатын хүүхдүүд" хэмээх агуу романаас иш татан "Аав чинь гадаадын агент. Та нар урвагчдын, улсын дайсаны хүүхдүүд, тагнуулчдын хүүхдүүд" гэх зэргээр байнга дайрч эхлэжээ.
Эцэст нь би хүүхдүүдээ аваад явахаар шийдсэн. Юу ч хэлэх, бэлтгэх боломжгүй, тэднийг Оросоос "бараг хөөсөн" тул явахаар шийдсэн. Үнэхээр зовлонтой нөхцөл байдал, маш хэцүү шийдвэр байсан. Гэсэн ч бид цүнхээ баглаж, аав руугаа, Израйль руу явсан. Бидэнд ердөө 30 мянган доллар байсан ч гэр бүлийнхээ төлөө энэ шийдвэрийг гаргахаас өөр арга байгаагүй. Үнэнийг хэлэхэд ийм зүйл болсон нь миний хувьд маш хүнд зовлон байсан" гэж дуучин хэлээд "эрүүлээр сэтгэх хүмүүсийн" санаа бодлыг яагаад ингэж хатуу хайр найргүй дарж байгааг одоо ч ойлгохгүй байна” гэлээ. “Бидэнд хэвлэл мэдээллийн хэрэгслээр цацагдаж байгаа шиг Цезарид том вилла, Тель-Авив хотын төвд байр байхгүй. Бидэнд Израилийн иргэншил ч байгаагүй. Ямар ч үнэтэй байшин, байнгын оршин суух бичиг баримт ч байхгүй байсан. Гэхдээ бидний талаар зохиосон тэр бүх домгийн хариуд “Үгүй ээ, би энд төрөл садныхаа байрыг хөлсөлж байгаа” гэж зовлон тоочилтой биш дээ. Хүмүүс домогт илүү итгэдэг. Тиймээс би тэдэнд энэ бүхнийг юу гэж тайлбарлахаа мэдэхгүй байна" гэж нөхцөл байдлаа тодорхой хэлэв. Бас тэр өөрийнхөө тухай "Миний өвдөг аль хэдийн чичирсэн ч гар минь хараахан чичрээгүй байна. Тиймээс яаж ийгээд амьдрах ёстой" гэв.
Энэ ярилцлагын бас нэг гол хэсэг нь Алла Пугачевагийн тайз болон өөрийнх нь тухай дурсамж байлаа. Максим Галкины тухай "Би олон гэр бүлтэй байсан ч энэ бол жинхэнэ аз жаргал. Макс, намайг, гэр бүлээ гайхалтай хайрлаж, халамжладаг. Би энэ тухай үгээр илэрхийлж чадахгүй. Ойлгож байна уу?" гэв. Пугачева, таван удаагийн гэрлэлтээ эргэн дурсахдаа зөвхөн анхны (Миколас Орбакастай), сүүлчийнх нь (Максим Галкинтай) жинхэнэ гэж нэрлэв. Харин бусад бүх хүмүүсийн тухайд тэр бол ердөө "найз нөхдөө дэмжсэн" хэрэг байсан гэж нэрлэсэн. Түүний хэлсэнээр тэдгээр бусад гэрлэлт нь зөвхөн нөхөр болох хүмүүсийг Москвад бүртгүүлэхэд нь туслах, гадаадын аялан тоглолтын нэр нүүр, эсвэл дуучин Филипп Киркоровын нэгэн адил тэднийг нэр алдарт хүргэхэд нь туслах төдий хэрэг байсан гэж ярьлаа.
Пугачева, энэ салбарт хамт ажиллагсадынхаа талаар ярьж байна. Тэр Татьяна Булановаг, Надежда Кадышевагийн тухай зэрэг олон хүний тухай ний нуугүй ярьсан. Ярилцлагын үеэр мөн ШАМАН гэгддэг дуучин Ярослав Дроновын тухай яриа өрнөв. Дуучны авъяас чадварыг Прима Донна анх нээсэн тухай хөндсөн сэтгүүлчийн асуултанд Алла Борисовна инээж, "Бурхан минь, хүмүүс намайг Прима Донна гэж дуудахыг би ямар их үзэн яддаг юм бэ. "Прима Донна" бол дууны нэр шүү дээ. Би ердөө түүнийг дуулсан эмэгтэй" гэлээ.
