07/10/2025
Нүүрсний хулгайн хамгийн том хохирогчийг яагаад хэн ч ярихгүй байна?...
Энэ хоёр хүн бие биенээ ямар нэгэн сандал сэнтийд залахыг монголчууд найман жил харав. Энэ хоёр маань занзайв, зузаарав. Үеийнх нь залуус үүрээ эвдүүлсэн шоргоолж шиг бужигнаж, үүцээ баран зүтгээд ч татвар дороос өндийх нь үгүй, татаас дарамтнаас босох нь үгүй цуцав, гундав. Харин мань хоёр яав, ах нарын дунд араагаа нууж, амаа хаттал гүйсээр брэндийн хэрэглээндээ тээглэж, бэлчээрийн хэмжээгээ танихаа болив. Хэн хэн нь Америкт сургуульд сурсан нэртэй, сугараад дундаас нь харайгаад ирсэн улс. Нүүрсний хулгайн хонгил угсарч, түүнийгээ УИХ, Засгийн газар, цагдаа шүүх, бизнесийнхнийг дамнуулан босгожээ. Монголчууд сүүлийн 20 жилд нүүрсний хулгайчид хамгийн ихээр ойртож ирсэн өдрүүд үргэлжилж байна. Оюун-Эрдэнийг унагааж, мөсөн уулын оройг харах гэж улсаараа мөн ч их зүтгэсэн, хөлтэй нь хөлхөж, хөлгүй нь мөлхөж зүтгэсэн, бид бүгд харсан. Тэгсэн одоо Амарбаясгалан алдлаад хэвтчихдэг гэнэ ээ. Эгэл иргэн бол ганц утас хулгайлсан хэргээр хэдэн сар шар махтайгаа хатна. Энгийн ардын хүү талх хулгайлсан хэргээр 10 жилийн ял авсан түүх ч бий. Гэтэл Амарбаясгалан яав? Нэр дурдагдаад байгаа хэргийг нь зүгээр л шалгая гэсэн чинь шарваж байна, шаралхаж байна, шартаж үзэж байна. Ямар их эго вэ, ямар халдаж болшгүй, хазайж баршгүй агуу ихийн айхтар дэмийрэл вэ? Шалгуулахгүй гэж зүтгэнэ, тэгснээ энд тэндэхийн сум, аймгийн цагдаагийн тамгатай бичиг ээлж дараалан гаргаж шиднэ. Хэвлэлийнхнийг цуглуулж хэвлээр мөлхөгч шиг аашилна, намын байрандаа найраа угсарна. Аргаа бараад УИХ-ын 60 орчим гишүүн шалгуулахыг шаардсан бичиг өргөн барьлаа. Үгүй нээрээ хууль зөрчигчөөр удирдуулдаг хууль тогтоох байгууллага гэж байвал хүн итгэх үү? Төрт ёсны завхрал шүү дээ. Тэгэнгүүт хариуд нь Ерөнхий сайдыг огцруулах бичиг нөгөө тал нь гаргалаа. Тэгснээ бүгд л УИХ-д халдлаа, Засгийн газар хэцүүдлээ, МАН нурлаа энэ тэр...яагаад хэн ч нүүрсний хэргийн хамгийн том хохирогчийг дурдахгүй байгаа юм бэ? Арав гаруй жил үргэлжилсэн нүүрсний хулгайд ард түмэн хамгийн ихээр хохирлоо. Бүхэл бүтэн үеийнхэн хэлмэгдлээ. Одоо дахиад Амарбаясгалангийн удирддаг УИХ-аар баталсан гэх 2024.12.27-ны гэрээ Монголыг 16-20 жил, хоёр үеийн турш идүүр сахисан гинжтэй гөлөг болгох гэж байна. Бүхэл бүтэн үеийн залуус гэр бүл, аав ээж, үр хүүхдээ орхиод гадагшаа хар ажил хийхээр гарч байна, хүүхдүүд цэцэрлэгийн сугалаанд азаа үзэж байна, сурагчид хоёр, гурван ээлжээр, 50-60-уулаа нэг ангид хичээллэж байна. Нүүрсний хулгай байгаагүй бол ийм байх уу? Ядаж л ард түмэнд оногддог гэх шүлс шиг мөнгө хэд дахин өсөх байлаа. Энэ тэгээд шударга явдал уу? Амарбаясгаланг шалгуулахаас үхтлээ айж байгаа Сайнзориг, Сандаг-Очир тэргүүтэй гишүүд хам хэрэгтнүүд гэж бид ойлгох уу? Тэд Амарбаясгаланг батлан дааж байгаа юм уу, амь биеэрээ хамгаалж, хамт хэрэг үүрэх үү? Амарбаясгаланг шалгуулахгүй байхын төлөө шалдлахаас буцахгүй байгаа тэдгээр гишүүд өнөөдөр шүүгч болчихсон уу, нэртэйгээр нь шүүхийн танхимд очиж шүлсээ үсэргээч! Тэр Сандаг-Очир гэхэд хувийн сургуульд нийгмийн ажилтнаар төгсчихөөд яаж яваад Төрийн байгуулалтын байнгын хорооны дарга болов? Энэ мэтээр өдөр хоног өнгөрөх тусам тос, усаараа ялгарна, толгой, хөлөөрөө танигдана. Тэгээд юу гээч? Нүүрсний хулгайн хэрэгт ийм ойрхон ирчихээд, хулгайчаа өмгөөлөөд байх юм бол тийм УИХ хэрэггүй. Нүүрсний хулгайтай тэмцэнэ гэж ханцуй шамлачихаад, нүүрээрээ газар харуулддаг Засгийн газар хэрэггүй, нүүрсний хулгайчдыг орогнуулаад хаацайлаад байх юм бол тийм улс төрийн нам ч хэрэггүй эээ. Нүүрсний хулгайн гэмт хэргээ илрүүлж, энэ ард түмнийхээ сэтгэл санаа, эд хөрөнгө, цалин татвар, улс дамнаж харласан амьдын хагацлын хохирлыг барагдуулж өг, чадахгүй бол УИХ энэ шалгуулахаас айгаад, хагас сар зугтаж байгаа даргатайгаа тар даа!
Эмүжин