Түүний ярианаас магтаал хүлээж аваагүй цорын ганц хүн бол ШАМАН буюу Ярослав Дронов. Пугачева, олон жилийн өмнө "Фактор А" мюзикл шоуны ерөнхий шүүгчээр ажиллаж байхдаа Дроновт ялалт өгөөгүй. Тэр Шаман-ы тухай яриандаа "Би түүнийг жинхэнэ од гэдэгт бүрэн итгэлтэй байсан. Түүний сэтгэл татам, хүчтэй хоолой, байлдан дагуулсан дүр төрхийг санаж байна. Гэхдээ тэр ялагч биш байсан... Харин түүний аав, шударга хүн, тэр хүүд нь тусласаны төлөө надад талархсан” гэж тэмдэглэв. Тухайн үед Ярослав Дронов уг шоунд ялагч болоогүй ч Пугачева өөрийн нэрэмжит “Золотая звезда” шагналыг түүнд олгож байсан юм. ШАМАН-ы аав Юрий Дронов нэгэн ярилцлагадаа Пугачева тухайн үед тэдний гэр бүлийн санхүүгийн хүнд бэрхшээлийг даван туулахад тусалсан. ШАМАН түүний тусламжаар Гнесиний хөгжмийн академид суралцах төлбөрөө төлсөн гэж дурссан байдаг. Харин Ярослав Дронов, Пугачеваг эх орноосоо явсаныг буруутган "Энгийн хүмүүс хэзээ ч эх орноосоо зугатахгүй. Оросын ард түмэн түүний урвасан явдлыг хэзээ ч мартахгүй, уучлахгүй" гэж мэдэгдсэн байсан юм.
Ярилцлагын үеэр Пугачева "Хүний мөс чанар гэдэг ойлголт байдаг, энэ нь алдар нэр, тансаглалаас илүү үнэ цэнэтэй, хорвоо дэлхий дээрх бүх зүйлээс илүү үнэ цэнэтэй" гэж хэллээ.
Мөн тэрээр "Эх орондоо болохгүй байгаа үйлдлийг буруу байна гэж хэлэх нь эх оронч үзэл. Гэтэл ЗХУ, ОХУ манай аль ч үеийн засгийн газар ард түмнийхээ үзэл бодлоо илэрхийлэх эрх чөлөөний өмнө хэтэрхий бардам байгаа нь нүгэл. Би надыг “урвагч” гэж нэрлээд байгаа хүмүүстэй санал нийлэхгүй байна. Тэд, “чамайг тэжээж, өсгөж, нандигнаж, шагнал гардуулж байсан эх орноо орхиод явлаа” гэцгээж байна. Гэхдээ тэд “энэ улсын төлөө бүх насаараа ажиллаж байсан уран бүтээлч бүсгүй”-г мартсан бололтой. Би үнэндээ юунаас урвасан юм бэ? Би маш их хайртай эх орноо ганцхан тохиолдолд л орхиж болно. Хэрэв эх орон надаас урвасан бол. Гэсэн ч би эх орондоо хайртай хэвээр. Орос болон бусад улс орнуудад "сая сая дагагчтай" хэвээр байна" гэсэн.
Гэхдээ тэр хэд хэдэн удаа нулимсаа барьж дийлэхгүй байгаа нь харагдсан. Төгсгөлд нь тэрээр, Зөвлөлтийн үеийн нэгэн хошигнолыг эргэн дурсав. “Иргэдийг Улаан талбайд цуглан өөрсдийгөө дүүжлэхийг тушаажээ. Гэтэл тэнд очих хүмүүст нэг асуудал тулгарсан нь дүүжлүүрийн олсыг өөрсдөө авч очих уу, аль эсвэл олсыг газар дээр нь олгох юм уу? гэж. Түүн шиг "бид бүтээсэн бүхнээ устгаж байна. Яагаад, тэгэх ёстой гэж. Бид энх тайвны төлөө залбирах ёстой. Учир нь дайныг хэн ч хүсэхгүй…" гэв. Алла Борисовна бас “Надад онцгой зөн совин байдаг. Би удаан хугацаанд үүнийг мэдэрч ирсэн. Яг яаж гэдгийг тайлбарлах боломжгүй. Энэ бүхний дараа юу болохыг би сайн мэдэж байна. Юутай ч 2027 он хүртэл амьдарцгаая. Санаж аваарай, 27 шүү” гэсэн юм.
Copy
